1-2. Ni baahi abarikubaasa kuhwera omwegi wa Baibuli kutunguuka kuhika aha kubatizibwa?

“NKAKUNDA ebi naabaire niinyegyesibwa omu kwega Baibuli,” Amy orikutuura omuri Fiji nikwo arikugira. “Nkaba niimanya ngu nigo mazima. Kwonka ku naatandikire kushashaanuka n’ab’eishe-emwe na banyaanyazi-itwe nibwo naatunguuka kuhika aha kubatizibwa.” Eky’okureeberaho kya Amy nikyoreka amazima makuru aga: Omwegi wa Baibuli naabaasa kugumizamu naatunguuka kuhika aha kubatizibwa yaatunga obuhwezi bw’abandi omu kibiina.

² Buri mubuurizi naabaasa kuhwera aha kweyongyera kutunguuka kw’ekibiina. (Efe. 4:16) Payoniya orikwetwa Leilani, orikutuura omuri Vanuatu, naagira ati: “Nikigambwa ngu nikyetengyesa ekyaro kyona okworora omwana. Ninteekateeka ngu nikyo kimwe n’okuhindura abantu abeegi. Butoosha nikyetengyesa ekibiina kyona kubaasa kureeta omuntu omu mazima.” Ab’eka, abanywani, n’abashomesa nibakora kihango omu kuhwera omwana kukura. Eki nibakikora barikumuhiga n’okumwegyesa amashomo makuru. Nikyo kimwe, ababuurizi nibabaasa kuha abeegi ba Baibuli obwengye, babahigye, kandi babateereho eky’okureeberaho kirungi, kibahwere kutunguuka bakahika aha kubatizibwa.​—Enf. 15:22.

3. Ebi Ana, Dorin, na Leilani baagambire noobyegyeraho ki?

³ Ahabw’enki omubuurizi oine omwegi wa Baibuli ashemereire kwikiriza ababuurizi abandi kuhwera omwegi ogwo? Yetegyereza eki Ana, payoniya ow’omutaano omuri Moldova, arikugamba: “Kigumire munonga omuntu omwe kukora aha byetengo  by’omwegi wa Baibuli byona yaatandika kutunguuka.” Dorin, payoniya ow’omutaano omu ihanga niryo rimwe, naagira ati: “Obwire obwingi ababuurizi nibagamba enshonga erikuhika omwegi aha mutima, ei naakubaire ntarikubaasa kuteekateekaho.” Leilani naagamba enshonga endiijo: “Okufayo aha mwegi n’okumugirira rukundo nikihwera omwegi kwetegyereza ngu buzima turi abantu ba Yehova.”​—Yoh. 13:35.

4. Nituza kwega ki omu kicweka eki?

⁴ Kwonka, noobaasa kwebuuza oti: ‘Nyowe nimbaasa kuhwera nta omwegi wa Baibuli kutunguuka naaba tiinye ndikumwegyesa Baibuli?’ Ka tureebe eki turikubaasa kukora twayetwa kwejumba omu kwegyesa omwegi wa Baibuli, n’eki turikubaasa kukora yaatandika kwija omu nteerane. Nituza n’okureeba eki abareeberezi barikubaasa kukora kuhwera abeegi ba Baibuli kutunguuka kuhika aha kubatizibwa.

5. Oine kukora ki waayetwa kwejumba omu kwegyesa omuntu Baibuli?

⁵ Omu kwegyesa omwegi, orikumwegyesa niwe aine obujunaanizibwa bw’okumuhwera kwetegyereza Ekigambo kya Ruhanga. Orikumwegyesa yaakweta kumwegaitaho, oine kwereeba nk’omukozi mugyenzi we. Obujunaanizibwa bwawe n’okubaangira orikwegyesa omwegi. (Mub. 4:9, 10) Mbwenu shi noobaasa kukora ki kuhwera omu kwegyesa gye omuntu Baibuli?

