1-2. Shoboorora oku emisingye ya Baibuli erikubaasa kwongyera kugira amakuru maingi embeera zaitu zaahinduka.

 ABAGORE aha kugaitwa kwabo nibahurikiza gye orubazo rw’obushwere orurikwegamira ahari Baibuli. Emisingye erikugambwa omu rubazo orwo, neeba etari misya aharibo. Kwonka kuruga aha izooba eryo, neeba neija kubagirira amakuru maingi. Ahabw’enki? Ahakuba nibaija kuba nibagigyenderaho omu bushwere bwabo.

² Nikyo kimwe n’omukazi na iba Abakristaayo baaheza kuzaara omwana. Nibabaasa kuba bamazire emyaka mingi barikugaaniira aha nshonga y’okworora abaana. Kwonka hati emisingye ya Baibuli egyo neija kuba mikuru aharibo. Hati nibaija kugira omwana owaabo ow’okureeberera. Obu ka n’obujunaanizibwa bw’amaani! Buzima, embeera nsya nizibaasa kuhindura emiteekateekyere yaitu aha misingye ya Baibuli erikumanywa gye. Egi n’enshonga emwe ahabw’enki abaheereza ba Yehova nibashoma Ebyahandiikirwe, nk’oku abagabe ba Israeli baagambiirwe kubiteekateekaho “ebiro byona” eby’amagara gaabo.​—Bir. 17:19.

3. Nituza kushwijuma ki omu kicweka eki?

³ Abazaire, mwine obujunaanizibwa bw’amaani obw’Ekikristaayo, obw’okwegyesa abaana baanyu ebirikukwata ahari Yehova. Kwonka mwine kukora ekirikukira aha kubeegyesa ebirikukwata ahari Ruhanga. Mwine kubahwera kumukundira kimwe. Nimubaasa kukora ki kureetera abaana baanyu kukunda Yehova? Omu kicweka eki, nituza kushwijuma emisingye  ena erikubaasa kuhwera imwe abazaire. (2 Tim. 3:16) Nituza n’okureeba oku abazaire Abakristaayo abamwe bagasiirwe ahabw’okugyendera aha buhabuzi bwa Baibuli.

4. Ni musingye ki gumwe ogurikubaasa kuhwera abazaire kwegyesa abaana baabo kukunda Yehova? (Yakobo 1:5)

⁴ Omusingye 1: Sherura obuhabuzi bwa Yehova. Shaba Yehova kukuha obwengye bw’okuhwera abaana baawe kumukunda. (Shoma Yakobo 1:5.) Niwe arikukirayo kuba ohikire omu kuha obuhabuzi. Hariho enshonga nyingi ahabw’enki niwe ahikire. Yetegyereze ibiri aharizo. Ey’okubanza, Yehova niwe arikukirayo kumanya eki kirikumanyisa okuba omuzaire. (Zab. 36:9) Eya kabiri, obuhabuzi bw’obwengye obu arikuha butoosha niburugamu ebirungi.​—Isa. 48:17.

5. (a) Ekibiina kya Yehova nikiha abazaire buhwezi ki? (b) Nk’oku vidiyo erikworeka, nooyegyera ki aha ku Ow’eishe-emwe na Munyaanyazi-itwe Amorim baayoroire abaana baabo?

⁵ Yehova kurabira omu Kigambo kye n’ekibiina kye, naataho eby’okurya bingi eby’omwoyo ebirikwegamira ahari Baibuli ebirikubaasa kukuhwera kworora abaana baawe kumukunda. (Mat. 24:45) Nk’eky’okureeberaho, noobaasa kutunga obuhabuzi bwingi omu bicweka “Obuhwezi bw’Eka,” ebyabaire nibiizira omuri Awake! kumara emyaka, kandi hati biri aha mukura gwaitu. Kandi na vidiyo nyingi eziri aha jw.org zirimu okubuuzibwa n’eby’okureeberaho ebirikubaasa kuhwera abazaire kugyendera aha buhabuzi bwa Yehova baaba niboorora abaana baabo. *​—Enf. 2:4-6.

