1. Nitugasirwa tuta twabaho aha mukoro gw’okwijuka okufa kwa Yesu ogurikubaho buri mwaka?

 HATARIHO kubangaanisa noikiriza ngu ekitambo n’ekiconco ky’omuhendo. (2 Kor. 9:15) Ahabw’okugira ngu Yesu akahayo amagara ge ahabwaitu, noobaasa kugira omukago murungi na Yehova Ruhanga. Kandi noobaasa n’okugira amatsiko g’amagara agatahwaho. Buzima kihikire kworeka ngu nitusiima ekitambo, na Yehova owaakihaireyo ahabw’okutukunda. (Rom. 5:8) Yesu akatandikaho omukoro gw’okwijuka okufa kwe buri mwaka, kutuhwera kuguma nitusiima ekitambo, n’obutakikwata eijaga.—Luk. 22:​19, 20.

2. Nituza kwega ki omu kicweka eki?

² Omwaka ogu, Ekiijutsyo nikiza kubaho Orwamukaaga, Apuri 12, 2025. Hatariho kubangaanisa twena nitwetebeekanisa kubaho. Nitwija kugasirwa munonga omu bwire bw’Ekiijutsyo twateekateeka a aha ki Yehova n’Omwana we baatukoreire. Omu kicweka eki, nituza kureeba eki ekitambo kirikutwegyesa ahari Yehova n’Omwana we. Ekicweka ekirikukurataho, nikiza kutuhwera kwetegyereza oku ekitambo kirikutugasira, n’oku turikubaasa kworeka ngu nitukisiima.

EKI EKITAMBO KIRIKUTWEGYESA AHARI YEHOVA

3. Okufa kw’omutu omwe kukaba nikwija kucungura kuta abantu baingi? (Reeba n’ekishushani.)

³ Ekitambo nikitwegyesa aha buringaaniza bwa Yehova. (Bir. 32:4) Mu muringo ki? Nk’eky’okureeberaho, ahabw’obugomi bwa Adamu, tukahungura ekibi ekyarugiremu okufa. (Rom. 5:12) Yehova akataho entebeekanisa y’okutucungura kuruga omu kibi n’okufa arikuhayo  Yesu kuba ekitambo. Kwonka shi ekitambo ky’omuntu omwe ohikiriire, kikaba nikibaasa kucungura kita abantu baingi? Entumwa Paulo akashoboorora ati: “Nk’oku baingi baahindukire abasiisi ahabw’okutahurira kw’omuntu omwe [Adamu], nikwo baingi barihinduka abahikiriire ahabw’okuhurira kw’omwe [Yesu].” (Rom. 5:19; 1 Tim. 2:6) Ekirikumanyisa ngu, okugoma kw’omuntu omwe owaabaire ahikiriire kukatureetera kuba abahuuku b’ekibi n’okufa. N’ahabw’ekyo, kikaba nikyetengyesa omuntu omwe ohikiriire kutucungura.

4. Ahabw’enki Yehova ataraikiriize baijukuru ba Adamu ab’emitima eshemeire kutuuraho ebiro byona?

⁴ Mbwenu shi Yesu akaba aine kufa kubaasa kutucungura? Yehova shi akaba atarikubaasa kwikiriza baijukuru ba Adamu ab’emitima eshemeire kutuuraho ebiro byona? Abantu abatahikiriire ekyo bakaba nibaija kukireeba nk’ekikorwa kirungi kandi eky’embabazi. Kwonka, kikaba kitarikwija kworeka oburingaaniza bwa Yehova. Ahabw’okugira ngu Yehova n’omuringaaniza, akaba atarikubaasa kwehuzya ekikorwa kya Adamu eky’obugomi.

5. Ahabw’enki nitubaasa kugira obwesigye ngu Yehova naija kukora ekihikire?

⁵ Kandi shi, ku ogire ngu Yehova tarahaireyo ekitambo, akeehuzya oburingaaniza bwe arikwikiriza abaana ba Adamu abatahikiriire kutuuraho ebiro byona? Obundi abantu bakaateekateekire ngu Ruhanga naabaasa kwehuzya oburingaaniza bwe n’omu nshonga ezindi. Nk’eky’okureeberaho, bakaateekateekire ngu naabaasa kuremwa kuhikiiriza bimwe aha biraganiso bye. Kwonka, enshonga egyo teine kutwerarikiriza. Ahabw’okugira ngu Yehova akakora eky’oburingaaniza arikwefeerereza Omwana we omukundwa, nikituhamiza ngu butoosha naakora ebihikire.

