1. Niki ekirikubaasa kuba kyakutangaarize ku waataireho kugambira abandi ebiri omu Baibuli?

NOIJUKA obu waabanza kumanya ngu ebi orikwega n’amazima? Amazima ga Baibuli agu waabaire nooyega gakaba nigeetegyerezibwa gye kandi goorobi! Okateekateeka ngu buri omwe naija kwikiriza ebi oyegire. Okaba noohamiza kimwe ngu obutumwa bwa Baibuli nibubaasa kubahwera kugira embeera nungi hati n’amatsiko g’okugira ebiro birungi by’omumaisho. (Zab. 119:105) N’ahabw’ekyo okagira omuhimbo waagambira banywani baawe n’abanyabuzaare aha mazima agu waabaire nooyega. Kwonka niki ekyabaireho? Kikakutangaaza kureeba ngu baingi bakanga ebi waabagambiire.

2-3. Obu Yesu yaabaire ari omu nsi abantu baingi bakamutwariza bata?

² Omuriitwe tihaine oshemereire kutangaara, abandi baayanga obutumwa obu turikubabuurira. Obu Yesu yaabaire ari omu nsi, baingi bakamwanga n’obu araabe yaabaire naakora eby’okutangaaza, ebyabaire nibyoreka ngu aine obushagiki bwa Ruhanga. Nk’eky’okureeberaho, Yesu akazoora Laazaaro nangwa n’abahakanisa be bakaba batarikubaasa kubangaanisa aha ky’okutangaaza eki. Kwonka nabwo, abeebembezi b’Abayudaaya bakanga kwikiriza ngu Yesu niwe Mesia. Nangwa bakaba nibenda n’okwita bombi Yesu na Laazaaro!​—Yoh. 11:47, 48, 53; 12:9-11.

³ Yesu akaba naamanya ngu abantu baingi tibarikwija kwikiriza ngu niwe Mesia. (Yoh. 5:39-44) Akagambira abeegi ba Yohaana Omubatizi ati: “Otarikumbangaanisaho aine omugisha” nari okushemererwa. (Mat. 11:2, 3, 6) Ahabw’enki abantu baingi baayangire kwikiriza Yesu?

4. Nituza kushwijuma ki omu kicweka eki?

⁴ Omu kicweka eki n’ekirikukurataho, nituza kushwijuma enshonga zitari zimwe na zimwe ahabw’enki baingi omu kyasha ky’okubanza baayangire kwikiririza omuri Yesu. Nituza n’okureeba  ahabw’enki baingi obunaku obu nibanga kwikiriza obutumwa bwaitu. Ekikuru munonga, nituza kwega ahabw’enki twine kugira okwikiriza kw’amaani omuri Yesu kugira ngu hatagira ekyatuteeza entsibo.

5. Niki ekirikubaasa kuba kyareeteire bamwe kuteekateeka ngu Yesu tiwe Mesia owaaraganisiibwe?

⁵ Baingi bakanga Yesu ahabw’obukomooko bwe. Bakaba nibaikiriza ngu Yesu n’omwegyesa murungi kandi ngu naakora eby’okutangaaza. Kwonka nabwo, bakaba nibamureeba nk’omwana w’omushaija omubaizi omworo. Kandi akaba naaruga Nazareesi, orurembo oru abantu baabaire nibatwara nk’orutari rw’amaani. Nangwa na Nasanaeli, owaizire kuba omwegi wa Yesu, omu kubanza akagira ati: “Omuri Nazareesi nihabaasa kurugamu ekintu kirungi?” (Yoh. 1:46) Nasanaeli naabaasa kuba yaabaire atarikukunda orurembo oru Yesu yaabaire naatuuramu. Nari obundi naabaasa kuba yaabaire naijuka obunabi oburi omuri Miika 5:2, obwabaire nibugira ngu Mesia naija kuzaarirwa omuri Betelehemu, beitu etari Nazareesi.

