EKICWEKA EKY’OKWEGA 4
Ahabw’enki Nituza aha Kiijutsyo
“Mugume mukore mutyo okuunyijukiraho.”—LUK. 22:19.
EKYESHONGORO 20 Okahayo Omwana Waawe ow’Omuhendo
EBIRAAGAMBWEHO *
1-2. (a) Ni ryari obu orikubaasa kuteekateeka aha mukundwa waawe owaafiire? (b) Yesu akatandikaho mukoro ki aha kiro ky’aha muheru atakafiire?
N’OBU haakuba hahingwireho obwire omukundwa waawe afiire, nooguma noomwijuka. Eizooba obu omukundwa waawe yaafa okukira munonga nirikureetera kwijuka bingi ebirikumukwataho.
2 Buri mwaka, obuhumbi bw’abantu omu nsi yoona nibeeteerana kwijuka okufa kwa Yesu ou turikukunda munonga. (1 Pet. 1:8) Nibeeteerana kwijuka ogwo owaahaireyo amagara ge nk’ekitambo kutucungura ekibi n’okufa. (Mat. 20:28) Nangwa, Yesu akaba naayenda ngu abakuratsi be baijuke okufa kwe. Ekiro ekyahereerukireyo Yesu akaitwa, akatandikaho omukoro gw’omutaano reero yaabagira ati: “Mugume mukore mutyo okuunyijukiraho.” *—Luk. 22:19.
3. Nituza kushwijuma ki omu kicweka eki?
3 Abantu bakye ahari abo abarikwija aha mukoro gw’Ekiijutsyo nibo baine amatsiko g’okuza omu iguru. Kwonka abandi baingi abarikubaho nibaba baine amatsiko g’okutuura omu nsi. Omu kicweka eki, nituza kureeba enshonga ahabw’enki aba guruupu ezi zombi nibaba baine ekihika ky’okubaho aha mukoro gw’Ekiijutsyo buri mwaka. Nituza n’okureeba oku turikugasirwa twaza aha mukoro ogu. Ka tutandikye turikushwijuma zimwe aha nshonga ahabw’enki entoore nibaza aha Kiijutsyo.
EKIRIKUREETERA ENTOORE KUZA AHA KIIJUTSYO
4. Ahabw’enki entoore nibarya aha mugaati kandi bakanywa n’ahari viinyo aha Kiijutsyo?
4 Buri mwaka, entoore nibaza aha Kiijutsyo kandi nibarya aha mugaati banywa n’ahari viinyo. Ahabw’enki nibaba bahikire kurya aha mugaati n’okunywa ahari viinyo? Kubaasa kugarukamu ekibuuzo ekyo, teekateeka aha kyabaireho aha kiro ekyahereerukireyo Yesu akaitwa. Bwanyima y’Okuhingurwaho, Yesu akatandikaho omukoro, hati ogu turikumanya nk’Ekiijutsyo. Akarabyamu omugaati na viinyo yaabiha entumwa ze abeesigwa 11, kandi yaabagambira kuryaho n’okunywaho. Yesu akabagambira aha ndagaano ibiri, endagaano ensya n’endagaano y’Obukama. * (Luk. 22:19, 20, 28-30) Endagaano ezi zikabaasisa entumwa n’abandi bakye kwija kuba abagabe n’abanyamurwa omu iguru. (Kush. 5:10; 14:1) Entoore entsigarira, * abari omu ndagaano ezi ibiri, nibo bonka abarikubaasa kurya aha mugaati kandi bakanywa n’ahari viinyo aha Kiijutsyo.
5. Entoore baine kwijuka ki aha matsiko gaabo?
5 Hariho enshonga endiijo ahabw’enki entoore barikubaho aha mukoro gw’Ekiijutsyo: Omukoro ogu nigubahwera kuteekateeka aha matsiko gaabo. Yehova abahaire amatsiko g’omutaano, ag’okuza omu iguru bakatunga okutafa, barikuheereza hamwe na Yesu ku baraahitsye omuhendo ogwijwire 144,000, kandi nibaija kureeba Yehova Ruhanga! (1 Kor. 15:51-53; 1 Yoh. 3:2) Entoore nibamanya ngu beetsirwe kuza omu iguru kutunga emigisha egi. Kubaasa kuheebwa emigisha egi, baine kuguma bari abeesigwa kuhika aha kufa. (2 Tim. 4:7, 8) Entoore ku barikuteekateeka aha matsiko g’okuza omu iguru nikibashemeza munonga. (Tit. 2:13) Kandi shi ‘ab’entaama ezindi’? (Yoh. 10:16) Ni nshonga ki ezirikubareetera kubaho aha Kiijutsyo?
