1. Niki ekirikugumira abantu baingi?

 ORAATAIREHO ekigyendererwa ky’eby’omwoyo kwonka okagumirwa kukihikiiriza? b Kyaba nikwo kiri, tori wenka. Nk’eky’okureeberaho, Philip akaba naayenda kwongyera aha mutindo gw’okushaba kwe n’aha mirundi ei yaabaire naashaba, kwonka arikuburwa obwire. Erika akaba aine ekigyendererwa ky’okukwata obwire bw’oruteerane rw’okuza kubuurira, kwonka akaba naakira kukyerererwa. Tomáš owaataireho emirundi mingi kushoma Baibuli yoona. Naagira ati: “Nkaba ntarikukunda kushoma Baibuli. Nkateeraho emirundi eshatu, kwonka buri murundi nkaba ngarukira omu kitabo ky’Abaleevi.”

2. Ahabw’enki tutaine kuhwamu amaani twaba tutahikire aha kigyendererwa kyaitu ky’eby’omwoyo?

² Waaba oine ekigyendererwa eki otakahikireho, oteereeba nk’oremirwe. Nangwa n’ekigyendererwa ekyorobi nikyetengyesa obwire n’okukora n’amaani. Ahabw’okugira ngu nookyenda kuhika aha kigyendererwa kyawe, nikyoreka ngu nootwara omukago gwawe na Yehova nka mukuru kandi nooyenda kumuha ekirikukirayo oburungi. Yehova naakusiima ahabw’okuteeraho. Kandi tarikukushaba kukora eki otarikubaasa. (Zab. 103:14; Mik. 6:8) N’ahabw’ekyo taho ekigyendererwa kiringaniire, ekirikuhikaana n’embeera yaawe. Mbwenu shi noobaasa kukora ki kukihikaho? Ka tureebe bimwe ebi turikubaasa kukora.

3. Ahabw’enki ekihika ni kikuru?

³ Okugira ekihika nikikuhwera kuhika aha kigyendererwa kyawe ky’eby’omwoyo. Omuntu oine ekihika naakora n’amaani kuhika aha kigyendererwa kye. Nitubaasa kugyeragyeranisa ekihika n’omuyaga ogurikuhwera obwato kuhika ahu burikuza. Omuyaga gwagumizamu niguhuuha, omuvugi w’obwato naahika ei arikuza. Omuyaga gwaba guri ogw’amaani naarahuka kuhikayo. Nikyo kimwe, twayongyera kugira ekihika ky’amaani, nitwija kuhika aha bigyendererwa byaitu. Ow’eishe-emwe David kuruga El Salvador naagira ati: “Waaba oine ekihika nooteeraho nk’oku orikubaasa. Torikwikiriza kintu kyona kukuremesa kuhika aha kigyendererwa kyawe.” Mbwenu shi noobaasa kukora ki kwongyera kugira ekihika?

4. Nitubaasa kushaba ki? (Abafilipi 2:13) (Reeba n’ekishushani.)

⁴ Shaba kwongyera kugira ekihika. Yehova naabaasa kukoresa omwoyo gwe kukuhiga kuhika aha kigyendererwa kyawe. (Shoma Abafilipi 2:13.) Obumwe nitutaho ekigyendererwa ahabw’okugira ngu twine kukitaho, kandi ekyo ni kirungi. Kwonka nitubaasa kuba tutaine kihika ky’okukihikaho. Ekyo nikyo kyahikire ahari munyaanyazi-itwe orikwetwa Norina kuruga Uganda. Akataho ekigyendererwa ky’okwegyesa omuntu Baibuli, kwonka akaba ataine kihika ahakuba akaba naateekateeka ngu ti mwegyesa murungi. Niki ekyamuhweraire? Naagira ati: “Nkatandika kushaba Yehova buri izooba kumpwera kwongyera kugira ekihika ky’okwegyesa omuntu Baibuli. Kandi nkaboneza omu myegyeseze yangye. Bwanyima y’ameezi makye, nketegyereza ngu nyine ekihika. Omu mwaka nigwo gumwe, nkatandika kwegyesa abantu babiri Baibuli.”

