EKICWEKA EKY’OKWEGA 5
EKYESHONGORO 108 Rukundo ya Ruhanga Etarikuhwaho
Oku Turikugasirwa Omuri Rukundo ya Yehova
“Kristo Yesu akaija omu nsi kujuna abasiisi.”—1 TIM. 1:15.
ENTIMA
Oku turikugasirwa ahabw’ekitambo, n’oku turikubaasa kworeka ngu nitusiima Yehova.
1. Nitubaasa kukora ki kureetera Yehova kushemererwa?
TEERA akashushani orikuha omuntu ou orikukunda ekiconco kirungi ky’omutaano, kandi eky’omugasho. Noobaasa kwehurira kubi omuntu ogwo yaakibiika, akabura kukikoresa. Kwonka, nooshemererwa yaakikoresa gye, kandi akooreka ngu naakisiima. Eky’okwega? Yehova akahayo Omwana we ahabwaitu. Ka aine kuba naashemererwa twayoreka ngu nitusiima ekiconco ky’omuhendo ekyo, na rukundo eyaamuhigire kutuha ekitambo!—Yoh. 3:16; Rom. 5:7, 8.
2. Nituza kushwijuma ki omu kicweka eki?
2 Kwonka haahinguraho obwire, nitubaasa kutandika kureeba ekitambo nk’ekitaine mugasho. Ekyo nikibaasa kushusha nk’okuta ekiconco kya Ruhanga omu ibiikiro. Nikibaasa kutushemeza kukigira, kwonka tugume tukibiikire. Kubaasa kwetantara ekyo kubaho, butoosha tushemereire kweshwijuma kureeba yaaba nitusiima eki Ruhanga na Kristo baatukoreire. Ekicweka eki nikiza kutuhwera kukora ekyo. Nituza kureeba oku ekitambo kirikutugasira hati n’oku kiraatugasire omu biro by’omumaisho. Kandi nituza n’okureeba oku turikubaasa kworeka ngu nitusiima rukundo ya Yehova na munonga omu bwire by’Ekiijutsyo.
OKU TURIKUGASIRWA HATI
3. Ni muringo ki gumwe oku ekitambo kirikutugasira hati?
3 Na hati ekitambo kya Kristo nikitugasira. Nk’eky’okureeberaho, Yehova naatusaasira ebibi byaitu arikwihirira aha kitambo. Naayenda kutusaasira, n’obu kiraabe kitarikumwetengyesa kukikora. Omuhandiiki wa zaaburi akooreka okusiima arikweshongora ati: “Ahabw’okuba iwe [Yehova] ori murungi, orahuka kusaasira.”—Zab. 86:5; 103:3, 10-13.
4. Yehova akahayo ekitambo ahabwa baahi? (Luka 5:32; 1 Timoseo 1:15)
4 Abamwe nibabaasa kuba nibeehurira nk’abatashemereire okusaasira kwa Yehova. Amazima gari ngu, twena titushemereire kusaasirwa. Entumwa Paulo akaba naayereeba ‘nk’otashemereire kwetwa Entumwa.’ Kandi, akoongyeraho ati: “Ahabw’embabazi za Ruhanga ndi nk’oku ndi.” (1 Kor. 15:9, 10) Twayeteisa ebibi byaitu, Yehova naatusaasira. Ahabw’enki? Tihabw’okugira ngu tushemereire kusaasirwa, kureka naakikora ahabw’okutukunda. Ku oraabe nooyereeba nk’otahikire kusaasirwa, ijuka ngu Yehova akahayo ekitambo ahabw’abasiisi abarikweteisa, beitu tihabw’abantu abataine kibi.—Shoma Luka 5:32; 1 Timoseo 1:15.
