1-2. Twine kugumizamu nitukora ki bwanyima y’okubatizibwa? Shoboorora.

 NOOKIRA kuboneza eka yaawe emirundi engahi? Otakataahire omu nju egyo, noobaasa kuba waabandize kugiboneza gye. Kwonka niki ekirikubaho waaba otagarukire kugireeberera? Omu bwire bukye, neebaasa kwijura omucuucu n’oburofa. Kubaasa kurinda enju yaawe ecumire gye, butoosha oine kugiboneza.

² Nikyo kimwe, twine kuteeraho munonga kugarurwa busya omu miteekateekyere yaitu n’emitwarize yaitu. Amazima gari ngu, tutakabatiziibwe tukateeraho kukora empinduka ezirikwetengyesa kubaasa kweyozyaho “oburofa bwona obw’aha mubiri n’obw’omu mwoyo.” (2 Kor. 7:1) Kwonka, hati twine kworobera obuhabuzi bw’entumwa Paulo oburikugira ngu mugumizemu ‘nimuhindurwa basya.’ (Efe. 4:23) Ahabw’enki twine kugumizamu nituteeraho kukikora? Ahakuba omucuucu n’oburofa eby’ensi egi nibibaasa kutureetera kuba abatashemeire omu maisho ga Yehova. Kubaasa kwetantara ekyo kubaho kandi tukaguma turi abashemeire ahari Yehova, butoosha twine kushwijuma emiteekateekyere yaitu, emitwarize yaitu n’ebyetengo byaitu.

3. “Okugarurwa busya omu biteekateeko byanyu” nikimanyisa ki? (Abarooma 12:2)

³ Niki eki twine kukora kugarurwa busya omu biteekateeko byaitu? (Shoma Abarooma 12:2.) Ebigambo by’Orugriika  ebirikuvunuurwa “okugarurwa obusya omu biteekateeko byanyu” nibibaasa kumanyisa “okuhunduuza ebiteekateeko byanyu.” N’ahabw’ekyo, tikirikumanyisa ngu twine kukora ebintu bikye birungi ebirikureebwa abandi. Kureka, twine kweshwijuma tukamanya eki turi omu mutima kandi tukakora empinduka ezirikwetengyesa kugira ngu emitwarize yaitu ehikaane n’emitindo ya Yehova nk’oku kirikubaasika. Ekyo titurikukikora omurundi gumwe, kureka nitugumizamu nitukikora.

4. Nitubaasa kwetantara tuta kubumbwa emitwarize y’ensi egi?

⁴ Ku turaabe abahikiriire, nitwija kubaasa kushemeza Yehova butoosha omuri byona ebi turaabe nitukora. Kwonka hati, twine kugumizamu nituteeraho kushemeza Yehova. Yetegyereze akakwate akari aha gati y’ebigambo okugarurwa busya omu biteekateeko byaitu n’okumanya gye ebi Ruhanga arikukunda, ebi Paulo yaakoreise omu Abarooma 12:2. Omu mwanya gw’okwikiriza kubumbwa entebeekanisa y’ensi egi, twine kweshwijuma kumanya yaaba ebigyendererwa byaitu n’ebi turikucwamu nibyegamira aha miteekateekyere ya Ruhanga nari ey’ensi egi.

5. Nitubaasa kushwijuma tuta emiteekateekyere yaitu aha kwirira haihi kw’ekiro kya Yehova? (Reeba ekishushani.)

⁵ Teekateeka ahari eki. Yehova naayenda ngu tugume ‘tutegyereze ekiro kye.’ (2 Pet. 3:12) Yebuuze oti: ‘Oku ndikutwaza nikworeka ngu turi haihi n’emperu y’entebeekanisa y’ensi egi? Ebi ndikucwamu aha bikwatiraine n’obwegyese n’emirimo, nibyoreka ngu okuheereza Yehova nikyo kirikukirayo obukuru ahariinye? Nyine okwikiriza ngu Yehova naaza kundeeberera n’ab’eka yangye, nari obutoosha niinyerakirira aha bintu by’omubiri?’ Teekateeka aha kushemererwa oku Yehova arikugira ku arikureeba nituteeraho kukora  ebi arikukunda.—Mat. 6:25-27, 33; Fil. 4:12, 13.

