1. Abakristaayo omu kyasha ky’okubanza bakaba baine buremeezi ki?

AHAGATI ya 62 na 64, entumwa Petero akahandiikira abashuhuuki abaabaire bataataaniire “omuri Ponto, Galatia, Kapadokia, Asia na Bisunia.” (1 Petero 1:1) Ab’eishe-emwe na banyaanyazi-itwe aba bakaba barugire omu bicweka bitarikushushana. Bakaba nibahiiganisibwa, kandi bakaba baine kugarurwamu amaani n’okuheebwa obuhabuzi. Kandi bakaba bari n’omu bwire bw’akabi munonga. Petero akahandiika ati: “Emperu ya byona eri haihi.” Yerusaalemu ekaba neeza kucwekyerezibwa omu bwire obutarikuhika emyaka ikumi. Niki ekyabaire nikiza kuhwera Abakristaayo aba kuraba omu bwire bugumire obwo?​—1 Petero 4:4, 7, 12.

2, 3. Ahabw’enki Petero yaahigire ab’eishe-emwe bagyenzi be kuba efura? (Reeba ekishushani aha kutandika.)

² Ekintu kimwe eki entumwa Petero yaahigire ab’eishe-emwe kukora ‘n’okukunirana’ nari okukorerana eby’obufura. (1 Petero 4:9) Ekigambo ky’Orugriika “efura” nikimanyisa “okukunda,  nari okugirira embabazi abu otarikumanya.” Kwonka Petero akaba naahiga ab’eishe-emwe bagyenzi be kukorerana eby’obufura, n’obu baraabe baabaire nibamanyana kandi barikukora ebintu hamwe. Okukorerana eby’obufura kikaba nikiija kubahwera kita?

³ Kikaba nikiija kubahwera kwongyera kumanyana. Kandi shi iwe? Noijuka oku waashemereirwe obu omuntu yaakweta omu ka ye? Kandi obu waayeta omuntu omu ka yaawe, kikakuhwera kwongyera kumumanya. Omuringo murungi gw’okumanya ab’eishe-emwe na banyaanyazi-itwe n’okuba efura orikubataayaayisa. Abakristaayo abaabaire bariho omu bwire bwa Petero bakaba baine kuhwerahwerana oburemeezi bwaguma nibweyongyera. Omu biro ‘by’emperu’ ebi, naitwe twine kukora nikyo kimwe.​—2 Timoseo 3:1.

4. Nituza kugaaniira ahari ki omu kicweka eki?

⁴ Twine migisha ki ey’okworeka abandi obufura? Nitubaasa kusingura tuta ebirikubaasa kuturemesa kuba efura? Niki ekirikubaasa kutuhwera kuba abagyenyi barungi?

5. Nitubaasa kuba tuta efura omu nteerane zaitu ez’Ekikristaayo?

⁵ Omu nteerane: Nitwetwa kwija omu nteerane ezirikutebeekanisibwa Yehova n’ekibiina kye. Nitwenda weena orikwija omu nteerane zaitu kuhurira ngu naakundwa, okukira munonga abasya. (Abarooma 15:7) Kandi nibaba bari abagyenyi ba Yehova, n’ahabw’ekyo twine kubareetera kuhurira batebeekaine, tutarikufayo aha kubarikureebeka nari oku bajwaire. (Yakobo 2:1-4) Waareeba omugyenyi ashutami wenka, noobaasa kumweta kushutama naiwe. Nikibaasa kumushemeza waamuhwera kumanya oku oruteerane ruraagyende nari kusherura ebyahandiikirwe ebirikushomwa. Ogu nigubaasa kuba omuringo murungi ‘gw’okukunira abagyenyi.’​—Abarooma 12:13.

