1-2. Abajurizi ba Yehova baingi baine mbeera ki ezigumire?

ENTUMWA PAULO akahiga Timoseo nangwa otwariiremu n’Abakristaayo boona kuhikiiriza gye obuheereza bwabo. (2 Tim. 4:5) Twena twine kugyendera aha buhabuzi bwa Paulo. Kwonka, obumwe nikiba kitoorobi. Ahakuba ab’eishe-emwe na banyaanyazi-itwe abamwe nikibeetengyesa obumanzi kubaasa kwejumba omu kubuurira. (2 Tim. 4:2) Nk’eky’okureeberaho, teekateeka aha b’eishe-emwe abarikutuura omu mahanga ahu omurimo gwaitu gurikuzibirwa nari ahu gwemereziibwe. Nabwo nibeejumba omu buheereza n’obu baraabe bataine bugabe bw’okukikora!

² Abajurizi ba Yehova nibaraba omu buremeezi butari bumwe na bumwe oburikubaasa kubamaramu amaani. Nk’eky’okureeberaho, baingi baine kukora eshaaha nyingi kutungira ab’amaka gaabo eby’okubabaisaho ebikuru. Nibaba nibenda kukora bingi omu buheereza, kwonka nibaba baruhire munonga aha muheru gwa saabiiti. Abamwe tibarikubaasa kukora bingi ahabw’endwara ezitarikukira, nari ahabw’emyaka ya bukuru, kandi obumwe tibarikuruga omu maka gaabo. Kandi abandi nibateganisibwa okwehurira nk’abataine mugasho. Mary, * munyaanyazi-itwe orikutuura omuri Middle East, naagira ati: “Nikitwara amaani maingi kurwanisa enyehurira zangye ezitahikire reero ntsigara ntaine maani. Kandi bwanyima niinyeshinja ahabw’okugira ngu embeera egi neetwara obwire bw’obuheereza bwangye.”

3. Nituza kureeba nshonga ki omu kicweka eki?

³ Yaaba turi mu mbeera ki, Yehova naabaasa kutuha amaani g’okwemera oburemeezi bwaitu, reero tugumizemu nitumuheereza nk’oku embeera zaitu zirikutubaasisa. Tutakareebire oku Yehova arikubaasa kutuhwera, ka tushwijume oku yaagumize  Paulo na Timoseo kuhikiiriza obuheereza bwabo n’obu baraabe baabaire baine oburemeezi.

4. Paulo akaraba mu mbeera ki ezigumire?

⁴ Paulo akatunga oburemeezi bwingi. Na munonga akaba naayenda kugarurwamu amaani obu baamuteera enkoni, amabaare, kandi bakamuta n’omu kihome. (2 Kor. 11:23-25) Akagamba butunu ngu obumwe akaba naateganisibwa enyehurira zitahikire. (Rom. 7:18, 19, 24) Kandi akagumisiriza endwara eyaabaire eri ‘nk’eihwa omu mubiri,’ ei yaabaire naayendera kimwe ngu Ruhanga amwiheho.​—2 Kor. 12:7, 8.

5. Paulo akabaasa kukora ki n’obu araabe yaabaire aine emirabanamu?

⁵ Yehova akaha Paulo amaani g’okugumizamu omu buheereza bwe n’obu araabe yaabaire aine emirabanamu. Yetegyereze ebi Paulo yaabaasize kukora. Nk’eky’okureeberaho, obu yaabaire akomiirwe omu nju omuri Rooma, akajuririra amazima omu bweziriki omu maisho g’abeebembezi b’Abayudaaya kandi obundi n’obu yaatwarwa omu b’obushoboorozi. (Byak. 28:17; Fil. 4:21,22) Akabuurira n’abaserukare baingi, na boona abaabaire nibaija kumutaayaayira. (Byak. 28:30, 31; Fil. 1:13) Kandi omu bwire obwo, Paulo akahwerwa kuhandiika amabaruha maingi agarikugasira Abakristaayo baingi na hati. Kandi, eky’okureeberaho kya Paulo kikagumya ekibiina kya Rooma, ekyarugiiremu ab’eishe-emwe bagyenzi be kugira “obumanzi bw’okugamba ekigambo kya Ruhanga bataine bwoba.” (Fil. 1:14) N’obu Paulo obumwe yaabaire atarikubaasa kukora bingi, akaba akora eki arikubaasa kuhikaana n’embeera ye, ‘ekyayongyereire aha kubuzya’ amakuru marungi.​—Fil. 1:12.

