1. Ahabw’enki Yesu yaashabire Yehova kurinda abeegi be?

AHA kiro obu Yesu yaakwatwa, akaba naateekateeka aha mbeera zigumire ezaabaire niziija kuhika aha beegi be. Yesu arikuhigwa rukundo ei yaabaire ainiire banywani be, akashaba Ishe ngu “abarinde omubi.” (Yoh. 17:14, 15) Yesu akaba naamanya ngu yaaheza kugaruka omu iguru, Sitaane Omuregi naija kugumizamu naarwanisa buri omwe orikwenda kuheereza Yehova. Buzima, abaheereza ba Yehova kikaba nikiija kubeetengyesa kurindwa.

2. Nitubaasa kuhamya tuta ngu Yehova naija kugarukamu okushaba kwaitu?

² Yehova akagarukamu okushaba kwa Yesu ahakuba akaba naamukunda. Twateeraho nk’oku turikubaasa kushemeza Yehova, naitwe naija kutukunda, kandi naija kutufaho twamushaba kutuhwera n’okuturinda. Yehova nk’Omutwe gw’eka orikufayo, naija kugumizamu naareeberera abaana be. Eki yaaba atakikozire, nikijumisa eiziina rye!

3. Ahabw’enki hati nitwendera kimwe Yehova kuturinda?

³ Hati nitwenda oburinzi bwa Yehova kukira ira. Sitaane akabingwa omu iguru, ‘aine ekiniga kingi.’ (Kush. 12:12) Areetaire abarikutuhiiganisa ‘kuteekateeka ngu nibakorera Ruhanga.’ (Yoh. 16:2) Kandi abandi, abatarikwikiririza omuri Ruhanga, nibatuhiiganisa ahabw’okugira ngu titurikwikiriza kubumbwa emiteekateekyere y’ensi. Kyona ekiraabeho, twine obwesigye. Ahabw’enki? Ahakuba Ekigambo kya Ruhanga nikigira kiti: ‘Mukama waitu n’ow’okwesigwa, naija kubagumya, kandi abarinde omubi.’ (2 Tes. 3:3) Yehova naaturinda ata? Ka tushwijume emiringo ebiri.

4. Kurugiirira aha Abaefeso 6:13-17, Yehova atuhaire ki kuturinda?

⁴ Yehova atuhaire ekijwaro ky’eby’okwerindisa ekirikubaasa kuturinda kutataahirirwa Sitaane. (Shoma Abaefeso 6:13-17.) Eky’okwerindisa eki eky’eby’omwoyo n’eky’amaani kandi nikikora gye! Kwonka nikiija kuturinda twajwara buri kicweka kyakyo kandi tukaguma tukijwaire. Buri kicweka ky’ekijwaro ky’okwerindisa nikijwekyera ki? Ka tushwijume kimwe-kimwe.

5. Orukoba rw’amazima niki, kandi ahabw’enki twine kurwezirika?

⁵ Orukoba rw’amazima nirujwekyera amazima agari omu Kigambo kya Ruhanga, Baibuli. Ahabw’enki twine kwezirika orukoba oru? N’ahabw’okugira ngu Sitaane niwe “ishe w’ebishuba.” (Yoh. 8:44) Atwire naabeiha kumara emyaka mingi kandi abaasize kuhabisa “ensi yoona”! (Kush. 12:9) Kwonka amazima agari omu Baibuli nigaturinda kutabeihwabeihwa. Mbwenu shi nitwezirika tuta orukoba oru orw’akamanyiso? Nitukikora turikwega amazima agarikukwata ahari Yehova, ‘turikumuramya omu mwoyo n’omu mazima,’ kandi turikuba ab’amazima omu buri kimwe.​—Yoh. 4:24; Efe. 4:25; Heb. 13:18.

