1. Okaba oine mitwarize ki otakatandikire kwega Baibuli?

 OKABA oine mitwarize ki, Abajurizi ba Yehova batakatandikire kukwegyesa Baibuli? Baingi ahariitwe nituba tutarikwenda n’okukiteekateekaho. Obundi tukaba nitutwaza nk’abantu b’ensi egi, turikugyendera aha mitindo yaayo erikukwata aha kihikire n’ekigwire. Buzima, tukaba ‘tutaine matsiko, kandi turi omu nsi tutaine Ruhanga.’ (Efe. 2:12) Kwonka ku twayegire Baibuli, twahindukira kimwe!

2. Okajumbura bintu ki ku waatandikire kwega Baibuli?

² Ku waabaire nooyega Baibuli, okamanya ngu oine Sho ow’omu iguru orikukukunda munonga. Okeetegyereza ngu waaba nooyenda kushemeza Yehova kandi okaba omwe aha b’omu ka ye abarikumuramya, oine kuhindura emitwarize yaawe, endeebeka yaawe, n’emiteekateekyere yaawe. Okaba oine kwega kugyendera aha mitindo ye y’ahaiguru.—Efe. 5:3-5.

3. Kurugiirira aha Abakolosai 3:9, 10, Yehova naayenda ngu tukore ki, kandi nituza kwega ki omu kicweka eki?

³ Yehova Omuhangi waitu kandi Tataitwe ow’omu iguru, aine obushoboorozi bw’okucwamu oku ab’eka ye baine kutwaza. Kandi naayenda ngu tutakabatiziibwe, tuteereho ‘kujuura omuntu owa ira n’emitwarize ye.’ * (Shoma Abakolosai 3:9, 10.) Ekicweka eki nikiza kuhwera abarikwenda kubatizibwa kugarukamu ebibuuzo bishatu ebi: (1) “Omuntu owa ira” niki? (2) Ahabw’enki Yehova naatuhiga kumujuura? (3) Nitubaasa kumujuura tuta? Ku oraabe obatiziibwe, ekicweka eki nikiza kukuhwera kutagaruka kugira emitwarize yaawe eya ira.

4. Nooba nootwaza ota waaba okiine “omuntu owa ira”?

⁴ Orikuba aine “omuntu owa ira” okutwarira hamwe naaba aine emiteekateekyere n’emitwarize y’omubiri. Naabaasa kuba naayeyendeza, arikurahuka kugira ekiniga, ari entasiima, kandi arikwetunguura. Naabaasa kuba naakunda kureeba ebirikwitsa enshoni, ebihagaro by’obushambani, nari eby’obushaarizi. Naaba aine emitwarize mirungi emwe, kandi naabaasa kweshinja ahabw’ebintu bibi ebi arikugamba nari ebi arikukora. Kwonka naaba ataine kihika ky’okuhindura emiteekateekyere ye n’emitwarize ye.—Gal. 5:19-21; 2 Tim. 3:2-5.

5. Tushemereire kugira miteekateekyere ki eringaniire kyahika aha kujuura omuntu owa ira? (Ebyakozirwe 3:19)

⁵ Ahabw’okugira ngu twena tituhikiriire, titurikubaasa kwiha omu biteekateeko byaitu n’omu mutima gwaitu ebyetengo byona ebibi. Obumwe, nitubaasa kukora nari kugamba ekintu bwanyima twefuuze. (Yer. 17:9; Yak. 3:2) Kwonka twajuura omuntu owa ira, nituba tutakitegyekwa emiteekateekyere n’ebyetengo by’omubiri. Nituba tutakimanywa ahabw’emitwarize ya ira.—Isa. 55:7; shoma Ebyakozirwe 3:19.

6. Ahabw’enki Yehova naatuhiga kwetantara emiteekateekyere n’emize mibi eya ira?

⁶ Yehova naatuhiga kwetantara emiteekateekyere n’emize mibi ahabw’okugira ngu naatukunda munonga, kandi naayenda ngu twesiimire amagara. (Isa. 48:17, 18) Naamanya ngu abarikwikiriza kusingurwa ebyetengo bibi nibereetera obusaasi n’abagyenzi baabo. Naagira enaku yaareeba nitwereetera obusaasi n’abandi.

