1. Ni bintu ki ebi ab’eishe-emwe abatsigazi baine?

AB’EISHE-EMWE abatsigazi, mwine bingi ebi murikubaasa kukora. Baingi ahariimwe mwine amagara marungi n’amaani. (Enf. 20:29) Buzima muri ab’omuhendo omu kibiina. Noobaasa kuba oine ekyetengo ky’okutooranwa kuba omuheereza. Kwonka, noobaasa kuba nooteekateeka ngu abandi nibakureeba nka muto munonga kandi otakahikire kuheebwa obujunaanizibwa bukuru. N’obu oraabe ori muto, haine ebi orikubaasa kukora hati kureetera abandi kukuha ekitiinisa omu kibiina.

2. Nituza kugamba ahari ki omu kicweka eki?

² Omu kicweka eki, nituza kuta omutima aha Mugabe Daudi. Nituza n’okushwijuma ebirikukwata ahari Asa na Yehoshafaati, abagabe babiri ba Yuda. Nituza kureeba emirabanamu ei abashaija bashatu aba baatungire, oku baatwarize, n’eki ab’eishe-emwe abatsigazi barikubaasa kubeegyeraho.

3. Abatsigazi nibabaasa kuhwera bata abakuzire omu kibiina?

³ Obu Daudi yaabaire ari muto akeega emyoga ei abandi baabaire nibareeba nk’ey’omuhendo. Buzima akaba ari omuntu w’eby’omwoyo, kandi akatunguura omwoga gwe gw’okweshongora reero etalanta ye yaagikoresa kugasira Saulo, omugabe owaabaire atoorainwe Ruhanga. (1 Sam. 16:16, 23) Imwe  batsigazi ‘mwe mwine emyoga erikubaasa kugasira abandi omu kibiina? Baingi ahariimwe mugiine. Nk’eky’okureeberaho, noobaasa kwetegyereza ngu bamwe aha b’eishe-emwe na banyaanyazi-itwe abakuzire nibasiima waabeegyesa kukoresa gye ebyoma byabo kweyegyesa n’okubikoresa omu nteerane. Okumanya kukoresa gye ebyoma kwawe nikubaasa kugasira munonga abakuzire aba.

4. Nka Daudi, ab’eishe-emwe abatsigazi baine kugira mitwarize ki? (Reeba ekishushani ekiri aha kipampagare.)

⁴ Daudi omu ntwaza ye eya buri izooba, akakyoreka gye ngu n’ow’obujunaanizibwa kandi orikwesigwa. Nk’eky’okureeberaho, obu yaabaire akiri omutsigazi, akakora n’obweziriki kureeberera entaama z’eishe. Omurimo ogu gukaba gutoorobi. Daudi bwanyima akashoboororera Omugabe Saulo ati: “Nyowe, omwiru waawe, nkaba ndiisa entaama za tata, ku haabaire haija entare nari edubu, yaakwata omwana gw’entaama omu busyo, nkaba ngikurata, ngiteera, ngugiiha omu kanwa.” (1 Sam. 17:34, 35) Daudi akaba naafayo aha magara g’entaama, kandi akaba azirwanirira atarikutiina. Ab’eishe-emwe abatsigazi nibabaasa kutooreza Daudi barikuhikiiriza omu bwesigwa buri bujunaanizibwa obu barikuheebwa.

5. Kurugiirira ahari Zaaburi 25:14, ni kintu ki ekikuru eki ab’eishe-emwe abatsigazi barikubaasa kukora?

⁵ Daudi akiri omutsigazi akagira omukago murungi na Yehova. Omukago ogwo gukaba guri mukuru munonga kukira obumanzi bwa Daudi nari omwoga gwe gw’okuteera enanga. Yehova akaba atari Ruhanga wa Daudi kyonka, beitu akaba ari na munywani we ow’aha mara. (Shoma Zaaburi 25:14.) Ab’eishe-emwe abatsigazi, ekintu kikuru eki murikubaasa kukora n’okuhamya omukago gwanyu na Yehova, kandi eki nikibaasa kubarugiramu okutunga obujunaanizibwa obundi.

6. Ni miteekateekyere ki mibi ei bamwe baabaire baine ahari Daudi?

⁶ Daudi akaba aine kusingura emiteekateekyere mibi ei abandi baabaire bamwineho. Nk’eky’okureeberaho, obu Daudi yaayehayo kurwanisa Goliasi, Omugabe Saulo akateeraho kumuremesa, arikumugira ati: “Okiri muto.” (1 Sam. 17:31-33) Enyimaho, mukuru wa Daudi akamucwera orubanja ahabw’okutaba w’obujunaanizibwa. (1 Sam. 17:26-30) Kwonka Yehova akaba atarikureeba Daudi nka muto munonga nari otari w’obujunaanizibwa. Akaba naamanya gye omutsigazi ogu Daudi. Kandi Daudi ahabw’okwesiga munywani we  Yehova kumuha amaani, akateera Goliasi yaamwikarira.​—1 Sam. 17:45, 48-51.

