EKICWEKA EKY’OKWEGA 4
Yehova Naatuha Emigisha Twateeraho Kuba aha Kiijutsyo
“Mugume mukore mutyo okuunyijukiraho.”—LUK. 22:19.
EKYESHONGORO 19 Ekiihuro kya Mukama Waitu
EBIRAAGAMBWEHO a
1-2. Ahabw’enki nituza aha Kiijutsyo buri mwaka?
EMYAKA nka 2,000 enyima, Yesu akahayo amagara ge ahabwaitu kugira ngu tutungye amagara agatahwaho. Aha kiro eki yaakwatiirweho, akaragiira abakuratsi be kwijuka ekikorwa ekyo ekya rukundo barikugira omukoro gworobi ogurikutwariramu okukoresa omugaati na viinyo.—1 Kor. 11:23-26.
2 Nitworobera ekiragiro kya Yesu ekyo ahabw’okugira ngu nitumukunda munonga. (Yoh. 14:15) Buri mwaka omu bwire bw’Ekiijutsyo, nitworeka okusiima ahabw’eki yaatukoreire turikushaba kandi tukateekateeka aha ku turikugasirwa omu okufa kwe. Nitwejumbira kimwe n’omu kubuurira turikweta abantu baingi nk’oku kirikubaasika kutwegaitaho aha mukoro mukuru ogu. Kandi hatariho kubangaanisa, tumariirire kutaikiriza ekintu kyona kuturemesa kuba aha Kiijutsyo.
3. Nituza kugamba ahari ki omu kicweka eki?
3 Omu kicweka eki, nituza kureeba emiringo eshatu oku abantu ba Yehova barikuteeraho kwijuka okufa kwa Yesu: (1) nk’oku Yesu yaayegyeise, (2) barikweta abandi kwija aha Kiijutsyo, (3) kandi barikugira Ekiijutsyo n’omu mbeera zigumire.
OKUKUZA EKIIJUTSYO NK’OKU YESU YAAYEGYEISE
4. Ni mazima ki agarikugambwaho buri mwaka aha Kiijutsyo kandi ahabw’enki tutashemereire kukwata eijaga? (Luka 22:19, 20)
4 Buri mwaka aha Kiijutsyo, nituhurikiza orubazo orurikwegamira ahari Baibuli orurikugarukamu ebibuuzo bitari bimwe. Nitwega ahabw’enki ekitambo nikyetengyesa n’oku okufa kw’omuntu omwe kurikubaasa kurihiirira ebibi bya baingi. Nitwijukibwa eki omugaati na viinyo birikujwekyera n’abaine kurya kandi bakanywa aha bumanyiso obwo. (Shoma Luka 22:19, 20.) Kandi nituteekateeka aha migisha ebiikiirwe abaine amatsiko g’okutuura omu nsi. (Isa. 35:5, 6; 65:17, 21-23) Titwine kukwata eijaga amazima ago. Obuhumbi n’obuhumbi bw’abantu tibarikwetegyereza amazima ago, kandi tibarikusiima ekitambo kya Yesu. Kandi tibarikukuza okufa kwe nk’oku yaayegyeise abakuratsi be. Ahabw’enki kiri kityo?
5. Entumwa abarikukira obwingi ku baafiire, abantu bakatandika kwijuka bata okufa kwa Yesu?
5 Entumwa za Yesu abarikukira obwingi ku baherize kufa, Abakristaayo ab’ebishobobo bakatandika kushenshera omu kibiina. (Mat. 13:24-27, 37-39) Bakaba ‘bagamba eby’obuhabe, [kubeihabeiha] abeegi ngu babakurate.’ (Byak. 20:29, 30) Kimwe aha bintu “eby’obuhabe” ebi baabaire nibeegyesa n’okugira ngu Yesu tarahaireyo mubiri gwe “rimwe kwekorera ebibi bya baingi,” nk’oku Baibuli erikugira, kureka ngu ekitambo ekye kiine kuguma nikiheebwayo. (Heb. 9:27, 28) Hati abantu baingi nibaikiriza enyegyesa y’ebishuba egyo. Butoosha nibateeranira omu makanisa gaabo kukuza omukoro ogurikumanywa “nk’Ekitambo kya Misa.” b Ediini ezindi niziijuka okufa kwa Yesu rimwe na rimwe, kwonka abantu baingi abari omu diini ezo tibarikwetegyereza gye amakuru g’ekitambo kya Yesu. Bamwe nibabaasa kwebuuza bati: ‘Buzima okufa kwa Yesu nikumanyisa ngu ebibi byangye nibibaasa kusaasirwa?’ Ahabw’enki nibeebuuza batyo? N’ahabw’okugira ngu obumwe nibabaasa kuba bahabisiibwe abarikubangaanisa ngu ebibi by’abantu tibirikubaasa kusaasirwa kurabira omu kitambo kya Yesu. Abakuratsi ba Yesu abaabuzima babaasize kukwata bata enshonga egyo?
