1-2. Waaba otaketebeekaniise kubatizibwa, ahabw’enki otashemereire kuhwa amaani? (Reeba ekishushani ekiri aha kipampagare.)

 KU ORAABE nooyenda kubatizibwa, otaireho ekigyendererwa kirungi. Oyeteekateekire kubatizibwa? Waaba nooyenda kubatizibwa kandi abareeberezi baakwikiriize, kora ebirikwetengyesa kugira ngu obatizibwe omurundi oguraakurateho. Noija kutunga emigisha mingi omu kuheereza Yehova.

² Mbwenu shi, hariho oraakugambiire ngu haine ebi oine kukora kutunguuka okabatizibwa? Nari iwe noobyemanyira? Kyaba nikwo kiri, otahwa amaani. Noobaasa kutunguuka ohikye aha kubatizibwa, yaaba ori mukuru nari ori muto.

3. Omushaija Omwesiopia akabuuza ki Filipo, kandi ekyo nikireetaho kibuuzo ki? (Ebyakozirwe 8:36, 38)

³ Shoma Ebyakozirwe 8:36, 38. Omukungu w’eiramuriro Omwesiopia akabuuza Filipo omubuurizi w’engiri ati: “Ekirikunzibira kubatizibwa niki?” Omushaija Omwesiopia akaba naayenda kubatizibwa, kwonka shi buzima akaba yaahikire aha idaara rikuru eryo?

4. Omushaija Omwesiopia akooreka ata ngu amaririire kugumizamu naayega?

⁴ Omushaija Omwesiopia “ogwo akaba agiire Yerusaalemu kuramya.” (Byak. 8:27) N’ahabw’ekyo aine kuba yaabaire ahindukire akaza omu diini y’Ekiyudaaya. Hatariho kubangaanisa akaba ayegire ebirikukwata ahari Yehova omu Byahandiikirwe ebirikwera eby’Oruheburaayo. Kwonka nabwo, akaba  aine ekihika ky’okwega ebirikukiraho. Obu Filipo yaabugana omukungu ogwo aha muhanda, akamushanga naakora ki? Akaba naashoma omuzingo gw’ekitabo kya nabi Isaaya. (Byak. 8:28) Ebyo bikaba biri eby’okurya by’omwoyo ebigumire. Omukungu ogwo taramazirwe n’amazima ga Baibuli agarikutandikirwaho, kureka akaba naayenda kugumizamu naayega.

5. Omwesiopia akagyendera ata aha bi yaayegire?

⁵ Omushaija ogwo akaba ari omukungu wa Kandake Omugabekazi wa Esiopia, “ari omubiiki w’ebintu bye byona.” (Byak. 8:27) N’ahabw’ekyo aine kuba yaabaire aine obujunaanizibwa bwingi. Kwonka, akaba ataho obwire bw’okuza kuramya Yehova. Taragarukiire aha kwega amazima, kureka akagyendera aha bi yaayegire. N’ahabw’ekyo, akaruga Esiopia yaaza Yerusaalemu aha hekalu kuramya Yehova. Orugyendo orwo rwine kuba rwamutwariire obwire n’esente nyingi, kwonka akaba akora kyona ekirikwetengyesa aza kuramya Yehova.

6-7. Omwesiopia akoongyera ata kukunda Yehova?

⁶ Omwesiopia akeega amazima makuru kuruga ahari Filipo, agaabaire nigatwariramu okumanya ngu Yesu niwe Mesia. (Byak. 8:34, 35) Omukungu ogwo ku yaamanyire eki Yesu yaamukoreire akakwatwaho. Mbwenu shi akatwaza ata? Akaba naabaasa kucwamu kuguma n’ekitiinisa kye omu diini y’Ekiyudaaya ei yaabaire agiiremu. Kwonka akoongyera kukunda Yehova n’Omwana we. Rukundo egyo ekamuhiga kucwamu kubatizibwa akaba omukuratsi wa Yesu Kristo. Filipo ku yaareebire ngu omushaija ogwo ahikire kubatizibwa, akamubatiza.

⁷ Waatooreza Omwesiopia ogwo, noobaasa kwetebeekanisiza okubatizibwa. Kandi naiwe noija kugamba n’obumanzi oti: “Ekirikunzibira kubatizibwa niki?” Ka tureebe oku orikubaasa kukora nk’ebi Omwesiopia yaakozire: Akaguma naayega, akagyendera aha bi yaayegire, kandi akagumizamu naayongyera kukunda Ruhanga.

