1. Abaheereza ba Yehova abeesigwa abamwe nibabaasa kuteganisibwa nyehurira ki?

 BUZIMA ka nikihuumuriza kumanya ngu Yehova naasiima abantu be nka guruupu! Baibuli neegira eti: “[Yehova] ashemerererwa abantu be.” (Zab. 149:4) Kwonka, obumwe abamwe nibabaasa kuhwa amaani beebuuze bati: ‘Mbwenu shi Yehova naansiima? Abaheereza ba Yehova abeesigwa baingi, obumwe bakaba nibateganisibwa enyehurira nk’ezo.—1 Sam. 1:​6-10; Yob. 29:​2, 4; Zab. 51:11.

2. Ni baahi abu Yehova arikusiima?

² Baibuli neeyoreka butunu ngu n’obu tutahikiriire nitubaasa kusiimwa Yehova. Mu muringo ki? Turikwikiririza omuri Yesu kandi tukabatizibwa. (Yoh. 3:16) Twakora tutyo, nituba nitworeka muranga ngu tweteisize ebibi byaitu, kandi twaraganisa Ruhanga kukora ebi arikukunda. (Byak. 2:38; 3:19) Yehova naashemererwa munonga twakora ebyo kugira omukago murungi nawe. Twateeraho kukora kyona ekirikubaasika kuhikiiriza okwehayo kwaitu, Yehova naatusiima kandi nituba banywani be.—Zab. 25:14.

3. Nituza kugamba ahari ki?

³ Ahabw’enki abamwe, obumwe nibateekateeka ngu Yehova tarikubasiima? Yehova naayoreka ata ngu naatusiima? Omukristaayo naabaasa kuhamya ata ngu Yehova naamusiima?

ENSHONGA AHABW’ENKI ABAMWE BARIKUTEEKATEEKA NGU YEHOVA TARIKUBASIIMA

4-5. Nitubaasa kugira bwesigye ki, n’obu turaabe nitwehurira nk’abatari b’omuhendo?

⁴ Abaingi omuriitwe, nitubaasa kuba tutwire nitwereeba nk’abatari b’omuhendo kuruga omu buto. (Zab. 88:15)  Ow’eishe-emwe orikwetwa Adrián naagira ati: “Ntwire ninyereeba nk’otaine mugasho. Obu naabaire nkiri muto, nkaba nshaba ngu ab’eka yangye batuure omu Paradiso, kwonka nyowe nkaba nimmanya ngu timpikire kubamu.” Tony, ou abazaire be batari mu mazima, naagira ati: “Abazaire bangye tibarangambire ngu nibankunda nari ngu nibanyesiimisa. Eki kikaandeetera kuteekateeka ngu tibarikusiima ebi ndikukora.”

⁵ Obumwe twaba nitwehurira nk’abatari b’omuhendo, twine kwijuka ngu Yehova niwe yaatweyirize haihi. (Yoh. 6:44) Naareeba ekirungi ekiri omuriitwe eki tutarikubaasa kureeba, kandi naamanya ekiri omu mitima yaitu. (1 Sam. 16:7; 2 Bus. 6:30) N’ahabw’ekyo, yaatugira ngu turi ab’omuhendo nitubaasa kumwesiga.—1 Yoh. 3:​19, 20.

6. Entumwa Paulo akaba naayehurira ata ahabw’ebibi ebi yaabaire akozire?

⁶ Abamwe omuriitwe tutakeegire amazima, tukakora ebintu ebirikutureetera kweshinja. (1 Pet. 4:3) Nangwa n’Abakristaayo abeesigwa nibabaasa kuba baine obweremwa obu barikuteeraho kusingura. Mbwenu shi naiwe nooyeshinja? Kyaba nikwo kiri, nikiija kukuhuumuriza waamanya ngu n’abaheereza ba Yehova abeesigwa obumwe nibeeshinja. Nk’eky’okureeberaho, entumwa Paulo akaba naashoberwa yaateekateeka aha butahikiirira bwe. (Rom. 7:24) Paulo akaba ayeteisize ebibi bye, kandi abatiziibwe. Kwonka nabwo, akeegambaho nk’owaabaire ari “muto aha ntumwa ezindi,” kandi omusiisi “w’okubanza.”—1 Kor. 15:9; 1 Tim. 1:15.