6. Omwaka 1872 gurikuza kuhika, abeegi ba Baibuli bakeetegyereza mazima ki ga Baibuli?
6 Ekyasha kya 19 kirikuhendera, guruupu y’abeegi ba Baibuli barikwebemberwa Charles Taze Russell bakatandika kushwijuma gye Ebyahandiikirwe. Bakaba baine ekigyendererwa ky’okumanya amazima agarikukwata aha kitambo kya Yesu n’oku okufa kwe kwine kwijukwa. Omwaka 1872 gurikuza kuhika, bakaba baamanyire ngu buzima Yesu akahayo ekitambo ahabw’abantu boona. Ebi baayegire tibarabyesigarize. Kureka bakabimanyisa abandi kurabira omu bitabo, empapura z’amakuru, na magaziini. Kandi bwanyima, barikutooreza Abakristaayo aba ira bakatandika kugira omukoro ogu omurundi gumwe omu mwaka.
7. Nitugasirwa tuta omu kucondooza kw’Abeegi ba Baibuli aba ira?
7 Obunaku obu nitugasirwa omu kucondooza oku Abakristaayo abo abeesigwa baakozire emyaka mingi enyima. Tuta? Ahabw’okuhwerwa Yehova tubaasize kwetegyereza amakuru g’ekitambo kya Yesu n’oku kirikugasira abantu boona. (1 Yoh. 2:1, 2) Tubaasize kwega amatsiko ag’emiringo ebiri, agu Baibuli erikuragaanisa abantu abarikushemeza Ruhanga, amagara agatarikufa omu iguru n’amagara agatahwaho omu nsi agu baingi baraatungye. Nitwirira haihi Yehova twayetegyereza rukundo mpango ei atwiniire n’oku turikugasirwa omu kitambo kya Yesu. (1 Pet. 3:18; 1 Yoh. 4:9) N’ahabw’ekyo nk’ab’eishe-emwe abeesigwa aba ira, nitweta abandi kutwegaitaho aha Kiijutsyo nk’oku Yesu yaayegyeise.
OKWETA ABANDI KWIJA AHA KIIJUTSYO
Noobaasa kukora ki kwejumbira kimwe omu hururu y’okweta abantu aha Kiijutsyo? (Reeba akacweka 8-10) e
8. Abaheereza ba Yehova bakozire ki kubaasa kweta abantu aha Kiijutsyo? (Reeba ekishushani.)
8 Abaheereza ba Yehova batwire nibeeta abandi kwija aha Kiijutsyo. Kuruga ira nk’omwaka 1881, ab’eishe-emwe na banyaanyazi-itwe omuri United States bakeetwa aha mukoro gw’omutaano ogwo omu ka y’ow’eishe-emwe omuri Allegheny, Pennsylvania. Bwanyima, buri kibiina kikaba nikibaasa kukuza Ekiijutsyo. Omu Kwakashatu 1940, ababuurizi bakagambirwa kweta omuntu weena owaabaire naayenda kumanya ebirikukiraho. Omuri 1960, nibwo Beseeli yaabanza kuheereza ebibiina kaada eziteirwe z’okukoresa omu kweta abantu. Kuruga obwo, kaada obuhumbi n’obuhumbi ez’okweta abantu aha Kiijutsyo zibaasize kugabwa. Ahabw’enki nitwefeerereza obwire n’amaani gaitu kuteeraho kweta abantu?
9-10. Ni baahi abarikugasirwa twateeraho kweta abantu aha Kiijutsyo? (Yohaana 3:16)
9 Enshonga emwe ahabw’enki nitweta abandi aha Kiijutsyo n’okwenda ngu baije beegye amazima agarikukwata aha ki Yehova na Yesu bakoreire abantu boona. (Shoma Yohaana 3:16.) Twine obwesigye ngu ebi barikureeba kandi bakahurira aha Kiijutsyo nibiija kubahiga kwega ebirikukiraho n’okuba abaheereza ba Yehova. Kwonka n’abandi nibagasirwa.
