“Omu buhangwa ndi omuntu oine enshoni,” Sara * nikwo arikushoboorora, “kandi tindikweyikiririzamu ekirikumara. N’ahabw’ekyo ninyetiina naaba ndi omu bantu abarikugambisa amaani kandi abataine nshoni. Kwonka nimba nyikaikaine naaba ndi n’omuntu orikwetwara kandi omucureezi. Omuntu nk’ogwo nimbaasa kumugambira ekiri aha mutima gwangye, enyehurira zangye, n’oburemeezi bwangye. Banywani bangye ab’aha mara nikwo barikutwaza batyo.”

Ebigambo bya Sara nibyoreka ngu okwetwara nikutureetera kukundwa abantu abandi. Kandi okwetwara nikushemeza Yehova. Ekigambo kye nikitwehanangiriza kiti: “Mujware . . . obucureezi” nari okwetwara. (Kol. 3:12) Okwetwara niki? Yesu akooreka ata ngu naayetwara? Kandi omutwarize ogu nigubaasa kutureetera guta kugira okushemererwa?

Okwetwara n’enyehurira y’okutwaza gye n’okugira obusingye. Omuntu orikwetwara naatwariza abandi omuringo gw’eihoreere, ogw’embabazi, kandi n’omu mbeera ezirikugwisa kubi naaguma aikaikaine aine okwerinda.

Okwetwara ti bweremwa, kureka n’omutwarize gw’amaani. Ekigambo ky’Orugriika ekirikuvunuurwa nk’okwetwara kikaba nikikoresibwa kushoboorora oku embaraasi y’omu kishaka erikutendekwa. Embaraasi neeguma eine amaani gaayo, kwonka neetendekwa kutegyeka amaani gaayo. Omu muringo nigwo gumwe, twaba abarikwetwara, niturinda enyehurira zaitu z’obutahikiirira, reero tuguma nitukoragana n’abandi omu muringo gw’obusingye.

Omuntu naabaasa kugira ngu ‘omu buhangwa tindi muntu orikwetwara.’ Nitutuura omu nsi ahu abantu barikugambisa amaani, kandi batari bagumisiriza, n’ahabw’ekyo nikibaasa kutugumira kugira omutwarize gw’okwetwara. (Rom. 7:19) N’ahabw’ekyo, nikyetengyesa okuteeraho munonga kubaasa kugira omutwarize gw’okwetwara, kwonka omwoyo gurikwera ogwa Yehova nigwija kutuhwera kumariirira kuhamira aha kigyendererwa kyaitu. (Gal. 5:22, 23) Ahabw’enki twine kuteeraho kugira omutwarize gw’okwetwara?

Okwetwara nikureetera abantu kutukunda. Nk’oku Sara owaaba yaagambirweho yaayetegyereize, nitukunda kuba turi n’abantu abarikwetwara. Yesu n’eky’okureeberaho ky’omutaano omu kwetwara n’okugira embabazi. (2 Kor. 10:1) Nangwa n’abaana abaabaire batarikumumanya gye bakaba nibenda kuba haihi nawe.​—Mak. 10:13-16.

Okwetwara nikuturinda na bagyenzi baitu. Okwetwara nikutuhwera kutarahuka kuhwa amaani  n’okugira ekiniga. (Enf. 16:32) N’ahabw’ekyo nitwetantara enyehurira z’okweshinja ezirikubaho ahabw’okukora kubi abandi, na munonga omuntu ou turikukunda. Kandi okwetwara nikutuhwera kutareetera bagyenzi baitu oburemeezi ahabw’okuremwa kurinda enyehurira zaitu.

N’obu Yesu araabe yaabaire aine obujunaanizibwa bwingi n’eby’okukora bingi, akaba naatwariza gye boona. Omu bwire obwo abantu baingi bakaba baremereirwe baine kuruhuurwa. Ka kishemereire kuba kyabahuumuriize Yesu ku yaabagizire ati: “Mwije ahariinye, . . . ahabw’okuba nintwaza gye, kandi ndi omucureezi omu mutima”!​—Mat. 11:28, 29.

