1. Ni migisha ki ei turikwesiimira ahabw’okuba omu kibiina kya Yehova?

 N’OMUGISHA gw’omutaano kuba omu kibiina kya Yehova omu bwire obu obugumire obw’ebiro by’emperu. Embeera omu nsi nizoongyera kusiisikara, kwonka Yehova atuhaire eka y’eby’omwoyo ey’ab’eishe-emwe na banyaanyazi-itwe erimu obumwe. (Zab. 133:1) Naatuhwera kugira enkoragana nungi nk’eka. (Efe. 5:33–6:1) Kandi naatuha obwengye oburikwetengyesa kugira obusingye bw’omu mutima.

2. Twine kukora ki, kandi ahabw’enki?

² Kwonka, twine kukora n’amaani kugumizamu nituheereza Yehova omu bwesigwa. Ahabw’enki? Ahabw’okuba obumwe nitubaasa kuguubwa kubi ahabw’obutahikiirira bw’abandi. Kandi nitubaasa kuhwa amaani, twaguma nitukora enshobe nizo zimwe. Nituba twine kugumisiriza turikuheereza Yehova (1) ow’eishe-emwe mugyenzi waitu yaatugwisa kubi, (2) ou turi nawe omu bushwere yaatureebya, (3) na twakora ekibi ky’amaani. Omu kicweka eki, nituza kushwijuma buri emwe aha mbeera ezi. Nituza n’okureeba eki turikubaasa kwegyera aha beesigwa abarikugambwaho omu Baibuli.

GUMISIRIZA OW’EISHE-EMWE MUGYENZI WAAWE YAAKUGWISA KUBI

3. Abaheereza ba Yehova nibahikwaho buremeezi ki?

³ Oburemeezi. Abakristaayo abamwe baine emitwarize erikutugwisa kubi. Abandi nibabaasa kutureebya nari kututwariza omu muringo gutari gw’embabazi. Abareeberezi nibabaasa kukora enshobe. Embeera nk’ezo nizibaasa kureetera abamwe kubangaanisa yaaba eki n’ekibiina kya Ruhanga. Omu mwanya  gw’okugumizamu nibaheereza Ruhanga n’omutima gumwe bari n’Abakristaayo bagyenzi baabo, nibabaasa kurekyera aho kuza omu nteerane n’okukwatanisa n’ababagwisize kubi. (Zef. 3:9) Kwonka shi ekyo n’eky’obwengye? Teekateeka aha ki turikubaasa kwegyera aha muntu orikugambwaho omu Baibuli owaahikirweho oburemeezi nk’obwo.

4. Entumwa Paulo akahikwaho buremeezi ki?

⁴ Eky’okureeberaho ky’omu Baibuli. Entumwa Paulo akaba naamanya ngu Abakristaayo bagyenzi be bakaba batahikiriire. Nk’eky’okureeberaho, tibaramutwariize gye obu yaatandika kukwatanisa n’ekibiina. (Byak. 9:26) Kandi, abamwe bakamugambaho ebitahikire kushiisha eiziina rye. (2 Kor. 10:10) Paulo akareeba ow’eishe-emwe oine obujunaanizibwa arikucwamu kubi, ekirikubaasa kuba kyateerize abandi entsibo. (Gal. 2:​11, 12) Kandi Mako munywani wa Paulo, akamureebya munonga. (Byak. 15:​37, 38) Paulo akaba naabaasa kwikiriza emwe aha mbeera ezo kumuremesa kukwatanisa n’abaamugwisize kubi. Kwonka, akaguma aine emiteekateekyere mirungi aha b’eishe-emwe bagyenzi be, kandi yaagumizamu naaheereza Yehova. Niki ekyahweraire Paulo kugumisiriza?

5. Niki ekyahweraire Paulo kuguma aine enkoragana nungi n’ab’eishe-emwe bagyenzi be? (Abakolosai 3:​13, 14) (Reeba n’ekishushani.)

⁵ Paulo akaba naakunda ab’eishe-emwe bagyenzi be. Rukundo egyo ekamuhwera kuta omutima aha mitwarize yaabo mirungi, beitu butari butahikiirira bwabo. Kandi, rukundo ekahwera Paulo kukora eki yaahandiikire omu Abakolosai 3:​13, 14. (Kishome.) Yetegyereze oku ekyo kyamuhweraire kutwariza Mako. Paulo taragumire aine ekiniga, n’obu Mako araabe yaamutsigireho omu rugyendo rwe orw’okubanza orw’obumiisani. Bwanyima, Paulo akahimbisa Mako omu baruha ei yaahandiikiire ekibiina kya Kolosai, arikugira ngu n’omukozi mugyenzi we ow’omuhendo, kandi omuhuumuriza murungi. (Kol. 4:​10, 11) Obu Paulo yaabaire akomiirwe Rooma, akashaba Mako kuba niwe yaija kumuhwera. (2 Tim. 4:11) Buzima, Paulo akasaasira ab’eishe-emwe bagyenzi be. Nitubaasa kumwegyeraho ki?

