Obunabi oburi omu chati egi nibubaho burikwihaihana. Omu miringo mingi nibworeka ngu turi omu ‘bunaku bw’emperu.’​—Dan. 12:4.

• Ebyahandiikirwe Kush. 11:7; 12:13, 17; 13:1-8, 12

  Obunabi “Enyamaishwa” etwire neetegyeka abantu omu nsi kumara ebyasha bingi. Omu bwire bw’emperu, omutwe gwayo ogwa mushanju gukahutaazibwa. Bwanyima omutwe gukakira kandi abantu omu ‘nsi’ yoona baakuratira enyamaishwa egyo. Sitaane naakoresa enyamaishwa ‘kurwanisa oruzaaro rw’abakitsigaireho’

  Okuhikiirira Omwegyemure guherize kubaho, hakatandikaho gavumenti z’abantu ezirikuhakanisa Yehova. Bwanyima y’ebyasha bingi, omu Rutaro rw’Ensi Yoona orwa I, Obutegyeki bwa Bungyereza bukahwa amaani. Kwonka United States ku yaagyegatsireho, ekagaruka yaagira amaani. Na munonga omu biro by’emperu, Sitaane naakoresa eby’obutegyeki byona kubonabonesa abaheereza ba Ruhanga.

• Ebyahandiikirwe Dan. 11:25-45

  Obunabi Okuharangatana aha gati y’omugabe wa bukiizi-bwa-bumosho n’owa bukiizi-bwa-buryo omu biro by’aha muheru.

  Okuhikiirira Germany kuharangatana na Bungyereza n’Amerika. Omuri 1945 Soviet Union n’abashagiki baayo bakaba omugabe w’obukiizi-bwa-bumosho. Omuri 1991, Soviet Union ekagwa, kandi omu bwire obwo, Russia n’abashagiki baayo bakahinduka omugabe wa bukiizi-bwa-bumosho.

• Ebyahandiikirwe Isa. 61:1; Mal. 3:1; Luk. 4:18

  Obunabi Omuzigu akabiba omwata omu musiri gw’engano gwakura gwashweka engano kuhitsya omu bwire bw’eishaaruura, omwata gwabona kutooranwa omu ngano.

  Okuhikiirira Kuruga omu myaka ya 1870 n’okwongyerayo, C. T. Russell na bagyenzi be bakeezirika kushoboorora amazima ga Baibuli. Omu myaka ya 1880, bakatandika kworeka ngu abaheereza ba Ruhanga baine kubuurira. Bakashohoza ebicweka ebiine emitwe, “Ababuurizi 1,000 Nibendwa” “n’Entoore Kubuurira.”

• Ebyahandiikirwe Mat. 13:24-30, 36-43

  Obunabi Omuzigu akabiba omwata omu musiri gw’engano gwakura gwashweka engano kuhitsya omu bwire bw’eishaaruura, omwata gwabona kutooranwa omu ngano.

  Okuhikiirira Kuruga omu myaka ya 1800 n’okwongyerayo, Abakristaayo ab’amazima bakatandika kushoroorwa omu Bakristaayo ab’ebishuba. Omu biro by’emperu, Abakristaayo ab’amazima nibarundaanwa baihwa omu Bakristaayo ab’ebishuba.

• Ebyahandiikirwe Dan. 2:31-33, 41-43

  Obunabi Ekishushani ky’ebigyere by’ekyoma n’eibumba kikozirwe omu byoma bitari bimwe.

  Okuhikiirira Eibumba nirijwekyera abantu ba butoosha abari ahansi y’Obutegyeki Kirimaani obwa Bungyereza n’Amerika. Abantu nibaremesa obutegyeki obu kukoresa obushoboorozi bwabwo omu bwijwire.

• Ebyahandiikirwe Mat. 13:30; 24:14, 45; 28:19, 20

  Obunabi Abari ‘nk’oburo’ nari engano nibarundaanwa omu “bitara” kandi ‘omwambari omwesigwa kandi ow’obwengye’ akatooranwa kureeberera “ab’omu ka” ya Yesu. Omurimo gw’okubuurira amakuru marungi g’Obukama gukajanjaara omu nsi yoona.

  Okuhikiirira Omuri 1919 omwambari omwesigwa akatooranwa kureeberera abaheereza Ruhanga. Kuruga obwo n’okwongyerayo, Abeegi ba Baibuli nibongyera kubuurira n’amaani. Obunaku obu, Abajurizi ba Yehova nibabuurira omu mahanga agarengire 200, kandi nibashohoza ebitabo ebirikwegamira ahari Baibuli omu ndimi ezirikurenga 1,000.

