1. Abazaire Abakristaayo baine kuhamya ki abaana baabo batakabatiziibwe?

“KUMARA ameezi maingi nkaguma ningambira taata na maama ngu niinyenda kubatizibwa, kandi bakaguma nibakigaaniiraho naanye. Bakaba nibenda kuhamya yaaba nimmanya obukuru bw’eki ncwairemu. Okwaikumi-n’abiri 31, 1934, eizooba eri naabaire nyiniire ekihika rikahika.” Ebi nibyo Blossom Brandt yaagambire ebyabaireho obu yaacwamu kubatizibwa. Obunaku obu, abazaire nabo nibenda kuhwera abaana baabo kucwamu gye. Omwana yaatuuraho kubatizibwa ataine nshonga ehikire, eki nikibaasa kushiisha omukago gwe na Yehova. (Yakobo 4:17) Abazaire baine kuhamya ngu omwana waabo ayeteekateekire kuba omwegi wa Kristo atakabatiziibwe.

2. (a) Bamwe aha bareeberezi abarikutaayaayira ebibiina beetegyereize buremeezi ki? (b) Nituza kwega ki omu kicweka eki?

² Bamwe aha bareeberezi abarikutaayaayira ebibiina bareebire ngu abaana baingi emishogoyo nari abaine emyaka nka 20  tibakabatiziibwe n’obu baraabe bakuriire omu mazima. Obwire obwingi, abaana abo nibaza omu nteerane, omu kubuurira, kandi nibeeyeta Abajurizi ba Yehova. Kwonka ahabw’enshonga zitari zimwe tibakeehaireyo ahari Yehova bakabatizibwa. Obumwe, eki nikireetwa abazaire abarikuteekateeka ngu abaana baabo tibakahikire kubatizibwa. Omu kicweka eki, nituza kureeba enshonga ina ezireeteire abazaire abamwe okutahiga abaana baabo kutunguuka kuhika aha kubatizibwa.

3. Niki ekyabaire nikyerarikiriza Abazaire ba Blossom?

³ Abazaire ba Blossom, abaaba baagambirweho aha kutandika kw’ekicweka eki, bakaba nibeerarikirira yaaba akuzire ekirikumara kwetegyereza obukuru bw’okubatizibwa n’eki kirikumanyisa. Mbwenu shi abazaire nibabaasa kumanya bata yaaba omwana waabo ahikire kwehayo ahari Yehova?

4. Ekiragiro kya Yesu ekiri omuri Matayo 28:19, 20 nikibaasa kuhwera kita abazaire obunaku obu?

⁴ Shoma Matayo 28:19, 20. Baibuli terikugira ngu omuntu ashemereire kubatizibwa aha myaka nanka. Kwonka ni kirungi abazaire kuteekateeka n’obwegyendesereza aha makuru g’okuhindura abantu abeegi. Omu Rugriika, ebigambo ‘okuhindura abantu abeegi’ ebirikukoresibwa omuri Matayo 28:19 nibimanyisa okwegyesa omuntu, oine ekigyendererwa ky’okumuhwera kuba omwegi wa Yesu. Omwegi n’ogwo orikwega akeetegyereza ebi Yesu yaayegyeise kandi akenda kumworobera. N’ahabw’ekyo abazaire bashemereire kwegyesa abaana baaheza bati kuzaarwa, baine ekigyendererwa ky’okubahwera kwehayo ahari Yehova n’okuba abeegi ba Kristo. Nitumanya ngu abeereere tibarikwikirizibwa kubatizibwa. Kwonka Baibuli neeyoreka ngu abaana abakiri bato nibabaasa kwetegyereza amazima kandi bagakunde.

5, 6. (a) Ebi Baibuli erikushoboorora ahari Timoseo nibituhwera kumanya ki aha kubatizibwa kwe? (b) Ni muringo ki murungi ogu abazaire barikubaasa kuhweramu abaana baabo?