Nitubaasa kugira tuta omutwarize gw’okwetwara nka Yesu? Nitushwijuma Ekigambo kya Ruhanga kwega oku Yesu yaabaire naatwariza abantu n’oku yaatwarize omu mbeera zigumire. Reero, naitwe twaba turi omu mbeera ezirikutugyeza omu kwetwara kwaitu, nituteeraho kutwaza nka Yesu. (1 Pet. 2:21) Yetegyereze enshonga ishatu ezaahweraire Yesu kutwaza gye.

Yesu akaba ari omucureezi omu mutima. Yesu akagira ati: “Nintwaza gye, kandi ndi omucureezi omu mutima.” (Mat. 11:29) Baibuli neegamba aha mitwarize egi yombi hamwe, ahabw’okugira ngu okutwaza gye kwine akakwate n’obucureezi nari okwetwara. (Efe. 4:1-3) Ahabw’enki kiri kityo?

Obucureezi nibutuhwera kwetantara kurahuka kugira ekiniga n’okuguubwa kubi. Yesu akatwariza ata abaamucwereire orubanja rutahikire bakamweta “omunyamururu, kandi omusinzi”? Yesu akooreka ngu bakaba bagwire, kandi omu muringo gw’okwetwara akagira ngu “obwengye [nibumanyirwa] aha mirimo yabwo.”​—Mat. 11:19.

Omuntu yaagamba kubi aha rangi yaawe, obuhangwa bwawe, nari obukomooko bwawe, noobaasa kuteeraho kumugarukamu omu muringo murungi. Peter, omureeberezi omuri South Africa, naagira ati: “Ku ndikuguubwa kubi ahabw’eki omuntu yaagamba, niinyebuuza nti: ‘Ku ogire ngu ni Yesu yaaba naija kutwaza ata?’” Naayongyeraho ati: “Nyegire kutaba orikurahuka kuguubwa kubi.”

Yesu akaba naayetegyereza obweremwa bw’abantu. Abeegi ba Yesu bakaba baine ebigyendererwa birungi, kwonka obumwe oburemeezi bwabo bukaba nibubaremesa kukora ebi barikwenda kukora. Nk’eky’okureeberaho, omu kiro Yesu atakaitsirwe, Petero, Yakobo, na Yohaana bakaremwa kumushagika omu nyehurira ze. Yesu akeetegyereza embeera yaabo yaagira ngu “omutima gwo nigukunda, kwonka omubiri n’omweremwa.” (Mat. 26:40, 41) Yesu ahabw’okwetegyereza embeera y’entumwa ze, tarabagiriire kiniga.

Mandy ni munyaanyazi-itwe owaabaire naakira kucwera bagyenzi be orubanja, kwonka hati naateeraho kwetwara nka Yesu. Naagira ati: “Ninyijuka ngu abantu boona tibahikiriire, kandi niinteeraho kuta omutima aha mitwarize yaabo emirungi nk’oku Yehova arikukora.” Mbwenu shi oku Yesu yaabaire naatwariza gye abantu nikubaasa kukuhwera kutwariza gye abandi?

Yesu akareka enshonga omu mikono ya Ruhanga. Obu Yesu yaabaire ari omu nsi akeemera okutwarizibwa kubi. Abantu tibaramwetegyereize, bakamugaya, kandi bakamubonabonesa. N’obu kiraabe kiri kityo, akaguma ari omucureezi ahakuba ‘akeehayo ahari ogwo orikucwa emanja z’amazima.’ (1 Pet. 2:23) Yesu akaba naamanya ngu Ishe ow’omu iguru naija kumureeberera ayiheho obutari buringaaniza omu bwire bwe.

Twaguubwa kubi tukateeraho kurwanisa obutari buringaaniza, nitubaasa kugira ekiniga kirengire tube rwongyerera maganya. Niyo nshonga ahabw’enki Ebyahandiikirwe nibitwijutsya biti: “Ekiniga ky’omuntu tikikora by’okuhikiirira kwa Ruhanga.” (Yak. 1:20) Nangwa n’obu twakuba tuhikire kugira ekiniga, obutahikiirira nibubaasa kutureetera kutwaza omu muringo gugwire.

