1. Yehova naahiga abaheereza be kukora ki? (Reeba n’ekishushani.)

 NITUBAASA kuhungira ahari oha twaba nitwenda obuhabuzi n’okuhuumurizibwa? Nitumanya eky’okugarukamu ky’ekibuuzo ekyo. Nitubaasa kushaba Yehova Ruhanga. Yehova nikyo arikutuhiga kukora. Naayenda ngu ‘tumushabe obutoosha.’ (1 Tes. 5:17) Nitubaasa kugamba nawe tutatiinire kandi tumushabe kutuhabura omu buri mbeera. (Enf. 3:5, 6) Ahabw’okugira ngu Yehova Ruhanga n’efura, tarikututeeraho bugarukiro aha mirundi ei twine kumushaba.

2. Nituza kugamba ahari ki omu kicweka eki?

² Nitutwara okushaba nk’ekiconco ky’omuhendo. Kwonka ahabw’okugira bingi by’okukora nitubaasa kugumirwa kutunga obwire bw’okushaba. Kandi nikibaasa kutwetengyesa kwongyera aha mutindo gw’okushaba kwaitu. Ekirungi, nitubaasa kutunga obuhwezi n’obuhabuzi omu Byahandiikirwe. Omu kicweka eki, nituza kureeba oku turikubaasa kugira obwire bw’okushaba turikwegyera ahari Yesu. Nituza n’okureeba ebintu bitaano bikuru ebi turikubaasa kugambaho omu kushaba kwongyera aha mutindo gw’okushaba kwaitu.

3. Yesu akaba naamanya ki aha bikwatiraine n’okushaba?

³ Yesu akaba naamanya ngu Yehova naatwara okushaba nka kikuru. Ira munonga, Yesu atakaizire omu nsi akaba naareeba  oku Yehova yaabaire naagarukamu okushaba kw’abashaija n’abakazi abeesigwa. Nk’eky’okureeberaho, Yesu akaba ari aha rubaju rwa Ishe obu yaagarukamu okushaba okwabaire nikuruga aha mutima okwa Haana, Daudi, Eliya n’abandi baingi. (1 Sam. 1:10, 11, 20; 1 Bag. 19:4-6; Zab. 32:5) Niyo nshonga ahabw’enki yaayegyeise abeegi be kushaba obutoosha baine obwesigye ngu naaza kubagarukamu.—Mat. 7:7-11.

4. Nitwegyera ki aha kushaba kwa Yesu?

⁴ Yesu akateeraho abeegi be eky’okureeberaho ky’okutooreza, arikushaba Yehova. Yesu akaba naakira kushaba omu buheereza bwe bwona. Akaba aine kugira obwire bw’okushaba ahakuba akaba naakira kuba aine bingi by’okukora kandi ashagatiirwe abantu baingi. (Mak. 6:31, 45, 46) Akaba aimuka kare omu kasheeshe kubaasa kwehereera kushaba. (Mak. 1:35) Eizooba rimwe, akashaba ekiro kyona atakacwiremu aha nshonga nkuru. (Luk. 6:12, 13) Kandi Yesu akashaba emirundi mingi aha kiro eki yaakwatiirweho arikuza kuhendera obujunaanizibwa obwabaire bugumire omu obuheereza bwe omu nsi.—Mat. 26:39, 42, 44.

5. Nitubaasa kutooreza tuta Yesu aha bikwatiraine n’okushaba?

⁵ Nitwegyera ahari Yesu ngu n’obu twakuba twine bingi by’okukora, twine kugira obwire bw’okushaba. Nka Yesu, ni kikuru kugira obwire bw’okushaba omu kasheeshe kare nari omu shaaha z’omwabazyo. Twakora tutyo, nitworeka ngu nitusiima ekiconco eki eky’omutaano. Munyaanyazi-itwe orikwetwa Lynne naijuka oku yaakwatsirweho ku yaayegire ebirikukwata aha mugisha gw’okushaba. Naagira ati: “Ku naamanyire ngu nimbaasa kugamba na Yehova obwire bwona, kikampwera kumutwara nka munywani wangye ow’aha mara n’okwongyera kuboneza omu kushaba kwangye.” Hatariho kubangaanisa baingi omuriitwe nitwehurira tutyo. Ka twetegyereze enshonga itaano ezi turikubaasa kugambaho omu kushaba.