7. Noobaasa kwegyera ki aha nshonga emwe erikukwata ahari Daudi?

⁷ Nitubaasa kwegyera ki ahari Daudi? Nitwega ngu twine kuba abagumisiriza. Abo abaakureebire okiri muto nikibaasa kubatwarira obwire kutandika kukutwara nk’omuntu okuzire. Kwonka noobaasa kugira obuhame ngu Yehova naareeba ekirikukira aha kyemerero kyawe. Naakumanya gye n’ebi orikubaasa kukora. (1 Sam. 16:7) Hamya omukago gwawe na Ruhanga. Ekyo Daudi akakikora arikwetegyereza ebyahangirwe. Daudi akaba ateekateeka munonga eki ebyahangirwe ebyo byabaire nibimwegyesa aha Muhangi. (Zab. 8:3, 4; 139:14; Rom. 1:20) Ekindi eki orikubaasa kukora, n’okwesiga Yehova kukuha amaani. Nk’eky’okureeberaho, mbwenu shi bamwe abu orikushoma nabo nibakurahura ahabw’okugira ngu ori Omujurizi wa Yehova? Kyaba nikwo kiri, shaba Yehova kukuhwera kwemera oburemeezi obu. Kandi gyendera aha buhabuzi oburi omu Kigambo kye n’ebitabo ebirikwegamira ahari Baibuli, hamwe na vidiyo. Buri murundi ogu orikureeba oku Yehova arikukuhwera kuraba omu mbeera egumire, nooyongyera kumutamu obwesigye. Kandi abandi baareeba nooyesiga Yehova, nabo nibeeyongyera kukwesiga.

8-9. Niki ekyahweraire Daudi kutegyereza agumisiriize kuba omugabe, kandi ab’eishe-emwe abatsigazi nibabaasa kumwegyeraho ki?

⁸ Teekateeka aha buremeezi obundi obu Daudi yaatungire. Bwanyima ya Daudi kushukwaho amajuta akatooranwa nk’omugabe, akaba aine kutegyereza emyaka mingi kubaasa kutegyeka nk’omugabe wa Yuda. (1 Sam. 16:13; 2 Sam. 2:3, 4) Omu bwire obwo, niki ekyamuhweraire kutegyereza agumisiriize? Omu mwanya gwa Daudi kutamwa, akata omutima aha ki yaabaire naabaasa kukora. Nk’eky’okureeberaho, obu Daudi yaabaire ahungiire omuri Filistia, akoresa omugisha ogwo kurwanisa abazigu ba Israeli. Omu kukora atyo, akarinda ensharo z’eihanga rya Yuda.​—1 Sam. 27:1-12.

⁹ Ab’eishe-emwe abakiri bato nibabaasa kwegyera ki ahari Daudi? Mukorese buri mugisha ogu mwine kuheereza ab’eishe-emwe. Teekateeka aha ky’okureeberaho ky’ow’eishe-emwe orikwetwa Ricardo. * Kuruga omu bushogoyo bwe, akaba naayenda kuheereza nka payoniya ow’obutwire. Kwonka akaba ateeteekateekire. Omu mwanya gw’okuhanika nari kugira ekiniga, Ricardo akongyera aha buheereza bwe. Naagira ati: “Ku ndikureeba enyima, nindeeba ngu kikaba kiri kirungi ahariinye kukora entunguuka erikwetengyesa. Nkaba ninta omutima ahari buri omwe orikusiima amazima n’okutebeekanisa gye kubagarukira. Nangwa nkatandika n’okwegyesa omwegi wangye w’okubanza. Ku naayongyeire kutunga obushongokye, obumanzi bwangye bukeeyongyera.” Ricardo hati ni payoniya murungi w’obutwire kandi omuheereza.

