1-2. Niki ekirikukira kubaho aha kubatizibwa, kandi nituza kushwijuma ki omu kicweka eki?

 ORAREEBIREHO guruupu y’abarikuza kubatizibwa? Noohurira barikugarukamu n’amaani ebibuuzo bibiri batakabatiziibwe. Nooreeba ab’eka yaabo na banywani baabo bashemereirwe. Ku barikuruga omu maizi, nibabateerera omu ngaro kandi nooreeba bashemereirwe munonga. Buri saabiiti, enkumi n’enkumi z’abantu nibahika aha idaara eryo, ku barikwehayo ahari Yehova kandi bakabatizibwa.

² Kandi shi iwe? Ku oraabe nooyenda kubatizibwa, ori ow’omutaano omu nsi egi embi, ahabw’okuba oriyo ‘noosherura’ Yehova. (Zab. 14:1, 2) Ekicweka eki nikikukwataho yaaba ori mukuru nari ori muto. Kandi naitwe abaabatiziibwe nitwenda kuhamya okumariirira kwaitu kuheereza Yehova ebiro byona. Hati ka tushwijume zimwe aha nshonga ahabw’enki nituheereza Yehova.

3. Ahabw’enki abaheereza ba Yehova nibakunda amazima n’okuhikiirira? (Zab. 119:128, 163)

³ Yehova akagambira abantu be ‘kukunda amazima.’ (Zek. 8:19) Yesu akahiga abakuratsi be kusherura okuhikiirira. (Mat. 5:6) Eki nikimanyisa ngu omuntu aine kuba naakunda kukora ekihikire, ekirungi kandi ekishemeire omu maisho ga Ruhanga. Nookunda amazima n’okuhikiirira? Nituhamya ngu nikwo kiri. Nooyanga ebishuba, n’ebikorwa bibi byona. (Shoma Zaaburi 119:128, 163.) Orikubeiha naaba naatooreza Sitaane, omutegyeki w’ensi egi. (Yoh. 8:44; 12:31) Kimwe aha bigyendererwa bya Sitaane n’okushiisha eiziina rya Yehova Ruhanga eririkwera. Kuruga obu haabaho obugomi omuri  Edeni, Sitaane atwire naagamba ebitahikire ahari Ruhanga. Akareetera Yehova kureebeka nk’omutegyeki orikweyendeza, kandi omubeihi orikwima abantu ebirungi. (Kut. 3:1, 4, 5) Ebishuba ebi Sitaane arikugamba ahari Yehova nibigumizamu kushiisha emiteekateekyere n’emitima y’abantu. Abantu ku barikucwamu kwanga ‘kukunda amazima,’ Sitaane naabaasa kubareetera kukora ebitashemeire.​—Rom. 1:25-31.

4. Yehova ayorekire ata ngu ni Ruhanga ow’amazima? (Reeba n’ekishushani.)

⁴ Yehova ni Ruhanga ow’amazima, kandi orikwegyesa amazima abarikumukunda. (Zab. 31:5) Ekyo naakikora arikubahwera kuruga omu bishuba bya Sitaane. Kandi Yehova naayegyesa abaheereza be kukora ebihikire n’okuba ab’amazima. Ekyo nikibahwera kugira ekitiinisa n’obusingye bw’omu mutima. (Enf. 13:5, 6) Kwiha obu waatandika kwega Baibuli waareebire ekyo nikibaho? Oyegire ngu emihanda ya Yehova niyo erikukirayo oburungi ahabw’abantu boona. (Zab. 77:13) N’ahabw’ekyo nooyenda kukora eby’okuhikiirira bya Ruhanga. (Mat. 6:33) Nooyenda kujurira amazima n’okworeka ngu ebi Sitaane yaagambire ahari Ruhanga waitu, Yehova n’ebishuba. Ekyo noobaasa kukikora ota?

5. Noobaasa kushagika ota amazima n’okuhikiirira?

⁵ Noobaasa kucwamu kutwaza omu muringo ogurikworeka ngu noogira oti: “Niinyanga ebishuba bya Sitaane, kandi ngu ninkunda amazima. Niinyenda ngu Yehova abe omutegyeki wangye, kandi nkore ebi arikugira ngu bihikire.” Ekyo noobaasa kukikora ota? Shaba Yehova kandi oyeheyo ahariwe orikuraganisa kumuheereza, reero oyoreka butunu ngu oyehaireyo orikubatizibwa. Rukundo ei twiniire amazima n’ekihikire niyo erikutuhiga kucwamu kubatizibwa.