8. Ebiri omuri Yohaana 17:3 nibikukwataho bita?

⁸ Shoma Yohaana 17:3. Mbwenu shi ebigambo bya Yesu ebi bikakuhiga kucwamu kwega Baibuli? Eki nikyo kihikire ahari baingi. Kwonka shi ebigambo ebyo nibituhiga kugumizamu nitwega? Eego. Titurikwija kurekyera aho ‘kumanya’ ebirikukwata ahari “Ruhanga omwe ow’amazima.” (Mub. 3:11) Kandi nitwija kugumizamu nitumwegaho ebiro byona. Ku turikwongyera kwega ahari Yehova, nikwo turikwongyera kumwirira haihi.​—Zab. 73:28.

9. Twine kukora ki bwanyima y’okumanya enyegyesa ezirikutandikirwaho?

 ⁹ Amazima gari ngu, nitutandika kumanya Yehova turikwega enyegyesa ezirikutandikirwaho. Omu baruha ei entumwa Paulo yaahandiikiire Abaheburaayo akagamba aha nyegyesa za Baibuli ezirikutandikirwaho ‘nk’okwegyesa eby’okubandizaho.’ Akaba atarikugaya enyegyesa ‘ez’okubandizaho ezoorobi’, kureka akaba naazigyeragyeranisa n’amate agarikuhwera omwereere kukura. (Heb. 5:12; 6:1) Akahiga Abakristaayo boona kugumizamu nibeega ebirikukira aha nyegyesa ezirikutandikirwaho, kureka beegye n’amazima agatoorobi ag’omu Kigambo kya Ruhanga. Waagizire ekihika ky’okumanya enyegyesa za Baibuli ezigumire? Oyeteekateekire kugumizamu nootunguuka, orikwega ahari Yehova n’ebigyendererwa bye?

10. Ahabw’enki bamwe nibagumirwa kwega?

¹⁰ Baingi ahariitwe nitugumirwa kwega. Kandi shi iwe? Obu waabaire okiri aha ishomero, okeega kushoma gye n’okweyegyesa? Mbwenu shi okaba nookunda kushoma kandi orikugasirwa? Nari, okeereeba nk’otarikubaasa kwetegyereza ebiri omu bitabo? Ku kiraabe nikwo kiri, tori wenka. Yehova naabaasa kukuhwera. Ahakuba ahikiriire kandi niwe Mwegyesa orikukirayo oburungi.

11. Yehova ayorekire ata ngu n’Omwegyesa Orikukirayo?

¹¹ Yehova n’Omwegyesa Orikukirayo. (Isa. 30:20, 21) N’omugumisiriza, omunyambabazi, Omwegyesa orikwetegyereza. Naata omutima aha birungi ebi abeegi be barikukora. (Zab. 130:3) Kandi tarikutwenza ebi tutarikubaasa kukora. Ijuka, akakora obwongo bwawe omu muringo ogurikutangaaza. (Zab. 139:14) Tukahangwa n’ekyetengo ky’okwega. Omuhangi waitu naayenda ngu tugumizemu kwega kandi tukukunde. N’ahabw’ekyo ni kikuru hati kugira ekyetengo ky’amazima ga Baibuli. (1 Pet. 2:2) Taho ebigyendererwa ebi orikubaasa kuhikiiriza, kandi ohamire aha ntebeekanisa yaawe y’okushoma Baibuli n’okugyeyegyesa. (Yos. 1:8) Ahabw’okuhwerwa Yehova, noija kwongyera kukunda kushoma n’okwega ebirikumukwataho.

12. Ahabw’enki twine kuteekateeka aha bi Yesu yaarabiremu n’obuheereza bwe twaba nitweyegyesa?

¹² Butoosha gira obwire bw’okuteekateeka aha bi Yesu yaarabiremu n’obuheereza bwe. Okugyendera haihi n’ebiribatiro bya Yesu nikituhwera kuheereza Yehova omu mbeera ezi ezigumire. (1 Pet. 2:21) Yesu akagamba butunu embeera ezi abakuratsi be baabaire nibaija kurabamu. (Luk. 14:27, 28) Kwonka, akaba naahamiza kimwe ngu abakuratsi be ab’amazima nibaija kuba abasinguzi nkawe. (Yoh. 16:33) Yega obushonshorekye oburikukwata aha bi Yesu yaarabiremu, kandi oteho ebigyendererwa by’okumutooreza buri izooba.

