1. Nitubaasa kutunga tuta obwengye, kandi nibutuhwera buta?

OBWENGYE niburuga ahari Yehova, kandi naabuha boona. Omuri Yakobo 1:5 nihagira hati: “Kwonka omuriimwe ku haraabe harimu obuzirwe obwengye, abushabe Ruhanga, oha boona n’omutima ogutarikwima, n’obu kwakuba okweshaanya.” Omuringo gumwe ogu turikutungamu obwengye n’okwikiriza Ruhanga kutuhana. Eki nikituhwera kutakora ebitahikire n’okuguma haihi na Yehova. (Enfumu 2:10-12) Kandi nitugira n’amatsiko g’amagara agatahwaho.​—Yuda 21.

2. Niki ekirikubaasa kutuhwera kukunda okuhana kwa Ruhanga?

² Ahabw’obutahikiirira bwaitu nari oku twakuziibwe, obumwe nikibaasa kutugumira kwikiriza kuhanwa nari kukureeba nk’ekintu kirungi. Kwonka twikiriza Ruhanga kutuhana tukaroza aha birungi ebirikurugamu, nitumanya ku arikutukunda munonga. Enfumu 3:11, 12 nihagira hati: “Mwana wangye, otarigaya” okuhana kwa Yehova. Nihagumizamu hati: “Ahakuba ou Mukama akunda, amuhana.” Nitubaasa kuhamya ngu Yehova naatwendeza ebirikukirayo oburungi. (Shoma Abaheburaayo 12:5-11.) Ahabw’okugira ngu Ruhanga naatumanya gye, okuhana kwe obutoosha kuhikire kandi nikwo turikuba nitwetenga. Omu kicweka eki, nituza kureeba ebintu  bina ebirikutwarirwa omu kuhana: (1) okwehana, (2) abazaire okuhana abaana baabo, (3) okuhana oku turikutunga omu kibiina, (4) n’ekirikukirayo kureeta obusaasi kukira okuhanwa.

3. Omwana naagira ata omutwarize gw’okwehana? Ha eky’okureeberaho.

³ Twaba twine omutwarize gw’okwehana, nitwerinda oku turikutwaza n’oku turikuteekateeka. Twine kwega kwehana ahakuba titurikuzaarwa nakwo. Nk’eky’okureeberaho, omwana yaaba naayega kuvuga egaari, omuzaire naaguma naamukwatirira kugira ngu atagwa. Kwonka bwanyima, yaatandika kuguma aha gaari atarikugwa, omuzaire naatandika kumurekura mporampora. Omuzaire yaaheza kuhamya ngu omwana taragwe, naarekura egaari. Omu muringo nigwo gumwe, abazaire ku barikutendeka abaana baabo ‘bakabeegyeseza omuri’ Yehova, nibaba nibabahwera kugira obwengye n’omutwarize gw’okwehana.​—Abaefeso 6:4.

4, 5. (a) Ahabw’enki okwehana kuri kukuru omu kutaho ‘omuntu musya’? (b) Ahabw’enki tutashemereire kuhwa amaani n’obu twakukora enshobe?

⁴ Nikyo kimwe n’abo abarikwega amazima bari bakuru. N’obu baraabe nibabaasa kuteeraho kwehana, nibaba batakabaire Abakristaayo abakuzire omu by’omwoyo. Kwonka ku barikutandika “kujwara omuntu omusya” bakateeraho kutooreza Kristo, nibeeyongyera kukura omu by’omwoyo. (Abaefeso 4:23, 24) Omutwarize gw’okwehana nigutuhwera “okwanga okutatiina Ruhanga n’okwetenga eby’ensi, ngu tubone kugumaho omu busingye obu obwa hati, nitwerinda turi abahikiriire, abarikutiina Ruhanga.”​—Tito 2:12.

⁵ Kwonka nabwo, twena turi abatahikiriire. (Omubuurizi 7:20) Mbwenu shi twakora enshobe, nikimanyisa ngu titurikwehana ekirikumara nari ngu titurikwehana na kakye? Nikibaasa kutamanyisa ekyo. Nitushoma omu Enfumu 24:16: “Ohikiriire agwa emirundi mushanju naimuka.” Niki ekiratuhwere ‘kwimuka’? N’omwoyo gurikwera beitu gatari maani gaitu. (Shoma Abafilipi 4:13.) Gumwe aha mitwarize y’omwoyo, n’okwerinda okurikushushanira kimwe n’okwehana.

