1. Niki ekirikushemeza baingi abarikwija omu nteerane zaitu omurundi gw’okubanza? (Reeba n’ekishushani.)

 TEEKATEEKA aha mushaija n’omukazi we abaija aha Kyombeko ky’Obukama eky’Abajurizi ba Yehova omurundi gw’okubanza. Bashemererwa munonga ahabw’okubakiira gye n’okureeba rukundo ei abari omu kibiina baine. Barikugaruka omu ka, omukazi agambira iba ati: ‘Abajurizi ba Yehova nibatwaza omu muringo ogurikutaana n’ogw’abantu abandi.’

2. Ahabw’enki bamwe nibateerwa entsibo?

² Rukundo eri omu kibiina Ekikristaayo n’ey’omutaano. Amazima gari ngu, Abajurizi ba Yehova tibahikiriire. (1 Yoh. 1:8) N’ahabw’ekyo ku turikwongyera kumanya abari omu kibiina, nitwongyera kureeba zimwe aha nshobe zaabo. (Rom. 3:23) Eky’obusaasi, bamwe nibaikiriza obutahikiirira bw’abandi kubateeza entsibo.

3. Abakuratsi ba Yesu abaabuzima nibamanyirwa ahari ki? (Yohaana 13:34, 35)

³ Garuka oreebe omutwe gw’ekicweka eki. (Shoma Yohaana 13:34, 35.) Abakuratsi ba Kristo abaabuzima nibamanyirwa ahari ki? Ni rukundo, beitu kutari kuhikiirira. Kandi yetegyereze  ngu Yesu taragizire ati: ‘Nibwo murimanya ku muri abeegi bangye.’ Kureka, akagira ati: “Nibwo abantu boona baribamanya ku muri abeegi bangye.” N’ahabw’ekyo Yesu akooreka ngu abakuratsi be n’abatari mu kibiina Ekikristaayo bakaba nibaza kumanyira abakuratsi be abaabuzima ahari rukundo etarimu kweyendeza ei barikugirirana.

4. Abamwe nibabaasa kwenda kumanya ki aha Bakristaayo abaabuzima?

⁴ Bamwe abatari Bajurizi ba Yehova nibabaasa kwebuuza bati: ‘Rukundo neemanyisa eta abakuratsi ba Yesu abaabuzima? Yesu akooreka ata ngu naakunda entumwa ze? Kandi nitubaasa kutooreza Yesu tuta?’ Ni kirungi Abajurizi ba Yehova kuteekateeka aha by’okugarukamu by’ebibuuzo ebyo. Ekyo nikibaasa kutuhwera kworeka rukundo omu bwijwire, na munonga turikwemera obutahikiirira bw’abandi.​—Efe. 5:2.

5. Ebigambo bya Yesu ebiri omu Yohaana 15:12, 13 nibimanyisa ki?

⁵ Yesu akooreka butunu ngu rukundo y’omutaano ekaba neija kumanyisa Abakuratsi be. (Shoma Yohaana 15:12, 13.) Yetegyereze ngu Yesu akabaragiira ati: “Mukundane nk’oku naabakunzire.” Ekyo nikimanyisa ki? Nk’oku Yesu yaashobooroire, egi ni rukundo y’okwefeerereza erikuhiga Omukristaayo kuhika n’aha kufeera mugyenzi we kyayetengyesa. b

6. Ekigambo kya Ruhanga nikyoreka kita ngu rukundo ni nkuru?

⁶ Ekigambo kya Ruhanga nikyegyesa ngu rukundo ni nkuru munonga. Egi n’emwe aha mishororongo ei abantu baingi barikukira kukunda: “Ruhanga aba rukundo.”  (1 Yoh. 4:8) ‘Kunda mutaahi waawe nk’oku orikwekunda.’ (Mat. 22:39) ‘Rukundo neeshweka ebibi bingi.’ (1 Pet. 4:8) ‘Rukundo terikuhwaho.’ (1 Kor. 13:8) Emishororongo egi n’endiijo neeyoreka butunu ngu ni kikuru kuteeraho kugira rukundo n’okworeka omutwarize murungi ogu.