6. Waayetwa kwejumba omu kwegyesa omwegi, noobaasa kugyendera ota aha musingye oguri omu Enfumu 20:18?

⁶ Yetebeekanisize okwegyesa okwo. Eky’okubanza, buuza omwegyesa kukugambira kakye ebirikukwata aha mwegi. (Shoma Enfumu 20:18.) Noobaasa kubuuza oti: “Noomanya ki ebirikukwata aha mwegi waawe? Nooza kuba nooyega nawe ishomo ki? Ogyendereire kuhwera ota omwegi omu ishomo eri? Haine eki nshemereire kugamba nari eki ntashemereire kugamba twaba nitumwegyesa? Niki ekirikubaasa kuhiga omwegi ogu kutunguuka?” N’ekya buzima, omwegyesa tarikwija kukugambira enshonga z’omwegi ez’omubonano, kwonka ebi araakugambire nibibaasa kukuhwera. Omumiisani orikwetwa Joy naakira kugaaniiramu atyo n’abu arikugyenda nabo aha beegi ba Baibuli. Ayetegyereize eki: “Okugaaniira oku nikuhwera ou ndikugyenda nawe kufayo aha mwegi n’okumanya eki araagambe omu kwega.”

7. Ahabw’enki oine kutebeekanisa waaba nooza kushendekyereza omubuurizi aha mwegi?

⁷ Omubuurizi yaakweta kumushendekyereza aha mwegi, nikiba kiri kirungi kutebeekanisa ebi omwegi arikuza kwega. (Ezr. 7:10) Dorin, ow’eishe-emwe owaaba yaagambirweho, naagira ati: “Ninshemererwa ou ndikuba ngyenzire nawe yaaba ayetebeekanisiize okwega.  Obwo nibwo arikwejumba omu kwegyesa omu muringo ogurikugasha.” N’ekindi, n’omwegi naabaasa kureeba ngu mwembi mwetebeekaniise gye, kandi nimumuteeraho eky’okureeberaho kirungi. N’obu waakuba otarikubaasa kutebeekanisa buri kimwe, teeraho kugira obwire bw’okurabarabamu kwetegyereza enshonga enkuru z’eishomo eryo.

8. Omu kwegyesa omwegi wa Baibuli noobaasa kuhamya ota ngu okushaba kwawe kwine amakuru?

⁸ Okushaba ni kikuru omu kwegyesa omwegi, n’ahabw’ekyo teekateeka bukiri kare aha bi oraagambe omu kushaba omwegyesa yaakugira ngu niiwe oraashabe. Obwo okushaba kwawe nikwija kukora amakuru maingi. (Zab. 141:2) Hanae, orikutuura omuri Japan, na hati naakiijuka okushaba kwa munyaanyazi-itwe owaabaire naashendekyereza omwegyesa we. Naagira ati: “Nketegyereza ngu aine omukago guhami na Yehova, kandi nkaba niinyenda kuba nkawe. Kandi nkabaasa n’okwetegyereza ngu naankunda ahabw’okugamba eiziina ryangye omu kushaba.”

9. Kurugiirira ahari Yakobo 1:19, noobaasa kukora ki kuba omushendekyereza w’omugasho aha omwegi wa Baibuli?

⁹ Shagika omwegyesa mwaba muri aha mwegi. Omamuyovbi payoniya w’omutaano omuri Nigeria naagira ati: “Omuhwezi murungi aha mwegi naakuratira gye mwaba nimwega. Ou orikugyenda n’omwegyesa naayongyeserezaho enshonga nungi, kwonka tarikugamba bingi, ahakuba naamanya ngu orikwegyesa omwegi niwe arikwebembera okwega.” Noobaasa kumanya ota obu oine kugira eki waagamba n’oku oine kukigamba? (Enf. 25:11) Hurikiza gye omwegyesa n’omwegi baaba nibahikaanisa ebiteekateeko. (Shoma Yakobo 1:19.) Reero obwo noobaasa kugira eki waayongyeraho waareeba ngu nikyetengyesa. Kwonka, nooba oine kukoresa okwetegyereza. Nk’eky’okureeberaho, toine kugamba bingi, nari kuteishuka aha nshoboorora y’orikwegyesa, nari kutaatsyamu enshonga endiijo. Beitu waagamba omu bugufu, okaha eky’okureeberaho nari okabuuza ekibuuzo noobaasa kuhwera omwegi kwetegyereza enshonga ei ariyo naayega. Obumwe, noobaasa kuteekateeka ngu tihaine ky’amaani eki orikubaasa kwongyeraho omu kwegyesa. Kwonka waayoreka ngu noofayo aha mwegi kandi okamusiima, noija kukora kihango kumuhwera kutunguuka.

