1, 2. (a) Yesu akagambira ki abeegi be ekiro ekyahererukireyo atakafiire? (Reeba ekishushani aha kutandika.) (b) Ahabw’enki ni kikuru kuguma nitwijuka enshonga ezirikutureetera kubuurira? (c) Nituza kushwijuma ki?

EKIRO ekyahererukireyo Yesu atakafiire, akamara obwire bwingi arikugaaniira n’entumwa ze. Akabahamiza ngu naabakunda munonga. Kandi akabagambira n’eky’okureeberaho ky’omuzaabibu, eki tugambireho omu kicweka eky’enyima. Yesu akaba naayenda kuhiga abeegi be kugumizamu nibaana “ebyana bingi,” ekirikumanyisa okugumisiriza omu kubuurira amakuru g’Obukama.​—Yohaana 15:8.

² Kwonka, akagambira abeegi be eki baabaire baine kukora n’enshonga ahabw’enki baabaire baine kukikora. Akabaha enshonga ahabw’enki baabaire baine kugumizamu nibabuurira. Ni kikuru naitwe kwijuka ahabw’enki twine kugumizamu nitubuurira. Okuteekateeka ahari eki nikiija kutuhwera kugumisiriza twaba nitubuurira omu “mahanga goona.” (Matayo 24:13, 14) Omu kicweka eki, nituza kushwijuma enshonga ina kuruga  omu Byahandiikirwe ezirikutureetera kubuurira. Kandi, nituza kushwijuma ebiconco bina kuruga ahari Yehova ebirikutuhwera kugumizamu nitwana ebyana.

3. (a) Kurugiirira ahari Yohaana 15:8, ni nshonga ki enkuru erikutureetera kubuurira? (b) Ebijuma by’emizaabibu omu ky’okureeberaho kya Yesu, nibijwekyera ki, kandi ahabw’enki eki kihikire?

³ Enshonga nkuru erikutureetera kubuurira n’okugira ngu nitwenda kuhimbisisa Yehova kandi tweze n’eiziina rye. (Shoma Yohaana 15:1, 8.) Obu Yesu yaagamba eky’okureeberaho ky’omuti gw’omuzaabibu, akagyeragyeranisa Yehova n’omuhingi, orikuhinga emizaabibu. Yesu akeeyeta omuti gw’omuzaabibu kandi abakuratsi be akabeeta amataagi. (Yohaana 15:5) N’ahabw’ekyo omu ky’okureeberaho eki, ebijuma by’emizaabibu nibijwekyera ebyana ebi abeegi ba Yesu barikwana, nari omurimo gw’okubuurira ogu barikukora. Yesu akagambira entumwa ze ati: “Ekihimbisisa Tata, kikahamya ku muri abeegi bangye, niimwe okwana ebyana bingi.” Emiti y’emizaabibu ku erikwana ebijuma by’emizaabibu birungi, ekyo nikihimbisisa omuhingi. Nikyo kimwe, twakora kyona ekirikubaasika kubuurira amakuru g’Obukama, nituhaisa Yehova ekitiinisa nari nitumuhimbisisa.​—Matayo 25:20-23.

4. (a) Nitweza tuta eiziina rya Ruhanga? (b) Nooyehurira ota ahabw’okuheebwa omugisha gw’okweza eiziina rya Ruhanga?