6. Noobaasa kuba ota omwegi murungi w’Ekigambo kya Ruhanga? (Reeba ekishushani aha kutandika.)

⁶ Okushaba, okweyegyesa Baibuli, n’okuteekateeka aha bi turikushoma nikubaasa kutuhwera kugira omutwarize gw’okwehana. Kandi shi ku waakuba noogumirwa kweyegyesa Baibuli nari otarikukunda kweyegyesa? Otakahwamu amaani. Waikiriza Yehova kukuhwera noija kugira ‘ekyetengo’ ky’okwega Ekigambo kye. (1 Petero 2:2) Shaba Yehova akuhwere kwehana kugira ngu otungye obwire bw’okwega Baibuli. Obundi noobaasa kutandika orikwega kumara edakiika nkye. Mporampora, nikiija kukworobera kukunda kweyegyesa. Noija kutandika kugasirwa omu bwire obu orikumara orikweyegyesa kandi orikuteekateeka aha biri omu Kigambo kya Yehova.​—1 Timoseo 4:15.

7. Okwehana nikubaasa kutuhwera kuta kuhika aha bigyendererwa byaitu eby’omwoyo?

⁷ Okwehana nikutuhwera kuhika aha bigyendererwa byaitu eby’omwoyo. Nk’eky’okureeberaho, ow’eishe-emwe omwe akareeba ngu omujinya gwe gutuubire, n’ahabw’ekyo akataho ekigyendererwa ky’okuba payoniya ow’obutwire. Okwehana kukamuhwera kuta? Akashoma omu magaziini  zaitu ebirikukwata aha kuba payoniya, kandi yaashaba Yehova kumuhwera. Eki kikahamya omukago gwe na Yehova. Kandi obumwe n’obumwe akaguma akaba aheereza nka payoniya omuhwezi. Taraikiriize kintu kyona kumuremesa kuhika aha kigyendererwa kye. Bwanyima y’akaire, akaba payoniya ow’obutwire.

8-10. Niki ekiraahwere abazaire kworora abaana baabo kuheereza Yehova? Ha eky’okureeberaho.

⁸ Yehova ahaire abazaire obujunaanizibwa bw’okworora abaana baabo ‘nibabeegyeseza omuri’ Yehova. (Abaefeso 6:4) Eki tikyorobi kukora obunaku obu. (2 Timoseo 3:1-5) Abaana baazaarwa, nibaba batarikumanya ekihikire n’ekitahikire, kandi omuntu waabo w’omunda naaba atatendekirwe. N’ahabw’ekyo baine kuhanwa kubaasa kumutendeka. (Abarooma 2:14, 15) Omucondooza omwe wa Baibuli akagira ngu ekigambo ky’Orugriika ekirikuvunuurwa “nk’okuhana” nikibaasa kumanyisa “okukura kw’omwana,” nari okworora omwana kuba omuntu w’obujunaanizibwa.

⁹ Abazaire baahana abaana omu muringo gwa rukundo, abaana nibahurira baine oburinzi. Nibamanya ngu obugabe bwine  obugarukiro kandi buri kimwe eki barikukora haine ebiraarugyemu. N’ahabw’ekyo n’eky’obwengye abazaire kwesiga obwengye bwa Yehova kubahwera kworora abaana baabo. Obuhabuzi bw’okworora abaana ni butaana kurugiirira ahu omuntu arikutuura, kandi nibuguma nibuhinduka. Kwonka, abazaire abarikworobera Ruhanga tibashemereire kutebeereza eki baine kukora nari kwegamira aha kumanya kwabo nari emiteekateekyere y’abantu.

¹⁰ Nitubaasa kwegyera ahari Noa. Obu Yehova yaamugambira kwombeka emeeri, akaba atarikumanya oku araagyombeke. Akaba aine kwesiga Yehova, kandi nitushoma ngu “yaaba nikwo yaatwaza,” nari akakora nk’oku Yehova yaamuragiire. (Okutandika 6:22) Niki ekyarugiremu? Emeeri ekacungura amagara ga Noa n’eka ye! Noa akaba ari omuzaire omusinguzi. Ahabw’enki? Ahabw’okwesiga obwengye bwa Ruhanga. Noa akeegyesa gye abaana be kandi akabateeraho eky’okureeberaho kirungi, ekyabaire kitoorobi omu bwire bubi obwo hatakabaireho omwegyemure.​—Okutandika 6:5.

