Abamwe bakuriire omu nganda ahu abashaija baingi barikutwara abakazi nk’ab’ahansi. Nk’eky’okureeberaho, Hans, omureeberezi wa saketi omuri Bolivia, naagira ati: “Omu bicweka ebimwe abashaija nibakuzibwa barikwetunguura, kibareetera kureeba abakazi nk’ab’ahansi n’okubatwariza kubi.” Shengxian, omureeberezi omuri Taiwan, naagira ati: “Ahu ndikutuura, abashaija baingi nibateekateeka ngu abakazi tibaine kwetaatsyataatsya omu nshonga z’abashaija. Omushaija yaagamba eki omukazi we arikuteekateeka aha nshonga, banywani be nibamugaya.” Abashaija abandi nibashoroora abakazi omu miringo etarikureebwa butunu. Nk’eky’okureeberaho, nibagamba ebintu ebirikubakiniika.

Ekirungi, omushaija n’obu yaakuba akuriire omu mbeera ki naabaasa kuhinduka. Naabaasa kusingura emiteekateekyere ey’okugira ngu abashaija nibakira abakazi. (Efe. 4:​22-24) Eki naabaasa kukikora arikutooreza Yehova. Omu kicweka eki, nituza kugamba aha ku Yehova arikutwariza abakazi, oku ab’eishe-emwe barikubaasa kwega kubatwariza nk’oku Yehova arikubatwariza, n’oku abareeberezi barikubaasa kwebembera omu kubaha ekitiinisa.

YEHOVA NAATWARIZA ATA ABAKAZI?

Yehova ataireho eky’okureeberaho kirungi aha ku abakazi baine kutwarizibwa. Nk’omuzaire oine embabazi, naakunda abaana be boona. (Yoh. 3:16) Banyaanyazi-itwe abeesigwa ni bahara ba Yehova ab’omuhendo. Ka tureebe emiringo etari emwe oku arikutwariza abakazi omu muringo gw’ekitiinisa.

Tarikubashoroora. Yehova akahanga abashaija n’abakazi omu kishushani kye. (Kut. 1:27) Tarahangire abashaija baine okubaasa kw’okugira  obwengye nari etalanta okurikukira okw’abakazi, kandi tarikukunda bashaija okukira abakazi. (2 Bus. 19:7) Akahanga abashaija n’abakazi barikubaasa kwetegyereza amazima agari omu Baibuli n’okuteekateeka aha mitwarize ye mirungi. Kandi, Yehova tarikureeba okwikiriza kw’abashaija nk’okurikukira okw’abakazi. Boona baine amatsiko, yaaba ag’okutuuraho ebiro byona omu nsi, nari kuheereza nk’abagabe n’abanyamurwa omu iguru. (2 Pet. 1:1) Buzima, Yehova tarikushoroora bakazi.

Naabahurikiza. Yehova naafayo aha nyehurira z’abakazi n’ebirikubeerarikiriza. Nk’eky’okureeberaho, akahurikiza okushaba kwa Rakeeli na Haana, kandi yaagira eki yaakora. (Kut. 30:22; 1 Sam. 1:​10, 11, 19, 20) Kandi Yehova akahwera abaahandiikire Baibuli kuhandiika ebirikukwata aha bashaija abaahurikiize abakazi. Abrahamu akoorobera obuhabuzi bwa Yehova yaahurikiza omukazi we, Saara. (Kut. 21:​12-14) Omugabe Daudi akahurikiza Abigaili. Nangwa, akeetegyereza ngu Yehova niwe yaabaire amwohereize kugamba nawe. (1 Sam. 25:​32-35) Yesu, orikworeka gye emitwarize ya Ishe, akaba naahurikiza nyina, Mariamu. (Yoh. 2:​3-10) Eby’okureeberaho ebi nibyoreka ngu omuringo gumwe oku Yehova arikworeka ngu naaha abakazi ekitiinisa n’okubahurikiza.

