1. Ahabw’enki izooba ry’Ekiijutsyo ni rikuru munonga omu mwaka? (Luka 22:​19, 20)

 EIZOOBA ry’Okwijuka okufa kwa Kristo, ni rikuru munonga omu mwaka aha baheereza ba Yehova. Nigwo mukoro gwonka ogu Yesu yaaragiire abakuratsi be kugira. (Shoma Luka 22:​19, 20.) Twine enshonga nyingi ezirikutureetera kugirira ekihika okuba aha Kiijutsyo. Ka tureebe zimwe aharizo.

2. Ni nshonga ki ezimwe ezirikutureetera kugirira Ekiijutsyo ekihika?

² Ekiijutsyo nikituhwera kuteekateeka aha bukuru bw’ekitambo. Nikituhwera kwijuka oku turikubaasa kworeka ngu nitusiima ekitambo kya Yesu. (2 Kor. 5:​14, 15) Kandi nikitubaasisa kutunga obwire ‘bw’okugumyana.’ (Rom. 1:12) Buri mwaka, baingi abatakibuurira nibaija aha Kiijutsyo. Nangwa bamwe ahariho nibagarukira Yehova ahabw’okubakiira na rukundo. Kandi abasya baingi abarikwija nibahigwa ebi barikureeba n’ebi barikuhurira kutandika kugyendera omu ruguuto rw’amagara. Niyo nshonga ahabw’enki nitutwara Ekiijutsyo nk’eky’omutaano!

3. Ekiijutsyo nikitureetera kita kugira obumwe nk’eishe-emwe omu nsi yoona? (Reeba n’ekishushani)

³ Teekateeka n’oku Ekiijutsyo kirikutureetera kugira obumwe nk’eishe-emwe omu nsi yoona. Abajurizi ba Yehova omu nsi yoona nibeerudaana omu myanya etari emwe eizooba ryaba nirirenga. Twena nituhurikiza orubazo orurikworeka obukuru bw’ekitambo. Nitweshongora ebyeshongoro bibiri by’okuhimbisa, turabyamu obumanyiso, kandi nihabaho okushaba emirundi ena, reero bwanyima ya burikushaba nitugarukamu ngu “amiina.” Omu shaaha nka 24, ebibiina byona  nibiba byaherize kukora ekintu nikyo kimwe. Noobaasa kuteebereza oku Yehova na Yesu barikushemererwa baareeba turi aha Kiijutsyo turikubahaisa ekitiinisa!

4. Nituza kugamba ahari ki omu kicweka eki?

⁴ Omu kicweka eki, nituza kugarukamu ebibuuzo ebi: Nitubaasa kutebeekanisa omutima gwaitu tuta ahabw’Ekiijutsyo? Nitubaasa kuhwera tuta abarikwenda kumanya ebirikukiraho kugasirwa? Kandi nitubaasa kuhwera tuta abatakibuurira? Eby’okugarukamu by’ebibuuzo ebi nibiza kutuhwera kuba twetebeekanisiize gye omukoro ogu ogurikwera.

NITUBAASA KUTEBEEKANISA OMUTIMA GWAITU TUTA AHABW’EKIIJUTSYO?

5. (a) Ahabw’enki twine kuteekateeka aha bukuru bw’ekitambo? (Zaaburi 49:​7, 8) (b) Waayega ki omu vidiyo Ahabw’enki Yesu Yaafiire?

⁵ Gumwe aha miringo mikuru oku turikubaasa kutebeekanisa omutima gwaitu ahabw’Ekiijutsyo n’okuteekateeka aha bukuru bw’ekitambo kya Yesu Kristo. Itwe ahabwaitu, tukaba tutarikubaasa kwecungura kuruga omu kibi n’okufa. (Shoma Zaaburi 49:​7, 8; reeba na vidiyo Ahabw’enki Yesu Yaafiire?) a N’ahabw’ekyo, Yehova akeefeerereza Yesu Omwana we omukundwa yaamuhayo kutufeera. (Rom. 6:23) Twayongyera kuteekateeka aha ki Yehova na Yesu baayefeerereize ahabwaitu, nitwongyera kusiima ekitambo. Nituza kureeba bimwe aha bi Yehova na Yesu baayefeerereize kuhayo ekitambo. Kwonka, ka tubanze tureebe okuhayo ekitambo kikaba nikitwariramu ki?