10. Eky’okureeberaho kyawe nikibaasa kuhwera kita omwegi wa Baibuli?

¹⁰ Gamba ebirikukukwataho. Kyaba nikibaasa kuhwera, gambira omwegi oku waayegire amazima, oku waasingwire mbeera zigumire, n’oku obaasize kureeba Yehova arikukuhwera. (Zab. 78:4, 7) Eky’okureeberaho kyawe nikibaasa kuhwera munonga omwegi. Nikibaasa kuhamya okwikiriza kw’omwegi nari kimuhigye kugumizamu naatunguuka kuhika aha kubatizibwa. Kandi nikibaasa n’okumuhwera kusingura okugyezibwa  oku aine. (1 Pet. 5:9) Gabriel, orikutuura omuri Brazil kandi hati ori payoniya, naijuka oku yaagasiirwe obu yaabaire naayega Baibuli. Naijuka ati: “Ku naahuriire ebirikukwata aha b’eishe-emwe, nkeega ngu Yehova naareeba emirabanamu ei twine. Kandi ku baraabe baasingwire emirabanamu egyo, naanye nimbaasa kugisingura.”

11-12. Ahabw’enki twine kwakiira gye abeegi ba Baibuli abarikwija omu nteerane?

¹¹ Omwegi wa Baibuli kubaasa kutunguuka kuhika aha kubatizibwa, aine kuba naaza omu nteerane atarikwosha, kandi arikuzigasirwamu. (Heb. 10:24, 25) Obundi, orikumwegyesa naija kumweta kwija omu ruteerane omurundi gwe ogw’okubanza. Yaaheza kwija, twena nitubaasa kumuhiga kugumizamu naija aha Kyombeko ky’Obukama. Eki nitubaasa kukikora tuta?

¹² Yakiira gye omwegi. (Rom. 15:7) Omwegi yaareeba ngu yaayakiirwa gye, ekyo nikibaasa kumuhiga kugumizamu naija aha Kyombeko ky’Obukama. Otarikureetera omwegi kwehurira kubi, fayo kumuramutsya kandi omwanjurire abandi. Otateebereza ngu abandi baamufaho, ahakuba orikumwegyesa naabaasa kuba yaakyerererwa nari aine ebindi ebi arikukora. Yetegyereze eki omwegi ariyo naagamba, kandi oyorekye ngu noomufaho. Okumwakiira gye kwawe nikubaasa kumuhwera kuta? Yetegyereze eky’okureeberaho kya Dmitrii, owaabatiziibwe emyaka mikye enyima hati ori omuheereza omu kibiina. Ku arikwijuka omurundi gwe gw’okubanza kwija omu ruteerane, naagira ati: “Ow’eishe-emwe akareeba ndi aheeru y’Ekyombeko ky’Obukama ntiinire kutaahamu, reero omu muringo gw’embabazi yaanshendekyereza twataahamu hamwe. Baingi bakaija kundamutsya. Buzima eki kikaantangaaza. Eki kikanshemeza munonga naahurira naayenda ngu buri izooba hagume habeho oruteerane. Nkareeba ekintu eki naabaire ntakareebahoga.”