EKIRIKUREETERA AB’ENTAAMA EZINDI KUBA AHA KIIJUTSYO
6. Ahabw’enki ab’entaama ezindi barikuza aha Kiijutsyo buri mwaka?
6 Ab’entaama ezindi n’obu baraabe batarikurya nari kunywa aha bumanyiso kwonka nibaza aha Kiijutsyo nka baakareebi. Omu 1938, abo abaabaire baine amatsiko g’okutuura omu nsi bakeetwa kwija aha Kiijutsyo. Omunaara gw’Omurinzi ogwa Maaci 1, 1938, gukagira guti: “Kihikire kandi n’eky’oburyo ab’entaama ezindi kubaho aha ruteerane oru kandi bakareeba ebirikubaho. . . . Eizooba eri nabo niribareetera okushemererwa.” Nk’oku abeetsirwe aha bugyenyi bw’okugaitwa barikushemererwa, ab’entaama ezindi nabo nibashemererwa kuba aha Kiijutsyo nka baakareebi.
7. Ahabw’enki ab’entaama ezindi barikugira ekihika ky’okuhurira orubazo rw’Ekiijutsyo?
7 Ab’entaama ezindi nabo nibateekateeka aha matsiko gaabo. Nibaba bainiire ekihika orubazo rw’Ekiijutsyo, ahakuba nirushoboorora eki Kristo n’abu araategyeke nabo 144,000 barikwija kukorera abantu abeesigwa omu Butegyeki bw’Emyaka Rukumi. Ahansi y’obutegyeki bw’Omugabe waabo Yesu Kristo nibaija kuhindura ensi Paradiso, kandi bahwere abantu abeesigwa kuba abahikiriire. Ka nikishemeza obukaikuru bwa baakareebi abarikuba aha Kiijutsyo, kuteekateeka aha bunabi oburikuza kuhikiirira, nk’oburi omuri Isaaya 35:5, 6; 65:21-23; n’Okushuuruurwa 21:3, 4. Ku barikuteera akashushani bari n’abakundwa baabo abaraazookye omu nsi ensya, nikihamya amatsiko gaabo aha biro by’omumaisho, kandi nibamariirira kugumizamu nibaheereza Yehova.—Mat. 24:13; Gal. 6:9.
8. Ni nshonga ki endiijo erikureetera ab’entaama ezindi kuba aha Kiijutsyo?
8 Teekateeka aha nshonga endiijo erikureetera ab’entaama ezindi kuba aha Kiijutsyo. Nibenda kworeka ngu nibakunda entoore kandi nibabashagika. Ekigambo kya Ruhanga kikagamba aha kukwatanisa okwabaire nikwija kubaho aha gati y’entoore n’abaine amatsiko g’okutuura omu nsi. Mu muringo ki? Ka tureebe eby’okureeberaho bikye.
9. Kurugiirira aha bunabi oburi omu Zekaria 8:23 ab’entaama ezindi nibatwara bata entoore?
9 Shoma Zekaria 8:23. Obunabi obu nibutuhwera kwetegyereza gye oku ab’entaama ezindi barikureeba ab’eishe-emwe na banyaanyazi-itwe entoore. Ebigambo “Omuyudaaya” na “naimwe” byombi nibimanyisa entoore entsigarira. (Rom. 2:28, 29) “Abantu ikumi abarikuruga omu mahanga aga buri rurimi” nibajwekyera ab’entaama ezindi. ‘Nibakwata omukugiro’ gw’entoore, barikubeegaitaho omu kuramya okushemeire. N’ahabw’ekyo, omu mwabazyo aha izooba ry’Ekiijutsyo, ab’entaama ezindi nibooreka ngu baine omukago guhami n’entoore barikuba aha mukoro ogu.
10. Yehova akozire ki kuhikiiriza obunabi oburi omu Ezekieli 37:15-19, 24, 25?
10 Shoma Ezekieli 37:15-19, 24, 25. Omu kuhikiiriza obunabi obu, Yehova arundaine entoore n’ab’entaama ezindi baagira obumwe. Obunabi nibugamba aha nkoni ibiri. Abaine amatsiko g’okuza omu iguru nibagyeragyeranisibwa n’enkoni ‘ya Yuda’ (oruganda orwabaire nirukomookamu abagabe ba Israeli), kandi abaine amatsiko g’okutuura omu nsi n’enkoni “ya Efuraimu.” * Yehova akaba naija kugaita aba guruupu ezi ibiri kuba “enkoni emwe.” Eki nikimanyisa ngu nibaheereza bakwataniise barikwebemberwa Omugabe waabo omwe, Kristo Yesu. Buri mwaka, entoore n’ab’entaama ezindi tibarikwija aha Kiijutsyo, buri guruupu okwayo kureka “nk’obusyo bumwe” barikwebemberwa “omuriisa omwe.”—Yoh. 10:16.
