EKICWEKA EKY’OKWEGA 2
EKYESHONGORO 132 Hati Turi Omwe
Abashaija, Muhe Abakazi Baanyu Ekitiinisa
‘Naimwe abashaija, . . . mubahe ekitiinisa.’—1 PET. 3:7.
ENTIMA
Oku omushaija arikubaasa kuha omukazi we ekitiinisa omu bigambo, n’omu bikorwa.
1. Ni nshonga ki emwe ahabw’enki Yehova yaatandikireho entebeekanisa y’obushwere?
YEHOVA ni Ruhanga w’okushemererwa, kandi naayenda ngu naitwe tushemererwe. (1 Tim. 1:11) Atuhaire ebiconco bingi kutuhwera kwesiimira amagara. (Yak. 1:17) Kimwe aha biconco ebyo n’obushwere. Omushaija n’omukazi baaza omu bushwere, nibaraganisa kukundana, kuhaana ekitiinisa, n’okureebana nk’ab’omuhendo. Okuguma baine omukago guhami nikibaasa kubareetera okushemererwa okwabuzima.—Enf. 5:18.
2. Obushwere bwingi obunaku buri mu mbeera ki?
2 Eky’obusaasi, baingi abari omu bushwere obunaku obu nibeebwa okuraganisa oku barikukora aha izooba ryabo ry’okugaitwa. N’ekirikurugamu, tibaine kushemererwa. Ripoota eherize kushohozibwa Ekitongore ky’Eby’amagara eky’Ensi Yoona neeyoreka ngu abashaija baingi nibateera abakazi baabo, babajuma, kandi babatwariza kubi. Omushaija orikukora ebyo naabaasa kutwariza omukazi we omu muringo gw’ekitiinisa baaba bari omu bantu, kwonka amutwarize kubi baaba bari omuka. Kandi obushwere bwingi nibuteganisibwa, omushaija yaaba naareeba eby’enshoni.
3. Ni nshonga ki ezirikubaasa kureetera abashaija kutwaza kubi?
3 Niki ekirikubaasa kureetera abashaija abamwe kutwaza kubi? Nibabaasa kuba baakuziibwe baishebo enshaarizi, n’ahabw’ekyo nibakireeba nk’ekya butoosha kutwaza batyo. Abandi nibakwatwaho entwaza y’ekicweka eki bakuriiremu erikushagika emiteekateekyere etahikire, ey’okugira ngu “omushaija nyishaija” aine kutwariza kubi omukazi we kumworeka ngu amwineho obushoboorozi. Abashaija abandi tibareegyesiibwe kutegyeka enyehurira zaabo, otwariiremu n’ekiniga. Kandi abandi baine emiteekateekyere etahikire aha bakazi n’okuteerana, ahabw’okugira ngu nibareeba eby’enshoni. Ripoota ezindi nizooreka ngu ekigwererezi kya COVID-19 kikareetera oburemeezi obwo kweyongyera. Kwonka ebyo byona ti rwekwatso y’abashaija kutwaza kubi.
4. Abashaija Abakristaayo baine kwegyendesereza ki, kandi ahabw’enki?
4 Abashaija Abakristaayo baine kwegyendesereza kutagira emiteekateekyere etahikire aha bakazi. a Ahabw’enki? Ahabw’okugira ngu ebi omuntu arikuteekateeka nibyo arikukora. Entumwa Paulo akarabura Abakristaayo entoore omuri Rooma ati: “Mutashushanisibwa n’ab’obusingye obu.” (Rom. 12:1, 2) Obu Paulo yaahandiikira Abakristaayo omuri Rooma, ekibiina kyabo kikaba kimazire obwire kiriho. Kwonka, ebigambo bya Paulo nibyoreka ngu bamwe omu kibiina bakaba nibakikuratira emigyenzo n’emiteekateekyere y’ensi. Niyo nshonga ahabw’enki yaabehanangiriize kuhindura emiteekateekyere, n’emitwarize yaabo. Obuhabuzi obwo nibukwata n’aha bashaija Abakristaayo obunaku obu. Eky’obusaasi, abamwe bagizire emiteekateekyere y’ensi baatandika kutwariza kubi abakazi baabo. b Yehova naayenda ngu omushaija atwarize ata omukazi we? Eky’okugarukamu kiri omu kyahandiikirwe kikuru ky’ekicweka eki.
5. Kurugiirira aha 1 Petero 3:7, omushaija aine kutwariza ata omukazi we?
5 Shoma 1 Petero 3:7. Yehova naagambira abashaija kuha abakazi baabo ekitiinisa. Omushaija orikuha omukazi we ekitiinisa naamutwariza omu muringo gw’embabazi, kandi ogwa rukundo. Omu kicweka eki, nituza kushwijuma oku omushaija arikubaasa kworeka ngu naaha omukazi we ekitiinisa. Kwonka ka tubanze tugambe aha bikorwa ebitarikuhaisa abakazi ekitiinisa.