6. Okukira munonga ni baahi abu twine kworeka obufura?

⁶ Okubaha eky’okunywa nari eky’okurya: Obu Baibuli yaabaire neehandiikwa abantu bakaba booreka obufura barikweta abandi omu maka gaabo kubaha eky’okurya, kworeka ngu nibenda kubanywana nari kugira obusingye nabo. (Okutandika 18:1-8; Abaramuzi 13:15; Luka 24:28-30) Okukira munonga ni baahi abu tushemereire kukunira? N’ab’eishe-emwe na banyaanyazi-itwe omu kibiina kyaitu. Obu ensi erikweyongyera kusiisikara, nikiija kutwetengyesa kuhamira aha b’eishe-emwe na banyaanyazi-itwe kandi tube banywani baabo. Omu 2011, Akakiiko Akareeberezi kakahindura eshaaha z’okwegyeramu Omunaara gw’Omurinzi aha Beseeli omuri United States. Bakaruga ahari shaaha 12:45 ez’omwabazyo baaza aha shaaha 12:15 ez’omwabazyo. Ahabw’enki? Ekirango kikooreka ngu obundi Ababeseeli nikibaasa kuboorobera kworekana obufura oruteerane orwo rwahwa bukiri kare. Ofiisi z’amataagi ezindi nazo zikozire nikyo kimwe. Eki kibaasiise Ababeseeli kwongyera kumanyana.

7, 8. Nitubaasa kukunira tuta abarikwija omu kibiina kyaitu kuha embazo?

⁷ Obumwe ab’eishe-emwe kuruga omu bibiina ebindi, abareeberezi abarikutaayaayira ebibiina, nari Ababeseeli nibaha embazo omu kibiina kyaitu. Obu nibubaasa kuba nibwo bwire burungi bw’okubakunira. (Shoma 3 Yohaana 5-8.) Nitubaasa kubeeta omu maka gaitu kubaha eky’okunywa nari eky’okurya.

 ⁸ Munyaanyazi-itwe omuri United States naagira ati: “Kumara emyaka, nyowe na ibanyi tubaasize kweta abarikuha embazo n’abakazi baabo omu ka yaitu kubakunira.” Naayehurira ngu buri kweta omuntu nikihamya okwikiriza kwabo kandi nikireeta okushemererwa. Naayongyeraho ati: “Eki tikikatureeterahoga kwefuuza.”

9, 10. (a) Ni baahi abu turikubaasa kuraaza kumara obwire? (b) Abaine amaju makye nabo nibabaasa kuhwera? Ha eky’okureeberaho.

⁹ Abagyenyi abarikumara obwire: Obu Baibuli yaabaire neehandiikwa, abantu bakaba nibakira kuha bagyenzi baabo ah’okuraara. (Yobu 31:32; Filemooni 22) Obunaku obu, naitwe nikibaasa kutwetengyesa kukora nikyo kimwe. Abareeberezi abarikutaayaayira ebibiina obwire obwingi nibaba nibenda ah’okuraara. Nikibaasa kuba nikyo kimwe n’aha beegi b’amashomero g’Obukama n’abarikuhwera omu kwombeka. Kandi shi abo abarikufeerwa amaka gaabo bwanyima y’okubaho ekihikiirizi? Nibabaasa kuba nibenda ah’okuraara kuhitsya enju zaabo zaabonezibwa. Titushemereire kuteekateeka ngu abo abaine amaju mahango nibo bonka abaine kuhwera. Nibabaasa kuba bahwereire emirundi mingi. Noobaasa kwikiriza kuraaza omuntu n’obu enju yaawe yaakuba eri nkye.

¹⁰ Ow’eishe-emwe omuri South Korea naijuka obu yaaraaza abeegi abaabaire baizire omu mashomero g’Obukama. Akahandiika ati: “Nkabanza kweziringa kubataayaayisa ahakuba nibwo twabaire tutaahire omu bushwere kandi turikutuura omu kaju kakye. Kwonka okwikiriza abeegi kuraara omu nju yaitu kikatureetera okushemererwa kwingi. Ahabw’okugira ngu nibwo twabaire tutaahire omu bushwere, tukareeba oku kirikushemeza omushaija n’omukazi we kuheereza kumwe Yehova bakahikiiriza n’ebigyendererwa byabo eby’omwoyo.”