⁴ Eiziina rya Ruhanga n’eririkwera omu bwijwire. Tihariho eki turikubaasa kukora kurireetera kwongyera kuba eririkwera. Mbwenu nitubaasa kweza tuta eiziina rya Ruhanga twaba nitubuurira? Yetegyereze eki nabi Isaaya yaagambire: ‘Mukama ow’amahe mube niwe mwaha ekitiinisa ahabw’okwera kwe.’ (Isaaya 8:13) Nitweza eiziina rya Ruhanga, Yehova, twaritwara nk’eririkukira amaziina goona, kandi tukahwera n’abandi kwetegyereza ngu n’eririkwera. (Matayo 6:9) Nk’eky’okureeberaho, twayegyesa abantu amazima agarikukwata aha mitwarize mirungi ya Yehova n’ekigyendererwa eki ainiire abantu eky’okutuura omu Paradiso ebiro byona, nitubahwera kureeba ngu ebibi byona ebi Sitaane yaagambire ahari Yehova n’ebishuba. (Okutandika 3:1-5) Kandi nitweza eiziina rya Ruhanga twahwera abantu kumanya ngu Yehova niwe ‘ashemereire kuhimbisibwa n’okuheebwa ekitiinisa n’obushoboorozi.’ (Okushuuruurwa 4:11) Rune, otwire ari payoniya kumara emyaka 16, naagira ati: “Okumanya ngu mpairwe omugisha gw’okuba omujurizi w’Omuhangi w’ensi n’eiguru nikindeetera kumusiima. Nikindeetera ekyetengo ky’okwenda kugumizamu nimbuurira.”

5. (a) Ni nshonga ki erikutureetera kubuurira erikugambwaho omuri Yohaana 15:9, 10? (b) Yesu akahwera ata abeegi kwetegyereza ngu kikaba nikiija kubeetengyesa kugumisiriza?

⁵ Shoma Yohaana 15:9, 10. Enshonga ya kabiri ahabw’enki turikubuurira amakuru agarikukwata aha Bukama, n’okugira ngu nitukunda Yehova na Yesu. (Mako 12:30; Yohaana 14:15) Yesu akagambira abeegi be ngu baine ‘kuguma omu kukunda kwe.’ Ahabw’enki  Yesu yaagambire atyo? N’ahakuba akaba naamanya ngu abakuratsi be nikiija kubeetengyesa kugumisiriza kubaasa kuguma bari Abakristaayo ab’amazima. Nangwa, n’omuri Yohaana 15:4-10, nitureeba ngu Yesu akakoresa ekigambo ‘okuguma’ emirundi mingi kuhwera abeegi be kwetegyereza ngu baine kugumisiriza.

6. Nitworeka tuta ngu nitwenda kukuguma omu kukunda kwa Kristo?

⁶ Nitworeka tuta ngu nitwenda kuguma omu kukunda kwa Yesu reero akatusiima? Turikuguma nitumworobera. Yesu naatushaba kukora kyenyine eki nawe yaakozire. Akagira ati: ‘Naanye ntwire ninyorobera ebiragiro bya Tata, naaguma omu kukunda kwe.’ Yesu naatuteeraho eky’okureeberaho.​—Yohaana 13:15.

7. Okworoba kwine kakwate ki na rukundo?

⁷ Yesu akakyoreka gye ngu okworoba kwine akakwate na rukundo, obu yaagira ati: “Oine ebiragiro byangye akabyorobera niwe arikunkunda.” (Yohaana 14:21) Ebiragiro bya Yesu nibiruga ahari Ishe, n’ahabw’ekyo twayorobera ekiragiro kya Yesu eky’okubuurira, nitworeka ngu nitukunda Yehova. (Matayo 17:5; Yohaana 8:28) Kandi twayoreka ngu nitukunda Yehova na Yesu, nibaturindira omu kukunda kwabo.

8, 9. (a) Ni nshonga ki endiijo erikutureetera kubuurira? (b) Ebigambo bya Yehova ebiri omu Ezekieli 3:18, 19 na 18:23 nibituhiga bita kugumizamu nitubuurira?

⁸ Enshonga ya kashatu ahabw’enki turikubuurira n’okugira ngu nitwenda kurabura abandi aha kiro kya Yehova ekirikwija. Omu Baibuli, Noa naagambwaho ‘nk’omubuurizi.’ (Shoma 2 Petero 2:5.) Omwegyemure gutakaizire, obutumwa bwa Noa bwine kuba bwabaire nibutwariramu okurabura abantu ngu nihaija kubaho okucwekyerera. Ahabw’enki nitugira tutyo? Ahakuba Yesu akagira ati: ‘Nk’oku baabaire bari omu biro ebyo ebyabandiize omwegyemure gw’amaizi, nibarya kandi nibanywa, nibashwera, nibahingira, okuhitsya aha kiro eki Noa yaataahiireho omu bwato; bakaba bari aho bataine ki barikumanya, okuhitsya obu omwegyemure gw’amaizi gwaizire, gukabatwara boona; n’okwija kw’Omwana w’omuntu nikwo kuriba kutyo.’ (Matayo 24:38, 39) N’obu abantu baingi baraabe baayehugize Noa, omu bwesigwa akabuurira obutumwa bw’okurabura obu Yehova yaabaire amuhaire.

