1. Yesu akagamba ki aha itungo ery’omu iguru?

TI BURI ky’omuhendo kyona ngu nikireebwa butunu. Nangwa ebintu ebirikukirayo kuba eby’omuhendo n’ebitarikureebwa. Yesu omu Rubazo rwe orw’aha Rushozi, akagamba aha by’omuhendo eby’omu iguru ebirikukirira kimwe eby’obugaiga. Akagaruka yaagira ati: “Ahu eitungo ryawe riri, n’omutima gwawe niho guba.” (Mat. 6:19-21) Omutima gwaitu nigwija kutuhiga kusherura ebintu ebi turikutwara nk’eby’omuhendo munonga. Nitwebiikira “eitungo omu iguru” turikukora eiziina rirungi na Ruhanga nari omukago murungi nawe. Yesu akashoboorora ngu, eby’omuhendo nk’ebi tibirikubaasa kucwekyerera nari kwibwa.

2. (a) Kurugiirira aha biri omu 2 Abakorinso 4:17, 18, entumwa Paulo naatuhiga kuta omutima ahari ki? (b) Nituza kushwijuma ki omu kicweka eki?

² Entumwa Paulo naatuhiga ‘kuhanga amaisho ebitarikureebwa.’ (Shoma 2 Abakorinso 4:17, 18.) Ebintu eby’omuhendo ebitarikureebwa nibitwariramu emigisha ei turaatungye omu nsi ensya. Omu kicweka eki, nituza kushwijuma eby’omuhendo bina ebitarikureebwa ebirikutugasira hati. Nibyo omukago murungi na Ruhanga, ekiconco ky’okushaba, obuhwezi bw’omwoyo gurikwera, n’obushagiki kuruga omu iguru omu murimo gwaitu gw’okubuurira. Nituza n’okureeba oku turikubaasa kworeka ngu nitusiima eby’omuhendo ebi ebitarikureebwa.

3. Ni ky’omuhendo ki ekirikukirayo ekitarikureebwa, kandi niki ekirikutubaasisa kukitunga?

³ Eky’omuhendo ekirikukirayo ekitarikureebwa n’okugira omukago murungi na Yehova Ruhanga. (Zab. 25:14) Nikibaasika kita Ruhanga kugira omukago murungi n’abantu abatahikiriire  kandi akaguma ari orikwera omu bwijwire? Naabaasa kukikora ahabw’okugira ngu ekitambo kya Yesu ‘nikiihaho ekibi ky’ensi.’ (Yoh. 1:29) Yehova akamanya kare ngu tihaine ekirikubaasa kuremesa ekigyendererwa kye eky’okuhayo Omujuni kuhikiirira. Niyo nshonga ahabw’enki Ruhanga yaabaire naabaasa kunywana abantu ira abaabaireho Yesu atakafiire.​—Rom. 3:25.

4. Gamba bamwe abaabaire banywani ba Ruhanga ekibiina Ekikristaayo kitakabaireho.

⁴ Teekateeka aha bashaija abamwe abaabaire banywani ba Ruhanga ekibiina Ekikristaayo kitakabaireho. Abrahamu akaba aine okwikiriza kw’omutaano. Bwanyima y’emyaka erikurenga 1,000 Abrahamu aherize kufa, Yehova akamugambaho nka ‘munywani we.’ (Isa. 41:8) N’ahabw’ekyo n’obu yaakuba rufu terikubaasa kutaanisa Yehova na banywani be. Yehova naakiijuka Abrahamu. (Luk. 20:37, 38) Ondiijo ni Yobu. Omu maisho ga baamaraika baingi, Yehova akagamba ahari Yobu ataine kubangaanisa kwona. Akagira ngu Yobu akaba ari omushaija ‘ohikiriire, orikumutiina kandi orikwetantara ekibi.’ (Yob. 1:6-8) Kandi shi Yehova akaba naareeba ata Danieli, owaamuheereize omu bwesigwa kumara emyaka nka 80 arikutuura omu bantu abakaafiire? Emirundi eshatu baamaraika bakahamiza omugurusi ogu, ngu Ruhanga ‘naamukunda munonga.’ (Dan. 9:23; 10:11, 19) Nitubaasa kuhamya ngu Yehova aine ekihika ky’okuzoora banywani be abaafiire.​—Yob. 14:15.