7. Ahabw’enki Sitaane atarikubaasa kureetera abantu kugira rukundo eyaabuzima?

⁷ Abantu baingi nibeebuuza bati: ‘Nimbaasa nta kumanya ediini ehikire? Ediini zoona nizigira ngu nizegyesa amazima, kwonka buri emwe neeyegyesa ebirikutaana ahari Ruhanga.’ Sitaane abaasize kuhabisa abantu arikureetaho ediini z’ebishuba. Kwonka tarikubaasa kutandikaho ekibiina ky’Abakristaayo abarikukundana. Yehova niwe wenka orikubaasa kukora ekyo. Ahakuba Yehova niwe bukomooko bwa rukundo eyaabuzima, abu arikushagika kandi akaha emigisha nibabaasa kugirirana rukundo eyaabuzima. (1 Yoh. 4:7) Mbwenu shi kishemereire kututangaaza kureeba ngu Yesu akagira ngu abakuratsi be abaabuzima nibaija kumanyirwa ahari rukundo etarikweyendeza?

8-9. Abantu baingi ku barikureeba rukundo ei Abajurizi ba Yehova baine nibakwatwaho bata?

⁸ Nk’oku Yesu yaagambire, abantu baingi babaasize kumanya abakuratsi be ahabwa rukundo eyaabuzima ei barikugirirana. Nk’eky’okureeberaho, ow’eishe-emwe orikwetwa Ian naijuka oruteerane oruhango oru yaabandize kuzamu, orwabaire ruri omu kishaayi ky’omupiira haihi n’eka ye. Ian akaba yaagiire omu kishaayi ekyo ameezi makye enyima kureeba omupiira. Naagira ati: “Nkareeba entaaniso y’amaani. Abajurizi ba Yehova bakaba nibatwaza gye, bajwaire gye, kandi abaana baabo bakaba baine emicwe mirungi.” Naayongyeraho ati: “Okukira byona, abantu abo bakaba baine okumarwa n’obusingye ebi naabaire ntwire ninsherura. Tindikwijuka embazo ezaahairwe aha izooba eryo, kwonka ninyijuka oku Abajurizi ba Yehova baabaire nibatwaza.” c Okutwaza gye kwaitu okwo nikurugiirira ahari rukundo eyaabuzima ei turikugirirana. Ahabw’okugira ngu nitukunda ab’eishe-emwe na banyaanyazi-itwe, nitubatwariza omu muringo gw’embabazi kandi nitubaha ekitiinisa.

⁹ Ow’eishe-emwe John nawe akeehurira atyo ku yaatandikire kuza omu nteerane z’ekibiina: “Nkashemererwa ahabw’okureeba boona nibatwarizana gye . . . bakaba bari nk’abahikiriire. Rukundo yaabo eyaabuzima ekampamiza ngu mboine ediini ey’amazima.” d Emirundi mingi, eby’okureeberaho nk’ebyo nibyoreka ngu Abajurizi ba Yehova nibo Bakristaayo abaabuzima.

10. Ni ryari obu twine kworeka rukundo y’Ekikristaayo? (Reeba obugambo obw’ahansi.)

¹⁰ Nk’oku kyagambwa aha kutandika, tihaine n’omwe aha b’eishe-emwe bagyenzi baitu ohikiriire. Obumwe, nibabaasa kukora nari bagambe ebirikutureetera kuguubwa kubi. e (Yak. 3:2) Ekyo kyabaho, nibwo twine kworeka rukundo y’Ekikristaayo omu muringo ogu turikutwazamu. Mbwenu shi, nitubaasa kwegyera ki ahari Yesu omu nshonga egi?​—Yoh. 13:15.

