1, 2. (a) Ahabw’enki nikitugumya ababuurizi baagumizamu nibabuurira omu bicweka ei baingi batarikuhurikiza? (Reeba ekishushani aha kutandika.) (b) Yesu akagamba ki aha kubuurira omu kicweka ky’owaabo? (Reeba obugambo obw’ahansi.)

SERGIO NA OLINDA ni baapayoniya omuri United States. Bombi nibarenzya emyaka 80. Ebiro ebi, amaguru gaabo gazimbire kandi nigabaremesa kugyenda gye. Kwonka kumara emyaka mingi, batwire nibaza aha ruguuto orurikurabwaho abantu baingi omu tauni yaabo shaaha emwe ey’akasheeshe. Nibaza ahu baasi zirikwemerera, reero abantu abarikwijaho babaha ebitabo. Abantu abarikukira obwingi tibarikubafaho, kwonka Sergio na Olinda nibaguma omu mwanya ogwo barikumwenyera abarikubareeba. Shaaha mukaaga z’eihangwe, nibagyenda mporampora bataaha. Omu kasheeshe akandi, shaaha emwe, nibagarukayo ahu baasi zirikwemerera. Nibabuurira buri kasheeshe emirundi mukaaga omu saabiiti omwaka gwona.

² Nka Sergio na Olinda, hariho ab’eishe-emwe na banyaanyazi-itwe baingi abeesigwa abatwire nibabuurira omu bicweka byabo  kumara emyaka mingi n’obu abantu baraabe batarikuhurikiza. Obundi naiwe noobuurira omu kicweka nk’ekyo. Ku kiraabe nikwo kiri, nitukusiima ahakuba noogumisiriza kandi noogumizamu noobuurira n’obu kyakuba kitoorobi. * (Reeba obugambo obw’ahansi.) Eky’okureeberaho kyawe nikigumya ab’eishe-emwe na banyaanyazi-itwe, nangwa n’abo abamazire obwire buraingwa omu buheereza. Yetegyereze eki abareeberezi abarikutaayaayira ebibiina barikukira kugamba. Nibagira bati: “Ku ndikubuurira n’ab’eishe-emwe na banyaanyazi-itwe abeesigwa, nimpurira naagumibwa.” “Obwesigwa bwabo nibumpiga kugumisiriza n’okuba emanzi omu buheereza bwangye.” “Eby’okureeberaho byabo nibindeetera kugira okushemererwa.”

3. Ni bibuuzo ki bishatu ebi turikuza kushwijuma, kandi n’ahabw’enki?

³ Omu kicweka eki nituza kugarukamu ebibuuzo bishatu ebi: Ahabw’enki obumwe nitubaasa kuhwamu amaani? Nikimanyisa ki okwana ebyana? Niki ekiraatuhwere kuguma nitwana ebyana twine okugumisiriza? Okumanya eby’okugarukamu by’ebibuuzo ebi nikiija kutuhiga kugumizamu nitukora omurimo gw’okubuurira ogu Yesu yaatuhaire.

4. (a) Omuringo mubi ogu Abayudaaya baatwariizemu Paulo gukamureetera kwehurira ata? (b) Ahabw’enki Paulo yaayehuriire atyo?

⁴ Kirakumaziremu amaani abantu omu kicweka kyanyu baayanga kuhurikiza amakuru g’Obukama? Ku kiraabe nikwo kiri, noija kwetegyereza oku entumwa Paulo yaayehuriire. Akamara emyaka nka 30 arikubuurira, kandi akahwera abantu baingi kuba Abakristaayo. (Ebyakozirwe 14:21; 2 Abakorinso 3:2, 3) Kwonka, tarabaasize kuhwera Abayudaaya baingi kuba Abakristaayo. Omu mwanya gw’ekyo, baingi aharibo bakanga kuhurikiza Paulo, kandi abandi bakamuhiiganisa. (Ebyakozirwe 14:19; 17:1, 4, 5, 13) Omuringo mubi ogu baamutwariizemu gukamureetera kwehurira ata? Akagira ati: “Nyine enaku nyingi n’obusaasi obutarikutuuza omu mutima gwangye.” (Abarooma 9:1-3) Ahabw’enki yaayehuriire atyo? N’ahabw’okugira ngu akaba naakunda abantu n’omurimo gw’okubuurira. Paulo buzima akaba naafayo aha Bayudaaya, kandi akaba ayehurira kubi ku baabaire banga embabazi za Ruhanga.

5. (a) Niki ekirikutuhiga kubuurira? (b) Ahabw’enki kiri ekya butoosha obumwe kuhwamu amaani?