⁹ Obunaku obu, nitubuurira obutumwa oburikukwata aha Bukama, turikuha abantu omugisha gw’okwega ahari Ruhanga n’ebi  araakorere abantu omu biro by’omumaisho. Nka Yehova, nitwendera kimwe ngu abantu bate omutima aha butumwa obu, reero ‘bagume bahuriire.’ (Ezekieli 18:23) Twaba nitubuurira enju aha nju n’omu myanya erimu abantu baingi, niturabura abantu baingi nk’oku kirikubaasika ngu Obukama bwa Ruhanga nibwija ababi.​—Ezekieli 3:18, 19; Danieli 2:44; Okushuuruurwa 14:6, 7.

10. (a) Ni nshonga ki erikutureetera kubuurira erikugambwaho omuri Matayo 22:39? (b) Paulo na Siila bakahwera bata omurinzi w’ekihome omuri Filipi?

¹⁰ Enshonga ya kana ahabw’enki nitugumizamu nitubuurira n’ahabw’okugira ngu nitukunda abantu. (Matayo 22:39) Rukundo egi neetuhwera kugumizamu nitubuurira ahakuba nitumanya ngu abantu nibabaasa kuhindura emiteekateekyere yaabo embeera zaabo zaahinduka. Nk’eky’okureeberaho abahakanisa, bakata Paulo na Siila omu kihome omu rurembo rwa Filipi. Kwonka ahagati y’ekiro, hakabaho omutsitsa gw’amaani gwatengyetsa ekihome enyigi zaakyo zaiguka. Omurinzi w’ekihome akatiina munonga ngu abaabaire bakomirwe batorokire, reero yaayenda kweita. Kwonka Paulo akagamba n’eiraka rihango yaamuzibira ati: “Oteekora kubi!” Omurinzi w’ekihome akabuuza ati: “Nshemereire kukora ki, nkajunwa?” Paulo na Siila bakamugira bati: “Ikiriza Mukama waitu Yesu, noija kujunwa.”​—Ebyakozirwe 16:25-34.

11, 12. (a) Ebirikukwata aha murinzi w’ekihome nibitwegyesa ki aha buheereza bwaitu? (b) Ahabw’enki nitwenda kugumizamu nitubuurira?

¹¹ Ebirikukwata aha murinzi w’ekihome nibitwegyesa ki aha murimo gw’okubuurira? Yetegyereze ngu bwanyima y’omutsitsa omurinzi w’ekihome nibwo yaahindura emiteekateekyere ye, kandi akashaba n’obuhwezi. Omu muringo nigwo gumwe, abantu abamwe abatarikwenda kuhurikiza obutumwa bwa Baibuli, nibabaasa kuhindura emiteekateekyere yaabo, kandi bashabe obuhwezi baatunga oburemeezi. Nk’eky’okureeberaho, abamwe nibabaasa kugwa kihuumura ahabw’okufeerwa omurimo gwabo nari ahabw’okugaitururwa. Abandi nibabaasa kuba nibeehurira kubi ahabw’okumanya ngu baine endwara y’amaani nari ahabw’okufeerwa abakundwa. Ebintu nk’ebi byabaho, abantu nibabaasa kutandika kwebuuza ebibuuzo ebirikukwata aha magara, ebi baabaire batarikuteekateekaho enyima. Nibabaasa n’okwebuuza bati: ‘Nimbaasa kukora ki kujunwa?’ Eki nikibaasa kubareetera kwenda kuhurikiza, obutumwa bwaitu oburikubaha amatsiko.

