1. Baingi obunaku nibata omutima ahari ki?

 WAAYETEGYEREIZE ngu baingi obunaku obu nibeefaho munonga okukira abandi? Nk’eky’okureeberaho, aha mikura y’empurizana, abamwe nibeegambaho munonga n’ebi bakozire. Kwonka, bakye nibo barikuha Yehova Ruhanga ekitiinisa. Omu kicweka eki, nituza kureeba eki kirikumanyisa kuha Yehova ekitiinisa, n’ekiine kutuhiga kukikora. Nituza n’okwega oku turikubaasa kuha Ruhanga ekitiinisa ekimushemereire, n’oku araahaise eiziina rye ekitiinisa.

NIKIMANYISA KI OKUHA YEHOVA EKITIINISA?

2. Yehova akooreka ata ekitiinisa kye aha Rushozi Sinai? (Reeba n’ekishushani .)

² Ekitiinisa niki? Omu Baibuli, ekigambo “ekitiinisa” nikibaasa kumanyisa ekintu kyona ekirikureetera omuntu yaaba ow’omutaano. Yehova akooreka ekitiinisa kye omu muringo gw’omutaano bwanyima y’obwire bukye aherize kucungura Abaisraeli kuruga omu buhuuku omuri Misiri. Teekateeka aha kyabaireho obu Abaisraeli baingi baabaire beemereire ahansi y’Orushozi Sinai kubugana Ruhanga waabo. Ekicu kikwaitse kikashweka orushozi orwo. Ahonaaho, hakabaho omutsitsa gw’amaani gwatengyetsa omwanya ogwo, orushozi rwacumbuuka omwika, emirabyo yaatyankana, enkuba zaahinda, kandi eiraka ry’enzamba ryagamba munonga. (Kur. 19:​16-18; 24:17; Zab. 68:8) Abaisraeli ka baine kuba baatangaire munonga, Yehova ku yaayorekire ekitiinisa kye!

3. Nituha tuta Yehova ekitiinisa?

³ Kandi shi itwe abantu? Nitubaasa kuhaisa Yehova ekitiinisa? Eego. Omuringo gumwe oku turikuha Yehova ekitiinisa, n’okugambira abandi aha maani ge maingi, n’emitwarize ye mirungi. Kandi, nituhaisa Ruhanga ekitiinisa turikumuhimbisa ahabw’ebi arikutubaasisa kuhikiiriza. (Isa. 26:12) Omugabe Daudi akataho eky’okureeberaho kirungi arikuha Yehova  ekitiinisa. Akashaba Ruhanga omu maisho g’Abaisraeli ati: “Ai [Yehova], obukuru, obushoboorozi, ekitiinisa, obusinguzi n’okutiinwa n’ebyawe, ahakuba ebiri omu iguru n’eby’omu nsi byona n’ebyawe.” Daudi ku yaahendeire okushaba kwe, “abantu boona abaabaire bateeraine baasiima [Yehova].”—1 Bus. 29:​11, 20.

4. Yesu akaha ata Yehova ekitiinisa?

⁴ Obu Yesu yaabaire ari omu nsi, akaha Ishe ekitiinisa arikworeka ngu niwe yaabaire ari obukomooko bw’eby’okutangaaza ebi yaakozire. (Mak. 5:​18-20) Kandi Yesu akahaisa Yehova ekitiinisa omu muringo ogu yaamugambireho, n’oku yaabaire naatwariza abandi. Eizooba rimwe, Yesu akaba naayegyesa omuri Sinagogi. Omuri abo abaabaire bamuhurikiize hakaba harimu omukazi owaabaire ariho daimoni kumara emyaka 18. Daimoni ekamumuzya omugongo, kandi akaba atarikubaasa kwemerera gye butsimba. Ekyo kikaba nikireeta obusaasi bwingi. Yesu akagirira omukazi ogwo esaasi, yaahika ahu yaabaire ari yaamugira ati: “Mukazi ‘we, waabohoororwa omu bumuga bwawe.” Reero akamutaho engaro, kandi ahonaaho omukazi ogwo ‘akahimbisa Ruhanga,’ yaagaruka yaagira amagara marungi, n’ekitiinisa. (Luk. 13:​10-13) Buzima omukazi ogwo akaba aine enshonga nungi y’okuha Yehova ekitiinisa, kandi naitwe nikyo twine kukora.

NIKI EKIRIKUTUHIGA KUHA YEHOVA EKITIINISA?

