1. Noobaasa kushoboorora ota eka ya Yakobo?

YAKOBO murumuna wa Yesu, akakurira omu ka ehami omu by’omwoyo. * Abazaire be, Yosefu na Mariamu, bakaba nibakunda Yehova munonga kandi bakaba nibakora kyona ekirikubaasika kumuheereza. Yakobo akaba aine omugisha ogundi. Mukuru we akaba naija kukura kuba Mesia owaaraganisiibwe. Yakobo ka yaatungire omugisha gw’amaani kukurira omu ka egyo!

2. Ni nshonga ki ezaareeteire Yakobo kuha mukuru we ekitiinisa?

² Hakaba hariho enshonga nyingi ezaabaire zishemereire kureetera Yakobo kuha mukuru we ekitiinisa. (Mat. 13:55) Nk’eky’okureeberaho, Yesu akaba naamanya gye Ebyahandiikirwe ahakuba aha myaka 12, akatangaaza abareeberezi omuri Yerusaalemu abaabaire beegire gye. (Luk. 2:46, 47) Yakobo ashemeire kuba yaakozire omurimo gw’okubaija hamwe na Yesu. Eki kishemereire kuba kyamureeteire kumanya gye mwene ishe ogu. Nathan H. Knorr akaba naakira kugira ati: “Nooyega bingi ebirikukwata aha muntu waaba nookora nawe.” * Yakobo naabaasa kuba yaareebire oku ‘Yesu yaayeyongyeire kutunga obwengye n’okukura, naasiimwa Ruhanga n’abantu.’ (Luk. 2:52) N’ahabw’ekyo nitubaasa kuteekateeka ngu Yakobo akaba aine kuba omwe aha baabandize kuhinduka abeegi ba Yesu. Kwonka tikwo kyabaire.

3. Yakobo akatwaza ata Yesu ku yaatandikire obuheereza bwe?

³ Obu Yesu yaabaire naaheereza omu nsi, Yakobo tarabaire  omwe aha beegi be. (Yoh. 7:3-5) Nangwa, na Yakobo naabaasa kuba ari omwe aha banyabuzaare ba Yesu abaabaire nibateekateeka ngu “agwire eiraro.” (Mak. 3:21) Tihariho ekirikworeka ngu Yakobo akaba ari na nyina, Mariamu obu Yesu yaahanikwa aha muti.—Yoh. 19:25-27.

4. Nituza kwega mashomo ki?

⁴ Bwanyima, Yakobo akaikiririza omuri Yesu kandi yaaba omuntu orikuheebwa ekitiinisa omu kibiina Ekikristaayo. Omu kicweka eki, nituza kushwijuma amashomo abiri agu turikubaasa kwegyera ahari Yakobo: (1) ekishemereire kutureetera kuguma turi abacureezi (2) n’oku turikubaasa kuba abeegyesa barungi.

5. Yakobo akatwaza ata obu Yesu yaamweyoreka?

⁵ Yakobo akaba ryari omukuratsi wa Yesu omwesigwa? Bwanyima ya Yesu kuzooka omu bafu, ‘akeeyoreka Yakobo, na bwanyima entumwa zoona.’ (1 Kor. 15:7) Bwanyima y’okubugana okwo, nibwo Yakobo yaabaire omwegi wa Yesu. Yakobo akaba ariho obu entumwa baabaire bategyereize kushukwaho omwoyo gurikwera omu kishengye ky’ahaiguru omuri Yerusaalemu. (Byak. 1:13, 14) Bwanyima, Yakobo akashemererwa kuheereza aha kakiiko akareeberezi omu kyasha ky’okubanza. (Byak. 15:6, 13-22; Gal. 2:9) Kandi bwanyima nk’omu mwaka gwa 62 Y.A.K., akahwerwa omwoyo gurikwera kuhandiikira Abakristaayo entoore ebaruha. Ebaruha egyo neetugasira obunaku obu, yaaba twine amatsiko g’okuza omu iguru nari ag’okutuura omu nsi. (Yak. 1:1) Kurugiirira aha munyabyafaayo omu kyasha ky’okubanza Josephus, Yakobo akaitwa ahabw’ekiragiro ky’Omunyamurwa Omukuru Anania omuto. Yakobo akaguma ari omwesigwa ahari Yehova kuhitsya yaaheza obuheereza bwe omu nsi.