YETANTARE EBIKORWA EBITARIKUHAISA OMUKAZI WAAWE EKITIINISA
6. Yehova naareeba ata abashaija abarikutwariza kubi abakazi baabo? (Abakolosai 3:19)
6 Okuba enshaarizi. Yehova naayanga omuntu weena enshaarizi. (Zab. 11:5) Naayanga abashaija abarikutwariza kubi abakazi baabo. (Mal. 2:16; shoma Abakolosai 3:19.) Kurugiirira aha kyahandiikirwe ekikuru 1 Petero 3:7, omushaija yaaba atatwarize gye omukazi we, omukago gwe na Ruhanga nigusiisikara. Yehova naabaasa n’okwanga kuhurira okushaba kwe.
7. Kurugiirira aha Abaefeso 4:31, 32, omushaija aine kwetantara migambire ki? (Reeba “n’Ebigambo Ebishobooroirwe.”)
7 Okujumiirana. Abashaija abamwe nibatwariza kubi abakazi baabo barikukoresa ebigambo by’ekiniga, kandi ebirikusaasa. Kwonka Yehova naayangira kimwe “ekiniga, oruyombo, n’okujumiirana.” c (Shoma Abaefeso 4:31, 32.) Naahurira buri kimwe. Omuringo ogu omushaija arikugambamu n’omukazi we n’obu barikuba bari bonka ni mukuru ahari Yehova. Omushaija orikugambira kubi omukazi we tarikushiisha obushwere bwe bwonka, kureka naashiisha n’omukago gwe na Yehova.—Yak. 1:26.
8. Yehova naatwara ata eby’enshoni, kandi ahabw’enki?
8 Okureeba eby’enshoni. Yehova naatwara ata eby’enshoni? Naabyangira kimwe. N’ahabw’ekyo omushaija orikureeba ebishushani ebitashemeire naaba naashiisha omukago gwe na Yehova, kandi naamaramu omukazi we ekitiinisa. d Yehova naayenda ngu omushaija agume ari omwesigwa aha mukazi we omu bikorwa n’omu biteekateeko. Yesu akagira ngu omushaija orikureeba omukazi ondiijo akamurigira, naaba aherize kushambana nawe “omu mutima gwe.” e—Mat. 5:28, 29.
9. Ahabw’enki Yehova naaguubwa kubi omushaija yaagyemesereza omukazi we kuteerana nawe omu muringo ogurikumumaramu ekitiinisa?
9 Okuteerana omu muringo ogurikumaramu ekitiinisa. Abashaija abamwe nibagyemesereza abakazi baabo kuteerana omu muringo ogurikubamaramu ekitiinisa, kandi ogurikubareetera kwehurira nk’abatashemeire nari abatarikukundwa. Yehova naayangira kimwe ebikorwa nk’ebyo eby’okweyendeza. Naayenda ngu abashaija bakunde abakazi baabo, babatware nk’ab’omuhendo, kandi bafeyo aha nyehurira zaabo. (Efe. 5:28, 29) Kwonka shi omushaija Omukristaayo ku yaakuba naamaramu omukazi we ekitiinisa, arikumutwariza kubi, nari arikureeba eby’enshoni? Naabaasa kuhindura ata emiteekateekyere ye n’ebikorwa bye?
OKU TURIKUBAASA KUSINGURA EBIKORWA BITASHEMEIRE
10. Abashaija nibabaasa kugasirwa bata omu ky’okureeberaho kya Yesu?
10 Niki ekirikubaasa kuhwera omushaija kusingura ebikorwa bitashemeire ebirikumaramu ekitiinisa? Naabaasa kuteeraho kutooreza Yesu. N’obu Yesu ataragiire omu bushwere, omuringo ogu yaabaire naatwarizamu abeegi be nigworeka oku omushaija aine kutwariza omukazi we. (Efe. 5:25) Nk’eky’okureeberaho, teekateeka aha ki abashaija barikubaasa kwegyera aha ku Yesu yaabaire naatwariza entumwa ze, n’oku yaabaire agamba nabo.
11. Yesu akatwariza ata entumwa ze?
11 Yesu akatwariza entumwa ze omu muringo gw’embabazi kandi ogw’ekitiinisa. Akaba atarikubatwariza kubi nari kubagambira kubi. N’obu araabe yaabaire ari Mukama waabo, akaba atarikuteekateeka ngu aine kukoresa amaani ge kworeka ngu abaineho obushoboorozi. Kureka, omu bucureezi akabaheereza. (Yoh. 13:12-17) Akagambira abeegi be ati: “Muunyegyereho, ahabw’okuba nintwaza gye, kandi ndi omucureezi omu mutima, naimwe muryatunga okuhuumura omu mitima yaanyu.” (Mat. 11:28-30) Yetegyereze ngu Yesu akaba ari omucureezi. Omuntu okuba omucureezi tikirikumanyisa ngu taine maani, kureka naaba aine okubaasa kw’okwezibira. Ku barikumurahura, naaguma aikaikaine, kandi naategyeka enyehurira ze.
