1. Omuntu aine kukora ki atakatandikire kwombeka enju?

KA TUGIRE ngu omuntu yaacwamu kwombeka enju. Naamanya ekika ky’enju ei arikwenda kwombeka. Mbwenu shi ahonaaho aine kugyenda akagura ebirikwetengyesa akatandika kwombeka? Ngaaha. Atakatandikire kwombeka, hariho ekintu kikuru eki aine kubanza yaakora. Aine kubanza yaabariirira akamanya esente ezirikwetengyesa kwombeka enju egyo ekahwa. Ahabw’enki? Ahakuba naaba aine kumanya yaaba aine esente zirikumara kubaasa kuheza enju egyo. Yaabanza akabariirira atakatandikire kwombeka, nikibaasa kumuhwera kuheza okwombeka enju ye.

2. Kurugiirira ahari Luka 14:28-30, niki eki oine kuteekateekaho n’obwegyendesereza?

² Okukunda Yehova n’okumusiima nibyo bikuhigire kuteekateeka aha kubatizibwa? Ku kiraabe nikwo kiri, ori omu mbeera nk’ey’omuntu orikwenda kwombeka enju. Ahabw’enki nitugira tutyo? Teekateeka aha bigambo bya Yesu ebiri omuri Luka 14:28-30. (Kishome.) Yesu akaba naagamba aha kirikutwarirwamu okuba omwegi we. Kubaasa kuba omukuratsi we, oine kuba oyeteekateekire kwikiriza ebirikutwarirwamu, nk’embeera zigumire n’okwefeerereza. (Luk. 9:23-26; 12:51-53) N’ahabw’ekyo otakabatiziibwe, omu bwegyendesereza oine kuteekateeka ahari byona ebirikutwarirwamu. Reero obwo noija kuba oyetebeekaniise gye kuba Omukristaayo obatiziibwe, kandi orikuheereza Ruhanga omu bwesigwa.

3. Nituza kushwijuma ki omu kicweka eki?

³ Ebirikuruga omu kuba omukuratsi wa Kristo nibikirira kimwe ebi orikwefeerereza? Eego buzima! Okubatizibwa nikukubaasisa kutunga emigisha mingi munonga hati, n’omu biro by’omumaisho. Ka tushwijume ebibuuzo bimwe ebikuru ebirikukwata aha kubatizibwa. Okukora ekyo nikwija kukuhwera kumanya eky’okugarukamu ky’ekibuuzo eki: “Nyeteekateekire kubatizibwa?”

4. (a) Okwehayo nikimanyisa ki? (b) Nikimanyisa ki ‘okubaho ahabwa’ Yehova, nk’oku kirikworekwa omu Abarooma 14:8?

⁴ Okwehayo nikimanyisa ki? Otakabatiziibwe oine kubanza waayehayo. Okwehayo nikimanyisa okweshengyereza Yehova kurabira omu kushaba orikumugambira ngu noija kumuheereza n’amagara gaawe goona, ebiro byona. Ku orikwehayo ahari Ruhanga, nooyeihaho obugabe bwawe. Hati nooba ori owa Yehova, kandi ogu n’omugisha gw’amaani. (Shoma Abarooma 14:8.) Omu kushaba noogambira Yehova ngu okuruga hati, noija kwebembeza okumuheereza omu mwanya gw’okwebembeza ebirikukushemeza. Okwehayo kwawe n’endahiro nari endagaano ei orikukora na Ruhanga. Yehova tarikutugyema kukora endahiro nk’egyo. Kwonka twaheza kurahira tutyo, naaba naayenda ngu tuhikiirize okuraganisa kwaitu.​—Zab. 116:12, 14.

5. Okwehayo kwine kakwate ki n’okubatizibwa?

⁵ Okwehayo kwine kakwate ki n’okubatizibwa? Nooyehayo ahabwawe kandi ori wenka, okwehayo kwawe nikuba nikumanywa iwe na Yehova mwenka. Okubatizibwa nikubaho omu rweteeraine, omu maisho g’abantu abandi, okukira munonga aha nteerane empango ez’ekiro kimwe nari bishatu. Ku orikubatizibwa, nooyoreka abandi ngu waaherize kwehayo ahari Yehova. * N’ahabw’ekyo ku orikubatizibwa nooyoreka abandi ngu nookunda Yehova Ruhanga waawe n’omutima gwawe gwona, n’amagara gaawe goona, n’obwengye bwawe bwona, n’amaani gaawe goona, kandi ngu omaririire kumuheereza ebiro byona.​—Mak. 12:30.

6-7. Kurugiirira ahari 1 Petero 3:18-22, ni nshonga ki ibiri ahabw’enki okubatizibwa nikwetengyesa?