6. Yakobo akaba naataana ata aha beebembezi b’ediini omu bunaku bwe?

⁶ Yakobo akaba ari omucureezi. Ahabw’enki turikubaasa kugira tutyo? Yetegyereze oku Yakobo yaabaire naataana aha beebembezi b’ediini kurugiirira aha ku yaatwarize bwanyima y’okubugana Yesu. Yakobo ku yaatungire obuhame obutarikubangaanisibwa ngu Yesu n’Omwana wa Ruhanga, akeecureeza yaikiriza. Kwonka abanyamurwa abakuru omuri Yerusaalemu bo bakanga. Nk’eky’okureeberaho, bakaba batarikubaasa kuhakana ngu Yesu akazoora Laazaaro kuruga omu bafu. Kwonka omu mwanya gw’okumanya ngu Yesu akaba naajwekyera Yehova, bakateeraho kwita bombi Yesu na Laazaaro. (Yoh. 11:53; 12:9-11) Bwanyima ya Yesu kuzooka, bakateeraho  kushereka amazima ago ngu gatamanywa abantu. (Mat. 28:11-15) Omwetunguuro gw’abeebembezi b’ediini abo gukabareetera kwanga Mesia.

7. Ahabw’enki twine kwetantara omwetunguuro?

⁷ Eishomo: Yetantare omwetunguuro, kandi guma oyeteekateekire kwegyesibwa. Nk’oku endwara erikubaasa kugumisa emitsi y’omutima ekaguremesa kuteera gye, omwetunguuro nigubaasa kugumisa omutima gwaitu ogw’akamanyiso gwangye kukuratira obuhabuzi bwa Yehova. Abafarisaayo bakaikiriza emitima yaabo kuguma munonga baayanga kwetegyereza obuhame obu omwoyo gurikwera gwaboorekire butunu. (Yoh. 12:37-40) Eki kikaba kiri eky’akabi ahakuba kikakwata ahari nyentsya yaabo ey’obutwire. (Mat. 23:13, 33) Ka ni kikuru ngu tugumizemu nitwikiriza Ekigambo kya Ruhanga n’omwoyo gwe gurikwera kubumba emitwarize yaitu n’emiteekateekyere yaitu n’ebi turikucwamu! (Yak. 3:17) Ahabw’okugira ngu Yakobo akaba ari omucureezi, akaikiriza kwegyesibwa Yehova. Kandi nk’oku turikuza kureeba, obucureezi bwe nibwo bwamureeteire kuba omwegyesa murungi.

8. Niki ekirikwija kutuhwera kuba abeegyesa barungi?

⁸ Yakobo akaba ataine obwegyese bw’amaani. Hatariho kubangaanisa abeebembezi b’ediini omu bunaku bwe bakaba nibamureeba nk’oku baabaire nibareeba entumwa Petero na Yohaana ‘nk’abantu babisi abateegyesiibwe.’ (Byak. 4:13) Kwonka Yakobo akeega kuba omwegyesa murungi, eki turikureeba twaba nitushoma ekitabo ekirikwetererwa eiziina rye. Nka Yakobo, nitubaasa kuba twine obwegyese bukye obw’ensi. Kwonka n’obu kiraabe kiri kityo, obuhwezi bw’omwoyo gurikwera n’okutendeka kw’ekibiina kya Yehova, nibibaasa kutuhwera kuba abeegyesa barungi. Ka tureebe eky’okureeberaho kya Yakobo eky’okuba omwegyesa murungi, tureebe amashomo agu turikubaasa kumwegyeraho.

9. Noobaasa kushoboorora ota emyegyeseze ya Yakobo?

⁹ Yakobo akaba atarikukoresa ebigambo bigumire nari enshoboorora egumire. N’ekyarugiremu, abu yaabaire naayegyesa bakaba nibarahuka kureeba eki baine kukora n’oku baine  kukikora. Nk’eky’okureeberaho, Yakobo akeegyesa ngu Abakristaayo baine kuba beeteekateekire kuhikwaho obutari buringaaniza kandi bagume bataine enziika. Akahandiika ati: ‘Abarikugumisiriza nitubeeta abahiiriirwe. Mukahurira aha kugumisiriza kwa Yobu, kandi mwareeba [muheru ei Yehova yaamuhaire], oku aine embabazi nyingi n’okusaasira.’ (Yak. 5:11) Yetegyereze ngu Yakobo okwegyesa kwe akaba naakwegamiza aha Byahandiikirwe. Akakoresa Ekigambo kya Ruhanga kuhwera abahurikiza be kumanya ngu butoosha Yehova naaha ebirungi abarikumuhamiraho nk’oku Yobu yaakozire. Yakobo akeegyesa eishomo eryo arikukoresa ebigambo byorobi kandi omu muringo gw’obwengye. Omu muringo ogwo, akata omutima ahari Yehova omu mwanya gw’okugwetaho.