6. Ishe abaana omwe naatwara ata obuhabuzi obu we n’omukazi we barikutunga omu kibiina kya Yehova?

⁶ Abazaire baingi nibasiima munonga obuhwezi obu Yehova arikubaha kurabira omu kibiina kye. Ishe abaana orikwetwa Joe naagira ati: “Okukuriza abaana bashatu omu mazima ti murimo gworobi. Nyowe n’omukazi wangye butoosha nitushaba Yehova kutuhwera. Kandi nitukira kutunga ekicweka nari vidiyo omu bwire buhikire kutuhwera kuraba omu mbeera ei turikuba turimu. Tutwire nitushaba Yehova obuhabuzi.” Joe n’omukazi we  beetegyereize ngu ebicweka ebi na vidiyo nibihwera abaana baabo kwirira haihi Yehova.

7. Ahabw’enki ni kikuru abazaire kufayo munonga aha ky’okureeberaho eki barikutaho? (Abarooma 2:21)

⁷ Omusingye 2: Ba eky’okureeberaho kirungi. Abaana nibaba nibareeba ebi abazaire baabo barikukora, kandi nibakira kubatooreza. Buzima, tihariho muzaire ohikiriire. (Rom. 3:23) N’obu kiraabe kiri kityo, abazaire abanyabwengye nibakora kyona ekirikubaasika kuteeraho abaana baabo eky’okureeberaho kirungi. (Shoma Abarooma 2:21.) Omuzaire omwe arikugamba aha baana, akagira ati: “Bari nk’omufaratsi gurikunyuunyuta buri kimwe.” Naayongyeraho ati: “Nibaija kutugambira twakora ekintu ekirikutaana n’ebi turikubeegyesa kukora.” N’ahabw’ekyo, twaba nitwenda ngu abaana baitu bakunde Yehova, rukundo ei tumwiniire eshemereire kuba ehami, kandi erikureebwa butunu.

8-9. Waayega ki aha bi Andrew na Emma baagambire?

⁸ Hariho emiringo mingi ei abazaire barikwegyesamu abaana baabo kukunda Yehova. Yetegyereze eki Andrew ow’eishe-emwe w’emyaka 17 arikugamba: “Abazaire bangye batwire nibanyegyesa obukuru bw’okushaba. Buri kiro, taata akaba ashaba naanye, n’obu naabaire mba naaherize kweshabira. Abazaire baitu bakaba nibatwijutsya ngu ‘noobaasa kugamba na Yehova emirundi yoona ei orikwenda.’ Okuhamiiriza obukuru bw’okushaba kikankwataho munonga, kandi hati nikinyorobera kushaba Yehova n’okumureeba nka Tata owa rukundo.” Abazaire, timushemeire kugaya oku rukundo ei mwiniire Yehova erikubaasa kukwata aha baana baanyu.

⁹ Teekateeka ahari Emma. Ishe ku yaatsigireho eka yaabo, akatsiga nyinabo aine amabanja maingi. Emma naagira ati: “Hariho emirundi mingi obu maama yaabaire naaba ataine sente zirikumara, kwonka butoosha akaba agamba aha ku Yehova arikureeberera gye abaheereza be. Nkaba nindeebera aha ntwaza ye ngu buzima ekyo naakiikiriza. Maama akaba naagyendera aha bi arikwegyesa.” Eki nikitwegyesa ki? Abazaire nibabaasa kutaho eky’okureeberaho kirungi nangwa n’omu mbeera zigumire.​—Gal. 6:9.

10. Abazaire Abaisraeli bakaba nibabaasa kugaaniira ryari n’abaana baabo? (Eky’Ebiragiro 6:6, 7)

¹⁰ Omusingye 3: Gaaniira n’abaana baawe butoosha. Yehova akaragiira Abaisraeli aba ira butoosha kuguma nibeegyesa abaana baabo ebirikumukwataho. (Shoma Eky’Ebiragiro 6:6, 7.) Abazaire abo bakaba baine emigisha mingi y’okugaaniira n’abaana baabo omu izooba ryona n’okubahwera kukunda Yehova omu mitima yaabo. Nk’eky’okureeberaho, omutsigazi Omwisraeli akaba naabaasa kumara eshaaha nyingi arikuhwera ishe, omu kubyara ebimera nari omu kushaaruura. Kandi omwishiki akaba naabaasa kumara obwire bwingi arikuhwera nyina omu kubaziira emyenda, okuruka, n’endiijo mirimo y’aha ka. Abazaire omu kukora hamwe n’abaana baabo, bakaba nibabaasa kugaaniira hamwe aha nshonga nkuru. Nk’eky’okureeberaho, bakaba nibabaasa kugaaniira aha mutwarize gwa Yehova ogw’oburungi, kandi beetegyereze n’oku yaabaire naahwera eka yaabo.