⁶ Mbwenu shi buzima okubatizibwa nikwetengyesa? Yetegyereze ebigambo ebiri omuri 1 Petero 3:18-22. (Kishome.) Nk’oku emeeri yaabaire eri akamanyiso akarikureebwa ngu Noa aine okwikiriza, okubatizibwa kwawe n’obuhame oburikureebwa butunu ngu oyehaireyo ahari Yehova. Kwonka shi okubatizibwa buzima nikwetengyesa? Eego buzima. Petero akagamba ahabw’enki kiri kityo. Eky’okubanza, nikubajuna. Okubatizibwa nikubaasa kutujuna twayoreka butunu omu bikworwa byaitu ngu nitwikiririza omuri Yesu, tukamanya ngu akatufeera, yaazooka yaagaruka omu iguru, kandi ngu hati “ari aha rubaju rwa buryo rwa Ruhanga.”

⁷ Ekya kabiri, nikutuhwera kugira ‘omutima ogutarikweshinja.’ Twayehayo ahari Ruhanga kandi tukabatizibwa, nitutandika kugira omukago gw’omutaano nawe. Twayeteisa twihire aha mutima kandi tukaikiririza omu kitambo kya Yesu, Ruhanga naatusaasira ebibi byaitu. Obwo nitubaasa kugira omutima ogutarikweshinja omu maisho ge.

8. Oshemereire kwihirira ahari ki kucwamu kubatizibwa?

⁸ Niki ekishemereire kukuhiga kucwamu kubatizibwa? Ahabw’okushwijuma gye Baibuli, obaasize kwega bingi ebirikukwata ahari Yehova, emitwarize ye, n’emiringo ei arikukoramu ebintu bye. Ebi oyegire ebirikumukwataho bikukwatsireho, reero byakuhiga kumukunda munonga. Rukundo ei oyiniire Yehova neebaasa kuba niyo nshonga nkuru ekuhigire kucwamu kubatizibwa.

9. Nikimanyisa ki okubatizibwa omu iziina rya Isheboona, ery’Omwana, n’ery’omwoyo gurikwera, nk’oku kiri omuri Matayo 28:19, 20?

⁹ Ekindi ekikureeteire kucwamu kubatizibwa n’amazima agu oyegire omu Baibuli kandi okaikiriza. Yetegyereze eki Yesu yaagambire obu yaaha abeegi be ekiragiro ky’okuhindura abantu abeegi. (Shoma Matayo 28:19, 20.) Kurugiirira ahari Yesu, abo abarikubatizibwa  baine kukikora “omu iziina rya Isheboona n’ery’Omwana n’ery’omwoyo” gurikwera. Eki nikimanyisa ki? Oine kwikiriza n’omutima gwawe gwona amazima agari omu Baibuli agarikukwata ahari Yehova, Omwana we Yesu, n’omwoyo gurikwera. Amazima aga gaine amaani kandi nigabaasa kukuhika aha mutima. (Heb. 4:12) Ka tushwijume gamwe aharigo.

10-11. Ni mazima ki agarikukwata ahari Isheboona agu oyegire kandi okaikiriza?

¹⁰ Teekateeka obu waayega amazima ago agarikukwata ahari Isheboona: Eiziina rye ni “Yehova,” niwe ari ahaiguru ‘y’ebintu byona omu nsi,’ kandi niwe Ruhanga ow’amazima wenka. (Zab. 83:18; Isa. 37:16) Niwe Muhangi waitu, kandi “okujuna” n’okwe. (Zab. 3:8; 36:9) Ataireho entebeekanisa y’okutujuna ekibi n’okufa, kandi atuhaire amatsiko g’okugumaho ebiro byona. (Yoh. 17:3) Waayehayo kandi okabatizibwa nooyoreka ngu ori omwe aha Bajurizi ba Yehova. (Isa. 43:10-12) Noija kuba omwe aha barikuramya Yehova abari omu ka ye, abarikwesiima kwetererwa eiziina rye, kandi bakarimanyisa abandi.​—Zab. 86:12.

¹¹ Ka n’omugisha gw’amaani kumanya eki Baibuli erikwegyesa ahari Isheboona! Waikiriza amazima aga ag’omuhendo, omutima gwawe nigwija kukuhiga kwehayo ahari Yehova kandi obatizibwe.

12-13. Ni mazima ki agarikukwata aha Mwana wa Ruhanga agu oyegire kandi okaikiriza?

