1. Niki ekirikukwija omu biteekateeko waateekateeka ahari rukundo ya Yehova?

 NOOTEEKATEEKA ngu Yehova ni wa muringo ki? Noomuteekateekaho ki waaba noomushaba? N’obu Yehova araabe atarikureebwa, Baibuli neemugambaho omu miringo mingi. Yehova naayetwa ‘eizooba, engabo n’omuriro ogurikurya busha.’ (Zab. 84:11; Heb. 12:29) Yehova naagyeragyeranisibwa n’eibaare rya safiro, omuringa gweziibwe, n’omuhanganzima. (Ezk. 1:​26-28) Ebigambo bimwe ebi Baibuli erikukoresa kushoborora ahari Yehova nibibaasa kutureetera kutangaara nari kutiina.

2. Niki ekirikubaasa kuremesa bamwe kwirira haihi Yehova?

² Ahabw’okugira ngu titurikubaasa kureeba Yehova, nikibaasa kutugumira kwikiriza ngu naatukunda. Abamwe nibateekateeka ngu Yehova tarikubaasa kubakunda ahabw’ebi baarabiremu. Ahabw’okugira ngu nibabaasa kuba baabaire bataine ishebo orikubakunda. Yehova naayetegyereza oku turikwehurira n’oku turikukwatwaho enyehurira nk’ezo. Naakoresa Ekigambo kye kutuhwera kumanya emitwarize ye mirungi.

3. Ahabw’enki twine kuteeraho kwetegyereza rukundo ya Yehova?

³ Ekigambo kimwe ekirikushoboorora gye eki Yehova ari, ni rukundo. (1 Yoh. 4:8) Baibuli neegira ngu Ruhanga aba rukundo. Niyo erikumuhiga kukora buri kimwe. Ruhanga aine rukundo mpango kandi naagyoreka n’abatarikumukunda. (Mat. 5:​44, 45) Omu kicweka eki, nituza kugamba ahari Yehova, na rukundo ye. Twayongyera kwega ahari Ruhanga waitu, nitwongyera kumukunda.

YEHOVA NAATUKUNDA MUNONGA

4. Embabazi za Yehova nizikureetera kwehurira ota? (Reeba n’ekishushani.)

⁴ “Yehova aine embabazi nyingi.” (Yak. 5:11) Omu Baibuli, Yehova naayegyeragyeranisa na nyina omwana oine embabazi  nyingi. (Isa. 66:​12, 13) Teekateeka aha ku omuzaire arikureeberera gye omwana we. Naamurembesereza kandi naamugambira omu iraka rirungi. Yaarira nari yaaba aine obusaasi, naateeraho kumuha eki arikwenda. Twaba twine obusaasi, nitubaasa kugira obwesigye ngu Yehova naatukunda. Omuhandiiki wa zaaburi akagira ati: “Ku nteekateeka bingi, naayemereza omutima, okuhuumuriza kwawe kugwisa gye amagara gangye.”—Zab. 94:19.

5. Rukundo ya Yehova etarikuhinduka neemanyisa ki ahariiwe?

⁵ Yehova noomwesigwa. (Zab. 103:8) Tarikurekyera aho kutukunda twashobya. Eihanga rya Israeli rikagwisa kubi Yehova emirundi mingi, kwonka abaayeteisize akabooreka rukundo etarikuhwaho arikugira ati: “Ahabw’okuba okambeera enkora-mutima, waaba ow’okuheebwa ekitiinisa, naanye naakukunda.” (Isa. 43:​4, 5) Rukundo ya Yehova terikuhinduka. Butoosha nitubaasa kumwesiga. N’obu twakuba tukozire enshobe z’amaani, Yehova tarikututsigaho. Twayeteisa kandi tukamugarukira naaba naakitukunda. Naaraganisa ngu naaza ‘kutusaasirira kimwe.’ (Isa. 55:7) Baibuli neegamba aha kusaasira okwo ‘nk’ebiro eby’okugaruka obusya . . . kuruga ahari Yehova.’—Byak. 3:19.

6. Nitwega ki ahari Yehova omuri Zekaria 2:8?

⁶ Shoma Zekaria 2:8. Ahabw’okugira ngu Yehova naatukunda naafayo aha nyehurira zaitu kandi ayeteekateekire kuturinda. Naayehurira kubi twagira obusaasi. N’ahabw’ekyo, nitubaasa kushaba tuti: “Ondinde nk’emboni y’eriisho” ryawe. (Zab. 17:8) Eriisho n’ekicweka ky’omuhendo aha mubiri. N’ahabw’ekyo, Yehova yaatugyeragyeranisa n’emboni y’eriisho rye naaba ari nk’orikugira ngu, ‘Orikuhitsya akabi aha bantu bangye, naaba yaakahitsya aha kintu kyangye eky’omuhendo.’

