1. Nitubaasa kumara tuta obwire turi na Yehova?

NITUKIRA kumara obwire n’abantu abu turikukunda. Omushaija n’omukazi we abaine obushwere burungi nibakunda kumara obwire hamwe omu mwabazyo ogucureire. Eminyeeto nibakunda kuba bari na banywani baabo. Kandi twena nitukunda kumara obwire n’ab’eishe-emwe bagyenzi baitu. Kandi okukira byona, nitukunda kumara obwire turi na Ruhanga waitu. Eki nitukikora turikushaba, turikushoma Ekigambo kye, kandi turikuteekateeka aha kigyendererwa kye n’emitwarize ye mirungi. Obwire obu turikumara turi na Yehova buzima n’obw’omuhendo!—Zab. 139:17.

2. Nitugumirwa kukora ki?

² N’obu turaabe nitukunda kumara obwire turi na Yehova, kwonka ti kyorobi. Ahabw’okugira bingi by’okukora, nikitugumira kutunga obwire bw’okuramya Yehova. Emirimo y’okwebaisaho, obujunaanizibwa bw’eka, n’ebindi bingi nibibaasa kututwarira obwire bwingi kitureetere kwereeba nk’abataine bwire bw’okushaba, kweyegyesa, nari obw’okuteekateeka.

3. Niki ekindi ekirikubaasa kutwara obwire bwaitu?

³ Hariho ekindi ekirikubaasa kutwara obwire bwaitu. Twaba tutegyendesereize, nitubaasa kwikiriza ebindi n’obu biraabe bitagwire kutwara obwire obu twakubaire nitukoresa kwirira haihi Yehova. Nk’eky’okureeberaho, teekateeka aha by’okweshemeza. Ti kigwire kweshemeza obumwe n’obumwe.  Kwonka eby’okweshemeza n’obu byakuba biri birungi nibibaasa kutuubya aha bwire bwaitu obw’okwejumba omu by’omwoyo. Twine kuta eby’okweshemeza omu mwanya gwabyo.—Enf. 25:27; 1 Tim. 4:8.

4. Hati nituza kushwijuma ki?

⁴ Omu kicweka eki, nituza kushwijuma ahabw’enki twine kwebembeza ebikuru. Kandi nituza n’okureeba oku turikubaasa kukoresa gye obwire bwaitu obu turikuba turi na Yehova, n’oku turikugasirwa twakikora.

5. Okushwijuma obuhabuzi oburi omu Abaefeso 5:15-17 nikibaasa kuhwera kita omunyeeto kukora ebirikugasha?

⁵ Cwamu kukora ebirikugasha. Eminyeeto nibakira kwerarikirira aha kukoresa gye obwire bwabo. Kwonka, abashomesa n’abanyabuzaare abatari mu mazima nibabahiga kutunga obwegyese obw’ahaiguru barikwetebeekanisiza okugira omurimo gw’ekitiinisa omu nsi. Orugyendo oru nirubaasa kubatwarira obwire bwabo bwingi. Beitu, abazaire n’abanywani omu kibiina nibahiga eminyeeto kukoresa obwire bwabo kuheereza Yehova. Niki ekirikubaasa kuhwera omunyeeto orikukunda Yehova kucwamu gye? Naabaasa kugasirwa yaashoma Abaefeso 5:15-17, kandi akateekateeka aha bi yaashoma. (Kishome.) Bwanyima y’okushoma emishororongo egi, omunyeeto ogwo naabaasa kwebuuza ati: ‘Eki [Yehova] arikwenda niki?’ Ni kucwamu ki okurikumushemeza? Ni kucwamu ki okuraambasise kukoresa gye obwire bwangye?’ Ijuka ngu, “ebiro ebi ni bibi,” kandi entebeekanisa y’ensi egi erikwebemberwa Sitaane eri haihi kuhendera. Kikaabaire eky’obwengye kukoresa gye obwire bwaitu kukora ebirikutureetera kusiimwa Yehova.