6. Niki eki twine kugumizamu nitukora?

⁶ Twine kushwijuma emiteekateekyere yaitu butoosha kandi tukakora empinduka ezirikwetengyesa. Paulo akahiga Abakorinso ati: “Mweshwijume mureebe ku muraabe muri omu kwikiriza, kandi mwegyeze mwenka.” (2 Kor. 13:5) Okuba “omu kwikiriza” nikikira aha kuza omu nteerane z’Ekikristaayo n’okwejumba omu kubuurira obutoosha. Nikitwariramu n’emiteekateekyere yaitu, ebyetengo byaitu nari ebigyendererwa byaitu. N’ahabw’ekyo twine kugarurwa busya omu biteekateeko byaitu turikushoma Ekigambo kya Ruhanga, turikwega kugira emiteekateekyere nk’eye, kandi tukakora kyona ekirikwetengyesa kushemeza Yehova.—1 Kor. 2:14-16.

7. Kurugiirira aha Abaefeso 4:31, 32, niki ekindi eki twine kukora, kandi ahabw’enki kigumire?

⁷ Shoma Abaefeso 4:31, 32. Oyihireho okuhindura emiteekateekyere yaitu, twine ‘kujwara omuntu omusya.’ (Efe. 4:24) Ekyo nikitwariramu kugira eki twakora. Bimwe aha bintu ebi twine kuteeraho munonga kusingura, n’emitwarize mibi erikutwariramu obushaarizi, okuguubwa kubi n’oruyombo. Ahabw’enki ekyo kitoorobi kukora? Ahakuba emitwarize mibi egyo neeba esimbire emizi omu mitima yaitu. Nk’eky’okureeberaho, Baibuli neegira ngu abantu abamwe ‘n’abanyakiniga’ kandi ‘nibarahuka kuguubwa kubi.’ (Enf. 29:22) Nikyetengyesa okukora n’amaani kweihamu emize egyo etwezingirire nangwa na bwanyima y’okubatizibwa, nk’oku kirikworekwa omu ky’okureeberaho ekiri ahaifo.

8-9. Eky’okureeberaho kya Stephen nikyoreka kita ngu nikyetengyesa kuguma nitujuura omuntu owa ira?

⁸ Ow’eishe-emwe orikwetwa Stephen akaba naagumirwa kutegyeka ekiniga kye. Naagira ati: “Nangwa na bwanyima y’okubatizibwa, nkaba nyine kugumizamu ninteeraho kwezibira kugira ekiniga. Nk’eky’okureeberaho, eizooba rimwe obu naabaire nimbuurira enju aha nju, nkeirukanzya omushuma owaabaire yaaheza kwiba radiyo omu motoka yangye. Ku naabaire ndi hakye kumukwata akagitambika ahansi yairuka yaahunga. Ku naagambiire abandi oku naabaasa kugarukana radiyo yangye, omureeberezi akambuuza ati: ‘Stephen, ku ogire ngu waakwata omushuma ogwo waaba noija kumukora ki?’ Ekibuuzo ekyo kikandeteera kuteekateeka kandi kyampiga kugumizamu niinteeraho kuba ow’obusingye.” b

⁹ Eky’okureeberaho kya Stephen nikyoreka ngu nitubaasa kugaruka kugira emitwarize mibi, n’obu twakuba nitureeba ngu tubaasize kugisingura. Ekyo kyabaho, otahwamu amaani kandi okateekateeka ngu oremirwe kutwaza omu muringo gw’Ekikristaayo. Nangwa n’entumwa Paulo akaikiriza arikugira ati: “Nyowe ku mba niinyenda kukora ekirungi, ekibi kimba haihi.” (Rom. 7:21-23) Abakristaayo twena twine emize etari emwe ei twine kusingura eri nk’omucuucu n’oburofa oburikuguma nibwerunda aha bintu by’omuka. Nituba twine kugumizamu nitukora ekiraatuhwere kuguma turi abeecumi. Niki?

10. Nitubaasa kurwanisa tuta emitwarize mibi? (1 Yohaana 5:14, 15)

¹⁰ Gambira Yehova omu kushaba omutwarize mubi ogukugumiire kucwa, kandi gira obwesigye ngu naija kukuhurira kandi akuhwere. (Shoma 1 Yohaana 5:14, 15.) N’obu  Yehova araabe atarikubaasa kwihaho omutwarize mubi ogwo omu muringo gw’eky’okutangaaza, naabaasa kukuha amaani g’okugwangira. (1 Pet. 5:10) Kandi, gumizamu nookorera aha kushaba kwawe orikwetantara ebintu ebirikubaasa kukureetera kugaruka kugira omuntu owa ira. Nk’eky’okureeberaho, yetantare kureeba vidiyo, tiivi nari kushoma ebitabo ebirikuhimbisiriza emitwarize mibi ei oriyo nooteeraho kusingura. Kandi otaguma nooteekateeka aha byetengo bibi.—Fil. 4:8; Kol. 3:2.