6. Ni muringo ki gumwe oku ekitambo kirikworeka rukundo ya Yehova? (1 Yohaana 4:​9, 10)

⁶ N’obu ekitambo kiraabe nikituhwera kumanya ngu Yehova n’omuringaaniza, okukira munonga nikituhwera kwetegyereza rukundo mpango ei atwiniire. (Yoh. 3:16; Shoma 1 Yohaana 4:​9, 10.) Enyegyesa y’ekitambo neeyoreka ngu Yehova naayenda twesiimire amagara ebiro byona, kandi twegaite aha ka ye. Nk’eky’okureeberaho, Adamu ku yaasiisire, Yehova akamwiha omu ka y’abarikumuramya. N’ekyarugiremu, twena nituzaarwa turi aheeru y’eka ya Ruhanga. Yehova naatusaasira ebibi byaitu arikwihirira aha kitambo, kandi naija kwikiriza abantu  boona abarikumwikiririzamu kandi bakamworobera kwija omu ka ye. Na hati nitubaasa kugira omukago murungi na Yehova, n’Abakristaayo bagyenzi baitu. Buzima Yehova ka naatukunda munonga!—Rom. 5:​10, 11.

7. Okubonabona kwa Yesu nikutuhwera kuta kwetegyereza ngu Yehova naatukunda?

⁷ Nitubaasa kwetegyereza gye rukundo mpango ei Yehova atwiniire twashwijuma eki yaayefeerereize kutuha ekitambo. Sitaane naagira ngu tihaine muheereza wa Ruhanga orikubaasa kuguma amuhamiireho yaahikwaho embeera zigumire. Yehova akaikiriza Yesu kubonabonesibwa kuhika aha kufa, kworeka ngu Sitaane n’omubeihi. (Yob. 2:​1-5; 1 Pet. 2:21) Yehova akareeba Yesu arikujumwa abahakanisa abanyadiini, abaserukare barikumuteera, kandi arikuhanikwa aha muti. Kandi akaba naareeba Omwana we omukundwa arikufeera omu busaasi bwingi. (Mat. 27:​28-31, 39) Yehova akaba aine amaani g’okuzibira ekyo kubaho. Nk’eky’okureeberaho, obu abahakanisa baagira bati: “Mbwenu [Ruhanga] naamujune hati, ku araabe naamukunda,” Yehova akaba naabaasa kukikora ahonaaho. (Mat. 27:​42, 43) Kwonka ku ogire ngu Yehova akataaha omu nshonga, ekitambo kikaba kitarikwija kuheebwayo, kandi tukaabaire tutaine matsiko. N’ahabw’ekyo Yehova akaikiriza Omwana we kugumisiriza obusaasi kuhitsya obu yaitsya ogw’ahamuheru.

8. Mbwenu shi Yehova akashaasha okureeba Omwana we naabonabona? Shoboorora. (Reeba n’ekishushani.)

⁸ Titushemereire kuteekateeka ngu obu Ruhanga ari ow’obushoboorozi bwona, taine nyehurira. Tukahangwa omu kishushani kye, ekirikumanyisa ngu nawe aine enyehurira. Baibuli neegira ngu naabaasa ‘kuguubwa kubi’ nari kugira obusaasi. (Zab. 78:​40, 41) Teekateeka aha mbeera ei Abrahamu na Isaaka baarabiremu. Yehova akagambira Abrahamu ngu amuhongyere omwana we omwe wenka ou yaabaire aine. (Kut. 22:​9-12; Heb. 11:​17-19) Teekateeka aha ku Abrahamu yaayehuriire arikutebeekanisa kwihayo omusyo kwita omwana we. Yehova ka aine kuba yaayehuriire kubi munonga arikureeba abantu nibaita Omwana we!—Reeba vidiyo Tooreza Okwikiriza Kwabo—Abrahamu, Ekicweka 2 aha jw.org.

9. Ebiri omu Abarooma 8:​32, 38, 39 nibukuhwera bita kwetegyereza rukundo mpango ei Yehova akwiniire, n’Abakristaayo bagyenzi baawe?