7. Ahabw’enki twine kuhamya obwesigye bwaitu omuri rukundo ya Yehova?

⁷ Yehova naayenda ngu tugire obuhame ngu naakunda buri muntu okwe. Kwonka naamanya ngu ebi turikuba turabiremu, nibibaasa kutureetera kubangaanisa yaaba naatukunda. Nari nitubaasa kuba nituraba omu mbeera ezirikugyeza obwesigye bwaitu omuri rukundo ye. Niki ekirikubaasa kutuhwera kuhamya obwesigye bwaitu omuri rukundo ya Yehova? N’okumanya oku Yehova arikworeka ngu naakunda Yesu, entoore, naitwe twena.

 OKU YEHOVA ARIKWOREKA RUKUNDO YE

8. Ahabw’enki Yesu yaabaire naahamya ngu Yehova naamukunda?

⁸ Kumara emyaka mingi, Yehova na Yesu bakagirira omukago kuhami na rukundo. Omukago gwabo nigwo gurikukirayo emyaka mingi omu nsi n’omu iguru. Yehova akooreka ngu naakunda Yesu nk’oku kirikworekwa omuri Matayo 17:5. Yehova akaba naabaasa kugira ati: ‘Ogu niwe ndikukunda.’ Kwonka, akaba naayenda kutumanyisa oku arikukunda Yesu, niyo nshonga ahabw’enki yaagizire ati: “Ogu n’Omwana wangye ou nkunda.” Yehova akaba naayesiimisa Yesu n’eki yaabaire ari haihi kukora. (Efe. 1:7) Kandi Yesu akaba atarikubangaanisa aha nyehurira ezi Ishe yaabaire amwiniire. Akaba naahamiza kimwe ngu Ishe naamukunda. Kandi emirundi mingi akooreka obwesigye abu yaabaire aine omuri rukundo eya Ishe.—Yoh. 3:35; 10:17; 17:24.

9. Ni kigambo ki ekirikukoresibwa kushoboorora rukundo ei Yehova ainiire entoore? Shoboorora. (Abarooma 5:5)

⁹ Kandi Yehova ayorekire ngu naakunda entoore. (Shoma Abarooma 5:5.) Yetegyereze ekigambo “kushukirwe.” Okucondooza kumwe nikukishoboorora “nk’okweshuka kw’amaizi g’omugyera.” Ebi ka n’ebigambo by’amaani ebirikworeka rukundo mpango ei Yehova ainiire entoore! Eki nikibareetera kumanya ngu ‘nibakundwa Ruhanga.’ (Yud. 1) Entumwa Yohaana akooreka enyehurira ezi entoore baine obu yaahandiika ati: “Mureebe okukunda oku Isheboona yaatukunzire oku kuri, itwe okwetwa abaana ba Ruhanga!” (1 Yoh. 3:1) Mbwenu shi Yehova naakunda entoore bonka. Ngaaha, Yehova ayorekire ngu naatukunda twena.

10. Niki ekirikukirayo kukuhamiza ngu Yehova naakukunda?

¹⁰ Niki ekirikukirayo kworeka rukundo ya Yehova? Ekitambo, nikyo kikorwa kya rukundo ekirikukirayo omu iguru n’omu nsi. (Yoh. 3:16; Rom. 5:8) Yehova akahayo omwana we omukundwa yaamwikiriza kutufeera twena kugira ngu tusaasirwe ebibi byaitu kandi tube banywani be. (1 Yoh. 4:10) Twateekateeka munonga aha muhendo ogu Yehova na Yesu baashashwire, nitubaasa kwongyera kwetegyereza oku barikukunda buri omwe ahariitwe. (Gal. 2:20) Ekitambo rikaba ritari eibanja eri Yehova yaabaire aine kushashura. Kureka kikaba kiri ekiconco kya rukundo. Yehova akeefeerereza Yesu owaabaire naakirayo kuba ow’omuhendo ahariiwe. Akaikiriza Omwana we kubonabona n’okwitwa ahabwaitu.

11. Nitwega ki omuri Yeremia 31:3?

¹¹ Nk’oku twareeba, Yehova tarikutukunda kyonka, kureka naayoreka oku arikutukunda. (Shoma Yeremia 31:3.) Yehova naatweyiriza haihi ahabw’okutukunda. (Gyeragyeranisa Eky’Ebiragiro 7:​7, 8.) Tihaine ekirikubaasa kututaanisa na rukundo ye. (Rom. 8:​38, 39) Rukundo egi neekureetera kwehurira ota? Shoma Zaaburi 23, kandi oyetegyereze oku rukundo ya Yehova n’okufayo kwe byakwatsire ahari Daudi, n’oku birikutukwataho.

