1-2. Abaheereza ba Yehova abeesigwa nibabaasa kuhikwaho bureemezi ki?

 EBINTU bibi ebirikubaho nibibaasa kuhindura embeera yaitu omu kiro kimwe. Nk’eky’okureeberaho, ow’eishe-emwe omwesigwa orikwetwa Luis a akaceberwa yaashangwa aine ekookoro etari ya butoosha. Omushaho akamugira ngu aine ameezi makye agu araabe akihuriire. Monika na iba bakaba baine bingi by’okukora omu buheereza. Kwonka eizooba rimwe, Monika akamanya ngu iba omureeberezi akaba ari ekirumira habiri kumara emyaka mingi. Olivia, munyaanyazi-itwe otarimu bushwere, akagyemeserezibwa kuruga omuka ye ahabw’eihunga eryabaire niriza kuteera ekicweka kyabo. Ku yaagarukire, akashanga eihunga ricwekyereize enju ye. Omu kaire kakye, embeera z’abantu abo zikahindukira kimwe. Hariho ekintu kibi ekiraakuhikireho kikahindura embeera yaawe ahonaaho?

² Naitwe abaheereza ba Yehova niturwara, kandi tuhikwaho embeera zigumire ezirikuhika aha bantu boona. Kandi nikibaasa kutwetengyesa kugumisiriza okuhakanisibwa nari okuhiiganisibwa abarikwanga abaheereza ba Ruhanga. N’obu Yehova atarikuzibira ebintu bibi ebyo kutuhikaho, naaraganisa kutuhwera. (Isa. 41:10) Ahabw’obuhwezi bwe, nitubaasa kuguma twine okushemererwa, tucwemu gye, kandi tugume tumuhamiireho n’omu mbeera ezigumire munonga. Omu kicweka eki, nituza kushwijuma emiringo ena oku Yehova arikutuhwera twahikwaho embeera zigumire. Kandi nituza kureeba  eki twine kukora kugasirwa omu buhwezi obu arikutuha.

YEHOVA NAIJA KUKURINDA

3. Twahikwaho embeera mbi, nitubaasa kugimirwa kukora ki?

³ Oburemeezi. Twahikwaho ekintu kibi, nitubaasa kugumirwa kuteekateeka gye n’okucwamu gye. Ahabw’enki? Nitubaasa kuba twine obusaasi bwingi kandi twerarikirire munonga. Nitubaasa kuba nk’abarikubandagira omu ruho, tutarikumanya ei twine kuraba. Yetegyereze oku banyaanyazi-itwe babiri abaagambwaho baayehuriire obu baabaire baine oburemeezi. Olivia naagira ati: “Bwanyima y’eihunga kucwekyereza enju yangye, nkaburabura kandi naarengwa obusaasi.” Monika naagamba oku yaayehuriire iba ku yaamureebize. Naagira ati: “Nkagira ekyekango, naahurira obusaasi bwingi omu mutima. Nkaba ntarikumanya eki ndikubaasa kukora. Ekyabaire nikireebeka nk’ekitarikubaasa kumbaho, nikyo kyambaireho.” Yehova naaraganisa kutuhwera ata twarengwa obusaasi?

4. Kurugiirira aha Abafilipi 4:​6, 7, Yehova naaturaganisa ki?

⁴ Eki Yehova arikukora. Naaraganisa kutuha eki Baibuli erikweta “obusingye bwa Ruhanga.” (Shoma Abafilipi 4:​6, 7.) Obusingye obu, n’okwikaikana kw’omu biteekateeko n’obunanukye bw’omu mutima ebi turikutunga ahabw’okugira omukago murungi nawe. Obusingye obwo ‘burengire okwetegyereza kw’omuntu weena,’ kandi ni burungi kukira oku turikuteekateeka. Orashabire Yehova, reero bwanyima okagira obusingye? Enyehurira egyo nibwo ‘busingye bwa Ruhanga.’

5. Obusingye bwa Ruhanga niburinda buta ebiteekateeko byaitu n’emitima yaitu?

⁵ Ekyahandiikirwe nikyo kimwe nikigira ngu obusingye bwa Ruhanga nibwija ‘kurinda emitima yaanyu n’obwengye bwanyu.’ Ekigambo ‘okurinda’ kikaba kikoresibwa omu mahe kugamba aha baserukare abaabaire nibarinda orurembo kutataahirirwa. Ab’omu rurembo bakaba nibabaasa kubyama omu busingye barikumanya ngu abaserukare barinzire orurembo. Nikyo kimwe, obusingye bwa Ruhanga bwarinda ebiteekateeko n’emitima yaitu, nitwikaikana turikumanya ngu twine oburinzi. (Zab. 4:8) Nka Haana, n’obu embeera yaitu yaakuba etahindukire ahonaaho, nitubaasa kuhurira twine obusingye. (1 Sam. 1:​16-18) Kandi twaba twikaikaine, nituteekateeka gye kandi tucwamu gye.