6. Eky’okwekingiza omu kifuba eky’okuhikiirira niki, kandi ahabw’enki twine kukijwara?

⁶ Eky’okwekingiza omu kifuba eky’okuhikiirira nikijwekyera emitindo ya Yehova ehikiriire. Ahabw’enki twine kujwara eky’okwekingiza omu kifuba? Nk’oku eky’okwekingiza omu kifuba kirikurinda omutima gw’omuserukare kutacumitwa, eky’okwekingiza omu kifuba eky’okuhikiirira nikirinda omutima gwaitu ogw’akamanyiso nari eki turi omunda, kutashiishwa emiteekateekyere y’ensi egi. (Enf. 4:23) Yehova naayenda ngu tumukunde kandi tumuheereze n’omutima gwaitu gwona. (Mat. 22:36, 37) N’ahabw’ekyo, Sitaane naateeraho kubaganisamu omutima gwaitu arikutureetera kukunda ebintu eby’ensi egi, ebi Yehova arikwanga. (Yak. 4:4; 1 Yoh. 2:15, 16) Kandi akakoryo aka kaaba katakozire, naija kuteeraho kutugyemesereza kuhenda emitindo ya Yehova.

7. Nitujwara tuta eky’okwekingiza omu kifuba eky’okuhikiirira?

⁷ Nitujwara eky’okwekingiza omu kifuba eky’okuhikiirira turikwega emitindo ya Yehova erikukwata aha kihikire n’ekigwire kandi tukagigyenderaho. (Zab. 97:10) Abamwe nibateekateeka ngu emitindo ya Yehova n’amaremesa. Kwonka twarekyera aho kugyendera aha misingye ya Baibuli, nitwija kuba nk’omuserukare orikujuura eky’okwekingiza omu kifuba ari omu kurwana ahabw’okugira ngu nikiremeera munonga. Ekyo ka nikiba kiri eky’obushema! Abarikukunda Yehova, ebiragiro bye ‘tibirikubarusya,’ kureka nibikiza amagara.​—1 Yoh. 5:3.

8. Nikimanyisa ki okujwara enkaito ez’okweteekateeka kubuurira amakuru marungi g’obusingye?

⁸ Kandi Paulo naatuhiga n’okujwara enkaito ez’okweteekateeka kubuurira amakuru marungi g’obusingye. Ekirikumanyisa, butoosha twine kuba tweteekateekire kubuurira amakuru marungi g’Obukama. Twagambira abandi obutumwa bwa Baibuli, okwikiririza kwaitu nikuhama. Buzima nikishemeza kureeba oku abaheereza ba Yehova barikusherura oburyo bw’okubuurira abandi amakuru amarungi, aha murimo, omu myanya y’obushuubuzi, enju aha nju, baaba nibagura ebintu, baaba bataayaayiire abanyabuzaare abatari mu mazima, baaba nibagaaniira n’abu barikumanyana nabo, nangwa n’obu baakuba batarikubaasa kuruga omuka. Twatiina tukarekyera aho kubuurira, nituba nk’omuserukare  orikujura enkaito ze omu kurwana. Ebigyere bye nibibaasa kuhutaara. N’ekirikurugamu, nikiba kyorobi kumurwanisa, kandi tikirikumworobera kukuratira ebi omuduumizi we arikumugambira kukora.

9. Ahabw’enki twine kukwata engabo yaitu mpango ey’okwikiriza?

⁹ Engabo mpango ey’okwikiriza neejwekyera okwikiriza oku twine omuri Yehova. Twine obwesigye ngu naija kuhikiiriza byona ebi arikuraganisa. Okwikiriza okwo nikwija kutuhwera “kuraaza emyambi y’omuriro yoona ey’omubi.” Ahabw’enki twine kukwata engabo mpango egi? Ahakuba neeturinda kutabeihwabeihwa enyegyesa z’abeehagwire aha mazima nari kutatiina abahakanisa baatwomeserezaho ebishuba. Twaba tutaine kwikiriza, titurikwija kugira amaani g’okwangira abarikuteeraho kutushendashenda kwehuzya emitindo ya Yehova. Ekindi, buri murundi obu turikuhamira aha kihikire yaaba turi aha murimo nari aha ishomero, nituba tukwaitse engabo yaitu. (1 Pet. 3:15) Ku turikwanga omurimo gw’esente nyingi ogurikutaahataaha omu entebeekanisa yaitu y’okuramya, nabwo nitworeka ngu tukwaitse engabo yaitu. (Heb. 13:5, 6) Kandi buri kuheereza Yehova n’obu twakuba nituhiiganisibwa, nikyoreka  ngu engabo yaitu eturinzire.​—1 Tes. 2:2.