10 Nitweta n’abo abatakiheereza Yehova. Twabeeta nikibaijutsya ngu Yehova naakibakunda. Baingi nibaikiriza okweta kwaitu kandi nitushemererwa twabareeba. Okwija aha Kiijutsyo nikibaijutsya okushemererwa oku baabaire bagira barikuheereza Yehova. Teekateeka aha ky’okureeberaho kya Monica. c Akabaasa kugaruka kuba omubuurizi omu bwire bw’ekigwererezi kya COVID-19. Bwanyima y’okuza aha Kiijutsyo omu 2021, akagira ati: “Omukoro ogu gwaba guri ogw’omutaano ahariinye. N’obu ndaabe mmazire emyaka 20 ntakibuurira, aha murundi ogu mbaasize kubuurira abantu kandi naabeeta aha Kiijutsyo. Buzima nkozire n’amaani gangye goona kwejumba omu hururu egyo, ahakuba ninsiima munonga Yehova na Yesu ahabw’eki bankoreire.” (Zab. 103:1-4) Yaaba abantu baikiriza okweta kwaitu nari bakanga, titurikuruha kubeeta aha Kiijutsyo, ahakuba nitumanya ngu Yehova naatusiima ahabw’okuteeraho kwaitu kukikora.
11. Yehova abaasize kutuha ata emigisha ahabw’okuteeraho kweta abantu aha Kiijutsyo? (Hagai 2:7)
11 Yehova abaasize kutuha emigisha mingi ahabw’okuteeraho kweta abantu aha Kiijutsyo. N’obu haraabe haabaire haatairweho emihingo omu 2021 ahabw’ekigwererezi kya COVID-19 abantu 21,367,603 bakaija aha Kiijutsyo. Omubaro gw’abaizire gukaba nigukira ogw’Abajurizi ba Yehova abari omu nsi yoona emirundi ebiri n’ekicweka! Amazima gari ngu, Yehova tarikuta omutima aha mubaro gw’abantu kyonka. Naafayo aha buri muntu owaija aha Kiijutsyo. (Luk. 15:7; 1 Tim. 2:3, 4) Nituhamiza kimwe ngu Yehova naakoresa obwire nk’obwo kutuhwera kutunga abantu abaine omutima ogushemeire.—Shoma Hagai 2:7.
OKUKUZA EKIIJUTSYO N’OMU MBEERA ZIGUMIRE
Yehova naatuha emigisha twateeraho kugira Ekiijutsyo (Reeba akacweka 12) f
12. Ni mbeera ki ezirikubaasa kutureetera kugumirwa kukuza Ekiijutsyo? (Reeba ekishushani.)
12 Yesu akagira ngu omu bwire bw’emperu, tukaba nitwija kuhikwa embeera zigumire eza buri muringo, ezirikutwariramu okuhakanisibwa ab’eka yaitu, okuhiiganisibwa, endwara nyamwita, entaro, n’ebindi. (Mat. 10:36; Mak. 13:9; Luk. 21:10, 11) Obumwe, embeera ezo nizitureetera kugumirwa kwijuka okufa kwa Yesu. Ab’eishe-emwe na banyaanyazi-itwe babaasize kukora ki kusingura buremeezi obwo, kandi Yehova abahwereire ata?
13. Yehova akaha ata Artem omugisha ahabw’obumanzi n’okumariirira kwe kukuza Ekiijutsyo obu yaabaire ari omu kihome?
13 Okuteebwa omu kihome. Ab’eishe-emwe na banyaanyazi-itwe abakomirwe ahabw’okwikiriza kwabo nibakora kyona eki barikubaasa kwijuka kufa kwa Yesu. Teekateeka aha byahikire ahari Artem. Omu bwire bw’Ekiijutsyo eky’omwaka 2020 akateebwa omu kihome kya fuuti 13 ahari 13 we n’abasibe abandi bataano. N’obu araabe yaabaire ari omu kihome akatunga ebi yaabaire naabaasa kukoresa nk’obumanyiso bw’Ekiijutsyo kandi yaayetebeekanisa orubazo rw’Ekiijutsyo orwe. Kwonka abu yaabaire akomirwe nabo bakaba nibareetsa kandi barikukoresa orurimi rubi. Mbwenu shi akakora ki? Akabashaba kutareetsa nari kukoresa ebigambo bibi kumara eshaaha emwe yonka. Artem akatangaara, ku baikirize kutareetsa nari kukoresa ebigambo bibi omu bwire bw’Ekiijutsyo. Artem naagira ati: “Bwanyima nkabagambira ebirikukwata aha Kiijutsyo.” N’obu baraabe baagizire ngu tibarikwenda kuhurira ebirikukwata aha mukoro ogwo, bwanyima y’okureeba kandi bakahurira Artem naakuza Ekiijutsyo, bakamubuuza byona ebiine akakwate n’omukoro ogwo.