⁵ Nka Paulo, nitubuurira ahakuba nitufayo aha bantu, kandi nituba nitwenda kubahwera. (Matayo 22:39; 1 Abakorinso 11:1) Kurugiirira aha bi turikureeba nitumanya ngu okuheereza Yehova nikyo kirikukirayo oburungi. Kandi nitwenda kuhwera abandi kwija kumuheereza nabo bakagasirwa! Niyo nshonga ahabw’enki nituguma nitubahiga kwega amazima agarikukwata ahari Yehova n’ekigyendererwa eki ainiire abantu. Nituba turi nk’abarikubareetera ekiconco ky’omuhendo reero tukabeeshengyereza tuti: ‘Nyabura ‘we kyakiire.’ N’ahabw’ekyo ku barikwanga ekiconco eki, n’ekya butoosha, kugira ‘obusaasi omu mutima,’ nk’oku Paulo yaayehuriire. Nitugira obusaasi obu, ti habw’okugira ngu titwine kwikiriza, kwonka n’ahabw’okugira ngu nitukunda abantu. N’ahabw’ekyo n’obu turaabe obumwe nituhwamu amaani, nitugumizamu kubuurira. Nitubaasa kwikirizana na Elena, otwire ari payoniya kumara emyaka erikurenga 25, orikugira ati: “Ninshanga omurimo  gw’okubuurira gugumire. Kwonka, tihariho gundi murimo ogu naakwenzire kukora.”

6. Nituza kugarukamu kibuuzo ki?

⁶ Ahabw’enki twine obuhame ngu nitubaasa kuba abasinguzi omu buheereza bwaitu n’obu twakuba nitubuurira omu kicweka kigumire? Kubaasa kugarukamu ekibuuzo eki, ka tugaaniire aha by’okureeberaho bya Yesu bibiri, ebirikukwata aha ‘kwana ebyana.’ (Matayo 13:23) Eky’okureeberaho eky’okubanza n’ekirikukwata aha muzaabibu.

7. (a) Omu ky’okureeberaho kya Yesu n’oha orikujwekyera ‘omuhingi,’ omuti ‘gw’omuzaabibu,’ ‘n’amataagi’? (b) Ni kibuuzo ki eki twine kugarukamu?

⁷ Shoma Yohaana 15:1-5, 8. Omu ky’okureeberaho eki, Yesu akashoboorora ngu Yehova niwe “muhingi,” Yesu niwe muti ‘gw’omuzaabibu,’ kandi abeegi be nibo ‘mataagi.’ * (Reeba obugambo obw’ahansi.) Bwanyima Yesu akagambira entumwa ze ati: “Ekihimbisisa Tata, kikahamya ku muri abeegi bangye, niimwe okwana ebyana bingi.” Mbwenu shi nikimanyisa ki okwana ebyana? Omu ky’okureeberaho eki, Yesu taragambire butunu eki ebyana ebyo byabaire nibimanyisa, kwonka akatuha ekirikubaasa kutuhwera kutunga eky’okugarukamu ky’ekibuuzo eki.

8. (a) Omu ky’okureeberaho kya Yesu, ahabw’enki “okwana ebyana” kitarikumanyisa okuhindura abantu abandi abeegi ba Yesu? (b) Yehova naatushaba kukora ebintu bya muringo ki?

⁸ Yesu akagamba ahari Ishe ati: ‘Buri itaagi eriri omuriinye, eritarikwana byana, naaritemaho.’ Ekirikumanyisa ngu, titurikubaasa kuba abaheereza ba Yehova twaba tutarikwana byana. (Matayo 13:23; 21:43) N’ahabw’ekyo omu ky’okureeberaho eki, okwana ebyana tikirikubaasa kumanyisa okuhindura abantu abandi abeegi ba Yesu. (Matayo 28:19) Kuri kiri kityo, Abajurizi ba Yehova abeesigwa abatakahwereire muntu kuba omwegi wa Yesu bakaabaire bari nk’amataagi agatarikwana byana. Kwonka eki tikihikire! Ahabw’enki? Ahabw’okuba titurikubaasa kugyema abantu kuba abeegi ba Yesu. Yehova ni Ruhanga oine rukundo. Tarikubaasa kutushaba kukora ekirengire okubaasa bwaitu. Kureka naatushaba kukora ekyo kyonka eki turikubaasa.​—Eky’Ebiragiro 30:11-14.

9. (a) Nitwana tuta ebyana? (b) Nituza kushwijuma ky’okureeberaho ki?

⁹ Mbwenu shi okwana ebyana nikimanyisa ki? Kiine kuba ekintu eki twena turikubaasa kukora. Ni murimo ki ogu Yehova ahaire abaheereza be boona? N’okubuurira amakuru marungi g’Obukama bwa Ruhanga. * (Reeba obugambo obw’ahansi.) (Matayo 24:14) Eky’okureeberaho ky’omubibi nikishoboorora gye enshonga egi. Ka tushwijume eky’okureeberaho ekya kabiri.

