1-2. Nootunga migisha ki bwanyima y’okubatizibwa?

 NIKISHEMEZA omuntu ku arikubatizibwa akaza omu ka ya Yehova. Abaine omugisha ogu ogw’omutaano nibaikirizana na Daudi omuhandiiki wa zaaburi, owaagizire ati: ‘[Aine okushemererwa ou Yehova] atoorana, akamwiriza haihi, kuguma omu bikaari bye.’—Zab. 65:4.

² Yehova tarikwikiriza buri omwe kwija omu ka ye. Nk’oku tureebire omu kicweka eky’enyima, naacwamu kwirira haihi abarikworeka ngu nibenda kugira omukago guhami nawe. (Yak. 4:8) Waayehayo ahari Yehova kandi okabatizibwa, noomwirira haihi omu muringo gw’omutaano. Noobaasa kuhamiza kimwe ngu bwanyima y’okubatizibwa naija ‘kukushukaho emigisha, obure n’ah’okugita.’—Mal. 3:10; Yer. 17:​7, 8.

3. Abakristaayo abeehaireyo kandi bakabatizibwa baine kukora ki? (Omubuurizi 5:​4, 5)

³ Okubatizibwa n’entandikiro y’okuheereza Yehova. Bwanyima y’okubatizibwa noija kuba oine kukora kyona ekirikubaasika kuhikiiriza okuraganisa kwawe, n’obu waakwohibwa nari okahikwaho ebirikugyeza okwikiriza kwawe. (Shoma Omubuurizi 5:​4, 5.) Ahabw’okugira ngu ori omwegi wa Yesu, noija kuteeraho kumutooreza, kandi oyorobere ebiragiro bye. (Mat. 28:​19, 20; 1 Pet. 2:21) Ekicweka eki nikiija kukuhwera kukora ekyo.

 GUMIZAMU NOOKURATIRA YESU N’OBU HAAKUBAHO OBUREMEEZI N’OKWOHIBWA

4. Abeegi ba Yesu nibeekorera omuti mu muringo ki?

⁴ Omuntu yaabatizibwa, tashemereire kuteekateeka ngu taraije kuhikwaho oburemeezi. Yesu akakyoreka butunu ngu abeegi be bakaba nibaija kwekorera omuti. Kandi, bakaba nibaija kukikora “obutoosha.” (Luk. 9:23.) Mbwenu shi akaba naamanyisa ngu abakuratsi be nibaija kuguma nibabonabona? Ngaaha buzima. Kureka, akaba naayoreka ngu oyihireho emigisha ei baabaire nibaija kutunga, bakaba nibaija n’okuhikwaho oburemeezi. Kandi bumwe aha buremeezi obwo, bukaba nibubaasa kuba obw’amaani.—2 Tim. 3:12.

5. Yesu akagira ngu abarikwefeerereza bakaba nibaija kutunga migisha ki?

⁵ Obundi ohakanisiibwe ab’eka yaawe, nari haine ebi oyefeerereize kubaasa kwebembeza eby’Obukama. (Mat. 6:33) Kyaba nikwo kiri, gira obwesigye ngu Yehova naareeba byona ebi orikumukorera. (Heb. 6:10) Noobaasa kuba waareebire okuhikiirira kw’ebigambo bya Yesu ebi: “Tihaine muntu owaatsigireho enju, beene ishe, banyaanya, nyina, ishe, abaana, nari ekibanja kye ahabwangye n’ahabw’engiri, otariheebwa omu biro bya hati ebirikukira ebyo emirundi igana, enju, beene ishe, banyaanya, baanyina, abaana, ebibanja, hamwe n’okuhiigwa, kandi omu biro bya bwanyima akaheebwa amagara agatahwaho.” (Mak. 10:​29, 30) Emigisha ei otungire neekirira kimwe ebi obaasize kwefeerereza.—Zab. 37:4.