6. Mary akacwamu ki, kandi ahabw’enki okucwamu kwe kwabaire kuri okw’obwengye?

⁶ Yebeembeze ebirikukira obukuru. Obumwe, okukoresa gye obwire bwaitu, nikitwariramu okucwamu kukora ekintu kimwe ahari bibiri n’obu byombi byakuba bitagwire. Eki nitukireebera aha byabaireho obu Yesu yaataayaayira Mariamu na Mariza. Hatariho kubangaanisa Mariza akashemererwa kutaayaayisa Yesu, yaatandika kutebeekanisa ekiihuro kihango. Kwonka, Mariamu we akacwamu kushutama haihi na Mukama we kuhurikiza ebi arikwegyesa. N’obu Mariza araabe yaabaire aine ekigyendererwa kirungi, Mariamu we ‘akatoorana omugabo murungi.’ (Luk. 10:38-42.) Bwanyima, Mariamu naabaasa kuba yaabaire atarikwijuka ebyagabwirwe izooba eryo, kwonka nitubaasa kuhamya ngu tareebirwe ebi Yesu yaayegyeise. Nk’oku Mariamu yaakoreise gye obwire bukye obwo kuba na Yesu, naitwe nitusiima munonga obwire obu turikuba turi na Yehova. Nitubaasa kukoresa gye tuta obwire obwo?

7. Ahabw’enki twine kutunga obwire bw’okushaba, kweyegyesa n’okuteekateeka?

⁷ Oine kumanya ngu okushaba, okweyegyesa n’okuteekateeka biine akakwate n’okuramya kwaitu. Twaba nitushaba, nituba nituhurizana na Tataitwe ow’omu iguru, orikutukunda munonga. (Zab. 5:7) Twaba nitweyegyesa Baibuli, nituba ‘nitumanya Ruhanga’ obukomooko bw’obwengye bwona. (Enf. 2:1-5) Okuteekateeka, nikutuhwera kushwijuma emitwarize ya Yehova erikushemeza n’okukorera aha kigyendererwa eki atwiniire. Noobaasa kuteekateeka aha muringo ogu orikubaasa kukoresamu gye obwire bwawe? Kwonka niki ekirikubaasa kutuhwera kukora ekyo?

8. Nitubaasa kwegyera ki aha ku Yesu yaakoreise obwire bwe ari omu ihamba?

 ⁸ Kyaba nikibaasika, za omu mwanya ogucureire. Teekateeka aha ky’okureeberaho kya Yesu. Yesu atakatandikire obuheereza bwe omu nsi, akabanza yaamara ebiro 40 omu ihamba. (Luk. 4:1, 2) Omu mwanya ogwo ogucureire akaba naabaasa kushaba Yehova n’okuteekateeka aha kigyendererwa eki Ishe amwiniire. Eki kikahwera Yesu kwetebeekanisiza okugyezibwa okwabaire kuri haihi kumuhikaho. Eky’okureeberaho kya Yesu nikibaasa kukugasira kita? Waaba nootuura omu ka erimu abantu baingi, nikibaasa kukugumira kutunga omwanya gucureire. Omu mbeera egyo, noobaasa kucwamu kuza aheeru. Ekyo nikyo Julie arikukora yaaba naayenda kumara obwire arikushaba Yehova. We na iba ahu barikutuura omuri France, nikibagumira kuba bonka omu omwanya ogwehereire. “N’ahabw’ekyo nituza omu mwanya gw’okuhuumuriramu buri izooba,” nikwo Julie arikugira. “Naaba ndi okwo nyenka, nimbaasa kutaho omutima, reero buzima ngambe na Yehova.”

9. N’obu Yesu araabe yaabaire aine bingi by’okukora, akooreka ata ngu naatwara omukago gwe na Yehova nk’ogw’omuhendo?

⁹ Yesu akaba ari omwecurengi aine bingi by’okukora. Arikuheereza omu nsi, akaba naaza omu myanya etari emwe n’emwe akuratiirwe enkuyanja y’abantu, abaabaire nibenda kuba nawe. Eizooba rimwe, ‘abantu boona ab’omu tauni bakaba beeteeraniire omu irembo’ kumureeba. Kwonka nabwo, akagira obwire bw’okuhamya omukago gwe na Yehova. Omu kasheeshe kare munonga, akaza omu “mwanya gwekiikire” yaamara obwire ari na Ishe.—Mak. 1:32-35.

10-11. Kurugiirira ahari Matayo 26:40, 41, omu musiri Gesesemaani Yesu akahabura abeegi be kukora ki, kwonka hakabaho ki?

¹⁰ Omu kiro ekyahereerukireyo Yesu atakafiire, kandi arikuhendera obuheereza bwe, akagaruka yaaza omu mwanya ogwehereire kuteekateeka n’okushaba. Akaza omu musiri Gesesemaani. (Mat. 26:36) Omu bwire obwo, Yesu akahabura abeegi be aha bikwatiraine n’okushaba.