Munyaanyazi-itwe omuri Germany orikwetwa Cathy akaba naateekateeka ngu, ‘waaba oteerwanireho, toine ondiijo orikwija kukurwanaho.’ Kwonka ku yaayegire kwesiga Yehova, emiteekateekyere ye ekahinduka. “Tikyakinyetengyesa kwerwanaho,” nikwo arikugira. “Ninyetwara, ndikumanya ngu buri kimwe kiri omu bushoboorozi bwa Yehova.” Ku oraabe oratwariziibweho omu muringo gutari gw’oburingaaniza, okutooreza Yesu okeesiga Ruhanga nikiija kukuhwera kuguma ori orikwetwara.

Yesu akooreka ngu obucureezi nibukora kihango omu kureetaho okushemererwa. Yesu akagira ngu “abacureezi” baine okushemererwa. (Mat. 5:5) Yetegyereze oku okwetwara kurikubaasa kuhwera omu mbeera ezi.

Okwetwara nikutuubya emirabanamu omu bushwere. “Nkaba ninkira kugambira omukazi wangye ebigambo bingi ebirikureeta obusaasi ntafiireyo,” ow’eishe-emwe Robert kuruga Australia nikwo arikugira. “Kwonka waaheza kugambisa ekiniga ebigambo byawe torikubaasa kubigarura enyima. Kikaba nikindeetera enaku ahabw’okumukora kubi.”

‘Twena nitushobya omuri bingi’ omu migambire yaitu, kandi okugamba tutabandize kuteekateeka nikumaraho obusingye omu bushwere. (Yak. 3:2) Omu mbeera nk’ezo, okwetwara nikutuhwera kuguma twikaikaine n’okurinda orurimi rwaitu.​—Enf. 17:27.

Robert akakora n’amaani kwega kuguma aikaikaine n’okugira okwerinda. Eki kirugiremu ki? “Ebiro ebi, n’obu harikubaho obutaikirizana, niinteeraho kuhurikiza n’obwegyendesereza, kwetwara omu kugamba, kandi ninyezibira kuguubwa kubi,” nikwo arikugira. “Omukago ogu nyine n’omukazi wangye gwongyeire kubonera.”

Okwetwara nikutuhwera kukwatanisa gye n’abandi. Abarikurahuka kugira ekiniga nibahendera baine abanywani bakye. Kwonka omutwarize gw’okwetwara, nigutuhwera “kurinda . . . omurunga gw’obusingye.” (Efe. 4:2, 3) Cathy, owaaba yaagambirweho, naagira ati: “Okwetwara nikumbaasisa kukwatanisa gye n’abandi, n’obu abamwe baraabe bagumire kukoragana nabo.”

Okwetwara nikureeta obusingye bw’omu mutima. Baibuli neegira ngu okwetwara n’obusingye biine akakwate ‘n’obwengye oburikuruga omu iguru.’ (Yak. 3:13, 17) Omuntu orikwetwara naaba aine “omutima ogutuurize.” (Enf. 14:30) Martin, otaireho munonga kugira omutwarize gw’okwetwara, naagira ati: “Hati niinyoroba tinkiremera aha nshonga, kandi eki nikindeetera obugwagye omu mutima n’okushemererwa.”

N’amazima, nikibaasa kutugumira kugira omutwarize gw’okwetwara. Ow’eishe-mwe omwe naagira ngu, “okuba ow’amazima, na hati, obumwe ningira ekiniga kingi omu mutima.” Kwonka Yehova orikutuhiga kugira omutwarize gw’okwetwara, naija kutuhwera omu kurwana oku. (Isa. 41:10; 1 Tim. 6:11) Naabaasa kuhendera okutendekwa kwaitu, kandi naabaasa ‘kutuha amaani.’ (1 Pet. 5:10) Bwanyima, nitubaasa kutooreza Paulo, omu kugira ‘obucureezi n’okutwaza gye ebya Kristo.’​—2 Kor. 10:1.