11. Ab’entaama ezindi nibashagika bata beene Ishe Kristo nk’oku kiri omu Matayo 25:31-36, 40?
11 Shoma Matayo 25:31-36, 40. “Entaama” omu ky’okureeberaho eki nibajwekyera abarikukora ebihikire omu biro ebi by’emperu abaine amatsiko g’okutuura omu nsi, kandi nibeetwa ab’entaama ezindi. Nibashagika entoore entsigarira omu bwesigwa barikubahwera kuhikiiriza omurimo muhango ogw’okubuurira n’okuhindura abantu abeegi omu nsi yoona.—Mat. 24:14; 28:19, 20.
12-13. Ni mu miringo ki endiijo ei ab’entaama ezindi barikworeka ngu nibashagika beene Ishe Kristo?
12 Buri mwaka Ekiijutsyo kiri haihi kubaho, ab’entaama ezindi nibashagika beene Ishe Kristo barikwejumba omu hururu y’okweta abantu kwija aha Kiijutsyo. (Reeba akabokusi “ Nooyetebeekanisiza Kare Obwire bw’Ekiijutsyo?”) Kandi nibakora entebeekanisa zoona kuhamya ngu Ekiijutsyo kyabaho omu buri kibiina omu nsi yoona, n’obu ebibiina ebimwe byakuba bitaine abarikurya kandi bakanywa aha bumanyiso bw’Ekiijutsyo. Ab’entaama ezindi nibashemererwa kushagika beene Ishe Kristo omu miringo nk’egi. Nibamanya ngu ebi barikukora kushagika entoore, Yesu naabireeba nk’ebi baakorera we wenyini.—Mat. 25:37-40.
13 Ahabw’enki twena nituza aha mukoro gw’Ekiijutsyo, oyihireho amatsiko agu twine?
ENSHONGA AHABW’ENKI TWENA NITUZA AHA KIIJUTSYO
14. Yehova na Yesu boorekire bata ngu batwiniire rukundo mpango munonga?
14 Nitusiima Yehova na Yesu ahabw’okutukunda. Yehova ayorekire ngu naatukunda omu miringo mingi, kwonka hariho gumwe ogurikukirayo. Akatugirira rukundo etarimu kweyendeza arikwohereza Omwana we omukundwa kubonabona kandi akafa ahabwaitu. (Yoh. 3:16) Nitwetegyereza ngu Yesu nawe akatugirira rukundo arikuhayo amagara ge ayekundiire ahabwaitu. (Yoh. 15:13) Titurikubaasa kushashura Yehova na Yesu ahabwa rukundo ei baatugiriire. Kwonka nitubaasa kworeka okusiima kwaitu kurugiirira aha ku turikutwaza buri izooba. (Kol. 3:15) Kandi nituza aha Kiijutsyo kusiima rukundo mpango ei baatugiriire n’okworeka ngu naitwe nitubakunda.
15. Ahabw’enki entoore n’ab’entaama ezindi barikutwara ekitambo nk’eky’omuhendo?
15 Nitutwara ekitambo nk’ekiconco ky’omuhendo munonga. (Mat. 20:28) Entoore nibatwara ekitambo nk’eky’omuhendo ahakuba nikibabaasisa kugira amatsiko. Ahabw’okwikiririza omu kitambo, Yehova naabatwara nk’abahikiriire kandi abaana be. (Rom. 5:1; 8:15-17, 23) Ab’entaama ezindi n’abo nibasiima ekitambo. Ahabw’okwikiririza omu shagama ya Kristo eyasheshekire, baine omuntu w’omunda otarikubashinja omu maisho ga Ruhanga, kandi nibabaasa kuheereza gye baine amatsiko g’okuhonokaho aha “ kubonabona kwingi.” (Kush. 7:13-15) Omuringo gumwe ogu entoore n’ab’entaama ezindi barikworeka ngu nibasiima ekitambo n’okuba aha Kiijutsyo buri mwaka.
16. Ni nshonga ki endiijo erikutureetera kuba aha Kiijutsyo?
16 Enshonga endiijo erikutureetera kuza aha Kiijutsyo n’okworobera Yesu. Yaaba twine amatsiko g’okuza omu iguru nari kutuura omu nsi, buri omwe ahariitwe naaba naayenda kworobera ekiragiro eki Yesu yaahaire obu yaatandikaho Ekiijutsyo, akagira ati: “Mugume mukore muti okuunyijukiraho.”—1 Kor. 11:23, 24.