14. Abaheereza ba Yehova bakataho ntebeekanisa ki kubaasa kukuza Ekiijutsyo n’obu haabaireho ekigwererezi kya COVID-19?
14 Ekigwererezi kya COVID-19. Ahabw’ekigwererezi kya COVID-19 abaheereza ba Yehova bakaba batarikubaasa kugira Ekiijutsyo butunu. Kwonka ekyo tikirabaremeise kukuza Ekiijutsyo. d Ebibiina ebyabaire nibibaasa kukoresa Intaneeti bikagirira Ekiijutsyo aha Zoom. Kandi shi obukaikuru bw’abantu abaabaire bataine Intaneeti? Omu mahanga agamwe, bakakora entebeekanisa y’okugira ngu orubazo rw’Ekiijutsyo ruheebwe aha tiivi na radiyo. Okwongyera ahari ekyo, ofiisi z’amataagi zikavunuura orubazo orwo omu ndimi ezirikurenga 500 kugira ngu abari omu myanya eyehereire babaase kugira Ekiijutsyo. Kandi ab’eishe-emwe abeesigwa bakatebeekanisa kutwarira ebibiina orubazo ebiri omu myanya egyo.
15. Nooyegyera ki aha byahikire aha mwegi wa Baibuli orikwetwa Sue?
15 Okuhakanisibwa omu ka. Kimwe aha birikureetera bamwe kugumirwa kuba aha Kiijutsyo n’okuhakanisibwa ab’eka yaabo. Teekateeka aha byahikire aha mwegi wa Baibuli orikwetwa Sue. Omu 2021, harikuburayo eizooba rimwe Ekiijutsyo kikabaho, Sue akagambira orikumwegyesa Baibuli ngu taraabe aha Kiijutsyo ahabw’okugira ngu bamwe aha b’eka ye bakaba nibamuhakanisa. Orikumwegyesa Baibuli akashoma Luka 22:44. Reero yaamugira ngu twatunga oburemeezi, twine kutooreza Yesu turikushaba Yehova obuhwezi kandi tukamwesigira kimwe. Eizooba eryakuratsireho, Sue akatebeekanisa obumanyiso bw’Ekiijutsyo kandi yaareeba vidiyo y’Okuramya kw’Akasheeshe aha jw.org. Omwabazyo ogwo, akaza omu kishengye kye yaahurikiza orubazo rw’Ekiijutsyo aha simu. Bwanyima, Sue akahandiikira orikumwegyesa Baibuli ati: “Nyomwabazyo ongumize munonga. Nkozire kyona eki ndikubaasa kuba aha Kiijutsyo kandi Yehova ampweraire. Okushemererwa okungizire kugumire eishoboorora!” Nooteekateeka ngu Yehova naabaasa kukuhwera waahikwaho embeera nk’egyo?
16. Ahabw’enki twine obwesigye ngu Yehova naija kutuha emigisha twateeraho kuba aha Kiijutsyo? (Abarooma 8:31, 32)
16 Yehova naasiima okuteeraho kwaitu kwijuka okufa kwa Yesu. Twine obwesigye ngu Yehova naija kutuha emigisha twayoreka ngu nitusiima byona ebi atukoreire. (Shoma Abarooma 8:31, 32.) Ka tumariirire kuba aha Kiijutsyo omwaka ogu, kandi tukore kyona eki turikubaasa kwongyera kwejumba omu by’omwoyo omu bwire bw’Ekiijutsyo.
EKYESHONGORO 18 Okusiima Ekitambo
a Orwakabiri, Apuri 4, 2023, Obukaikuru bw’abantu omu nsi yoona nibaija kwijuka okufa kwa Kristo. Baingi ogu nigwo guraabe omurundi gwabo gw’okubanza kwija aha mukoro ogu. Kandi Abajurizi ba Yehova abamazire emyaka mingi batakibuurira nabo nibaija kutwegaitaho. Bamwe nibaija kuba aha mukoro ogwo n’obu baraabe baine ebirikubateganisa. N’obu haakubaho mbeera ki, noobaasa kugira obwesigye ngu Yehova naija kushemererwa ahabw’okuteeraho kwawe kuba aha mukoro ogwo.
b Abakristaayo ab’ebishobobo nibaikiriza ngu aha mukoro ogwo omugaati na viinyo nibihinduka omubiri n’eshagama ya Kristo. Nibateekateeka ngu eshagama ya Yesu n’omubiri gwe nibiheebwayo nk’ekitambo buri kwejumba omu mugyenzo ogwo.
c Amaziina agamwe gahindwirwe.
d Reeba n’aha jw.org ebicweka ebiine omutwe “2021 Memorial Commemoration.”