⁵ Timoseo akaba ari omwegi owaacwiremu kuheereza Yehova akiri muto. Entumwa Paulo akagira ngu Timoseo akatandika kwega amazima g’omu Kigambo kya Ruhanga “okuruga omu buto.” Ishe akaba atarikuheereza Yehova, kwonka nyina na nyinenkuru bakamuhwera kukunda Ekigambo kya Ruhanga. Kandi, eki kikamureetera kugira okwikiriza kuhami. (2 Timoseo 1:5; 3:14, 15) Naabaasa kuba yaabaire akiri omushogoyo nari aine emyaka nka 20, obu yaaheebwa obujunaanizibwa bw’omutaano omu kibiina.​—Ebyakozirwe 16:1-3.

⁶ Abaana tibarikushushana. Boona tibarikutunguukira aha rurengo rumwe. Abamwe nibeetegyereza amazima, bacwamu gye, kandi babatizibwa bakiri bato. Kandi abandi nibaba batakahikire kubatizibwa okuhitsya baakura. N’eky’obwengye abazaire kutagyemesereza abaana baabo kubatizibwa. Beitu, nibabaasa kuhwera buri mwana kutunguuka okurugiirira aha kubaasa kwe. Nikishemeza munonga abazaire okureeba abaana baabo barikukuratira obuhabuzi oburi omu Enfumu 27:11. (Kishome.) Kwonka baine kwijuka ngu ekigyendererwa kyabo n’okuhwera abaana baabo kuba abeegi ba Kristo. Baine ekigyendererwa eki omu  biteekateeko, abazaire nibabaasa kwebuuza bati: ‘Omwana wangye naamanya ebirikumara kubaasa kwehayo ahari Yehova kandi akabatizibwa?’

7. Mbwenu shi omwana aine kuba naamanya buri kimwe ekirikukwata aha nyegyesa za Baibuli atakabatiziibwe? Shoboorora.

⁷ Abazaire baaba nibeegyesa abaana baabo, nibaba nibabahwera kumanya gye amazima. Okumanya oku nikuhiga abaana kwenda kwehayo ahari Ruhanga. Kwonka ekyo tikirikumanyisa ngu omwana aine kuba naamanya buri kimwe ekirikukwata aha nyegyesa za Baibuli kubaasa kwehayo akabatizibwa. Buri mwegi wa Kristo aine kugumizamu naayega n’obu yaakubatizibwa. (Shoma Abakolosai 1:9, 10.) Mbwenu shi omuntu orikuza kubatizibwa aine kuba naamanya ebirikwingana ki?

8, 9. Niki ekyahikire aha murinzi w’ekihome ow’omuri Filipi, kandi eki nikitwegyesa ki?

⁸ Abazaire obunaku obu nibabaasa kwegyera aha ka emwe eya ira. (Ebyakozirwe 16:25-33) Omu mwaka gwa 50, entumwa Paulo aha rugyendo rwe rw’obumiisani orwa kabiri akataayaayira orurembo Filipi. Paulo na Siila ku baahikireyo, bakababeiherera, baabakwata baabata omu kihome. Omu kiro, hakabaho omutsitsa gw’amaani ogwareteire enyingi zoona ez’ekihome kwiguka. Omurinzi w’ekihome akateekateeka ngu abaabaire bakomirwe batorokire, kandi akaba naayenda kweita, kwonka Paulo yaamuzibira. Paulo na Siila bakeegyesa omurinzi w’ekihome n’ab’eka ye amazima agarikukwata ahari Yesu. Bakaikiriza ebirikukwata ahari Yesu ebi baayegire, kandi baamanya ku kiri kikuru okumworobera. N’ahabw’ekyo bakabatizibwa ahonaaho. Mbwenu shi eki nikitwegyesa ki?

⁹ Omurinzi ogu naabaasa kuba yaabaire ari omuserukare Omurooma owaabaire ahuumwire. Akaba atarikumanya ebiri omu Kigambo kya Ruhanga. N’ahabw’ekyo kubaasa kuba Omukristaayo, akaba aine kwega enyegyesa za Baibuli ez’okubandizaho, akeetegyereza eki Ruhanga arikwenda abaheereza be bakore, reero akoorobera enyegyesa za Yesu Kristo. Ebi yaayegire omu kaire ako bikamuhwera kwenda kubatizibwa. Kwonka akaba aine kugumizamu naayega bwanyima y’okubatizibwa. Mbwenu shi noobaasa kukora ki, omwana waawe yaakugira ngu naayenda kubatizibwa ahakuba naakunda Yehova kandi naayenda kumworobera? Noobaasa kumuhiga kugambira abareeberezi bareebe yaaba ahikire kubatizibwa. * (Reeba obugambo bw’ahansi.) Naija kugumizamu naayega ebirikukwata ahari Yehova ebiro bye byona, nk’Abakristaayo abandi boona ababatiziibwe.​—Abarooma 11:33, 34.