• Ebyahandiikirwe Dan. 12:11; Kush. 13:11, 14, 15

  Obunabi Enyamaishwa y’amahembe abiri ekeebembera omu kukora “ekishushani ahabw’enyamaishwa egyo,” kandi neeha “ekyo kishushani ky’enyamaishwa omwitsyo.”

  Okuhikiirira Obutegyeki Kirimaani obwa Bungyereza n’Amerika nibwo bwayebembeire omu kutandikaho Ekigombe ky’Amahanga Agakwataniise. Ekigombe eki nikishagikwa n’amahanga agandi. Bwanyima, omugabe wa bukiizi-bwa-bumosho akeegaita aha kigombe ky’amahanga agakwataniise kuruga 1926 kuhika 1933 bwonka. Kushushana n’Amahanga Ageeteeraine (UN), Ekigombe ky’Amahanga Agakwataniise ekyabandize kikaheebwa ekitiinisa ekishemereire Obukama bwa Ruhanga.

• Ebyahandiikirwe Dan. 8:23, 24

  Obunabi Omugabe ow’aha maisho aharikutiinisa akareeta “okucwekyerera okurikutiinisa.”

  Okuhikiirira Obutegyeki Kirimaani obwa Bungyereza n’Amerika bwitsire abantu baingi. Nk’eky’okureeberaho, omu Rutaro rw’Ensi Yoona orwa II, United States ekacwekyereza abantu baingi obu yaateera bomu ibiri z’amaani aha ihanga eryabaire nirihakanisa obutegyeki kirimaani obw’amakwatane.

• Ebyahandiikirwe Dan. 11:31; Kush. 17:3, 7-11

  Obunabi “Enyamaishwa erikutukura” ey’amahembe ikumi ekaruga omu kiina ekitaine bugarukiro kandi niwe mugabe wa munaana. Ekitabo kya Danieli nikigamba aha mugabe ogwo ‘nk’ekirikuzira ekirikuhwerekyereza.’

  Okuhikiirira Ekigombe ky’Amahanga Agakwataniise kikahwa amaani omu Rutaro rw’Ensi Yoona orwa II. Bwanyima y’orutaro orwo, ekibiina kya UN kikateebwaho. UN, nayo nk’ekigombe ky’amahanga agakwataniise, neeheebwa ekitiinisa ekishemereire Obukama bwa Ruhanga. Ekibiina kya UN nikiija kutaahirira ediini y’ebishuba.

• Ebyahandiikirwe 1 Tes. 5:3; Kush. 17:16

  Obunabi Amahanga nigaija kurangirira ngu “n’obusingye tihariho kabi,” kandi “amahembe ikumi” “n’enyamaishwa” nibiija kutaahirira “maraaya” acwekyerezibwe. Bwanyima y’ekyo, amahanga nigaija kucwekyerezibwa.

  Okuhikiirira Amahanga nigabaasa kuteekateeka ngu gareetsire obusingye n’oburinzi omu nsi. Reero amahanga agarikushagika UN nigaija kucwekyereza ebibiina by’ediini y’ebishuba. Eki nikiija kutandika ekicweka ky’okubanza eky’okubonabona kwingi. Okubonabona okwo nikwija kuhendera n’okucwekyerezibwa kw’ensi ya Sitaane yoona ahari Haramagedoni.

• Ebyahandiikirwe Ezk. 38:11, 14-17; Mat. 24:31

  Obunabi Googi naija kutaahirira ensi y’abaheereza ba Ruhanga. Reero obwo, baamaraika nibaija kurundaana “entoore.”

  Okuhikiirira Omugabe wa bukiizi-bwa-bumosho, arikukora hamwe na gavumenti ezindi zoona omu nsi, nibaija kutaahirira abaheereza ba Ruhanga. Bwanyima y’okutaahirira oku kutandika, abashukirweho omwoyo gurikwera abaraabe bakiri omu nsi nibaija kurundaanwa kutwarwa omu iguru.

• Ebyahandiikirwe Ezk. 38:18-23; Dan. 2:34, 35, 44, 45; Kush. 6:2; 16:14, 16; 17:14; 19:20

  Obunabi Ogwo ‘oshutami’ aha ‘mbaraasi erikwera’ naija kuhendera ‘okusingura’ kwe arikucwekyereza Googi n’eihe rye. “Enyamaishwa” neija ‘kunagwa omu nyanja erikwakamu omuriro n’obuganga bw’ekibiriiti,’ n’ekishushani rutaaba nikiija kucwekyerezibwa.

  Okuhikiirira Yesu, Omugabe w’Obukama bwa Ruhanga, naija kujuna abaheereza ba Ruhanga. Ari hamwe n’abu araategyekye nabo 144,000 n’eihe rya baamaraika, naija kucwekyereza amahanga agaraabe geegaitsire hamwe, n’entebeekanisa ya Sitaane yoona ey’eby’obutegyeki.