5. Haine n’omwe ahariitwe oshemereire kuteekateeka ngu aine kugirirwa embabazi? Shoboorora.
5 Tihaine n’omwe ahariitwe oshemereire kuteekateeka ngu aine kusaasirwa Yehova, n’obu yaakuba amazire emyaka mingi omu buheereza. Kwonka nabwo, Yehova naatusiima ahabw’okuheereza omu bwesigwa. (Heb. 6:10) Akatuha Omwana we nk’ekiconco, beitu kutarikutushashura ahabw’okumuheereza. Twateekateeka ngu tushemereire kugirirwa embabazi ahabw’ebi tukozire, nari twine kutwarizibwa omu muringo gw’omutaano, nituba turi nk’abarikugira ngu Kristo akafeera busha.—Gyeragyeranisa Abagalatia 2:21.
6. Ahabw’enki Paulo yaakozire n’amaani omu kuheereza Yehova?
6 Paulo akaba naamanya ngu tarikubaasa kusiimwa Ruhanga. Mbwenu shi ahabw’enki yaakozire n’amaani omu kuheereza Yehova? Akaba naayenda kworeka ngu naasiima Yehova ahabw’okumugirira embabazi ezitamushemereire. (Efe. 3:7) Nka Paulo, nitugumizamu kuheereza n’obweziriki, tihabw’okugira ngu embabazi za Yehova zitushemereire, kureka ahabw’okworeka ngu nitusiima.
7. Ni mu muringo ki ogundi oku turikugasirwa omu kitambo hati? (Abarooma 5:1; Yakobo 2:23)
7 Buri omwe ahariitwe naabaasa kugira omukago murungi na Yehova ahabw’ekitambo. a Nk’oku kyorekirwe omu kicweka eky’enyima, obu twazaarwa tukaba tutaine mukago murungi na Ruhanga. Kwonka ahabw’ekitambo, twine “obusingye na Ruhanga” kandi nitubaasa kumwirira haihi.—Shoma Abarooma 5:1; Yakobo 2:23.
8. Ahabw’enki twine kusiima Yehova ahabw’omugisha gw’okushaba?
8 Teekateeka aha ku omugisha gw’okushaba gurikutuhwera kugira omukago murungi na Yehova. Yehova naahurira okushaba kw’abantu be abeteeraine hamwe, n’okwa buri muntu okwe. Okushaba nikubaasa kwikaikanisa emitima yaitu, kutuhwere kugira obusingye bw’omu biteekateeko, kutureetere kwehurira gye, kandi okukira munonga kuhamye omukago gwaitu na Ruhanga. (Zab. 65:2; Yak. 4:8; 1 Yoh. 5:14) Obu Yesu yaabaire ari omu nsi, akashaba emirundi mingi arikumanya ngu Yehova naahurira okushaba kwe, kandi okushaba kukaba nikumuhwera kuguma aine omukago guhami na Ishe. (Luk. 5:16) Ka nikitushemeza kumanya ngu ahabw’ekitambo nitubaasa kuba banywani ba Yehova, kandi tugambe nawe omu kushaba!
OKU TURAAGASIRWE OMU BIRO BY’OMUMAISHO
9. Ekitambo nikiija kugasira kita abaheereza ba Yehova abeesigwa omu biro by’omumaisho?
9 Ekitambo nikiija kugasira kita abaheereza ba Yehova abeesigwa omu biro by’omumaisho? Nibaija kuheebwa amagara agatahwaho. Abantu baingi nibateekateeka ngu ekyo tikirikubaasika ahabw’okuba abantu batwire nibafa kumara emyaka mingi. Kwonka Yehova akaba agyendereire ngu abantu batuureho ebiro byona. Ku ogire ngu Adamu tarasiisire, tihaine owaakubaire naateekateeka ngu ekyo tikirikubaasika. Kandi n’obu hati amagara agatahwaho garaabe nigareebeka nk’ag’omutaano, n’ekiconco eki Yehova yaahaireyo eky’omwana we omukundwa ngu tugire amatsiko ago nakyo n’eky’omutaano.—Rom. 8:32.