6. Ahabw’enki nikiija kukwetengyesa kugumizamu nooyangira ebi “omubiri gwetenga” bwanyima y’okubatizibwa?

⁶ Nikiija kukwetengyesa kusingura ebi “omubiri gwetenga,” na bwanyima y’okubatizibwa. (1 Yoh. 2:16) Kandi ahabw’okugira ngu ori mwijukuru wa Adamu, noija kukora enshobe. Obumwe noobaasa kwehurira nk’oku Paulo yaayehuriire. Akahandiika ati: “Omu mutima gwangye nsiima ebiragiro bya Ruhanga, kwonka omu ngingo zangye nshangamu ekindi kiragiro ekirwanisa ekiragiro eky’omu bwengye bwangye, kimpindura omuhuuku w’ebiragiro by’ekibi ebiri omu ngingo zangye.” (Rom. 7:​22, 23) Noobaasa kuhwa amaani ahabw’okukora enshobe. Kwonka, okuteekateeka aha ki waaraganiise Yehova obu waayehayo, nikiija kukuhwera kumariirira kwangira okwohibwa. Amazima agari ngu, okuraganisa okwo nikwija kukuhwera waayohibwa. Mu muringo ki?

7. Okwehayo ahari Yehova nikwija kukuhwera kuta kuguma omuhamiireho?

⁷ Waayehayo ahari Yehova, nooyeyangisa. Eki nikimanyisa ngu noocwamu kutakorera aha byetengo byawe ebitarikushemeza Yehova. (Mat. 16:24) N’ahabw’ekyo, waayohibwa tikiraakwetengyese kuteekateeka eki oraakore. Noija kuba waaherize kucwamu. Noija kuba omariirire kuguma ori omwesigwa ahari Yehova. Waakora otyo, noija kuba nootooreza Yobu. N’obu araabe yaahikirweho oburemeezi bw’amaani akagira ati: ‘Okuhitsya obu ndifa, tindikwija kureka kuguma ndi omwesigwa!’—Yob. 27:5.

8. Okuteekateeka aha kushaba kw’okwehayo kwawe nikikuhwera kita kwangira okwohibwa?

⁸ Waateekateeka aha kuraganisa kwawe okw’okwehayo ahari Yehova, noija kutunga amaani g’okwangira okwohibwa. Nk’eky’okureeberaho, torikwija kweshunga na muka bandi. Ahabw’enki? Ahabw’okuba noija kuba waaraganiise kutakora ekintu nk’ekyo. Ekyo nikiija kukuhwera kutagira enyehurira ezigumire kweihamu. Torikwija kutoora “akahanda k’enkozi z’ebibi.”—Enf. 4:​14, 15.

9. Okuteekateeka aha kwehayo nikikuhwera kita kwebembeza eby’omwoyo?

 ⁹ Kandi shi ku waakuheebwa omurimo oguraakuremese kuguma nooza omu nteerane z’Ekikristaayo? Noomanya eki oine kukora. Oine kuba waacwiremu kare kutaikiriza omurimo ogwo. N’ahabw’ekyo, tikirikwija kukwetengyesa kuteekateeka, aha ku oraareetere okucwamu kubi kurugamu ekirungi. Waateekateeka aha ku Yesu yaabaire amaririire kushemeza Ishe, noija kucwamu ahonaaho kwanga kukora ekintu kyona ekitarikushemeza Ruhanga ou waayehaireyo.—Mat. 4:10; Yoh. 8:29.

10. Yehova naija kukuhwera ata bwanyima y’okubatizibwa kugumizamu nookuratira Yesu?

¹⁰ Nangwa okwohibwa n’okugyezibwa nibikubaasisa kworeka ngu omariirire kugumizamu nookuratira Yesu. Waakora otyo, noobaasa kugira obwesigye ngu Yehova naija kukuhwera. Baibuli neegira eti: “Ruhanga n’ow’okwesigwa; taribaikiriza kugyezibwa ekigyezo eki mutarikubaasa, kureka omu kigyezo ekyo naija kubateeraho oburyo bw’okuhunga, ngu mubaase kukigumisiririza.”—1 Kor. 10:13.