¹¹ Yeetegyereze ekyabaireho. Bakahika omu musiri Gesesemaani kikyererezi, obundi nyekiro munonga. Yesu akahiga entumwa ze ‘kuguma nibareeba,’ reero yaaza kushaba. (Mat. 26:37-39) Kwonka ku yaabaire agiire kushaba, bakagwejegyera. Ku yaabashangire bagwejegyeire, akagaruka yaabahiga ‘kuguma nibareeba kandi nibashaba.’ (Shoma Matayo 26:40, 41.) Akeetegyereza ngu bakaba baine amaganya kandi baruhire. Yesu omu muringo gw’embabazi akeetegyereza ngu “omubiri n’omweremwa.” Kwonka  nabwo, akagarukayo emirundi ebiri kushaba, ku yaagarukire yaashanga abeegi be bagwejegyeire omu mwanya gw’okushaba.—Mat. 26:42-45.

12. Nitubaasa kukora ki kushaba obumwe twaba nituhurira twine amaganya nari turuhire kubaasa kushaba?

¹² Cwamu kushaba omu bwire burungi. Obumwe nitubaasa kuhurira twine amaganya nari turuhire ekirenga tutaine gashaba. Ekyo ku kiraabe kirakuhikireho, tori wenka. Noobaasa kukora ki? Abamwe abaabaire bamanyiriire kushaba Yehova barikuza kubyama, bashangire ngu nikigasha kukikora kareho omu mwabazyo obu barikuba bataruhire munonga. Abandi beetegyereize ngu omuringo ogu barikwecureezamu baaba nibashaba nigubahwera. Kandi shi waaba oyerarikiriire nari otaine muhimbo gw’okushaba? Gambira Yehova oku orikwehurira. Noobaasa kugira obwesigye ngu Tataitwe omunyambabazi naija kukwetegyereza.—Zab. 139:4.

13. Ebyoma byaitu nibibaasa kutuhuzya bita twaba turi na Yehova?

¹³ Yetantare ebirikuhuzya waaba nooyeyegyesa. Okushaba tigwo muringo gwonka gw’okuhamya omukago gwaitu na Yehova. Okweyegyesa Ekigambo kya Ruhanga n’okuza omu nteerane z’ekibiina nabyo nibituhwera kwirira haihi Ruhanga. Haine eki orikubaasa kukora kukuhwera kukoresa gye obwire bw’okweyegyesa n’obu orikuba ori omu nteerane z’ekibiina? Yebuuze oti: ‘Niki ekirikukira kumpuzya naaba ndi omu nteerane nari ndikweyegyesa?’ N’okugambira aha simu, okwohereza obutumwa aha simu nari aha kyoma ekindi? Obunaku obu abantu baingi baine ebyoma ebi. Abacondooza abamwe nibagira ngu okuba haihi n’ekyoma waaba oine eki oriyo nookora nikibaasa kutuhuzya. “Nooba otataire omutima aha ki oriyo nookora,” nikwo omunyabwengye omwe arikugira. “Ebiteekateeko byawe nooba obitaire aha kintu ekindi.” Enteerane empango zitakatandikire nitukira kwijukibwa kuhamya ngu ebyoma byaitu tibyateganisa abandi. Noobaasa kukora nikyo kimwe waaba ori na Yehova kugira ngu ekyoma kwawe kitakuteganisa?

14. Kurugiirira aha Abafilipi 4:6, 7, Yehova naija kutuhwera ata kutahuga?

¹⁴ Shaba Yehova kukuhwera kutahuga. Waatandika kuhuga waaba oriyo nooyeyegyesa, nari ori omu ruteerane rw’ekibiina, shaba Yehova kukuhwera. Waaba oine amaganya, nikiba kitoorobi kwehuzya  ebirikukwerarikiriza reero okata omutima aha by’omwoyo, kwonka ni kikuru okukora. Mushabe kukuha obusingye oburaije kurinda omutima gwawe n’ebiteekateeko byawe.—Shoma Abafilipi 4:6, 7.

15. Nitugasirwa tuta twamara obwire turi na Yehova?

¹⁵ Waataho obwire bw’okugaaniira na Yehova, okamuhurikiza, kandi okamuteekateekaho, noija kugasirwa. Mu muringo ki? Eky’okubanza, noija kucwamu gye. Baibuli neetuhamiza ngu ‘orikugyenda n’abanyabwengye, nawe naija kuhinduka omunyabwengye.’ (Enf. 13:20) N’ahabw’ekyo waamara obwire na Yehova obukomooko bw’obwengye, noija kuba omunyabwengye. Noija kumanya oku orikubaasa kumushemeza, n’okwetantara kucwamu omu muringo ogutarikumushemeza.

