Ahabw’enki omushaija ow’obuzaare bwa haihi yaagizire ngu yaashwera Ruusi naija kuba ‘yaashiisha’ obuhunguzi bwe? (Ruusi 4:1, 6)

▪ Omu bwire bwa Baibuli, omushaija ku yaabaire afa atazaire omwana, kikaba kireetaho ebibuuzo: Niki ekyabaire kihika aha kibanja kye? Mbwenu shi eiziina ry’eka ye rikaba rihwaho? Ebiragiro bya Musa nibituhwera kugarukamu ebibuuzo ebyo.

Niki ekyabaire kihika aha kibanja ky’omushaija owaabaire afa, nari yaaba omworo akaguza eitaka rye? Mwene ishe nari omunyabuzaare wa haihi akaba naabaasa kucungura ekibanja kye. N’ahabw’ekyo ab’eka bakaba nibabaasa kukigarukana.​—Lev. 25:23-28; Kub. 27:8-11.

Eiziina ry’eka y’omushaija owaabaire afa rikaba ririndwa rita? Omukazi owaabaire afeerwa iba akaba ahungurwa omuramu, nk’oku kyabaire omu mbeera ya Ruusi. Omuramu ogwo akaba ahungura muka nyakufa kugira ngu baazaare omwana w’okuhungura ebintu bye n’okugaruraho eiziina rye. Entebeekanisa egi eyaabaire neeyoreka rukundo ekaba egasira n’efaakazi.​—Bir. 25:5-7; Mat. 22:23-28.

Teekateeka aha kyahikire ahari Naomi. Akaba ashweirwe omushaija orikwetwa Elimeleki. Naomi ku yaafeereirwe iba n’abatabani be babiri, akatsigara ataine w’okumureeberera. (Rus. 1:1-5) Naomi ku yaagarukire Yuda, akahiga Ruusi omukaamwana kugambira Boazi kucungura ekibanja kyabo. Akaba ari omunyabuzaare wa Elimeleki. (Rus. 2:1, 19, 20; 3:1-4) Kwonka Boazi akaba naamanya ngu hariho omushaija ondiijo ow’obuzaare bwa haihi kumukira. N’ahabw’ekyo niwe yaabaire aine kubanza kucwamu yaaba naabaasa kubacungura.​—Rus. 3:9, 12, 13.

Omu kubanza omushaija ogwo ow’obuzaare bwa haihi akaikiriza kubahwera. (Rus. 4:1-4) N’obu kiraabe kyabaire nikitwariramu okukoresa esente ze, akeetegyereza ngu Naomi akaba atakibaasa kuzaara omwana owaabaire naaza kuhungura ekibanja kya Elimeleki. Ekirikumanyisa ngu omushaija ogwo akaba naaza kwongyerwaho ekibanja ekyo, n’ahabw’ekyo akagureeba nk’omugisha gw’okugira ebintu bingi.

Kwonka omushaija ogwo akanga ku yaamanyire ngu okucungura ekibanja ekyo kikaba nikitwariramu okuhungura Ruusi. Akagira ati: “Nyowe tindikubaasa kukicungura, ntakaashiisha obuhunguzi bwangye.” (Rus. 4:5, 6) Ahabw’enki yaayangire?

Omushaija ogwo nari omuntu ondiijo kuri yaashweire Ruusi reero bakazaara omwojo, omwana ogwo akaba naija kuhungura ekibanja kya Elimeleki. Eki kikaba nikiija ‘kushiisha’ kita “obuhunguzi” bw’omushaija ogwo? Baibuli terikukigambaho butunu, kwonka ezi nizibaasa kuba ziri zimwe aha nshonga.

• Ey’okubanza, akaba naareeba ngu esente ezi araakorese kugura ekibanja kya Elimeleki niziza kufa busha ahakuba kikaba kitaraabe ekye. Kikaba nikiza kutwarwa mutabani wa Ruusi.

• Eya kabiri, akaba naija kugira obujunaanizibwa bw’okureeberera Naomi na Ruusi.

• Eya kashatu, Ruusi n’omushaija ogwo ku bakuzaire abaana abandi, bakaba nibaza kubagana obuhunguzi n’abaana be.

• Eya kana, omushaija ogwo ku yaakubaire ataine abaana abe, mutabani wa Ruusi akaahungwire ekibanja ky’omushaija ogwo n’ekya Elimeleki. N’ahabw’ekyo ekibanja kye kikaba nikiza kutwarwa omwana orikwetererwa eiziina rya Elimeleki beitu ritari erye. Omushaija ogwo taraikiriize kufeerwa obuhunguzi bwe kugira ngu ahwere Naomi. Akacwamu ngu Boazi omunyabuzaare wa haihi ondiijo, abe niwe yaabacungura. Boazi akaikiriza ahakuba akaba naayenda “kugaruraho eiziina rya nyakufa omu buhunguzi bwe.”​—Rus. 4:10.

Omushaija ogwo ow’obuzaare bwa haihi akaba ataire omutima aha kurinda eiziina erye, n’obuhunguzi bwe. Akaba aine emiteekateekyere y’okweyendeza. N’ekyarugiremu akafeerwa eiziina rye kandi tiririkumanywa. Kandi akafeerwa n’omugisha gw’omutaano ogu Boazi yaatungire, ogw’okuba omwe ahari baishenkuru ba Mesia, Yesu Kristo. Ebyarugiremu ka byabaire bibi ahabw’omushaija ogwo kweyendeza akanga kuhwera!​—Mat. 1:5; Luk. 3:23, 32.