10. Izooba rimwe Daudi akakora ki atakacwiremu aha nshonga nkuru?

¹⁰ Yetegyereze ekindi ekyahikire ahari Daudi. Obu we n’abashaija be baabaire bahungire Saulo, bakatsigaho ab’omu maka gaabo baaza kurwanisa abazigu baabo. Ku baabaire batakagarukire, abazigu bakaija baataahirira amaka gaabo baatwara abantu nk’enkwatwa. Ahabw’okugira ngu Daudi akaba ashongokire omu by’okurwana, akaba naabaasa kutebeekanisa omuringo murungi gw’okucungura abantu abaabaire batwairwe. Kwonka omu mwanya gw’ekyo, akashaba Yehova obuhabuzi. Daudi akeebuuza ahari Yehova arikukoresa omunyamurwa  orikwetwa Abiasaari ati: “Ku ndaakurate ezo ngabo, niinyija kuzihika?” Yehova akagambira Daudi kubakurata, kandi yaamuhamiza ngu naija kuba omusinguzi. (1 Sam. 30:7-10) Omuringo ogu Daudi yaakwatsiremu enshonga egi noobaasa kugwegyeraho ki?

11. Noobaasa kukora ki otakacwiremu ekintu kyona?

¹¹ Shaba obuhabuzi otakacwiremu ekintu kyona. Yebuuze aha bazaire baawe. Noobaasa n’okutunga obuhabuzi burungi orikugaaniiraho n’abareeberezi abakuzire omu by’omwoyo. Yehova naayesiga abashaija aba abatoorainwe, naiwe noobaasa kubeesiga. Yehova naabeeta “ebiconco” omu kibiina. (Efe. 4:8) Noija kugasirwa waatooreza okwikiriza kwabo kandi okahurikiza obuhabuzi bw’obwengye obu barikukuha. Hati ka tureebe eki turikubaasa kwegyera aha Mugabe Asa.

12. Omugabe Asa akaba aine mitwarize ki obu yaatandika kutegyeka?

¹² Omugabe Asa omu butsigazi bwe, akaba ari omucureezi kandi akaba aine obumanzi. Ku yaahunguriire ishe orikwetwa Abiya, akatandikaho ehururu y’okumaraho okuramya ebishushani. Kandi akagambira “Abayuda kusherura [Yehova], Ruhanga wa baishenkurubo, n’okworobera ebiragiro n’ebyatairweho.” (2 Bus. 14:1-7) Kandi obu Zeera owa Esiopia yaataahirira Yuda aine abaserukare 1,000,000, Asa akashaba Yehova obuhwezi, arikugira ati: “Ai [Yehova], tihaine orikwingana naiwe omu kuhwera abataine maani baateerwa ab’amaani. [Yehova] Ruhanga waitu, otuhe emikono, ahabw’okuba niiwe turikwesiga.” Ebigambo birungi ebi nibyoreka oku Asa yaabaire naayesiga Yehova ngu naabaasa kujuna abantu be. Asa akeesiga Ishe ow’omu iguru, kandi Yehova akasingura “Abaesiopia.”​—2 Bus. 14:8-12.

13. Niki ekyahikire ahari Asa bwanyima, kandi ahabw’enki?

¹³ Hatariho kubangaanisa noikiriza ngu okurwanisa eihe ry’abaserukare 1,000,000 kikaba kitoorobi, kwonka Asa akabaasa kurisingura. Kwonka eky’obusaasi, Asa ku yaatungire oburemeezi obutagumire munonga, akanga kubuuza Yehova eky’okukora. Asa ku yaatiinatiinisiibwe Omugabe mubi wa Israeli orikwetwa Baasha, akasherura obuhwezi aha mugabe wa Siria. Okucwamu okwo kukarugamu akagwe! Yehova arikukoresa nabi we Hanani,  akagira Asa ati: “Ahabw’okuba oyesigire omugabe wa Siria, tiwaayesiga [Yehova] Ruhanga waawe, nikyo eihe ry’omugabe wa Siria” rikwogiire omu mikono. Nangwa kuruga obwo, Asa akaguma naagira entaro. (2 Bus. 16:7, 9; 1 Bag. 15:32) Nitwega ki?

14. Noobaasa kwesiga ota Yehova kurugiirira ahari 1 Timoseo 4:12, kandi waakikora niharugamu ki?

¹⁴ Guma ori omucureezi kandi ogumizemu nooyesiga Yehova. Obu waabatizibwa, okooreka ngu noikiririza kimwe omuri Yehova, kandi ngu n’okumwesiga. Kandi Yehova akakuha n’omugisha gw’okuba omwe aha b’eka ye. Hati ekikuru eki oine kukora n’okugumizamu nooyesiga Yehova. Nikibaasa kureebeka nk’ekyorobi kwesiga Yehova waaba nooza kucwamu aha nshonga nkuru, kwonka shi nootwaza ota omu bwire obundi? Ka ni kikuru kwesiga Yehova waaba noocwamu aha bikwatiraine n’okweshemeza, omurimo gw’okwebaisaho, n’ebigyendererwa eby’obutwire! Otakaayesiga obwengye bwawe. Kureka, shwijuma emisingye ya Baibuli erikukwata aha mbeera zaawe, reero okuratire obuhabuzi obwo. (Enf. 3:5, 6) Waakora otyo, noija kushemeza Yehova kandi oreetere n’ab’omu kibiina kukuha ekitiinisa.​—Shoma 1 Timoseo 4:12.