11. Ahabw’enki twine kukunira abasya omu kibiina kyaitu?

¹¹ Ab’eishe-emwe na banyaanyazi-itwe abasya omu kibiina: Ab’eishe-emwe na banyaanyazi-itwe nari ab’eka emwe nibabaasa kwija omu kicweka kyanyu kuruga omu bibiina ebindi. Nibabaasa kuba baizire omu kibiina kyanyu ahabw’okugira ngu nikyetenga abahwezi. Nari nibabaasa kuba bari baapayoniya abohereziibwe omu kibiina kyaitu. Egi neeba eri empinduka mpango aharibo. Nibaba baine kukora empindahinduka kutuura omu mwanya musya, ekibiina kisya, obundi n’okugamba orurimi rusya. Noobaasa kubeeta kubaha eky’okunywa nari eky’okurya nari kuza kurambura nabo? Eki nikiija kubahwera kugira abanywani basya n’okumanyiira embeera nsya.

12. Ni ky’okureeberaho ki ekirikworeka ngu tikirikwetengyesa kutebeekanisa ebintu bingi okuba efura?

¹² Tikirikukwetengyesa kutebeekanisa ebintu bingi kubaasa kuba efura. (Shoma Luka 10:41, 42.) Ow’eishe-emwe omwe naijuka ekyamubaireho obu we n’omukazi we baahinduka abamiisani. Naagira ati: “Tukaba tukiri bato, tutarikumanya na bingi, kandi twiniire ab’omuka orushusho. Omwabazyo gumwe omukazi wangye akaba ainiire  ab’owaabo orushusho, kandi okuteeraho kwangye kumuhwera kukaba kutarikukora. Reero bwanyima shaaha nka 1:30 z’eihangwe, twahurira omuntu naiguza aha rwigi. Omwegi wa Baibuli akaba atureeteire emicungwa eshatu. Akaba aizire kutangirira itwe abamiisani abasya. Tukamweta kutaaha omu nju kandi twamuha egiraasi y’amaizi. Bwanyima tukateeka chai na chokoreti erikwotsya. Tukaba tutarikumanya Oruswahiri, kandi nawe akaba atarikumanya Orungyereza.” Ow’eishe-emwe naagira ngu eki kikabahwera kutandika kunywana ab’eishe-emwe omu kicweka ekyo n’okutunga okushemererwa.

13. Okuba efura nikikuhwera kita?

¹³ Oreeziringireho kuba efura? Ku kiraabe nikwo kiri, noobaasa kuba waafeereirwe omugisha gw’okutunga okushemererwa n’okugira abanywani ab’ebiro byona. Okuba efura ni gumwe aha miringo y’okusingura eihamba. Mbwenu shi niki ekirikubaasa kureetera omuntu kweziringa kuba efura? Ezi ni zimwe aharizo.

14. Nitubaasa kukora ki twaba tutaine bwire burikumara n’amaani g’okutaayaayisa nari kutaayaayira abandi?

¹⁴ Obwire n’amaani: Abajurizi ba Yehova baine bingi by’okukora n’obujunaanizibwa bwingi. Abamwe nibabaasa kuteekateeka ngu tibaine bwire burikumara n’amaani g’okuba efura. Ku oraabe nooyehurira otyo, nikibaasa kukwetengyesa kuhindura aha ntebeekanisa yaawe kwikiriza kutaayaayisa n’okutaayaayira abandi. Eki ni kikuru ahakuba Baibuli neetuhiga kuba efura. (Abaheburaayo 13:2) N’ahabw’ekyo okuba efura n’ekintu kihikire eky’okukora. Kubaasa kuba efura, nikibaasa kukwetengyesa kumara obwire bukye aha bintu ebitari bikuru.

15. Ahabw’enki abamwe nibateekateeka ngu tibarikubaasa kuba efura?

¹⁵ Oku orikwereeba: Orabaire nooyenda kuba efura kwonka okareeba ngu torikubaasa? Obundi oine enshoni nari nootiina ngu abagyenyi baawe nibaija kutamwa. Nari obundi toine sente nyingi kandi nootiina ngu torikubaasa kuha abagyenyi baawe nk’ebi ab’eishe-emwe abandi barikubaha. Kwonka ijuka ngu tikirikwetengyesa ngu enju yaawe ebe eri ey’omurembe. Abagyenyi baawe nibaija kushemererwa, enju yaawe yaaba ecumire gye, etereerize gye, kandi orikushemererwa.

