1. Baibuli obumwe neeshoboorora eta ekigambo okuhana?

NIKI ekirikwija omu biteekateeko byawe ku orikuhurira ekigambo ‘okuhana’? Abantu baingi nibamanya ngu nikimanyisa okufubira, kwonka okuhana nikutaana n’ekyo. Baibuli neegira ngu okuhana ni kurungi ahariitwe, kandi obumwe Baibuli neekukwatanisa n’okumanya, obwengye, rukundo, n’amagara. (Enfumu 1:2-7; 4:11-13) Eki kiri kityo ahabw’okugira ngu Ruhanga naatuhana ahabw’okutukunda, kandi naayenda ngu tugumeho ebiro byona. (Abaheburaayo 12:6) N’obu okuhana kwa Ruhanga obumwe kirikutwariramu okufubira, ti kw’omwaga nari akabi. Nangwa n’amakuru agahikire ag’ekigambo ‘okuhana’ nigatwariramu okwegyesa, nk’oku omuzaire arikwegyesa omwana ou arikukunda.

2, 3. Okuhana nikubaasa kutwariramu kuta okwegyesa n’okufubira? (Reeba ekishushani aha kutandika.)

² Teekateeka aha ky’okureeberaho eki. Omwojo muto orikwetwa Johnny akaba ariyo naatambika omupiira omu nju. Nyina yaamugira ati: “Johnny, nookimanya ngu toshemereire kuzaanira omupiira omu nju! Noobaasa kwata ebintu.” Kwonka  akeehuzya nyina yaagumizamu naazaanira omupiira omu nju. Omupiira gukateera engyemeko y’ebimuri yaayatika! Mbwenu shi nyina Johnny akakora ki kumuhana? Akamwegyesa arikumushoboororera ahabw’enki eki yaakora kigwire. Nyina akaba naayenda amanye ngu ni kirungi kworobera abazaire, kandi ngu ebiragiro byabo nibyetengyesa ti maremesa. Nyina Johnny kubaasa kumwegyesa eishomo, akacwamu ngu kikaba kihikire kumufubira arikumwihaho omupiira ogwo kumara obwire. Ekyo tikirashemeize Johnny, kwonka kikamuhwera kwijuka ngu haine ebirikurugamu yaayanga kworobera abazaire.

³ Itwe Abakristaayo, turi omu ka ya Yehova. (1 Timoseo 3:15) Tataitwe Yehova, aine obugabe bw’okutuhwera kutaanisa ekihikire n’ekigwire kandi akatuhana twamugomera. N’obu twakutunga oburemeezi ahabw’okucwamu kubi, okuhana kwa Yehova okwa rukundo nikubaasa kutwijutsya ngu ni kikuru kumworobera. (Abagalatia 6:7) Ruhanga naatukunda munonga kandi tarikwenda ngu tubonabone.​—1 Petero 5:6, 7.

4. (a) Yehova naayenda ngu tutendekye tuta abandi? (b) Nituza kwega ki omu kicweka eki?

⁴ Twahana turikukoresa Baibuli, nituhwera omwana nari omwegi wa Baibuli kuba omukuratsi wa Kristo. Twine kukoresa Baibuli kwegyesa abeegi baitu ekihikire n’okubahwera kwetegyereza, kandi ‘bakoorobera byona ebi Yesu yaaragiire.’ (Matayo 28:19, 20; 2 Timoseo 3:16) Ogu nigwo muringo ogu Yehova arikwenda ngu batendekwe reero nabo baije bahwere abandi kukuratira Kristo. (Shoma Tito 2:11-14.) Hati ka tugaaniire aha bibuuzo bishatu bikuru ebi: (1) Ruhanga naayoreka ata ngu naatukunda yaatuhana? (2) Nitubaasa kwegyera ki aha bantu abu Ruhanga yaahanire? (3) Nitubaasa kutooreza tuta Yehova na Yesu twaba nituhana abandi?

5. Yehova ku arikutuhana nikyoreka kita ngu naatukunda?

⁵ Yehova naatuhabura, naatwegyesa, kandi naatutendeka ahabw’okutukunda. Naayenda ngu tugume haihi nawe kandi tugumeho ebiro byona. (1 Yohaana 4:16) Tarikutugwisa kubi nari kutureetera kwehurira nk’abataine mugasho. (Enfumu 12:18) Omu mwanya gw’ekyo, naata omutima aha mitwarize mirungi kandi naatureka kwecweramu. Mbwenu shi nooreeba ngu okuhana okurikwegamira ahari Baibuli, ebitabo byaitu, n’okw’abazaire baitu, nari abareeberezi nikworeka ngu Yehova naatukunda? Nangwa, n’obu abareeberezi barikutuhabura omu obucureezi itwe tutakamanyire enshobe yaitu, nibaba nibooreka rukundo nk’ei Yehova atwiniire.​—Abagalatia 6:1.