⁹ Ekitambo nikitwegyesa ngu tihariho orikutukunda kukira Yehova, n’obu baakuba abanyabuzaare nari banywani baitu ab’ahamara. (Shoma Abarooma 8:​32, 38, 39.)  Hatariho kubangaanisa, Yehova naatukunda munonga kukira oku turikwekunda. Nooyenda kutuuraho ebiro byona? Ekyo Yehova nikyo arikukwendeza. Nooyenda ngu ebibi byawe bisaasirwe? Yehova naayendera kimwe kukusaasira. Naayenda ngu twikiririze omu kiconco ky’omuhendo eki yaatuhaire, kandi tworobe. Ekitambo nikyoreka rukundo mpango ei Ruhanga atwiniire. Kandi omu nsi ensya, nitwija kwongyera kwega ahari rukundo ya Yehova.—Mub. 3:11.

EKI EKITAMBO KIRIKUTWEGYESA AHARI YESU

10. (a) Niki ekyakirizeyo kushaasha Yesu obu yaacwerwa orubanja? (b) Yesu akeeza ata eiziina rya Yehova? (Reeba n’akabokusi “ Yesu Akeeza Eiziina rya Yehova Arikuguma ari Omwesigwa.”)

¹⁰ Yesu naafayo munonga aha iziina rya Ishe. (Yoh. 14:31) Yesu akeehurira kubi ku yaateirweho orubanja rw’okurogota n’okugomesa abantu, ahakuba akaba naamanya ngu eki nikiija kujumisa eiziina rya Ishe. Egi niyo nshonga ahabw’enki yaashabire ati: “Ai bambe Taata, ekikopo eki kimpingure.” (Mat. 26:39) Yesu akahimbisisa eiziina rya Ishe arikuguma ari omwesigwa kuhika aha kufa.

11. Yesu akooreka ata ngu naakunda munonga abantu? (Yohaana 13:1)

¹¹ Kandi ekitambo nikitwegyesa ngu Yesu naafayo munonga aha bantu, kwonka okukira munonga abeegi be. (Enf. 8:31; shoma Yohaana 13:1.) Nk’eky’okureeberaho, akaba naamanya ngu obuheereza bwe omu nsi bukaba nibwija kubamu oburemeezi otwariremu n’okufeera omu busaasi. Yesu taraizire omu nsi kuhikiiriza obujunaanizibwa obwo bwonka. Kureka, akateeraho n’age goona kubuurira, kwegyesa, n’okuheereza abandi. Nangwa n’aha izooba eri yaakwatiirweho, akanaabisa entumwa ze ebigyere, yaabahuumuriza  kandi yaabaha n’obuhabuzi. (Yoh. 13:​12-15) Kandi obu yaabaire ahanikirwe aha muti, akamara obwire bukye arikuha amatsiko enkozi y’ebibi owaabaire ahanikirwe haihi nawe, kandi yaaha nyina omuntu w’okumureeberera. (Luk. 23:​42, 43; Yoh. 19:​26, 27) N’ahabw’ekyo, rukundo mpango ei Yesu atwiniire akagyoreka omu kufa kwe, n’omu buheereza bwe bwona omu nsi.

12. Yesu naagumizamu arikuhayo ebitambo ahabwaitu mu muringo ki?

¹² N’obu Kristo araabe yaafiire ‘rimwe akaheza,’ na hati naahayo ebitambo ahabwaitu. (Rom. 6:10) Mu muringo ki? Naagumizamu kukoresa obwire n’amaani kutuhwera kugasirwa omu migisha y’ekitambo. Yetegyereze ebi arikukora. Naaheereza nk’Omugabe, Omunyamurwa Omukuru, kandi omutwe gw’ekibiina. (1 Kor. 15:25; Efe. 5:23; Heb. 2:17) Naayebembera omurimo gw’okurundaana entoore n’ab’entaama ezindi, omurimo oguraahwe okubonabona kwingi kutakahendeire. b (Mat. 25:32; Mak. 13:27) Naahamya ngu abaheereza be abeesigwa baatunga eby’okurya by’omwoyo omu biro ebi eby’emperu. (Mat. 24:45) Kandi n’omu Butegyeki bwe bw’Emyaka Rukumi naija kugumizamu naatuha ebirikwetengyesa. Buzima Yehova akahayo Omwana we ahabwaitu!