7. Kurugiirira aha Abarooma 12:1, 2, twine obugabe bw’okukora ki?

⁷ Abanywani n’abanyabuzaare abamwe omu kubanza nibabaasa kutujuma baareeba nituteeraho kuhindura emitwarize yaitu. (1 Pet. 4:3, 4) Nibabaasa kutugira ngu twine obugabe bw’okukora kyona eki turikwenda, kandi ngu titwine kwikiriza abandi kutugambira eky’okukora. Kwonka abo abarikwehuzya emitindo ya Yehova buzima nibaba batarikwetegyeka. Omu mazima, nibaba nibaikiriza ensi erikutegyekwa Sitaane kubabumba. (Shoma Abarooma 12:1, 2.) Twena nituba twine eky’okucwamu: Nitubaasa kucwamu kuguma  n’emitwarize yaitu eya ira, nk’eri omu nsi ya Sitaane, nari kwikiriza Yehova kutuhindura abantu barungi.—Isa. 64:8.

8. Niki ekiraatuhwere kwetantara emiteekateekyere etahikire n’emize mibi?

⁸ Yehova naamanya ngu nikitwara obwire n’amaani kusingura emiteekateekyere egwire n’emize mibi. (Zab. 103:13, 14) Kwonka, naakoresa Ekigambo kye, omwoyo gurikwera, n’ekibiina kye, kutuha obwengye, amaani, n’obushagiki kubaasa kuhindura emitwarize yaitu. Buzima yaaherize kukuhwera. Hati ka tureebe ebi orikubaasa kukora kwongyera kujuura emitwarize eya ira, reero okaba ohikire kubatizibwa.

9. Ekigambo kya Ruhanga nikibaasa kukuhwera kukora ki?

⁹ Koresa Baibuli kweshwijuma gye. Ekigambo kya Ruhanga nikikora nk’endeeberwamu kukuhwera kumanya emiteekateekyere yaawe, emigambire yaawe, n’ebikorwa byawe. (Yak. 1:22-25) Orikukwegyesa Baibuli n’abandi Bakristaayo abakuzire omu by’omwoyo nibabaasa kukuha obuhabuzi. Nk’eky’okureeberaho, nibabaasa kukoresa Ebyahandiikirwe ebiraakuhwere kumanya okubaasa kwawe n’obweremwa bwawe. Nibabaasa kukwegyesa kusherura obuhabuzi oburikwegamira ahari Baibuli oburaakuhwere kusingura emize mibi. Kandi Yehova naaba ayeteekateekire kukuhwera obwire bwona. Naamanya omuringo murungi gw’okukuhwera, ahakuba naayetegyereza ekiri omu mutima gwawe. (Enf. 14:10; 15:11) N’ahabw’ekyo taho entebeekanisa y’okuguma noomushaba, kandi nooyega Ekigambo kye buri izooba.

10. Waayegyera ki ahari Elie?

¹⁰ Yesigye emitindo ya Yehova ngu niyo erikukirayo oburungi. Nitubaasa kugasirwa omuri buri kimwe eki Yehova arikutushaba kukora. Abarikugyendera aha mitindo ye nibagira ekitiinisa, ekigyendererwa, n’okushemererwa okwabuzima. (Zab. 19:7-11) Kwonka, abarikwehuzya emitindo ye nibabonabona ahabw’ebirikuruga omu bikorwa by’omubiri. Yetegyereze eki omushaija orikwetwa Elie arikugamba aha kwehuzya emitindo ya Ruhanga. Akoororwa abazaire abarikukunda Yehova. Kwonka omu bushogoyo bwe, akacwamu kukwatanisa n’emikago mibi. Akakoresa emibazi y’ekitokooza bwongo, yaashambana, kandi akaba naiba. Elie naagira ngu eki kikamureetera kwongyera kugira ekiniga n’okuba enshaarizi. “Okutwarira hamwe, nkakora buri kimwe eki naabaire nyegyesiibwe ngu Abakristaayo tibaine kukora” nikwo arikugira. Kwonka, ebi Elie yaayegire akiri muto tibiramwebiire kimwe. Empereruka, akagaruka yaatandika kwega Baibuli. Akakora n’amaani kucwa emize mibi, kandi yaabatizibwa omu 2000. Agasiirwe ata ahabw’okugyendera aha mitindo ya Yehova? Naagira ati: “Hati nyine obusingye bw’omu biteekateeko n’omutima ogutarikweshinja.” * Eky’okureeberaho eki nikyoreka ngu, abarikwanga kugyendera aha mitindo ya Yehova nibereetera obusaasi. Kwonka nabwo, Yehova naaba ayeteekateekire kubahwera kuhinduka.