11. Ahabw’enki abazaire baine kukora n’amaani kutendeka abaana baabo?

¹¹ Ku oraabe ori omuzaire, naiwe noija kuba ‘nikwo waatwaza’ otyo mu muringo ki? Yorobera Yehova. Ikiriza akuhwere omu kworora abaana baawe. Koresa obuhabuzi kuruga omu Ekigambo kye n’ekibiina kye. Omu biro by’omumaisho, abaana baawe nibaija kukusiima ahabw’okukora ekyo! Ow’eishe-emwe omwe akahandiika ati: “Ninsiima munonga omuringo ogu abazaire bangye baankurizemu. Bakakora kyona eki barikubaasa kumpika aha mutima.” Naagira ngu abazaire be nibo baamuhwereire kwirira haihi na Yehova. Nangwa n’obu abazaire barikuteeraho kwegyesa omwana waabo, omwana naabaasa kuruga ahari Yehova. Kwonka omuzaire okozire kyona ekirikubaasika naabaasa kugira omutima ogutarikumushinja, kandi naagira n’amatsiko ngu eizooba rimwe omwana we naija kugarukira Yehova.

12, 13. (a) Omwana yaaba abingirwe, abazaire nibooreka bata ngu niboorobera Ruhanga? (b) Eka emwe akagasirwa eta ahabw’abazaire kworobera Yehova?

¹² Abazaire abamwe ekirikubareetera kugumirwa omu kworobera Ruhanga, n’omwana waabo yaabingwa omu kibiina. Munyaanyazi-itwe omwe ou omuhara yaabingirwe kandi akaruga omu ka, naagira ati: “Nkaguma ninsherura eby’okwekwatsa omu bitabo by’ekibiina kugira ngu ngume ningaaniira na muhara wangye na mwijukuru wangye.” Kwonka iba akamuhwera kwetegyereza ngu bakaba batakiine bujunaanizibwa ahari muhara waabo, kandi bakaba baine kuhamira ahari Yehova.

¹³ Bwanyima y’emyaka, muhara waabo akagaruka omu kibiina. Nyina naagira ati: “Hati naanteerera esimu nari naampandiikira obutumwa haihi buri izooba! Kandi nyowe na ibanyi naatuha ekitiinisa ahakuba naamanya ngu tukoorobera Ruhanga. Buzima twine omukago murungi.” Mbwenu shi mutabani waawe nari muhara waawe ku araabe abingirwe omu kibiina, noija ‘kwesiga’ Yehova n’omutima gwawe gwona? Noija kumworeka ngu ‘torikwegamira okwetegyereza kwawe ahabwawe’? (Enfumu 3:5, 6) Ijuka, Yehova okutuhana nikitworeka ngu aine obwengye bwingi kandi ngu naatukunda munonga. Otakayebwa ngu  akahayo Omwana we ahabw’abantu boona, otwariiremu na mutabani waawe nari muhara waawe. Ruhanga naayenda ngu buri omwe atungye amagara agatahwaho. (Shoma 2 Petero 3:9.) N’ahabw’ekyo abazaire, mugumizemu nimumanya ngu okuhana kwa Yehova n’obuhabuzi bwe bihikire, n’obu obumwe okwikiriza okuhana kiraabe nikireeta obusaasi. Yorobera Yehova yaakuhana, kandi otahakanisa.

14. Nitugasirwa tuta omu buhabuzi bwa Yehova obu “omubiiki orikwesigwa” arikutuha?

¹⁴ Yehova akaraganisa kureeberera, kurinda, n’okwegyesa ekibiina Ekikristaayo. Ekyo naakikora omu miringo mingi. Nk’eky’okureeberaho, akatoorana Omwana we kureeberera ekibiina, kandi Yesu akataho “omubiiki orikwesigwa” kutuha eby’okurya by’omwoyo kutubaasisa kuguma turi abeesigwa. (Luka 12:42) “Omubiiki” ogwo naatuha obuhabuzi bw’omuhendo nari naatuhana. Obundi noobaasa kwijuka orubazo oru waahuriire nari ekicweka eki waashomire omuri emwe ahari magaziini zaitu, ekyakuhwereire kuhindura emiteekateekyere yaawe nari oku orikutwaza. Nooshemererwa ahabw’okukora empindahinduka ezo, ahakuba nikyoreka ngu noikiriza Yehova kukuhana.​—Enfumu 2:1-5.

15, 16. (a) Nitubaasa kugasirwa tuta omu murimo gw’abareeberezi? (b) Nitubaasa kureetera tuta abareeberezi kukunda omurimo gwabo?

¹⁵ Kristo atuhaire n’abareeberezi okureeberera ekibiina. Baibuli neebagambaho ‘nk’ebiconco’ omu bantu. (Abaefeso 4:8, 11-13) Nitubaasa kugasirwa tuta omu murimo gw’abareeberezi? Nitubaasa kutooreza okwikiriza kwabo n’eky’okureeberaho kyabo kirungi, n’okukuratira obuhabuzi obu barikutuha kuruga omu Baibuli. (Shoma Abaheburaayo 13:7, 17.) Abareeberezi nibatukunda kandi nibenda kutuhwera kwirira haihi na Ruhanga. Baareeba ngu tutandikire kwosha enteerane nari ngu omujinya gwaitu gutuubire, ahonaaho nibateeraho kutuhwera. Nibatuhurikiza kandi batugumya barikutuha obuhabuzi burungi kuruga omu Baibuli. Nooreeba obuhwezi bwabo nk’obuhame ngu Yehova naakukunda?