5. Oine kukora ki kubaasa kuba munywani wa Yehova?

⁵ N’abantu bangahi abatahikiriire obunaku obu abari banywani ba Yehova? Ni bahika omu bukaikuru. Eki nitukimanya ahabw’okugira ngu abashaija, abakazi n’abaana omu nsi yoona nibagumizamu kworeka omu mitwarize yaabo ngu nibenda kuba banywani ba Ruhanga. Yehova naanywana “ab’omutima ogugororokire.” (Enf. 3:32) Nibabaasa kuba banywani ba Ruhanga ahabw’okwikiririza omu kitambo kya Yesu. Yehova arikwihirira aha kitambo ekyo, naatwikiriza kwehayo ahariwe kumuheereza, kandi tukabatizibwa. Twakuratira amadaara makuru ago, nitwegaita aha bukaikuru bw’Abakristaayo abeehaireyo bakabatizibwa, kandi abaine okushemererwa ahabw’okugira omukago murungi n’Ogwo orikukirayo omu nsi n’eiguru!

6. Nitubaasa kworeka tuta ngu nitusiima omukago gwaitu na Ruhanga?

⁶ Nitubaasa kworeka tuta ngu nitutwara omukago gwaitu na Ruhanga nk’ogw’omuhendo? Nka Abrahamu na Yobu, abaagumire bari abeesigwa ahari Ruhanga kumara emyaka mingi, twine kuguma turi abeesigwa n’obu twakuba tumazire emyaka mingi nituheereza Yehova omu nsi egi embi. Nka Danieli, twine kutwara omukago gwaitu na Ruhanga nk’ogw’omuhendo kukira amagara gaitu. (Dan. 6:7, 10, 16, 22) Turikuhwerwa Yehova, nitubaasa kwemera okugyezibwa kwona okurikutuhikaho kandi tukaguma twine omukago guhami nawe.​—Fil. 4:13.

7. (a) Kurugiirira aha Enfumu 15:8, Yehova naatwara ata okushaba kwaitu? (b) Yehova naagarukamu ata okushaba kwaitu?

⁷ Eky’omuhendo ekindi ekitarikureebwa n’omugisha gw’okushaba. Abanywani barungi nibakunda kugaaniira aha bi barikuteekateeka n’aha nyehurira zaabo. Mbwenu shi nikyo kimwe na Yehova munywani waitu? Eego! Yehova naagamba naitwe kurabira omu Kigambo kye, kandi naakikoresa kutworeka ebiteekateeko bye n’enyehurira ze. Nitubaasa kugamba nawe kurabira omu kushaba, turikumugambira ebi turikuteekateeka n’oku turikwehurira omu mutima. Yehova naakunda kuhurira okushaba kwaitu. (Shoma Enfumu 15:8.) Yehova munywani waitu orikutukunda, naahurira  okushaba kwaitu kandi akugarukamu. Obumwe naabaasa kukugarukamu ahonaaho. Obundi nikibaasa kutwetengyesa kugumizamu nitushaba aha nshonga niyo emwe. Kwonka nabwo, nitubaasa kugira obwesigye ngu naija kutugarukamu omu bwire obuhikire kandi omu muringo ogurikukirayo oburungi. Kwonka obumwe, Ruhanga naabaasa kugarukamu okushaba kwaitu omu muringo ogu tutarikuteekateeka. Nk’eky’okureeberaho, omu mwanya gw’okwihaho ekigyezo, naabaasa kutuha obwengye n’amaani ‘kukigumisiriza.’​—1 Kor. 10:13.