¹² N’ahabw’ekyo twagumizamu nitubuurira omu bwesigwa, nikiija kutubaasisa kuhuumuriza abantu, baaba beeteekateekire kwikiriza ngu tubahuumurize. (Isaaya 61:1) Charlotte, otwire ari payoniya kumara emyaka 38, naagira ati: “Abantu bahabire. Nibeetenga omugisha gw’okuhurira amakuru marungi.” Ejvor, otwire ari payoniya kumara emyaka 34, naagira ati: “Obunaku obu okukira ira, abantu baingi beehwaire amatsiko. Buzima niinyenda kubahwera. Eki nikimpiga kubuurira.” N’ahabw’ekyo, rukundo ei twiniire abantu n’enshonga nkuru erikutureetera kugumizamu nitubuurira.

13, 14. (a) Ni kiconco ki ekirikugambwaho omuri Yohaana 15:11? (b) Nitubaasa kutunga tuta okushemererwa nk’oku Yesu aine? (c) Okushemererwa nikutuhwera kuta omu kubuurira?

¹³ Ekiro ekyahererukireyo Yesu atakafiire, akagamba n’aha biconco ebyabaire nibiija kuhwera entumwa ze kuguma nibaana ebyana. Ebiconco ebi ni biiha, kandi nibibaasa kutuhwera bita obunaku obu?

 ¹⁴ Ekiconco ky’okushemererwa. Mbwenu shi okubuurira n’omugugu? Ngaaha buzima. Yesu ku yaaherize kugamba eky’okureeberaho ky’omuti gw’omuzaabibu, akagira ngu twabuurira nitwija kushemererwa nkawe. (Shoma Yohaana 15:11.) Ekyo nikibaasika kita? Ijuka ngu omu ky’okureeberaho kya Yesu akeegyeragyeranisa n’omuti gw’omuzaabibu, kandi abeegi be yaabagyeragyeranisa n’amataagi. Amataagi nigatunga amaizi n’ebiriisa ebi garikwetenga gaaguma gari aha muti gw’omuzaabibu. Omu muringo nigwo gumwe, nitubaasa kushemererwa nka Yesu twaguma nitukwatanisa nawe, kandi tukamutooreza. Obwo nitwija kugira okushemererwa nk’oku aine, okurikuruga omu kukora ebi Ruhanga arikukunda. (Yohaana 4:34; 17:13; 1 Petero 2:21) Hanne, otwire ari payoniya kumara emyaka erikurenga 40, naagira ati: “Okushemererwa oku ndikugira butoosha naaruga omu kubuurira, nikumpiga kugumizamu nimpeereza Yehova.” Okushemererwa nikwija kutuha amaani g’okugumizamu nitubuurira n’obu abantu baingi baakuba batarikuhurikiza.​—Matayo 5:10-12.

15. (a) Ni kiconco ki ekirikugambwaho omuri Yohaana 14:27? (b) Obusingye nibutuhwera buta kuguma nitwana ebyana?

¹⁵ Ekiconco ky’obusingye. (Shoma Yohaana 14:27.) Omu mwabazyo Yesu atakafiire, akagambira abeegi be ati: ‘Obusingye bwangye nimbubaha.’ Obusingye bwa Yesu nibutuhwera buta kugumizamu nitubuurira? Twagumizamu nitubuurira, nitugira obusingye ahakuba nitumanya ngu nituba nitushemeza Yehova na Yesu. (Zaaburi 149:4; Abarooma 5:3, 4; Abakolosai 3:15) Ulf, otwire ari payoniya kumara emyaka 45, naagira ati: “Omurimo gw’okubuurira nigundeetera oburuhe, kwonka nigundeetera okumarwa n’okugira ekigyendererwa.” Nitwesiima munonga ahabw’okureeba ngu tukatunga obusingye!

16. (a) Ni kiconco ki ekirikugambwaho omuri Yohaana 15:15? (b) Entumwa bakaba nibabaasa kuguma bata bari banywani ba Yesu?