11. Ni bintu ki ebi Yehova arikwanga?

¹¹ Yanga ebi Yehova arikwanga. (Zab. 97:10) Baibuli neeyoreka ngu Yehova naayanga ‘amaisho g’amaryo, orurimi orurikubeiha, n’emikono erikusheesha eshagama y’abataine rubanja.’ (Enf. 6:16, 17) Kandi ‘naayangira kimwe [omushaarizi] n’engobya.’ (Zab. 5:6)  Yehova naayangira kimwe emiteekateekyere egi n’ebikorwa ebyo, ahakuba akacwekyereza abantu babi omu bwire bwa Noa ahabw’okwijuza ensi obushaarizi. (Kut. 6:13) Teekateeka aha ky’okureeberaho ekindi. Yehova arikukoresa nabi Malaki, akagira ngu naayanga abarikugaitururwa n’abakundwa baabo omu muringo gw’oburyarya. Ruhanga tarikusiima okuramya kwabo, kandi naija kubajunaana ahabw’ebikorwa byabo.—Mal. 2:13-16; Heb. 13:4.

12. Nikimanyisa ki ‘okwangira kimwe ekibi’?

¹² Yehova naayenda ngu ‘twangire kimwe ekibi.’ (Rom. 12:9) Ebigambo ‘okwangira kimwe’ nibimanyisa enyehurira y’amaani, erikureetera omuntu kureeba ekintu nk’ekirikunugwa. Teekateeka oku okurikubaasa kwehurira baakugira ngu orye eby’okurya bijunzire. Okukiteekateeka kyonka nikibaasa kukureetera kusheshemuka. Nikyo kimwe, naitwe twine kugira enyehurira nk’egyo twateekateeka aha kukora ekintu eki Yehova arikwanga.

13. Ahabw’enki twine kurinda emiteekateekyere yaitu?

¹³ Rinda emiteekateekyere yaawe. Ebiteekateeko byaitu biine akakwate n’ebi turikukora. Niyo nshonga ahabw’enki Yesu yaatwegyeise kwangira ebiteekateeko ebirikubaasa kutureetera kukora ekibi ky’amaani. (Mat. 5:21, 22, 28, 29) Nitwenda kushemeza Tataitwe omu iguru, tikwo? Ka ni kikuru, ngu twangire buri kiteekateeko kyona ekibi ahonaaho kitakagiire omu bwongo bwaitu!

14. Emigambire yaitu neeyoreka ki, kandi twine kugarukamu bibuuzo ki?

¹⁴ Rinda emigambire yaawe. Yesu akagira ati: ‘Ebirikuruga omu kanwa nibiba nibiruga omu mutima.’ (Mat. 15:18) Eego, emigambire yaitu neeyoreka ekirikuba kiri omu mutima. N’ahabw’ekyo yebuuze ebibuuzo ebi: ‘Niinyanga kubeiha, n’obu okugamba amazima kyakuba nikiija kundugiramu oburemeezi? Obu ndi omu bushwere, ninyegyendesereza kuteeshunga n’abu ntarikushushanisa nabo obuhangwa? Niinyetantara ebigambo by’obuhwanshoni? Ningarukamu nyikaikaine haagira owaangwisa kubi?’ Noija kugasirwa waateekateeka aha bibuuzo ebyo. Emigambire yaawe neebaasa kugyeragyeranisibwa n’ehuuzi z’omwenda. Waateeraho kwetantara okujumiirana, okubeiha n’emigambire y’obuhwanshoni, nikiija kukworobera kujuura emitwarize yaawe eya ira.

15. Nikimanyisa ki okuhanika omuntu waitu owa ira aha muti?

 ¹⁵ Ba oyeteekateekire kugira eki waakora. Entumwa Paulo akakoresa ebigambo by’amaani eby’amashushane kworeka obukuru bw’okuhindura emitwarize yaitu. Akahandiika ngu twine kuhanika “omuntu waitu owa ira” aha muti. (Rom. 6:6) Ekirikumanyisa ngu twine kukuratira eky’okureeberaho kya Kristo. Twine kwetantarira kimwe emiteekateekyere n’ebikorwa ebi Yehova arikwanga. Twakora tutyo, nibwo turikugira omuntu w’omunda otarikutushinja, n’amatsiko g’amagara agatahwaho. (Yoh. 17:3; 1 Pet. 3:21) Ijuka ngu Yehova tarikwija kuhindura emitindo ye kuhikaana n’ebi turikwenda. Kureka, naitwe twine kuhinduka kuhikaana n’emitindo ye.—Isa. 1:16-18; 55:9.