Naabeesiga. Nk’eky’okureeberaho, Yehova akaha Haawa obujunaanizibwa bw’okuhwera Adamu kureeberera ensi yoona. (Kut. 1:28) Omu kukora atyo, akooreka ngu tarikumureeba nk’ow’ahansi, kureka nk’omuhwezi wa iba. Kandi Yehova akeesiga nabikazi Debora na Hulida kuha abaheereza be obuhabuzi, otwariiremu omuramuzi n’omugabe. (Bar. 4:​4-9; 2 Bag. 22:​14-20) Obunaku obu, Yehova naikiriza abakazi Abakristaayo kukora emirimo ye. Banyaanyazi-itwe abo abeesigwa n’ababuurizi, baapayoniya, nari abamiisani. Kandi nibahwera omu kuteera puraani z’ebyombeko by’Obukama, kubyombeka, n’okubireeberera. Abamwe nibaheereza aha Beseeli kandi abandi nibaheereza aha ofiisi z’abavunuuzi. Banyaanyazi-itwe ni nk’eihe rihango eri Yehova arikukoresa kuhikiiriza ebi arikukunda. (Zab. 68:11) Buzima, Yehova tarikureeba abakazi nk’abataine maani nari nk’abatarikubaasa kugira eki baakora.

AB’EISHE-EMWE NIBABAASA KWEGA BATA KUTWARIZA ABAKAZI NK’OKU YEHOVA ARIKUBATWARIZA?

Ab’eishe-emwe, kubaasa kumanya yaaba nitutwariza banyaanyazi-itwe nk’oku Yehova arikubatwariza, twine kuba ab’amazima twaba nitushwijuma emiteekateekyere yaitu n’ebikorwa. Kubaasa kukora ekyo, nituba twine kuhwerwa. Nk’oku ekyoma kya X-ray kirikworeka endwara ei omuntu arwaire omu mutima, nitubaasa kuhwerwa omunywani murungi, n’ekigambo kya Ruhanga kumanya enyehurira zitahikire ezi twine aha bakazi. Nitubaasa kukora ki kutunga obuhwezi obwo?

Buuza omunywani murungi. (Enf. 18:17) Ni kirungi kubuuza omunywani ou turikwesiga oine embabazi, n’emiteekateekyere eringaniire oti: “Nooteekateeka ngu niintwariza nta banyaanyazi-itwe? Nibareeba ngu niimbaha ekitiinisa? Nimbaasa kwongyera kubatwariza gye?” Munywani waawe yaakugambira ahu oine kuhinduramu, yetantare kwehorereza. Kureka, ba oyeteekateekire kukora empinduka ezirikwetengyesa.

Yeyegyese Ekigambo kya Ruhanga. Omuringo murungi gw’okumanya yaaba nitutwariza gye banyaanyazi-itwe n’okushwijuma emiteekateekyere n’ebikorwa byaitu kureeba yaaba nibihikaana n’ebiri omu Kigambo kya Ruhanga. (Heb. 4:12) Twaba nitweyegyesa Baibuli, nitwega ebirikukwata aha bashaija abaatwariize gye abakazi n’abaabatwariize kubi. Reero nitubaasa kugyeragyeranisa ebikorwa byabo n’ebyaitu. Ekindi, okugyeragyeranisa emishororongo ya Baibuli nikituhwera kwetantara kushagika emiteekateekyere egwire tutakimanyire erikukwata aha abakazi. Nk’eky’okureeberaho, 1 Petero 3:​7, nihooreka ngu omukazi aine kuheebwa ekitiinisa, ‘ahabw’okuba n’orwabya rutagumire.’ b Mbwenu shi eki nikimanyisa ngu n’ow’ahansi nari ngu omushaija naamukiza okwetegyereza n’okubaasa? Ngaaha. Gyeragyeranisa ebigambo bya Petero na Abagalatia 3:​26-29 aharikworeka ngu, Yehova atooraine abakazi n’abashaija kutegyeka  na Yesu omu iguru. Twayeyegyesa Ekigambo kya Ruhanga kandi tukabuuza omunywani murungi eki arikuteekateeka aha ku turikutwariza abakazi, nitwega oku turikubaasa kuha banyaanyazi-itwe ekitiinisa ekibashemereire.