13. Emitwarize yaawe neebaasa kukwata eta aha mwegi wa Baibuli?

¹³ Taho eky’okureeberaho kirungi. Emitwarize yaawe neebaasa kuhamiza omwegi wa Baibuli ngu yaabona amazima. (Mat. 5:16) Vitalii, hati ori payoniya omuri Moldova, naagira ati: “Nketegyereza oku abandi omu kibiina baabaire nibatwaza, emiteekateekyere yaabo, n’emicwe yaabo. Eki kikampamiza ngu Abajurizi ba Yehova buzima nibagyenda na Ruhanga.”

14. Eky’okureeberaho kyawe nikibaasa kuhwera kita omuntu kutunguuka?

¹⁴ Omwegi wa Baibuli kubaasa kutunguuka kuhika aha kubatizibwa, naaba aine kugyendera aha bi arikwega. Eki butoosha tikyorobi. Kwonka omwegi yaareeba oku orikugasirwa ahabw’okugyendera aha misingye ya Baibuli, nawe nikibaasa kumuhiga kukutooreza. (1 Kor. 11:1) Teekateeka ahari Hanae, owaaba yaagambirweho. Naagira ati: “Nkaba  nindeeba ab’eishe-emwe na banyaanyazi-itwe nibata omu nkora ebintu ebi naabaire niinyega. Nkareeba oku naanye naabaire nimbaasa kugumya abandi nkabasaasira, kandi nkoreka ngu nimbakunda. Butoosha bakaba bagamba gye aha bandi. Nkaba niinyenda kubatooreza.”

15. Nituhwerwa tuta Enfumu 27:17 kumanya ahabw’enki twine kunywana omwegi wa Baibuli yaagumizamu naija omu nteerane?

¹⁵ Nywana omwegi. Omwegi yaaguma naija omu nteerane, yongyera kworeka ngu noomufaho. (Fil. 2:4) Noobaasa kugaaniira nawe kumumanya gye? Otarikwetaatsya omu nshonga ze nk’omuntu, noobaasa kumwebaza ahabw’okukora empindahinduka nungi, kandi omubuuze oku okwega kwe kurikugyenda, eka ye, n’omurimo gwe. Okugaaniira oku nikubaasa kurugamu okugira omukago murungi nawe. Waanywana omwegi wa Baibuli, noomuhwera kutunguuka kuhika aha kubatizibwa. (Shoma Enfumu 27:17.) Hanae ni payoniya ow’obutwire hati. Arikwijuka obu yaabanza kwija omu nteerane, naagira ati: “Ku naatungire abanywani omu kibiina, nkatandika kugirira enteerane ekihika, kandi nkaba nzayo n’obu naabaire mba nduhire. Nkaba ninkunda kuba na banywani bangye aba abasya, kandi eki kikampwera kwecwa aha banywani abataine enyikiriza nk’ezangye. Nkaba niinyenda kuba haihi na Yehova n’ab’eishe-emwe na banyaanyazi. N’ahabw’ekyo nkacwamu kubatizibwa.”

16. Noobaasa kukora ki ekindi kuhwera omwegi wa Baibuli kwereeba nk’omwe aha b’omu kibiina?

¹⁶ Omwegi yaagumizamu naatunguuka arikukora n’empindahinduka, muhwere kwereeba nk’omwe aha b’ekibiina. Noobaasa kukora eki orikuba efura. (Heb. 13:2) Denis orikuheereza omuri Moldova ku arikuranzya enyima obu yaabaire naayegyesibwa Baibuli, naijuka ati: “Emirundi mingi, nyowe n’omukazi wangye bakaba batweta kushashaanuka n’ab’eishe-emwe. Bakaba batugambira oku Yehova yaabahweraire. Ekyo kikatugumya. Okututaayaayisa okwo kukatuhwera kuhamiza kimwe ngu nitwenda kuheereza Yehova, kandi ngu twine nyentsya nungi munonga.” Omwegi wa Baibuli ku araabe ari omubuurizi, nabwo noobaasa kumweta kugyenda nawe omu buheereza. Diego, omubuurizi omuri Brazil, naagira ati: “Ab’eishe-emwe baingi bakaba banyeta kugyenda nabo omu buheereza. Ogu gukaba guri omuringo murungi gw’okubamanya gye. Omu kugyenda nabo, nkeega bingi, naahurira ndi haihi na Yehova hamwe na Yesu.”