16, 17. Noobaasa kukora ki waaba nootiina kutaayaayisa abagyenyi?

¹⁶ Ku oraabe nootiina kutaayaayisa abagyenyi, tiiwe wenka. Omureeberezi omuri Bungyereza naagira ati: “Okutebeekanisiza abagyenyi nikibaasa kukutiinisa. Kwonka ekintu kyona ekiine akakwate n’okuheereza Yehova, n’eky’omugasho kandi nikireeta okumarwa. Eki nikikira okwerarikirira kwona. Ninkira kukunda kushutama hamwe n’abagyenyi bangye tukanywa kaawa turikugaaniira.” Butoosha ni kirungi kworeka ngu noofayo aha bagyenyi baawe. (Abafilipi 2:4) Abantu baingi nibakunda kugamba ebi barabiremu. Nitubaasa kumanya ebi barabiremu twabaho hamwe nabo. Omureeberezi ondiijo akahandiika ati: “Okweta owangye abanywani kuruga omu kibiina nikimpwera kubeetegyereza gye n’okumanya gye oku baizire omu mazima.” Waayoreka ngu noofayo aha bagyenyi baawe, noobaasa kuhamya ngu ekyo nikibareetera okushemererwa.

¹⁷ Munyaanyazi-itwe omwe payoniya owaabaire naakira kuraaza abeegi b’amashomero  g’Obukama akagira ati: “Omu kubanza nkaba ninyerarikirira ahabw’okugira ngu enju yangye ekaba eringaniire, kandi ebintu byangye eby’omu nju bikuzire. Omukazi w’omwe aha barikwegyesa omu mashomero ago akampuumuriza. Akagira ngu we na iba ku barikuba nibataayaayira ebibiina, obwire oburikukirayo kubashemeza n’obwo obu barikumara bari n’omuntu w’eby’omwoyo orikuba ataine bintu bingi kwonka oine ekigyendererwa nk’ekyabo eky’okuheereza Yehova n’okumarwa n’ebintu bikye. Eki kikanyijutsya eki maawe yaabaire akira kugamba obu twabaire tukiri bato: ‘Ni kirungi kurya emboga ezirikwiragura zonka kwonka hariho okukundana.’” (Enfumu 15:17) Titushemereire kutiina, ahakuba ekikuru n’okugirira rukundo abagyenyi baitu.

18, 19. Okuba efura nikibaasa kutuhwera kita kusingura emiteekateekyere egwire ei twine aha bandi?

¹⁸ Oku orikutwara abandi: Omu kibiina kyanyu harimu omuntu orikukugwisa kubi? Waaba otateireho kusingura emiteekateekyere egwire, enyehurira zaawe tizirikwija kuhinduka. Noobaasa kuba otarikwenda kweta omuntu omu ka yaawe ahabw’okugira ngu torikukunda emitwarize ye. Nari obundi akakugwisa kubi enyima, kandi nikikugumira kwebwa.

¹⁹ Baibuli neegira ngu noobaasa kuboneza omukago gwawe n’abandi, nangwa n’abazigu baawe waaba ori efura. (Shoma Enfumu 25:21, 22.) Waayeta omuntu omu ka yaawe, noobaasa kusingura enyehurira mbi kandi ogire omukago murungi n’omuntu ogwo. Noobaasa kutandika kumureebamu  emitwarize mirungi nk’ei Yehova yaamureebiremu obu yaamureeta omu mazima. (Yohaana 6:44) Rukundo yaakuhiga kweta omuntu obaire atarikuteekateeka ngu nooza kumweta, egi neebaasa kuba entandikiro y’okugira omukago murungi nawe. Noobaasa kuhamya ota ngu rukundo niyo erikukuhiga? Omuringo gumwe n’okugyendera aha buhabuzi oburi omu Abafilipi 2:3, aharikugira ngu “omu bucureezi” twara abandi ngu nibakukira. Tushemereire kuteekateeka aha miringo ei ab’eishe-emwe na banyaanyazi-itwe barikutukira. Nitubaasa kwegyera aha kwikiriza kwabo, okugumisiriza kwabo, nari aha mitwarize yaabo ey’Ekikristaayo. Twateekateeka aha mitwarize yaabo mirungi, nitubaasa kwongyera ahari rukundo ei tubainiire reero kitworobere kubakunira.