6. Niki ekyabaire nikiija kuhwera abantu b’omu bunaku bwa Yesu kumanya ngu niwe Mesia?

⁶ Ebyahandiikirwe nibigamba ki? Nabi Isaaya akagira ngu abazigu ba Yesu bakaba batarikwija kufayo aha bushonshorekye ‘bw’obusingye bwe’ obukomooko bwe. (Isa. 53:8) Kwonka obushonshorekye bwingi bukagambwaho omu bunabi. Ku ogire ngu abantu abo bakafayo kushwijuma ebihikire ebirikukwata ahari Yesu, bakaba nibaija kumanya ngu akazaarirwa omuri Betelehemu, kandi ngu akaba ari mwijukuru w’Omugabe Daudi. (Luk. 2:4-7) N’ahabw’ekyo okuzaarwa kwa Yesu kukaba nikuhikaana n’obunabi oburi omu Miika 5:2. Mbwenu shi oburemeezi bukaba buri nkahi? Abantu bakarahukiiriza kucwa orubanja. Bakaba bataine obuhame bwona. Ahabw’enshonga egi, bakateerwa entsibo.

7. Ahabw’enki abantu baingi obunaku obu nibanga Abajurizi ba Yehova?

⁷ Nitureeba oburemeezi nk’obu obunaku obu? Eego. Abajurizi ba Yehova okutwarira hamwe obukomooko bwaitu tiburi bw’amaani, n’ahabw’ekyo baingi nibatureeba nk’abantu b’ahansi “abateegyesiibwe.” (Byak. 4:13) Abamwe nibateekateeka ngu Abajurizi ba Yehova tibashemereire kwegyesa ebirikukwata ahari Baibuli ahabw’okugira ngu tibarikuza omu mashomero agarikwegyesa eby’ediini. Abamwe nibagira ngu Abajurizi ba Yehova “n’ediini y’America,” n’obu Omujurizi wa Yehova nk’omwe ahari mushanju niwe arikutuura omuri United States. Kandi abamwe nibagambirwa ngu Abajurizi ba Yehova tibarikwikiririza omuri Yesu. Emyaka y’enyima, abantu bakaba nibagira ngu Abajurizi ba Yehova “n’Abakomunisiti,” “entatsi z’America,” nari “endeme.” Ahabw’okugira ngu abo abarikuhurira ebitebyo ebi nibaba bataine buhame nari nibanga kubwikiriza, nibahendera bateirwe entsibo.

8. Kurugiirira aha Ebyakozirwe 17:11, abantu baine kukora ki baaba nibenda kumanya abaheereza ba Ruhanga obunaku obu?

⁸ Omuntu naabaasa kwetantara ata kuteerwa entsibo? Abantu baine kwetungira obuhame. Eki nikyo Luka omuhandiiki w’Engiri yaabaire amaririire kukora. Akataho ekigyendererwa ‘ky’okutondoora ebintu byona nk’oku byakurataine’ omu muringo oguhikire. Akaba naayenda ngu abarikushoma ekitabo eki ‘bamanye gye amazima g’ebyo ebi’ baabaire beegire ebirikukwata ahari Yesu. (Luk. 1:1-4) Abayudaaya abaabaire nibatuura omuri Beroya bakaba bari nka Luka. Obu baabanza kuhurira amakuru marungi agarikukwata ahari Yesu, bakashwijuma Ebyahandiikirwe eby’Oruheburaayo kuhamya yaaba ebi baabaire nibagambirwa n’amazima. (Shoma Ebyakozirwe 17:11.) Nikyo  kimwe, abantu obunaku obu baine kwetungira obuhame obuhikire. Ebi barikwegyesibwa baine kubigyeragyeranisa n’eki Ebyahandiikirwe birikugamba. Kandi baine n’okushwijuma ebirikukwata aha Bajurizi ba Yehova ab’obunaku obu. Baayetungira obuhame obuhikire, tibarikwija kwikiriza ebi barikuhurira nari rwango kubahumya bakaremwa kureeba amazima.

