1. Kurugiirira ahari Matayo 24:9, ahabw’enki tutaine kutangaara ab’ensi baatwanga?

YEHOVA akatuhanga turikubaasa kukunda kandi tukakundwa. N’ahabw’ekyo omuntu yaatwanga, nitugira enaku n’okutiina. Nk’eky’okureeberaho, munyaanyazi-itwe Georgina, orikutuura Buraaya naagira ati: “Aha myaka 14, maawe akanyanga ahabw’okuheereza Yehova. Nkeehurira nk’otsigirweho kandi naatandika kubangaanisa yaaba ndi omuntu murungi.” * Ow’eishe-emwe Danylo akahandiika ati: “Abaserukare ku bantaire, bakanjuma kandi bakantiinantiinisa ahabw’okuba Omujurizi wa Yehova, ekyo kikandeetera obwoba bwingi n’okuhemuka.” Rwango nk’egi neetugwisa kubi, kwonka ekyo tikirikututangaaza. Yesu akagira ngu nitwija kwangwa.​—Shoma Matayo 24:9.

2-3. Ahabw’enki abantu nibanga abakuratsi ba Yesu?

² Ensi neeyanga abakuratsi ba Yesu. Ahabw’enki? Ahakuba nka Yesu, ‘tituri b’ensi.’ (Yoh. 15:17-19) N’ahabw’ekyo, n’obu turaabe nituha gavumenti z’abantu ekitiinisa, nitwanga kuziramya n’obumanyiso bw’eihanga. Nituramya Yehova wenka. Nitushagika Ruhanga kuba niwe ahikire kutegyeka abantu, ekintu eki Sitaane ‘n’oruzaaro rwe’ barikuhakanisa. (Kut. 3:1-5, 15) Nitubuurira ngu Obukama bwa Ruhanga nibwo bwonka oburaamareho oburemeezi bw’abantu, kandi bukacwekyereza boona abarikubuhakanisa. (Dan. 2:44; Kush. 19:19-21) Obutumwa obu nibushemeza abacureezi kwonka nibugwisa kubi ababi.​—Zab. 37:10, 11.

³ Kandi nitwangwa ahabw’okugyendera aha mitindo ya Ruhanga ehikiriire. Emitindo egyo neetaanira kimwe n’emitwarize mibi ey’ab’ensi. Nk’eky’okureeberaho, abantu baingi hati  nibaikiriza ebikorwa birikuhemurana nk’ebi Ruhanga yaihiriireho kucwekyereza Sodoma na Gomora! (Yud. 7) Ahabw’okugira ngu nituhamira aha mitindo ya Baibuli erikutuhwera kwetantara ebikorwa ebyo, abantu baingi nibatujuma kandi bagira ngu titurikukwatanisa n’abandi!​—1 Pet. 4:3, 4.

4. Ni mitwarize ki erikubaasa kutugumya abantu baaba nibatwanga?

⁴ Niki ekirikubaasa kutuhwera kugumisiriza, abantu baatwanga nari baatujuma? Twine kugira okwikiriza kuhami ngu Yehova naija kutuhwera. Okwikiriza kwaitu kuri nk’engabo nikubaasa “kuraaza emyambi y’omuriro yoona ey’omubi.” (Efe. 6:16) Okugira okwikiriza kwonka tikirikumara. Twine kugira na rukundo. Ahabw’enki? Ahakuba rukundo ‘terikurahuka kuguubwa kubi.’ Neeyemera byona, kandi neegumisiriza byona ebirikubaasa kutugwisa kubi. (1 Kor. 13:4-7, 13) Ka tureebe oku okukunda Yehova, ab’eishe-emwe, nangwa n’abazigu baitu kirikubaasa kutuhwera kugumisiriza rwango.

5. Yesu okukunda Ishe kikamubaasisa kukora ki?

⁵ Omu kiro eki Yesu yaakwatiirweho, akagambira abakuratsi be abeesigwa ati: ‘Nyowe ninkora nk’oku Tata yaandagiire, [ahakuba] nimukunda.’ (Yoh. 14:31) Ahabw’okugira ngu Yesu akaba naakunda Yehova kikamuhwera kugumisiriza okugyezibwa kw’amaani. Twaba nitukunda Yehova nitubaasa kukora nikyo kimwe.

6. Kurugiirira aha Abarooma 5:3-5, abaheereza ba Yehova nibeehurira bata baaba nibahiiganisibwa omu nsi egi?

⁶ Okukunda Ruhanga kutwire nikuhwera abaheereza be kugumisiriza okuhiiganisibwa. Nk’eky’okureeberaho, entumwa ku baaragiirwe eishengyero ry’Abayudaaya kurekyera aho kubuurira, okukunda Ruhanga kukabahiga kumworobera “okukira abantu.” (Byak. 5:29; 1 Yoh. 5:3) Kandi rukundo egi neegumya n’ab’eishe-emwe ab’obunaku obu, baingi aharibo ababaasize kwemera okuhiiganisibwa kwa gavumenti z’abantu. Omu mwanya gw’okuhwamu amaani, nitugureeba nk’omugisha kugumisiriza rwango y’ensi egi.​—Byak. 5:41; Shoma Abarooma 5:3-5.

