1. Ni nshonga ki enkuru ei abantu boona baine kucwamu?

 ABANTU baine enshonga nkuru y’okucwamu hati. Mbwenu shi nibaija kushagika Yehova Ruhanga nk’ohikire kuba omutegyeki wa byona, nari nibaija kushagika omuzigu we Sitaane Omuregi? Tihaine orikubaasa kuguma ataine rubaju. Ebi baraacwemu aha nshonga egi, nibikwata ahari nyentsya yaabo ey’obutwire. (Mat. 25:31-33, 46) “Omu kubonabona kwingi,” nibaija kuteebwaho akamanyiso k’okuhonokaho nari ak’okucwekyerezibwa.​—Kush. 7:14; 14:9-11; Ezk. 9:4, 6.

2. (a) Abaheburaayo 10:35-39 nihatuhiga kukora ki? (b) Ekitabo ky’Okushuuruurwa nikibaasa kutuhwera kita?

² Shoma Abaheburaayo 10:35-39. Ku oraabe ocwiremu kushagika obutegyeki bwa Yehova, ocwiremu gye. Hati oine ekihika ky’okuhwera abandi nabo kucwamu gye. Ku kiraabe nikwo kiri, noobaasa kukoresa ebiri omu kitabo ky’Okushuuruurwa kubahwera. Ekitabo ky’omutaano eki nikyoreka ekirikuza kuhika aha barikuhakanisa Yehova, n’emigisha eraatungwe abarikushagika obutegyeki bwe, kandi bakabuhamiraho. Twine kwega amazima makuru aga. Twakora tutyo, nikiija kutuhwera kumariirira kugumizamu nituheereza Yehova. Kandi, nitubaasa kukoresa ebi twegire kuhwera abandi kucwamu gye, n’okuhamira aha kucwamu kwabo.

3. Nituza kushwijuma ki omu kicweka eki?

³ Omu kicweka eki, nituza kugarukamu ebibuuzo bibiri ebi: Abarikushagika obutegyeki bwa Ruhanga nibaija kutunga ki? Kandi, niki ekiraahikye ahari abo abarikucwamu kushagika enyamaishwa erikutukura, erikugambwaho omu kitabo ky’Okushuuruurwa?

4. Yohaana akareeba baahi omu iguru abaabaire bari na Yesu?

⁴ Omu kworekwa, entumwa Yohaana akareeba guruupu ibiri z’abantu abarikushagika obutegyeki bwa Yehova, barikuheebwa ekiconco ky’amagara agatahwaho. Guruupu y’okubanza erimu abantu 144,000. (Kush. 7:4) Nibaihwa omu nsi kushanga Yesu omu iguru kukora gavumenti, nari Obukama. Bari hamwe nawe, nibaija kutegyeka ensi. (Kush. 5:9, 10; 14:3, 4) Yohaana omu kworekwa, akabareeba beemereire na Yesu aha Rushozi Saayuuni orw’omu iguru.​—Kush. 14:1.

5. Niki ekiri haihi kuhika aha bakitsigaireho omu nsi aha 144,000?

⁵ Kumara ebyasha bingi, enkumi n’enkumi z’abantu batwire nibatooranwa kuba bamwe aha 144,000. (Luk. 12:32; Rom. 8:17) Kwonka, Yohaana akagambirwa ngu bakye aha mubaro ogwo nibo baabaire nibaija kuba bakitsigaireho omu nsi omu biro by’emperu. Okubonabona kwingi kutakatandikire, abaraabe ‘bakitsigaireho’ nibaija kuteebwaho “akamanyiso” k’aha muheru akarikworeka ngu nibasiimwa Yehova. (Kush. 7:2, 3; 12:17) Omu bwire bukye okubonabona kwingi kuherize kutandika, abaraabe bakitsigaireho omu nsi nibaija kutwarwa omu iguru kwegaita aha bandi abariyo, reero babone kuhitsya omuhendo ogwijwire 144,000. Bari omu iguru nibaija kutegyeka na Yesu omu Bukama bwa Ruhanga.​—Mat. 24:31; Kush. 5:9, 10.

6-7. (a) Yohaana akareeba guruupu ki endiijo ey’abantu, kandi nitugimanyaho ki? (b) Ahabw’enki entoore abakitsigaire omu nsi ‘n’omutwe muhango gw’abantu’ baine kufayo kumanya ebiri omu Okushuuruurwa eshuura 7?

