1. Abazaire nibendeza ki abaana baabo?

 NITUMANYA ngu abazaire nimwenda kuhwera abaana baanyu kumanya Yehova kandi bakamukunda. Kwonka titurikubaasa kureeba Ruhanga. Noobaasa kuhwera ota abaana baawe kumureeba nk’owaabuzima n’okumwirira haihi?​—Yak. 4:8.

2. Abazaire nibabaasa kwegyesa bata abaana baabo aha mitwarize ya Yehova?

² Omuringo mukuru gw’okuhweramu abaana kwirira haihi Yehova n’okubeegyesa Baibuli. (2 Tim. 3:14-17) Kwonka Baibuli neeyoreka omuringo ogundi oku abato barikubaasa kwega ahari Yehova. Omu kitabo ky’Enfumu, omuzaire naijutsya omutabani kuteebwa emitwarize ya Yehova, erikureebekyera omu byahangirwe. (Enf. 3:19-21) Nituza kureeba emiringo emwe oku abazaire barikubaasa kukoresa ebyahangirwe kuhwera abaana baabo kwega emitwarize ya Yehova.

3. Abazaire baine kuhwera bata abaana baabo?

³ Baibuli neegira ngu emitwarize ya ‘Ruhanga etarikureebwa neereebekyera kimwe, erikumanyirwa aha bi yaahangire.’ (Rom. 1:20) Obundi, abazaire nimukunda kumara obwire n’abaana baanyu aheeru murikweshemeza. Mukorese obwire obwo kubahwera kureeba akakwate akari aha gati ‘y’ebyahangirwe’ n’emitwarize ya Yehova erikutangaaza. Hati, ka tureebe eki abazaire barikubaasa kwegyera ahari Yesu.

4. Yesu akakoresa ata ebyahangirwe kwegyesa abeegi be? (Luka 12:24, 27-30)

⁴ Yetegyereze oku Yesu yaakoreise ebyahangirwe kwegyesa. Eizooba rimwe, akagambira abeegi be kuteekateeka aha bikoona  n’ebirabyo. (Shoma Luka 12:24, 27-30.) Yesu akaba naabaasa kugamba aha nyamaishwa nari ekimera ekindi, kwonka akacwamu kukoresa ekinyonyi n’ekimuri ebi abeegi be baabaire nibamanya gye. Abeegi be nibabaasa kuba baabaire nibareeba ebikoona birikuguruka ahaiguru omu mwanya n’ebimuri birikurabya omu ishwa. Noobaasa kuteera akashushani Yesu arikworekyereza aha bintu ebyo arikugamba? Akagamba ahari ki bwanyima y’eby’okureeberaho ebyo? Akeegyesa abeegi be eishomo rikuru eririkukwata aha bufura bwa ishebo ow’omu iguru n’embabazi ze kworeka ngu, Yehova naija kuriisa kandi ajweke abaheereza be abeesigwa nk’oku arikureeberera ebikoona n’ebirabyo.

5. Ni byahangirwe ki ebi abazaire barikubaasa kukoresa kwegyesa abaana baabo ahari Yehova?

⁵ Abazaire nimubaasa kutooreza muta Yesu omu kwegyesa kwanyu? Nimubaasa kugambira abaana baanyu ebyahangirwe ebirikubashemeza, nk’enyamaishwa nari ekimera eki orikukunda. Mwaba nimugaaniira nabo, muteereho kubagambira eki ebyahangirwe ebyo birikubeegyesa ahari Yehova. Reero obuuze omwana waawe enyamaishwa nari ekimera eki arikukunda. Waaba noogamba aha mitwarize ya Yehova orikukoresa omwana waawe arikukunda noobaasa kumureetera kuhurikiriza gye.