10. (a) Embibo n’eitaka ebi Yesu yaagambireho omu ky’okureeberaho kye nibijwekyera ki? (b) Ekimera ky’engano nikyana harugamu ki?

¹⁰ Shoma Luka 8:5-8, 11-15. Omu ky’okureeberaho ky’omubibi, Yesu akashoboorora ngu embibo “n’ekigambo kya Ruhanga,” nari obutumwa oburikukwata aha Bukama bwa Ruhanga. Kandi eitaka n’omutima gw’omuntu. Embibo ezaagwire aha itaka rirungi zikamera, zaatsimba emizi, zaatooka amababi, kandi zaarugamu ekimera. Bwanyima ekimera kikeera “emirundi igana.” Ka tugire ngu ekimera ekyo kikaba kiri engano,  ekaba neija kwana harugamu ki? Mbwenu shi n’ebimera by’engano ebindi? Ngaaha! Kikaabaire nikirugamu embibo, reero bwanyima zikura zirugamu ebimera by’engano. Omu ky’okureeberaho eki, embibo emwe ekarugamu embibo igana. Eki nikitwegyesa ki aha buheereza bwaitu?

11. (a) Eky’okureeberaho ky’omubibi nikitwegyesa ki aha buheereza bwaitu? (b) Nitwana tuta embibo nsya?

¹¹ Obu abazaire Abakristaayo n’Abajurizi ba Yehova abandi baabanza kutwegyesa aha Bukama bwa Ruhanga, bakaba bari nk’abarikubiba embibo omu itaka rirungi. Bakashemererwa ku baareebire twikiriza obutumwa obwo. Embibo egyo ekaguma neekura kandi yaayeyongyera kukura kuhitsya obu yaayana. Kandi nk’oku ekimera ky’engano eki twaheza kugambaho kitarikubaasa kwana ebindi bimera, beitu enjuma nsya, naitwe titurikurugwamu abeegi basya, kureka niturugwamu embibo nsya. * (Reeba obugambo obw’ahansi.) Ekyo nitukikora tuta? Buri kugambira abandi aha Bukama bwa Ruhanga, nituba turi nk’abarikubaha aha mbibo eyaabibirwe omu mitima yaitu kandi turikugijanjaaza. (Luka 6:45; 8:1) Twagumizamu nitubuurira obutumwa oburikukwata aha Bukama bwa Ruhanga, nituba ‘nitwana ebyana’ twine okugumisiriza.

12. (a) Nitwega ki omu ky’okureeberaho kya Yesu eky’emizaabibu n’omubibi? (b) Eishomo eryo nirikureetera kwehurira ota?

¹² Nitwega ki omu ky’okureeberaho kya Yesu eky’omuzaabibu n’omubibi? Nitwega ngu okwana ebyana tikirikwegamira aha ku abantu barikwakiira amakuru marungi. Kureka nikwegamira aha kugumizamu kwaitu turikubuurira. Paulo akagamba ekirikushushana n’ekyo obu yaagira ati: ‘Buri omwe aryaheebwa ebihembo nk’omurimo gwe oku guriba guri.’ (1 Abakorinso 3:8) Yehova naija kutuha ebihembo ahabw’okukora kwaitu, beitu ti habw’ebirikuruga omu kukora kwaitu. Matilda, otwire ari payoniya kumara emyaka 20, naagira ati: “Nikindeetera okushemererwa ahabw’okumanya ngu Yehova naatuha ebihembo ahabw’okuteeraho kwaitu.”

13, 14. Kurugiirira aha biri omu Abarooma 10:1, 2, ahabw’enki Paulo atararekyeire aho kubuurira?

¹³ Niki ekiraatuhwere ‘kwana ebyana’ twine okugumisiriza? Ka twetegyereze gye eky’okureeberaho kya Paulo. Nitumanya ngu Paulo  akahwamu amaani ahabw’okugira ngu Abayudaaya bakanga amakuru agarikukwata aha Bukama. Kwonka Paulo tararekyeire aho kubabuurira. Akashoboorora oku yaabaire naatwara Abayudaaya obu yaagira ati: “Ekyakunanura omutima gwangye, kandi eki nshabira Abaisraeli ahari Ruhanga nikyo eki, ngu bajunwe. Ahakuba nimpamya nti: Baine obweziriki ahari Ruhanga, kwonka tiburimu kushoborokyerwa.” (Abarooma 10:1, 2) Ahabw’enki Paulo yaagumiizemu naabuurira?