6. Kurugiirira aha 2 Abakorinso 12:9, 10, niki ekyabaasiise Paulo kuhikiiriza obuheereza bwe?

⁶ Paulo akaba naayetegyereza ngu Yehova niwe arikumuha amaani g’okuhikiiriza obuheereza bwe beitu gatari maani ge. Akeetegyereza ngu amaani ga Ruhanga ‘gakahikiirizibwa omu bweremwa.’ (Shoma 2 Abakorinso 12:9, 10.) Omwoyo gurikwera gukabaasisa Paulo kutunga amaani g’okuhikiiriza gye obuheereza bwe n’obu araabe yaabaire naahiiganisibwa, akomirwe, aine n’obundi buremeezi.

7. Timoseo akaba aine kusingura buremeezi ki kubaasa kuhikiiriza obuheereza bwe?

⁷ Timoseo munywani wa Paulo omuto, nawe akaba aine kwesiga amaani ga Ruhanga kubaasa kuhikiiriza obuheereza bwe. Timoseo  akaba naagyenda na Paulo omu ngyendo ze z’obumiisani. Kandi, Paulo akamwohereza n’omu ngyendo ezindi kuza kutaayaayira ebibiina n’okubigumya. (1 Kor. 4:17) Timoseo naabaasa kuba yaayehuriire nk’otarikubaasa. Obundi niyo nshonga ahabw’enki Paulo yaamwehanangiriize ati: “Hatagira owaagaya obutsigazi bwawe.” (1 Tim. 4:12) Kandi omu bwire obwo, Timoseo nawe akaba aine eihwa omu mubiri nikwo ‘okurwararwara kwawe.’ (1 Tim. 5:23) Kwonka Timoseo akaba naamanya ngu Yehova naija kumuha amaani g’omwoyo gurikwera kugumizamu naabuurira amakuru marungi n’okuheereza ab’eishe-emwe bagyenzi be.​—2 Tim. 1:7.

8. Yehova naaha ata abaheereza be amaani obunaku obu?

⁸ Obunaku obu, Yehova naaha abaheereza be “amaani agarikukirira kimwe,” kugira ngu bagumizemu nibamuheereza omu bwesigwa. (2 Kor. 4:7) Ka tureebe ebintu bina ebi Yehova arikutuha kutuhwera kugira amaani g’okugumizamu nitumuheereza omu bwesigwa: Okushaba, Baibuli, okushashaanuka n’Abakristaayo bagyenzi baitu, n’obuheereza bwaitu.

9. Okushaba nikubaasa kutuhwera kuta?

⁹ Okutunga amaani kurabira omu kushaba. Nk’oku kiri omu Abaefeso 6:18, Paulo naatuhiga kushaba Ruhanga omu bwire bwona. Kandi Ruhanga naatugarukamu arikutuha amaani. Jonnie, orikutuura omuri Bolivia, akatunga amaani nk’ago obu yaahikwaho okugyezibwa kukurataine. Omukazi we n’abazaire be bombi bakarwara munonga omu bwire nibwo bumwe. Jonnie akaba naategana kubareeberera bonshatu. Nyina akafa, kandi kikatwara obwire buraingwa omukazi we na ishe kukira. Jonnie ku arikureeba enyima, naagira ati: “Ku naabaire mba nshobeirwe, okushaba ndikugamba oku ndikwehurira buzima nikyo kyabaire nikimpwera.” Yehova akaha Jonnie amaani g’okugumisiriza. Ronald, omureeberezi omuri Bolivia, akamanya ngu nyina aine ekookoro. Akafa bwanyima y’okwezi kumwe. Niki ekyamuhwereire kugumisiriza? Naagira ati: “Okushaba Yehova nikumbaasisa kwigura omutima gwangye nkamugambira enyehurira zangye zoona. Niimanya ngu naanyetegyereza kukira ondiijo muntu weena, kukira n’oku ndikweyetegyereza.” Obumwe, nitubaasa kushobangirirwa nari tube tutarikumanya eki twine kushaba. Kwonka Yehova naayenda ngu tumushabe n’obu twakuba nitugumirwa kugamba gye ebiteekateeko byaitu n’enyehurira zaitu.​—Rom. 8:26, 27.