6. Ni nshonga ki eziri omuri Zaaburi 45:4 ezirikutureetera kukunda Yesu Kristo?

⁶ Ahabw’enki nookunda Yesu Kristo? Yetegyereze enshonga ezimwe omuri Zaaburi 45:4. (Kishome.) Yesu naakunda amazima, obucureezi, n’okuhikiirira. Waaba nookunda amazima n’okuhikiirira, buzima nooba nookunda Yesu Kristo. Teekateeka oku Yesu yaashagikire amazima n’okuhikiirira. (Yoh. 18:37) Yesu naatwegyesa ata kuba abacureezi?

7. Niki ekirikukushemeza aha bucureezi bwa Yesu?

 ⁷ Yesu naatwegyesa kuba abacureezi omuri byona ebi arikukora. Nk’eky’okureeberaho, naahimbisisa Ishe omu mwanya gw’okwehimbisa. (Mak. 10:17, 18; Yoh. 5:19) Obucureezi nk’obwo nibukureetera kwehurira ota? Buzima nibukuhiga kukunda Omwana wa Ruhanga n’okumukuratira. Ahabw’enki Yesu n’omucureezi? N’ahabw’okugira ngu naakunda Ishe ori omucureezi kandi amutooreza. (Zab. 18:35; Heb. 1:3) Mbwenu shi torikwenda kwirira haihi Yesu, ahabw’okugira ngu naatooreza emitwarize ya Yehova omu muringo oguhikire?

8. Ahabw’enki nitukunda Yesu Omugabe waitu?

⁸ Nitukunda Yesu Omugabe waitu ahakuba niwe Mutegyeki orikukirayo oburungi. Yehova niwe yaatendekire Omwana we kandi akamutoorana kuba omutegyeki. (Isa. 50:4, 5) Teekateeka n’ahari rukundo ey’okwefeerereza ei Yesu yaatworekire. (Yoh. 13:1) Ahabw’okugira ngu Yesu n’Omugabe waawe, oshemereire kumukunda. Akagira ngu abanywani be n’abo abarikumukunda kandi bakooreka ngu nibamukunda barikworobera ebiragiro bye. (Yoh. 14:15; 15:14, 15) Ka n’omugisha gw’omuhendo kuba munywani w’Omwana wa Yehova!

9. Okubatizibwa kw’Abakristaayo nikushushana kuta n’okwa Kristo?

⁹ Kimwe aha bi Yesu arikugambira abakuratsi be kukora n’okubatizibwa. (Mat. 28:19, 20) Akatuteeraho eky’okureeberaho. Okubatizibwa kwa Yesu nikutaana aha kw’abakuratsi be omu miringo etari emwe. (Reeba akabokusi “ Ni Ntaaniso ki eri aha Gati y’Okubatizibwa kwa Yesu n’okw’Abakuratsi Be.”) Kwonka aha rubaju orundi, nikushushana. Yesu ku yaabatiziibwe, akooreka ngu ayehaireyo kukora ebi Ishe arikukunda. (Heb. 10:7) Abakuratsi ba Kristo nibabatizibwa kworeka abandi ngu beehaireyo ahari Yehova Ruhanga. Kandi nka Yesu, nibaba bataire omutima aha kukora ebi Ruhanga arikukunda, beitu bitari byabo. Omu muringo ogwo, nibaba nibakuratira eky’okureeberaho kya Mukama waabo.

10. Ni nshonga ki ezirikukureetera kukunda Yesu, kandi rukundo egyo eine kukuhiga kukora ki?

¹⁰ Noikiriza Yesu nk’Omwana wa Yehova omwe nyamunegyere kandi nk’Omugabe ou yaatooraine kututegyeka. Nooreeba Yesu nk’orikutooreza gye obucureezi bwa Ishe. Oyegire ngu akaha eby’okurya abaabaire baine enjara, yaahuumuriza abataine maani, nangwa yaakiza abarwaire. (Mat. 14:14-21) Oreebire oku arikwebembera ekibiina Ekikristaayo obunaku obu. (Mat. 23:10) Kandi noomanya ngu naija kukora bingi omu biro by’omumaisho nk’Omugabe w’Obukama bwa Ruhanga. Mbwenu shi noobaasa kworeka ota ngu noomukunda? Orikukuratira eky’okureeberaho kye. (Yoh. 14:21) Noobaasa kutandika orikwehayo ahari Yehova kandi okabatizibwa.