5. Nitubaasa kuteekateeka ahari ki kubaasa kwongyera aha kihika kyaitu?

⁵ Teekateeka aha bi Yehova akukoreire. (Zab. 143:5) Entumwa Paulo akateekateeka aha mbabazi za Yehova ezitamushemereire ezi yaamugiriire, kyamuhiga kukora n’amaani kumuheereza. (1 Kor. 15:9, 10; 1 Tim. 1:12-14) Nikyo kimwe, waayongyera kuteekateeka aha bi Yehova akukoreire, nooyongyera kugira ekihika ky’okuhika aha kigyendererwa kyawe. (Zab. 116:12) Teekateeka aha kyahweraire munyaanyazi-itwe omuri Honduras kuhika aha kigyendererwa kye ky’okuba payoniya ow’obutwire. Naagira ati: “Nkateekateeka ahari rukundo mpango ei Yehova anyiniire. Akanyiriza haihi n’abaheereza be. Naandeeberera kandi naandinda. Okuteekateeka aha bintu ebyo kikahamya rukundo ei mwiniire kandi naayongyera kugira ekihika.”

6. Niki ekindi ekirikubaasa kutuhwera kwongyera kugira ekihika?

⁶ Ta omutima aha ku orikugasirwa waahika aha kigyendererwa kyawe. Yetegyereze ekyahweraire Erika owaaba yaagambirweho, kuhika aha kigyendererwa kye ky’okukwata obwire. Naagira ati: “Nketegyereza ngu nkaba  ninfeerwa bingi naakyerererwa kuhika omu ruteerane rw’okubuurira. Kwonka ku naabaire nkwata obwire, nkaba ndamutsya ab’eishe-emwe na banyaanyazi-itwe kandi mmara obwire nabo. Kandi nkaba mpurira obuhabuzi obwabaire buheebwa kimpwera kwongyera aha mutindo gw’obuheereza bwangye n’okubukunda.” Erika akata omutima aha ku arikugasirwa yaakwata obwire, yaabaasa kuhika aha kigyendererwa kye. Ni birungi ki ebi orikubaasa kuteekateekaho? Ekigyendererwa kyawe kyaba kiri eky’okushoma Baibuli nari kushaba, teekateeka aha ku kiraahamye omukago gwawe na Yehova. (Zab. 145:18, 19) Waaba oine ekigyendererwa ky’okugira omutwarize gw’Ekikristaayo, ta omutima aha ku kiraakuhwere kwongyera kukoragana gye n’abandi. (Kol. 3:14) Nikibaasa kukwetengyesa kuhandiika enshonga zoona ahabw’enki nooyenda kuhikiiriza ekigyendererwa kyawe. Guma nooshwijuma ebi waahandiika. Tomáš, owaaba yaagambirweho, naagira ati: “Naaba nyine enshonga nyingi z’okuhika aha kigyendererwa, niinteeraho kukora kyona ekirikubaasika kukihikiiriza.”

7. Niki ekyahweraire Julio n’omukazi we kuhika aha kigyendererwa kyabo?

⁷ Mara obwire n’abarikukuhiga. (Enf. 13:20) Teekateeka aha kyahweraire Julio n’omukazi we kuhika aha kigyendererwa ky’okwongyera aha buheereza bwabo. Naagira ati: “Tukatoorana abanywani abaabaire nibatuhiga kuhika aha kigyendererwa kyaitu, kandi tukaba tukigaaniiraho nabo. Baingi aharibo bakaba baahikire aha kigyendererwa nk’ekyaitu, n’ahabw’ekyo bakatuha obuhabuzi burungi. Banywani baitu bakaba batubuuza ahu twahika, kandi batuhiga kyaba nikyetengyesa.”