10. Nk’oku kirikworekwa omu Abaheburaayo 4:12, ahabw’enki okushoma Baibuli n’okugiteekateekaho kiri kikuru munonga?

¹⁰ Okutunga amaani kurabira omu Baibuli. Nk’oku Paulo yaabaire naayesiga Ebyahandiikirwe kumuha amaani n’obuhuumure, naitwe nitubaasa kubyesiga. (Rom. 15:4) Twaba nitushoma Ekigambo kya Yehova kandi turikukiteekateekaho, naabaasa kukoresa omwoyo gwe gurikwera kutuhwera kwetegyereza gye oku Ebyahandiikirwe birikukwata aha mbeera yaitu. (Shoma Abaheburaayo 4:12.) Ronald, owaaba yaagambirweho, naagira ati: “Ninshemererwa okureeba ngu nkagira omucwe gw’okushoma omu Baibuli buri kiro. Ninkira kuteekateeka munonga aha mitwarize ya Yehova n’oku atwire naafayo aha baheereza be. Eki nikimpwera kugaruka kugira amaani.”

11. Baibuli ekagumya eta munyaanyazi-itwe owaabaire naaganya?

¹¹ Nitubaasa kugira emiteekateekyere mirungi aha mbeera zaitu turikuteekateeka aha Kigambo kya Ruhanga. Yetegyereze oku Baibuli yaagasiire omufaakazi owaabaire naaganya. Omureeberezi akagira ngu akaba naabaasa kwega amashomo kandi agasirwe arikushoma  ekitabo kya Yobu. Ku yaakishomire, ahonaaho akabanza kucwera Yobu orubanja ahabw’emiteekateekyere ye egwire. Omu biteekateeko bye akarabura Yobu ati: “Yobu! Reka kuteekateeka aha bitahikire byonka!” Kwonka bwanyima akeetegyereza ngu emiteekateekyere ye teine ntaaniso n’eya Yobu. Eki kikamuhwera kuhindura emiteekateekyere ye kandi kyamubaasisa kugumira obusaasi bw’okufeerwa iba.

12. Yehova naatugumya ata kurabira omu b’eishe-emwe bagyenzi baitu?

¹² Okutunga amaani kurabira omu kushashaanuka n’ab’eishe-emwe. Omuringo ogundi ogu Yehova arikuhamu Abakristaayo amaani n’okurabira omu b’eishe-emwe. Paulo akahandiika ngu akaba aine ekihika ky’okugumyana n’ab’eishe-emwe na banyaanya. (Rom. 1:11, 12) Mary, owaaba yaagambirweho, naasiima okushashaanuka nk’okwo. Naagira ati: “Yehova akoreise ab’eishe-emwe na banyaanyazi-itwe nangwa abaabaire batarikumanya n’oburemeezi bwangye. Bakaba baangambira ebigambo birikugumya nari baampa kaada, kandi ekyo nikyo naabaire niinyenda. Kandi nikihwera munonga kugambiraho banyaanyazi-itwe abandi abarabireho omu mbeera nk’eyangye reero nkegyera aha by’okureeberaho byabo. Kandi abareeberezi butoosha nibandeetera kwehurira ngu ndi ow’omuhendo omu kibiina kya Yehova.”

13. Nitubaasa kugumyana tuta twaba turi omu nteerane z’ekibiina?

¹³ Enteerane z’ekibiina nizo turikubaasa kutungiramu okugumyana kurungi munonga. Waaza omu nteerane, ahabw’enki otarikuteeraho kugumya abandi orikubagambira ebigambo by’embabazi kandi okabasiima? Nk’eky’okureeberaho, eizooba rimwe oruteerane rutakatandikire omureeberezi orikwetwa Peter akagambira munyaanyazi-itwe ou iba atari mu mazima ati: “Torikubaasa kuteebereza oku kirikutugaruramu amaani kukureeba aha. Butoosha noohwera abaana baawe boona mukaaga kuba baine eby’okugarukamu.” Amarira garikumutaratamba omu maisho ahabw’okushemererwa akagira ati: “Buzima ebigambo ebyo nibyo naaba niinyenda kuhurira izooba eri.”

14. Okwejumba omu buheereza nikitukwataho kita?

¹⁴ Okutunga amaani kurabira omu buheereza bwaitu. Twagambira abandi amazima ga Baibuli, nituhurira twaruhuuka kandi twagira amaani, yaaba basiima nari banga. (Enf. 11:25) Munyaanyazi-itwe orikwetwa Stacy akakyereebera butunu oku obuheereza burikuha amaani. Omwe omu ka ku yaabingirwe, akarimbagirirwa reero yaaguma naayebuuza ati: ‘Haine eki naakubaasize kukora kumuhwera?’ Stacy kikaba nikimugumira kutateekateeka aha nshonga egi. Niki ekyamuhwereire kuraba omu mbeera egumire egi? N’obuheereza! Ku yaagumire naayejumba omu kubuurira, yaatandika kuta omutima aha bantu abu yaabaire naabuurira abaabaire nibenda obuhwezi bwe. Naagira ati: “Omu bwire obwo, Yehova akampwera kutunga omwegi wa Baibuli owaarahukire kutunguuka. Ekyo kikangumya munonga. Ekintu ekyampwereire kugaruka omu nteeko n’okwejumba omu buheereza.”