16. Ahabw’enki oine kumariirira kugumizamu noorwanisa obweremwa bw’omubiri?

¹⁶ Gumizamu noorwanisa okwetenga kubi. Nangwa na bwanyima y’okubatizibwa, nooba oine kugumizamu noorwanisa ebyetengo by’omubiri. Teekateeka aha ky’okureeberaho ky’omushaija orikwetwa Maurício. Obu yaabaire akiri omuto, akatandika kwejumba omu bikorwa by’obutingwa. Akarugaho yaabona Abajurizi ba Yehova baatandika kumwegyesa Baibuli. Bwanyima y’okuhindura emitwarize ye, akabatizibwa omu 2002. N’obu Maurício araabe amazire emyaka mingi arikuheereza Yehova, naagira ati: “Amazima gari ngu obumwe nimba nyine kurwanisa ebyetengo bitahikire.” Kwonka tarikwikiriza eki kumureetera kwehurira kubi. Kureka, naagira ati: “Nikimpuumuriza kumanya ngu naayangira ebyetengo ebyo, ninshemeza Yehova.” *

17. Waayegyera ki aha ky’okureeberaho kya Nabiha?

¹⁷ Yesigye obuhwezi bwa Yehova, n’omwoyo gurikwera beitu gatari maani gaawe. (Gal. 5:22; Fil. 4:6) Twine kugira okumariirira twaba nitwenda kweihiraho kimwe emitwarize ya ira. Teekateeka aha ky’okureeberaho ky’omukazi orikwetwa Nabiha. Ishe akamutsigaho obu yaabaire aine emyaka mukaaga. “Ekyo kikandeetera obusaasi bwingi,” nikwo arikugira. Nabiha ku yaagumire naakura, akoongyera kugira ekiniga n’amaryo. Akatandika kwejumba omu kuguza emibazi y’ekitokooza bwongo, akakwatwa yaateebwa omu kihome, kandi yaamarayo emyaka. Abajurizi ba Yehova  abaabaire nibabuurira omu kihome bakatandika kumwegyesa Baibuli. Nabiha akatandika kukora empinduka z’amaani. “Emize yangye emwe ekaba eyorobi kugicwa,” nikwo arikugira. “Kwonka kikangumira munonga kucwa okureetsa.” Nabiha akarwanisa omuze ogu kumara obwire oburengire omwaka, kwonka akarugaho yaasingura. Ekyo akakikora ata? Naagira ata: “Ekikuru munonga, okuguma ninshaba Yehova kikampwera kusingura.” Hati naagambira abandi ati: “Nyine obwesigye ngu ku ndaabe naabaasize kuhindura emitwarize yangye nkashemeza Yehova, buri omwe naabaasa!” *

18. Kurugiirira aha 1 Abakorinso 6:9-11, baingi aha baheereza ba Ruhanga baabaasize kukora ki?

¹⁸ Omu kyasha ky’okubanza, bamwe aha bashaija n’abakazi abu Yehova yaatooraine kutegyeka na Kristo, omu kubanza bakaba baine emize mibi. Nk’eky’okureeberaho, bakaba bari enshambani, ebitingwa, kandi abashuma. Kwonka ahabw’okuhwerwa omwoyo gurikwera, bakabaasa kuhindura emitwarize yaabo. (Shoma 1 Abakorinso 6:9-11.) N’obunaku obu, Baibuli ehwereire obukaikuru bw’abantu kuhindura emitwarize yaabo. * Babaasize kusingura emize mibi egumire eicwa. Eby’okureeberaho byabo nibyoreka ngu naiwe noobaasa kuhindura emitwarize yaawe, kandi osingure emize mibi kubaasa kuba ohikire kubatizibwa.

19. Ekicweka ekirikukurataho nikiza kugamba ahari ki?

¹⁹ Oyihireho okujuura omuntu owa ira, abarikwenda kubatizibwa baine kuteeraho kujwara omuntu musya. Ekicweka ekirikukurataho nikiza kugamba oku orikubaasa kukikora, n’oku abandi barikubaasa kukuhwera.