10, 11. (a) Abazaire abamwe baine miteekateekyere ki? (b) Niki buzima ekirikubaasa kurinda omwana?

¹⁰ Abazaire abamwe nibateekateeka ngu ni kirungi abaana baabo kubanza baatunga obwegyese bw’ahaiguru oburikubaasa kubahwera kutunga emirimo, bakabona kubatizibwa. Abazaire aba nibaba baine ebigyendererwa birungi, kwonka baine kwebuuza: ‘Ekyo nikiza kuhwera omwana wangye kuba omusinguzi? Eki nikihikaana n’ebi turikwega omu Baibuli? Yehova naayenda ngu amagara gaitu tugakorese ki?’​—Shoma Omubuurizi 12:1.

¹¹ Ni kikuru kwijuka ngu ensi egi n’ebigirimu nibihakanisa emiteekateekyere ya Yehova n’ebi arikukunda. (Yakobo 4:7, 8; 1 Yohaana 2:15-17; 5:19) Okugira omukago guhami na Yehova nikyo kintu kikuru ekirikukirayo ekirikubaasa kurinda omwana waawe okutabeihwabeihwa Sitaane, ensi egi, n’emiteekateekyere yaayo mibi. Abazaire bayebeembeza obwegyese n’emirimo mirungi, abaana baabo nibabaasa kuteekateeka ngu ebintu eby’omu nsi ni bikuru kukira okugira omukago murungi na Yehova. Eki n’ekyakabi munonga. Mbwenu shi abazaire, buzima nimwenda ngu ab’ensi beegyese abaana baanyu ebi barikuteekateeka ngu nibireeta okushemererwa? Omuringo gumwe gwonka ogurikubaasa kutureetera okushemererwa okwabuzima kandi tukaba abasinguzi, n’okwebembeza okuheereza Yehova.​—Shoma Zaaburi 1:2, 3.

12. Ahabw’enki abazaire abamwe nibateekateeka ngu ni kirungi omwana kutarahuka kubatizibwa?

¹² Omukazi omwe akashoboorora ahabw’enki yaabaire atarikwenda ngu omuhara abatizibwe. Akagira ati: “Ningira enshoni kugira ngu enshonga enkuru ekaba eri entebeekanisa y’okubingwa omu kibiina.” Nka munyaanyazi-itwe ogu, abazaire abamwe nibateekateeka ngu ni kirungi omwana kutegyereza kubatizibwa okuhitsya yaakura ekirikumara kwetantara enshobe z’obushema. (Okutandika 8:21; Enfumu 22:15) Abazaire  abo nibabaasa kuteekateeka ngu omwana waabo yaaba atabatiziibwe, tarikubaasa kubingwa omu kibiina. Kwonka shi emiteekateekyere egi erimu kabi ki?​—Yakobo 1:22.

13. Mbwenu shi omuntu yaaba atakabatiziibwe, nikimanyisa ngu tarikujunaanwa ahari Yehova? Shoboorora.

¹³ N’amazima, abazaire baine kuhamya ngu omwana yaaza kubatizibwa aine kuba ayeteekateekire kwehayo ahari Yehova. Kwonka neeba eri enshobe kuteekateeka ngu omwana tarikujunaanwa ahari Yehova yaaba atabatiziibwe. Omwana naatandika kujunaanwa ahari Yehova yaaheza kumanya ekihikire n’ekitahikire. (Shoma Yakobo 4:17.) N’eky’obwengye abazaire okutamaramu amaani omwana waabo yaaba naayenda kubatizibwa. N’obu omwana yaakuba akiri muto, nibamwegyesa kukunda ebirikushemeza Yehova n’okwanga ebi arikwanga, nk’oku nabo barikukora. (Luka 6:40) Rukundo ei omwana ainiire Yehova neija kumurinda okutakora ekibi ky’amaani, ahakuba naaba naayenda kukora eki Yehova arikukira ngu kihikire.​—Isaaya 35:8.