7. Niki eki twine kuguma nitwijuka aha bikwatiraine n’ebibi ebi tukozire?

⁷ Tataitwe ow’omu iguru naaraganisa kutusaasira twayeteisiza kimwe. (Zab. 86:5) N’ahabw’ekyo, twaba nitweshinja ahabw’ebibi ebi tukozire, nitubaasa kugira obwesigye ngu Yehova atusaasiire.—Kol. 2:13.

8-9. Nitubaasa kusingura tuta enyehurira z’okwereeba nk’abatarikukora ekirikumara kushemeza Yehova?

⁸ Nitwenda kukora kyona eki turikubaasa kuheereza Yehova omu bwijwire. Kwonka, abamwe nibabaasa kwehurira nk’abatarikukora ekirikumara kubaasa kusiimwa Yehova. Munyaanyazi-itwe orikwetwa Amanda naagira ati: “Ninkira kuteekateeka ngu kubaasa kuha Yehova ekirikukirayo oburungi nyine kwongyera aha buheereza bwangye. Ninkira kwenda kukora ebirikukira ebi ndikubaasa. Ku ‘ndikuremwa’ ninteekateeka ngu Yehova ntarikunsiima.”

⁹ Mbwenu shi nitubaasa kusingura tuta enyehurira z’okwereeba nk’abatarikubaasa kukora ebirikusiimwa Yehova? Ijuka ngu Yehova tarikuremera aha nshonga. Tarikutushaba kukora ebi tutarikubaasa. Naasiima byona ebi turikukora byaba nibyo birikukirayo oburungi. Kandi noobaasa kuteekateeka aha by’okureeberaho by’omu Baibuli, eby’abaaheereize Yehova n’omutima gwabo gwona. Teekateeka ahari Paulo. Akaheereza n’obweziriki kumara emyaka mingi, kandi yaatandikaho ebibiina bingi. Mbwenu shi, embeera ku zaamuremeise kukora bingi omu murimo gw’okubuurira akeereeba nk’otarikusiimwa Ruhanga? Ngaaha. Akagumizamu naakora eki arikubaasa, kandi Yehova akamuha emigisha. (Byak. 28:​30, 31) Nikyo kimwe, obumwe titurikubaasa kuha Yehova ebirikwingana. Kwonka ekikuru ahariwe n’ekirikutureetera kubikora. Ka tureebe emiringo emwe oku Yehova arikworeka ngu naatusiima.

YEHOVA NAAYOREKA ATA NGU NAATUSIIMA?

10. Nitubaasa “kuhurira” tuta eiraka rya Yehova ery’okusiima? (Yohaana 16:27)

¹⁰ Kurabira omu Baibuli. Yehova naakunda  kworeka ngu naasiima abu arikukunda. Ebyahandiikirwe nibyoreka emirundi ebiri obu Yehova yaagambira Yesu ngu niwe Mwana we ou arikukunda kandi ou arikusiima. (Mat. 3:17; 17:5) Okaayenzire kuhurira Yehova naakusiima? Yehova tarikugamba naitwe butunu omu iraka ririkuhurirwa, kwonka naagamba naitwe kurabira omu Kigambo kye. Nitubaasa “kuhurira” eiraka rya Yehova ery’okusiima twashoma ebigambo bya Yesu ebiri omu bitabo by’Engiri. (Shoma Yohaana 16:27.) Yesu akooreka gye emitwarize nk’eya Ishe. N’ahabw’ekyo, twashoma aha ku yaayorekire ngu naasiima abakuratsi be abatahikiriire, nooba nooshusha ngu Yehova naatugambira ebigambo ebyo.—Yoh. 15:​9, 15.

11. Ahabw’enki okuhikwaho embeera zigumire kitarikumanyisa ngu Yehova takitusiima? (Yakobo 1:12)

¹¹ Kurabira omu bi arikukora. Yehova ayeteekateekire kutuhwera, nk’eky’okureeberaho naatuhwera kutunga ebirikwetengyesa eby’omubiri. Obumwe, Yehova naareka embeera zigumire kutuhikaho, nk’oku kyabaire ahari Yobu. (Yob. 1:​8-11) Twahikwaho embeera zigumire tikirikumanyisa ngu Yehova takitusiima. Kureka, embeera nk’ezo nizitubaasisa kworeka ngu nitukunda Ruhanga kandi nitumwesiga. (Shoma Yakobo 1:12.) Nitwija kwereebera oku arikutureeberera n’oku arikutuhwera kugumisiriza.