OKU ORIKUBAASA KUGUMIZAMU NOOKURATIRA YESU

11. Gumwe aha miringo mirungi oku orikubaasa kugumizamu nookuratira Yesu, ni guuha? (Reeba n’ekishushani.)

¹¹ Yesu akaba ari omwekambi, kandi akaguma aine omukago murungi na Yehova kurabira omu kushaba. (Luk. 6:12) Okugumizamu nookora ebirikukwiriza haihi na Yehova, ni gumwe aha miringo mirungi oku orikubaasa kuguma nookuratira Yesu bwanyima y’okubatizibwa. Baibuli neegira eti: ‘Kwonka amazima agu tuhikiremu, tube nigo [twaguma] nitugyenderamu.’ (Fil. 3:16) Obumwe, noija kuhurira eby’okureeberaho  by’ab’eishe-emwe na banyaanyazi-itwe ababaasize kwongyera aha buheereza bwabo. Obundi bakaza omu Ishomero ry’Ababuurizi b’Obukama nari ahu ababuurizi barikwendwa munonga. Waaba noobaasa kutaho ekigyendererwa nk’ekyo kikore ahonaaho. Abaheereza ba Yehova nibaba baine ekihika ky’okwongyera aha buheereza bwabo. (Byak. 16:9) Kwonka shi, ku waakuba otarikubaasa kukora ekyo hati? Otahwa amaani. Nikikwetengyesa kugumisiriza omu mpaka z’Ekikristaayo. (Mat. 10:22) Otagaya ebi orikubaasa kukora kuheereza Yehova kurugiirira aha kubaasa kwawe n’embeera ei orimu. Ogwo nigwo muringo mukuru oku orikubaasa kugumizamu nookuratira Yesu bwanyima y’okubatizibwa.—Zab. 26:1.

12-13. Noobaasa kukora ki omujinya gwawe gwatandika kutuuba? (1 Abakorinso 9:​16, 17) (Reeba n’akabokusi “ Guma omu Mpaka.”)

¹² Kwonka shi, ku waakwetegyereza ngu okushaba kwawe tikurikuruga aha mutima nari tokikunda obuheereza bwawe? Kandi shi okushoma Baibuli ku kwakuba kutakikushemeza nka ira? Waatandika kugira enyehurira nk’ezo bwanyima y’okubatizibwa, otateekateeka ngu tokiine buhwezi bw’omwoyo gwa Yehova. Enyehurira zaawe obumwe nizibaasa kuhinduka, ahabw’okugira ngu tohikiriire. Omujinya gwawe gwatandika kutuuba, teekateeka aha ky’okureeberaho ky’entumwa Paulo. N’obu yaabaire naateeraho kutooreza Yesu, akaba naamanya ngu obumwe tarikubaasa kugira obweziriki nibwo bumwe. (Shoma 1 Abakorinso 9:​16, 17.) Akagira ati: ‘[N’obu] ndaabe nimbuurira ngyemirwe, nshemereire kubuurira ahabw’okukwatsibwa’ amakuru marungi. Paulo akaba amaririire kuhikiiriza obuheereza bwe n’obu obumwe yaabaire ahurira ataine mujinya.

 ¹³ Nikyo kimwe, otacwamu orikwihirira aha ku orikwehurira. Mariirira kukora ekihikire n’obu orikuba otarikwenda kukikora. Bwanyima y’obwire, ebi orikukora nibibaasa kukureetera kuhindura enyehurira zaawe. Waaguma oine entebeekanisa nungi y’eby’omwoyo, nikiija kukuhwera kuguma nookuratira Yesu bwanyima y’okubatizibwa. Okuhamira aha ntebeekanisa yaawe y’eby’omwoyo nikiija kugumya ab’eishe-emwe bagyenzi baawe.—1 Tes. 5:11.

GUMA ‘NOOYESHWIJUMA’ KANDI ‘NOOYEGYEZA’

14. Oine kuguma nooshwijuma ki butoosha, kandi ahabw’enki? (2 Abakorinso 13:5)

¹⁴ Kandi noija kugasirwa waaguma nooyeshwijuma bwanyima y’okubatizibwa. (Shoma 2 Abakorinso 13:5.) Obumwe, oine kweshwijuma kureeba yaaba nooshaba butoosha, nooshoma Baibuli kandi nooyeyegyesa, nooza omu nteerane kandi nooyejumba omu kubuurira. Teeraho kusherura oku orikubaasa kwongyera kugasirwa omu ntebeekanisa z’eby’omwoyo ezo. Nk’eky’okureeberaho, yebuuze ebibuuzo nk’ebi: ‘Nimbaasa kushoboororera abandi enyegyesa za Baibuli ezirikutandikirwaho? Hariho oku ndikubaasa kwongyera kushemererwa omu buheereza bwangye? Okushaba kwangye nikworeka ngu niinyesigira kimwe Yehova, kandi mmugambira kyenyini eki ndikwenda? Ninza omu nteerane z’Ekikristaayo butoosha? Nimbaasa kwongyera nta kuhurikiza gye omu nteerane n’okuzeejumbamu?’