8. Nitubaasa kworeka tuta ngu nitusiima ekiconco ky’okushaba?

⁸ Nitubaasa kworeka tuta ngu nitusiima ekiconco ky’okushaba? Omuringo gumwe n’okworobera obuhabuzi bwa Yehova oburikugira ngu “mushabe obutoosha.” (1 Tes. 5:17) Yehova tarikutugyema kumushaba. Kureka, naatuha obugabe bw’okwecweramu kandi atuhiga kwezirikira okushaba. (Rom. 12:12) N’ahabw’ekyo nitubaasa kworeka okusiima kwaitu turikushaba Yehova emirundi mingi buri izooba. Okushaba kwaitu kwine kutwariramu okusiima Yehova, n’okumuhimbisa.​—Zab. 145:2, 3.

9. Ow’eishe-emwe omwe naatwara ata okushaba, kandi shi iwe?

⁹ Ku turikumara obwire nituheereza Yehova kandi tukareeba oku arikugarukamu okushaba kwaitu, nitwongyera kusiima ekiconco ky’okushaba. Teekateeka aha ky’okureeberaho kya, Chris, ow’eishe-emwe otwire omu buheereza obw’obutwire kumara emyaka 47. Naagira ati: “Ka nikishemeza kwimuka kare omu kasheeshe kushaba Yehova orikwetwara. N’ekintu kirungi munonga kugamba na Yehova omu kasheeshe obu eizooba ririkuba niritandika kwaka ririkuteera aha orume rukangashana! Eki nikimpiga kumusiima ahabw’ebiconco bye, otwariiremu omugisha gw’okushaba. Kandi bwanyima y’okushaba omu mwabazyo, ka nikishemeza kubyama oine omutima gutarikweshinja!”

10. Ahabw’enki twine kusiima ekiconco ky’omwoyo gurikwera?

¹⁰ Omwoyo gurikwera n’ekindi kiconco ky’omuhendo ekitarikureebwa. Yesu akatuhiga kuguma  nitushaba kuheebwa omwoyo gurikwera. (Luk. 11:9, 13) Yehova naakoresa omwoyo gurikwera kutuha amaani “agarikukirira kimwe” aha gaabutoosha. (2 Kor. 4:7; Byak. 1:8) Turikuhwerwa omwoyo gurikwera, nitubaasa kwemera okugyezibwa kwona okurikutuhikaho.

11. Omwoyo gurikwera nigubaasa kutuhwera guta?

¹¹ Omwoyo gurikwera nigutubaasisa kuhikiiriza obujunaanizibwa bwaitu omu kuheereza Ruhanga. Nigutuhwera kwongyera kuboneza etalanta zaitu n’okubaasa kwaitu. Kandi nigutubaasisa kuhikiiriza gye obujunaanizibwa bw’Ekikristaayo. Nitubaasa kugamba butunu ngu ebirungi ebi turikutunga ti ahabw’amaani gaitu, beitu n’ahabw’obuhwezi bw’omwoyo gurikwera.

12. Kurugiirira ahari Zaaburi 139:23, 24, nitubaasa kushaba omwoyo gurikwera kutuhwera kukora ki?

¹² Omuringo ogundi ogu turikworeka ngu nitumanya obukuru bw’omwoyo gurikwera, n’okushaba kubaasa kumanya yaaba twine ebiteekateeko n’ebyetengo bibi omu mitima yaitu. (Shoma Zaaburi 139:23, 24.) Twashaba omu muringo nk’ogwo, Yehova naija kukoresa omwoyo gwe kutuhwera kumanya emiteekateekyere n’ebyetengo bitahikire. Kandi twamanya ngu twine ebiteekateeko n’ebyetengo bibi, tushemereire kushaba Yehova kutuha omwoyo gurikwera kugira amaani g’okwangira ebiteekateeko n’ebyetengo ebyo. Obwo nitwija kworeka ngu tumaririire kwetantara kukora ekintu kyona ekirikubaasa kureetera Yehova kwanga kutuha obuhwezi bw’omwoyo gurikwera.​—Efe. 4:30.