11. Ni mitwarize ki mibi ei Yakobo na Yohaana baayorekire? (Reeba n’ekishushani.)

¹¹ Yesu akaba atarikutwara abakuratsi be nk’abahikiriire. Kureka, omu muringo gwa rukundo akaba abahwera kukora empinduka omu mitwarize yaabo kubaasa kusiimwa Yehova. Eizooba rimwe, entumwa Yakobo na Yohaana, bakagambira nyinabo kushaba Yesu kubaha emyanya mikuru omu Obukama. (Mat. 20:20, 21) Eki Yakobo na Yohaana baakozire kikooreka ngu baine amaryo n’omwetunguuro.​—Enf. 16:18.

12. Mbwenu shi Yakobo na Yohaana nibo bonka abaayorekire emitwarize mibi? Shoboorora.

¹² Yakobo na Yohaana tibo bonka abaayorekire emitwarize mibi aha izooba eryo. Yetegyereze oku entumwa ezindi baatwarize: “Kandi ikumi, ku baabihuriire, baagwerwa kubi enyineemwe ezo zombi.” (Mat. 20:24) Yakobo na Yohaana nibabaasa kuba baatongaine n’entumwa abandi. Obundi abandi bakagira bati: ‘Nimuteekateeka ngu nimutukira? Niyo nshonga ahabw’enki mushabire emyanya y’ahaiguru omu Bukama? Tiimwe mwenka abarikukora munonga na Yesu. Naitwe emyanya egyo ey’ahaiguru etushemereire!’ Kyona ekyabaireho, entumwa tibarorekire ngu nibakundana.

13. Yesu akatwaza ata entumwa ze ku baayorekire emitwarize kubi? (Matayo 20:25-28)

¹³ Yesu akabatwariza ata? Tarabagirire  ekiniga. Kandi taragizire ngu naaza kutoorana entumwa abandi abacureezi, abarikubaasa kuguma nibatwarizana omu muringo gwa rukundo. Kureka, akabagumisiririza arikugamba nabo. (Shoma Matayo 20:25-28.) Akagumizamu naabatwariza omu muringo gwa rukundo, n’obu ogwo gwabaire gutari murundi gw’okubanza nari ogw’aha muheru entumwa barikuhakana aha waabaire ari mukuru omuribo.​—Mak. 9:34; Luk. 22:24.

14. Entumwa za Yesu bakakurira mu mbeera ki?

¹⁴ Hatariho kubangaanisa, Yesu aine kuba yaateekateekire aha mbeera ezi entumwa ze baakuriiremu. (Yoh. 2:24, 25) Ahu baakuriire abeebembezi b’ediini bakaba nibata omutima aha bukuru n’emyanya y’ebitiinisa. (Mat. 23:6.) Abeebembezi b’ediini y’Ekiyudaaya bakaba nibeemanya ngu bahikiriire. f (Luk. 18:9-12) Yesu akaba naamanya ngu embeera egyo ekaba neekwata aha ku baabaire nibeeteekateekaho n’abandi. (Enf. 19:11) Akaba naamanya ngu nibabaasa kukora enshobe kandi ku baabaire bazikora akaba atabakabukira. Akaba naamanya ngu nibenda kukora ebirungi, n’ahabw’ekyo akabagumisiririza arikubahwera kusingura amaryo n’omwetunguuro, kandi bakateeraho kugira rukundo.

15. Niki eki turikwegyera aha ki Yakobo na Yohaana baakozire?

¹⁵ Nitubaasa kwegyera bingi aha ki Yakobo na Yohaana baakozire. Bakaba batashemereire kushaba emyanya y’ebitiinisa omu Bukama. Kandi entumwa abandi nabo bakaba batahikire kwikiriza embeera egyo kushiisha obusingye bwabo. Kwonka nabwo, Yesu akatwariza entumwa ze boona omu muringo gw’embabazi na rukundo. Eky’okwega? Ekikuru ti nshobe ezi abandi barikukora kyonka, kureka oku turikutwaza baashobya nakyo ni kikuru. Niki ekirikubaasa kutuhwera? Omukristaayo mugyenzi waawe yaakugwisa kubi, noobaasa kwebuuza oti: ‘Ahabw’enki eki yaakora kyangwisa kubi munonga? Mbwenu shi nikyoreka omutwarize mubi ogu nyine kweihamu? Mbwenu shi omuntu owaangwisa kubi naabaasa kuba aine oburemeezi? N’obu naakuba mpikire kuguubwa kubi, nimbaasa nta kworeka rukundo etarimu kweyendeza ndikwehuzya ekyabaho?’ Twayongyera kutwariza abandi omu muringo gwa rukundo, nitwongyera kworeka ngu turi abakuratsi ba Yesu abaabuzima.