11. Ni bintu ki ebi turikubaasa kukora kuguma tujwaire omuntu omusya?

¹¹ Waajura omuntu owa ira, nikiba kiri kikuru kujwara omuntu omusya. Ekyo noobaasa kukikora ota? Taho ekigyendererwa ky’okutooreza Yehova orikwega aha mitwarize ye. (Efe. 5:1, 2) Nk’eky’okureeberaho, waashoma omu Baibuli enshonga erikworeka okusaasira kwa Yehova, yebuuze oti: ‘Ninsaasira abandi?’ Waashoma oku Yehova arikugirira embabazi abarikuraba omu mbeera zigumire, yebuuze oti, ‘Ninyoreka omu bikorwa ngu ninfayo aha b’eishe-emwe bagyenzi bangye abaine ebi bakyenire?’ Gumizamu noogarurwa busya omu biteekateeko orikujwara omuntu omusya kandi yegumisiririze omu kukikora.

12. Stephen akeetegyereza ata ngu Baibuli eine amaani g’okuhindura emitwarize y’abantu?

¹² Stephen, owaaba yaagambirweho, mporampora akabaasa kujwara omuntu omusya. Naagira ati: “Kuruga obu naabatizibwa, nyeshangire omu mbeera ahu kirikunyetengyesa kutegyeka ekiniga kyangye. Eki ndikukora ninduga omu mwanya ogurimu abantu abarikuteeraho kundeetera kugira ekiniga nari nyikaikanisa embeera etakarugiremu akabi. Abantu baingi, otwariiremu n’omukazi wangye nibansiima ahabw’oku ndikutwaza omu mbeera ezo. Naanye obumwe nikintangaaza! Tindikwehimbisa ahabw’empinduka ezinkozire omu mitwarize yangye. Kureka, niinyikiriza ngu Baibuli eine amaani g’okuhindura emitwarize y’abantu.”

13. Niki ekiraatuhwere kugira ebyetengo bishemeire? (Abagalatia 5:16)

¹³ Shoma Abagalatia 5:16. Yehova naatuha omwoyo gurikwera kubaasa kuba abasinguzi omu kukora ekihikire. Twayeyegyesa Ekigambo kya Ruhanga, nituba nitwikiriza obuhwezi bw’omwoyo gurikwera. Kandi nitutunga omwoyo gurikwera twaza omu nteerane. Aha nteerane ezo ez’Ekikristaayo, nitubaasa kushashaanuka n’ab’eishe-emwe na banyaanyazi-itwe abarikuteeraho munonga nkaitwe kukora ekihikire kandi ekyo nikitugumya. (Heb. 10:24, 25; 13:7) Kandi twayeshengyereza Yehova omu kushaba kutuhwera omu bweremwa bwaitu, naatuha amaani g’omwoyo gurikwera kugumizamu niturwana. N’obu okukora ebintu ebyo kitarikwihaho ebyetengo bibi, nikituhwera kwangira kwohibwa kukorera aha byetengo ebyo. Nk’oku Abagalatia 5:16 harikugira, abarikugyendera omu mwoyo ‘tibarikwihikiiriza okw’okwetenga kw’omubiri.’

14. Ahabw’enki ni kikuru kuguma nituteeraho kugira ebyetengo bishemeire?

¹⁴ Twataho entebeekanisa nungi y’eby’omwoyo, nikiba kiri kikuru kugumizamu nitugigyenderaho kandi tukateeraho kugira ebyetengo bishemeire. Ahabw’enki? Ahakuba omwe aha bazigu baitu tarikuruha kuturwanisa. Omuzigu ogwo nikwo kwohibwa kukora ekitahikire. Na bwanyima y’okubatizibwa nitubaasa kweshanga turikwenda kukora ebintu ebi twine kwetantara, nk’okuteera zaara, okukoresa kubi amaarwa,  n’okureeba ebirikwitsa enshoni. (Efe. 5:3, 4) Ow’eishe-emwe omunyeeto naikiriza arikugira ati: “Kimwe aha bintu ebirikungumira kwetantara n’okurigira abu ndikushushanisa nabo obuhangwa. Nkaba ninteekateeka ngu enyehurira ezo niziza kumara obwire bukye, kwonka nizikinteganisa.” Niki ekirikubaasa kukuhwera na munonga ekyetengo ekitashemeire kyaba eky’amaani?