8. Nihabaasa kubaho ki twateeraho kuhikiiriza ekigyendererwa kyaitu obu turi kuba twine ekihika bwonka? (Reeba n’ekishushani.)

⁸ Twena obumwe, hariho obu turikuba nituhurira tutaine kihika. Mbwenu shi ekyo nikimanyisa ngu titurikubaasa kuhika aha kigyendererwa kyaitu? Ngaaha. Nk’eky’okureeberaho: Omuyaga nigubaasa kuhwera obwato kuhika ahu burikuza. Kwonka, omuyaga niguba gwine amaani gatarikwingana, kandi aha mazooba agamwe nigubaasa n’okutabaho. Mbwenu shi ekyo nikimanyisa ngu omuvugi w’obwato tarikwija kugumizamu naagyenda? Ngaaha buzima. Obwato obumwe bwine ingini, kandi obundi n’obw’enkatsi. Omuvugi waabwo naabaasa kukoresa ebyo kugumizamu kuhika ahu arikuza. Ekihika eki turikuba twine nitubaasa kukigyeragyeranisa n’omuyaga, nikibaasa kutashushana buri izooba. Aha mazooba agamwe, nitubaasa kuhurira tutaine muhimbo gw’okuhikiiriza ekigyendererwa kyaitu. N’ahabw’ekyo twaba nitwenda kuhikiiriza ekigyendererwa kyaitu obu turikuba twine ekihika bwonka, nitubaasa kutakihikaho. Kwonka nk’oku omuvugi w’obwato arikukoresa emiringo endiijo kuhika ahu arikuza, naitwe nitubaasa kuhika aha kigyendererwa  kyaitu n’obu twakuba tutaine mujinya. N’obu eki kirikwetengyesa okwezibira, kwonka niharugamu ebirungi bingi. Tutakagambire aha ki turikubaasa kukora, ka tureebe ekibuuzo eki turikubaasa kwebuuza.

9. Mbwenu shi twine kuguma nituteeraho kuhika aha kigyendererwa kyaitu n’obu twakuba tutaine kihika? Shoboorora.

⁹ Yehova naayenda ngu tumuheereze tushemereirwe kandi twekundiire. (Zab. 100:2; 2 Kor. 9:7) Mbwenu shi twine kugumizamu nituteeraho kuhikiiriza ekigyendererwa ky’omwoyo n’obu twakuba nituhurira tutaine kihika? Teekateeka aha ky’okureeberaho ky’entumwa Paulo. Akagira ati: “Nteera omubiri gwangye ngu ngutegyekye.” (1 Kor. 9:25-27) Paulo akaba ayeegyema kukora ekihikire n’obu yaabaire aba naahurira atarikwenda kukikora. Mbwenu shi Yehova akasiima obuheereza bwa Paulo? Eego. Kandi akamushuumbusha ahabw’okuteeraho.—2 Tim. 4:7, 8.

10. Nitugasirwa tuta twateeraho kuhikiiriza ekigyendererwa kyaitu n’obu turikuba tutaine kihika?

¹⁰ Yehova naatusiima twateeraho kuhikiiriza ekigyendererwa kyaitu n’obu turikuba tutaine kihika. Naashemererwa ahabw’okumanya ngu titurikukikora ahabw’okugira ngu nitukikunda, kureka nitukikora ahabw’okumukunda. Nk’oku Yehova yaahaire Paulo emigisha, naitwe naija kugituha twateeraho. (Zab. 126:5) Kandi twareeba emigisha ei Yehova arikutuha nikituhwera kugira ekihika. Munyaanyazi-itwe Lucyna kuruga Poland naagira ati: “Obumwe nimba ntarikwenda kuza kubuurira, na munonga naaba nduhire. Kwonka, ku ndikuzayo ningira okushemererwa kwingi.” N’ahabw’ekyo ka tureebe eki turikubaasa kukora twaba tutaine mujinya.