15. Nooyegyera ki aha bigambo bya Mary?

¹⁵ Bamwe ahabw’embeera zaabo nibabaasa kuteekateeka ngu tibarikukora kihango omu buheereza. Ku oraabe nikwo orikwehurira otyo, ijuka ngu Yehova naakusiima ku oraabe nookora eki orikubaasa. Garuka oteekateekye aha ky’okureeberaho kya Mary. Ku yaagiire omu kicweka ky’orurimi orundi, akeereeba nk’otarikukora ekirikumara. Naagira ati: “Kumara obwire, eki naabaire nimbaasa kukora n’okugarukamu ekyorobi, nari okushoma ekyahandiikirwe omu Baibuli, nari kuha omuntu turakiti omu kubuurira.” Eki kikamureetera  kwehurira nk’otaine mugasho gw’amaani okutashushana n’abaabaire nibagamba gye orurimi. Kwonka, akahindura emiteekateekyere ye. Akatandika kwetegyereza ngu Yehova naabaasa kumukoresa n’obu araabe yaabaire atarikubaasa kukora bingi. Naagira ati: “Amazima agarikujuna abantu goorobi munonga, kandi amazima ago nigo garikuhindura embeera z’abantu.”

16. Niki ekirikubaasa kugumya abo abatarikubaasa kuruga omu maka gaabo?

¹⁶ Yehova naareeba kandi naasiima ekyetengo kyaitu eky’okwejumba omu buheereza, n’obu twakuba tutarikubaasa kuruga omu maju gaitu. Naabaasa kutuhwera kubuurira abarikutureeberera nari abashaho baitu. Twagyeragyeranisa embeera zaitu eza hati n’ez’enyima, nitubaasa kutamwa. Kwonka twamanya oku Yehova arikutuhwera hati, nitwija kutunga amaani g’okugumisiriza okugyezibwa kwona twine okushemererwa.

17. Kurugiirira aha Omubuurizi 11:6, ahabw’enki twine kuguma nitwejumba omu buheereza n’obu twakuba tutarikutunga ebirungi ahonaaho?

¹⁷ Titurikubaasa kumanya yaaba embibo y’amazima ei turikubyara eraatsimbe emizi ekatandika kukura. (Shoma Omubuurizi 11:6.) Nk’eky’okureeberaho, Barbara munyaanyazi-itwe oine emyaka erengire omuri 80, naakira kubuurira arikukoresa esimu n’okuhandiika amabaruha. Emwe aha baruha ye, akatamu Omunaara gw’Omurinzi ogwa Maaci 1, 2014, ogwabaire gurimu ekicweka ekiine omutwe, “Eki Ruhanga Akukoreire.” Akaba atarikumanya ngu ebaruha etungirwe omushaija n’omukazi we abaabaire batakiri Bajurizi ba Yehova. Bakaguma nibashoma magaziini egi emirundi n’emirundi. Omushaija naagira ngu okaba nooshusha ngu Yehova ariyo naagamba nawe butunu. Bombi bakatandika kwija omu nteerane kandi bakagaruka baatandika kuheereza Yehova bwanyima y’okumara emyaka erengire 27 batarikuheereza. Teera akashushani oku eki kyagumize Barbara kandi kikamuhiga ahabw’okureeba ebirungi ebyarugire omu baruha ye!

18. Nitubaasa kukora ki kugasirwa omu maani ga Ruhanga?

¹⁸ Yehova naatuteeraho emihanda mingi ey’okutungiramu amaani ge omu bwijwire. Twagikoresa nk’okushaba, Baibuli, okushashaanuka n’Abakristaayo bagyenzi baitu n’obuheereza, nituhamya ngu Yehova aine amaani n’ekyetengo ky’okutuhwera. Butoosha ka twesigye Tataitwe ow’omu iguru, orikukunda ‘kworeka ku ari ow’amaani kuhwera abaine emitima’ emuhamiireho.​—2 Bus. 16:9.