1-3. Ni bintu ki ebimwe ebirikubaasa kureetera Abajurizi ba Yehova kurira?

NI RYARI obu ohereeruka kurira? Obumwe niturira ahabw’okushemererwa. Kwonka nitukira kurira ahabw’obusaasi bw’omu mutima. Nk’eky’okureeberaho, nitubaasa kurira twafeerwa omukundwa. Lorilei, munyaanyazi-itwe omuri United States, akahandiika ati: “Obumwe obusaasi bw’okufeerwa muhara wangye bukaba nibuba obw’amaani oshusha ngu tihariho ekirikubaasa kundeetera obuhuumure. Omu bwire obwo, nkaba nyebuuza yaaba hariho ekirikubaasa kutambira omutima gwangye oguhendekire.” *

² Nitubaasa kurira ahabw’enshonga ezindi. Hiromi, payoniya omuri Japan, akagira ati: “Hati ekirikummaramu amaani n’okugira ngu abantu abu ndikushanga omu buheereza tibarikwefeerayo. Obumwe nincura amarira gataratambwa omu maisho, ninshaba Yehova kumpwera kutunga omuntu orikusherura amazima.”

³ Naiwe obumwe nooyehurira otyo? Baingi ahariitwe nikwo turikwehurira tutyo. (1 Pet. 5:9) Nitwenda ‘kuheereza [Yehova] tushemereirwe,’ kwonka nitubaasa kuba nitumuheereza turikurira twine n’enaku, tutamirwe, nari twine amaganya agarikutureetera kugumirwa kuhamira ahari Ruhanga. (Zab. 6:6; 100:2) Nitubaasa kukora ki twaba nitwehurira tutyo?

4. Nituza kugamba ahari ki omu kicweka eki?

⁴ Nitubaasa kwegyera ahari Yesu. Obumwe, nawe akaba naagira enyehurira z’amaani zimureetera ‘kurira.’ (Yoh. 11:35; Luk. 19:41; 22:44; Heb. 5:7) Ka tureebe obu Yesu yaarira. Kandi nituza n’okureeba amashomo agu turikwegyera aha kurira kwe. Nituza n’okureeba emiringo ei turikubaasa kwemeramu ebirikutureetera kurira.

5. Ebiri omuri Yohaana 11:32-36 nibitwegyesa ki ahari Yesu?

⁵ Omu mwaka gwa 32 Y.A.K., Laazaaro munywani wa Yesu akarwara kandi yaafa. (Yoh. 11:3, 14) Laazaaro akaba aine banyaanya babiri, Mariamu na Mariza, kandi Yesu akaba naabakunda munonga. Abakazi abo bakaba baine enaku nyingi ahabw’okufeerwa munyaanyabo. Bwanyima ya Laazaaro kufa, Yesu akaza omuri Besania, ahu Mariamu na Mariza baabaire nibatuura. Mariza ku yaahuriire ngu Yesu ariyo naija, akairuka yaashohora kumubugana. Teebereza enaku ei yaabaire aine obu yaagira ati: “Mukama wangye, kuri obaire ori aha, munyaanyazi takufiire.” (Yoh. 11:21) Bwanyima Yesu ku yaareebire Mariamu n’abandi nibarira, nawe “yaarira.”—Shoma Yohaana 11:32-36.

6. Ahabw’enki Yesu yaarizire aha izooba eryo?

⁶ Ahabw’enki Yesu yaarizire aha izooba eryo? Ekitabo Insight on the Scriptures nikigarukamu kiti: “Okufa kwa munywani we Laazaaro n’obusaasi bwa banyaanya ba Laazaaro obw’okufeerwa bikareetera Yesu ‘kutsinda omu mutima gwe, n’okurira.’” * Yesu naabaasa kuba yaabaire naateekateeka aha busaasi obu munywani we Laazaaro yaagizire obu yaabaire arwaire, n’oku yaabaire naayehurira obu yaabaire ari haihi kufa. Kandi Yesu akarira ahabw’okureeba oku Mariamu na Mariza baakwatsirweho okufa kwa munyaanyabo. Ku oraabe oraafeereirweho omunywani nari omunyabuzaare, hatariho kubangaanisa nooyetegyereza gye enyehurira ezo. Yetegyereze amashomo ashatu agu orikubaasa kwegyera aha kurira kwa Yesu.