10. Ni muringo ki gumwe ogu turikubaasa kutoorezamu Yakobo twaba nitwegyesa?

¹⁰ Eishomo: Yegyesa omu muringo gworobi, kandi orikwegamira aha Kigambo kya Ruhanga. Ekigyendererwa kyaitu, tikishemereire kuba okushemeza abandi, beitu okubooreka obwengye bwa Yehova bwingi n’oku arikubafaho. (Rom. 11:33) Nitubaasa kuhika aha kigyendererwa ekyo ebi turikwegyesa twaba nitubyegamiza aha Byahandiikirwe. Nk’eky’okureeberaho, omu mwanya gw’okugambira abeegi baitu ba Baibuli eki turikubaasa kukora ku ogire ngu turi omu mbeera nk’eyaabo, twine kubahwera kuteekateeka aha barikugambwaho omu Baibuli, kandi twetegyereze emiteekateekyere ya Yehova n’enyehurira ze. Reero obwo nibaija kugira ekihika ky’okushemeza Yehova, kutari okweshemeza.

11. Abakristaayo bakaba baine buremeezi ki omu bunaku bwa Yakobo, kandi akabaha buhabuzi ki? (Yakobo 5:13-15)

¹¹ Yakobo akaba naareeba enshonga nk’oku eri. Nikireebwa butunu omu mabaruha ga Yakobo ngu akaba naamanya oburemeezi obu ab’eishe-emwe bagyenzi baabaire baine, kandi akabaha obuhabuzi oburikwetegyerezibwa gye oku baabaire baine kubusingura. Nk’eky’okureeberaho, Abakristaayo abamwe bakaba nibatuuraho kugyendera aha buhabuzi. (Yak. 1:22) Abamwe bakaba nibagwera orubaju rw’abagaiga. (Yak. 2:1-3) Kandi abandi bakaba nibagumirwa kurinda orurimi rwabo. (Yak. 3:8-10) Abakristaayo abo bakaba baine oburemeezi bw’amaani, kwonka Yakobo tarahanikire akabahugaho. Akabaha obuhabuzi omu muringo gw’embabazi kwonka ogwa butunu, kandi akahiga abaine obweremwa omu by’omwoyo kusherura obuhwezi aha bareeberezi.—Shoma Yakobo 5:13-15.

12. Nitubaasa kugumizamu tuta nituhwera abeegi ba Baibuli twine emiteekateekyere mirungi?

¹² Eishomo: Reeba enshonga nk’oku eri, kwonka ogire emiteekateekyere mirungi aha bandi. Baingi abu turikwegyesa Baibuli nibabaasa kuba nibagumirwa kugyendera aha buhabuzi bwayo. (Yak. 4:1-4) Nikibaasa kubatwarira obwire kweihamu emitwarize mibi reero bakagira emitwarize nk’eya Kristo. Turikutooreza Yakobo, twine kugira obumanzi bw’okugambira abeegi baitu ahu baine kukora empindahinduka. Kandi twine kuguma twine emiteekateekyere mirungi, turikwesiga Yehova ngu naija kweyiriza haihi abantu abacureezi, kandi ngu naija kubaha amaani g’okukora empindahinduka.—Yak. 4:10.

13. Nk’oku kirikworekwa omuri Yakobo 3:2, Yakobo akeetegyereza ki?

¹³ Yakobo akaguma ayeyineho emiteekateekyere ehikire. Yakobo tarateekateekire ngu obukomooko bwe nari ngu obuheereza bwe bukamuhindura ow’omutaano, nari ngu akaba naakira ab’eishe-emwe bagyenzi be nari banyaanya. Abu yaabaire naaramya nabo akabeeta ‘ab’eishe-emwe abarikukundwa.’  (Yak. 1:16, 19; 2:5) Tarateireho kworeka abandi ngu ahikiriire. Kureka, nawe akeegambaho omu bigambo ebi: ‘Twena nitushobya omuri bingi.’—Shoma Yakobo 3:2.

14. Ahabw’enki twine kuba tweteekateekire kwikiriza enshobe zaitu?

¹⁴ Eishomo: Ijuka ngu twena turi abasiisi. Titushemereire kuteekateeka ngu nitukira abu turikwegyesa. Ahabw’enki? Twareetera omwegi kuteekateeka ngu titwine kamogo, naabaasa kuteekateeka ngu tarikubaasa kuhikiiriza ebi Ruhanga arikwenda. Kwonka twaba ab’amazima tukaikiriza ngu butoosha tikirikutworobera kukuratira emisingye y’Ebyahandiikirwe, kandi tukashoboorora oku Yehova atuhweraire kusingura oburemeezi obu, nitwija kuhwera abu turikwegyesa kureeba ngu nabo nibabaasa kuheereza Yehova.