⁶ Yohaana ku yaaherize kureeba guruupu y’omu iguru, bwanyima akareeba “omutwe muhango gw’abantu.” Okutashushana na 144,000, aba bo tibarikubaasa kubarwa. (Kush. 7:9, 10) Aba nitubamanyaho ki? Yohaana akagambirwa ati: “Aba nibo baarugire omu kubonabona kwingi, bakoozya ebijwaro byabo omu shagama y’Omwana gw’entaama, bikeera.” (Kush. 7:14) Abantu nyamwingi aba ku baraahonokeho omu kubonabona kwingi, nibaija kutuura aha omu nsi batungiremu emigisha y’omutaano.​—Zab. 37:9-11, 27-29; Enf. 2:21, 22; Kush. 7:16, 17.

⁷ Yaaba tutoorainwe kuza omu iguru nari kutuura omu nsi, nitwereeba nka bamwe aha barikugambwaho omu Okushuuruurwa 7? Nikwo twine kwereeba. Abantu ba guruupu ezi zombi abarikuheereza Ruhanga, ka nibaija kushemererwa omu bwire obwo! Nitwija kushemererwa munonga ahabw’okucwamu kushagika obutegyeki bwa Yehova. Ekitabo ky’Okushuuruurwa nikitugambira ki ekindi aha kubonabona kwingi?​—Mat. 24:21.

8. Okubonabona kwingi nikwija kutandika kuta, kandi abantu baingi nibaija kutwaza bata?

⁸ Nk’oku kiri omu kicweka eky’enyima, ab’eby’obutegyeki omu nsi egi juba nibiija kwehindukana Babulooni Orukuru, nari amatware g’ediini z’ebishuba zoona. (Kush. 17:16, 17) Egi niyo eraabe entandikiro y’okubonabona kwingi. Mbwenu shi eki nikiija kureetera abantu baingi kucwamu kuramya Yehova? Ngaaha. Kureka, Okushuuruurwa eshuura 6 neeyoreka ngu omu bwire bw’akahuurukano obwo, abantu abatarikuheereza Yehova nibaija kusherura obuhungiro omu by’obutegyeki n’eby’obushuubuzi eby’ensi egi, ebirikugyeragyeranisibwa n’enshozi. Ahabw’okugira ngu abantu abo tibarikwija kushagika Obukama bwa Ruhanga, naija kubareeba nk’abarikumuhakanisa.​—Luk. 11:23; Kush. 6:15-17.

9. Abantu ba Yehova nibaija kuba bata ab’omutaano omu bwire bw’okubonabona kwingi, kandi nihaija kurugamu ki?

 ⁹ Buzima, abaheereza ba Yehova abeesigwa nibaija kuba ab’omutaano omu bwire bugumire obwo obw’okubonabona kwingi. Nibo bonka omu nsi abaraabe nibakiheereza Yehova Ruhanga, kandi nibaija kwanga kushagika ‘enyamaishwa.’ (Kush. 13:14-17) Eki nikiija kugwisa kubi abarikuhakanisa Yehova. N’ekiraarugyemu, amahanga nigaija kwegaita hamwe kutaahirira abantu ba Ruhanga omu nsi yoona. Okutaahirira oku okw’ekigwiraro nikugambwaho omu bunabi nk’okutaahirira kwa Googi owa Magoogi.​—Ezk. 38:14-16.

10. Nk’oku kiri omu Okushuuruurwa 19:19-21, Yehova naija kukora ki, abantu be ku baraataahirirwe?

¹⁰ Yehova naija kutwaza ata, abantu be ku baraataahirirwe? Naatugambira ati: ‘Ekiniga kyangye nikiija kwimuka.’ (Ezk. 38:18, 21-23) Okushuuruurwa eshuura 19 neeshoboorora ekirikwija kukurataho. Yehova naija kwohereza Omwana we kurinda abantu be n’okusingura abazigu be. Yesu naija kwegaitwaho “amahe ag’omu iguru,” agarikutwariramu baamaraika na 144,000 kurwanirira abaheereza ba Ruhanga. (Kush. 17:14; 19:11-15) Orutaro oru nirwija kuhendera ruta? Abantu n’ebigombe byona ebirikuhakanisa Yehova, nibiija kucwekyererezibwa kimwe!​—Shoma Okushuuruurwa 19:19-21.