¹⁴ Enshonga y’okubanza, Paulo akagamba ekyamuhigire kugumizamu naabuurira Abayudaaya. N’okukira ngu kikaba ‘nikinanura omutima gwe.’ Buzima akaba naayenda ngu bahikye aha kujunwa. (Abarooma 11:13, 14) Enshonga ya kabiri, akagira ngu ‘akashabira Abaisraeli ahari Ruhanga.’ Akeeshengyereza Yehova ngu buri omwe aha Bayudaaya abaase kwikiriza amakuru g’Obukama. Enshonga ya kashatu, akagira ati: ‘Baine obweziriki ahari Ruhanga.’ Akaba naareeba ebirungi omu bantu n’okubaasa kwabo okw’okuheereza Yehova. Akaba naamanya ngu Abayudaaya abeeziriki nibabaasa kuba abeegi ba Kristo abeeziriki, nkawe.

15. Nitubaasa kutooreza tuta Paulo? Ha eby’okureeberaho.

¹⁵ Nitubaasa kutooreza tuta Paulo? Ekintu ky’okubanza, twine kugira obweziriki bw’okusherura abo abaine ekyetengo ky’okutunga amagara agatahwaho. Ekya kabiri, nitweshengyereza Yehova kuhwera abantu abaine emitima mirungi kuhurikiza ebi turikubabuurira.  (Ebyakozirwe 13:48; 16:14) Eki nikyo Silvana, otwire ari payoniya kumara emyaka nka 30, arikukora. Naagira ati: “Ntakagiire aha buri nju omu kicweka eki ndikubuuriramu, ninshaba Yehova ngu ampe emiteekateekyere mirungi.” Kandi naitwe nitushaba ngu baamaraika batuhwere tubaase kubona abantu abarikwenda kuhurikiza. (Matayo 10:11-13; Okushuuruurwa 14:6) Robert, otwire ari payoniya kumara emyaka erikurenga 30, naagira ati: “Okukora na baamaraika abarikumanya gye ebi abantu barikurabamu nikishemeza.” Ekya kashatu, nituteeraho kureeba ebirungi omu bantu n’okubaasa kwabo okw’okuheereza Yehova. Carl, omureeberezi omazire emyaka erikurenga 50 abatiziibwe, naagira ati: “Ninsherura akamanyiso kakye akarikworeka ngu omuntu n’ow’amazima, obundi nk’akamwenyo, okureebesa embabazi, nari yaabuuza ekibuuzo ekirikuruga aha mutima.” Twakora ebintu ebi, nitubaasa ‘kwana ebyana’ twine okugumisiriza nk’oku Paulo yaakozire.

16, 17. (a) Nitubaasa kwega ki omu Omubuurizi 11:6? (b) Okubuurira kwaitu nikukwata kuta aha barikutureeba?

¹⁶ Titushemereire kwebwa oku omurimo gwaitu gw’okubuurira gurikukwata aha bantu, n’obu kyakuba nikireebeka ngu tihariho abarikuhurikiza. (Shoma Omubuurizi 11:6.) Abantu nibaba nibatureeba. Nibeetegyereza oku turikuba tujwaire gye, nibareeba ngu turi abanyambabazi kandi abarikutwaza gye. Eki nikibaasa kubashemeza, kandi haahinguraho obwire, abaabaire nibatuteekateekaho kubi nibabaasa kutandika kututeekateekaho gye. Sergio na Olinda bashangire ngu eki kihikire.

¹⁷ Sergio naagira ati: “Ahabw’okurwara, haine obu twamara obwire tutarikuza ahu baasi zirikwemerera. Ku twagarukire, abahinguzi baatubuuza bati: ‘Niki ekibaireho? Ka mubaire mutakireebeka?’” Olinda naayongyeraho arikumwenya ati: “Abavugi ba baasi bakatuhuubira, kandi abandi baatugira ngu, twashemererwa kureeba ngu mwagaruka aha murimo gwanyu!’ Kandi bakatushaba na magaziini zaitu.” Sergio na Olinda bakatangaara omushaija ku yaizire aha kagaari kaabo akabaha omuganda gw’ebimuri, kandi akabeebaza ahabw’omurimo ogu barikukora.

18. Ahabw’enki omariirire ‘kwana ebyana’ oine okugumisiriza?

¹⁸ Waagumizamu ‘otarikugwisa omukono’ gwawe omu kugambira abandi aha Bukama bwa Ruhanga, nooba ori omwe ahari abo abarikuha ‘amahanga goona’ obuhame. (Matayo 24:14) Okukira byona, noija kutunga okushemererwa okurikuruga omu kumanya ngu nooshemeza Yehova. Naakunda abo boona ‘abarikwana ebyana’ baine okugumisiriza!