10. Entoore n’ab’entaama ezindi baine matsiko ki omu biro by’omumaisho?
10 N’obu turaabe nitwija kutunga amagara agatahwaho omu biro by’omumaisho, Yehova naayenda ngu tugagirire ekihika hati. Entoore baine ekihika ky’okutunga amagara againe ekigyendererwa omu iguru barikutegyeka ensi bari na Kristo. (Kush. 20:6) Ab’entaama ezindi baine amatsiko g’okutuura omuri paradiso eraabe etarimu busaasi n’enaku. (Kush. 21:3, 4) Ori omwe aha b’entaama ezindi abaine amatsiko g’okutunga amagara agatahwaho omu nsi? Kwonka eki ti kiconco ky’okutuhuumuriza kyonka, ahakuba Yehova akahanga abantu kutuuraho omu nsi ebiro byona. Ekyo buzima nikiija kutureetera okushemererwa kwingi.
11-12. Ni migisha emwe ei turikwija kwesiimira omuri Paradiso? (Reeba n’ebishushani.)
11 Teebereza oku embeera ziraabe ziri omuri Paradiso omu nsi. Torikwija kwerarikirira ngu noija kurwara nari kufa. (Isa. 25:8; 33:24) Yehova naija kwigutsya buri kyetengo kyawe kyona ekirungi. Okaayenzire kwega ahari ki? Aha bya saayansi, okweshongora, nari okuteera ebishushani? Kandi, nihaija n’okwetengyesa ab’okuteera puraani z’ebyombeko, abombeki, abahingi, ab’okuhwera omu kuhunduuza, kutebeekanisa eby’okurya, kukora ebikoreso, n’ab’okureeberera emisiri. (Isa. 35:1; 65:21) Ahabw’okugira ngu noija kuba oine amagara agatahwaho, noija kwega emyoga yoona ei orikwenda.
12 Ka nitwija kushemererwa munonga kwakiira abaraazoorwe! (Byak. 24:15) Teekateeka oku orikwija kushemererwa ahabw’okwongyera kumanya ebirikukwata ahari Yehova orikushwijuma ebi yaahangire. (Zab. 104:24; Isa. 11:9) Ekirikukirayo oburungi, nikiija kutushemeza kuramya Yehova n’omutima ogutarikweshinja. Mbwenu shi okaayenzire kufeerwa emigisha egi ey’ebiro by’omumaisho ‘ahabw’eby’okweshemeza by’ekibi ebirikuhwaho juba’? (Heb. 11:25) Ngaaha buzima! Emigisha egi neekirira kimwe byona ebi turikwefeerereza hati. Ijuka ngu, titurikwija kuguma tutegyereize ensi kuhinduka Paradiso. Neija kurugaho ebe eyaabuzima tugituuremu. Ebyo byona nibiija kuhikiirira ahabw’okugira ngu Yehova akatukunda munonga yaatuha ekiconco ky’Omwana we.
Ni migisha ki ey’omu Paradiso ei oiniire ekihika? (Reeba akacweka 11-12)
YOREKA NGU NOOSIIMA RUKUNDO YA YEHOVA
13. Nitubaasa kworeka tuta ngu nitusiima rukundo ya Yehova? (2 Abakorinso 6:1)
13 Nitubaasa kworeka tuta ngu nitusiima Yehova ahabw’okutuha ekitambo? Turikwebembeza omurimo gwe omu bi turikukora. (Mat. 6:33) Yesu akagira ngu “abariho barekye kuguma bariho ahabwabo bonka, kureka ahabw’Ogwo owaabafeereire akabazookyera.” (2 Kor. 5:15) Buzima titurikwenda kwebwa ekigyendererwa ky’embabazi ezitatushemereire ezi Yehova yaatugiriire.—Shoma 2 Abakorinso 6:1.
14. Nitubaasa kworeka tuta ngu nitwikiririza omu buhabuzi bwa Yehova?
14 Kandi nitubaasa kworeka ngu nitusiima rukundo ya Yehova turikwikiririza omu buhabuzi bwe. Tuta shi? Turikuteekateeka aha ki Yehova arikwenda ngu tukore twaba nitucwamu obwegyese obu turaatungye, nari omurimo oguturaakore kwebaisaho. (1 Kor. 10:31; 2 Kor. 5:7) Twayoreka okwikiriza kwaitu omu bikorwa nihabaho ekintu ky’omutaano. Okwikiriza kwaitu omuri Yehova n’omukago gwaitu nawe nibyongyera kuhama. Kandi amatsiko gaitu nigoongyera kuba agaabuzima.—Rom. 5:3-5; Yak. 2:21, 22.