6. Kurugiirira aha Okushuuruurwa 4:10, 11, niki eki ekishemereire Yehova?

⁶ Himbisa Yehova. Omu kworekwa, entumwa Yohaana akareeba abakuru 24 omu  iguru barikuramya Yehova. Bakahimbisa Ruhanga barikugira ngu ashemereire “kuhimbisibwa n’okuheebwa ekitiinisa n’obushoboorozi.” (Shoma Okushuuruurwa 4:10, 11.) Baamaraika abeesigwa nabo baine enshonga nyingi ezirikubareetera kuhimbisa Yehova n’okumuhaisa ekitiinisa. Nibatuura omu iguru nawe kandi nibamumanya gye. Nibareeba emitwarize ye erikworekyerwa omu bi arikukora. Ku barikureeba oku Yehova arikutwaza, nikibahiga kumuhimbisa.—Yob. 38:4-7.

7. Ni nshonga ki ezirikutureetera kuhimbisa Yehova?

⁷ Naitwe nitwenda kuhimbisa Yehova omu kushaba kwaitu, turikugamba ebi turikumukundaho n’ebi turikumusiimira. Waaba nooshoma Baibuli kandi orikugyeyegyesa, teeraho kureeba emitwarize ya Yehova erikukushemeza. (Yob. 37:23; Rom. 11:33) Gambira Yehova omu kushaba oku emitwarize egyo erikukureetera kwehurira. Kandi nitubaasa kuhimbisa Yehova ahabw’okutuhwera otwariiremu n’eka yaitu yoona ey’omwoyo. Butoosha naatureeberera kandi naaturinda.—1 Sam. 1:27; 2:1, 2.

8. Ni bintu ki bimwe ebirikutureetera kusiima Yehova? (1 Abatesalonika 5:18)

⁸ Siima Yehova. Twine bingi ebi turikubaasa kusiimira Yehova omu kushaba. (Shoma 1 Abatesalonika 5:18.) Nitubaasa kumusiima ahabw’ebintu birungi ebi twine, ahakuba ebirungi byona nibiruga ahariwe. (Yak. 1:17) Nk’eky’okureeberaho, nitubaasa kumusiimira ensi nungi n’ebintu ebirikutangaaza ebi yaahangire. Nitubaasa n’okumusiima ahabw’amagara, eka yaitu, abanywani, n’amatsiko gaitu. Kandi nitwenda kusiima Yehova ahabw’okutwikiriza kugira omukago murungi nawe.

9. Ahabw’enki twine kuteeraho kusiima Yehova?

⁹ Buri omwe nikibaasa kumwetengyesa kuteeraho kuteekateeka aha nshonga ezi aine kusiimira Yehova. Abantu baingi obunaku obu n’entasiima. Nibata omutima aha bi barikwenda, omu mwanya gw’okuguta aha ki bashemereire kukora kworeka ngu nibasiima ebi baine. Twatandika kugira emiteekateekyere nk’egyo, okushaba kwaitu nikubaasa kuba nk’okushabiiriza. Kubaasa kwetantara ekyo kubaho, twine kugumizamu nituteeraho kworeka ngu nitusiima Yehova ahabwa byona ebi atukoreire.—Luk. 6:45.