17. Abareeberezi nibabaasa kuhwera bata abeegi ba Baibuli?

¹⁷ Mugirire abeegi ba Baibuli obwire. Abareeberezi, mwakunda abeegi ba Baibuli kandi mukabafaho, ekyo nikibaasa kubahwera kutunguuka kuhika aha kubatizibwa. Nimubaasa kuguma nimugaaniira nabo butoosha baija  omu nteerane? Nibaija kumanya ngu nimubafaho mwijuka amaziina gaabo, na munonga baatandika kugarukamu. Nimubaasa kuguma nimuhindura omu ntebeekanisa zaanyu kubaasa kugyenda n’ababuurizi baaba nibaza kwegyesa abeegi Baibuli? Nimubaasa kuhwera abeegi kukira oku murikuteekateeka. Payoniya orikwetwa Jackie, orikutuura omuri Nigeria, naashoboorora ati: “Abeegi baingi nikibatangaaza ku barikumanya ngu ow’eishe-emwe ou naagyenda nawe kubeegyesa n’omureeberezi. Omwegi wa Baibuli omwe akagira ati: ‘Ekyo pasita wangye tarikubaasa kukikora. Naataayaayira abagaiga bonka kandi nabwo baaheza kumuha sente!’” Omwegi ogwo hati naija omu nteerane.

18. Abareeberezi nibabaasa kuhikiiriza bata obujunaanizibwa bwabo, kurugiirira ahari 1 Petero 5:2?

¹⁸ Mutendekye abarikwegyesa Baibuli kandi mubahigye. Abareeberezi, mwine obujunaanizibwa bw’amaani obw’okuhwera ababuurizi kuba barungi omu buheereza bwabo, otwariiremu n’okwega kwegyesa gye abeegi ba Baibuli. (Shoma 1 Petero 5:2.) Omubuurizi yaaba naatiina kwegyesa omwegi wa Baibuli oriho, ba niiwe waayegyesa. Jackie, owaaba yaagambirweho, naashoboorora ati: “Abareeberezi nibakira kumbuuza aha bikwatiraine n’abeegi bangye. Ku ndikutunga oburemeezi omu kwegyesa abeegi ba Baibuli, nibampa obuhwezi oburikukora.” Abareeberezi nibabaasa kukora kihango kuhiga abarikwegyesa abeegi ba Baibuli kugumisiriza. (1 Tes. 5:11) Jackie naayongyeraho ati: “Ninshemererwa abareeberezi baangumya kandi bakangambira ngu nibasiima obweziriki bwangye. Ebigambo nk’ebyo nibinduhuura nk’oku egiraasi y’amaizi erikuruhuura aha izooba ry’omushana mwingi. Okusiima kwabo nikumpwera kwongyera kwegiramu obwesigye n’okutunga okushemererwa omu murimo gw’okwegyesa abantu Baibuli.”​—Enf. 25:25.

19. Ni kushemererwa ki oku twena turikubaasa kugira?

¹⁹ N’obu waakuba otaine omwegi wa Baibuli ou orikwegyesa hati, nabwo noobaasa kuhwera omuntu kutunguuka omu by’omwoyo. Otarikugamba bingi, noobaasa kushagika orikwegyesa omwegi orikutebeekanisa gye eky’okwongyeserezaho omu kwega. Noobaasa kunywana abeegi ba Baibuli baija aha Kyombeko ky’Obukama, obateereho n’eky’okureeberaho kirungi. Kandi abareeberezi nibabaasa kuhiga abeegi ba Baibuli barikubagirira obwire, barikutendeka abeegyesa baabo, kandi bakabasiima. Buzima, tihariho ekirikubaasa kutureetera okushemererwa okukira okumanya ngu haine eki tukozire n’obu kyakuba kiri kikye omu kuhwera omuntu kuheereza Tataitwe, Yehova.