EKICWEKA EKY’OKWEGA 3
EKYESHONGORO 35 ‘Manya Ebintu Ebirikukira Obukuru’
Cwamu Ebirikushemeza Yehova
“Okutiina [Yehova] nibwo butandikiro bw’obwengye, n’okumanya Orikwera nikwo kwetegyereza.”—ENF. 9:10.
ENTIMA
Oku okumanya, obwengye, n’okwetegyereza birikutuhwera kucwamu gye.
1. Ni kintu ki ekigumire eki twena twine kukora?
BURI IZOOBA haine ebi turikucwamu. Ebimwe byorobi, nk’okucwamu eki turaarye kyantsya, nari obu turaaze kubyama. Kwonka ebindi bigumire. Nk’okucwamu ebirikukwata aha amagara gaitu, abakundwa baitu, nari okuramya kwaitu. Nitwenda ngu ebi turikucwamu bitugasire n’eka yaitu. Okukira byona, twine amatsiko ngu ebi turikucwamu nibiija kushemeza Yehova.—Rom. 12:1, 2.
2. Niki ekiraakuhwere kucwamu gye?
2 Noobaasa kucwamu gye (1) waamanya gye ebirikutwarirwamu, (2) waamanya eki Yehova arikuteekateeka aha nshonga, (3) waateekateeka aha bi orikwenda kucwamu. Ekicweka eki nikiza kugamba aha nshonga ezo, kandi nikiza n’okutuhwera kureeba oku turikubaasa kutendeka okubaasa kwaitu kw’okwetegyereza.—Enf. 2:11.
MANYA GYE EBIRIKUTWARIRWAMU
3. Ha eky’okureeberaho kworeka ahabw’enki oshemereire kumanya gye ebirikutwarirwamu otakacwiremu.
3 Kubaasa kucwamu gye twine kumanya gye ebirikutwarirwamu. Ahabw’enki ekyo ni kikuru? Ka tugire ngu omurwaire oine endwara y’amaani yaaza kwebuuza aha mushaho. Mbwenu shi omushaho naija kumuragurira atabandize kumucebera nari kumubuuza oku arikushaasha? Ngaaha. Naiwe noobaasa kucwamu gye waabanza kumanya gye ebirikutwarirwa omu nshonga. Ekyo noobaasa kukikora ota?
4. Nk’oku kirikworekwa omu Enfumu 18:13, noobaasa kumanya gye ota ebirikutwarirwamu? (Reeba n’ekishushani.)
4 Noobaasa kumanya gye ebirikutwarirwamu orikubuuza ebibuuzo. Ka tugire ngu waayetwa aha mukoro. Mbwenu shi nooba oine kuzayo? Waaba otarikumanya gye omuntu okwetsire, nari oku omukoro ogwo gutebeekanisibwe, nikiija kukwetengyesa kumubuuza ebibuuzo nk’ebi: “Omukoro nigwija kubaho ryari kandi mu mwanya ki? Nigwija kuba nigwingana ki? N’oha oraabe akuriire omukoro ogwo? Ni bantu ki abeetsirwe? Ni bintu ki ebiraakorwe aha mukoro? Nihaija kubaho amaarwa?” Okutunga eby’okugarukamu by’ebibuuzo nk’ebyo nikikuhwera kucwamu omu muringo gw’obwengye.—Shoma Enfumu 18:13.
Manya ebirikutwarirwamu orikubuuza ebibuuzo (Reeba akacweka 4) a
5. Oshemereire kukora ki waamanya ebirikutwarirwamu?
5 Waaheza kumanya ebirikukwata aha mukoro, shwijuma gye ebirikutwarirwamu. Nk’eky’okureeberaho, mbwenu shi ku waakumanya ngu abantu abatarikukuratira emisingye ya Baibuli nibaija kuba aha mukoro ogwo, nari ngu nihaija kugaburwa amaarwa maingi? Nooreeba ngu omukoro ogwo nigubaasa kurugamu okuraara enkyera? (1 Pet. 4:3) Kandi shi, omukoro ogwo ku gwakuba nigutaahataaha omu ntebeekanisa yaawe y’oruteerane rw’ekibiina nari obwire bw’okubuurira? Waaheza kwetegyereza byona ebirikutwarirwamu, noija kuba waatunga ah’okwihirira kucwamu gye. Hariho ekindi eki oine kukora. Iwe noomanya oku embeera ziraabe ziri, kwonka Yehova we naayehurira ata aha nshonga egyo?—Enf. 2:6.
SHWIJUMA EMITEEKATEEKYERE YA YEHOVA
6. Kurugiirira ahari Yakobo 1:5, ahabw’enki twine kushaba Yehova obuhwezi?
6 Shaba Yehova kukuhwera kwetegyereza emiteekateekyere ye. Naija kukuha obwengye oburaakuhwere kucwamu omu muringo ogurikumushemeza. Naaha obwengye “boona n’omutima ogutarikwima, n’obu kwakuba okweshaanya.”—Shoma Yakobo 1:5.