11. Ni mukoro ki ogw’omutaano ogurikwija kubaho ogurikugambwaho omu kitabo ky’Okushuuruurwa?

¹¹ Teebereza oku abantu abeesigwa baraayehurire omu nsi, bwanyima y’okuhonokaho aha kucwekyerezibwa kw’abazigu ba Ruhanga! Obu ka nibwija kuba obwire bw’okwesiima! N’obu haraabe nihaija kubaho akaari k’okushemererwa omu iguru bwanyima ya Babulooni Orukuru kucwekyerezibwa, hariho ekindi ekirikwija kureeta okushemererwa kwingi. (Kush. 19:1-3) Buzima, “obugyenyi bw’Omwana gw’entaama,” nigwo mukoro mukuru ogurikugambwaho omu kitabo ky’Okushuuruurwa.​—Kush. 19:6-9.

12. Nk’oku kiri omu Okushuuruurwa 21:1, 2, obugyenyi bw’Omwana gw’entaama nibwija kubaho ryari?

¹² Obugyenyi obu nibwija kubaho ryari? Boona 144,000 nibaija kuba bari omu iguru orutaro rwa Haramagedoni rutakatandikire kurwanwa. Kwonka, obwire bw’obugyenyi bw’Omwana gw’entaama nibwija kuba butakahikire. (Shoma Okushuuruurwa 21:1, 2.) Obugyenyi bw’Omwana gw’entaama nibwija kubaho bwanyima y’orutaro rwa Haramagedoni kuhwa, n’abazigu ba Ruhanga boona baaheza kwihwaho.​—Zab. 45:3, 4, 13-17.

13. Obugyenyi bw’Omwana gw’entaama nibukwata buta ahari boona abarikutwarirwamu?

¹³ Obugyenyi bw’Omwana gw’entaama nibukwata buta ahari boona abarikutwarirwamu? Nk’oku omushaija n’omukazi barikugaitwa hamwe omu bushwere, obugyenyi bw’akamanyiso obu n’obw’okugaita Omugabe Yesu Kristo ‘n’omugore we,’ nibo 144,000. Omukoro mukuru ogu nigwija kureetaho gavumenti nsya, erikwija kutegyeka ensi kumara emyaka 1,000.​—Kush. 20:6.

14-15. Abantu emitwaro 144,000 omu Okushuuruurwa eshuura 21 nibagyeragyeranisibwa naki? (Reeba ekishushani ekiri aha kipampagare.)

¹⁴ Kandi, Okushuuruurwa eshuura 21 neegyeragyeranisa 144,000 n’orurembo rurungi munonga, “Yerusaalemu Orusya.” (Kush. 21:2, 9) Orurembo oru rwombekire aha misingi y’amabaare 12, kandi hariho “amaziina g’entumwa ikumi na ibiri ez’Omwana gw’entaama.” Ahabw’enki eki kyashemeize Yohaana? N’ahabw’okugira ngu akareeba eiziina rye  rihandiikire ahari rimwe aha mabaare g’emisingi ago. Ka yaatungire omugisha gw’amaani!​—Kush. 21:10-14; Efe. 2:20.

¹⁵ Tihariho rurembo rundi orurikushusha n’orurembo rw’akamanyiso oru. Oruguuto rukuru rw’orurembo orwo rukaba rukozirwe omu zaabu, rwine amarembo 12 g’eruuru, ebisiika byarwo n’emisingi byombekiise amabaare g’obuguzi bwingi, kandi rupimirwe gye. (Kush. 21:15-21) Kwonka, Yohaana akeetegyereza ngu haine ekirikuburamu! Akagira ati: ‘Tindareebiramu hekalu, ahakuba [Yehova] Ruhanga ow’Obushoboorozi Bwona n’Omwana gw’entaama nibo hekalu yaarwo. Orurembo orwo tirurikwetenga izooba nari okwezi kurwakira, ahakuba ekitiinisa kya Ruhanga nigwo mushana gwarwo, kandi Omwana gw’entaama niwe tabaaza yaarwo.’ (Kush. 21:22, 23) Abo abarikwetwa Yerusaalemu Orusya nibaija kuba bari na Yehova butunu. (Heb. 7:27; Kush. 22:3, 4) N’ahabw’ekyo, Yehova na Yesu nibo hekalu omu rurembo orwo.