12. Yesu akaba akagambira ata abandi?
12 Yesu akaba agambira abandi ebirikuhuumuriza, kandi ebirikuruhuura. Taragambiire kubi abakuratsi be. (Luk. 8:47, 48) N’obu abahakanisa baamujumire kandi bakateeraho kumwitsa ekiniga, ‘taraabagaruriize.’ (1 Pet. 2:21-23) Obumwe, Yesu akaba acwamu kuguma ahunami omu mwanya gw’okugarukamu kubi. (Mat. 27:12-14) Ekyo n’eky’okureeberaho kirungi aha bashaija Abakristaayo.
13. Nk’oku kirikworekwa omuri Matayo 19:4-6, nikimanyisa ki omushaija ‘kuguma n’omukazi we’? (Reeba n’ekishushani.)
13 Yesu akeehanangiriza abashaija kuguma bari abeesigwa aha bakazi baabo. Akajuriza ebigambo bya ishe owaagizire ngu omushaija aine ‘kuguma n’omukazi we.’ (Shoma Matayo 19:4-6.) Ekigambo ky’Orugriika “okuguma” ekirikukoresibwa omu mushororongo ogwo nikimanyisa “okukwatanisiza kimwe.” N’ahabw’ekyo, omukago gw’omushaija n’omukazi we omu bushwere gwine kuba guhami munonga orikushusha ngu bakwatanisiibwe hamwe. Omukago gwabo gwasiisikara, bombi nibakwatwaho. Omushaija oine omukago nk’ogwo n’omukazi we, naayangira eby’enshoni eby’emiringo yoona. Naayanga ahonaaho “kureeba ebitaine mugasho.” (Zab. 119:37) Naaba ari nk’orikukora endagaano n’amaisho ge kutarigira omukazi ondiijo weena.—Yob. 31:1.
Omushaija omwesigwa naayanga kureeba eby’enshoni (Reeba akacweka 13) g
14. Ni bintu ki ebi omushaija orikutwaza kubi aine kukora kugaruka kugira omukago murungi na Yehova, n’omukazi we?
14 Omushaija orikutwariza kubi omukazi we kandi akamujuma, aine kugira ebindi ebi yaakora kugaruka kugira omukago murungi na Yehova, n’omukazi we. Aine kukora ki? Eky’okubanza, aine kwetegyereza ngu eki arikukora ni kibi. Tihariho ekisherekirwe omu maisho ga Yehova. (Zab. 44:21; Mub. 12:14; Heb. 4:13) Ekya kabiri, aine kurekyera aho kutwariza kubi omukazi we, kandi akahindura emitwarize ye. (Enf. 28:13) Ekya kashatu, aine kushaba Yehova n’omukazi we okusaasirwa. (Byak. 3:19) Aine kushaba Yehova kumuha ekyetengo ky’okuhinduka, n’okumuhwera kurinda ebiteekateeko bye, emigambire ye, n’ebikorwa. (Zab. 51:10-12; 2 Kor. 10:5; Fil. 2:13) Ekya kana, aine kukora ebirikuhikaana n’okushaba kwe arikwangira kimwe obushaarizi bw’omuringo gwona, n’okujumiirana. (Zab. 97:10) Ekya kataano, ahonaaho naashaba abareeberezi kumuhwera. (Yak. 5:14-16) Ekya mukaaga, naataho entebeekanisa y’okumuhwera kutagaruka kukora ebikorwa ebyo omu biro by’omumaisho. N’omushaija orikureeba eby’enshoni aine kukuratira obuhabuzi nibwo bumwe. Yehova naija kumuha omugisha ahabw’okuteeraho kuhindura ebikorwa bye. (Zab. 37:5) Kwonka tikirikumara omushaija okwanga ebikorwa bibi. Aine kwega kuha omukazi we ekitiinisa. Ekyo naabaasa kukikora ata?
OKU ORIKUBAASA KUHA OMUKAZI WAAWE EKITIINISA
15. Omushaija naabaasa kworeka ata ngu naakunda omukazi we?
15 Yoreka ngu noomukunda. Ab’eishe-emwe abamwe abari omu bushwere nibateeraho buri izooba kugira eki baakora kworeka abakazi baabo ngu nibabakunda. (1 Yoh. 3:18) Omushaija naabaasa kukora obuntu bukye kworeka omukazi we ngu naamukunda nk’okukwatana omu ngaro nari okumubumbatira. Naabaasa n’okumwoherereza obutumwa arikumugambira ngu, “Nkwiniire orushusho” nari kumubuuza ati: “Eizooba ryawe nirigyenda rita?” Obumwe n’obumwe, naabaasa kumworeka rukundo ei amwiniire arikumuhandiikira otugambo turungi omu kabaruha. Omushaija yaakora ebintu ebi naaha omukazi we ekitiinisa, kandi ahamya obushwere bwabo.