5. Twine nshonga ki ahabw’enki nituha Yehova ekitiinisa?

⁵ Nituha Yehova ekitiinisa ahabw’okuba kimushemereire. Twine enshonga nyingi ahabw’enki nituha Yehova ekitiinisa. N’ow’obushoboorozi bwona, kandi aine amaani agataine bugarukiro. (Zab. 96:​4-7) Obwengye bwe bwingi nibureeberwa omu bi yaahangire. Niwe Bukomooko bw’amagara, kandi niwe arikugabaisaho. (Kush. 4:11) N’omwesigwa. (2 Sam. 22:26) Buri kimwe eki arikukora nikigyenda gye, kandi butoosha naahikiiriza ebi arikuraganisa. (Yos. 23:14) Tikirikututangaaza kureeba ngu nabi Yeremia akagamba ahari Yehova ati: “Omu banyabwengye boona ab’omu mahanga, n’omu nsi z’abagabe baago zoona, tihaine orikushushana naiwe.” (Yer. 10:​6, 7) Buzima, twine enshonga nungi ahabw’enki twine kuha Tataitwe ow’omu iguru ekitiinisa. Kwonka, Yehova titurikumuha ekitiinisa kyonka, kureka nitumukunda.

6. Ahabw’enki nitukunda Yehova?

⁶ Nituha Yehova ekitiinisa ahabw’okuba nitumukunda munonga. Yetegyereze emitwarize ya Yehova erikutureetera kumukunda. Aine embabazi, kandi n’omunyasaasi. (Zab. 103:13; Isa. 49:15) Ku turikutwarizibwa kubi nawe naayehurira kubi. (Zek. 2:8) Naatureetera kwanguhirwa kwirira haihi nawe nka munywani waitu. (Zab. 25:14; Byak. 17:27) Kandi n’omucureezi, “naayecureeza kureeba ebiri omu iguru n’eby’omu nsi. Atunguura omworo naamwiha omu mucuucu.” (Zab. 113:​6, 7) Mbwenu shi enshonga ezo tiziine kutureetera kuha Ruhanga waitu ekitiinisa?—Zab. 86:12.

7. Twine mugisha ki gw’omutaano?

⁷ Nituha Yehova ekitiinisa ahabw’okuba nitwenda abandi bamumanye. Baingi tibarikumanya amazima agarikukwata ahari Yehova. Ahabw’enki? Ahabw’okugira ngu Sitaane abahumize emitima arikujanjaaza ebishuba ahari Yehova. (2 Kor. 4:4) Sitaane areetaire abantu kuteekateeka ngu Yehova naahoora enzigu, tarikufayo, kandi ngu niwe areetsireho okubonabona omu nsi. Kwonka itwe nitumanya amazima agarikukwata ahari Ruhanga waitu. Twine omugisha gw’okumanyisa abantu ebihikire ebirikumukwataho, reero tukamuhaisa  ekitiinisa. (Isa. 43:10) Zaaburi 96 neegamba munonga aha kuha Yehova ekitiinisa. Twaba nitushwijuma ebiri omu zaaburi egi, teekateeka aha miringo emwe oku orikubaasa kuha Yehova ekitiinisa ekimushemereire.

NITUBAASA KUHA TUTA YEHOVA EKITIINISA EKIMUSHEMEREIRE?

8. Ni muringo ki gumwe oku turikubaasa kuha Yehova ekitiinisa? (Zaaburi 96:​1-3)

⁸ Shoma Zaaburi 96:​1-3. Nituha Yehova ekitiinisa omu bi turikumugambaho. Omu mishororongo egyo, abaheereza ba Yehova nibahigwa ‘kweshongorera Yehova,’ ‘[kuhimbisa] eiziina rye,’ ‘kworeka okujuna kwe,’ kandi ‘bakamanyisa ekitiinisa kye omu mahanga.’ Egyo yoona n’emiringo oku turikubaasa kuha Tataitwe ow’omu iguru ekitiinisa omu bigambo byaitu. Abayudaaya abeesigwa n’Abakristaayo omu kyasha ky’okubanza, tibareziringire kugambira abandi aha birungi ebi Yehova yaabaire abakoreire, n’okujurira eiziina rye. (Dan. 3:​16-18; Byak. 4:29) Itwe ekyo nitubaasa kukikora tuta?

9-10. Waayegyera ki aha ky’okureeberaho kya Angelena? (Reeba n’ekishushani.)

⁹ Teekateeka aha ky’okureeberaho kya munyaanyazi-itwe Angelena, a orikutuura United States. Akooreka obumanzi arikujurira eiziina rya Yehova omu kitongore eki yaabaire naakorera. Ahabw’okugira ngu Angelena akaba ari omukozi musya, bakamweta omu rukiiko ahu abakozi basya baabaire baheebwa omugisha gw’okweyanjurira bagyenzi baabo barikubagambira bimwe ebirikubakwataho. Akatebeekanisa kubooreka ebishushani ebirikworeka okushemererwa oku yaabaire aine ahabw’okuba Omujurizi wa Yehova. Kwonka atakagiireho kubibooreka, omukozi mugyenzi we akeeyanjura nk’owaabaire akuziibwe Abajurizi ba Yehova. Akatandika kukiinika enyegyesa zaitu. Angelena naagira ati: “Omutima gwangye gukatandika kuteera. Kwonka nkeebuuza nti: ‘Mbwenu shi mwikirize kugamba ebishuba ahari Yehova? Nari njuririre Yehova?’”