20. Nitubaasa kuba tuta abeesigwa omuntu yaatweta, kandi ahabw’enki?

²⁰ Omuhandiiki wa Zaaburi Daudi akabuuza ngu, ai Yehova, n’oha oriba omugyenyi omu ihema ryawe? (Zaaburi 15:1) Bwanyima y’ekyo Daudi akagamba aha mitwarize ei Yehova arikwenda ngu abagyenyi be bagire. Gumwe ahariyo n’okwesigwa. Nitushoma tuti: “Ku arahira, n’obu afeerwa tahinduka.” (Zaaburi 15:4) Omuntu yaakweta okaikiriza, toshemereire kushazamu okwetwa okwo, okwihaho buzima kyaba nikyetengyesa. Ogwo okwetsire naabaasa kuba ayetebeekanisiize okutaayaaya kwawe, n’ahabw’ekyo ku orikukushazamu, amaani ge goona nigaba gaafa busha. (Matayo 5:37) Abamwe nibashazamu okwetwa okumwe kugira ngu baikirize okundi oku barikuteekateeka ngu ni kurungi. Mbwenu shi ekyo n’ekikorwa kya rukundo kandi ekirikuhaisa ekitiinisa? Omuntu yaakutaayaayisa oshemereire kusiima kyona eki araakuhe. (Luka 10:7) Waaba oine kushazamu okwetwa, nikiba kiri ekikorwa kya rukundo kandi eky’obwengye kumumanyisa ahonaaho.

21. Okuha ekitiinisa emigyenzo y’ekicweka nikibaasa kutuhwera kita kuba abagyenyi barungi?

²¹ Kandi ni kikuru kuha ekitiinisa emigyenzo y’ekicweka. Omu bicweka ebimwe, nibaakiira abagyenyi n’obu baakuba batabeetsire. Ahandi, nikiba kiri kirungi kukora entebeekanisa otakagiire kutaayaayira omuntu. Omu bicweka ebindi, ogwo owaataayaayisa naaha abagyenyi be eby’okurya ebirungi ebi aine, reero ab’eka ye barya bwanyima. Abandi nibatwara buri omwe omu muringo gurikwingana. Omu myanya emwe, abagyenyi nibagira eki baija nakyo kwongyesereza aha by’okurya. Omu myanya endiijo, tibarikwenda ngu omugyenyi agire eki yaija nakyo. Omu nganda ezimwe, omu muringo gw’embabazi abagyenyi nibanga waabeeta omurundi gw’okubanza nari ogwa kabiri. Kwonka abandi, egyo neeba eri emicwe mibi waayanga okwetwa kw’okubanza. Butoosha tushemereire kuhamya ngu omuntu owaatweta yaatunga okushemererwa.

22. Ahabw’enki ni kikuru munonga kworekana obufura?

²² Petero akagira ati: “Emperu ya byona eri haihi.” (1 Petero 4:7) Obunaku obu, turi haihi munonga n’okubonabona kwingi okutakabahoga. Embeera omu nsi ku ziraayeyongyere kuba mbi munonga, nitwija kwetenga kugirira rukundo ab’eishe-emwe na banyaanyazi-itwe. Obuhabuzi bwa Petero okukira munonga nibukora ebiro ebi. Nibugira buti: “Mukunirane.” (1 Petero 4:9) Eego, obufura nibushemeza kandi nibwetengyesa hati n’ebiro byona.