6. Ruhanga okutuhana nikyoreka kita ngu naatukunda n’obu omuntu yaakufeerwa obujunaanizibwa obumwe?

 ⁶ Obumwe okuhana nikutwariramu ekirikukira aha buhabuzi. Omuntu yaakora ekibi ky’amaani, naaba atakibaasa kuhikiiriza obujunaanizibwa obumwe omu kibiina. N’obu eki kirikubaho, okuhana oku nikuba nikworeka ngu Ruhanga naamukunda. Nk’eky’okureeberaho, nikubaasa kumuhwera kureeba ngu ni kikuru kumara obwire arikweyegyesa Baibuli, arikuteekateeka aha bi arikushoma, kandi arikushaba. Okukora ebi nikibaasa kumuhwera kuhamya omukago gwe na Yehova. (Zaaburi 19:7) Haahinguraho obwire, naabaasa kugarurirwa obujunaanizibwa bwe nari obuheereza obu yaabaire afeereirwe. Nangwa n’obu omuntu yaakubingwa, ekyo nakyo nikyoreka rukundo ya Yehova ahakuba nikirinda ekibiina kutazamu emicwe mibi y’omuntu ogwo. (1 Abakorinso 5:6, 7, 11) Kandi ahabw’okugira ngu omuringo ogu Ruhanga arikuhanamu tiguri gw’amaremesa, nikihwera omuntu kumanya obuhango bw’ekibi eki akozire. Eki nikibaasa kumureetera kweteisa.​—Ebyakozirwe 3:19.

7. Shebuna akaba ari oha, kandi akagira mutwarize ki omubi?

⁷ Kubaasa kwetegyereza oku okuhana kuri kukuru, nituza kugamba aha bantu babiri abu Yehova yaahanire. Ow’okubanza ni Shebuna, owaabaire ariho omu butware bw’Omugabe Hezekia, na Graham, ow’eishe-emwe ow’obunaku obu. Shebuna akaba naareeberera enju, obundi ey’Omugabe Hezekia, kandi akaba aine obushoboorozi bwingi. (Isaaya 22:15) Kwonka Shebuna akagira okwetunguura kandi akaba naayenda kureetera abandi kuteekateeka ngu n’ow’amaani. Nangwa akeetimbira n’ekituuro ky’esente nyingi kandi yaayevuga n’omu ‘bigaari by’ekitiinisa.’​—Isaaya 22:16-18.

8. Yehova akahana ata Shebuna, kandi hakarugamu ki?

⁸ Ahabw’okugira ngu Shebuna akateeraho kwetungira ekitiinisa, Ruhanga akamwihaho  obujunaanizibwa bwe yaabuha Eliakimu. (Isaaya 22:19-21) Eki kikabaho obu Omugabe Senakeribu owa Asiria yaacuma enaama y’okutaahirira Yerusaalemu. Bwanyima Senakeribu akoohereza abakuru n’eihe ry’amaani kuza kutiinatiinisa Abayudaaya n’okureetera Omugabe Hezekia kuhanika. (2 Abagabe 18:17-25) Hezekia akoohereza Eliakimu n’abandi bashaija babiri kuza kubugana abakuru abo. Omwe aha bashaija aba akaba ari Shebuna, hati owaabaire naakora nk’omuhandiiki. Eki nikitwegyesa ngu obundi hati Shebuna akaba abaire omucureezi, kandi taragizire kiniga nari enziika. Akaba ayeteekateekire kwikiriza omurimo ogw’ahansi. Nitubaasa kwegyera ahari Shebuna ebintu bishatu.

9-11. (a) Nitubaasa kwegyera ki ahari Shebuna? (b) Nootwara ota omuringo ogu Yehova yaatwariizemu Shebuna?

⁹ Eky’okubanza, ahabw’okugira ngu Shebuna akafeerwa obujunaanizibwa bwe, nikitwijutsya ngu “amaryo gakuratwa okucwekyerera.” (Enfumu 16:18) Nitubaasa kuba twine obuheereza bw’omutaano omu kibiina, kandi abandi nibabaasa kuteekateeka ngu turi ab’amaani. Mbwenu shi nitwija kuguma turi abacureezi? Twine kwijuka ngu okubaasa kwona oku twine n’ebintu birungi byona ebi turikukora, Yehova niwe arikutubaasisa. (1 Abakorinso 4:7) Entumwa Paulo akaturabura ati: “Ningambira buri muntu weena omuriimwe, ngu arekye kweteekateekaho okukira oku ari, kureka ateekateekye okutarenzya oku ari.”​—Abarooma 12:3.