6. Nitubaasa kukora ki kugasirwa omu busingye bwa Ruhanga? (Reeba n’ekishushani)

⁶ Eki twine kukora. Waatunga oburemeezi yeta omurinzi. Ota? Shaba kuhitsya  waahurira oine obusingye bwa Ruhanga. (Luk. 11:9; 1 Tes. 5:17) Luis, owaaba yaagambirweho, naashoboorora oku we n’omukazi we Ana, baabaasize kugumisiriza ku baamanyire ngu aine obwire bukye obu araabe akiriho. Akagira ati: “Omu bwire nk’obwo nikiba kigumire kucwamu aha bikwatiraine n’obujanjabi n’enshonga ezindi. Kwonka okushaba kutuhweraire munonga kugira obusingye omu mbeera egi.” Luis n’omukazi we bakagira ngu bakashaba Yehova munonga kandi emirundi mingi ngu abahe obusingye bw’omu biteekateeko, okwikaikana omu mutima, n’obwengye bw’okucwamu gye. Kandi bakeetegyereza ngu akaba naabahwera. Waatunga oburemeezi, yezirikire okushaba, kandi noija kutunga obusingye bwa Yehova oburarinde omutima gwawe n’ebiteekateeko byawe.—Rom. 12:12.

YEHOVA NAIJA KUKUHAMYA

7. Nitubaasa kwehurira tuta twahikwaho embeera egumire?

⁷ Oburemeezi. Twaba twine oburemeezi, enyehurira zaitu, ebiteekateeko byaitu n’oku turikutwaza nibibaasa kutaringaanira. Nitubaasa kuba nk’eryato eririkutwarwatwarwa ebingonzi. Ana, owaaba yaagambirweho, akagira ngu akashoberwa munonga bwanyima y’okufa kwa iba, Luis. Akagira ati: “Ku naabaire nyehurira nk’otaine mugasho, nkaba nyesaasibwa, kandi nguubwa kubi ahabw’okufa kwe.” Obumwe, Ana akaba agira eihamba kandi agumirwa kucwamu aha nshonga ezi Luis yaabaire naacwamu. Obumwe, akaba ayehurira nk’owaateerwa eihunga ry’amaani. Yehova naatuhwera ata twagira enyehurira mbi nk’ezo?

8. Nk’oku kirikworekwa omuri Isaaya 33:​6, Yehova naaturaganisa ki?

⁸ Eki Yehova arikukora. Naatuhamiza ngu naija kutuhwera kuhama. (Shoma Isaaya 33:6.) Emeeri yaaterwa eihunga neebaasa kutandika kuzongazonga. Kubaasa kuhwera emeeri kuhama, emeeri enyingi zikozirwe n’ebyoma ahansi omu mbaju ebirikubaasa kuzihwera. Ebyoma ebi nibibaasa kureetera emeeri kurekyera aho kuzongazonga, kireetere abagiriho kugira oburinzi n’okugyenda baikaikaine. Kwonka, ebyoma ebyo kubaasa kukora gye emeeri eine kugumizamu neegyenda. Nikyo kimwe, Yehova naija kutuhamya twagumizamu turi abeesigwa omu bwire bw’oburemeezi.