15. Nitubaasa kworeka tuta ngu nitusiima rukundo ya Yehova omu bwire bw’Ekiijutsyo?
15 Hariho omuringo ogundi oku turikubaasa kworeka ngu nitusiima rukundo ya Yehova. Turikukoresa gye obwire bw’Ekiijutsyo. Oyihireho okwetebeekanisa kuba aha Kiijutsyo, nitubaasa n’okweta abandi kwija kutwegaitaho. (1 Tim. 2:4) Shoboororera abu orikweta kwija aha Kiijutsyo ebiraabeho. Ekyo noobaasa kukikora orikubooreka vidiyo Ahabw’enki Yesu Yaafiire? na Okwijuka Okufa kwa Yesu eziri aha jw.org. Abareeberezi baine kuteeraho kweta abatakibuurira. Teekateeka aha kushemererwa okurikuba omu iguru n’omu nsi emwe aha ntaama za Yehova erikuba ehabire yaagaruka omu busyo! (Luk. 15:4-7) Aha izooba ry’Ekiijutsyo, ka tuteereho kuramutsya buri omwe, kwonka okukira munonga abasya n’abamazire obwire batarikwija. Nitwenda kubareetera kuhurira baikaikaine.—Rom. 12:13.
16. Ahabw’enki twine kuteekateeka aha kwongyera aha buheereza bwaitu omu bwire bw’Ekiijutsyo?
16 Mbwenu shi noobaasa kwongyera kwejumba omu mirimo y’eby’omwoyo omu bwire bw’Ekiijutsyo? Okukora ekyo, n’omuringo murungi gw’okworeka ngu nitusiima Ruhanga na Kristo ahabwa byona ebi baatukoreire. Ku turikwongyera aha buheereza bwaitu, nitwongyera kureeba oku Yehova arikutushagika, n’ekirikurugamu nitumwesigira kimwe. (1 Kor. 3:9) Teeraho n’okukuratira entebeekanisa y’okushoma Baibuli ey’Ekiijutsyo eri omu katabo Okushwijuma Ebyahandiikirwe Buri Izooba, nari chati eri omu katabo k’okukoresa omu ruteerane rw’aha gati ya saabiiti. Kandi omu kweyegyesa kwawe noobaasa kwongyera kucondooza aha mishororongo egyo.
17. Niki ekirikureetera Yehova okushemererwa? (Reeba n’akabokusi “ Oku Turikworeka ngu Nitusiima Rukundo ya Yehova.”)
17 Amazima gari ngu, embeera zaawe nizibaasa kukuremesa kukora byona ebyagambwaho omu kicweka eki. Kwonka, ijuka ngu Yehova tarikugyeragyeranisa ebi orikukora n’ebi abandi barikukora, kureka naareeba ekiri omu mutima gwawe. Naashemererwa yaareeba noosiima ekiconco ky’omuhendo eky’ekitambo oyihire aha mutima.—1 Sam. 16:7; Mak. 12:41-44.
18. Ahabw’enki nitusiima Yehova na Yesu Kristo?
18 Ekitambo nikyo kirikutubaasisa kusaasirwa ebibi byaitu, kugira omukago murungi na Yehova, n’amatsiko g’okutuuraho ebiro byona. Butoosha ka tuteereho kworeka ngu nitusiima rukundo ya Yehova, eyaamuhigire kutuha emigisha egi yoona. (1 Yoh. 4:19) Kandi ka tworekye ngu nitusiima Yesu owaatukunzire munonga akahayo amagara ge ahabwaitu!—Yoh. 15:13.
EKYESHONGORO 154 Rukundo Etarikuremwa