10. Enkofiira y’okujunwa niki, kandi ahabw’enki twine kugijwara?

¹⁰ Enkofiira y’okujunwa n’amatsiko agu Yehova arikutuha, arikutuhamiza ngu naija kutujuna okufa, kandi ngu naija kushumbuusha boona abarikukora ebi arikukunda. (1 Tes. 5:8; 1 Tim. 4:10; Tit. 1:1, 2) Nk’oku enkofiira erikurinda omutwe gw’omuserukare, n’amatsiko g’okujunwa nigarinda emiteekateekyere yaitu. Mu muringo ki? Amatsiko nigatuhwera kuguma tutaire omutima aha bi Ruhanga arikuraganisa n’okutarengwa obujune ahabw’oburemeezi. Nitujwara tuta enkofiira egi? Nitugijwara turikuguma twine emiteekateekyere nk’eya Ruhanga. Nk’eky’okureeberaho, nituta amatsiko gaitu omuri Ruhanga, beitu butari obugaiga obutarikwesigwa.​—Zab. 26:2; 104:34; 1 Tim. 6:17.

11. Rurara y’omwoyo niki, kandi ahabw’enki twine kugikoresa?

¹¹ Rurara y’omwoyo n’Ekigambo kya Ruhanga, Baibuli. Rurara egi eine amaani g’okusheeshuura ebishuba ebya buri muringo, n’okucungura abantu kuruga omu buhuuku bw’enyegyesa z’ebishuba n’emize mibi. (2 Kor. 10:4, 5; 2 Tim. 3:16, 17; Heb. 4:12) Nitwega kukoresa gye rurara egi kurabira omu kweyegyesa Baibuli n’omu kutendekwa okuri omu kibiina kya Ruhanga. (2 Tim. 2:15) Oyihireho ekijwaro ky’eby’okwerindisa, Yehova naatuha oburinzi obw’omuringo ogundi. Ni buuha?

12. Yehova atuhaire ki ekindi, kandi ahabw’enki?

¹² Omuserukare murungi naamanya ngu tarikubaasa kurwanisa eihe rihango akarisingura wenka, abaserukare bagyenzi be nibaba baine kumuhwera. Naitwe, titurikubaasa kurwanisa Sitaane n’abarikumushagika tukabasigura twenka, ab’eishe-emwe bagyenzi baitu baine kutuhwera. Yehova atuhaire oruganda ‘ry’eishe-emwe’ omu nsi yoona kutuhwera.​—1 Pet. 2:17.

13. Kurugiirira aha Abaheburaayo 10:24, 25, nitugasirwa tuta twaza omu nteerane?

¹³ Omuringo gumwe ogu turikutungamu obuhwezi n’okuza omu nteerane zaitu. (Shoma Abaheburaayo 10:24, 25.) Twaba tushobeirwe, ekirikubaasa kuhika ahari buri omwe ahariitwe, nitubaasa kugarukwa omutima omunda twaza omu nteerane. Eby’okugarukamu by’ab’eishe-emwe na banyaanyazi-itwe nibitugumya. Embazo ezirikwegamira ahari Baibuli n’eby’okureeberaho ebirikuheebwa nibituhwera kumariirira kugumizamu nituheereza Yehova. Kandi ebigaaniiro ebirikwombeka ebi turikwejumbamu enteerane zitakatandikire na zahwa nibitugumya. (1 Tes. 5:14) Okwongyera ahari ekyo, enteerane nizitubaasisa kugira okushemererwa okurikuruga omu kuhwera abandi. (Byak. 20:35; Rom. 1:11, 12) Enteerane zaitu nizituhwera omu miringo mingi endiijo. Nizituhwera kwongyera kuboneza obukoryo bwaitu, turikwetebeekanisiza obuheereza. Nk’eky’okureeberaho, nitwega kukoresa gye eby’Okukoresa omu Kwegyesa. N’ahabw’ekyo yetebeekanisize gye enteerane z’ekibiina. Oruteerane rwaba nirugyenda omu maisho, hurikiza gye. Bwanyima y’oruteerane, ta omu nkora okutendekwa oku waatunga. Waakora ebintu ebi, noija kuba ‘omuserukare murungi owa Kristo Yesu.’​—2 Tim. 2:3.