6. Nitubaasa kwegyera ki ahari nyina wa Christopher?

⁶ Mbwenu shi abazaire baine kumara obwire bwingi barikucondooza aha nyamaishwa n’ekimera batakagaaniire n’abaana eki birikubeegyesa ahari Yehova? Ngaaha buzima. Yesu taragambire buri kimwe ekirikutwarirwa omu kuriisa ebinyonyi nari oku ebimuri biri kukura. Omwana waawe naabaasa kuba naakunda kumanya bingi ebirikukwata aha byahangirwe, kwonka obumwe waamworeka akantu kakye nari okamubuuza ekibuuzo noomuhwera kwetegyereza enshonga. Yetegyereze eki ow’eishe-emwe orikwetwa Christopher arikugamba aha mbeera ye y’obuto: “Maawe akaba agamba aha byahangirwe ebitwetooroire kutuhwera kubiteekateekaho. Nk’eky’okureeberaho, ku twabaire turaba haihi n’enshozi, akaba agira ati: ‘Mureebe oku enshozi ziriya ziri mpango kandi zirikureebeka gye! Buzima Yehova tarikutangaaza?’ Nari ku twabaire tuba turi haihi n’enyanja, akaba agira ati: ‘Mureebe oku ebingonzi biine amaani! Ekyo tikirikworeka ngu Ruhanga aine amaani?’” Christopher naagira ati: “Ebintu bikye ebi yaagambire aha byahangirwe, bikatukwataho munonga.”

7. Noobaasa kutendeka ota abaana baawe kuteekateeka aha byahangirwe?

⁷ Abaana baawe baaba nibakura, noobaasa kubatendeka kwongyera kuteekateeka aha byahangirwe n’eki birikubeegyesa aha mitwarize ya Yehova. Noobaasa kugamba aha kintu kimwe eki Ruhanga yaahangire, reero obuuze omwana waawe oti: “Eki nikikwegyesa ki ahari Yehova?” Ebi baarakugarukyemu nibibaasa kukutangaaza.​—Mat. 21:16.

8. Abazaire Abaisraeli bakaba baine omugisha gw’okukora ki baaba nibagyenda aha muhanda?

⁸ Abazaire Abaisraeli bakahigwa kwegyesa abaana baabo ebiragiro bya Yehova baaba nibagyenda nabo “omu muhanda.” (Bir. 11:19) Emihanda egyo ekaba neeraba omu byaro bya Israeli. Bakaba nibabaasa kureeba enyamaishwa z’emiringo mingi, ebinyonyi n’ebimuri. Abazaire ku baabaire baba nibagyenda omu muhanda, bakaba bareetera abaana baabo kuteekateeka aha bi Yehova yaahangire. Obunaku obu abazaire mwine omugisha  gw’okukoresa ebyahangirwe kwegyesa abaana baanyu. Yetegyereze oku abazaire abamwe oku babaasize kukikora.

9. Noobaasa kwegyera ki ahari Punitha na Katya?

⁹ Omukazi orikwetwa Punitha, orikutuura omu rurembo ruhango omuri India, naagira ati: “Twataayaayira abanyabuzaare omu kyaro, nitugureeba nk’omugisha gw’okuhwera abaana baitu kwegyera aha bi Yehova yaahangire. Nindeeba ngu abaana bangye nibeetegyereza gye ebyahangirwe baaba batari omu myanya erimu abantu baingi.” Abazaire, abaana baanyu tibarikwija kwebwa ebi barikwega baaba bari naimwe omu myanya mirungi nk’egyo. Katya, munyaanyazi-itwe kuruga Moldova, naagira ati: “Omu bintu ebi ndikwijuka gye nkiri muto, n’obwire obu naamazire n’abazaire bangye omu myanya y’ebyaro. Nimbasiima munonga ahabw’okunyegyesa nkiri muto kwemerera, nketegyereza ebi Yehova yaahangire n’eki birikunyegyesa ahariiwe.”

10. Abazaire nibabaasa kukora ki baaba batarikubaasa kuza omu myanya y’ebyaro? (Reeba akabokusi “ Obuhwezi bw’Abazaire.”)

¹⁰ Kandi shi ku waakuba otarikubaasa kuza omu myanya y’ebyaro? Amol, nawe orikutuura India, naagira ati: “Niintuura omu mwanya, ahu abazaire baine kukora obwire bwingi, kandi okuza omu byaro nikyetengyesa esente nyingi. Kwonka, mwaba muri omu mwanya gw’okuhumuriramu nari aha mutwe gw’enju nimubaasa kureeba ebyahangirwe kandi mugaaniire aha mitwarize ya Yehova.” Waayetegyereza ebiri haihi n’ah’orikutuura noija kureeba ebyahangirwe bingi ebi orikubaasa kworeka abaana baawe. (Zab. 104:24) Noobaasa kureeba ebinyonyi, obukooko, ebimera, n’ebindi bingi. Karina, kuruga Germany, naagira ati: “Maawe naakunda ebimuri, n’ahabw’ekyo obu naabaire ndi muto, ku naabaire ngyenda nawe akaba anyoreka ebimuri birungi.” Abazaire nimubaasa n’okukoresa vidiyo  nyingi n’ebitabo by’ekibiina ebirikugamba aha byahangirwe ebitebeekanisiibwe kwegyesa abaana baanyu. Eego, oyihireho ahu orikutuura, noobaasa kuhwera abaana baawe kwetegyereza ebi Ruhanga yaahangire. Hati ka twetegyereze emwe aha mitwarize ya Yehova ei orikubaasa kugambaho n’abaana baawe.

