EKICWEKA EKY’OKWEGA 21
Oku Yehova Arikugarukamu Okushaba Kwaitu
“Ku turaabe nitumanya ngu atuhurira omuri byona ebi tushaba, nitumanya ngu tutungire ebi twamushabire.”—1 YOH. 5:15.
EKYESHONGORO 41 Ninkweshengyereza Hurira Okushaba Kwangye
EBIRAAGAMBWEHO a
1-2. Nitubaasa kwebuuza ki aha bikwatiraine n’okushaba kwaitu?
OREEBUURIZEHO yaaba Yehova naagarukamu okushaba kwawe? Kyaba nikwo kiri, tori wenka. Ab’eishe-emwe na banyaanyazi-itwe baingi nikwo barikuteekateeka na munonga baaba bari omu mbeera egumire. Twaba nitubonabona nitubaasa kugumirwa kwetegyereza oku Yehova arikugarukamu okushaba kwaitu.
2 Ka tureebe ahabw’enki nitubaasa kugira obwesigye ngu Yehova naagarukamu okushaba kw’abaheereza be. (1 Yoh. 5:15) Nituza n’okugarukamu ebibuuzo ebi: Ahabw’enki obumwe nitubaasa kuteekateeka ngu Ruhanga tarikugarukamu okushaba kwaitu? Yehova naagarukamu ata okushaba kwaitu?
YEHOVA NAABAASA KUTATUGARUKAMU NK’OKU TURIKUTEEKATEEKA
3. Ahabw’enki Yehova arikwenda ngu tumushabe?
3 Ebyahandiikirwe nibituhamiza ngu Yehova naatukunda munonga kandi turi ab’omuhendo ahariwe. (Hag. 2:7; 1 Yoh. 4:10) Niyo nshonga ahabw’enki naatuhiga kumushaba obuhwezi. (1 Pet. 5:6, 7) Naayenda kutuhwera kumuguma haihi n’okuba abasinguzi omu kusingura oburemeezi obu twine.
Yehova akagarukamu okushaba kwa Daudi arikumujuna abazigu be (Reeba akacweka 4)
4. Nitumanya tuta ngu Yehova naagarukamu okushaba kw’abaheereza? (Reeba n’ekishushani.)
4 Nitukira kushoma omu Baibuli oku Yehova yaagarukiremu okushaba kw’abaheereza be. Haine ou orikwijuka? Teekateeka aha Mugabe Daudi. Akaba aine abazigu baingi, kandi akaba ashaba Yehova kumuhwera. Eizooba rimwe, akashaba ati: “Hurira okushaba kwangye, ai [Yehova], otegye okutu okweshengyereza kwangye; ahabw’okwesigwa kwawe n’okuhikiirira kwawe ongarukyemu.” (Zab. 143:1) Yehova akagarukamu okushaba kwa Daudi yaamujuna. (1 Sam. 19:10, 18-20; 2 Sam. 5:17-25) Daudi akabaasa kugamba aine obwesigye ati: “[Yehova] ari haihi na boona abamutakira.” Naitwe nitubaasa kugira obwesigye nk’obwe.—Zab. 145:18.
Yehova akagarukamu okushaba kwa Paulo arikumuha amaani agaabaire nigetengyesa kugumisiriza (Reeba akacweka 5)
5. Mbwenu shi Yehova akagarukamu okushaba kw’abaheereza be aba ira nk’oku baabaire nibateekateeka? Ha eky’okureeberaho. (Reeba n’ekishushani.)
5 Yehova naabaasa kutagarukamu okushaba kwaitu nk’oku turikuteekateeka. Ekyo nikyo kyabaire aha ntumwa Paulo. Akashaba Ruhanga kumwiha “eihwa omu mubiri.” Akamweshengyereza kashatu ngu oburemeezi obwe burugyeho. Mbwenu shi Yehova akagarukamu okushaba okwo? Eego, kwonka ti nk’oku Paulo yaabaire naateekateeka. Omu mwanya gw’okwihaho oburemeezi obwo, akamuha amaani g’okugumisiriza kugira ngu abaase kugumizamu naamuheereza omu bwesigwa.—2 Kor. 12:7-10.
6. Ahabw’enki obumwe turikubaasa kuteekateeka ngu Yehova tarikugarukamu okushaba kwaitu?
6 Naitwe obumwe okushaba kwaitu nikubaasa kutagarukwamu nk’oku turikuteekateeka. Nitubaasa kugira obwesigye ngu Yehova naamanya omuringo murungi gw’okutuhweramu. Nangwa naabaasa ‘kukora ebirikukirira kimwe ebi turikushaba nari ebi turiteekateeka.’ (Efe. 3:20) N’ahabw’ekyo, naabaasa kugarukamu okushaba kwaitu omu bwire nari omu muringo ogututarikuteekateeka.