13. Nitubaasa kwongyera tuta kusiima ekiconco ky’omwoyo gurikwera?

¹³ Nitubaasa kwongyera kusiima ekiconco ky’omwoyo gurikwera twateekateeka aha bi omwoyo gurikwera gubaasize kukora omu biro ebi. Yesu atakagiire omu iguru, akagambira abakuratsi be ati: ‘Nimwija kuheebwa amaani, omwoyo gurikwera ku guraabaijeho, kandi nimwija kuba baakareebi bangye okuhitsya aha muheru gw’ensi.’ (Byak. 1:8) Ebigambo ebi biriyo nibihikiirira omu muringo gw’omutaano. Ahabw’obuhwezi bw’omwoyo gurikwera, abantu nk’obukaikuru munaana n’ekicweka kuruga omu nshonda zoona ez’ensi bahindukire  Abajurizi ba Yehova. Kandi turi omu paradiso ey’eby’omwoyo ahabw’okugira ngu omwoyo gurikwera nigutuhwera kugira emitwarize mirungi nk’okukunda, okushemererwa, obusingye, okugumisiriza, embabazi, oburungi, obwesigwa, obucureezi, n’okwerinda. Emitwarize egi yoona ‘n’ekyana ky’omwoyo.’ (Gal. 5:22, 23) Buzima ekiconco ky’omwoyo gurikwera ka n’eky’omuhendo!

14. Twine bushagiki ki obutarikureebwa twaba turi omu kubuurira?

¹⁴ Twine eky’omuhendo ekitarikureebwa ekindi nigwo mugisha ‘gw’okukora’ hamwe na Yehova n’ekicweka eky’omu iguru eky’ekibiina kye. (2 Kor. 6:1) Nitukikora buri kuza omu murimo gw’okuhindura abantu abeegi. Paulo akeegambaho n’abo abarikwejumba omu murimo ogwo ati: “Turi abakozi [abarikukora hamwe na] Ruhanga.” (1 Kor. 3:9) Ku turikwejumba omu murimo gw’okubuurira, nituba nitukorera hamwe na Yesu. Ijuka ngu bwanyima y’okugambira abeegi be “kuhindura abantu abeegi omu mahanga goona,” Yesu akagira ati: “Ndi hamwe naimwe.” (Mat. 28:19, 20) Kandi shi baamaraika? Ka n’omugisha kwebemberwa baamaraika omu kubuurira amakuru marungi “omu nsi yoona”!​—Kush. 14:6.

15. Ha eky’okureeberaho kuruga omu Baibuli ekirikworeka obushagiki bukuru bwa Yehova omu buheereza bwaitu.

¹⁵ Obushagiki obu turikutunga kuruga omu iguru nibutuhwera kuhikiiriza ki? Twaba nitubiba embibo z’Obukama, embibo ezimwe nizigwa aha mitima erikusiima kandi zikura. (Mat. 13:18, 23) N’oha orikureetera embibo z’amazima kukura kandi zikaana? Yesu naashoboorora ngu tihariho muntu orikubaasa kuba omukuratsi we, Ishe “yaaba atamwiriize haihi.” (Yoh. 6:44) Baibuli erimu eky’okureeberaho ekirikukwata aha nshonga egi. Ijuka obu Paulo yaabuurira abakazi abaabaire bari aheeru y’orurembo Filipi. Yetegyereze eki Baibuli erikugamba ahari omwe aha bakazi abo orikwetwa Ludiya. Yehova ‘akaigura omutima gwe okweta aha bigambo ebyagambwa Paulo.’ (Byak. 16:13-15) Nk’oku Yehova yaayeyiriize haihi Ludiya, abaasize kweyiriza haihi obukaikuru bw’abantu.