11. Abazaire nibabaasa kuhwera bata abaana baabo kumanya rukundo ya Yehova?

¹¹ Kubaasa kuhwera abaana baawe kumanya rukundo ya Yehova, noobaasa kugamba oku enyamaishwa nyingi zirikufayo aha baana baazo. (Mat. 23:37) Kandi noobaasa kugamba aha byahangirwe eby’emiringo mingi ebirikutushemeza. Karina, owaaba yaagambirweho, naagira ati: “Ku naabaire gyenda na maama, akaba ampiga kwemerera kandi nketegyereza oku buri kimuri kirikutaana aha kindi n’oku oburungi bwakyo burikworeka rukundo ya Yehova. N’obu haraabe hahingwireho emyaka, ku ndikureeba ebimuri by’emiringo mingi, ninyetegyereza oku bikozirwe n’erangi zaabyo. Nibinyijutsya rukundo mpango ei Yehova atwiniire.”

12. Abazaire nibabaasa kuhwera bata abaana baabo kumanya obwengye bwa Ruhanga? (Zaaburi 139:14) (Reeba n’ekishushani.)

¹² Hwera abaana baawe kumanya obwengye bwa Ruhanga. Yehova aine obwengye oburikukirira kimwe obwaitu. (Rom. 11:33) Nk’eky’okureeberaho, noobaasa kuhwera abaana baawe kumanya oku orwoya rurikukora ebicu, n’oku ebicu birikuruga omu mwanya gumwe bikaza omu gundi. (Yob. 38:36, 37) Noobaasa n’okugamba oku omubiri gwaitu gukozirwe omu muringo gurikutangaaza. (Shoma Zaaburi 139:14.) Yetegyereze oku omushaija omwe orikwetwa Vladimir yaakozire ekyo. Naagira ati: “Eizooba rimwe mutabani waitu akagwa ahansi n’egaari ye reero yaahutaara. Bwanyima y’ebiro bikye ekironda kikakira. Nyowe n’omukazi wangye tukamushoboororera ngu Yehova akahanga obutafaari bw’omubiri burikubaasa kwegarura busya. Tukamugira ngu ekyo tikirikubaasa kubaho aha bintu ebi abantu barikukora. Nk’eky’okureeberaho, emotoka terikubaasa kwegarura busya yaatunga butandu. Ekyo kikahwera mutabani waitu kumanya obwengye bwa Yehova.”

13. Abazaire nibabaasa kuhwera bata abaana baabo kumanya amaani ga Ruhanga? (Isaaya 40:26)

 ¹³ Yehova naatugambira kwimutsya amaisho gaitu tukareeba ahaiguru, reero tuteekateeke aha maani ge agarikurinda enyonyoozi zoona. (Shoma Isaaya 40:26.) Noobaasa kugambira abaana baawe kureeba ahaiguru kandi bakateekateeka aha bi barikureeba. Yetegyereze eki munyaanyazi-itwe orikwetwa Tingting, kuruga Taiwan, arikwijuka aha buto bwe. Naagira ati: “Eizooba rimwe, maawe akantwara kurambura, reero omu bwire bwa nyekiro tukareeba ahaiguru hatariho mataara g’omu tauni. Omu bwire obwo nkaba ninyerarikirira aha kugyemeserezibwa kw’ab’orwingano rwangye ahakuba bakaba nibandeetera kugumirwa kuheereza Yehova omu bwesigwa. Maawe akampiga kuteekateeka aha maani ga Yehova agu yaakoreise kuhanga enyonyoozi zoona n’okwijuka ngu naabaasa kukoresa amaani ago kumpwera naagyezibwa. Bwanyima y’okwetegyereza ebyahangirwe omu kurambura okwo, nkongyera kumanya Yehova, kandi nkamariirira kumuheereza.”