16. Niki ekirikwija kuhika aha bantu omu Myaka Rukumi ey’Obutegyeki bw’Obukama bwa Ruhanga?

¹⁶ Entoore nibashemererwa ku barikuteekateeka aha rurembo oru. Kwonka n’abaine amatsiko g’okutuura omu nsi bahikire kurugirira ekihika. Omu Myaka Rukumi Obukama bwa Ruhanga burikutegyeka, Yerusaalemu Orusya nirwija kubareetera emigisha etarikubarwa. Yohaana akareeba emigisha egi erikusheneneka ‘nk’omugyera gw’amaizi g’amagara.’ Kandi aha mbaju zombi ez’omugyera hariho ‘emiti y’amagara’ erikwana amababi “ag’okutambira amahanga.” (Kush. 22:1, 2) Abantu boona abaraabe bariho obunaku obwo, nibaija kugasirwa omu bintu birungi ebyo. Mporampora, abantu boona abarikworobera Yehova nibaija kuba abahikiriire. Nihaija kuba hatakiriho ndwara, obusaasi, nari okurira ahabw’enaku.​—Kush. 21:3-5.

17. Nk’oku Okushuuruurwa 20:11-13 harikworeka, ni baahi abarikwija kugasirwa omu Butegyeki obw’Emyaka Rukumi?

¹⁷ Ni baahi abarikwija kugasirwa omu bintu birungi ebi? Ab’okubanza, n’abantu nyamwingi abaraahonokeho ahari Haramagedoni, otwariiremu n’abaana boona obundi abaraabe bazaariirwe omu nsi ensya. Kwonka Okushuuruurwa eshuura 20 neeraganisa ngu abafu nibaija kuzooka. (Shoma Okushuuruurwa 20:11-13.) ‘Abahikiriire’ abaafiire ira “n’abatahikiriire,” abataratungire omugisha gurikumara ogw’okwega ebirikukwata ahari  Yehova, boona nibaija kuzooka kutuura aha omu nsi. (Byak. 24:15; Yoh. 5:28, 29) Mbwenu shi eki nikimanyisa ngu buri omwe owaafiire naija kuzooka atungye amagara omu nsi omu Butegyeki bw’Emyaka Rukumi? Ngaaha. Ababi abaayangire nkana omugisha gw’okuheereza Yehova batakafiire, tibarikwija kuzoorwa kutunga amagara. Bakatunga omugisha gwabo kwonka baayanga kugukoresa gye kugira ngu baije batungye amagara omuri Paradiso omu nsi.​—Mat. 25:46; 2 Tes. 1:9; Kush. 17:8; 20:15.

18. Embeera omu nsi niziija kuba nizishusha ki bwanyima y’emyaka 1,000?

¹⁸ Ahu emyaka 1,000 eraaze kuhwera, abantu boona omu nsi nibaija kuba bahikiriire. Tihaine orikwija kugaruka kuteganisibwa ekibi ekyakomookire ahari Adamu. (Rom. 5:12) Omukyeeno gw’ekibi ky’Adamu nigwija gwihiirweho kimwe. Obwo, abari omu nsi nibaija “kuba abahuriire,” kandi bahikiriire aha kuhendera kw’emyaka 1,000.​—Kush. 20:5.

19. Ahabw’enki okugyezibwa kw’aha muheru nikwija kwetengyesa?

¹⁹ Nitumanya ngu Yesu akaremesa Sitaane obu yaabaire naateeraho kumureetera kutaguma ari omwesigwa. Akaguma ari omwesigwa obu yaabaire naagyezibwa. Kwonka shi abantu boona abahikiriire nibaija kuguma bari abeesigwa, Sitaane ku araaheebwe omugisha bw’okubagyeza? Buri omwe naija kubaasa kwegarukiramu ekibuuzo eki, Sitaane ku araakomoororwe bwanyima y’emyaka 1,000. (Kush. 20:7) Abaraagume bari abeesigwa omu kugyezibwa okw’aha muheru oku, nibaija kutunga amagara agatahwaho, n’obugabe obwabuzima. (Rom. 8:21) Abaraagome, nibaija kucwekyerezibwa n’Omuregi na baadaimoni obutagaruka kubaho.​—Kush. 20:8-10.

20. Obunabi oburikushemeza oburi omu kitabo ky’Okushuuruurwa nibukureetera kwehurira ota?

²⁰ Hati nooyehurira ota bwanyima y’okumurikirwa ebiri omu kitabo ky’Okushuuruurwa? Buzima nikishemeza kureeba ngu nootwarirwa omu bunabi obu. Eki kishemereire kukureetera kwenda kweta abandi kutwegaitaho omu kuramya okushemeire okwa Ruhanga waitu. (Kush. 22:17) Obu twine ekihika omu biteekateeko byaitu n’omu mitima yaitu ahabw’ebintu ebi ebiri haihi kubaho, nikituhiga kugamba nk’entumwa Yohaana owaagizire ati: “Amiina. Ija, Mukama waitu Yesu.”​—Kush. 22:20.