7. Ahabw’enki obumwe nikyetengyesa kuhindura omu kushaba kwaitu? Ha eky’okureeberaho.
7 Nikibaasa kutwetengyesa kuhindura omu kushaba kwaitu twayongyera kwetegyereza gye ebi Yehova arikukunda. Teekateeka aha ky’okureeberaho kya Martin Poetzinger. Ow’eishe-emwe Poetzinger ku yaaherize kutaaha omu bushwere akatwarwa omu nkambi ya Nazi. Omu kubanza, akashaba Yehova ngu abaase kurekurwa kugira ngu areeberere omukazi we kandi agumizemu naabuurira. Kwonka bwanyima ya saabiiti ibiri akeetegyereza ngu Yehova akaba atarikumuteeraho oburyo bw’okurekurwa. N’ahabw’ekyo akatandika kushaba ati: “Yehova, nikweshengyereza, nyoreka eki orikwenda ngu nkore.” Akatandika kuteekateeka aha mbeera ei ab’eishe-emwe bagyenzi be omu nkambi baabaire nibarabamu. Baingi aharibo bakaba nibeerarikirira aha b’eka yaabo. Ow’eishe-emwe Poetzinger akagaruka yaashaba ati: “Yebare Yehova, ahabw’obujunaanizibwa busya obu. Mpwera ngumye ab’eishe-emwe bagyenzi bangye.” Akamara emyaka mwenda omu nkambi arikukora obujunaanizibwa obwo!
8. Twine kwijuka kintu ki ekikuru twaba nitushaba?
8 Twine kwijuka ngu Yehova aine ekigyendererwa kandi naija kukihikiiriza omu bwire bwe. Ekigyendererwa ekyo nikitwariramu okumariraho kimwe oburemeezi bwona oburikutureetera kubonabona, nk’ebihikiirizi, endwara, n’okufa. Yehova naija kuhikiiriza ekigyendererwa kye arikukoresa Obukama bwe. (Dan. 2:44; Kush. 21:3, 4) Kwonka, obu obwire obwo butakahikire, Yehova akirekireho Sitaane kutegyeka ensi. b (Yoh. 12:31; Kush. 12:9) Ku ogire ngu Yehova naashoboorora oburemeezi bwaitu hati, okashushire ngu Sitaane n’omutegyeki murungi. Kwonka n’obu turaabe twine kutegyereza Yehova kuhikiiriza ebiraganiso ebimwe, tikirikumanyisa ngu nituba tutaine buhwezi bwe. Ka tureebe emwe aha miringo oku arikutuhwera.
OKU YEHOVA ARIKUGARUKAMU OKUSHABA KWAITU
9. Yehova naabaasa kutuhwera ata twaba nitwenda kucwamu? Ha eky’okureeberaho.
9 Naatuha obwengye. Yehova naaraganisa kutuha obwengye oburikwetengyesa kubaasa kucwamu gye. Nitwetenga obwengye oburikuruga ahari Ruhanga na munonga twaba nitucwamu aha nshonga ezirikukwata aha mbeera zaitu, nk’okugumira aho tutagiire omu bushwere nari okuza omu bushwere. (Yak. 1:5) Teekateeka aha kyahikire ahari munyaanyazi-itwe Maria, otari mu bushwere. c Akaba ashemereirwe arikuheereza nka payoniya ow’obutwire obu yaabugana ow’eishe-emwe. Naagira ati: “Omukago gwaitu ku gwayongyeire kuhama, tukoongyera kugirirana enyehurira. Nkamanya ngu nyine kucwamu. Nkashaba munonga aha nshonga egi. Nkaba niinyenda obuhabuzi bwa Yehova, kwonka nkaba niimanya ngu tiwe araancweremu eky’okukora.” Naahamiza kimwe ngu Yehova akagarukamu okushaba kwe yaamuha obwengye. Ata? Ku yaacondoorize omu bitabo by’ekibiina, akatunga ebicweka ebirikugamba aha nshonga egyo ebyamuhweraire kutunga eby’okugarukamu by’ebibuuzo bye. Kandi akata omu nkora n’obuhabuzi bwa nyina ori omu mazima. Obuhabuzi obwo bukahwera Maria kushwijuma gye enyehurira ze. Ekyo kikamuhwera kucwamu gye.
Yehova naatuha ata amaani g’okugumisiriza? (Reeba akacweka 10)
10. Kurugiirira aha 2 Abakorinso 4:7, Yehova naakora ki kuhwera abaheereza be? Ha eky’okureeberaho. (Reeba n’ekishushani.)