16. N’oha oshemereire kuhimbisibwa ahabw’obusinguzi obu turikutunga omu buheereza?

¹⁶ N’oha buzima ori enyima y’obusinguzi bwaitu omu kubuurira? Paulo akagarukamu ekibuuzo ekyo omu baruha ei yaahandiikire ab’ekibiina kya Korinso ati: “Nyowe nkabyara, Apolo yaitirira amaizi, kwonka Ruhanga niwe yaabikurize. N’ahabw’ekyo orikubyara ti kintu, n’obu yaakuba orikwitirira amaizi, kureka Ruhanga okuza.” (1 Kor. 3:6, 7) Nk’entumwa Paulo, butoosha twine kuhimbisa Yehova ahabw’obusinguzi bwaitu omu buheereza.

17. Nitubaasa kworeka tuta ngu nitusiima omugisha ‘gw’okukora na Ruhanga,’ Kristo, na baamaraika?

¹⁷ Nitubaasa kworeka tuta ngu nitusiima omugisha ‘gw’okukora’ na Ruhanga, Kristo, na baamaraika? Nitubaasa kukikora turikusherura oburyo bw’okwejumbira kimwe omu kubuurira abandi amakuru marungi. Hariho emiringo mingi ey’okukora eki, nk’okubuurira omu myanya y’orweteeraine nari enju aha nju. (Byak. 20:20) Kandi baingi nibakunda kubuurira kitaraariire. Baabugana omuntu ou batarikumanya, nibamuramutsya kandi baateeraho kugaaniira nawe. Yabagarukamu gye, nibamubuurira amakuru marungi g’Obukama omu muringo gw’obwengye.

18-19. (a) Nitwitirira tuta embibo z’amazima? (b) Ha eky’okureeberaho ekirikworeka oku Yehova yaahweraire omwegi wa Baibuli.

¹⁸ Obu ‘turikukora na Ruhanga,’ twine kubyara embibo z’amazima kandi tukaziitirira. Omuntu yaayoreka ngu naayenda kumanya ebirikukiraho, twine kukora kyona ekirikubaasika  kumugarukira nari kukora entebeekanisa kugira ngu ondiijo agarukyeyo kutandika kumwegyesa Baibuli. Twagumizamu nitumwegyesa Baibuli, nitwija kushemererwa kureeba oku Yehova arikumuhwera kuhindura emiteekateekyere ye n’enyehurira ze.

¹⁹ Teekateeka aha ky’okureeberaho kya Raphalalani, omuri South Africa owaabaire ari omufumu. Akakunda ebi yaayegire omu kwega Baibuli. Kwonka akagumirwa kwikiriza eki Ekigambo kya Ruhanga kirikugamba aha bikwatiraine n’okuhurizana na baishenkuru abaafiire. (Bir. 18:10-12) Mporampora, akaguma naikiriza Ruhanga kubumba emiteekateekyere ye. Omu bwire bukye, akarekyera aho eby’obufumu, n’obu eki kyabaire nikitwariramu okufeerwa omurimo gwe ogw’okwebaisaho. Raphalalani, hati oine emyaka 60 y’obukuru naagira ati: “Ninsiima Abajurizi ba Yehova ahabw’okumpwera omu miringo mingi, nk’okumpwera kutunga omurimo. Okukira munonga, ninsiima Yehova ahabw’okumpwera kukora empindahinduka ezirikwetengyesa, kandi hati nimbaasa kwejumba omu kubuurira nk’omwe aha Bajurizi be obatiziibwe.”

20. Omaririire kukora ki?

²⁰ Omu kicweka eki, twareeba eby’omuhendo bina ebitarikureebwa. Ekirikukirayo obukuru n’omugisha ogu twine ogw’okuba banywani ba Yehova ab’aha mara. Eki nikitubaasisa kugasirwa omu by’omuhendo ebindi ebitarikureebwa, nk’okugamba nawe kurabira omu kushaba, okutunga obuhwezi bw’omwoyo gurikwera, n’okutunga obushagiki kuruga omu iguru omu buheereza bwaitu. Ka tumariirire kwongyera kusiima eby’omuhendo ebi ebitarikureebwa. Kandi ka tugume nitusiima Yehova ahabw’okuba omunywani murungi!