9. Hakabaho ki Yesu ku yaayangire kworeka abantu akamanyiso kuruga omu iguru?

⁹ Obu Yesu yaabaire ari omu nsi, bamwe bakaba nibagaya emyegyeseze ye. Bakaba nibenda ekirikukira aha kwegyesa kwe. Bakaba bamugambira kukora “akamanyiso akarikuruga omu iguru” kuhamya ngu niwe Mesia. (Mat. 16:1) Obundi eki bakaba nibakikora ahabw’okuteetegyereza gye ebiri omuri Danieli 7:13, 14. Kwonka, obwire bwa Yehova obw’okuhikiiriza obunabi obwo bukaba butakahikire. Ebi Yesu yaabaire naayegyesa bikaba bishemereire kubamara n’okubahamiza ngu niwe Mesia. Kwonka ku yaayangire kubaha akamanyiso aku baabaire nibenda, ekyo kikabateeza entsibo.​—Mat. 16:4.

10. Yesu akahikiiriza ata ebirikukwata ahari Mesia ebi Isaaya yaamuhandiikireho?

¹⁰ Ebyahandiikirwe nibigamba ki? Nabi Isaaya akahandiika ahari Mesia ati: ‘Tarikwija kutongana, tarikwija kuyomba, n’eiraka rye tiririkwija kuhurirwa omu mihanda.’ (Isa. 42:1, 2) Yesu akaba naayejumba omu buheereza bwe acureire kandi atarikureetera abantu kumutaho omutima. Tarayombekire hekalu z’amaani, kandi akaba atarikujwara emyenda nk’ey’abanyadiini kuba ow’omutaano aha bandi, nari kwenda ngu bamwete ebitiinisa by’ediini. Obu Yesu yaabaire naahozesibwa arikuza kwitwa, tarateireho kushemeza Omugabe Heroode arikumukorera akamanyiso. (Luk. 23:8-11) Akakora eby’okutangaaza ebimwe, kwonka ekigyendererwa kye ekikuru kukaba kuri okubuurira amakuru marungi. Akagambira abeegi be ngu “ahakuba nikyo naiziriire.”​—Mak. 1:38.

11. Abamwe baine miteekateekyere ki egwire obunaku obu?

¹¹ Nitureeba oburemeezi nk’obu obunaku obu? Eego. Baingi nibakunda kuza omu makanisa  mahango agarimu ebihuugirwe eby’omuhendo gw’ahaiguru, abeebembezi b’ediini abaine ebitiinisa by’amaani, n’emikoro etarikumanywa gye obukomooko bwayo. Kwonka abantu ku barikuza omu makanisa nibeega ki ahari Ruhanga n’ebigyendererwa bye? Abo abarikuza omu nteerane zaitu z’Ekikristaayo nibeega ebi Yehova arikwenda ngu bakore, kandi nibatwaza omu muringo ogurikuhikaana n’ekigyendererwa kye. Ebyombeko byaitu by’Obukama nibireebeka gye kandi bicumire gye kwonka tibiri by’esente nyingi. Abarikureeberera ebibiina tibarikujwara emyenda y’omutaano, kandi tibaine ebitiinisa by’omuhendo. Enyegyesa n’enyikiriza zaitu nizeegamira aha Kigambo kya Ruhanga. Beitu, eki nikiteeza baingi entsibo ahakuba nibateekateeka ngu endamya yaitu n’ey’ahansi munonga, kandi ngu ebi turikwegyesa tibirikuhikaana n’ebi barikwenda kuhurira.

12. Nk’oku Abaheburaayo 11:1, 6 harikushoboorora, okwikiriza kwaitu kwine kuba nikwegamira ahari ki?

¹² Nitubaasa kwetantara tuta kuteerwa entsibo? Entumwa Paulo akagambira Abakristaayo abaabaire nibatuura omuri Rooma ati: ‘Okwikiriza nikuruga omu bi turikuhurira, kandi ebi turikuhurira nibiruga omu kigambo ekirikukwata ahari Kristo.’ (Rom. 10:17) N’ahabw’ekyo, nitwombeka okwikiriza kwaitu turikwega Ebyahandiikirwe, beitu kutari kwejumba omu mikoro y’ediini etarikwegamira aha byahandiikirwe, n’obu yaakuba neereebeka nk’erikushemeza. Twine kugira okwikiriza kuhami munonga okurikwegamira aha kumanya okuhikire ahakuba otaine ‘kwikiriza tarikubaasa kushemeza’ gye Ruhanga. (Shoma Abaheburaayo 11:1, 6.) N’ahabw’ekyo, titwine kubanza twareeba akamanyiso karikutangaaza kuruga omu iguru kubaasa kuhamya ngu tuboine amazima. Okushwijuma gye enyegyesa za Baibuli ezirikuhamya okwikiriza nikimara kubaasa kwehamiza amazima n’okweihamu okubangaanisa.