RUKUNDO YA YEHOVA NEEKUREETERA KWEHURIRA OTA?

12. Noobaasa kugamba ota omu bugufu ahari Zaaburi 23?

¹² Shoma Zaaburi 23:​1-6. Zaaburi 23 n’ekyeshongoro ekirikworeka obwesigye obu Daudi yaabaire aine omuri rukundo ya Yehova n’okufayo kwe. Daudi, omuhandiiki wa zaaburi egi, naashoboorora omukago guhami ogu yaabaire aine n’Omuriisa we, Yehova. Daudi ku yaabaire aikiriza Yehova kumwebembera akaba ahurira aine oburinzi kandi akaba ayongyera kumwesigira kimwe. Daudi akaba naamanya ngu Yehova naija kukuguma naamukunda ebiro by’amagara ge goona. Niki ekyamuhweraire kugira obwesigye obwo?

13. Ahabw’enki Daudi yaabaire naahamya ngu Yehova naamufaho?

 ¹³ ‘Tindikwija kukyena kintu kyona.’ Daudi akaba naareeba ngu tihaine eki akyenire, ahabw’okugira ngu Yehova akaba naamuha ebirikwetengyesa byona. Daudi akaba naasiimwa Yehova kandi aine omukago murungi nawe. Niyo nshonga ahabw’enki yaabaire naahamiza kimwe ngu n’obu haakubaho ki, Yehova naija kugumizamu naamureeberera. Ahabw’okugira ngu Daudi akaba naamanya ngu Yehova naamufaho, kikamuhwera kuterarikirira, kugira okushemererwa kwingi n’okumarwa.—Zab. 16:11.

14. Yehova naatufaho ata omu muringo gwa rukundo?

¹⁴ Yehova naatureeberera omu muringo gwa rukundo okukira munonga twahikwaho ebintu bibi. Claire, a oheereize aha Beseeli emyaka erikurenga 20, akeehurira nk’otaine kihwera obu ab’eka ye bahikwaho oburemeezi bukurataine. Ishe akarwara endwara y’okushanyarara, omwe aha barumuna akabingwa omu kibiina kandi ab’eka ye bakafeerwa eby’emishuuburo yaabo otwariiremu n’enju yaabo. Yehova akooreka ata ngu naabafaho omu muringo gwa rukundo? Claire naagira ati: “Yehova akahamya ngu ab’eka yangye baatunga ebirikwetengyesa buri izooba. Kaingi, Yehova akaba atuha ebirikukira aha bi naabaire ninteekateeka! Nikinshemeza ku ndikwijuka obu Yehova yaanyoreka ngu naankunda. Okwijuka ebyo kikampwera kuguma mpami naahikirweho oburemeezi obundi.”

15. Ahabw’enki Daudi yaagarukirwemu amaani? (Reeba n’ekishushani.)

¹⁵ ‘Angaruramu amaani.’ Obumwe, Daudi akaba ayehurira kubi ahabw’oburemeezi n’okugyezibwa okwamuhikireho. (Zab. 18:​4-6)  Kwonka, okumanya ngu Yehova naamukunda kandi naamufaho kikaba kimugumya. Yehova akeebembera munywani we owaabaire aruhire yaamuhitsya omu ‘bunyaatsi buto n’amaizi agarikusheneneka.’ N’ekyarugiremu, Daudi akagarukwamu amaani, kandi yaabaasa kugumizamu naamuheereza.—Zab. 18:​28-32.

16. Rukundo ya Yehova ekuhwereire eta kugarukwamu amaani?

¹⁶ Nikyo kimwe obunaku obu, rukundo ya Yehova neetubaasisa kuraba omu kugyezibwa n’emirabanamu. (Tonz. 3:22; Kol. 1:11) Teekateeka aha ky’okureeberaho kya Rachel. Akacweka entegye obu iba yaamutsigaho kandi akatsigaho Yehova omu bwire bw’ekigwererezi kya COVID-19. Yehova akakora ki kumuhwera? Naagira ati: “Yehova akandeteera kuhurira ngu ninkundwa. Akampwera kutunga abanywani abaabaire bamara obwire bwingi naanye, abaabaire bandeetera eby’okurya, baakanyoherereza obutumwa n’ebyahandiikirwe, bakasheka naanye kandi bakanyijutsya ngu Yehova naanfaho. Butoosha ninsiima Yehova ahabw’okumpa eka mpango erikunkunda.”