15-16. Ebi ow’eishe-emwe omwe yaarabiremu noobyegyeraho ki aha bikwatiraine n’okwangira okwohibwa?

¹⁵ Oine kuba ow’amazima na waaba nooshwijuma obweremwa bwawe. Ow’eishe-emwe orikwetwa Robert naagamba ekyamuhikireho ekiine akakwate n’enshonga egyo: “Obu naabaire nyine emyaka 20, nkaba ninkora ebiro bikye omu saabiiti. Eizooba rimwe bwanyima y’okwinuka aha murimo, omukozi mugyenzi wangye akanyeta kumutaayaayira. Akangira ngu nitwija kuba turi twenka ‘tugire obwire burungi hamwe.’ Nkabanza kwekwatsakwatsa, kwonka bwanyima nkanga kandi naamushoboororera ahabw’enki.” Robert akangira okwohibwa, kandi ekyo nitukimusiimira. Kwonka ku yaakiteekateekireho, akeetegyereza ngu akaba naabaasa kutwaza omu muringo gw’omutaano. Naagira ati: “Tindaangire ahonaaho, nk’oku Yosefu yaayangiire muka Potifaari. (Kut. 39:​7-9) Nangwa, nkeebuuza ahabw’enki ntaraamwangiire ahonaaho. Embeera egyo ekampwera  kureeba ngu nkaba nyine kuhamya omukago gwangye na Yehova.”

¹⁶ Noobaasa kugasirwa waayeshwijuma nka Robert. N’obu waakusigura okwohibwa, yebuuze oti: ‘Naatwara bwire burikwingana ki kwanga?’ Waareeba ngu haine ahu oine kuhinduramu, otakayehurira kubi. Shemererwa ahabw’okumanya obweremwa obwo. Kigambeho omu kushaba, kandi teeraho kukora ebiraakuhwere kwongyera kumariirira kugyendera aha mitindo ya Yehova ey’emicwe.—Zab. 139:​23, 24.

17. Ebyahikire ahari Robert bikaba nibitwariramu bita eiziina rya Yehova?

¹⁷ Hariho ekindi eki turikubaasa kwegyera aha byahikire ahari Robert. Naayongyeraho ati: “Omukozi mugyenzi wangye ku yaanyetsire nkanga, akangira ati: ‘Waasingura ekigyezo!’ Nkamubuuza eki yaabaire naamanyisa. Reero akanshoboororera ngu munywani we owaabaire atakiri Mujurizi wa Yehova akamugira ngu Abajurizi ba Yehova eminyeeto boona n’ebirumira-habiri, kandi nibabaasa kutaguma bari abeesigwa baagyezibwa. N’ahabw’ekyo, akagira munywani we ngu naija kugyereza ahariinye kureeba yaaba nikwo kiri. Nkashemererwa munonga ahabw’okumanya ngu nkahimbisisa eiziina rya Yehova.”

18. Omaririire kukora ki bwanyima y’okubatizibwa? (Reeba n’akabokusi “ Ebicweka Bikurataine Ebiraakushemeze.”)

¹⁸ Waayehayo ahari Yehova kandi okabatizibwa, nooyoreka ngu nooyenda kweza eiziina rye n’obu haakubaho ki. Kandi noobaasa kugira obwesigye ngu Yehova naamanya oburemeezi obu orikurabamu n’okwohibwa oku orikwangira. Naija kukuha emigisha ahabw’okuteeraho kuguma ori omwesigwa. Gira obwesigye ngu orikuhwerwa omwoyo gurikwera, noija kugira amaani g’okukora ekyo. (Luk. 11:​11-13) Ahabw’obuhwezi bwa Yehova, noija kugumizamu nookuratira Yesu bwanyima y’okubatizibwa.