¹⁶ Ijuka ngu nikibaasa kuba kitoorobi abareeberezi kutuha obuhabuzi. Nooteekateeka ngu nabi Nasani akeehurira ata obu yaabaire aine kugamba n’Omugabe Daudi bwanyima y’omugabe kuteeraho kushereka ekibi kye ky’amaani? (2 Samueli 12:1-14) Noogira gu entumwa Paulo akeehurira ata obu yaabaire aine kuhana entumwa Petero omwe aha entumwa 12 ahabw’okutwariza gye Abakristaayo Abayudaaya okukira abatari Bayudaaya? Paulo akaba aine kuba emanzi kubaasa kukora ekyo. (Abagalatia 2:11-14) Noobaasa kukora ki kugira ngu kyorobere abareeberezi kukuha obuhabuzi? Ba omucureezi, orikusiima, kandi oyorobi kugamba nawe. Reeba obuhwezi bwabo nk’obuhame ngu Ruhanga naakukunda. Obwo noija kugasirwa, n’abareeberezi nibaija kukunda omurimo gwabo.

17. Abareeberezi bakahwera bata munyaanyazi-itwe omwe?

¹⁷ Munyaanyazi-itwe omwe naagira ngu ebyamuhikireho ira bikamureetera okugumirwa kukunda Yehova, kandi akagira amaganya maingi. Naagira ati: “Nkaba nimmanya ngu nyine kugamba n’abareeberezi. Tibarangambiire kubi nari kuncwera orubanja, beitu bakangumya. Bwanyima ya buri  ruteerane, n’obu baabaire baba baine bingi by’okukora, omwe aharibo akaba ambuuza oku ndi. Ahabw’ebi naarabiremu, kikaba nikingumira kwikiriza ngu Ruhanga naabaasa kunkunda. Emirundi mingi Yehova akoreise ekibiina kye n’abareeberezi kumpamiza ngu naankunda. Ninshaba kuguma mmuhamiireho.”

18, 19. Niki ekirikureeta obusaasi bwingi kukira okuhanwa? Ha eky’okureeberaho.

¹⁸ Okuhanwa nikubaasa kureeta obusaasi, kwonka okwanga okuhana kwa Ruhanga nikureeta obusaasi bwingi munonga. (Abaheburaayo 12:11) Eki nitukireebera aha byahikire ahari Kaini n’Omugabe Zedekia. Ruhanga ku yaareebire ngu Kaini ainiire omurumuna rwango, kandi ngu naayenda n’okumwita, akamuhabura ati: ‘N’enki ekyakukwatsa ekiniga? Kwonka ku oraabe otakozire gye, ekibi nikiija kuguma kibandami aha rwigi, kikugwereire; kwonka iwe oshemereire kukitegyeka.’ (Okutandika 4:6, 7) Kaini akanga okuhana kwa Yehova, yaita omurumuna, kyamurugiramu oburemeezi bw’amaani ebiro byona eby’amagara ge. (Okutandika 4:11, 12) Kaini kuri yaayorobeire Ruhanga, akaba atarikuza kwereetera obusaasi bwingi.

¹⁹ Zedekia akaba ari omugabe mubi orikukora enshobe. Obu yaabaire naategyeka, abantu omuri Yerusaalemu bakaba bari omu mbeera mbi. Nabi Yeremia akarabura Zedekia emirundi mingi ngu ahindure emitwarize ye. Kwonka akanga okuhana kwa Yehova, kandi hakarugamu ebintu bibi. (Yeremia 52:8-11) Yehova tarikwenda ngu tutungye obusaasi butarikwetengyesa!​—Shoma Isaaya 48:17, 18.

20. Niki ekirikwija kuhika ahari abo abarikwikiriza Ruhanga kubahana n’abo abarikwanga?

²⁰ Obunaku obu, abantu baingi nibagaya okuhana kwa Yehova kandi bakwanga. Kwonka obwire butari bwa hare, buri omwe orikwanga okuhana kwa Yehova naija kutunga obusaasi bw’amaani. (Enfumu 1:24-31) N’ahabw’ekyo muhurire okuhana mugire obwengye. Nk’oku Enfumu 4:13 harikugira, “hamya ebi oyegyesiibwe, otaribireka; obirinde, ahabw’okuba nigo magara gawe.”