9. Eby’okukoresa omu kucondooza nibibaasa kutuhwera bita kuhama? (Reeba n’ekishushani)

⁹ Eki twine kukora. Waayehurira kubi munonga, kora kyona eki orikubaasa kuguma  oine entebeekanisa nungi y’eby’omwoyo. Amazima gari ngu, noobaasa kutakora nk’ebi obaire nookora, kwonka ijuka ngu Yehova aringaniire. (Gyeragyeranisa Luka 21:​1-4.) Omu ntebeekanisa yaawe y’eby’omwoyo, taho obwire bw’okweyegyesa n’okuteekateeka. Ahabw’enki? Yehova naakoresa ekibiina kye kutuha ebirikubaasa kutuhwera kuguma tuhami. Noobaasa kubitunga orikukoresa eby’okucondoozamu ebiriho omu rurimi rwawe, nka JW Library^®, Watch Tower Publications Index, n’Akatabo k’Okucondooza ak’Abajurizi ba Yehova. Monika, owaaba yaagambirweho, akagira ngu akacodoooza aha buhabuzi obwabaire nibubaasa kumuhwera yaagira enyehurira mbi z’amaani. Nk’eky’okureeberaho, akacondooza aha kigambo “ekiniga.” Kandi obumwe akaba acondooza aha “kureebya” nari “obwesigwa.” Reero akaba ashoma kuhitsya yaayehurira gye. Akagira ati: “Obu naatandika kucondooza aha nshonga ezo nkaba nyerarikiriire. Kwonka ku naagumiizemu ninshoma, okaba nooshusha ngu Yehova ambumbatiire. Nkamanya ngu naayetegyereza enyehurira zangye kandi naampwera.” Obuhwezi nk’obwo kuruga ahari Yehova, naiwe nibubaasa kukuhwera kuhama.—Zab. 119:​143, 144.

YEHOVA NAIJA KUKUSHAGIKA

10. Nitubaasa kwehurira tuta bwanyima y’okuhikwaho embeera egumire?

¹⁰ Oburemeezi. Bwanyima y’okuhikwaho oburemeezi, obumwe nitubaasa kuhurira tutaine maani omu mubiri n’omu nyehurira. Nitubaasa kwehurira nk’omwiruki ohutaire orikugyenda naacumbagira, kwonka yaabaire nairuka munonga. Nitubaasa kugumirwa kukora ebi twabaire nitukora nari tuburwe omujinya gw’okwejumba omu bi twabaire nitukunda. Nka Eliya, nitubaasa kugumirwa kwimuka, turikwenda kuguma tubyami. (1 Bag. 19:​5-7) Yehova naaraganisa kutukorera ki twaba nituhurira tutaine maani?

11. Ni muringo ki ogundi oku Yehova arikutuhwera? (Zaaburi 94:18)

¹¹ Eki Yehova arikukora. Naaraganisa kutushagika. (Shoma Zaaburi 94:18.) Nk’oku omwiruki ohutaire arikuba naayenda obuhwezi kubaasa kugyendagyenda, naitwe nikibaasa kutwetengyesa kuhwerwa kubaasa kugumizamu nituheereza Yehova. Omu mbeera nk’egyo, Yehova naatuhamiza ati: “Nyowe, [Yehova] Ruhanga waawe, ndyakukwata omukono gwa buryo, nkugire nti: Otatiina, naija kukuhwera.” (Isa. 41:13) Omugabe Daudi akatunga okuhwerwa nk’okwo.  Ku yaagizire oburemeezi n’abazigu, akagira Yehova ati: “Omukono gwawe gwa buryo gumbangiire.” (Zab. 18:35) Kwonka Yehova naatushagika ata?

12. Ni baahi obu Yehova arikukoresa kutuhwera twaba tuhwairemu amaani?

¹² Yehova naakira kutushagika arikuhiga abandi kutuhwera. Nk’eky’okureeberaho, eizooba rimwe obu Daudi yaabaire ahwairemu amaani, munywani we Yonasaani akamutaayaayira yaamugumya omu nyehurira, yaamugambira n’ebigambo ebyamugumize. (1 Sam. 23:​16, 17) Kandi, Yehova akatoorana Elisa kugumya Eliya. (1 Bag. 19:​16, 21; 2 Bag. 2:2) Obunaku obu, Yehova naabaasa kukoresa ab’eka yaitu, abanywani, nari abareeberezi kutushagika. Kwonka, twaba twine oburemeezi, nitubaasa kwenda kwetaanisa aha bandi. Nituba nitwenda ngu tube twenka. N’ekya butoosha kwehurira otyo. Mbwenu shi nitubaasa kukora ki kutunga obushagiki bwa Yehova?