12. Nitubaasa kwegyera ki aha byahikire ahari Dmitrii?

¹² Teekateeka aha ky’okureeberaho ky’ow’eishe-emwe orikwetwa Dmitrii owa Asia. Akafeerwa omurimo gwe kandi akaba atarikubaasa kutunga ogundi kumara ameezi maingi. N’ahabw’ekyo akacwamu kwongyera kwejumbira kimwe omu kubuurira, kworeka ngu naayesiga Yehova. Kwonka nabwo, hakahinguraho ameezi atakaboine murimo. Bwanyima akarwara kandi akaba atarikubaasa kwimuka omu kitanda. Akatandika kuteekateeka ngu takiri taata murungi, kandi nyineeka orikusiimwa Yehova. Omwabazyo gumwe omuhara akata aha rupapura ebigambo ebiri omu Isaaya 30:15: ‘Omu kutuuza n’omu kwesiga nimwo amaani gaanyu garaarugye.’ Akabitwarira ishe omu kitanda, reero yaamugira ati: “Taata, ku oraagume waayehurira kubi, ijuka ekyahandiikirwe eki.” Dmitrii akeetegyereza ngu Yehova akaba naakireeberera eka ye arikubahwera kutunga eby’okurya, ebijwaro, n’oburaaro. Naagira ati: “Eki naabaire nyine kukora, n’okutuuza kandi nkaguma ninyesiga Ruhanga wangye.” Ku oraabe  oine oburemeezi nk’obwo, noobaasa kugira obwesigye ngu Yehova naija kukureeberera kandi akuhwere kugumisiriza.

13. Yehova naakoresa baahi kworeka ngu naatusiima, kandi naakikora ata?

¹³ Kurabira omu b’eishe-emwe bagyenzi baitu. Yehova naakoresa ab’eishe-emwe na banyaanyazi-itwe kworeka ngu naatusiima. Nk’eky’okureeberaho, naabaasa kubareetera kutugambira ebigambo ebirikugumya omu bwire obuhikire. Munyaanyazi-itwe omuri Asia eki akakyereebera butunu obu yaabaire aine amaganya. Akafeerwa omurimo gwe, kandi akarwara munonga. Bwanyima, iba akakora ekibi ky’amaani kandi akaba atakiri mureeberezi. Naagira ati: “Nkaba ntarikumanya ahabw’enki ebi byabaire nibimpikaho, nkateekateeka ngu nimbaasa kuba nkozire enshobe kandi ntakisiimwa Yehova.” Munyaanyazi-itwe akeeshengyereza Yehova kumuhamiza ngu naamusiima. Yehova akakikora ata? Munyaanyazi-itwe naagira ati: “Abareeberezi bakagamba naanye kandi baampamiza ngu Yehova naankunda.” Bwanyima akagaruka yaashaba Yehova ngu amuhwere. Naagira ati: “Eizooba eryo ryenyini nkatunga ebaruha kuruga aha guruupu y’ab’eishe-emwe na banyaanyazi-itwe omu kibiina. Ku naabaire ninshoma ebigambo ebyo ebirikuhuumuriza, nketegyereza ngu akahurira okushaba kwangye.” Yehova butoosha naayoreka ngu naatusiima kurabira omu bigambo by’abandi ebirikugumya.—Zab. 10:17.

14. Ni muringo ki ogundi oku Yehova arikworeka ngu naatusiima?

¹⁴ Kandi, Yehova naatuhamiza ngu naatusiima arikukoresa Abakristaayo bagyenzi baitu kutuha obuhabuzi oburikwetengyesa. Nk’eky’okureeberaho, omu kyasha ky’okubanza, Yehova akakoresa entumwa Paulo kuhandiikira ab’eishe-emwe bagyenzi be  ebaruha 14. Omu baruha ezo akabahabura butunu kwonka omu muringo gwa rukundo. Ahabw’enki Yehova yaakoreise Paulo kuhandiika obuhabuzi obwo? Yehova ni Tataitwe murungi, kandi naahana abaana be abu ‘arikushemerererwa.’ (Enf. 3:​11, 12) N’ahabw’ekyo, twaheebwa obuhabuzi oburikwegamira ahari Baibuli nitubaasa kubureeba nk’obuhame oburikworeka ngu Ruhanga naakitusiima. (Heb. 12:6) Ni buhame ki obundi oburikworeka ngu Yehova naatusiima?