7. Noobaasa kumanya ota emiteekateekyere ya Yehova? Ha eky’okureeberaho.
7 Waaheza kushaba Yehova obuhabuzi, fayo kwetegyereza oku arikugarukamu okushaba kwawe. Teekateeka ahari eki: Ka tugire ngu waaba noogyenda waahaba, noobaasa kubuuza omutuuzi w’omu kicweka ekyo kukuragiirira omuhanda. Mbwenu shi noobaasa kugyenda atakakugarukiremu? Ngaaha buzima. Oine kubanza waahurikiza gye arikukuragiirira omuhanda. Nikyo kimwe, waaheza kushaba Yehova obwengye, teeraho kwetegyereza oku arikukugarukamu orikucondooza emisingye ya Baibuli n’ebiragiro ebirikukwata aha mbeera yaawe. Nk’eky’okureeberaho, waaba noocwamu yaaba oraaze aha mukoro ogwaba gwagambirweho, noobaasa kushwijuma eki Baibuli erikugamba aha magyenyi g’okuraara enkyera, emikago mibi, n’ekyetengo ky’okwebembeza eby’Obukama omu mwanya gw’ebyaawe.—Mat. 6:33; Rom. 13:13; 1 Kor. 15:33.
8. Noobaasa kukora ki waaba nooyenda kutunga eki orikusherura? (Reeba n’ekishushani.)
8 Obumwe, nooyetenga obuhwezi bw’abandi kubaasa kutunga eki orikusherura. Ab’eishe-emwe na banyaanyazi-itwe abakuzire omu by’omwoyo nibabaasa kukuhwera. Kwonka, noobaasa n’okugasirwa waacondooza. Noobaasa kutunga obuhabuzi bw’emiringo mingi omu bitabo byaitu, nk’Akatabo k’Okucondooza ak’Abajurizi ba Yehova na Scriptures for Christian Living. Ijuka ngu ekigyendererwa kyawe n’eky’okucwamu omu muringo oguraashemeze Yehova.
Shwijuma emiteekateekyere ya Yehova (Reeba akacweka 8) b
9. Nitubaasa kuhamya tuta ngu twacwamu ebirikushemeza Yehova? (Abaefeso 5:17)
9 Nitubaasa kuhamya tuta ngu twacwamu ebirikushemeza Yehova? Twine kubanza kuteeraho kumumanya gye. Baibuli neegira eti: “Okumanya Orikwera nikwo kwetegyereza.” (Enf. 9:10) Eego, okwetegyereza okuhikire nikuruga omu kumanya emitwarize ya Yehova, ekigyendererwa kye, ebi arikukunda nari ebi arikwanga. Yebuuze oti: ‘Kurugiirira aha bi ndikumanya ahari Yehova, nimbaasa kucwamu nta omu muringo ogurikumushemeza?’—Shoma Abaefeso 5:17.
10. Ahabw’enki emisingye ya Baibuli ni mikuru munonga kukira entwaza y’eka yaitu nari ey’ekicweka kyaitu?
10 Kubaasa kushemeza Yehova, obumwe nituba twine kukora ekitarikushemeza abu turikukunda. Nk’eky’okureeberaho, abazaire nibabaasa kwangisiriza ngu muhara waabo aine kushwerwa omushaija oine esente nyingi, nari orikubaasa kubaha enjugano mpango n’obu yaakuba atahami omu by’omwoyo. N’amazima, nibaba nibenda ngu muhara waabo areebererwe omu by’omubiri, kwonka shi omushaija ogwo naabaasa kumuhwera kutunguuka omu by’omwoyo? Enshonga egyo Yehova naagireeba ata? Eky’okugarukamu kiri omuri Matayo 6:33. Ekyahandiikirwe ekyo nikihiga Abakristaayo ‘kubanza kusherura Obukama.’ N’obu turaabe nituha abazaire baitu ekitiinisa n’ab’ekicweka kyaitu, ekikuru ahariitwe n’okushemeza Yehova.
TEEKATEEKA AHA BY’ORIKWENDA KUCWAMU
11. Ni mutwarize ki ogurikugambwaho omu Abafilipi 1:9, 10 oguraatuhwere kushwijuma okucwamu kwaitu?
11 Waaheza kushwijuma emisingye ya Baibuli eraakuhwere kucwamu, nooba oine kuteekateeka aha bi orikwenda kucwamu. (Shoma Abafilipi 1:9, 10.) Omutwarize gw’okwetegyereza nigwija kukuhwera kumanya ebiraarugye omu kucwamu kwawe. Obumwe nikibaasa kukworobera kucwamu. Kwonka tikirikumanyisa ngu buri kucwamu kworobi. Okwetegyereza nikwija kukuhwera kucwamu gye n’omu mbeera ezigumire.
12-13. Okwetegyereza nikubaasa kutuhwera kuta kucwamu gye aha bikwatiraine n’omurimo gw’okwebaisaho?