¹² Okatwaza ota ku waayegire amazima aga agarikukwata aha Mwana wa Ruhanga? Yesu niwe wa kabiri omu kitiinisa omu nsi n’omu iguru. Niwe Mucunguzi. Ayekundiire akahayo amagara ge ahabwaitu. Omu bikorwa byaitu twayoreka ngu nitwikiririza omu kitambo, nitubaasa kusaasirwa ebibi byaitu, tugire omukago murungi na Ruhanga, kandi twije tutungye amagara agatahwaho. (Yoh. 3:16) Yesu niwe Munyamurwa waitu Omukuru. Naayenda kutuhwera kugasirwa omu kitambo, n’okugira omukago murungi na Ruhanga. (Heb. 4:15; 7:24, 25) Yesu obu ari Omugabe w’Obukama bwa Ruhanga, niwe ou Yehova araakorese kweza eiziina rye, akaihaho ebikorwa bibi byona, kandi akareeta emigisha y’obutwire omuri Paradiso. (Mat. 6:9, 10; Kush. 11:15) Yesu niwe twine kutooreza. (1 Pet. 2:21) Akatuteeraho eky’okureeberaho arikwemarira aha kukora ebi Ruhanga arikukunda.​—Yoh. 4:34.

¹³ Waikiriza enyegyesa ezirikukwata aha Mwana wa Ruhanga ow’omuhendo, noija kumukunda. Rukundo egyo neekuhiga kukoresa amagara gaawe kukora ebi Ruhanga arikukunda, nk’oku Yesu yaakozire. Ekirikurugamu, nikiija kukuhiga kwehayo ahari Yehova kandi obatizibwe.

14-15. Ni mazima ki agarikukwata aha mwoyo gurikwera agu oyegire kandi okaikiriza?

¹⁴ Okateekateeka ki ku waayegire amazima agarikukwata aha mwoyo gurikwera? Okamanya ngu omwoyo gurikwera ti muntu, kureka n’amaani ga Ruhanga. Yehova akakoresa omwoyo gurikwera kuhiga abaahandiikire Baibuli n’okubahwera, kandi nigutuhwera kwetegyereza ebi turikushomamu n’okubigyenderaho. (Yoh. 14:26; 2 Pet. 1:21) Yehova naakoresa omwoyo gurikwera kutuha “amaani agarikukirira kimwe.” (2 Kor. 4:7) Omwoyo gurikwera nigutuha amaani g’okubuurira amakuru marungi, kusingura okwohibwa, kwemera ebirikutumaramu amaani, n’okugumisiriza okugyezibwa. Nigutuhwera kugira emitwarize mirungi ey’ekyana ky’omwoyo gurikwera. (Gal. 5:22) Abarikushaba Ruhanga omu mazima kandi bakamwesiga naabaha omwoyo gwe gurikwera.​—Luk. 11:13.

¹⁵ Ka nikihuumuriza kumanya ngu abarikuramya Yehova nibabaasa kwesiga omwoyo gurikwera kubahwera omu kumuheereza! Waikiriza amazima agu oyegire agarikukwata aha mwoyo  gurikwera, nikiija kukuhiga kwehayo ahari Ruhanga kandi obatizibwe.

16. Kurugiirira aha bi twaheza kushwijuma hati, waayega ki?

¹⁶ Okwikiriza kwehayo ahari Ruhanga n’okubatizibwa n’eidaara rikuru munonga. Nk’oku twayega, oine kuba oyeteekateekire kwikiriza byona ebirikutwarirwamu, nk’embeera zigumire, n’ebi oine kwefeerereza. Kwonka emigisha ei orikutunga neekirira kimwe okwefeerereza kwawe. Okubatizibwa nikubaasa kukujuna, kukureetere kugira omutima ogutarikweshinja omu maisho ga Ruhanga. Okucwamu kwawe kubatizibwa okukira munonga kushemereire kuba nikwegamira ahari rukundo ei oyiniire Yehova Ruhanga. Kandi oine kwikiririza kimwe n’omutima gwawe gwona, amazima agu oyegire agarikukwata ahari Isheboona, Omwana, n’omwoyo gurikwera. Twashwijuma ebi twaheza kwega hati, noobaasa kugarukamu ota ekibuuzo eki: “Nyeteekateekire kubatizibwa?”

17. Ni madaara ki agamwe agarikuhitsya omuntu aha kubatizibwa?

¹⁷ Ku oraabe noohurira ngu oyeteekateekire kubatizibwa, hatariho kubangaanisa waahikire aha madaara gatari gamwe na gamwe kubaasa kugira omukago murungi na Yehova. * Omu kwegyesibwa Baibuli, obaasize kumanya bingi ebirikukwata ahari Yehova na Yesu, kandi ogizire okwikiriza. (Heb. 11:6) Nooyesigira kimwe ebi Yehova arikuraganisa ebiri omu Baibuli, kandi noohamiza kimwe ngu okwikiririza omu kitambo kya Yesu nikwija kukujuna ekibi n’okufa. Oyeteisize ebibi byawe, ekirikumanyisa okwehurira kubi ahabw’enshobe ezi waakozire, kandi waaherize kushaba Yehova kukusaasira. Waaherize kuhindura embeera zaawe, ekirikumanyisa okwangira kimwe ebibi ebi waabaire nookora, kandi waatandikire kutwaza omu muringo ogurikushemeza Ruhanga. (Byak. 3:19) Oine ekihika ky’okugambira abandi aha bi orikwikiriza. Ohikire kuba omubuurizi otabatiziibwe kandi okatandika kubuurira hamwe n’ekibiina. (Mat. 24:14) Yehova naakwesiimisa ahabw’okuhika aha madaara aga agarikwetengyesa. Omureeteire kushemererwa munonga.​—Enf. 27:11.