14. Abareeberezi nibabaasa kushagika bata abazaire?

¹⁴ Abareeberezi nibabaasa kushagika omurimo gw’abazaire, barikugamba gye aha bigyendererwa by’omwoyo. Munyaanyazi-itwe omwe naijuka ngu Ow’eishe-emwe Russell akagaaniira nawe obu yaabaire aine emyaka mukaaga. Naagira ati: “Akamara edakiika 15 arikugaaniira naanye aha bigyendererwa byangye by’omwoyo.” Niki ekyarugiremu? Munyaanyazi-itwe ogu akaba payoniya, kandi akamara emyaka erikurenga 70 ari payoniya! Buzima, okuhiga omuntu orikukoresa ebigambo birungi, nikibaasa kumuhwera. (Enfumu 25:11) Abareeberezi nibabaasa kweta abazaire n’abaana baabo kugira eki baakora aha Kyombeko ky’Obukama. Nibabaasa kushaba abaana kukora emirimo erikuhikaana n’emyaka yaabo.

15. Abandi omu kibiina nibabaasa kuhwera bata abato?

¹⁵ Abandi omu kibiina nibabaasa kuhwera  bata? Barikworeka ngu nibafayo aha bato. Nk’eky’okureeberaho, noobaasa kufayo kureeba yaaba abato nibateeraho kwirira haihi na Yehova. Omwana naabaasa kugarukamu gye omu ruteerane, nari naabaasa kuha orubazo omu ruteerane orw’ahagati ya Saabiiti. Naabaasa kuba yaabuurira mugyenzi we aha ishomero, nari naabaasa kwohibwa kukora ekibi kwonka akore ekihikire. Kyaba nikwo kiri, musiime ahonaaho kandi omugambire ngu yaakora gye! Nitubaasa kutaho ekigyendererwa ky’okugaaniira n’abato enteerane zitakatandikire na bwanyima yaazo. Twakora tutyo, abaana nibaija kumanya ngu nabo nibamwe aha ‘b’omutwe muhango gw’abantu.’​—Zaaburi 35:18.

16, 17. (a) Ahabw’enki ni kikuru abaana kubatizibwa? (b) Abazaire nibabaasa kutunga kushemererwa ki? (Reeba ekishushani aha kutandika.)

¹⁶ Bumwe aha bujunaanizibwa bukuru obu abazaire baine n’okwegyesa abaana baabo kukunda Yehova. (Zaaburi 127:3; Abaefeso 6:4) Abaana omu ihanga rya Israeli bakaba baazaarwa beehaireyo ahari Yehova. Kwonka tikwo kiri aha baana baitu. Ahabw’okugira ngu abazaire nibakunda Yehova n’amazima tikirikumanyisa ngu n’abaana baabo nibaija kukikora. Abazaire baine kugira ekigyendererwa ky’okuhwera omwana waabo yaaheza ati kuzaarwa, kugira ngu abe omwegi wa Yesu, ayeheyo kuheereza Ruhanga kandi abatizibwe. Tihaine ekirikukira ekyo obukuru. Omuntu ku arikwehayo kuheereza Yehova akabatizibwa, kandi akaguma ari omwesigwa, naija kubaasa kuhonokaho omu kubonabona kwingi.​—Matayo 24:13.

¹⁷ Obu Blossom Brandt yaabaire naayenda kubatizibwa, abazaire be bakaba nibenda kuhamya ngu buzima ahikire kubatizibwa. Ku baatungire obuhame, bakamushagika. Ekiro ekyahereerukireyo Blossom arikuza kubatizibwa, ishe haine eki yaakozire. Blossom naagira ati: “Twena akatushaba kutsimba amaju, reero yaashaba. Akagambira Yehova ngu nikimushemeza munonga okureeba muhara we omuto arikwehayo ahari Yehova.” Bwanyima y’emyaka erikurenga 60, Blossom naagira ati: “Nimbahamiza, omu myaka yoona erikwija, tindikubaasa kwebwa ekiro ekyo!” Abazaire, nitushaba ngu naimwe mutungye okushemererwa n’okumarwa mwareeba abaana baanyu barikwehayo ahari Yehova kandi bakabatizibwa.