6. Okuhayo ekitambo kikaba nikitwariramu ki?

⁶ Ekitambo n’omuhendo ogurikuheebwayo kucungura ekintu. Adamu, omuntu w’okubanza akaba ahikiriire obu yaahangwa. Ku yaasiisire, akeefeerereza omugisha gw’okugumaho ebiro byona, kandi yaagufeerereza n’abaana be boona. Yesu akahayo amagara ge agahikiriire nk’ekitambo, kugaruraho eki Adamu yaafeereirwe. Obu Yesu yaabaire ari omu nsi, “tarakozire kibi, n’omu kanwa ke tihararugiremu bugobya.” (1 Pet. 2:22) Obu Yesu yaafa, amagara ge agahikiriire gakaba nigaingana n’agu Adamu yaafeereirwe.—1 Kor. 15:45; 1 Tim. 2:6.

7. Yesu akahikwaho kugyezibwa kwa muringo ki obu yaabaire ari omu nsi?

⁷ Yesu akaguma naayorobera Ishe ow’omu iguru n’obu araabe yaagyeziibwe emirundi mingi ari omu nsi. Akiri muto, akoorobera abazaire be abaabaire batahikiriire n’obu we yaabaire ahikiriire. (Luk. 2:51) Akiri omunyeeto, akaba aine kwangira okugyemeserezibwa kugoma nari kutaba omwesigwa. Kandi Yesu ku yaakuzire, akaba aine kuteeraho kwangira emitego ya Sitaane Omuregi, otwariiremu n’okugyezibwa butunu kutahamira ahari Ruhanga. (Mat. 4:​1-11) Sitaane akaba amaririire kureetera Yesu kushiisha kugira ngu atakahayo ekitambo.

8. Yesu akagumisiriza kugyezibwa ki okundi?

⁸ Obu Yesu yaabaire naaheereza omu nsi, akahiiganisibwa kandi yaatiinatiinisibwa kwitwa. (Luk. 4:​28, 29; 13:31) Kandi akaba aine kugumizamu naagumisiriza obutahikiirira bw’abakuratsi be. (Mak. 9:​33, 34) Obu yaabaire naahozesibwa, akatwarizibwa kubi kandi yaajumwa. Bwanyima akaitwa omu muringo gw’obusaasi bwingi kandi ogurikuhemurana. (Heb. 12:​1-3) Kandi akaba aine kwemera okugyezibwa okwahereerukireyo, ataine burinzi bwa Yehova. b—Mat. 27:46.

9. Ekitambo kya Yesu nikitureetera kwehurira tuta? (1 Petero 1:8)

 ⁹ Buzima, Yesu akeefeerereza kihango kubaasa kuhayo ekitambo. Nitwongyera kukunda Yesu twateekateeka aha ku yaayehaireyo ayekundiire kuba ekitambo ahabwaitu.—Shoma 1 Petero 1:8.

10. Yehova akeefeerereza ki kubaasa kuhayo ekitambo?

¹⁰ Yehova akeefeerereza ki kuhayo Yesu nk’ekitambo? Yehova na Yesu baine omukago guhami nk’ogu omwana arikubaasa kugira na ishe. (Enf. 8:30) Teekateeka oku Yehova yaayehuriire arikureeba Yesu naagumisiriza okugyezibwa kw’emiringo mingi obu yaabaire ari omu nsi. Buzima, Yehova akagira obusaasi bwingi Omwana we ku yaatwariziibwe kubi, akangwa, kandi akabonabonesibwa.

11. Ha eky’okureeberaho ekirikworeka oku Yehova yaayehuriire ku yaareebire Yesu arikwitwa.

¹¹ Omuzaire weena oraafeereirweho omwana naayetegyereza gye obusaasi bwingi obu omuntu arikugira yaafeerwa omwana. Nitwikiririza kimwe omu kuzooka, kwonka ekyo tikirikwihaho obusaasi obu turikugira twafeerwa. Ekyo nikituhwera kumanya obusaasi obu Yehova yaagizire arikureeba omwana we arikubonabona kandi akafa omuri 33 Y.A.K. c—Mat. 3:17.