¹⁰ Ekya kabiri, Yehova okuhana Shebuna omu muringo gw’amaani nikyoreka ngu akaba naamanya ngu obundi Shebuna naabaasa kuhinduka. (Enfumu 3:11, 12) Eki n’eky’okwega ahari abo abaafeereirwe obuheereza bw’omutaano. Omu mwanya gw’okugira ekiniga n’enziika, nibabaasa kugumizamu nibaha Yehova ekirikukirayo oburungi. Nibabaasa kucwamu kureeba okuhanwa nk’obuhame ngu Yehova naabakunda. Ijuka ngu Tataitwe naija kurugaho naashumbuusha abarikuguma bari abacureezi. (Shoma 1 Petero 5:6, 7.) Yehova yaatuhana, naabaasa kutubumba twaba turi abacureezi kandi turi nk’eibumba eryorobi.

¹¹ Ekya kashatu, oku Yehova yaatwariize Shebuna nikitwegyesa enshonga nkuru. N’obu omuringo ogu Yehova arikuhanamu guraabe nigworeka ngu naayanga ekibi, beitu nigworeka ngu naakunda omuntu orikuba asiisire. Yehova naasherura ebirungi omu bantu. Ku oraabe ori omuzaire, nari omureeberezi, noobaasa kutooreza Yehova oku arikuhana.​—Yuda 22, 23.

12-14. (a) Abamwe nibatwaza bata Yehova yaabahana? (b) Baibuli ekahwera eta ow’eishe-emwe omwe kuhindura aha miteekateekyere ye, kandi hakarugamu ki?

¹² Eky’obusaasi, abantu abamwe nibagira ekiniga kingi ku barikuhanwa kibareetera kuruga ahari Ruhanga n’ekibiina. (Abaheburaayo 3:12, 13) Mbwenu shi eki nikimanyisa ngu tihariho orikubaasa kubahwera? Ngaaha! Ka tureebe ekyahikire ahari Graham, owaabingirwe kandi bwanyima akagarurwa omu kibiina, kwonka akarekyera aho kubuurira n’okuza omu nteerane. Omureeberezi akateeraho kunywana Graham, kandi Graham akarugaho yaashaba omureeberezi ogwo kumwegyesa Baibuli.

¹³ Omureeberezi naagira ati: “Graham akaba aine amaryo. Akaba naacwera orubanja abareeberezi abaacwiremu ngu abingwe. N’ahabw’ekyo bwanyima y’okwega emirundi mikye, tukagaaniira aha byahandiikirwe ebirikukwata  aha kugira amaryo n’ebirikurugamu. Graham akatandika kureeba enshobe ze arikuhwerwa Ekigambo kya Ruhanga, kandi tarakunzire eki yaareebire! Ebyarugiremu bikaba biri birungi munonga! Bwanyima y’okumanya ngu akaba aine omuze gw’okucwera abandi orubanja kandi ngu n’amaryo gakaba ‘nk’empimbi’ omu riisho rye gamuhumya, akatandika kuhinduka ahonaaho kuba murungi. Akatandika kwija omu nteerane z’Ekikristaayo atarikwosha, yaatamu amaani kwega Ekigambo kya Ruhanga, yaagira n’omucwe gw’okushaba buri izooba. Kandi akaikiriza n’obujunaanizibwa bwe nk’omutwe gw’eka, ekyashemeize omukazi we n’abaana be.”​—Luka 6:41, 42; Yakobo 1:23-25.

¹⁴ Omureeberezi naayongyeraho ati: “Eizooba rimwe, Graham akangambira ekintu ekyankwatsireho munonga. Akangira ati: ‘Nkatunga amazima emyaka mingi enyima, kandi nkaba nimpeereza nka payoniya. Kwonka hati nibwo ndikubaasa kugamba omu mazima ngu ninkunda Yehova.’” Bwanyima y’obwire bukye, Graham akaheebwa obujunaanizibwa bw’okugyendesa omuzindaaro omu nteerane, kandi akashemererwa kuheebwa obujunaanizibwa obwo. Omureeberezi akagira ati: “Eky’okureeberaho kye kikanyegyesa ngu omuntu yaaba omucureezi omu maisho ga Ruhanga arikwikiriza kuhanwa, emigisha neemweshukaho!”

15. Twine kukora ki kugira ngu tuhane abandi omu muringo murungi?

¹⁵ Twaba nitwenda kuba abeegyesa barungi, twine kubanza kuba abeegi barungi. (1 Timoseo 4:15, 16) Nikyo kimwe, ku oraabe ori omwe aha bu Yehova arikukoresa kuhana abandi, oine kuguma ori omucureezi kandi oikirize Yehova kukwebembera. Abandi baareeba ngu ori omucureezi, nibaija kukuha ekitiinisa kandi nikiija kuboorobera kwikiriza waabaha obuhabuzi nari waabahana. Nitubaasa kwegyera ahari Yesu.