7. Twine kutwaza tuta abanyabuzaare baaba nibatuhiiganisa?

⁷ Obundi ab’omu maka gaitu nibabaasa kuba nibo barikutuhiiganisa munonga. Twatandika kukunda amazima, bamwe aha b’omu maka gaitu nibabaasa kuteekateeka ngu tuhabisiibwe. Abandi nibabaasa kuteekateeka ngu tuhungutukire. (Gyeragyeranisa Mako 3:21.) Nibabaasa n’okutuhiiganisa omu muringo gw’obushaarizi. Eki kyabaho, titushemereire kutangaara. Yesu akagira ati: ‘Abazigu b’omuntu nibaija kuba ab’omu ka ye.’ (Mat. 10:36) Buzima, yaaba abanyabuzaare baitu batuhiiganisa bata, nitwetantara kubareeba nk’abazigu baitu. Kandi, twayongyera kukunda Yehova, nitwongyera n’okukunda abantu. (Mat. 22:37-39) Kwonka titurikubaasa kuhenda emitindo n’emisingye ya Baibuli ahabw’okwenda kushemeza abantu.

8-9. Niki ekyahwereire munyaanyazi-itwe kuguma ahami n’obu araabe yaabaire naahiiganisibwa munonga?

⁸ Georgina, owaaba yaagambirweho, akabaasa kuguma ari omwesigwa n’obu nyina araabe yaabaire naamuhiiganisa. Georgina naashoboorora ati: “Nyowe na maawe Abajurizi ba Yehova bakatandika kutwegyesa Baibuli. Kwonka bwanyima y’ameezi mukaaga ku naayenzire kuza omu nteerane, emiteekateekyere ya maawe ekahinduka. Nketegyereza ngu akaba naagaaniira n’abeehagwire aha mazima, kandi akateeraho kummaramu amaani arikukoresa ebishuba byabo. Kandi akaba anjuma, anyurura eishokye, aniga amaraka, kandi anaga ebitabo byangye. Ku naahikize emyaka 15,  nkabatizibwa. Maawe akateeraho kundemesa kuheereza Yehova arikuntwara kutuura omu ka erimu abaana abandi emishogoyo, bamwe aharibo abaabaire nibakoresa emibazi y’ekitokooza bwongo kandi barikuhenda n’ebiragiro. Ti kyorobi kugumisiriza okuhiiganisibwa na munonga kwaba nikuruga aha muntu oshemereire kukukunda kandi akakufaho.”

⁹ Georgina akagumira ata embeera egyo? Naagira ati: “Obu maawe yaanyehindukana, nkaba naaheza kushoma Baibuli yoona. Nkaba nyine obuhame ngu mboine amazima, kandi nkehurira ndi haihi munonga na Yehova. Nkaba ninkira kumushaba, kandi angarukamu. Obu naabaire nintuura omu ka egyo, munyaanyazi-itwe omwe akaba anyeta owe kwega Baibuli. Kandi omu bwire obwo, ab’eishe-emwe na banyaanyazi-itwe bakangumya aha Kyombeko ky’Obukama. Bakantwariza nk’ow’omu ka yaabo. Nkereebera butunu ngu Yehova naakirira kimwe abarikutuhiiganisa, n’obu baakuba baine maani ki.”

10. Nitubaasa kugira bwesigye ki omuri Yehova Ruhanga waitu?

¹⁰ Entumwa Paulo akahandiika ngu tihaine ekirikubaasa “kututaanisa n’okukunda kwa Ruhanga okuri omuri Kristo Yesu Mukama waitu.” (Rom. 8:38, 39) N’obu twakubonabona kumara akaire, butoosha Yehova naija kutuhuumuriza kandi atugumye. Kandi eky’okureeberaho kya Georgina nikyoreka ngu Yehova naija n’okutuhwera arikukoresa eka yaitu y’omuhendo ey’eby’omwoyo.