7. Yesu okurizibwa banywani be nikitwegyesa ki ahari Yehova?

⁷ Yehova naayetegyereza oku orikwehurira. Yesu naajwekyera gye Ishe. (Heb. 1:3) Okurira kwa Yesu, nikworeka gye enyehurira za Ishe. (Yoh. 14:9) Ku oraabe oine obusaasi bw’okufeerwa omukundwa, gira obuhame ngu Yehova naareeba obusaasi bwawe, kandi naakwatwaho munonga. Naayenda kukiza  omutima gwawe oguhendekire.—Zab. 34:18; 147:3.

8. Ahabw’enki turikubaasa kugira obuhame ngu Yesu naija kuzoora abakundwa baitu abaafiire?

⁸ Yesu naayenda kuzoora abakundwa baawe. Omwanya mukye Yesu atakarizire, akahamiza Mariza ati: “Munyaanyoko naija kuzooka.” Mariza akaikiriza eki Yesu yaagambire. (Yoh. 11:23-27) Mariza ahabw’okuba omuheereza wa Yehova omwesigwa, buzima akaba naamanya ngu ebyasha bingi enyima Eliya na Elisa bakazoora abafu. (1 Bag. 17:17-24; 2 Bag. 4:32-37) Kandi naabaasa kuba yaahuriireho abantu abu Yesu yaabaire yaazoire. (Luk. 7:11-15; 8:41, 42, 49-56) Naiwe noobaasa kugira obuhame ngu noija kugaruka kureeba abakundwa baawe abaafiire. Yesu okurira arikuhuumuriza abarikuganya, n’obuhame ngu okuzoora abaafiire kumuri aha mutima munonga!

9. Nka Yesu, noobaasa kushagika ota abarikuganya? Ha eky’okureeberaho.

⁹ Noobaasa kushagika abarikuganya. Yesu tararizire na Mariza na Mariamu kyonka, beitu akagaaniira nabo kandi yaabaha amatsiko. Naitwe nitubaasa kuhwera tutyo abarikuganya. Dan, omureeberezi omuri Australia, naagira ati: “Bwanyima y’okufeerwa omukazi wangye, nkaba niinyenda obushagiki. Ab’eishe-emwe baingi n’abakazi baabo bakaba baija ekiro n’eizooba kumpurikiza kyonka. Bakaba nibanyikiriza kuganya, kandi bakaba batarikuhemuka ahabw’okurira kwangye. Kandi bakaba nibampwera aha mirimo, nk’okwozya emotoka yangye, okugura ebintu, n’okuteeka na munonga ku naabaire mpurira ntarikubaasa kubikora. Kandi bakaba nibakira kushaba naanye. Bakooreka ngu n’abanywani kandi ab’eishe-emwe ‘abaazaariirwe okuhwera omu bihikiirizi.’”—Enf. 17:17.

10. Ebiri omuri Luka 19:36-40, nibishoboorora ahari ki.

¹⁰ Yesu akahika omuri Yerusaalemu ahari Nisani 9, 33 Y.A.K. Ku yaahikire omu rurembo, abantu bakeerundaana baayara emyenda omu nguuto omu maisho ge kworeka ngu n’Omugabe waabo. Buzima eryo rikaba riri eizooba ririkushemeza. (Shoma Luka 19:36-40.) N’ahabw’ekyo abeegi be nibabaasa kuba baabaire batarikuteekateeka aha kyakuratsireho. Yesu “ku yairiire haihi, yaareeba orurembo, yaaruririra.” Yesu arikurira akagamba akagwe akaabaire nikaija kugwera abatuuzi b’omuri Yerusaalemu.—Luk. 19:41-44.

11. Ahabw’enki Yesu yaariziibwe abatuuzi ba Yerusaalemu?

¹¹ Yesu akagira obusaasi omu mutima ahabw’okuba akaba naamanya ngu n’obu baraabe baamwakiira gye, abantu b’eihanga rye okutwarira hamwe bakaba baayorekire ngu tibarikusiima obutumwa bw’Obukama. N’ekyarugiremu, Yerusaalemu ekaba neija kucwekyerezibwa, kandi Omuyudaaya weena owaabaire naija kuhonokaho, akaba naija kutwarwa omu bukwatwa. (Luk. 21:20-24) Eky’obusaasi, nk’oku Yesu yaagambire, abantu baingi bakamwanga. Abantu abarikukira obwingi nibatwara bata obutumwa bw’Obukama ei orikutuura? Bakye ku baraabe nibo barikusiima amazima, noobaasa kwegyera aha kurira kwa Yesu? Yetegyereze agandi amashomo ashatu.