11. Ni nshonga ki enkuru erikukureetera kubatizibwa, kandi ahabw’enki kiri kityo?

¹¹ Ni nshonga ki enkuru erikukureetera kubatizibwa? Yesu akooreka ekiragiro kya Ruhanga ekirikukirayo obukuru obu yaagira ati: “Okunde [Yehova] Ruhanga waawe n’omutima gwawe gwona, n’amagara gaawe goona, n’obwengye bwawe bwona, kandi n’amaani gaawe goona.” (Mak. 12:30) Mbwenu shi ebigambo ebyo nibishoboorora rukundo ei oiniire Ruhanga?

12. Ahabw’enki nookunda Yehova? (Reeba n’ekishushani.)

¹² Hariho enshonga nyingi ezirikutureetera  kukunda Yehova. Nk’eky’okureeberaho, obaasize kumanya ngu niwe “enshuro y’amagara” n’obukomooko “bw’engabirano yoona enungi n’ekiconco kyona ekihikire.” (Zab. 36:9; Yak. 1:17) Buri kintu kyona ekirungi eki orikwesiimiramu nikiruga ahari Ruhanga waitu efura kandi owa rukundo.

13. Ahabw’enki ekitambo n’ekiconco ky’omuhendo?

¹³ Ekitambo nikyo kiconco ekirikukirayo eki Yehova atuhaire. Ahabw’enki nitugira tutyo? Teekateeka aha mukago gw’akaramata ogu Yehova aine n’Omwana we. Yesu akagira ati: ‘Tata naankunda’ kandi naanye ‘nimukunda.’ (Yoh. 10:17; 14:31) Omukago gwabo gukongyera kuhama ahabw’okumara emyaka mingi bari hamwe. (Enf. 8:22, 23, 30) Teekateeka aha busaasi obu Yehova yaagizire obu yaikiriza omwana we kubonabonesibwa kandi akaitwa. Ahabw’okugira ngu Yehova naakunda munonga abantu otwariiremu naiwe, akahayo Omwana we omukundwa nk’ekitambo kubaasisa iwe n’abandi kutuuraho ebiro byona. (Yoh. 3:16; Gal. 2:20) Egi niyo nshonga nkuru erikutureetera kukunda Ruhanga.

14. Ni kigyendererwa ki ekirikukirayo oburungi eki orikubaasa kugira?

¹⁴ Rukundo ei oiniire Yehova eyongyeire kukura ahabw’okugira ngu oyegire bingi ebirikumukwataho. Buzima nooyenda kwongyera kumwirira haihi hati n’ebiro byona. Kandi  ekyo nikibaasika. Naakuhiga kureetera omutima gwe kushemererwa. (Enf. 23:15, 16) Ekyo noobaasa kukikora ti mu bigambo kyonka kureka n’omu bikorwa. Oku orikutwaza nikwija kworeka ngu buzima nookunda Yehova. (1 Yoh. 5:3) Ekyo nikyo kigyendererwa ekirikukirayo oburungi eki orikubaasa kugira.

15. Noobaasa kworeka ota rukundo ei oiniire Yehova?

¹⁵ Noobaasa kworeka ota ngu nookunda Yehova? Eky’okubanza, nooshaba omu mubonano orikwehayo ahari Ruhanga omwe ow’amazima. (Zab. 40:8) Reero, nooyoreka muranga ngu oyehaireyo orikubatizibwa. Nk’oku twaba twareebire aha kutandika kw’ekicweka eki, obu nibuba buri obwire bw’okushemererwa kandi obw’omutaano ahariiwe. Hati nooba otakiriho ahabwawe, kureka ahabwa Yehova. (Rom. 14:8; 1 Pet. 4:1, 2) Okwo nikureebeka nk’okucwamu kugumire, kandi buzima nikwo kiri. Kwonka nikukubaasisa kwesiimira embeera ezirikukirayo oburungi. Mu muringo ki?