16. Ahabw’enki omushaija aine kuhimbisa omukazi we?
16 Yoreka ngu noomusiima. Omushaija orikuha omukazi we ekitiinisa naamwombeka, kandi amugumya. Omuringo gumwe oku arikukora ekyo, n’okwijuka kworeka ngu naasiima omukazi we ahabw’ebi arikukora kumushagika. (Kol. 3:15) Omushaija yaahimbisa omukazi we aihire aha mutima, naamureetera kwehurira gye. Omukazi naahurira aine oburinzi, arikukundwa, kandi aine ekitiinisa.—Enf. 31:28.
17. Omushaija naabaasa kworeka ata ngu naaha omukazi we ekitiinisa?
17 Mugirire embabazi kandi omuhe ekitiinisa. Omushaija orikukunda omukazi we naamusiima, kandi amutwara nk’ow’omuhendo munonga. Naamureeba nk’ekiconco ky’obuguzi bwingi kuruga ahari Yehova. (Enf. 18:22; 31:10) N’ahabw’ekyo, naamutwariza omu muringo gw’embabazi kandi ogw’ekitiinisa, n’obu barikuba bari omu bikorwa by’omubonano. Tarikumugyemesereza kwejumba omu bikorwa by’okuteerana ebirikumureetera kwehurira kubi, ebirikumumaramu ekitiinisa, nari ebirikumureetera kweshinja. f Kandi omushaija nawe naateeraho kuguma aine omuntu ow’omunda otarikumushinja omu maisho ga Yehova.—Byak. 24:16.
18. Abashaija baine kumariirira kukora ki? (Reeba n’akabokusi “ Emiringo Ena Oku Omushaija Arikworeka Ngu Naaha Omukazi we Ekitiinisa.”)
18 Abashaija nimubaasa kugira obwesigye ngu Yehova naabasiima, yaareeba nimuteeraho kuha abakazi baanyu ekitiinisa omu mbeera zoona. Mariirira kuha omukazi waawe ekitiinisa orikwetantara ebikorwa ebirikumumaramu ekitiinisa, orikumugirira embabazi, kandi okooreka ngu noomukunda. Waakora otyo, nooyoreka ngu noomutwara nk’ow’omuhendo. Waaha omukazi waawe ekitiinisa, noija kurinda omukago ogurikukirayo ogu oine na Yehova.—Zab. 25:14.
EKYESHONGORO 131 “Eki Ruhanga Yaateeraine Hamwe”
a Abashaija nibaija kugasirwa baashoma ekicweka, “Nootwariza Abakazi Nk’oku Yehova Arikubatwariza?” omu Munaara gw’Omurinzi ogwa Jenwari 2024.
b Abarikutwarizibwa kubi omu maka nibabaasa kugasirwa baashoma ekicweka, “Obuhwezi bw’Abarikutwarizibwa Kubi omu Maka” omu bicweka ebikurataine “Enshonga Ezindi” aha jw.org n’omu JW Library®.
c EBIGAMBO EBISHOBOOROIRWE: “Okujumiirana” nikitwariramu okweta abantu amaziina agarikubagarura ahansi, n’okubacwera orubanja obutoosha. Ebigambo byona ebibi, ebirikumaramu omuntu ekitiinisa, kandi ebirikukiniika nibitwarirwa omu kujumiirana.
d Reeba ekicweka “Eby’enshoni Nibibaasa Kushenya Obushwere Bwawe” aha jw.org n’omu JW Library.
e Omukazi ou iba arikureeba eby’enshoni naabaasa kugasirwa yaashoma ekicweka “Omukundwa Waawe Yaareeba Ebirikwitsa Enshoni” omu Munaara gw’Omurinzi ogwa Agusto 2023.
f Baibuli terikuha obushonshorekye bwona aha bikorwa by’okuteerana ebishemeire nari ebitashemeire ebi omushaija n’omukazi we barikubaasa kwejumbamu. Abakristaayo abari omu bushwere baine kucwamu ebirikuhaisa Yehova ekitiinisa, ebirikubashemeza, kandi ebitarikubareetera kweshinja. Okutwarira hamwe, omushaija n’omukazi we tibaine kugambira abandi enshonga ezo ez’omubonano.
g ENSHOBOORORA Y’EKISHUSHANI: Abashaija abu ow’eishe-emwe arikukora nabo nibateeraho kumworeka eby’enshoni ebiri omu magaziini.