11. Yehova naabaasa kutuhwera ata kwongyera kugira omutwarize gw’okwerinda?

¹¹ Shaba kugira omutwarize gw’okwerinda. Okwerinda nikimanyisa okubaasa kw’okutegyeka enyehurira n’ebikorwa byawe. Obumwe nikitwariramu okwezibira kukora ekintu kibi. Kwonka, omutwarize gw’okwezibira nigutuhwera kukora ekihikire, na munonga kyaba kigumire nari tutaine kihika ky’okukikora. Ijuka ngu, okwerinda n’omutwarize gw’omwoyo gurikwera, n’ahabw’ekyo shaba Yehova kukuhwera kugira omutwarize mukuru ogwo. (Luk. 11:13; Gal. 5:22, 23) David, owaaba yaagambirweho, akashoboorora oku okushaba kwamuhweraire. Akaba naayenda kwongyera kweyegyesa obutoosha. Naagira ati: “Nkaba nshaba Yehova kumpwera kuteeraho kugira omutwarize gw’okwerinda. Ahabw’obuhwezi bwe, nkabaasa kutaho entebeekanisa nungi y’okweyegyesa kandi naagihamiraho.”

12. Omusingye oguri omu Omubuurizi 11:4, gwine kakwate ki n’ebigyendererwa by’omwoyo?

¹² Otategyereza kugira embeera nungi. Omu nsi egi, nitubaasa kutagira embeera nungi obwire bwona. Twazitegyereza, nitubaasa kutahika aha kigyendererwa kyaitu. (Shoma Omubuurizi 11:4.) Ow’eishe-emwe Dayniel naagira ati: “Tihariho embeera nungi. N’ahabw’ekyo titwine kutegyereza, kureka tushemereire kutandikiraho.” Ow’eishe-emwe Paul kuruga Uganda naaha enshonga endiijo erikworeka ahabw’enki tutaine kweziringa: “Twatandikiraho n’obu embeera zirikuba zitoorobi, Yehova naatuhwera.”—Mal. 3:10.

13. Ahabw’enki ni kurungi kutandika n’ebigyendererwa bikye?

¹³ Tandika n’ekigyendererwa kikye. Nitubaasa kutagira ekihika ahabw’okugira ngu ekigyendererwa kyaitu nikireebeka nk’ekigumire kuhikaho. Ku kiraabe nikwo kiri, noobaasa kutaho ebigyendererwa bikye ebi orikubaasa kuhikiiriza. Ku oraabe otaireho ekigyendererwa ky’okugira omutwarize, noobaasa kutandika  orikugworeka omu bintu bikye. Waaba otaireho ekigyendererwa ky’okushoma Baibuli yoona, noobaasa kutandika orikukoresa obwire bukye. Tomáš, owaagambwaho, akaba naagumirwa kuhikiiriza ekigyendererwa kye ky’okushoma Baibuli yoona omu mwaka. Naagira ati: “Nketegyereza ngu nkaba ncwairemu kushoma bingi ebi naabaire ntarikubaasa. N’ahabw’ekyo nkateeraho omurundi ogundi kushoma emishororongo mikye buri izooba kandi nkagiteekateekaho. N’ekyarugiremu, nkatandika kukunda kugishoma.” Tomáš’ ku yaayongyeire kukunda kushoma Baibuli akoongyera aha mishororongo ei yaabaire naashoma. Kandi, akabaasa kushoma Baibuli yoona. c

14. Ni bintu ki ebirikubaasa kuturemesa kuhikiiriza ekigyendererwa kyaitu?

¹⁴ Kwonka n’obu twakuba twine ekihika nari turikubaasa kwezibira, nihabaasa kugira ebyaturemesa. Nk’eky’okureeberaho, ‘ebihikiirizi’ nibibaasa kutureetera kuburwa obwire bw’okukora aha kigyendererwa kyaitu. (Mub. 9:11) Nitubaasa kuhikwaho oburemeezi butureetere kuhwa amaani. (Enf. 24:10) Obutahikiirira bwaitu nibubaasa kutureetera kutwaza omu muringo ogutarikutuhwera kuhikiiriza ekigyendererwa kyaitu. (Rom. 7:23) Nari nitubaasa kuhurira turuhire. (Mat. 26:43) Niki ekirikubaasa kutuhwera kusingura ebirikuturemesa kuhikiiriza ekigyendererwa kyaitu?