ABAREEBEREZI NIBAHA BATA BANYAANYAZI-ITWE EKITIINISA?

Ab’eishe-emwe nabo nibabaasa kwega kutwariza banyaanyazi-itwe omu muringo gw’ekitiinisa barikutooreza abareeberezi abaine rukundo. Abareeberezi nibeebembera bata omu kworeka ngu nibaha banyaanyazi-itwe ekitiinisa? Yetegyereze emiringo etari emwe oku barikukikora.

Nibasiima banyaanyazi-itwe. Entumwa Paulo akateeraho abareeberezi eky’okureeberaho kirungi. Akasiima butunu banyaanyazi-itwe batari bamwe omu baruha ei yaahandiikiire ekibiina kya Rooma. (Rom. 16:12) Noobaasa kuteebereza okushemerererwa oku banyaanyazi-itwe abo baagizire ebaruha ya Paulo ku yaashomiirwe ekibiina! Nikyo kimwe, abareeberezi nibasiima banyaanyazi-itwe aha bw’emitwarize yaabo mirungi n’ahabw’ebi barikukorera Yehova. Eki nikireetera banyaanyazi-itwe kuhurira ngu nibaheebwa ekitiinisa kandi nibasiimwa. Abareeberezi baakoresa ebigambo ebirikugumya banyaanyazi-itwe, nibibaasa kubahiga kugumizamu nibaheereza Yehova omu bwesigwa.—Enf. 15:23.

Abareeberezi baaba nibasiima banyaanyazi-itwe, nibabagambira baihire aha mutima kyenyini eki barikubasiimira. Ahabw’enki? Munyaanyazi-itwe orikwetwa Jessica naagira ati: “Ni kirungi ab’eishe-emwe kugambira munyaanyazi-itwe ngu ‘waakora gye.’ Kwonka nikitushemeza munonga ab’eishe-emwe baatusiimira kyenyini eki twakora, nk’okwegyesa abaana baitu kucureera omu nteerane nari kwakiira omwegi wa Baibuli tukamureeta omu ruteerane n’obu yaakuba atarikutuura haihi naitwe.” Abareeberezi baasiimira banyaanyazi-itwe kyenyini  eki baakora, nibabareetera kwehurira nk’ab’omugasho kandi nk’ab’omuhendo omu kibiina.

Nibahurikiza Banyaanyazi-itwe. Abareeberezi abacureezi nibamanya ngu tibo bonka abarikubaasa kucwamu gye. Nibaikiriza banyaanyazi-itwe kubagambira eki barikuteekateeka aha nshonga, kandi nibabahurikiza gye baaba nibagamba. Abareeberezi baakora batyo, nibagumya banyaanyazi-itwe kandi nabo nibagasirwa. Bata shi? Omureeberezi orikwetwa Gerardo, orikuheereza aha Beseeli, naagira ati: “Nyetegyereize ngu okubuuza banyaanyazi-itwe eki barikuteekateeka nikimpwera kuhikiiriza gye obujunaanizibwa bwangye. Emirundi mingi, banyaanyazi-itwe nibaba bamazire obwire buraingwa barikukora ekintu kukira ab’eishe-emwe.” Omu kibiina, banyaanyazi-itwe baingi ni baapayoniya, n’ahabw’ekyo nibamanya bingi ebirikukwata aha bantu omu kicweka eki barikubuuriramu. Omureeberezi orikwetwa Bryan naagira ati: “Banyaanyazi-itwe baine bingi ebi barikubaasa kukora omu kibiina. N’ahabw’ekyo teeraho kugasirwa omuri ebyo ebi barikumanya!”