6-7. Nitubaasa kuguma nitworeka tuta rukundo ab’eishe-emwe bagyenzi baitu na baakora enshobe? (1 Yohaana 4:7)

⁶ Eishomo. Yehova naayenda tugumizemu kworeka ngu nitukunda ab’eishe-emwe na banyaanyazi-itwe. (Shoma 1 Yohaana 4:7.) Ow’eishe-emwe yaaremwa kworeka omutwarize gw’Ekikristaayo, nitubaasa kuteekateeka  ngu yaaba naateeraho kugyendera aha misingye ya Baibuli, kandi eki yaakora yaaba atakigyendereire. (Enf. 12:18) Ruhanga naakunda abaheereza be abeesigwa n’obu barikukora enshobe. Tarikutsigaho twakora enshobe, kandi tarikubiika enziika. (Zab. 103:9) Ka ni kikuru munonga okutooreza Tataitwe orikusaasira!—Efe. 4:32–5:1.

⁷ Kandi obu emperu y’ensi egi erihakye kuhika, twine kuguma nitukwatanisa n’ab’eishe-emwe na banyaanyazi-itwe. Nitubaasa kwongyera kuhiiganisibwa, kandi tukomwe ahabw’okwikiriza kwaitu. Ekyo kyabaho, nitwija kwetenga obuhwezi bw’ab’eishe-emwe na banyaanyazi-itwe okukira obundi bwona. (Enf. 17:17) Teekateeka aha kyahikire ahari Josep, a owa Spain. We n’ab’eishe-emwe abandi bakakomerwa hamwe ahabw’okutagwera rubaju omu by’obutegyeki. Naagira ati: “Omu kihome, kikaba kyorobi kugira obutaikirizana n’ab’eishe-mwe ahabw’okutuura hamwe. Tukaba twine kugumisiririzana kandi tukasaasirana. Ekyo kikatuhwera kuguma twine obumwe n’oburinzi. Tukaba nitutuura n’embohe abatarikuheereza Yehova. Eizooba rimwe nkahendeka omukono baaguta omu purasita, n’ahabw’ekyo nkaba tarikubaasa kugira eki naayegasira. Kwonka, omwe aha b’eishe-emwe akanyogyeza emyenda, kandi yaandeeberera omu miringo endiijo. Bakanyoreka rukundo eyaabuzima obu naabaire niingyetenga munonga.” Ezo ka n’enshonga nungi ezirikutureetera kushoboorora obutaikirizana n’abandi!

GUMISIRIZA OU ORI NAWE OMU BUSHWERE YAAKUREEBYA

8. Abari omu bushwere nibatunga buremeezi ki?

⁸ Oburemeezi. Obushwere bwona burimu oburemeezi. Baibuli neegamba butunu ngu abari omu bushwere nibaija kugira “obusaasi omu mubiri.” (1 Kor. 7:28) Ahabw’enki? Ahabw’okugira ngu bombi abarikuza omu bushwere nibaba batahikiriire, baine emitwarize etarikushushana, nibakunda kandi nibanga ebintu bitarikushushana. Nibabaasa kuba nibaruga omu nganda zitarikushushana nari bakuriire omu mbeera zitarikushushana. Haahinguraho obwire, nibabaasa kworeka emitwarize ei bataroorekire barikweriima. Kimwe ahari ebyo nikibaasa kureetaho oburemeezi. Omu mwanya gwa buri omwe kwikiriza enshobe kandi bakateeraho kuzishoboorora, buri omwe naabaasa kwekwatsa mugyenzi we. Nangwa nibabaasa kureeba okutaana nari okugaitururwa nk’omuringo gw’okushoboorora oburemeezi bwabo. Mbwenu shi ekyo kihikire? b Ka twegyere aha ky’okureeberaho ky’omu Baibuli eky’owaagumisiriize embeera egumire omu bushwere.

9. Abigaili akatunga buremeezi ki?

⁹ Eky’okureeberaho ky’omu Baibuli. Abigaili akaba ari mu bushwere na Nabali, ou Baibuli erikugira ngu akaba ari omunyamwaga, kandi aine emicwe mibi. (1 Sam. 25:3) Kiine kuba kyagumiire Abigaili kutuura n’omushaija nk’ogwo. Mbwenu shi Abigaili akaba naabaasa kuruga omu bushwere bwe? Eego. Akaba naabaasa kukikora, obu Daudi owaabaire naija kuba omugabe wa Israeli, yaija kwita iba ahabw’okumujuma n’abashaija be. (1 Sam. 25:​9-13) Abigaili akaba naabaasa kuhunga, aikirize Daudi kuhikiiriza ekigyendererwa kye. Kwonka, akataaha omu nshonga yaayeshengyereza Daudi kutaita Nabali. (1 Sam. 25:​23-27) Niki ekirikubaasa kuba kyamuhigire kukora ekyo?