12. Nitubaasa kukora ki twaba turi haihi kugira Ekiijutsyo?

¹² Kuruga hati kuhika aha Kiijutsyo, ni kirungi waaba nooyeyegyesa nari omu kuramya kw’eka kuta omutima aha kitambo? Koresa Akatabo k’Okucondooza ak’Abajurizi ba Yehova nari ebitabo ebirikushoboorora Baibuli ebirikugamba aha nshonga egyo omu bwijwire. d Noobaasa n’okukuratira entebeekanisa y’okushoma Baibuli ey’Ekiijutsyo eri omu Obuheereza Bwaitu n’Oku Turikutwaza—Akatabo k’Okukoresa. Kandi aha izooba ry’Ekiijutsyo, oteebwa kureeba puroguraamu y’omutaano ey’Okuramya kw’Akasheeshe. Twatebeekanisa omutima gwaitu ahabw’Ekiijutsyo, nitwija kuba tweteekateekire kuhwera n’abandi kukigasirwamu.—Ezr. 7:10.

HWERA ABARIKWENDA KUMANYA EBIRIKUKIRAHO KUGASIRWA

13. Niki eki twine kubanza kukora kuhwera abarikwenda kumanya ebirikukiraho kugasirwa omu Kiijutsyo?

¹³ Nitubaasa kuhwera tuta abarikwenda kumanya ebirikukiraho kugasirwa omu  Kiijutsyo? Eky’okubanza, n’okubeeta. Oyihireho abo abu turikushanga omu kubuurira, nitubaasa kuhandiika abandi abu turikwenda kweta. Nibabaasa kutwariramu abanyabuzaare, abu turikukora nabo, abu turikushoma nabo, n’abandi. Twaba tutaine kaada zirikumara eziteirwe, nitubaasa kubeeta turikuboherereza linki aha byoma byabo. Obundi t’okamanya nihabaasa kugira abaija.—Mub. 11:6.

14. Ha eky’okureeberaho kworeka oku omuntu arikukwatwaho yaayetwa butunu.

¹⁴ Waayeta omuntu butunu nikimuhiga kwija. Eizooba rimwe, munyaanyazi-itwe orikutuura omu ka eyebaganiisemu omu diini akatangaara iba ku yaamugizire ngu naija kumwegaitaho aha Kiijutsyo. Ahabw’enki ekyo kyamutangaarize? N’ahabw’okugira ngu emirundi mingi enyima, akaba naakira kumuhiga kwija aha Kiijutsyo kwonka akaba atarikwija. Mbwenu shi niki ekyareeteire iba kwija aha murundi ogu? Iba akagira ati: “Bakampa kaada y’okuunyeta.” Omureeberezi w’omu kicweka kyabo ou yaabaire naamanya niwe yaamwetsire. Iba akaija aha Kiijutsyo kandi akagumizamu naija n’emyaka mingi eyaakuratsireho.

15. Twine kuguma nitwijuka ki twaba nitweta abantu kwija aha Kiijutsyo?

¹⁵ Ijuka ngu abu turikweta nibaba baine ebibuuzo, okukira munonga baaba batakaijaga omu nteerane zaitu. Ni kirungi kuteekateeka aha bibuuzo ebi barikubaasa kuba baine kandi tukaba tweteekateekire kubigarukamu. (Kol. 4:6) Nk’eky’okureeberaho, abamwe nibabaasa kwebuuza bati: ‘Niki ekiraabe aha mukoro ogu?’ ‘Niguza kumara obwire burikwingana ki?’ ‘Hariho okujwara kw’omutaano?’ ‘Hariho okushashura kubaasa kutaahamu?’ ‘Hariyo okushorooza esente?’ Twaba nitweta omuntu kwija aha Kiijutsyo, nitubaasa kumubuuza tuti: “Haine eki waakwenzire kubuuza?” reero bwanyima noobaasa kumugarukamu. Nitubaasa n’okukoresa vidiyo Okwijuka Okufa kwa Yesu na Niki Ekirikukorerwa aha Kyombeko ky’Obukama? kumuhwera  kwetegyereza ekirikubaho omu nteerane zaitu. Kandi eishomo 28 ery’ekitabo Yesiimire Amagara Ebiro Byona ririmu enshonga nyingi ezi turikubaasa kukoresa kugaaniira nabo.