16. Nk’oku Zaaburi 41:12 harikworeka, Yehova naija kuha ata emigisha abarikwehayo kumuheereza?

¹⁶ Yehova niwe arikukirayo kuba efura. N’obu waakumuha ki, butoosha naakushumbuusha ebirikukira ebi orikumuha. (Mak. 10:29, 30) Naija kukuha ebirikukirayo oburungi, eby’omugasho, n’okumarwa, nangwa n’omu nsi egi embi. Kandi ebyo n’endozo. Orugyendo oru orikutandika waaheza kubatizibwa tirwine muheru. Noobaasa kugumizamu nooheereza Sho ou orikukunda ebiro byona. Omukago gwawe na Sho nigwija kwongyera kuhama, kandi naiwe noija kugumaho ebiro byona nkawe.​—Shoma Zaaburi 41:12.

17. Niki eki orikubaasa kuha Yehova eki ataine?

¹⁷ Waayehayo kandi okabatizibwa, nootunga omugisha gw’okuha Sho ekintu ky’omuhendo. Akuhaire byona ebirungi, ebirikushemeza, ebi otwire nooyesiimiramu. Naiwe noobaasa kugira eki waaha Omuhangi w’eiguru n’ensi eki ataine, orikwehayo oyekundiire kumuheereza. (Yob. 1:8; 41:11; Enf. 27:11) Buzima ogu nigwo muringo murungi ogu orikubaasa kutwazamu. Hatariho kubangaanisa,  rukundo ei oiniire Yehova niyo eshemereire kukuhiga kubatizibwa.

18. Ni bibuuzo ki ebi orikubaasa kwebuuza?

¹⁸ Noobaasa kugarukamu ota ekibuuzo eki, nooyenda kubatizibwa? Naiwe orikumanya eky’okugarukamu. Kwonka nikibaasa kukuhwera waayebuuza oti: ‘Ntegyereize ki kubatizibwa?’ (Byak. 8:36) Ijuka ebi twagambaho. Eky’okubanza, nookunda amazima n’okuhikiirira. Yebuuze oti: ‘Niinyenda kureeba obu buri omwe araabe naagamba amazima kandi arikukora ekihikire?’ Ekya kabiri, nookunda Yesu Kristo. Yebuuze oti: ‘Niinyenda ngu Omwana wa Ruhanga abe Omugabe wangye kandi niintooreza eky’okureeberaho kye?’ Ekya kashatu, okukira munonga, nookunda Yehova. Yebuuze oti: ‘Niinyenda kushemeza omutima gwa Yehova ndikumuheereza?’ Waagarukamu ebibuuzo ebyo ngu eego, mbwenu niki ekirikukuremesa kubatizibwa? Otegyereize ki?​—Byak. 16:33.

19. Ahabw’enki otaine kweziringa kubatizibwa? Ha eky’okureeberaho. (Yoh. 4:34)

¹⁹ Waaba nootumimwa kubatizibwa, teekateeka aha ky’okureeberaho eki Yesu yaakoreise. (Shoma Yohaana 4:34.) Yetegyereze ngu Yesu akagyeragyeranisa okukora ebi Ishe arikukunda n’eby’okurya. Ahabw’enki? Ahakuba eby’okurya n’eby’omugasho ahariitwe. Yesu akaba naamanya ngu buri kimwe eki Yehova arikutushaba kukora n’eky’oburungi bwaitu. Yehova tarikwenda ngu tukore ekirikubaasa kuturugiramu akabi. Mbwenu shi Yehova naayenda ngu obatiziibwe? Eego. (Byak. 2:38) N’ahabw’ekyo, gira obuhame ngu waayorobera ekiragiro ky’okubatizibwa noija kugasirwa. Waaba otarikubaasa kweziringa kurya eby’okurya ebi orikukunda, ahabw’enki nooyeziringa kubatizibwa?

20. Nituza kugamba ahari ki omu kicweka ekirikukurataho?

²⁰ Ahabw’enki bamwe nibatuuraho kubatizibwa? Abaingi nibabaasa kugira ngu, “Tinkeetebeekaniise.” Okucwamu kwehayo ahari Yehova kandi okabatizibwa nikwo kucwamu okurikukirayo obukuru. N’ahabw’ekyo, nikitwara obwire, okuteekateeka n’obwegyendesereza, n’amaani kuba ohikire kubatizibwa. Ku oraabe oine ekihika ky’okuhika aha eidaara eryo, noobaasa kukora ki hati kwetebeekanisa? Nituza kugarukamu ekibuuzo ekyo omu kicweka ekirikukurataho.