15. Mbwenu shi haagira ebyatuteganisa, nikiba nikimanyisa ngu turemirwe? Shoboorora. (Zaaburi 145:14)

¹⁵ Ijuka ngu haagira ekyakuteganisa tikirikumanyisa ngu oremirwe. Baibuli neegira ngu nitubaasa kutunga oburemeezi emirundi mingi. Kwonka neeyoreka gye ngu nitubaasa kubusingura twaba twine obuhwezi bwa Yehova. (Shoma Zaaburi 145:14.) Ow’eishe-emwe Philip, owaaba yaagambirweho, naagira ati: “Obusinguzi bwangye tindikubureebera aha mirundi ei ndikugwa.  Kureka aha mirundi ei ndikwimuka.” David, nawe owaaba yaagambirweho, naagira ati: “Ninteeraho kureeba ebirikunteganisa nk’omuringo gw’okworeka ngu ninkunda Yehova.” Waateeraho kugumizamu na haagira ebyakuteganisa, nooyoreka ngu nooyenda kushemeza Yehova. Ka nikishemeza Yehova kukureeba nooteeraho kuhika aha kigyendererwa kyawe!

16. Nitubaasa kwegyera ki aha birikubaasa kututeganisa?

¹⁶ Yegyera aha kyakuteganisa. Teekateeka aha kyakuteganisa, reero oyebuuze oti: ‘Nimbaasa kugira eki naahindura kwetantara kugaruka kuremwa?’ (Enf. 27:12) Obumwe, okugaruka enyima nikibaasa kworeka ngu ekigyendererwa eki waataireho torikukibaasa. Kyaba nikwo kiri omu mbeera yaawe, teeraho kugaruka kukishwijuma kureeba yaaba noobaasa kukihikiiriza. d Yehova tarikwija kukureeba nk’oremirwe waaba otahikire aha kigyendererwa eki otarikubaasa.—2 Kor. 8:12.

17. Ahabw’enki twine kuguma nitwijuka ebigyendererwa ebi twahikiirize?

¹⁷ Ta omutima aha ki waaherize kuhikiiriza. Baibuli neegira ngu “Ruhanga t’otahikiriire kwebwa emirimo yaanyu.” (Heb. 6:10) N’ahabw’ekyo naiwe toine kwebwa ebi waaherize kuhikiiriza. Teekateeka aha bigyendererwa ebi waahikireho, nk’okugira omukago murungi na Yehova, okugambira abandi ebirikumukwataho, n’okubatizibwa. Nk’oku waabaasize kuhika ahari ebyo, noobaasa kuhika n’aha bigyendererwa ebindi ebi otaireho.—Fil. 3:16.

18. Niki eki twine kwijuka twaba nituteeraho kuhika aha kigyendererwa kyaitu? (Reeba n’ekishushani.)

¹⁸ Ahabw’okuhwerwa Yehova, noobaasa kuhika aha kigyendererwa kyawe, nk’oku omuvugi w’obwato arikushemererwa yaahika ei arikuba naaza. Kwonka ijuka ngu, abavugi b’obwato baingi nibashemezibwa n’ebi barikureeba baaba bari aha rugyendo. Nikyo kimwe, waateeraho kuhika aha kigyendererwa ky’eby’omwoyo noija kushemererwa waijuka oku Yehova akuhweraire kandi akakuha emigisha. (2 Kor. 4:7) Waaba otaruhire kugumizamu nootaho ebigyendererwa, noija kutunga emigisha mingi.—Gal. 6:9.