12. Yesu okurira ahabwa bataahi be nikitwegyesa ki ahari Yehova?

¹² Yehova naafayo aha bantu. Okurira kwa Yesu nikutwegyesa ngu Yehova naafayo munonga aha bantu. ‘Tarikwenda muntu weena kuhwerekyerera, kureka naayenda ngu boona bahikye aha kweteisa.’ (2 Pet. 3:9) Obunaku obu nitworeka ngu nitukunda bataahi baitu turikugumisiriza omu kuteeraho kwaitu kuhika  abantu aha mutima, turikubabuurira amakuru marungi.—Mat. 22:39. *

13-14. Yesu akooreka ata ngu naasaasibwa abantu, kandi nitubaasa kugira tuta omutwarize ogwo?

¹³ Yesu akabuurira n’obweziriki. Akooreka ngu naakunda abantu arikugumizamu kubeegyesa buri kutunga omugisha. (Luk. 19:47, 48) Niki ekyamuhigire kukora atyo? Akaba naasaasibwa abantu. Obumwe, abantu baingi bakaba baba nibenda kuhurira ebigambo bye, reero we n’abeegi be kibareetera kuburwa n’obwire ‘bw’okurya.’ (Mak. 3:20) Nangwa akaikiriza n’okwegyesa nyekiro, obwire obwabaire nibubaasikira omwe aha bahurikiza be. (Yoh. 3:1, 2) Baingi abaabandize kuhurikiza Yesu tibarahindukire beegi be. Kwonka boona abamuhurikiize, bakatunga obujurizi buhikire. Hati nitwenda kuha buri omwe omugisha gw’okuhurira amakuru marungi. (Byak. 10:42) Kubaasa kuhikiiriza eki, nikibaasa kutwetengyesa kuhindura omu ku turikubuurira.

¹⁴ Ba oyeteekateekire kukora empinduka. Twaba tutahindwire omu bwire obu turikwejumba omu buheereza, nitubaasa kutahika ahari abo abarikusiima amakuru marungi. Payoniya orikwetwa Matilda naagira ati: “Nyowe na ibanyi nituteeraho kuza kubuurira abantu omu bwire butarikushushana. Omu kasheeshe kare munonga, nitubuurira omu myanya y’eby’obushuubuzi. Shaaha mukaaga z’eihangwe obu abantu barikuba nibarabarabamu, nitubuurira omu rweteeraine turikukoresa akagaari. Bwanyima y’ekyo, nituza omu maka g’abantu kandi nitushangayo baingi.” Omu mwanya gw’okuhamira aha ntebeekanisa erikutworobera, twine kuba tweteekateekire kuza kubuurira obu abantu barikubaasa kushangwayo. Twakora tuti, nitubaasa kuhamya ngu Yehova naija kushemererwa.

15. Ekiro ky’aha muheru Yesu akiri omu nsi, hakabaho ki nk’oku kirikworekwa omuri Luka 22:39-44?

¹⁵ Omu mwabazyo gwa Nisani 14, 33 Y.A.K., Yesu akaza omu musiri gwa Gesesemaani. Omu musiri ogwo, akashaba arikugambira  Yehova ekimuri aha mutima. (Shoma Luka 22:39-44.) Omu bwire bugumire obwo nibwo Yesu ‘yaashaba akeeshengyereza munonga naarira.’ (Heb. 5:7) Yesu akashaba ki omu kiro ekyo eky’aha muheru arikuza kufa? Akashaba kutunga amaani g’okuguma ahamiire ahari Yehova, kandi arikukora ebi arikukunda. Yehova akahurira okushaba kw’Omwana we okw’obusaasi, reero yaayohereza maraika kumugumya.