14. Twine buhwezi ki obundi?

¹⁴ Kandi twine baamaraika nyamwingi abarikutuhwera. Teekateeka aha ki maraika omwe arikubaasa kukora! (Isa. 37:36) Hati teekateeka aha ki eihe rihango rya baamaraika ririkubaasa kuhikiiriza. Tihaine muntu nari daimoni orikubaasa kusingura eihe rya Yehova.  Nikigambwa ngu omuheereza wa Ruhanga omwesigwa yaaba aine Yehova naaba ari ow’amaani munonga. (Bar. 6:16) Eki buzima ka kihikire! Guma nooteekateeka aha nshonga egi omukozi mugyenzi waawe yaakutiinatiinisa, ou orikushoma nawe, nari omunyabuzaare otarikuheereza Yehova. Ijuka ngu tori wenka omu kurwana oku. Nooba nookuratira obuhabuzi bwa Yehova.

15. Kurugiirira ahari Isaaya 54:15, 17, ahabw’enki hataine orikubaasa kuhunamisa abaheereza ba Ruhanga?

¹⁵ Hariho enshonga nyingi ahabw’enki ensi ya Sitaane neetwanga. Titurikwejwanzya omu by’obutegyeki kandi titurikukwata ebirwaniso. Nitugambira abantu eiziina rya Ruhanga, turangirira Obukama bwe ngu nibwo bwonka oburaareeteho obusingye, kandi bukatunguura emitindo ye ehikiriire. Nitusheeshuura omutegyeki w’ensi egi ngu n’omwinazi, omubeihi, kandi omwitsi. (Yoh. 8:44) Kandi nitubuurira ngu ensi y’abantu abarikutegyekwa Sitaane n’obu haakubaho ki neija kucwekyerera. Kwonka itwe, Sitaane n’abarikumushagika tibarikubaasa kutuhunamisa. Kureka, nitwija kugumizamu nituhimbisa Yehova, omu muringo gwona ogurikubaasika! N’obu Sitaane araabe ari ow’amaani, tabaasize kuremesa amakuru marungi g’Obukama kujanjaara kuhika aha bantu omu nsi yoona. Ekyo kibaasize kubaho ahabw’oburinzi bwa Yehova.​—Shoma Isaaya 54:15, 17.

16. Yehova naija kucungura ata abantu be omu kubonabona kwingi?

¹⁶ Niki ekiri haihi kubaho? Omu kubonabona kwingi, Yehova naija kuturinda omu miringo ebiri ey’omutaano. Ogw’okubanza, naija kutucungura ku araareetere abagabe b’ensi kucwekyereza Babulooni orurembo Orukuru, nizo ediini z’ebishuba zoona. (Kush. 17:16-18; 18:2, 4) Bwanyima, naija kucungura abaheereza be yaaba naacwekyereza abaraabe batsigaireho omu nsi ya Sitaane ahari Haramagedoni.​—Kush. 7:9, 10; 16:14, 16.

17. Nitugasirwa tuta twaguma haihi na Yehova?

¹⁷ Twaguma haihi na Yehova, Sitaane tarikubaasa kutuhitsyaho akabi k’obutwire. Nangwa, Sitaane niwe arikwija kuhikwaho akabi k’obutwire. (Rom. 16:20) N’ahabw’ekyo jwara ekijwaro ky’eby’okwerindisa byona, kandi ogume okijwaire! Otateeraho kwejumba omu kurwana oku ahabwawe wenka. Baangira ab’eishe-emwe na banyaanyazi-itwe. Kandi kuratira obuhabuzi bwa Yehova. Waakora otyo, noobaasa kugira obuhame ngu Sho ow’omu iguru naija kukugumya kandi akurinde.​—Isa. 41:10.