13. Oine kugumizamu nooshaba ki Yehova, kandi ahabw’enki?

¹³ Okumanya kyonka tikirikumara. Okumanya nikukuhwera kwega bingi ebirikukwata ahari Yehova n’okugira emitwarize nka rukundo n’okwikiriza. (1 Kor. 8:1-3) Waaba nooyega, gumizamu nooshaba Yehova kukuhwera kwongyera kugira okwikiriza. (Luk. 17:5) Naagarukamu okushaba nk’okwo. Okwikiriza okurikwegamira aha kumanya okuhikire okurikukwata ahari Ruhanga waitu nikwija kukuhwera kugumizamu nootunguuka.​—Yak. 2:26.

14. Entumwa Petero akooreka ata obukuru bw’okugyendera aha bi turikwega? (Reeba n’ekishushani.)

¹⁴ Entumwa Petero akooreka ahabw’enki kiri kikuru abakuratsi ba Kristo kugumizamu  nibagyendera aha bi barikwega. Akagamba ebirikukwata ahari Noa. Yehova akagambira Noa ngu akaba naaza kucwekyereza abantu ababi ab’obunaku obwo, arikukoresa omwegyemure. Okumanya kyonka ngu hakaba nihaza kubaho omwegyemure kikaba kitarikwija kujuna Noa n’eka ye. Yetegyereze ngu Petero akagamba aha byabaireho omwegyemure gutakabaireho obu baabaire “nibakikora emeeri.” (1 Pet. 3:20) Buzima, Noa n’eka ye bakakora ebi Ruhanga yaabagambiire baayombeka emeeri mpango. (Heb. 11:7) Bwanyima Petero akagyeragyeranisa eki Noa yaakozire n’okubatizibwa, obu yaahandiika ngu, okubatizibwa, nikyo kishushani ky’egi, kandi nakwo hati nikubajuna. (1 Pet. 3:21) N’ahabw’ekyo, nitubaasa kugyeragyeranisa ebi orikukora hati kwetebeekanisiza okubatizibwa n’omurimo ogu Noa n’eka ye baakozire barikwombeka emeeri kumara emyaka. Oine kukora ki kwetebeekanisiza okubatizibwa?

15. Okweteisiza kimwe nikitwariramu ki?

¹⁵ Kimwe aha bi twine kubanza kukora n’okweteisa ebibi byaitu. (Byak. 2:37, 38) Okweteisiza kimwe nikikuhwera kukora empinduka. Mbwenu shi waarekiire aho kukora ebitarikushemeza Ruhanga, nk’ebikorwa by’obushambani, okukoresa etaabe, nari ebigambo ebitashemeire? (1 Kor. 6:9, 10; 2 Kor. 7:1; Efe. 4:29) Ekyo ku oraabe otakakikozire, teeraho kugumizamu nookora empinduka. Gaaniiraho n’orikukwegyesa Baibuli, nari shaba abareeberezi omu kibiina kukuhwera n’okukuhabura. Waaba okiri muto kandi orikutuura n’abazaire baawe, bashabe kukuhwera kucwa emize mibi erikubaasa kukuremesa kubatizibwa.

16. Entebeekanisa nungi y’eby’omwoyo neetwariramu ki?

¹⁶ Ni kikuru kuhamira aha ntebeekanisa nungi y’eby’omwoyo. Ekyo nikitwariramu okuza omu nteerane z’Ekikristaayo n’okuzejumbamu. (Heb. 10:24, 25) Kandi waikirizibwa kubuurira n’ekibiina, teeraho kukikora butoosha. Oku oraayongyere kwejumba omu murimo gw’okukiza amagara, nikwo araayongyere kugukunda. (2 Tim. 4:5) Waaba okiri muto kandi orikutuura n’abazaire baawe, yebuuze oti: ‘Abazaire bangye nibo barikunyijutsya kuza omu nteerane nari omu kubuurira?  Nari ekyo ninkyehabura?’ Ku oraabe nooyehabura kubikora, nooba nooyoreka okwikiriza na rukundo ei oiniire Yehova kandi ngu noomusiima. Ebyo n’ebikorwa ebirikworeka ngu nootiina Ruhanga, kandi nibyo biconco ebi orikumuha. (2 Pet. 3:11; Heb. 13:15) Ebiconco byona ebi turikuha Ruhanga twekundiire kandi tutagyemirwe nibimushemeza. (Gyeragyeranisa 2 Abakorinso 9:7.) Ebyo nitubikora ahabw’okuba nikitushemeza kuha Yehova ekirikukirayo oburungi.