15. Ahabw’enki nikitugumya kumanya ngu ebyetengo bibi nibihika aha ‘bantu boona’? (Reeba ekishushani.)

¹⁵ Waaba nooteeraho kusingura okwetenga kutashemeire, ijuka ngu tori wenka. Baibuli neegira eti: “Tihariho kigyezo ekirababaireho ekitari ky’abantu boona.” (1 Kor. 10:13a) Envunuura endiijo ya Baibuli neekoresa ebigambo ebi: “Tihariho kigyezo ekirababaireho ekitakahikaga aha bantu boona.” Ebigambo ebyo bikaba bihandiikiirwe abashaija n’abakazi Abakristaayo Abakorinso. Bamwe aharibo bakaba bari enshambani, ebitingwa, kandi abasinzi. (1 Kor. 6:9-11) Nooteekateeka ngu ku baherize kubatizibwa, tibaragarukire kugira ebyetengo bibi ebi baabaire baine kurwanisa? Ekyo nikibaasa kuba tikwo kyabaire. Boona bakaba bari Abakristaayo abashukirweho omwoyo gurikwera, kwonka nabwo bakaba batahikiriire. Hatariho kubangaanisa obumwe n’obumwe bakaba baine kuteeraho kusingura ebyetengo bitashemeire. Ekyo buzima nikitugumya. Ahabw’enki? Ahakuba nikyoreka ngu ekyetengo kibi kyona eki oriyo noorwanisa, hariho owaabaasize kukyangira. Buzima, noobaasa kuguma ‘ohami omu kwikiriza, orikumanya ngu ab’eishe-emwe omu nsi yoona nibahikwaho obusaasi nk’obwawe.’—1 Pet. 5:9.

16. Ni mutego ki ogu twine kwetantara, kandi ahabw’enki?

¹⁶ Yetantare omutego gw’okuteekateeka ngu tihaine orikwetegyereza oburemeezi obu orikurabamu. Ahakuba noobaasa kwehwa amatsiko n’okwereeba nk’otarikubaasa kwangira ebyetengo bibi. Kwonka Baibuli terikushagika  emiteekateekyere nk’egyo. Neegira eti: ‘Ruhanga n’ow’okwesigwa, taribaikiriza kugyezibwa ekigyezo eki mutarikubaasa, kureka omu kigyezo ekyo naija kubateeraho oburyo bw’okuhunga, ngu mubaase kukigumisiririza.’ (1 Kor. 10:13b) N’ahabw’ekyo, n’obu ekyetengo kibi kyakuba eky’amaani, nitubaasa kugumisiriza tusingure. Ahabw’obuhwezi bwa Yehova, nitubaasa kwangira ekyetengo ekyo.

17. N’obu turaabe tutarikubaasa kwezibira kugira ebyetengo bibi, nitubaasa kukora ki twabigira?

¹⁷ Butoosha ijuka eki: Ahabw’okugira ngu tohikiriire, torikubaasa kwezibira kugira ebyetengo bibi. Kwonka waabigira, noobaasa kubyangira ahonaaho, nk’oku Yosefu yaakozire obu yairuka akahunga muka Potifaari. (Kut. 39:12) Otakaikiriza kutegyekwa ebyetengo bibi!

18-19. Nitubaasa kukoresa bibuuzo ki twaba nituteeraho kugarurwa busya omu biteekateeko?

¹⁸ Okugarurwa busya omu biteekateeko byaitu nikitwariramu okugumizamu nituteeraho kugira emiteekateekyere n’ebikorwa ebirikuhikaana n’ekigyendererwa kya Yehova. N’ahabw’ekyo butoosha yeshwijume orikwebuuza oti: ‘Nintwaza omu muringo ogurikworeka ngu niimanya obukuru bw’obwire obu turimu? Ndiyo nintunguuka omu kutaho omuntu omusya? Niinyikiriza obuhwezi bw’omwoyo gurikwera kugira ngu mbaase kwangira ebyetengo bibi?’

¹⁹ Waaba nooyeshwijuma, omutima otaguta aha kuba ohikiriire, beitu aha ku orikutunguuka. Waareeba ngu oine kuhinduramu, otakahwa amaani okabirugaho. Kureka, gyendera aha kwehanangiriza okuri omu Abafilipi 3:16 aharikworeka ngu entunguuka ei twakozire, tube niyo twagumizamu nayo. Waakora otyo, gira obwesigye ngu Yehova naija kukuha emigisha ahabw’okuteeraho kugarurwa busya omu biteekateeko byawe.