Abarikushoma ekyahandiikirwe ki barikurahukiiriza nibeebuuza ekibuuzo ekyo. Kwonka emishororongo egi neegamba ahari Baamefiboshesi babiri batarikushushana, kandi nitubaasa kugira eki twayega twashwijuma ekyabaireho.

Omugabe Saulo owa Israeli akaba aine abatabani mushanju n’abahara babiri. Mutabani wa Saulo omujigaijo akaba ari Yonasaani. Bwanyima akazaara omutabani ondiijo orikwetwa Mefiboshesi, arikumuzaara omuri Rizipa ekinyanshunju kye. Ekirikushemeza, na Yonasaani akaba aine omutabani orikwetwa Mefiboshesi. N’ahabw’ekyo Omugabe Saulo akaba aine omutabani orikwetwa Mefiboshesi n’omwijukuru oine eiziina niryo rimwe.

Bwanyima, Omugabe Saulo akeehindukana Abagibeoni abaabaire nibatuura omu Baisraeli yaayenda kubacwekyereza kubamaraho boona. Kandi baingi bakaitwa, ekintu ekyabaire kigwereire kimwe. Ahabw’enki? Ahakuba enyima omu bunaku bwa Yoshua, abakuru b’Abaisraeli bakaba bakozire endagaano n’Abagibeoni.—Yos. 9:3-27.

Endagaano egyo ekaba neekikora n’omu bunaku bw’Omugabe Saulo. Kwonka omugabe akateeraho kuhakanisa endagaano egyo arikucwekyereza Abagibeoni. Okuteeraho okwo kukarugiramu “Saulo n’enju ye y’enyitsi y’abantu” kugiibwaho orubanja rw’okusheesha eshagama. (2 Sam. 21:1) Bwanyima, Daudi akaba omugabe. Abagibeoni abaahonokireho bakamugambira aha kwitwa kubi kwabo. Daudi akababuuza oku araabahongyerere ahabw’ekikorwa kibi kya Saulo, reero kikareetera Yehova kuha ensi egyo omugisha. Abagibeoni omu mwanya gw’okushaba esente, bakashaba ngu abaana mushanju ‘b’ogwo omushaija owaabacwekyereize’ baheebweyo kwitwa. (Kub. 35:30, 31) Kandi Daudi akaikiriza okushaba kwabo.—2 Sam. 21:2-6.

Obwo, Saulo na Yonasaani bakaba baaherize kufeera omu rutaro, kwonka Mefiboshesi mutabani wa Yonasaani akaba akihuriire. Akaba amugire ahabwa butandu ei yaatungire akiri muto, kandi akaba ateejumbire omu kutaahirira Abagibeoni okwabaire kutebeekanisiibwe ishenkuru. Daudi akaba akozire endagaano y’obunywani na Yonasaani, eyaabaire neija kugasira oruzaaro rwa Yonasaani, otwariiremu na Mefiboshesi. (1 Sam. 18:1; 20:42) Ekyahandiikirwe nikigira kiti: ‘Omugabe [Daudi] akarokora Mefiboshesi mwene Yonasaani mutabani wa Saulo, ahabw’endahiro ei Daudi na Yonasaani mwene Saulo baarahiriraine’ omu maisho ga Yehova.—2 Sam. 21:7.

Kwonka nabwo, Daudi akaikiriza okushaba kw’Abagibeoni. Akahayo batabani ba Saulo babiri, omwe aharibo owaabaire naayetwa Mefiboshesi, na baijukuru ba Saulo bataano. (2 Sam. 21:8, 9) Ekikorwa kya Daudi kikahezaho okusheesha eshagama omu nsi egyo.

Ekikorwa eki kikaba nikikira aha kuba eky’ebyafaayo. Ahakuba ekiragiro kya Ruhanga kikaba nikigira kiti: ‘Abaana batariitwa nibaturwa baishebo.’ (Bir. 24:16) Yehova akaba atarikubaasa kwikiriza ekyakozirwe ahari batabani ba Saulo babiri n’abaijukuru bataano, ku ogire ngu bakaba bataine rubanja. Ekiragiro eki nikyongyeraho kiti: “Omuntu weena aryaitwa ahabw’ekibi kye.” Nikireebeka ab’eka ya Saulo mushanju abaitsirwe, nabo bakeejumba omu kuteeraho kwa Saulo kuhezaho Abagibeoni. N’ekyarugiremu, mushanju abo bakashashurira ebibi byabo.

Enshonga egi neeyoreka ngu omuntu tarikubaasa kwetantara ebirikuruga omu kibi eki akozire arikuteekateeka ngu naakuratira eki agambiirwe kukora. Enfumu y’obwengye neegira eti: ‘Yetegyereze ahu ebigyere byawe birikuraba, obwo nibwo emihanda yaawe eraahame.’ —Enf. 4:24-27; Efe. 5:15.