16. Ahabw’enki Yesu yaabaire aine amaganya obu yaabaire naashaba omu musiri gwa Gesesemaani?

¹⁶ Hatariho kubangaanisa, Yesu akarira obu yaabaire naashaba omu musiri gwa Gesesemaani ahabw’amaganya g’okumureeba nk’omurogotsi. Kandi akaba naamanya n’obujunaanizibwa bw’amaani obu yaabaire aine obw’okujuririra eiziina rya Ishe. Waaba oine embeera erikukureetera kuganya, kandi erikugyeza okuhamira kwawe ahari Yehova, noobaasa kwegyera ki aha kurira kwa Yesu? Yetegyereze amashomo ashatu.

17. Yehova okugarukamu okushaba kwa Yesu nitukyegyeraho ki?

¹⁷ Yehova naahurira okweshengyereza kwawe. Yehova akahurira okweshengyereza kwa Yesu. Ahabw’enki? N’ahabw’okugira ngu akaba ataire munonga omutima aha kuguma ahamiire ahari Ishe n’okujuririra eiziina rye. Ekigyendererwa kyaitu ekikuru kyaba kiri okuguma tuhamiire ahari Yehova n’okujuririra eiziina rye, twamushaba obuhwezi naija kugarukamu okushaba kwaitu.—Zab. 145:18, 19.

18. Ni mu muringo ki ogu Yesu ari nk’omunywani omunyambabazi?

¹⁸ Yesu naayetegyereza oku orikwehurira. Twaba twerarikiriire, ka nikitushemeza kuhuumurizibwa omunywani omunyambabazi, na munonga oragyeziibweho nkaitwe! Yesu niwe munywani nk’ogwo. Naamanya eki kirikumanyisa okwehurira kubi n’okwenda obuhwezi. Naayetegyereza obuhangwa bwaitu, kandi naija kuhamya ngu twatunga obushagiki oburikwetengyesa omu bwire obuhikire. (Heb. 4:15, 16) Nk’oku Yesu yaikiriize obuhwezi bwa maraika omu musiri Gesesemaani, naitwe twine kuba tweteekateekire kwikiriza obuhwezi obu Yehova arikutuha, yaaba buri omu kitabo, vidiyo, orubazo, nari okugumibwa omureeberezi, nari omunywani okuzire omu by’omwoyo.

19. Niki ekirikubaasa kukugumya waaba noogyezibwa kutahamira ahari Ruhanga? Ha eky’okureeberaho.

 ¹⁹ Noija kutunga “obusingye bwa Ruhanga.” Yehova naija kukugumya ata? Twashaba, nitwija kutunga “obusingye bwa Ruhanga oburengire okwetegyereza kw’omuntu weena.” (Fil. 4:6, 7) Obusingye obu Yehova arikutuha nibwikaikanisa emitima yaitu butebeekanisa n’ebiteekateeko byaitu. Eki nikyo kyahikire ahari munyaanyazi-itwe Luz. Naagira ati: “Ninkira kuteganisibwa okugira eihamba. Obumwe enyehurira ezo, nizindeetera kuteekateeka ngu Yehova tarikunkunda. Kwonka ekyo ku kirikubaho, ahonaaho niingambira Yehova oku ndikwehurira. Okushaba nikumpwera kutegyeka enyehurira zangye.” Nk’oku eky’okureeberaho kye kirikworeka, nitubaasa kutunga obusingye kurabira omu kushaba.

20. Okurira kwa Yesu twakwegyeraho mashomo ki?

²⁰ Okurira kwa Yesu ka twakwegyeraho amashomo g’omugasho kandi agarikuhuumuriza! Twaijukibwa ngu twine kugumya banywani baitu abarikuganya, kandi twesigye Yehova na Yesu ngu nibaija kutushagika twafeerwa abakundwa. Twahigwa kubuurira n’okwegyesa omu muringo gw’embabazi ahabw’okugira ngu Yehova Ruhanga na Yesu Kristo baine omutwarize murungi ogu. Kandi nikituhuumuriza ahabw’okumanya ngu Yehova n’Omwana we omukundwa nibeetegyereza oku turikwehurira, n’obweremwa bwaitu, kandi nibenda kutuhwera kugumisiriza. Ka tugumizemu nitugyendera aha bi twayega kuhitsya obu Yehova araahikiirize okuraganisa kwe okurikushemeza, okw’okuragaza “amarira goona aha maisho” gaitu!—Kush. 21:4.