13. Niki ekyareeteire baingi kwanga Yesu?

¹³ Obu Yesu yaabaire ari omu nsi, abeegi ba Yohaana Omubatizi bakatangaara kureeba abeegi ba Yesu batarikusiiba. Yesu akashoboorora ngu kikaba kitarikubeetengyesa kusiiba  yaaba akihuriire. (Mat. 9:14-17) Kwonka Abafarisaayo n’abandi abaabaire nibahakanisa Yesu bakamucwera orubanja ahabw’okugira ngu akaba atarikukuratira emigyenzo yaabo n’oburomborombo. Bakamugirira ekiniga ku yaakirize abarwaire ahari Sabato. (Mak. 3:1-6; Yoh. 9:16) Beitu bo, bakaba nibeetwara nk’abarikuha Sabato ekitiinisa, kwonka bakaba nibakireeba nk’ekitaine nshonga kuguriza ebintu omuri hekalu. Bakaguubwa kubi munonga Yesu ku yaabazibiire kukikora. (Mat. 21:12, 13, 15) Kandi abu Yesu yaabuuriire omu sinagogi ya Nazareesi arikukoresa ebyafaayo eby’enyima kusheeshuura okweyendeza kwabo n’okutagira kwikiriza bakagira ekiniga kingi. (Luk. 4:16, 25-30) Yesu okukora ebirikutaana n’ebi baabaire nibateekateeka kikareetera baingi kuteerwa entsibo.​—Mat. 11:16-19.

14. Ahabw’enki Yesu yaayangire kwikiriza emigyenzo etarikuhikaana n’Ebyahandiikirwe?

¹⁴ Ebyahandiikirwe nibigamba ki? Yehova kurabira omuri nabi we Isaaya akagira ati: “Abantu aba nibaanyirira haihi, bampa ekitiinisa n’akanwa kaabo n’eminwa yaabo, kwonka emitima yaabo endi hare, kandi okuntiina kwabo n’ekiragiro eki baayegyesiibwe abantu.” (Isa. 29:13) Yesu akaba ahikire kwanga kwikiriza emigyenzo y’abantu eyaabaire etarikuhikaana n’Ebyahandiikirwe. Abaabaire nibeebembeza ebiragiro by’abantu n’emigyenzo yaabo omu mwanya gw’Ebyahandiikirwe bakanga Yehova na Yesu ou yaayohereize kuba Mesia.

15. Ahabw’enki baingi obunaku obu batarikukunda Abajurizi ba Yehova?

¹⁵ Nitureeba oburemeezi nk’obu obunaku obu? Eego. Baingi nibagira ekiniga Abajurizi ba Yehova baayanga kubeegaitaho aha mikoro etarikwegamira aha byahandiikirwe, nk’okukuza ebiro by’okuzaarwa na Noiri. Abandi nibagira ekiniga Abajurizi ba Yehova baayanga kukuza emikoro y’eihanga nari baayanga kwejumba omu migyenzo y’okuziika etarikuhikaana n’Ekigambo kya Ruhanga. Abarikuteerwa entsibo twayanga kwejumba omu mikoro egi, nibabaasa kuba nibateekateeka ngu nibaramya Ruhanga omu muringo oguhikire. Kwonka buzima tibarikubaasa kumushemeza baaba nibakunda munonga emigyenzo y’ensi kukira enyegyesa ezirikureebwa butunu eziri omu Baibuli.​—Mak. 7:7-9.

16. Kurugiirira ahari Zaaburi 119:97, 113, 163-165, twine kukora ki kandi twine kwetantara ki?

¹⁶ Nitubaasa kwetantara tuta kuteerwa entsibo? Twine kukundira kimwe ebiragiro bya Yehova n’emisingye ye. (Shoma Zaaburi 119:97, 113, 163-165.) Twaba nitukundira kimwe Yehova, nitwija kwetantara emigyenzo yoona etarikumushemeza. Titurikwija kwikiriza ekintu kyona kutaahataaha omu rukundo ei twiniire Yehova.