16. Abarikwija aha Kiijutsyo nibabaasa kuba baine bibuuzo ki ebindi?

¹⁶ Bwanyima y’Ekiijutsyo, abasya abaija nibabaasa kuba baine ebibuuzo ebindi. Nibabaasa kwebuuza, ahabw’enki bakye nibo barya aha bumanyiso, beitu obwo baaba bariho. Nibabaasa n’okubuuza, nitugira Ekiijutsyo emirundi engahi. Kandi nibabaasa kuba nibeebuuza yaaba enteerane z’Abajurizi ba Yehova zoona nizikorwa omu muringo gurikushushana. N’obu enshonga ezirikukira obwingi zirikugambwaho omu rubazo rw’Ekiijutsyo, abasya nibabaasa kuba nibenda kwongyera kushoboorokyerwa. Ekicweka ekiri aha jw.org ekiine omutwe “Why Do Jehovah’s Witnesses Observe the Lord’s Supper Differently From the Way Other Religions Do?” nikibaasa kutuhwera kugarukamu bimwe aha bibuuzo byabo. Nitwenda kukora kyona eki turikubaasa Ekiijutsyo kitakabaireho, aha izooba ry’Ekiijutsyo, na bwanyima yaakyo kuhwera ab’emitima eshemeire kukigasirwamu.—Byak. 13:48.

HWERA ABATAKIBUURIRA

17. Abareeberezi nibabaasa kuhwera bata abatakibuurira? (Ezekieli 34:​12, 16)

¹⁷ Abareeberezi nibabaasa kuhwera bata abatakibuurira omu bwire bw’Ekiijutsyo? Yoreka ngu noobafaho. (Shoma Ezekieli 34:​12, 16.) Ekiijutsyo kitakabaireho, hamya ngu waayeta baingi nk’oku kirikubaasika. Bahamize ngu noobakunda kandi ngu nooyenda kubahwera omu muringo gwona ogu orikubaasa. Beete kwija aha Kiijutsyo. Kandi baija, baakiire n’omuhimbo. Bwanyima y’Ekiijutsyo, gumizamu noohurizana nabo, kandi obahe obuhwezi bw’eby’omwoyo oburikwetengyesa kugarukira Yehova.—1 Pet. 2:25.

18. Abari omu kibiina boona nibabaasa kuhwera bata abatakibuurira? (Abarooma 12:10)

¹⁸ Abari omu kibiina boona nibabaasa  kuhwera abatakibuurira abaija aha Kiijutsyo. Bata shi? Turikubatwariza omu muringo gwa rukundo, ogw’embabazi, kandi ogw’ekitiinisa. (Shoma Abarooma 12:10.) Ijuka ngu ab’eishe-emwe abo abakundwa nibabaasa kuba baabaire bataine mujinya gw’okwija aha ruteerane. Obundi nibabaasa kuba baabaire nibatiina ngu tibaraayakiirwe gye. e N’ahabw’ekyo yetantare kubabuuza ebibuuzo ebirikubahemura nari kugamba ebirikubaasa kubareetera kwehurira kubi. (1 Tes. 5:11) Ab’eishe-emwe na banyaanyazi-itwe aba n’Abakristaayo bagyenzi baitu. N’ahabw’ekyo nitushemererwa kugaruka kuramya hamwe nabo.—Zab. 119:176; Byak. 20:35.

19. Nitugasirwa tuta twaijuka okufa kwa Yesu?

¹⁹ Buzima nikitushemeza ahabw’okugira ngu Yesu akatuteeraho entebeekanisa y’okwijuka okufa kwe buri mwaka. Twabaho aha Kiijutsyo nitugasirwa, kandi n’abandi nibagasirwa. (Isa. 48:​17, 18) Nitwongyera kukunda Yehova na Yesu, nitworeka ngu nitusiima eki baatukoreire. Nituhamya omukago gwaitu n’Abakristaayo bagyenzi baitu. Kandi nitubaasa kuhwera abandi kwega oku nabo barikubaasa kwesiimira emigisha ei turikutunga ahabw’ekitambo. Ka tukore kyona eki turikubaasa kwetebeekanisiza eizooba rikuru omu mwaka, ery’Ekiijutsyo!