EBINDI EBIRIKUTUHAMIZA NGU YEHOVA NAATUSIIMA

15. Ni baahi abu Yehova arikuha omwoyo gurikwera, kandi ahabw’enki ekyo kirikutugumya?

¹⁵ Yehova naaha omwoyo gurikwera abu arikusiima. (Mat. 12:18) Nitubaasa kwebuuza tuti: ‘Mbwenu shi mbaasize kworeka gumwe aha mitwarize y’omwoyo gurikwera?’ Nooreeba ngu nooyongyera kugumisiririza abandi kukira obu waabaire otakamanyire Yehova? Amazima gari ngu, waayongyera kworeka emitwarize y’omwoyo gurikwera, noija kwongyera kuhamya ngu Yehova naakusiima.—Reeba akabokusi “ [Emitwarize] y’Omwoyo Gurikwera ni . . . ”

16. Ni baahi abu Yehova arikukoresa kubuurira amakuru marungi, kandi ekyo nikikureetera kwehurira ota? (1 Abatesalonika 2:4)

¹⁶ Yehova naashemererwa kuha abu arikusiima obujunaanizibwa bw’okubuurira amakuru marungi. (Shoma 1 Abatesalonika 2:4.) Yetegyereze oku munyaanyazi-itwe orikwetwa Jocelyn yaagasiirwe ahabw’okubuurira abandi amakuru marungi. Eizooba rimwe, Jocelyn akaimuka aine amaganya. Naagira ati: “Nkeehurira nk’otaine eki ndikubaasa kuha abandi, kwonka nkaba ndi payoniya, kandi rikaba riri eizooba ry’okubuurira. N’ahabw’ekyo, nkashaba naaza kubuurira.” Akasheeshe ako Jocelyn akabuurira Mary omukazi omunyambabazi, kandi akaikiriza kwega Baibuli. Bwanyima y’ameezi makye, Mary akagira ngu akaba naashaba Ruhanga kumuhwera, obu Jocelyn yaiguza aha rwingi rwe. Jocelyn ku arikuteekateeka aha byabaireho naagira ati: “Nooshusha ngu Yehova akaba naagira ngu, ‘ninkusiima.’” Amazima gari ngu, ti buri omwe naija kutuhurikiza twaba nitubuurira. Kwonka, nitubaasa kuhamya ngu Yehova naashemererwa twateeraho nk’oku turikubaasa kubuurira abandi amakuru marungi.

17. Nooyegyera ki aha bigambo bya Vicky aha bikwatiraine n’ekitambo? (Zaaburi 5:12)

 ¹⁷ Yehova akahayo ekitambo kugasira abu arikusiima. (1 Tim. 2:​5, 6) Kwonka shi ku twakuba nituteekateeka ngu Yehova tarikutusiima n’obu twakuba nitwikiririza omu kitambo kandi tubatiziibwe? Twine kwijuka ngu, titurikubaasa kwesiga enyehurira zaitu, kwonka nitubaasa kwesiga Yehova. Naareeba abarikwikiririza omu kitambo nk’abahikiriire kandi naija kubaha emigisha. (Shoma Zaaburi 5:12; Rom. 3:26) Okuteekateeka aha kitambo kikahwera Vicky. Eizooba rimwe, bwanyima y’okuteekateka aha kitambo, akagira ati: “Nketegyereza ngu, Yehova atwire angumisiririze kumara obwire buraingwa. . . Kwonka nyowe nkaba ndi nk’orikumugira ngu, ‘rukundo ei onyiniire terikumara. Ekitambo ky’Omwana waawe tikirikubaasa kushweka ebibi byangye.’” Ahabw’okuteekateeka aha kiconco ky’ekitambo, akeetegyereza ngu Yehova naamukunda. Naitwe twateekateeka aha kitambo, nitubaasa kumanya ngu Yehova naatukunda kandi naatusiima.

18. Nitubaasa kugira bwesigye ki twagumizamu nitukunda Tataitwe ow’omu iguru?

¹⁸ N’obu twakuteeraho munonga kugyendera aha buhabuzi obwo, obumwe nitubaasa kuhwa amaani, kandi twehurire nk’abatarikusiimwa Yehova. Ekyo kyabaho, ijuka ngu Yehova naasiima abarikugumizamu ‘nibamukunda.’ (Yak. 1:12) N’ahabw’ekyo, gumizamu nooyirira haihi Yehova kandi oteereho kureeba oku Yehova arikworeka ngu naakusiima. Guma noijuka ngu Yehova “tari hare n’omuntu weena omuriitwe.”—Byak. 17:27.