16. Okumara obwire ori na Yehova nikituhwera kita kuboneza emyegyeseze yaitu?

¹⁶ Ekya kabiri, noija kuba omwegyesa murungi. Twaba nitwegyesa omuntu Baibuli, ekigyendererwa kyaitu ekikuru n’eky’okuhwera omwegi kugira omukago murungi na Yehova. Oku turikwongyera kuhurizana na Tataitwe ow’omu iguru, nikwo turikwongyera kumukunda, kandi nikwo turaabaase kwegyesa gye abeegi baitu nabo kumukunda. Eki nikyo Yesu yaakozire. Akagamba ahari Ishe aine omuhimbo kandi omu muringo gwa rukundo, kyahwera abeegi be nabo kumukunda.—Yoh. 17:25, 26.

17. Ahabw’enki okushaba n’okweyegyesa nibituhwera kuhamya okwikiriza kwaitu?

¹⁷ Ekya kashatu, okwikiriza kwawe nikwija kuhama. Yetegyereze ekirikubaho waashaba Yehova kukuhabura, kukuhuumuriza, nari kukuhwera. Buri murundi ogu Yehova arikugarukamu okushaba kwawe, okwikiriza kwawe nikuhama. (1 Yoh. 5:15) Niki ekindi ekirikubaasa kuhamya okwikiriza kyawe? N’okweyegyesa. Ijuka ngu, ‘okwikiriza nikuruga omu bi turikuhurira.’ (Rom. 10:17) Kwonka, twine kukora ekirikukira aha kutunga okumanya. Twine kukora ki ekindi?

18. Yoreka ahabw’enki twine kugira obwire bw’okuteekateeka.

¹⁸ Twine kuteekateeka aha bi turikwega. Yetegyereze ebyahikire aha muhandiiki wa Zaaburi 77. Akaba aine amaganya ahabw’okureeba ngu Yehova takimusiima hamwe n’Abaisraeli bagyenzi be. Ebiteekateeko ebyo bikaba nibimuteganisa nyekiro. (Omushororongo 2-8) Akakora ki? Akagambira Yehova ati: ‘Ninyija kuteekateeka munonga aha murimo gwawe gwona, ngumye ebiteekateeko byangye aha bikuru ebi waakozire.’ (Omushororongo 12) Amazima gari ngu, omuhandiiki wa zaaburi akaba naamanya gye ebi  Yehova yaakoreire abaheereza be ira, kwonka akaba naayebuuza ati: “Ruhanga ayebirwe okugira embabazi, aimire embabazi ze nyingi ahabw’ekiniga?” (Omushororongo 9) Omuhandiiki wa zaaburi akateekateeka aha murimo gwa Yehova n’okugirira abantu be ira embabazi n’esaasi. (Omushororongo 11) Niki ekyarugiremu? Omuhandiiki wa zaaburi akaba naahamiza kimwe ngu Yehova tarikwija kutsigaho abaheereza be. (Omushororongo 15) Nikyo kimwe, okwikiriza kwawe nikwija kuhama waateekateeka aha bi Yehova yaaherize kukorera abaheereza be, n’ebi akukoreire.

19. Nitugasirwa mu muringo ki ogundi twamara obwire turi na Yehova?

¹⁹ Ekya kana, kandi ekirikukira obukuru, omukago gwawe na Yehova niguza kuhama. Rukundo, omutwarize ogurikukira endiijo yoona, nigwija kukuhiga kworobera Yehova, kwefeerereza kukora ebirikumushemeza, n’okwemera okugyezibwa kw’emiringo yoona. (Mat. 22:37-39; 1 Kor. 13:4, 7; 1 Yoh. 5:3) Tihariho ekirikukirayo kuba eky’omuhendo nk’okugira omukago murungi na Yehova!—Zab. 63:1-8.

20. Nookora ki kuhamya ngu tihaine ekyakuteganisa waaba ori na Yehova?

²⁰ Ijuka ngu okuramya kwaitu nikutwariramu okushaba, okweyegyesa, n’okuteekateeka. Nka Yesu, sherura omwanya gucureire ahu orikubaasa kuba hamwe na Yehova. Yetantare ebirikubaasa kukuhuzya ebitarikwetengyesa. Shaba Yehova kukuhwera kutaho omutima waaba nooyejumba omu by’omwoyo. Waateeraho kukoresa gye obwire bwawe hati, Yehova naija kukuha amagara agatahwaho omu nsi ensya.—Mak. 4:24.