11. Abazaire Abakristaayo baine mugisha ki ogw’okugaaniira n’abaana baabo?

¹¹ Kuruga obwo ebintu bihindukire. Omu mahanga maingi, abazaire tibarikubaasa kumara obwire bwingi n’abaana baabo omu izooba. Abazaire nibabaasa kuba bari aha mirimo, kandi abaana bari aha ishomero. N’ahabw’ekyo, abazaire baine kusherura obwire gw’okugaaniira n’abaana baabo. (Efe. 5:15, 16; Fil. 1:10) Okuramya kw’eka nikubaasa kuhwera  omu nshonga egi. Alexander ow’eishe-emwe omutsigazi naagira ati: “Tata butoosha naakora entebeekanisa z’okuramya kw’eka, kandi tarikwikiriza ekintu kyona kutaahataaha omu bwire obu obw’okuba hamwe. Bwanyima y’okwega, nitutandika kugaaniira hamwe.”

12. Omutwe gw’eka aine kuhikiiriza ki omu bwire bw’okuramya kw’eka?

¹² Ku oraabe ori omutwe gw’eka, noobaasa kukora ki kureetera okuramya kw’eka kuba okurikushemeza? Noobaasa kwega n’abaana baawe ekitabo kyaitu ekisya nyamurungi Yesiimire Amagara Ebiro Byona! Okwega oku n’obwire burungi bw’okugaaniira gye. Nooba nooyenda ngu abaana baawe bakugambire enyehurira zaabo n’ebirikubeerarikiriza, n’ahabw’ekyo otakoresa obwire bw’okuramya kw’eka kubacwera orubanja nari kubahera. Kandi otateeraho kutabuka abaana baagamba eki barikuteekateeka n’obu kyakuba kitarikuhikaana n’emisingye y’Ebyahandiikirwe. Kureka, yesiime kureeba ngu baaba ab’amazima aha ku barikwehurira, kandi bahigye kugumizamu nibakugambira batarikutiina. Noobaasa kuhwera gye abaana baawe waaba noomanya oku buzima barikwehurira.

13. Abazaire baine migisha ki endiijo ey’okuhwera abaana baabo kwirira haihi Yehova?

¹³ Abazaire, omu izooba ryona musherure oburyo bw’okuhwera abaana baanyu kwirira haihi na Yehova. Timwine kutegyereza obwire obu mutaireho kwegyesezamu abaana baanyu Baibuli, kubaasa kubeegyesa ebirikukwata ahari Ruhanga waitu owa rukundo. Yetegyereze eki Lisa nyina abaana arikugamba: “Tukahwera abaana baitu kwega ebirikukwata ahari Yehova turikukoresa ebyahangirwe. Nk’eky’okureeberaho, embwa zaitu ku zaabaire zikora ekintu ekirikushetsya, tukaba tubagira ngu eki nikyoreka oku Omuhangi waitu arikushemererwa, kandi ngu naakunda ebihangirwe nk’oku naitwe turikubikunda.”

14. Ahabw’enki ni kikuru abazaire kuhwera abaana baabo kutoorana gye abanywani? (Enfumu 13:20)

¹⁴ Omusingye 4: Hwera abaana baawe kugira abanywani barungi. Ekigambo keya Ruhanga nikyoreka gye ngu banywani baitu nibabaasa  kutureetera kutwaza gye nari kubi. (Shoma Enfumu 13:20.) Abazaire, nimumanya gye banywani b’abaana baanyu? Murabareebireho kandi mukamara nabo obwire? Noobaasa kukora ki kuhwera abaana kunywana abarikukunda Yehova? (1 Kor. 15:33) Noobaasa kubahwera kutoorana gye abanywani orikweta abarikukora gye omu by’omwoyo kubeegaitaho mwaba mwine ebi murikukora hamwe nk’eka.​—Zab. 119:63.