18. Niki ekindi eki oine kukora otakabatiziibwe?

¹⁸ Otakabatiziibwe, hariho ebindi bintu bikye ebi oine kukora. Nk’oku twegire enyima, oine kwehayo ahari Ruhanga. Oine kwehereera omu kushaba okamugambira kuruga aha mutima, kandi okamuraganisa ngu noija kukoresa amagara gaawe kukora ebi arikukunda. (1 Pet. 4:2) Bwanyima manyisa omuhikaanisa w’akakiiko k’abareeberezi ngu nooyenda kubatizibwa. Naija kushaba abareeberezi abamwe kugaaniiraho naiwe. Nyabura ‘we oteerarikirira aha bikwatiraine n’okugaaniira nabo. Hatariho kubangaanisa, ab’eishe-emwe aba nibakumanya kandi nibakukunda. Nibaija kugaaniira naiwe aha nyegyesa nkuru za Baibuli ezi waaherize kwega. Nibaba nibenda kuhamya yaaba  nooyetegyereza enyegyesa ezo, kandi ngu nooyetegyereza obukuru bw’okwehayo n’okubatizibwa. Baareeba ngu ohikire kubatizibwa, nibakugambira ngu noobaasa kubatizibwa aha ruteerane oruhango orw’ekiro kimwe nari orw’ebiro bishatu oruraakurateho.

19-20. Nikiija kukwetengyesa kukora ki bwanyima y’okubatizibwa, kandi ekyo noobaasa kukikora ota?

¹⁹ Bwanyima y’okubatizibwa, nikiija kukwetengyesa kukora ki? * Ijuka ngu okubatizibwa n’endagaano, kandi Yehova naayenda ngu ogihikiirize. N’ahabw’ekyo waaheza kubatizibwa, nooba oine kuhamira aha ndagaano yaawe egyo ey’okwehayo. Ekyo noobaasa kukikora ota?

²⁰ Guma haihi n’ekibiina kyawe. Obu ori Omukristaayo obatiziibwe, hati ori omwe aha ‘b’eishe-emwe.’ (1 Pet. 2:17) Ab’eishe-emwe na banyaanyazi-itwe omu kibiina nibo ka yaawe ey’eby’omwoyo. Waaguma nooza omu nteerane otarikwosha, noija kuhamya omukago ogu oine nabo. Shoma Ekigambo kya Ruhanga kandi ogume nookiteekateekaho buri izooba. (Zab. 1:1, 2) Bwanyima y’okushoma ekicweka omu Baibuli, gira obwire oteekateekye munonga aha bi waashoma. Reero obwo ebigambo ebi waashoma nibiija kukuhika aha mutima. ‘Shaba’ obutaruha. (Mat. 26:41) Okushaba kwawe okurikuruga aha mutima nikwija kukwiriza haihi na Yehova. Guma ‘obanze osherure Obukama’ bwa Ruhanga. (Mat. 6:33) Noobaasa kukora otyo orikuta omurimo gw’okubuurira omu mwanya gw’okubanza. Waaguma nooyejumba omu buheereza obutoosha, okwikiriza kwawe nikwija kuguma kuhami, kandi noobaasa n’okuhwera abandi kuza omu ruguuto rw’amagara agatahwaho.​—1 Tim. 4:16.

21. Okubatizibwa kwawe nikwiguraho omuhanda gw’okutunga ki?

²¹ Okucwamu kwawe kwehayo ahari Yehova kandi okabatizibwa n’enshonga nkuru munonga. N’amazima haine ebirikutwarirwamu. Mbwenu shi ebirungi ebirikuruga omu kubatizibwa nibikira ebi orikwefeerereza? Eego buzima! Oburemeezi bwona obu orikubaasa kutunga omu nsi egi ni ‘bukye, kandi n’obw’omwanya mukye.’ (2 Kor. 4:17) Okutaana n’ekyo, okubatizibwa kwawe nikwija kukwigurira omuhanda gw’okutunga okumarwa hati, n’okwija “kutunga amagara agaabuzima” omu biro by’omumaisho. (1 Tim. 6:19) N’ahabw’ekyo, omu bwegyendesereza shaba kandi oteekateekye aha ky’okugarukamu kyawe eky’ekibuuzo eki: “Nyeteekateekire kubatizibwa?”