15. Noobaasa kushoboorora ota eby’okureeberaho ebi Yakobo yaabaire naakoresa? (Yakobo 3:2-6, 10-12)

¹⁵ Yakobo akaba naakoresa eby’okureeberaho ebirikuhika aha mutima. Hatariho kubangaanisa, akahwerwa omwoyo gurikwera, kwonka nabwo naabaasa kuba yaayegire bingi arikwetegyereza eby’okureeberaho ebi mukuru we Yesu yaakoreise. Eby’okureeberaho ebi Yakobo yaakoreise byorobi, kandi amashomo gaabyo nigeetegyerezibwa gye.—Shoma Yakobo 3:2-6, 10-12.

16. Ahabw’enki twine kukoresa eby’okureeberaho ebirikukora gye?

¹⁶ Eishomo: Koresa eby’okureeberaho ebirikukora gye. Waakoresa eby’okureeberaho ebihikire, noohwera abantu kukoresa amatu gaabo n’amaisho. Noohwera abantu kutandika kuteera obushushani. Obushushani obu barikuteera nibubahwera kwijuka enshonga nkuru ez’amazima ga Baibuli. Yesu akaba ari omuhangu omu kukoresa eby’okureeberaho ebirikukora gye, kandi omurumuna Yakobo akamutooreza. Ka tushwijume kimwe aha by’okureeberaho bya Yakobo, kandi twetegyereze ahabw’enki nikikora gye.

17. Ahabw’enki eky’okureeberaho ekiri omuri Yakobo 1:22-25 kirikukora gye?

¹⁷ Shoma Yakobo 1:22-25. Eky’okureeberaho kya Yakobo eky’endeeberwamu nikikora gye ahabw’enshonga nyingi. Akaba naayenda kworeka ngu kubaasa kugasirwa omu Kigambo kya Ruhanga, twine kukora ekirikukira aha kukyega, kureka twine kugyendera aha bi turikwega. Akatoorana eky’okureeberaho eki abantu baabaire nibaija kurahuka kwetegyereza, eky’omushaija arikwereeba omu ndeeberwamu.  Enshonga ye n’eha? Kikaabaire kiri eky’obushema omuntu kwereeba omu ndeeberwamu, akareeba ekitatereire eki arikubaasa kutereeza kwonka akanga kukitereeza. Nikyo kimwe, nikiba kiri eky’obushema kushoma Ekigambo kya Ruhanga, tukareeba ekintu eki twine kutereeza aha bikwatiraine n’entwaza yaitu nari omuze, kwonka tukanga kuhinduraho.

18. Ni bintu ki bishatu ebi twine kukoresa omu ky’okureeberaho?

¹⁸ Twakoresa eky’okureeberaho, nitubaasa kutooreza Yakobo turikukora ebintu bishatu: (1) Hamya ngu eky’okureeberaho nikihikaana n’enshonga ei orikwegyesaho. (2) Koresa eky’okureeberaho eki abakuhurikiize baraarahukye kwetegyereza. (3) Yoreka gye enshonga nkuru ey’eky’okureeberaho. Ku oraabe noogumirwa kwesherurira eky’okureeberaho ekihikire, za omu Watch Tower Publications Index. Za ahansi y’omutwe “eby’okureeberaho,” noija kushangayo bingi ebi orikubaasa kukoresa. Kwonka ijuka ngu, eby’okureeberaho biri nk’omuzindaaro, nibitunguura enshonga ei oriyo nooyegyesa. Hamya ngu waakoresa eby’okureeberaho aha nshonga nkuru ezi orikwenda kwegyesa. Kimanye ngu, enshonga nkuru erikutureetera kuboneza emyegyeseze yaitu ti kwehimbisa, kureka n’okuhwera abantu baingi nk’oku kirikubaasika kuba bamwe aha b’eka ya Yehova eshemereirwe.

19. Nitworeka tuta ngu nitusiima eka yaitu ey’eby’omwoyo?

¹⁹ Itwe titutungire omugisha gw’okukura na mukuru waitu ohikiriire, kwonka tutungire omugisha gw’okuheereza Yehova turi n’eka mpango ey’ab’eishe-emwe na banyaanyazi-itwe. Nitworeka ngu nitubakunda turikushashaanuka nabo, turikuheereza nabo omu bwesigwa omu murimo gw’okubuurira n’okwegyesa. Twateeraho kutooreza Yakobo omu miteekateekyere, emitwarize, n’omu myegyeseze, nitwija kuhimbisisa Yehova Tataitwe ow’omu iguru, kandi nitwija kuhwera ab’emitima mirungi kumwirira haihi.