Abareeberezi abanyabwengye tibarikurahuka kwanga ebi banyaanyazi-itwe barikugamba. Ahabw’enki? “Ebi munyaanyazi-itwe arikugamba nari ebi arabiremu nibibaasa kuhwera omureeberezi kwetegyereza enshonga omu bwijwire, kandi bi muhwere kugira embabazi,” Nikwo omureeberezi orikwetwa Edward arikugira . (Enf. 1:5) N’obu obumwe omureeberezi atarikugyendera aha bi munyaanyazi-itwe arikumanya nari ebi yaagamba, naabaasa kumusiima.

Nibatendeka banyaanyazi-itwe. Abareeberezi abanyabwengye nibasherura oburyo bw’okutendeka banyaanyazi-itwe. Nk’eky’okureeberaho nibabatendeka oku barikubaasa kwebembera enteerane z’okuza kubuurira haaba hatariho ow’eishe-emwe obatizibwe. Nibabaasa n’okubatendeka oku barikubaasa kukoresa ebyoma ebirikukoresibwa omu kwombeka n’omu kuhunduuza. Abareeberezi aha Beseeli, nibatendeka banyaanyazi-itwe kukora emirimo etari emwe, nk’okuhunduuza, okugura ebintu, okubariirira esente, okuta puroguraamu aha kompyuta, n’ebindi. Ku barikutendeka banyaanyazi-itwe, nibooreka ngu nibabatwara nk’abarikubaasa kandi abeesigwa.

Banyaanyazi-itwe baingi nibakoresa okutendekwa oku barikutunga kuruga aha bareeberezi kugasira abandi. Nk’eky’okureeberaho, abamwe nibakoresa okutendekwa oku barikutunga omu by’okwombeka kuhwera abandi kugaruka kwombeka enju bwanyima y’ekihikiirizi. Banyaanyazi-itwe abandi nibakoresa obukoryo obu barikwega barikubuurira omu rweteeraine kutendeka banyaanyazi-itwe baingi omu buheereza obwo. Banyaanyazi-itwe nibareeba bata abareeberezi abaabatendekire? Munyaanyazi-itwe orikwetwa Jennifer naagira ati: “Obu naabaire nimpwera omu kwombeka Ekyombeko ky’Obukama, omureeberezi akateeraho kuntendeka. Akareeba omurimo ogu naakozire, kandi yaansiima. Nkakunda kukora nawe ahakuba nkaba nimpurira ndi ow’omuhendo kandi ndikwesigwa.”

EBIRUNGI EBIRIKURUGA OMU KUTWARIZA BANYAANYAZI-ITWE NK’AB’EKA YAITU

Nka Yehova, nitukunda banyaanyazi-itwe abeesigwa! N’ahabw’ekyo nitubatwariza nk’ab’eka yaitu. (1 Tim. 5:​1, 2) Nitubeesiimisa kandi nitushemererwa kukora nabo. Nikitushemeza ku barikumanya ngu nitubakunda kandi nitubashagika. Munyaanyazi-itwe orikwetwa Vanessa naagira ati: “Ninsiima munonga Yehova ahabw’okuba omu kibiina kye, ekirimu ab’eishe-emwe abaangumize.” Munyaanyazi-itwe omuri Taiwan naagira ati: “Ninsiima Yehova munonga n’ekibiina kye ahabw’okugira ngu nibafayo aha bakazi n’enyehurira zaitu. Eki nikihamya okwikiriza kwangye kandi kindeetera kwongyera kwesiima ahabw’omugisha gw’okuba omu kibiina kya Yehova.”

Buzima, Yehova naashemererwa yaareeba abashaija abeesigwa barikuteeraho kutwariza abakazi nk’oku arikubatwariza! (Enf. 27:11) Omureeberezi omuri Scotland orikwetwa Benjamin, naagira ati: “Ensi neetwariza abakazi omu muringo ogurikubagarura ahansi. N’ahabw’ekyo ku barikwija aha Kyombeko ky’Obukama, nituba nitwenda ngu bareebe entaaniso.” Twena ka tukore kyona ekirikubaasika kutooreza Yehova turikutwariza banyaanyazi-itwe abakundwa omu muringo gwa rukundo kandi tubahe ekitiinisa ekibashemereire.—Rom. 12:10.