13. Niki eki twine kukora kubaasa kugasirwa omu bushagiki bwa Yehova? (Reeba n’ekishushani)

¹³ Eki twine kukora. Teeraho kwangira okwe- nda kwetaanisa aha bandi. Twayetaanisa aha bandi, nitubaasa kutandika kweteekateekaho twenka n’oburemeezi obu twine. Emiteekateekyere nk’egyo neebaasa kukwata n’aha ku turikucwamu. (Enf. 18:1) Amazima gari ngu, buri omwe naayenda obwire bw’okweheerera, na munonga yaahikwaho embeera egumire. Kwonka, twayetaanisa aha bandi kumara obwire buraingwa, nituba nitweyiriza hare n’omuringo ogu Yehova arikukoresa kutushagika. N’ahabw’ekyo, n’obu embeera yaakuba egumire eta, ikiriza obuhwezi bw’ab’eka yaawe, banywani baawe, n’abareeberezi. Bareebe nk’abu Yehova arikukoresa kukushagika.—Enf. 17:17; Isa. 32:​1, 2.

YEHOVA NAIJA KUKUHUUMURIZA

14. Ni mbeera ki erikutiinisa erikubaasa kutuhikaho?

¹⁴ Oburemeezi. Nitubaasa kuhikwaho embeera ezirikutiinisa munonga. Abaheereza ba Yehova abeesigwa abarikugambwaho omu Baibuli, obumwe bakahikwaho embeera ezaabareeteire kugira amaganya n’okutiina ahabw’abazigu baabo nari okugyemeserezibwa okundi. (Zab. 18:4; 55:​1, 5) Naitwe nitubaasa kuba nituhakanisibwa aha ishomero, aha murimo, ab’eka yaitu, nari gavumenti. Nitubaasa kuba nitutiina ngu nitubaasa kufa ahabw’endwara ei twine. Omu bwire nk’obwo, nitubaasa kwehurira nk’abatarikubaasa  kwehwera nk’omwana muto. Mbwenu shi omu mbeera nk’ezo Yehova naatuhwera ata?

15. Zaaburi 94:​19, nihatuhamiza hata?

¹⁵ Eki Yehova arikukora. Naatuhuumuriza kandi agwitsa gye emitima yaitu. (Shoma Zaaburi 94:19.) Zaaburi egi neebaasa kutureetera kuteekateeka aha mwishiki muto otiinire, kandi atarikubaasa kubyama ahabw’enjura nyingi y’eihunga. Nitubaasa kuteera akashushani ishe arikwija ahu ari, akamukiikira kuhitsya yaagwejegyera. N’obu enjura yaakuba ekiriyo neegwa, okuhuumurizibwa oku ishe arikumuha nikumureetera kwehurira aine oburinzi. Naitwe twahikwaho embeera zirikutiinisa, nikibaasa kwetengyesa Tataitwe ow’omu iguru kutukiikira omu muringo gw’akamanyiso kuhitsya enyehurira ezo zaahwaho. Mbwenu shi nitubaasa kutunga tuta okuhuumurizibwa nk’okwo kuruga ahari Yehova?

16. Nitubaasa kukora ki kubaasa kugasirwa omu kuhuumurizibwa kwa Yehova? (Reeba n’ekishushani)

¹⁶ Eki twine kukora. Butoosha gira obwire bw’okuba na Yehova orikushaba kandi okashoma Ekigambo kye. (Zab. 77:​1, 12-14) Reero waaba ori omu mbeera egumire, noija kubanza kuhungira ahari Sho ow’omu iguru. Gambira Yehova ebirikukutiinisa n’ebirikukwerarikiriza. Ikiriza Yehova kugamba naiwe kandi akuhuumurize kurabira omu Byahandiikirwe. (Zab. 119:28) Noobaasa kutunga ekyahandiikirwe kuruga omu Baibuli ekirikubaasa kukuhuumuriza waaba otiinire. Nk’eky’okureeberaho, noobaasa kutunga okuhuumurizibwa omu kitabo kya Yobu, Zaaburi, n’Enfumu, hamwe n’omu bigambo bya Yesu ebiri omu Matayo eshuura 6. Waashaba Yehova kandi okashoma Ekigambo kye, naija kukuhuumuriza.

17. Nitubaasa kugira bwesigye ki?

¹⁷ Twine obwesigye ngu Yehova naija kuba arinaitwe twahikwaho embeera zigumire. Titurikwija kuba turi twenka. (Zab. 23:4; 94:14) Yehova naaraganisa kuturinda, kutuhamya, kutushagika n’okutuhuumuriza. Isaaya 26:3 nihagamba ahari Yehova hati: “Omuntu orikukwegyekyerera omutima gwe noija kumurindira omu busingye buzima, ahabw’okuba naakwesiga.” N’ahabw’ekyo yesigye Yehova kandi okorese buri kagisha kugasirwa omu buhwezi obu arikukuha. Waakora otyo noija kugira amaani n’omu bwire bugumire.