15. Nk’oku kiri omu 2 Obusingye 18:1-3; 19:2, Omugabe Yehoshafaati akakora nshobe ki?

¹⁵ Obumwe noija kukora enshobe ahabw’okugira ngu tohikiriire. Kwonka, eki tikishemereire kukuremesa kukora kyona eki orikubaasa omu kuheereza Yehova. Teekateeka aha Mugabe Yehoshafaati. Akaba aine emitwarize mirungi mingi. Obu yaabaire akiri omutsigazi, akasherura “Ruhanga wa ishe, yaaguma naayorobera ebiragiro bye.” N’ekindi, akatuma abatware kugyenda nibaraba omu ndembo za Yuda barikwegyesa abantu ahari Yehova. (2 Bus. 17:4, 7) N’obu Yehoshafaati yaabaire ari ow’amazima, kwonka haine obu yaacwiremu kubi. Kandi Yehoshafaati ahabw’okucwamu kubi, akahanwa omwe aha bajwekyerwa ba Yehova. (Shoma 2 Obusingye 18:1-3; 19:2.) Ebirikumukwataho nitubaasa kubyegyeraho ki?

16. Noobaasa kwegyera ki aha ky’okureeberaho kya Rajeev?

¹⁶ Ikiriza obuhabuzi kandi obugyendereho. Obundi, nk’abatsigazi baingi, tikirikukworobera kumanya ebikuru ebi oine kwebembeza. Otakaahwa amaani. Yetegyereze eky’okureeberaho  ky’ow’eishe-emwe omutsigazi orikwetwa Rajeev. Arikugamba aha myaka ye ey’obushogoyo, naagira ati: “Obumwe nkaba mpurira ntarikumanya eky’okukora omu myaka egyo. Nk’abatsigazi baingi, nkaba ninkunda munonga okwejumba omu mizaano n’okweshemeza kukira okuza omu nteerane nari omu buheereza.” Niki ekyahweraire Rajeev? Omureeberezi orikufayo akamuha obuhabuzi. Rajeev naagira ati: “Akampwera kuteekateeka aha musingye oguri omu 1 Timoseo 4:8.” Rajeev akeecureeza yaikiriza obuhabuzi kandi yaahindura omu bintu bikuru ebi yaabaire naayebembeza. Naagira ati: “Nkacwamu kwebembeza ebigyendererwa by’omwoyo.” Ekyarugiremu? Rajeev naashoboorora ati: “Bwanyima y’emyaka mikye ntungire obuhabuzi obwo, nkahikiiriza ebirikwetengyesa naaba omuheereza.”

17. Abakuru nibatwara bata abatsigazi abarikuheereza Yehova?

¹⁷ Abakuru nibasiima munonga imwe abatsigazi abarikuheereza Yehova “n’omutima gumwe” mukwataniise nabo! (Zef. 3:9) Nibabakunda ahabw’okukora kwanyu n’amaani, ahabw’obweziriki bwanyu, n’okukora mwine omuhimbo omu murimo gwona ogu murikuheebwa. Buzima mutungire obuganzi omu maisho gaabo.​—1 Yoh. 2:14.

18. Nk’oku kiri omu Enfumu 27:11, Yehova naatwara ata abatsigazi abarikumuheereza?

¹⁸ Ab’eishe-emwe abatsigazi, timwine kwebwa ngu Yehova naabakunda kandi naabeesiga. Yehova akakihandiikisa kare ngu omu biro by’emperu, nihaija kuba hariho eihe ry’abatsigazi abarikwehayo beekundiire. (Zab. 110:1-3) Naamanya ngu nimumukunda kandi ngu nimwenda kumuheereza nk’oku murikubaasa. N’ahabw’ekyo mugumisiririze abandi, kandi naimwe mwetware. Mwakora enshobe, mwikirize okuhanwa n’okutendekwa oku muraatungye, mukureebe nk’okurikuruga ahari Yehova. (Heb. 12:6) Mukore n’obweziriki kuhikiiriza obujunaanizibwa obu murikuheebwa. Kandi okukira byona, omu buri kimwe eki murikukora, mureetere Sho ow’omu iguru kubeesiimisa.​—Shoma Enfumu 27:11.