11. Rukundo ei Yesu yaagambireho omuri Yohaana 15:12, 13 ekaba neija kuhwera eta abeegi be? Ha eky’okureeberaho.

¹¹ Omu kiro eki Yesu baamukwatireho, akaijutsya abakuratsi be kukundana. (Shoma Yohaana 15:12, 13.) Akaba naamanya ngu rukundo ey’okwefeerereza ekaba neija kubahwera kugira obumwe n’okugumira rwango y’ensi. Yetegyereze ebyahikire aha kibiina kya Tesalonika. Kwiha obu kyatandikwaho, ab’eishe-emwe bakaba nibahiiganisibwa. Kwonka, bakataho eky’okureeberaho kirungi ky’okugumisiriza omu bwesigwa n’okukundana. (1 Tes. 1:3, 6, 7) Paulo akabahiga ‘kwongyera kukundana’ omu bwijwire. (1 Tes. 4:9, 10) Rukundo ekaba neija kubahiga kugumya abahahaire emitima n’okushagika abataine maani. (1 Tes. 5:14) Bakakuratira obuhabuzi bwa Paulo ahakuba omu baruha ye eya kabiri ei yaabahandiikiire bwanyima y’omwaka gumwe, akabagira ati: “Okukunda  kwa buri omwe omuriimwe oku murikukundana ni kwingi buzima.” (2 Tes. 1:3-5) Rukundo niyo yaabahweraire kwemera embeera zigumire n’okuhiiganisibwa.

12. Omu bwire bw’orutaro, ab’eishe-emwe ab’eihanga rimwe bakooreka bata ngu nibakundana?

¹² Teekateeka aha ky’okureeberaho kya Danylo, owaaba yaagambirweho n’omukazi we. Orutaro ku rwahikire omu rurembo rwabo, bakagumizamu nibaza omu nteerane, nibabuurira nk’oku barikubaasa, kandi barikubagana eby’okurya n’ab’eishe-emwe bagyenzi baabo. Eizooba rimwe, abaserukare bakaija omu ka ya Danylo. “Bakangira ngu nyehakane okwikiriza kwangye, Danylo nikwo arikugira. “Ku naayangire, bakanteera kandi baayeshushaniriza nk’abarikwenda kundasha, barikuteera amasasi gakaraba ahaiguru y’omutwe gwangye. Batakagyenzire, bakantiinatiinisa ngu nibaija kugaruka bahambe omukazi wangye. Kwonka ab’eishe-emwe bakatuta omu gaari y’omwika twaza omu tauni endiijo. Tindikwija kwebwa rukundo ei ab’eishe-emwe abo baatworekire. Kandi ku twahikire omu tauni nsya egyo, ab’eishe-emwe bakatuha eby’okurya kandi baampwera kutunga omurimo n’oburaaro! N’ekyarugiremu, tukaba nitubaasa kuha obuhungiro Abajurizi ba Yehova abandi abaabaire nibahunga orutaro.” Eby’okureeberaho nk’ebi nibyoreka ngu rukundo y’Ekikristaayo neebaasa kutuhwera kugumisiriza rwango.

13. Omwoyo gurikwera nigutuhwera guta kugumisiriza omu buheereza bwaitu n’obu abantu baakuba nibatwanga?

¹³ Yesu akagambira abakuratsi be kukunda abazigu baabo. (Mat. 5:44, 45) Ekyo shi kyorobi kukora? Ngaaha buzima! Kwonka nikibaasika twaba twine obuhwezi bw’omwoyo gurikwera. Ekyana ky’omwoyo gurikwera nikitwariramu rukundo, okugumisiriza, embabazi, obucureezi n’okwerinda. (Gal. 5:22, 23) Emitwarize egi neetuhwera kugumisiriza rwango. Baingi abarikutuhiiganisa babaasize kuhindura emiteekateekyere yaabo ahabw’okugira ngu ow’eishe-emwe omushaija, omukazi, omwana, nari omutaahi aine emitwarize mirungi egyo. Kandi baingi aharibo babaasize kwija omu mazima. N’ahabw’ekyo waaba noogumirwa kukunda abarikukwanga ahabw’okuheereza Yehova, shaba omwoyo gurikwera. (Luk. 11:13) Kandi gira obwesigye ngu omuringo ogu Yehova arikukoramu ebintu butoosha nigwo gurikukirayo oburungi.​—Enf. 3:5-7.

14-15. Ebiri omu Abarooma 12:17-21 bikahwera bita Yasmeen kugumizamu naakunda iba n’obu araabe yaabaire naamuhiiganisa?

 ¹⁴ Teekateeka aha ky’okureeberaho kya Yasmeen, orikutuura omuri Middle East. Ku yaabaire Omujurizi wa Yehova, iba akateekateeka ngu bamuhabiise, kandi akateeraho kumuzibira kuheereza Ruhanga. Akamujuma kandi yaahiga abanyabuzaare, abeebembezi b’ediini, n’omufumu kumutiinatiinisa ngu ariyo naabaganisamu eka yaabo. Kandi iba akaija yaajuma ab’eishe-emwe bari omu ruteerane! Yasmeen akaba naakira kurira ahabw’okutwarizibwa kubi.