14. Abazaire nibabaasa kukoresa bata ebyahangirwe kuhwera abaana baabo kumanya ngu Yehova ni Ruhanga w’okushemererwa?

¹⁴ Ebyahangirwe bya Yehova nibyoreka ngu ni Ruhanga w’okushemererwa. Abanyasaayansi beetegyereize ngu enyamaishwa ezirikukira obwingi nizizaana otwariremu ebinyonyi n’eby’enyanja. (Yob. 40:20) Abaana baawe baarashekireho barikureeba enyamaishwa zirikuzaana? Obundi baareebire akaana k’enjangu nari ebibwana birikuzaana. Omurundi ogundi abaana baawe baareeba enyamaishwa nizizaana bakasheka, noobaasa kubaijutsya ngu nibaheereza Ruhanga orikushemererwa.​—1 Tim. 1:11.

15. Niki ekirikubaasa kuhwera abazaire kumanya eki abaana baabo barikuteekateeka? (Enfumu 20:5) (Reeba n’ekishushani.)

¹⁵ Obumwe, abazaire nibabaasa kugumirwa kuhiga abaana baabo kubagambira oburemeezi bwabo. Ku oraabe ori omu mbeera nk’egyo, noobaasa kukoresa ebibuuzo kumanya eki baana baawe barikuteekateeka. (Shoma  Enfumu 20:5.) Abazaire abamwe nikiboorobera kubuuza abaana baabo baaba nibareeba hamwe ebyahangirwe. Ahabw’enki? Enshonga emwe eri ngu nihaba hariho ebintu bikye ebirikubaasa kuhuzya abaana n’abazaire. Omushaija omuzaire kuruga Taiwan orikwetwa Masahiko naagamba aha nshonga endiijo ati: “Twamara obwire n’abaana baitu turikutemba enshozi nari turikugyendagyenda aha mwaro nibakira kuba baikaikaine. N’ahabw’ekyo nikitworobera kubabuuza kubaasa kumanya eki barikuteekateeka.” Katya, owaaba yaagambirweho, naagira ati: “Ku naabaire nduga aha ishomero, maama akaba antwara omu mwanya murungi kweshemeza. Omu mwanya ogwo ogucureire, kikaba kinyorobera kumugambira ebyabaho aha ishomero nari ebirikunyerarikiriza.”

16. Amaka nigabaasa kwesiimira gata omu bi Yehova yaahangire?

¹⁶ Amaka nigabaasa kukoresa ebi Yehova yaahangire kugaaniira n’abaana baabo omu muringo ogurikushemeza, eki nikireetera eka kugira enkoragana nungi. Baibuli neegira ngu hariho obwire “bw’okusheka” n’obwire “bw’okuzina.” (Mub. 3:1, 4.) Yehova akahanga emyanya mirungi ei turikubaasa kukoreramu ebintu ebirikutushemeza. Eka nyingi nizikunda kugyenda hamwe kurambura omu nshozi, omu myanya y’ebyaro, nari aha mwaro. Abaana abamwe nibakunda kwiruka, kuzaana, kureeba enyamaishwa nari kwibira omu mugyera n’omu nyanja. Obwo ka n’obwire burungi bw’okwejumba omu by’okweshemeza twaba turi omu myanya egyo, twetoroirwe ebi Yehova yaahangire!

17. Ahabw’enki abazaire baine kuhwera abaana baabo kukunda kwegyera aha byahangirwe?

¹⁷ Omu nsi ensya, abazaire n’abaana nibaija kwesiimira omu bi Yehova yaahangire okukira obundi bwona. Omu bwire obwo, tituraije kutiina enyamaishwa, kandi nazo tizirikwija kututiina. (Isa. 11:6-9) Nitwija kwesiimira ebi Yehova yaahangire ebiro byona. (Zab. 22:26) Kwonka abazaire, mutategyereza obwire obwo kuhika kugira ngu muhwere abaana baanyu kukunda kwegyera aha byahangirwe. Waakoresa ebyahangirwe kwegyesa abaana baawe ahari Yehova, nibaija kuba nk’Omugabe Daudi owaagizire ati: ‘Ai Yehova, omu birikukorwa byona tiharimu ebiri nk’ebyawe.’​—Zab. 86:8.