10. Niki ekirikubaasa kuba kyahweraire Abigaili kugumisiriza embeera egumire omu bushwere bwe?

 ¹⁰ Abigaili akaba naakunda Yehova kandi arikuha ekitiinisa emitindo ye y’obushwere. Hatariho kubangaanisa akaba naamanya eki Ruhanga yaagambiire Adamu na Haawa obu yaatandikaho obushwere bw’okubanza. (Kut. 2:24) Abigaili akaba naamanya ngu Yehova naatwara entebeekanisa y’obushwere nk’erikwera. Akaba naayenda kushemeza Ruhanga kandi ekyo kikamuhiga kukora kyona ekirikwetengyesa kujuna ab’eka ye otwariiremu na iba. Akagira eki yaakora ahonaaho kuzibira Daudi kwita Nabali. Kandi akaba ayeteekateekire kushaba okusaasirwa ahabw’enshobe ei atarakozire. Buzima, Yehova akaba naakunda omukazi ogwo emanzi owaabaire atarikweyendeza. Abari omu bushwere nibabaasa kwegyera ki ahari Abigaili?

11. (a) Yehova naayenda ngu abari omu bushwere bakore ki? (Abaefeso 5:33) (b) Waayegyera ki aha ku Carmen yaataireho kurinda obushwere bwe? (Reeba n’ekishushani.)

¹¹ Eishomo. Yehova naayenda ngu abari omu bushwere bahe entebeekanisa egyo ekitiinisa, n’obu omwe aharibo yaakuba agumire kutuuranwa. Ruhanga naashemererwa yaareeba abari omu bushwere barikuteeraho kukundana kandi bakahaana ekitiinisa batarikweyendeza. (Shoma Abaefeso 5:33.) Teekateeka aha ky’okureeberaho kya Carmen. Bwanyima y’emyaka mukaaga aherize kutaaha omu bushwere, Abajurizi ba Yehova bakatandika kumwegyesa Baibuli kandi yaabatizibwa. Naagira ati: “Ibanyi tarakikunzire. Akagirira Yehova eihari. Akaba naanjuma kandi arikuntiinatiinisa ngu naaza kuntsigaho.” Kwonka nabwo, Carmen akagumisiriza omu bushwere bwe. Kumara emyaka 50, atwire naateeraho kuha iba ekitiinisa kandi amutwariza omu muringo gwa rukundo. Naayongyeraho ati: “Emyaka ku yaagumire neehinguraho, nkeega kumanya enyehurira za ibanyi n’okugamba nawe omu muringo gw’embabazi. Okumanya ngu obushwere n’oburikwera omu maisho ga Yehova, kikandeetera kukora kyona eki ndikubaasa kuburinda. Nkateeraho kuguma na ibanyi ahabw’okukunda Yehova.” c Waagira oburemeezi omu bushwere bwawe, gira obwesigye ngu Yehova naija kukushagika kandi akuhwere kugumisiriza.

GUMISIRIZA N’OBU WAAKUKORA EKIBI KY’AMAANI

12. Nitubaasa kwehurira tuta twakora ekibi ky’amaani?

¹² Oburemeezi. Twakora ekibi ky’amaani, nitubaasa kwehurira kubi munonga. Baibuli  neegira ngu ebibi byaitu nibibaasa kutureetera kugira “omutima oguhendekire.” (Zab. 51:17) Ow’eishe-emwe orikwetwa Robert, kumara emyaka akateeraho kuba omuheereza omu kibiina. Kwonka, akakora ekibi ky’amaani, yaamanya ngu areebize Yehova. Naagira ati: “Omuntu wangye w’omunda akanshinja munonga, okaba nooshusha ngu nyekoreire entanuuru y’amatafaari. Kandi nkatetema omunda. Nkarira kandi naashaba Yehova. Ninyijuka ndikuteekateeka ngu Yehova tarikwija kugaruka kuhurira okushaba kwangye. Ahabw’okugira ngu nkaba mureebize.” Twacumura, nitubaasa kuhendeka omutima tuteekateekye ngu Yehova atutsigireho. (Zab. 38:4) Ku oraabe oreehuriireho otyo, teekateeka aha ky’okureeberaho ky’omu Baibuli eky’owaagumisiriize arikuheereza Yehova n’obu araabe yaakozire ekibi ky’amaani.