17. Niki ekyareeteire baingi kuteerwa entsibo omu bunaku bwa Yesu?

¹⁷ Omu bunaku bwa Yesu, bamwe bakaba nibenda empinduka omu by’obutegyeki. Bakaba nibateekateeka ngu Mesia naija kubacungura kuruga omu mwaga gw’Abarooma. Kwonka ku baateireho kumuhindura omugabe, akanga. (Yoh. 6:14, 15) Abandi otwariiremu n’abanyamurwa bakaba nibatiina ngu Yesu naija kureetaho empinduka omu by’obutegyeki kigwise kubi Abarooma, abaabaire bahaire abeebembezi b’ediini abo amaani n’obushoboorozi ebiringaniire. Enshonga z’eby’obutegyeki zikareetera Abayudaaya baingi kuteerwa entsibo.

18. Baingi bakeehuzya bunabi ki bw’omu Baibuli oburikukwata ahari Mesia?

¹⁸ Ebyahandiikirwe nibigamba ki? N’obu obunabi bwingi buraabe bwabaire nibworeka ngu Mesia naija kuba omurwani omusinguzi, obunabi obundi bukaba nibworeka ngu aine kubanza  yaafa ahabw’ebibi byaitu. (Isa. 53:9, 12) Mbwenu shi ahabw’enki baabaire baine emiteekateekyere egwire? Omu bwire bwa Yesu, baingi bakaba nibeehuzya obunabi bwona obutarikubahwera kwihaho oburemeezi bwabo ahonaaho.​—Yoh. 6:26, 27.

19. Ni miteekateekyere ki ereeteire baingi kuteerwa entsibo obunaku obu?

¹⁹ Nitureeba oburemeezi nk’obu obunaku obu? Eego. Baingi obunaku obu nibateerwa entsibo twayanga kwejwanzya omu by’obutegyeki. Nibateekateeka ngu twine kuteera oburuuru. Kwonka Yehova naatumanyisa ngu, twatoorana omuntu kututegyeka, niwe wenyini turikuba twayanga. (1 Sam. 8:4-7) Kandi abantu nibabaasa n’okuteekateeka ngu twine kwombeka amashomero n’amarwariro, n’ebindi ebirikuhwera abatuuzi. Nibateerwa entsibo ahabw’okugira ngu nituta omutima aha murimo gw’okubuurira, beitu kutari kuteeraho kwihaho oburemeezi bw’ensi egi ahonaaho.

20. Nk’oku kirikworekwa omu bigambo bya Yesu ebiri omuri Matayo 7:21-23, ekigyendererwa kyaitu ekikuru kiine kuba kiiha?

²⁰ Nitubaasa kwetantara tuta kuteerwa entsibo? (Shoma Matayo 7:21-23.) Ekigyendererwa kyaitu ekikuru kiine kuba okukora omurimo ogu Yesu yaaturagiire kukora. (Mat. 28:19, 20) Titwine kuhugibwa eby’obutegyeki nari enshonga z’abantu omu nsi egi. Nitukunda abantu kandi nitufayo aha buremeezi bwabo, kwonka nitumanya ngu omuringo murungi gw’okuhwera bataahi baitu n’okubeegyesa ebirikukwata aha Bukama bwa Ruhanga, n’okubahwera kugira omukago murungi na Yehova.

21. Tushemereire kugira kumariirira ki?

²¹ Omu kicweka eki, twayetegyereza ebintu bina ebyateerize abantu entsibo bakanga Yesu omu kyasha ky’okubanza, kandi ebirikubaasa kureetera abantu hati kwanga abakuratsi be. Kwonka shi ebi nibyo bintu byonka ebi twine kwetantara? Ngaaha. Omu kicweka ekirikukurataho, nituza kureeba ebintu bina ebindi ebirikubaasa kureetera abantu kuteerwa entsibo. Ka tumariirire kwetantara kuteerwa entsibo, kandi tugume twine okwikiriza kw’amaani!