12 Teekateeka aha mbeera egi. Ka tugire ngu oriyo noosherura omurimo gw’okubaisaho eka yaawe. Hariho emirimo y’emiringo ebiri. Bwanyima y’okushwijuma byona ebirikutwarirwamu nk’ekika ky’omurimo, obwire oburikwetengyesa kuhika aha murimo, n’ebindi, oyetegyereza ngu kurugiirira aha Byahandiikirwe, emirimo egyo yombi neikirizibwa. Obundi okaayenzire kukoraho gumwe ahabw’okugira ngu noogukunda, nari ahabw’okugira ngu noija kuba nootunga esente nyingi. Kwonka, hariho enshonga ezindi ezi oine kuteekateekaho otakacwiremu.
13 Nk’eky’okureeberaho, mbwenu shi gumwe aha mirimo egyo nigwija kutaahataaha omu ntebeekanisa yaawe y’okuza omu nteerane z’ekibiina? Omurimo ogwo shi nigwija kukureetera kuburwa obwire bw’okureeberera eka yaawe omu nyehurira n’omu by’omwoyo? Okwebuuza ebibuuzo nk’ebyo, nikiija kukuhwera kwebembeza ebirikukira obukuru nk’okuramya, n’ebyetengo by’eka yaawe, omu mwanya gw’okwebembeza eby’omubiri. Reero noija kubaasa kucwamu omu muringo ogurikushemeza Yehova.
14. Okwetegyereza na rukundo nibibaasa kutuhwera bita kwetantara kuteeza abandi entsibo?
14 Okwetegyereza nikwija n’okukuhiga kuteekateeka aha ku okucwamu kwawe kuraakwate aha bandi, kugira ngu otabateeza entsibo. (Fil. 1:10) Ekyo ni kikuru munonga waaba noocwamu aha nshonga y’okujwara n’okweboneza. Nk’eky’okureeberaho, nitubaasa kuba twine omuringo gw’okujwara n’okweboneza ogu turikukunda. Kwonka shi omuringo ogwo ku gwakuba niguteeza entsibo abari omu kibiina, n’aheeru yaakyo? Okwetegyereza nikwija kutuhwera kufayo aha nyehurira z’abandi. Rukundo neija kutuhiga kusherura eby’okugasira ‘mutaahi waitu,’ n’okuba abaringaniire. (1 Kor. 10:23, 24, 32; 1 Tim. 2:9, 10) Reero nitwija kucwamu omu muringo ogurikworeka ngu nitukunda abandi, kandi nitubaha ekitiinisa.
15. Oine kukora ki otakacwiremu aha nshonga nkuru?
15 Waaba noocwamu aha nshonga enkuru, teekateeka aha birikutwarirwamu kubaasa kuhikiiriza okucwamu kwawe. Yesu akatwegyesa ngu twine ‘kubariirira eby’emirimo’ yaitu. (Luk. 14:28) N’ahabw’ekyo teekateeka aha bwire, ebintu, n’amaani agarikwetengyesa kuhikiiriza okucwamu kwawe. Omu mbeera ezimwe, noobaasa kwebuuza aha b’eka yaawe kumanya eki buri omwe arikubaasa kukora kukushagika. Ahabw’enki ekyo ni kikuru? Nikibaasa kukuhwera kumanya yaaba oshemereire kuhinduramu, nari yaaba hariho omuringo ogundi ogurikukora gye. Kandi waagambira ab’eka yaawe eki orikwenda kucwamu, okahurikiza ebitenso byabo, nibaija kuba beeteekateekire kukuhwera kuhikiiriza eki oraacwemu.—Enf. 15:22.
CWAMU EBIRAAKUHWERE KUBA OMUSINGUZI
16. Ni bintu ki ebiraakuhwere kuba omusinguzi omu kucwamu? (Reeba n’akabokusi “Oku Orikubaasa Kucwamu Gye.”)
16 Ku oraabe waayetegyereza enshonga ezaagambwaho, biri oyeteekateekire kucwamu gye. Hati waaheza kumanya ebirikutwarirwamu, n’okushwijuma emisingye eraakuhwere kucwamu omu muringo ogurikushemeza Yehova. Mushabe kukuhwera kuhikiiriza okucwamu kwawe.
17. Niki ekiraakuhwere kucwamu gye?
17 N’obu oraabe ocwiremu gye emirundi mingi, ijuka ngu ekiraakuhwere kuguma noocwamu gye n’okwesiga obwengye bwa Yehova, beitu butari bwengye bwawe nari ebi orikumanya. Yehova niwe wenka orikubaasa kukuha obwengye obwabuzima n’okwetegyereza ebirikwetengyesa kucwamu gye. (Enf. 2:1-5) Yehova naabaasa kukuhwera kucwamu ebirikumushemeza.—Zab. 23:2, 3.
EKYESHONGORO 28 Okuba Munywani wa Yehova