10 Naatuha amaani g’okugumisiriza. Nk’oku Yehova yaahweraire entumwa Paulo, naatuha amaani kubaasa kugumisiriza okugyezibwa. (Shoma 2 Abakorinso 4:7.) Yetegyereze oku Yehova yaahweraire ow’eishe-emwe orikwetwa Benjamin kugumisiriza embeera zigumire. Obu Benjamin yaabaire ari omunyeeto, we n’ab’eka ye bakaba nibatuura omu nkambi z’empungi omuri Africa. Benjamin naagira ati: “Nkaba nshaba Yehova obutoosha kumpa amaani g’okukora ebirikusiimwa omu maisho ge. Yehova akagarukamu okushaba kwangye yaampa obusingye omu biteekateeko, obumanzi omu kubuurira, n’ebitabo by’okumpwera kuguma mpami omu by’omwoyo.” Naayongyeraho ati: “Okushoma eby’okureeberaho by’ab’eishe-emwe n’okumanya oku Yehova arikubahwera kugumisiriza, bikandeetera kumariirira kuguma ndi omwesigwa.”
Waareebire oku Yehova arikukuhwera arikukoresa ab’eishe-emwe bagyenzi baawe? (Reeba akacweka 11-12) d
11-12. Yehova naabaasa kukoresa ata eka yaitu y’eby’omwoyo kugarukamu okushaba kwaitu? (Reeba n’ekishushani.)
11 Naakoresa eka yaitu y’eby’omwoyo. Ekiro ekyahereerukireyo Yesu atakahaireyo amagara ge kwitwa, akashaba munonga. Akeeshengyereza Yehova kutaikiriza abandi kuteekateeka ngu amurogotsireho. Omu mwanya gw’okukora ekyo, Yehova akahwera Yesu arikwohereza omwe ahari baamaraika kumugumya. (Luk. 22:42, 43) Kandi Yehova naabaasa kutuhwera arikuhiga ow’eishe-emwe nari munyaanyazi-itwe kutugumya arikututeerera esimu nari kututaayaayira. Twena nitubaasa kusherura oburyo bw’okugambira ab’eishe-emwe bagyenzi baitu “ekigambo kirungi.”—Enf. 12:25.
12 Teekateeka aha ky’okureeberaho kya munyaanyazi-itwe Miriam. Saabiiti nkye iba aherize kufa, akaba ari omuka wenka aine ihamba, ayehweire amatsiko kandi aine amaganya. Akaba aguma naarira kandi arikwenda ow’okugamba nawe. Naagira ati: “Nkaba ntaine maani g’okuteerera omuntu esimu, n’ahabw’ekyo nkashaba Yehova. Ku naabaire ndiyo niindira kandi ndikushaba, haine owaanteereire esimu. Akaba ari omureeberezi, munywani waitu.” Miriam akatunga okuhuumurizibwa kuruga aha mureeberezi ogwo n’omukazi we. Naahamiza kimwe ngu Yehova niwe yaareeteire ow’eishe-emwe ogwo kuteera esimu.
Yehova naabaasa kureetera ata abandi kukuhwera? (Reeba akacweka 13-14)
13. Ha eky’okureeberaho ekirikworeka oku Yehova arikukoresa abatarikumuramya kugarukamu okushaba kwaitu.
13 Naabaasa kukoresa abantu abatarikumuramya. (Enf. 21:1) Obumwe, Yehova naagarukamu okushaba kw’abaheereza be arikuhiga abatarikumuramya kubahwera. Nk’eky’okureeberaho, akareetera Omugabe Arutagizakiseesi kuha Nehemia orusa rw’okugaruka Yerusaalemu kugira ngu ahwere kugaruka kwombeka orurembo. (Neh. 2:3-6) Na hati, Yehova naabaasa kureetera abatarikumuramya kutuhwera kyaba nikyetengyesa.
14. Eky’okureeberaho kya Soo Hing kyakukwataho kita? (Reeba n’ekishushani.)
14 Munyaanyazi-itwe orikwetwa Soo Hing akareeba oku Yehova yaamuhweraire arikukoresa omushaho we. Mutabani we aine endwara z’omutwe. Ku yaatungire butandu, we na iba bakarekura emirimo yaabo baza kumureeberera. N’ekyarugiremu, bakatunga oburemeezi omu by’entaatsya. Soo Hing akagira ngu akeehurira nk’otakibaasa kwemera embeera egyo. Akeeshengyereza Yehova kuruga aha mutima, arikumushaba kumuhwera. Omushaho akacwamu kusherura oburyo bw’okumuhwera n’eka ye. Ekyo kikabareetera kutunga obuhwezi kuruga omu gavumenti n’omwanya gw’okutuuramu guringaniire. Bwanyima, Soo Hing akagira ati: “Tukareeba omukono gwa Yehova omu mbeera yaitu. Buzimazima ‘naahurira okushaba’”—Zab. 65:2.