¹⁰ Mugyenzi we ogwo ku yaaherize kugamba, Angelena akashabira aha mutima ahonaaho. Bwanyima akamugambira omu muringo gw’embabazi ati: “Naanye ndi nkaiwe. Nkakuzibwa nk’omwe aha Bajurizi ba Yehova, kandi nkiri omwe aharibo.” Buri omwe akamutaho amaisho, kwonka akaguma aikaikaine  yaabooreka ebishushani ebi yaabaire atebeekaniise, kandi akabashoboororera ebi arikwikiriza omu muringo gw’ekitiinisa. (1 Pet. 3:15) Niki ekyarugiremu? Angelena arikuza kuheza kubibooreka, emiteekateekyere y’omukozi mugyenzi we ogwo ekaba yaahindukire. Akaikiriza ngu nawe akaba aine ebirungi ebi arikwijuka ebi yaatungire obu yaabaire ari n’Abajurizi ba Yehova. Angelena naagira ati: “Yehova aine kujuriirirwa. N’omugisha gw’omutaano kujuririra eiziina rye.” Naitwe twine omugisha gw’okuhimbisa Yehova n’okumuha ekitiinisa, n’obu abandi barikuba batarikukimuha.

11. Abaheereza ba Yehova ab’amazima batwire nibakuratira bata omusingye oguri omuri Zaaburi 96:8?

¹¹ Shoma Zaaburi 96:8. Nitubaasa kuhaisa Yehova ekitiinisa turikukoresa ebintu byaitu eby’omuhendo. Abaheereza ba Yehova ab’amazima batwire nibahaisa Yehova ekitiinisa omu muringo ogwo. (Enf. 3:9) Nk’eky’okureeberaho, Abaisraeli bakaba bahayo kushagika omurimo gw’okwombeka n’okureeberera hekalu. (2 Bag. 12:​4, 5; 1 Bus. 29:​3-9) Abeegi ba Kristo abaabaire nibafayo bakaba nibamushagika n’entumwa ze barikukoresa ‘ebintu byabo.’ (Luk. 8:​1-3) Abakristaayo omu kyasha ky’okubanza nabo bakahayo eby’okuhwera ab’eishe-emwe bagyenzi baabo. (Byak. 11:​27-29) Hati, naitwe nitubaasa kuhaisa Yehova ekitiinisa turikuhayo twekundiire.

12. Ebi turikuhayo nibihaisa bita Yehova ekitiinisa? (Reeba n’ekishushani.)

¹² Teekateeka aha ky’okureeberaho kimwe ekirikworeka oku ebi turikuhayo birikuhaisa Yehova ekitiinisa. Ripoota eya 2020 ekagamba aha ku ekyanda ekyamazire obwire buraingwa omuri Zimbabwe kyakwatsire aha bantu baingi. Abantu baingi bakaba bari omu kabi k’okwitwa enjara, otwariiremu munyaanyazi-itwe orikwetwa Prisca. Omu kyanda ekyo, akagumizamu naabuurira buri Rwakashatu n’Orwakataano, n’omu bwire bw’okuhinga entabire. Abataahi bakamugaaniiza ahabw’okuza omu kubuurira omu mwanya gw’okuhinga. Bakamugira bati: “Nooza kwitwa enjara.” Prisca akaba abagarukamu ati: “Yehova takatsigahoga abaheereza be.” Bwanyima y’obwire bukye, akatunga obuhwezi obu ekibiina kyaitu kirikuha abahikirweho ebihikiirizi. Obuhwezi obwo bukabaho ahabw’ebi turikuhayo. Bataahi ba Prisca bakatangaara, kandi baamugira bati:  “Ruhanga butoosha naakuhwera, n’ahabw’ekyo nitwenda kwega ebirikumukwataho.” Mushanju aharibo bakatandika kuza omu nteerane.