OKU TWENA TURIKUGASIRWA OMU KUBA AHA KIIJUTSYO
17. Ekiijutsyo nikituhwera kita kwirira haihi Yehova?
17 Nitwirira haihi Yehova. (Yak. 4:8) Nk’oku twaheza kwega, Ekiijutsyo nikituhwera kutunga omugisha gw’okuteekateeka aha matsiko agu Yehova atuhaire na rukundo ei yaatugiriire. (Yer. 29:11; 1 Yoh. 4:8-10) Twateekateeka aha matsiko gaitu aga nyentsya, nikituhwera kwongyera kukunda Yehova n’okuhamya omukago gwaitu nawe.—Rom. 8:38, 39.
18. Okuteekateeka aha ky’okureeberaho kya Yesu nikituhiga kukora ki?
18 Nituhigwa kutooreza Yesu. (1 Pet. 2:21) Harikuburayo ebiro bikye Ekiijutsyo kikabaho, nitukira kushoma aha saabiiti y’aha muheru Yesu akiri omu nsi, okufa kwe, n’okuzooka kwe. Reero omu mwabazyo aha izooba ry’Ekiijutsyo, orubazo orurikuheebwa nirutwijutsya rukundo ei Yesu yaatugiriire. (Efe. 5:2; 1 Yoh. 3:16) Twashoma kandi tukateekateeka ahari rukundo y’okwefeerereza ei Yesu yaatugiriire, nikituhiga “kutwaza nka we oku yaabaire atwaza.”—1 Yoh. 2:6.
19. Nitubaasa kuguma tuta omuri rukundo ya Ruhanga?
19 Nitumariirira kuguma omuri rukundo ya Ruhanga. (Yud. 20, 21) Nituguma omuri rukundo ya Ruhanga turikukora kyona ekirikubaasika kumworobera, turikweza eiziina rye, kandi turikushemeza omutima gwe. (Enf. 27:11; Mat. 6:9; 1 Yoh. 5:3) Okubaho aha mukoro gw’Ekiijutsyo nikituhiga kumariirira kworobera Yehova buri izooba, reero tuba nk’abarikumugira tuti: ‘Niinyenda kuguma omuri rukundo yaawe ebiro byona!’
20. Twine nshonga ki nungi ezirikutureetera kubaho aha Kiijutsyo?
20 Yaaba amatsiko gaitu n’okuza omu iguru nari kutuura omu nsi ebiro byona, twine enshonga nungi ezirikutureetera kuba aha Kiijutsyo. Buri mwaka ku turikuteeranira hamwe aha izooba eryo, nituba nitwijuka okufa kwa Yesu Kristo ou turikukunda munonga. Okukira byona, nituba nitwijuka rukundo mpango ei Yehova yaatugiriire arikuhayo Omwana we nk’ekitambo. Omwaka ogu, Ekiijutsyo nikiija kubaho omu mwabazyo Orwakataano, Okwakana 15, 2022. Ahabw’okugira ngu nitukunda Yehova n’Omwana we, tihaine ekishemereire kuturemesa kuba aha Kiijutsyo, omukoro ogurikukirayo obukuru.
EKYESHONGORO 16 Himbisa Ya Ahakuba Atooraine Omwana We
^ kacw. 5 Yaaba twine amatsiko g’okuza omu iguru nari kutuura omu nsi, nituba twine ekihika ky’okuza aha Kiijutsyo buri mwaka. Ekicweka eki nikiza kworeka enshonga ahabw’enki nituza aha Kiijutsyo n’oku turikugasirwa twakikora.
^ kacw. 2 Ebigambo ebyo bivunuurwe nka “Mukore muti okuunyijukiraho” (Today’s English Version) na “Mukore eki nk’ekiijutsyo kyangye” (The Jerusalem Bible).
^ kacw. 4 Kumanya ebirikukiraho aha ndagaano ensya n’endagaano y’Obukama, reeba ekicweka “Nimwija Kuba Obukama bw’Abanyamurwa” omu Omunaara gw’Omurinzi ogwa Okitoba 15, 2014, rup. 15-17.
^ kacw. 4 EBISHOBOOROIRWE: Ebigambo entoore entsigarira nibimanyisa Abakristaayo abashukirweho omwoyo ogurikwera abakiriho hati.
^ kacw. 10 Kumanya ebindi ebirikukiraho aha bunabi bw’enkoni ibiri oburi omu Ezekieli eshuura 37, reeba omu kitabo Pure Worship of Jehovah—Restored At Last!, rup. 130-135, kacw. 3-17.