17. Ahabw’enki Daudi yaabaire ‘atarikutiina kabi koona?’

¹⁷ “Tinditiina kabi koona, ahabw’okuba ori hamwe naanye.” Kaingi, Daudi akaba ayeshanga omu kabi kandi aine abazigu b’amaani. Kwonka nabwo, rukundo ya Yehova ekaba emureetera kuhurira aine oburinzi. Yehova akaba ari hamwe nawe omu buri mbeera kandi eki kikamugumya. N’ahabw’ekyo Daudi akeeshongora ati: ‘[Yehova] akancungura ebyabaire nibintiinisa byona.’ (Zab. 34:4) Ebi Daudi yaabaire naatiina bikaba biri ebya buzima, kwonka rukundo ya Yehova ekaba neekirira kimwe okutiina kwe.

18. Ahabw’enki orikubaasa kuhamya ngu rukundo ya Yehova neekugumya waaba otiinire?

¹⁸ Okugira obuhame ngu Yehova naatukunda nikibaasa kutugumya kita twahikwaho embeera ezirikutiinisa? Payoniya orikwetwa Susi naashoborora oku we na iba baayehuriire mutabani waabo ku yaayeyitsire: “Ekintu kibi ku kirikubaho kitaraariire nikibaasa kukureetera kwehurira nk’otaine kihwera. Kwonka rukundo ya Yehova neetureetera kuhurira twine oburinzi.” Rachel, owaaba yaagambirweho naagira ati: “Ekiro kimwe nkaba ninyehurira kubi munonga kandi ntiinire, nkarira ndikutakira Yehova. Omu nkaire ako nkahurira Yehova arikunyikaikainisa nk’oku omuzaire arikurembesereza omwana we kandi bwanyima nkatwarwa oturo. Tindikwija kwebwa  ekyabaireho obwire obwo.” Omureeberezi orikwetwa Tasos akamara emyaka ena omu kihome, ahabw’okwanga kuza omu mahe. Mbwenu shi akeetegyereza ata ngu Yehova naamukunda kandi naamufaho? Naagira ati: “Yehova akampwera kutunga ebirikwetengyesa nangwa n’okukiraho. Kikampwera kuhamya ngu nimbaasa kwongyera kumwesiga. Kandi, Yehova arikukoresa omwoyo gwe ogurikwera akampwera kugira okushemererwa, n’obu ndaabe naabaire ndi omu mwanya ogurikundeetera kugira amaganya. Eki kikampamiza ngu naateeraho kumwirira haihi, ninyongyera kugasirwa omu burungi bwe. N’ahabw’ekyo nkaba payoniya w’obutwire ndi omu kihome.”

YIRIRA HAIHI RUHANGA WAAWE OW’EMBABAZI NYINGI

19. (a) Okumanya ngu Ruhanga naatukunda nikikwata kita aha bi turikugambaho omu kushaba? (b) Ni nshoboorora ki ya rukundo ya Yehova erikukukwataho? (Reeba akabokusi “ Ebigambo Ebirikutuhwera Kumanya ngu Yehova Naatukunda Munonga.”)

¹⁹ Eby’okureeberaho ebi twashwijuma omu kicweka eki byatuhamiza ngu Yehova, Ruhanga owa rukundo ari hamwe naitwe. (2 Kor. 13:11) Naafayo ahari buri omwe. Nituhamiza kimwe ngu ‘embabazi ze zitwehinguririze.’ (Zab. 32:10) Ku turikwongyera kuteekateeka ahari rukundo ye, naaba owaabuzima ahariitwe kandi nitwongyera kuhurira turi haihi nawe. Nitubaasa kumushaba tutatiinire kandi tumugambire oku turikwehurira ahabwa rukundo ye. Nitubaasa kumugambira byona ebirikutwerarikiriza, twine obwesigye ngu naija kutuhwera kandi aine ekihika ky’okutuhwera.—Zab. 145:​18, 19.

20. Rukundo ya Yehova neetureetera eta kwirira haihi nawe?

²⁰ Nk’oku turikuba nitwenda kuba haihi n’omuriro aha izooba ry’embeho, nikwo na rukundo ya Yehova erikutwiriza haihi nawe. Rukundo ya Yehova n’ey’amaani kandi n’ey’embabazi. N’ahabw’ekyo, shemererwa ahabw’okugira ngu Yehova naakukunda. Kandi okyoreke orikugira oti: “Ninkunda” Yehova!—Zab. 116:1.