OKWIKIRIZA NIKWETENGYESA KUBAASA KUMANYA KANDI TUKAIKIRIZA OKU YEHOVA ARIKUGARUKAMU OKUSHABA
15. Niki ekyahweraire munyaanyazi-itwe omwe kwetegyereza ngu okushaba kwe kukaba nikugarukwamu?
15 Okushaba kwaitu tikurikugarukwamu omu muringo gw’eky’okutangaaza. Kwonka oku Tataitwe w’omu iguru arikugarukamu okushaba kwaitu nikituhwera kuguma tumuhamiireho. N’ahabw’ekyo teeraho kureeba oku arikugarukamu okushaba kwawe. Munyaanyazi-itwe orikwetwa Yoko akaba naateekateeka ngu Yehova tarikugarukamu okushaba kwe, kwonka akatandika kuhandiika byona ebi yaabaire naamushaba. Bwanyima y’obwire, akashoma omu katabo ke yaayetegyereza ngu Yehova akaba agarukiremu bingi aha bi yaabaire amushabire, otwariiremu n’ebi yaabaire atakiijuka. Obumwe n’obumwe, nituba twine kwemereramu tukateekateeka aha ku Yehova arikugarukamu okushaba kwaitu.—Zab. 66:19, 20.
16. Nitubaasa kworeka tuta ngu twine okwikiriza aha bikwatiraine n’okushaba kwaitu? (Abaheburaayo 11:6)
16 Nitworeka okwikiriza twashaba Yehova kandi tukaikiriza n’omuringo gwona ogu arikugarukamu okushaba kwaitu. (Shoma Abaheburaayo 11:6.) Teekateeka aha ky’okureeberaho kya Mike n’omukazi we, Chrissy. Bakaba baine ekigyendererwa ky’okuheereza aha Beseeli. Mike naagira ati: “Twembi tukaijuza foomu y’okuza aha Beseeli emirundi mingi kandi tukaguma nitushaba Yehova aha bikwatiraine n’ekigyendererwa eki.” Mike na Chrissy bakaguma baine obwesigye barikumanya ngu Yehova naamanya oku arikwenda kubakoresa omu buheereza bwe. Bakagumizamu nibakora eki barikubaasa, bari baapayoniya ab’obutwire ahu ababuurizi barikwendwa munonga kandi barikuhwera omu kwombeka ebyombeko by’ekibiina z’okwombeka ez’Obukama. Kandi hati bari omu buheereza bwa saketi. Mike naagira ati: “Butoosha Yehova tarikugarukamu okushaba kwaitu nk’oku turikuteekateeka, kwonka naakugarukamu omu miringo mirungi erikukirira kimwe ei turikuteekateeka.”
17-18. Kurugiirira aha Zaaburi 86:6, 7, nitubaasa kugira bwesigye ki?
17 Shoma Zaaburi 86:6, 7. Daudi omuhandiiki wa zaaburi akaba aine obwesigye ngu Yehova naahurira okushaba kwaitu kandi akugarukamu. Naiwe noobaasa kugira obwesigye nk’obwo. Eby’okureeberaho ebyagambwaho omu kicweka eki nibituhamiza ngu Yehova naabaasa kutuha obwengye n’amaani agarikwetengyesa kugumisiriza. Naabaasa kukoresa eka yaitu y’eby’omwoyo nari abatarikumuramya kutuhwera omu miringo etari emwe.
18 N’obu Yehova araabe atarikugarukamu okushaba kwaitu nk’oku turikuteekateeka, nituba twine obwesigye ngu naija kukugarukamu. Naija kutuha byenyini ebirikwetengyesa omu bwire obuhikire. N’ahabw’ekyo gumizamu nooshaba, oine obwesigye ngu Yehova naaza kukureeberera kandi naija ‘kuhaazya ekintu kyona ekihuriire ebi kirikwetenga’ omu nsi ensya eri haihi kubaho.—Zab. 145:16.
EKYESHONGORO 46 Nitukwebaza Yehova
a Yehova naatuhamiza ngu naagarukamu okushaba kwaitu kwaba nikuhikaana n’ekigyendererwa kye. Twaba twine oburemeezi, nitubaasa kugira obwesigye ngu naija kutuhwera kuguma tumuhamiireho. Ka tureebe oku Yehova arikugarukamu okushaba kwaitu.
b Kubaasa kumanya ahabw’enki Yehova aikiirize Sitaane kutegyeka ensi, reeba ekicweka “Ta Amaisho Gaawe aha Nshonga Enkuru,” omu Omunaara gw’Omurinzi ogwa Gyuni 2017.
c Amaziina agamwe gahindwirwe.
d ENSHOBOORORA Y’EKISHUSHANI: Omukazi n’omwana we baahungira omu eihanga erindi. Ab’eishe-emwe bagyenzi baabo baabakiira kandi babaha obuhwezi.