¹⁵ Aha Kyombeko ky’Obukama, eka ya Yasmeen ey’eby’omwoyo ekamuhuumuriza kandi yaamugumya. Abareeberezi bakamuhiga kugyendera aha bigambo ebiri omu Abarooma 12:17-21. (Kishome.) “Kikaba kigumire,” Yasmeen nikwo arikugira. “Kwonka nkashaba Yehova kumpwera, kandi naateeraho kugyendera aha buhabuzi bwa Baibuli. N’ahabw’ekyo ibanyi ku yaabaire anaga oburofa omu kiyungu, nkaba nkiboneza. Ku yaabaire anjuma, nkaba mmugarukamu ncureire. Kandi ku yaarwaire, nkamureeberera.”

16-17. Nitwegyera ki aha ky’okureeberaho kya Yasmeen?

¹⁶ Yasmeen akatunga ebirungi ahabw’okuguma naakunda iba. Naagira ati: “Ibanyi akongyera kunyesiga ahakuba akaba naamanya ngu ningamba amazima. Akatandika kuhurikiza twaba nitugaaniira ebirikukwata aha diini, kandi yaikiriza kureetaho obusingye omuka. Hati naanyendeza enteerane nungi z’ekibiina naaba ndiyo ninzayo. Hati nyowe nawe twine enkoragana nungi, kandi twine obusingye omuka. Nyine amatsiko ngu ibanyi naija kwigura omutima gwe naayega amazima, naanyegaitaho omu kuheereza Yehova.”

¹⁷ Eky’okureeberaho kya Yasmeen nikyoreka ngu rukundo ‘neeyemera byona, eine amatsiko ahari byona, kandi neegumisiriza byona.’ (1 Kor. 13:4, 7) Rwango neebaasa kuba ey’amaani erikureeta n’obusaasi, kwonka rukundo neekirira kimwe rwango. Rukundo neehindura emitima y’abantu. Kandi neeshemeza Yehova. Kwonka n’obu abarikutuhakanisa baakugumizamu nibatwanga, nabwo nitubaasa kuguma tushemereirwe. Tuta shi?

18. Ahabw’enki turikubaasa kushemererwa twaba nitwangwa?

¹⁸ Yesu akagira ati: “Mwine omugisha [okushemererwa] abantu ku baraabangye.” (Luk.  6:22) Tikugira ngu nitukunda kwangwa. Titurikuteeraho kuba amamanzi. Mbwenu shi ahabw’enki turikubaasa kushemererwa twayangwa? Yetegyereze enshonga ishatu. Ey’okubanza, twagumisiriza, nitusiimwa Ruhanga. (1 Pet. 4:13, 14) Eya kabiri, okwikiriza kwaitu nikwongyera kuhama n’okushemera. (1 Pet. 1:7) Eya kashatu, nitwija kutunga ekihembo ky’obuguzi bwingi nigo amagara agatahwaho.​—Rom. 2:6, 7.

19. Ahabw’enki entumwa baashemereirwe bwanyima y’okuteerwa?

¹⁹ Ahonaaho Yesu aherize kuzooka, entumwa bakashemererwa nk’oku yaabaire agambire. Bwanyima y’okuteerwa enkoni n’okuragiirwa kurekyera aho kubuurira, bakashemererwa. Ahabw’enki? ‘Ahabw’okuheebwa ekitiinisa eky’okuhemurwa nibaturwa eiziina rya Yesu.’ (Byak. 5:40-42) Bakaba nibakunda Mukama waabo kukira oku baabaire nibatiina abazigu baabo. Kandi bakooreka rukundo ei bamwiniire barikubuurira amakuru marungi ‘batarikureka.’ Ab’eishe-emwe baingi nibagumizamu kuheereza omu mbeera zigumire. Nibamanya ngu Yehova tarikwija kwebwa emirimo yaabo na rukundo ei bainiire eiziina rye.​—Heb. 6:10.

20. Nituza kwega ki omu kicweka ekirikukurataho?

²⁰ Ensi neija kugumizamu neetwanga emperu yaaba etakahikire. (Yoh. 15:19) Kwonka titwine kutiina. Nk’oku turikuza kureeba omu kicweka ekirikukurataho, Yehova naija kugumya abantu be kandi abarinde. (2 Tes. 3:3) N’ahabw’ekyo ka tugumizemu nitukunda Yehova, tukunde ab’eishe-emwe na banyaanyazi-itwe, nangwa tukunde n’abazigu baitu. Twakuratira obuhabuzi obu, nitwija kuguma twine obumwe, kandi tuhami omu by’omwoyo, tuhaise Yehova ekitiinisa, kandi nitwija kworeka ngu rukundo n’ey’amaani kukirira kimwe rwango.