¹⁶ Ekiconco ky’abanywani. Bwanyima ya Yesu kugambira entumwa ze ngu naayenda bashemererwe, akashoboorora ahabw’enki kiri kikuru kugira rukundo etarimu kweyendeza. (Yohaana 15:11-13) Bwanyima akabagira ati: “Mbeetsire banywani bangye.” Ka n’ekiconco ky’omuhendo kuba munywani wa Yesu! Kwonka shi entumwa ze bakaba nibabaasa kuguma bata bari banywani be? Yesu akashoboorora ati: ‘Mugyende mwane ebyana.’ (Shoma Yohaana 15:14-16.) Ekirikumanyisa okugumizamu nibabuurira. Emyaka  nk’ebiri enyima, Yesu akaba agambiire entumwa ze ati: ‘Omu kugyenda mugyende nimugamba muti: Obukama bw’omu iguru bwiriire haihi.’ (Matayo 10:7) Egyo niyo nshonga ahabw’enki, ekiro ekyahererukireyo Yesu atakafiire, akahiga abeegi be kugumisiriza omu murimo gw’okubuurira. (Matayo 24:13; Mako 3:14) Buzima, Yesu akaba naamanya ngu okuhikiiriza ekiragiro kye tikirikwija kworoba. Kwonka bakaba nibabaasa kukikora kandi bagume bari banywani be. Mu muringo ki? Barikuhwerwa ekindi kiconco.

17, 18. (a) Ni kiconco ki ekirikugambwaho omuri Yohaana 15:7? (b) Ekiconco eki kikahwera kita abeegi ba Yesu? (c) Ni biconco ki ebirikutuhwera obunaku obu?

¹⁷ Ekiconco eky’okugarukamu okushaba kwaitu. Yesu akagira ati: “Mushabe kyona eki murikwenda, kiryabakorerwa.” (Yohaana 15:7, 16) Ekiraganiso kya Yesu kishemereire kuba kyagumize entumwa ze! * (Reeba obugambo obw’ahansi.) Entumwa tibarabaasize kwetegyereza gye ngu Yesu juba akaba naija kufa. Kwonka okugira ngu akaba naija kufa kikaba kitarikumanyisa ngu nibaija kuguma bataine buhwezi. Yehova akaba ayeteekateekire kugarukamu okushaba kwabo n’okubahwera omu murimo gwabo gw’okubuurira. Kandi ekyo nikyo yaakozire. Ahonaaho Yesu aherize kufa, entumwa bakeeshengyereza Yehova kubaha obumanzi, kandi Yehova akagarukamu okushaba kwabo.​—Ebyakozirwe 4:29, 31.

¹⁸ Nikyo kimwe n’obunaku obu. Twagumisiriza omu murimo gw’okubuurira nituguma turi banywani ba Yesu. Kandi nituguma twine obuhame ngu twatunga oburemeezi omu kubuurira, reero tukashaba Yehova obuhwezi, naaba ayeteekateekire kugarukamu okushaba kwaitu. (Abafilipi 4:13) Nitushemererwa munonga ahabw’okugira ngu Yehova naagarukamu okushaba kwaitu, kandi Yesu ni munywani waitu. Ebiconco ebi Yehova arikutuha nibitugaruramu amaani kugumizamu nitwana ebyana.​—Yakobo 1:17.

19. (a) Ahabw’enki nitugumizamu nitubuurira? (b) Niki ekirikutuhwera kugumizamu nitukora omurimo ogu Ruhanga atuhaire?

¹⁹ Nk’oku twayega omu kicweka eki, enshonga ezirikutureetera kugumizamu nitubuurira n’ezi: Okuhimbisisa Yehova n’okweza eiziina rye, okworeka rukundo ei twiniire Yehova na Yesu, okurabura abantu, n’okworeka ngu nitukunda abantu. Kandi okushemererwa, obusingye, abanywani, n’okugarukamu okushaba kwaitu, ebi byona n’ebiconco ebirikutugaruramu amaani kugumizamu nitukora omurimo ogu Ruhanga atuhaire. Buzima Yehova naashemererwa ku arikutureeba nitukora n’amaani kugumizamu ‘nitwana ebyana’!