15. Abazaire nibabaasa kukora ki kuhwera abaana baabo kugira abanywani barungi?

¹⁵ Teekateeka ahari ishe abaana orikwetwa Tony. Naashoboorora eki we n’omukazi we barikukora kuhwera abaana baabo kugira abanywani barungi: “Kumara emyaka, nyowe n’omukazi wangye tutwire nitutaayaayisa ab’eishe-emwe na banyaanyazi-itwe abatarikushushanisa obukomooko n’emyaka. Niturya nabo kandi batwegaitaho omu kuramya kw’eka. Ogu n’omuringo murungi gw’okumanya abarikukunda Yehova, kandi abarikumuheereza bashemereirwe. Tubaasize kweta omu ka yaitu abareeberezi ba saketi, abamiisani, n’abandi. Ebi barabiremu, omujinya gwabo, n’omutima gwabo gw’okwefeerereza bigasiire munonga abaana baitu, kandi byabahwera kwirira haihi Yehova.” Abazaire, mumariirire kuhwera abaana baanyu kugira abanywani barungi.

16. Oshemereire kukora ki omwana waawe yaagira ngu tarikwenda kuheereza Yehova?

¹⁶ Kwonka shi bwanyima y’okuteeraho munonga oti, omwe aha baana baawe ku yaagira ngu tarikwenda kuheereza Yehova? Otateekateeka ngu tori muzaire murungi. Yehova atuhaire ekiconco ky’okwecweramu twena otwariiremu n’omwana waawe. Nibabaasa kucwamu kumuheereza nari kutamuheereza. Omwana waawe yaacwamu kuruga ahari Yehova, otahwa matsiko ngu tarikubaasa kugaruka. Ijuka eky’okureeberaho ky’omwana ekirare. (Luk. 15:11-19, 22-24) Omutsigazi ogwo akahaba yaaruga omu muhanda gw’okuhikiirira, kwonka bwanyima akagaruka. Abamwe nibabaasa kugira ngu “ekyo kikaba kiri ekitebyo, kwonka shi nikibaasa kubaho omu mbeera eza butoosha?” Buzima  nikibaasika! Nangwa, eki nikyo kyenyini ekyahikire aha mutsigazi orikwetwa Elie.

17. Ebyahikire ahari Elie nibikugumya bita?

¹⁷ Elie naagamba aha bazaire be ati: “Bakateeraho kumpwera kukunda Yehova, n’Ekigambo kye Baibuli. Kwonka omu bushogoyo bwangye, nkahinduka omugomi.” Elie akatandika kuba ekirumira habiri, kandi akanga kuhurikiza abazaire be omu kuteeraho kwabo kwona kumuhwera omu by’omwoyo. Bwanyima y’okuruga omuka, akeejumba omu bihagaro. Kwonka nabwo, obumwe akaba agaaniira n’omwe ahari banywani be ebirikukwata ahari Baibuli. Elie naagira ati: “Oku naabaire nyongyera kugambira munywani wangye ahari Yehova, nikwo naabaire nyongyera kuteekateeka ahari Yehova. Mporampora, embibo z’amazima ga Baibuli zikongyera kukanya omu mutima gwangye, ezi abazaire bangye bateireho munonga kubyaramu, zikatandika kumera.” Bwanyima y’obwire, Elie akagaruka omu mazima. * Teebereza oku abazaire be baashemereirwe ahabw’okumanya ngu bakateeraho kumwegyesa kukunda Yehova kuruga omu buto!​—2 Tim. 3:14, 15.

18. Nootwara ota abazaire abarikukora munonga kwegyesa abaana baabo kukunda Yehova?

¹⁸ Abazaire, muhairwe obujunaanizibwa bw’omuhendo, obw’okworora omugigi musya gw’abarikwija kuramya Yehova. (Zab. 78:4-6) Ogu ti murimo gworobi, kandi nitubasiima twihire aha mutima ahabw’okukora obucweka eihembe kuhwera abaana baanyu! Mwakora kyona ekirikubaasika kuhwera abaana baanyu kukunda Tataitwe ow’omu iguru Yehova, kandi mukaboororera omu kuhana kwe, nimubaasa kugira obwesigye ngu nimwija kumushemeza.​—Efe. 6:4.