GUMIZAMU ORIKWEGA

13. Okuteekateeka nikutuhwera kuta kugumizamu nitwega ahari rukundo ei Yehova na Yesu batwiniire?

¹³ Noobaasa kugumizamu nooyega ahari rukundo ei Yehova Ruhanga na Kristo Yesu batwiniire waaguma noogiteekateekaho. Obundi omu bwire bw’Ekiijutsyo eky’omwaka ogu, noobaasa kushoma kimwe aha bitabo by’Engiri. Otateeraho kushoma bingi murundi gumwe. Kureka, yetware kandi osherure enshonga ezindi ahabw’enki twine kukunda Yehova na Yesu. Kandi teeraho nk’oku kirikubaasika kugambira abandi ebi oyegire.

14. Nk’oku kirikworekwa omu Zaaburi 119:​97, okucondooza nikutuhwera kuta kuguma nitwega aha kitambo n’enyegyesa ezindi? (Reeba n’ekishushani.)

¹⁴ Ku oraabe omazire emyaka mingi omu mazima, noobaasa kwebuuza yaaba nikibaasika kwega ebintu bisya aha bikwatiraine n’oburingaaniza bwa Ruhanga, rukundo ye, n’ekitambo. Amazima gari ngu tihariho bugarukiro aha bi turikubaasa kwega aha  nshonga ezo, n’ezindi. Mbwenu shi, noobaasa kukora ki? Koresa buri kagisha kugasirwa omu bwijwire omu butumwa oburi omu bitabo by’ekibiina. Teeraho kucondooza aha bi otaayetegyereza gye. Reero omu izooba oteekateekye aha bi waayega n’eki birikukwegyesa ahari Yehova, Omwana we, na rukundo ei bakwiniire.—Shoma Zaaburi 119:97.

15. Ahabw’enki twine kuguma nitusherura ebintu bisya omu Baibuli?

¹⁵ Otahwa amaani waaba otatungire enshonga nsya nari ekintu kyona ekirikushemeza buri murundi ogu orikushoma Baibuli nari waaba noocondooza. Nooba ori nk’omuntu orikuteeraho munonga kusherura ezaabu. Abarikugisherura nibagumisiriza kumara eshaaha nyingi nari ebiro kubaasa kubona akacweka kakye munonga k’ezaabu. Kwonka, tibarikuhanika bakabirugaho, ahakuba buri kacweka k’ezaabu nikaba kari ak’omuhendo. Amazima agu orikwega omu Baibuli n’ag’omuhendo munonga kukira ezaabu. (Zab. 119:127; Enf. 8:10) N’ahabw’ekyo gira okugumisiriza, kandi ohamire aha ntebeekanisa yaawe ey’okushoma Baibuli buri izooba.—Zab. 1:2.

16. Nitubaasa kutooreza tuta Yehova na Yesu?

¹⁶ Waaba nooyeyegyesa, teeraho kusherura oku orikubaasa kugyendera aha bi waayega. Nk’eky’okureeberaho, tooreza Yehova orikuba omuringaaniza otarikushoroora abandi. Tooreza Yesu orikugira rukundo nk’ei ainiire Ishe n’abantu, orikuba oyeteekateekire kubonabona ahabw’eiziina rya Yehova, kandi orikuteeraho kuhwera Abakristaayo bagyenzi baawe. Ekindi, tooreza Yesu orikubuurira abandi kugira ngu nabo babaase kutunga omugisha gw’okwikiriza ekiconco kya Yehova eky’omuhendo.

17. Nituza kushwijuma ki omu kicweka ekirikukurataho?

¹⁷ Ku turikwongyera kwega aha kitambo kandi tukooreka ngu nitukisiima, nitwongyera kukunda Yehova n’Omwana we. N’ekirikurugamu, nabo nibaija kwongyera kutukunda. (Yoh. 14:21; Yak. 4:8) N’ahabw’ekyo, ka tuteereho kukoresa byona ebi Yehova arikutuha kwega aha bikwatiraine n’ekitambo. Omu kicweka ekirikukurataho nituza kwetegyereza emiringo etari emwe oku ekitambo kirikutugasira, n’oku turikubaasa kworeka ngu nitusiima rukundo ya Yehova.