Omuringo gwonka oku turikubaasa kusaasirwa ebibi byaitu n’okurabira omu kitambo eki Yesu yaahaireyo arikusheesha eshagama ye. (Efe. 1:7) Kwonka, Baibuli neegira ngu, ‘Ruhanga ahabw’okugumisiriza kwe [akaba naasaasira] ebibi ebyakozirwe ira,’ Yesu atakahaireyo kitambo. (Rom. 3:25) Mbwenu shi Yehova akaba naabaasa ata kukora ekyo, kandi akaguma ahamiire aha mitindo ye ey’oburingaaniza ehikiriire?

Kurugiirira aha mireebere ya Yehova, ekitambo kikaba kiri nk’ekyaherize kushashurwa kuruga obu yaacwamu kutaho ‘oruzaaro’ orwabaire nirwija kujuna boona abarikumwikiririzamu. (Kut. 3:15; 22:18) Ruhanga akaba naahamiza kimwe ngu omu obwire obuhikire omwana we akaba naija kuhayo ekitambo ayekundiire. (Gal. 4:4; Heb. 10:​7-10) Obu Yesu yaabaire ari omu nsi nk’omujwekyerwa wa Ruhanga, akaba aine obushoboorozi bw’okusaasira ebibi n’obu yaabaire akatahaireyo ekitambo. Ekyo akakikora ahakuba akaba naamanya ngu ekitambo eki yaabaire naija kuhayo, kikaba nikiija kushweka ebibi by’abantu abaine okwikiriza.—Mat. 9:​2-6.