13. Petero akakora kibi ki ky’amaani, kandi kikamureetera kwehurira ata?

¹³ Eky’okureeberaho ky’omu Baibuli. Harikuburayo ekiro kimwe Yesu akaitwa, Petero akakora enshobe zikurataine ezaamureetaire kukora ekibi ky’amaani. Ey’okubanza, akooreka ngu naayeyesiga ekirenga arikugira ngu naija kuguma ahamiire ahari Yesu n’obu entumwa abandi baakumutsigaho. (Mak. 14:​27-29) Eyaakuratsireho, obu baabaire bari omu musiri gwa Gesesemaani, akaremwa kuguma naareeba. (Mak. 14:​32, 37-41) Bwanyima, abaserukare ku baizire kukwata Yesu, Petero akamutsigaho. (Mak. 14:50) Empereruka, akeehakana Yesu emirundi eshatu ngu tarikumumanya. (Mak. 14:​66-71) Petero akatwaza ata ku yaamanyire ngu yaakora ekibi ky’amaani? Akarira munonga, ahabw’ekibi eki yaakozire. (Mak. 14:72) Teekateeka oku yaayehuriire munywani we Yesu ku yaitsirwe bwanyima y’eshaaha nkye. Petero ka aine kuba yaayehuriire kubi munonga!

14. Niki ekyahweraire Petero kugumizamu naaheereza Yehova? (Reeba n’ekishushani .)

¹⁴ Petero akabaasa kugumizamu naaheereza Yehova ahabw’enshonga zitari zimwe. Tareetaniise aha bandi, kureka akaguma naakwatanisa n’ab’eishe-emwe, kandi bakamuhuumuriza. (Luk. 24:33) Yesu ku yaazookire akeeyoreka Petero kumugumya. (Luk. 24:34; 1 Kor. 15:5) Kandi, omu mwanya gwa Yesu kucwera Petero orubanja ahabw’enshobe ezi yaakozire, akamugira ngu akaba naija kumuha obujunaanizibwa bukuru. (Yoh. 21:​15-17) Akaba naamanya ngu asiisire munonga, kwonka tarahwairemu amaani. Ahabw’enki? Ahakuba akaba naahamiza kimwe ngu Mukama we, Yesu, naakimukunda. Kandi  ab’eishe-emwe bakagumizamu nibamushagika. Nitubaasa kwegyera ki ahari Petero?

15. Yehova naayenda twehamize ki? (Zaaburi 86:5; Abarooma 8:​38, 39) (Reeba n’ekishushani.)

¹⁵ Eishomo. Yehova naayenda ngu tuhamize kimwe ngu naatukunda kandi ayeteekateekire kutusaasira. (Shoma Zaaburi 86:5; Abarooma 8:​38, 39.) Ku turikukora ekibi nitweshinja. Ekyo n’ekya butoosha kandi kihikire. Kwonka, titushemereire kuteekateeka ngu Yehova tarikutukunda kandi tarikubaasa kutusaasira. Kureka, twine kushaba obuhwezi ahonaaho. Robert, owaaba yaagambirweho naagira ati: “Nkakora ekibi ahabw’okweyesiga ngu nimbaasa kwangira okwohibwa.” Akeetegyereza ngu akaba aine kugambira abareeberezi. Naagira ati: “Ku naaherize kugamba nabo, ahonaaho nketegyereza ngu Yehova naabakoresa kumpamiza ngu naankunda. Abareeberezi tibarampugireho. Bakampwera kuhamya ngu Yehova akaba atantsigireho.” Naitwe nitubaasa kuhamiza kimwe ngu Yehova naatukunda, kandi naatusaasira twayeteisa, tukasherura obuhwezi oburikwetengyesa, kandi tukateeraho kutakora enshobe nizo zimwe. (1 Yoh. 1:​8, 9) Okugira obwesigye obwo nikiija kutuhwera kuteehwa amatsiko twateera entsibo nari twakora ekibi.

16. Ahabw’enki omariirire kugumisiriza orikuheereza Yehova?

¹⁶ Yehova naasiima okuteeraho kwaitu kumuheereza omu biro by’emperu ebi. Ahabw’obuhwezi bwa Yehova nitubaasa kugumisiriza n’obu haakubaho ebirikutumaramu amaani. Nitubaasa kuguma nitukunda ab’eishe-emwe na banyaanyazi-itwe, kandi tubasaasire n’obu baakutugwisa kubi. Nitubaasa kworeka rukundo n’ekitiinisa ebi twiniire Ruhanga n’entebeekanisa ze, turikukora kyona ekirikubaasika kushoboorora oburemeezi omu bushwere bwaitu. Kandi twakora ekibi ky’amaani, nitubaasa kusherura obuhwezi bwa Yehova, twikirize ngu naatukunda, ayeteekateekire kutusaasira, kandi tugumizemu nitumuheereza. Nitubaasa kuhamiza kimwe ngu nitwija kutunga emigisha mingi twaba ‘tutaruhire omu kukora gye.’—Gal. 6:9.