16. Niki ekindi eki turikubaasa kwegyera ahari Yesu?

¹⁶ Ekindi eki turikwegyera ahari Yesu n’okuteeraho kumanya gye ab’eishe-emwe bagyenzi baitu. (Enf. 20:5) Yesu akaba naabaasa kumanya ekiri omu mutima gw’omuntu. Itwe titurikubaasa kukimanya. Kwonka nitubaasa kwehuzya obutahikiirira bw’ab’eishe-emwe na banyaanyazi-itwe. (Efe. 4:1, 2; 1 Pet. 3:8) Ekyo nitubaasa kukikora twamanya ebirikubakwataho. Ka tureebe eky’okureeberaho.

17. Omureeberezi omwe wa saketi akagasirwa ata ahabw’okumanya gye ow’eishe-emwe mugyenzi we?

¹⁷ Omureeberezi wa saketi omuri East Africa naijuka ow’eishe-emwe owaabaire naatwaza omu muringo gutari gw’embabazi. Omureeberezi ogwo akatwaza ata? Naagira ati: “Omu mwanya gw’okwehuzya ow’eishe-emwe ogwo, nkacwamu kumumanya gye.” Ahabw’okukora ekyo, omureeberezi ogwo  akamanya ngu ow’eishe-emwe akaba naatwaza atyo ahabw’oku yaakuziibwe. Omureeberezi wa saketi naayongyeraho ati: “Ku naamanyire oku ow’eishe-emwe arikuteeraho munonga kusingura emitwarize egyo n’empinduka ezi yaabaire akozire, nkamusiima. Tukaba abanywani barungi.” Buzima, twafayo kumanya gye ab’eishe-emwe na banyaanyazi-itwe, nikiija kutworobera kubagirira rukundo.

18. Nitubaasa kwebuuza bibuuzo ki ow’eishe-emwe mugyenzi waitu yaatugwisa kubi? (Enfumu 26:20)

¹⁸ Obumwe nikibaasa kutwetengyesa kugamba n’ow’eishe-emwe otugwisize kubi. Kwonka, twine kubanza kwebuuza tuti: ‘Ninyetegyereza byona ebirikutwarirwamu?’ (Enf. 18:13) ‘Mbwenu shi naabaasa kuba akikozire atakigyendereire?’ (Mub. 7:20) ‘Ndakozire enshobe nk’egyo?’ (Mub. 7:21, 22) ‘Naagamba n’omuntu ogwo, embeera neeza kwongyera kuba mbi?’ (Shoma Enfumu 26:20.) Twateekateeka aha bibuuzo nk’ebyo, nituza kwetegyereza ngu rukundo ei twiniire ow’eishe-emwe mugyenzi waitu neebaasa kutureetera kwehuzya enshobe ye.

19. Omariirire kukora ki?

¹⁹ Abajurizi ba Yehova boona nibooreka ngu n’abakuratsi ba Yesu abaabuzima. Buri omwe ahariitwe naayoreka ngu n’omukuratsi wa Yesu yaagirira ab’eishe-emwe na banyaanya rukundo etarikweyendeza n’obu baraabe batahikiriire. Twakora tutyo, nitubaasa kuhwera abandi kumanya ediini ey’amazima kandi batwegaiteho omu kuramya Yehova, Ruhanga wa rukundo. Ka tumariirire kugumizamu nitworeka rukundo erikumanyisa Abakristaayo abaabuzima.