17-18. Ni mutwarize ki mukuru oguraakuhwere kutunguuka kuhika aha kubatizibwa, kandi nigwija kukuhwera guta? (Enfumu 3:3-6)

¹⁷ Waagumizamu orikutunguuka kuhika aha kubatizibwa, noija kutunga oburemeezi. Abantu abamwe nibabaasa kukujuma, kukuhakanisa nari kukuhiiganisa ahabw’okwikiriza kwawe. (2 Tim. 3:12) Waaba nooteeraho kusingura omuze mubi, obumwe noobaasa kugaruka enyima. Nari noobaasa kurahuka kuhanika kandi oyehurire kubi ahakuba ebigyendererwa byawe nibireebeka nk’ebiri hare. Niki ekiraakuhwere kugumisiriza? N’okukunda Yehova.

¹⁸ Rukundo ei oiniire Yehova n’omutwarize mukuru. (Shoma Enfumu 3:3-6.) Rukundo ehami ei oiniire Ruhanga neebaasa kukuhwera kusingura oburemeezi. Baibuli neekira kugamba ahari rukundo etarikuhinduka ei Yehova ainiire abaheereza be. Ekyo nikimanyisa ngu tarikubaasa kutsigaho abaheereza be nari kureekyeraho kubakunda. (Zab. 100:5) Ohangirwe omu kishushani kya Ruhanga. (Kut. 1:26) Noobaasa kworeka ota rukundo nk’egyo?

19. Noobaasa kwongyera kworeka ota ngu noosiima byona ebi Yehova akukoreire? (Abagalatia 2:20)

¹⁹ Yoreka ngu noosiima. (1 Tes. 5:18) Buri izooba, yebuuze oti: ‘Yehova naayoreka ata ngu naankunda?’ Reero siima Yehova, orikugamba byenyini ebi akukoreire kurabira omu kushaba. Yetegyereze ngu Yehova naakukorera ebirungi ahabw’okugira ngu naakukunda nk’oku entumwa Paulo yaakyetegyereize. (Shoma Abagalatia 2:20.) Yebuuze oti: ‘Naanye niinyenda kworeka ngu niimukunda?’ Rukundo ei oiniire Yehova neija kukuhwera kwemera oburemeezi n’okwangira okugyezibwa. Neija kukuhiga kuhamira aha ntebeekanisa yaawe ey’eby’omwoyo n’okugumizamu nooyoreka ngu nookunda Sho buri izooba.

20. Okwehayo ahari Yehova nikitwariramu ki, kandi okucwamu oku ni kukuru kuta?

 ²⁰ Bwanyima y’obwire, rukundo ei oiniire Yehova neija kukuhiga kushaba orikukoresa ebigambo by’omutaano. Noija kwehayo ahari Ruhanga. Ijuka ngu, waayehayo ahari Yehova, noija kugira amatsiko g’okuba owe ebiro byona. Waayehayo ahari Yehova nooraganisa kumuheereza omu mbeera enungi n’embi. Tikirikukwetengyesa kugaruka kwehayo. Okwehayo n’okucwamu kukuru munonga. Kwonka teekateeka ahari eki, noija kuba noocwamu aha bintu bingi, ebimwe nibibaasa kuba birungi, kwonka tihariho okucwamu okurikukira okwehayo ahari Yehova. (Zab. 50:14) Sitaane naija kuteeraho kutuubya rukundo ei oiniire Sho, arikwenda ngu otaguma omuhamiireho. Otaikiriza Sitaane kukusingura! (Yob. 27:5) Rukundo ehami ei oiniire Yehova neija kukuhwera kuhamira aha kuragaanisa kwawe n’okwongyera kwirira haihi Sho ow’omu iguru.

21. Ahabw’enki nitubaasa kugira ngu okubatizibwa tiyo muheru kureka n’entandikiro?

²¹ Waaheza kwehayo ahari Yehova, gambira abareeberezi b’ekibiina kyawe ngu nooyenda kubatizibwa. Butoosha guma noijuka ngu okubatizibwa, tiyo muheru kureka n’entandikiro. Nooba waatandika orugyendo rw’okuheereza Yehova orutaine bugarukiro. N’ahabw’ekyo hati hamya rukundo ei oiniire Sho. Taho ebigyendererwa ebiraakuhwere kuhamya rukundo egyo buri izooba. Ekyo nikiija kukuhiga kubatizibwa. Eryo ka niriija kuba izooba ry’okushemererwa kwingi! Kwonka egi n’entandikiro. Twine obwesigye ngu rukundo ei oiniire Yehova n’Omwana we neija kugumizamu neekura ebiro byona!