13. Ebikorwa byaitu nibihaisa bita Yehova ekitiinisa? (Zaaburi 96:9)

¹³ Shoma Zaaburi 96:9. Nitubaasa kuhaisa Yehova ekitiinisa omu bikorwa byaitu. Abanyamurwa abaabaire nibaheereza aha hekalu ya Yehova bakaba baine kuba abeecumi omu by’omubiri. (Kur. 40:​30-32) Kwonka, okugira emitwarize eshemeire ni kikuru okukira okuba abeecumi aha mubiri. (Zab. 24:​3, 4; 1 Pet. 1:​15, 16) Twine kuteeraho munonga kujuura “omuntu owa ira,” niyo miteekateekyere n’ebikorwa ebitashemeire, kandi tukajwara “omuntu omusya,” niyo miteekateekyere n’ebikorwa ebirikuhaisa Yehova ekitiinisa. (Kol. 3:​9, 10) Ahabw’okuhwerwa Yehova, abantu abaine emicwe etashemeire kandi enshaarizi, nibabaasa kuhinduka bajware omuntu omusya.

14. Nitwegyera ki ahari ky’okureeberaho kya Jack? (Reeba n’ekishushani.)

¹⁴ Teekateeka aha ky’okureeberaho kya Jack owaabaire ari enshaarizi kandi omuntu mubi, ou baakubize eiziina Daimoni. Ahabw’ebihagaro ebi Jack yaakozire, bakamucwera ogw’okufa. Kwonka, ku yaabaire ategyereize kwitwa, akaikiriza kwegyesibwa Baibuli ow’eishe-emwe owaataayaayire omu kihome eki yaabaire arimu. Oyihireho embeera ye ey’enyima, Jack akajuura omuntu owa ira, kandi bwanyima y’obwire akaba ahikire kubatizibwa. Akaba ahindukire munonga, kandi aha izooba eri yaabaire naaza kwitirwaho, bamwe aha barinzi b’ekihome bakarira barikumusiibura. Omuserukare omwe owaabaire naakora aha kihome ekyo akagira ati: “Enyima, Jack akaba ari omusibe orikukirayo kutwaza kubi omu mwanya ogu. Kwonka hati niwe arikukirayo kutwaza gye.” Saabiiti eyaakuratsireho Jack aherize kwitwa, ab’eishe-emwe abaagarukire kwebembera enteerane omu kihome bakashangayo omusibe owaizire omu ruteerane omurundi gw’okubanza. Niki ekyamuhigire kwija? Akakunda empinduka ezi Jack yaabaire akozire, kandi akaba naayenda kumanya eki arikubaasa kukora kuramya Yehova. Buzima, ebikorwa byaitu nibibaasa kuhaisa Tataitwe ow’omu iguru ekitiinisa.—1 Pet. 2:12.

 YEHOVA ARI HAIHI KUHAISA ATA EIZIINA RYE EKITIINISA?

15. Yehova naija kuhaisa ata eiziina rye ekitiinisa omu biro by’omumaisho? (Zaaburi 96:​10-13)

¹⁵ Shoma Zaaburi 96:​10-13. Emishororongo egi erikuhererukayo omuri Zaaburi 96 neegamba ahari Yehova nk’Omucwi w’emanja, kandi Omugabe ohikiriire. Yehova naija kuhaisa ata eiziina rye ekitiinisa omu biro by’omumaisho? Arikucwa emanja. Ari haihi kucwekyereza Babulooni Orukuru ahabw’okureetera eiziina rye eririkwera kujumwa. (Kush. 17:​5, 16; 19:​1, 2) Bamwe abaraareebe okucwekyerera kwa Babulooni Orukuru nibabaasa kutwegaitaho omu kuramya okw’amazima. Bwanyima, ahari Haramagedoni, Yehova naija kucwekyereza entebeekanisa ya Sitaane yoona, amarireho kimwe boona abarikumuhakanisa, kandi bakajuma eiziina rye. Kwonka naija kujuna abarikumukunda, bakamworobera, kandi bakamuha ekitiinisa. (Mak. 8:38; 2 Tes. 1:​6-10) Bwanyima y’okugyezibwa okw’aha muheru okuraabeho Emyaka Rukumi ey’Obutegyeki bwa Kristo yaaheza kuhendera, Yehova naija kuba yaaherize kweza eiziina rye. (Kush. 20:​7-10) Omu bwire obwo, ‘ensi neija kubugwa okumanya ekitiinisa kya [Yehova], nk’oku amaizi gabuga hoona omu nyanja.’—Hab. 2:14.

16. Omaririire kukora ki? (Reeba n’ekishushani.)

¹⁶ Ka nikiija kuba kirungi buri omwe omu nsi ku araabe naaha Yehova ekitiinisa ekishemereire eiziina rye! Kwonka obwire obwo butakahikire, nitubaasa kukoresa buri mugisha kuhaisa Ruhanga waitu ekitiinisa. Kutuhwera kuta omutima aha nshonga nkuru egyo, Akakiiko Akareeberezi katooraine Zaaburi 96:8 kuba ekyahandiikirwe ky’omwaka 2025: “[Ha Yehova] ekitiinisa ekishemereire eiziina rye.”