16. Nitwegyera ki ahari Yesu aha bikwatiraine n’okwegyesa n’okuhana kurungi?

¹⁶ Yesu butoosha akaba ayorobera Ishe, n’obu okukora ekyo obumwe kyabaire kiba kigumire. (Matayo 26:39) Akaijutsya abaabaire bamuhurikiize ngu ebi yaabaire naayegyesa n’obwengye bwe bikaba nibiruga ahari Ishe. (Yohaana 5:19, 30) Yesu akaba naayorobera ishe, ari omucureezi, kandi eki kikamuhwera kuba omwegyesa omunyambabazi. Abantu barungi bakaba nibakunda kuba ahu ari. (Shoma Luka 4:22.) Ebigambo bya Yesu eby’embabazi bikagaruramu abantu amaani. (Matayo 12:20) Akahabura entumwa ze omu muringo gw’embabazi n’obu araabe yaabaire naabaasa kubagirira ekiniga ahabw’okuhakana barikwenda kumanya omukuru omuribo.​—Mako 9:33-37; Luka 22:24-27.

17. Ni mitwarize ki erikuhwera abareeberezi kureeberera gye ekibiina?

¹⁷ Abareeberezi buri kuza kuhana omuntu barikwegamira aha misingye ya Baibuli,  baine kutooreza Kristo. Omu muringo ogu nibooreka ngu nibenda kwebemberwa Ruhanga n’Omwana we. Entumwa Petero akahandiika ati: “Muriise gye obusyo bwa Ruhanga, obu mwakwatsiibwe, mutaburiisa nk’abagyemirwe, kureka muburiise mweyendeire nk’oku Ruhanga arikukunda; ti habw’omururu mubi gw’okutunga ebintu, kureka mwine omutima ogurikukunda, murekye kutegyekyesa eikama obusyo obu mwakwatsiibwe, kureka mube eky’okureeberaho aharibwo.” (1 Petero 5:2-4) Abareeberezi abarikweta ahansi y’obushoboorozi bwa Ruhanga na Kristo nibagasirwa hamwe n’abu barikureeberera.​—Isaaya 32:1, 2, 17, 18.

18. (a) Yehova naayenda ngu abazaire bakore ki? (b) Ruhanga naahwera ata abazaire?

¹⁸ Kandi shi okuhana n’okutendeka ab’omu ka? Yehova naagambira emitwe y’amaka ati: “Murekye kugwisa kubi abaana baanyu, kureka mubarere, nimubategyeka gye, kandi nimubeegyeseza omuri” Yehova. (Abaefeso 6:4) Kwonka shi okuhana n’okutendeka buzima nibyetengyesa? Enfumu 19:18 nihagira hati: “Hana omwana waawe, okimwineho amatsiko; kwonka otamuteera ez’okumwita.” Yehova naaha abazaire obujunaanizibwa bw’okuhana abaana baabo. Baaba batakikozire, Yehova naija kubajunaana! (1 Samueli 3:12-14) Kwonka naabaha obwengye n’amaani baamushaba kandi bakeesiga Ekigambo kye n’omwoyo gwe gurikwera kubeebembera.​—Shoma Yakobo 1:5.

19, 20. (a) Nitutunga migisha ki twaikiriza Ruhanga kutuhana? (b) Nituza kugaaniira ahari ki omu kicweka ekirikukurataho?

¹⁹ Twaikiriza Yehova kutuhana kandi tukatooreza omuringo ogu Yehova na Yesu barikuhanamu, nitwija kutunga emigisha mingi munonga! Amaka gaitu n’ebibiina nibiija kubamu obusingye, buri omwe naija kuhurira naakundwa, kandi aine oburinzi. Egi n’endozo y’obusingye n’okushemererwa ebi turikwija kugira omu biro by’omumaisho. (Zaaburi 72:7) Yehova naatuhana arikututebeekanisa kwija kutuura hamwe nk’eka twine obusingye n’obumwe, obwo Yehova ari Tataitwe. (Shoma Isaaya 11:9.) Twaijuka eki, nitwija kwetegyereza ngu okuhana n’omuringo murungi ogu Ruhanga arikworeka ngu naatukunda.

²⁰ Omu kicweka ekirikukurataho, nituza kwega ebirikukiraho ebirikukwata aha kuhana omu ka n’omu kibiina. Nituza kureeba oku turikubaasa kwehana. Kandi nituza n’okureeba oku turikubaasa kwetantara ekintu ekirikushasha munonga okukira okuhanwa.