10. Munyaanyazi-itwe akagasirwa ata ahabw’okushaba arikworeka okusiima? (Reeba n’ekishushani.)

¹⁰ Twayemanyiiza kusiima nikituhwera kwemera embeera zigumire. Teekateeka aha ky’okureeberaho kya Kyung-sook, ekiri omu Munaara gw’Omurinzi ogwa Jenwari 15, 2015. Akaceberwa yaashangwa aine ekookoro y’ebihaha. Naagira ati:“Embeera egi ekandeetera kuhwamu amaani. Nkeehurira nk’ofeereirwe buri kimwe kandi nkatiina munonga.” Niki ekyamuhweraire kugumisiriza? Naagira ngu buri kiro atakabyamire, akaba aza aha mutwe gw’enju yaabo reero  ashaba omu iraka ririkuhurirwa arikugambira Yehova ebintu bitaano ebi arikumusiimira izooba eryo. Eki kikaba kimuhwera kuterarikirira ekirenga kandi kimuhiga kworeka ngu naakunda Yehova. Akareeba oku Yehova arikureeberera abaheereza be abeesigwa bahikwaho embeera zigumire, kandi akeetegyereza ngu nibatunga ebirungi ebirikukirira kimwe oburemeezi obu barikurabamu. Nka Kyung-sook, twine bingi by’okusiimira Yehova n’obu twakuba twine oburemeezi. Twashaba turikusiima, nikibaasa kutuhwera kugumisiriza n’okuguma twikaikaine.

11. Ahabw’enki Yesu ku yaagarukire omu iguru abeegi be baabaire baine kugira obumanzi?

¹¹ Shaba Yehova kukuha obumanzi omu kubuurira. Yesu atakagarukire omu iguru, akaijutsya abeegi be obujunaanizibwa bw’okuba baakareebi be “omuri Yerusaalemu, n’omuri Buyudaaya yoona, n’omuri Samaria, n’okuhitsya aha muheru gw’ensi.” (Byak. 1:8; Luk. 24:46-48) Bwanyima y’obwire bukye, abeebembezi b’ediini y’Ekiyudaaya bakakwata entumwa Petero na Yohaana baabatwara omu Ishengyero baabeehanangiriza kurekyera aho kubuurira kandi baabatiinatiinisa. (Byak. 4:18, 21) Petero na Yohaana bakatwaza bata?

12. Kurugiirira aha Ebyakozirwe 4:29, 31, abeegi bakakora ki?

¹² Petero na Yohaana bakagarukamu abeebembezi b’ediini y’Ekiyudaaya abaabatiinatiiniise bati: “Ku kiraabe kihikire omu maisho ga Ruhanga kuhurira imwe okukira Ruhanga, naimwe mukireebe, kwonka itwe titurikubaasa kuhunama kutagamba ebi twareebire, n’ebi twahuriire.” (Byak. 4:19, 20) Petero na Yohaana ku baarekwirwe, abeegi abandi bakashaba Yehova kubahwera kukora ebi arikukunda. Bakashaba bati: “Obaasise abahuuku baawe kugamba ekigambo kyawe n’obumanzi bwona.” Kandi Yehova akagarukamu okushaba okwo.—Shoma Ebyakozirwe 4:29, 31.

13. Nitubaasa kwegyera ki aha ky’okureeberaho kya Jin-hyuk?

¹³ Nitubaasa kutooreza abeegi ba Yesu turikugumizamu nitubuurira n’obu ab’obushoboorozi baakuturagiira kurekyera aho. Teekateeka aha ky’okureeberaho kya Jin-hyuk, ow’eishe-emwe owaakomirwe ahabw’okutejwanzya omu by’obutegyeki. Obu yaabaire ari omu kihome, akaheebwa obujunaanizibwa bw’okureeberera abasibe abaabaire bakomirwe bonka omu bushengye bukye, kwonka atarikwikirizibwa kugamba nabo aha nshonga endiijo yoona etaine kakwate n’obujunaanizibwa bwe, otwariiremu okugamba ahari Baibuli. Akashaba obumanzi bw’okubuurira amazima n’obwegyendesereza yaatunga akagisha. (Byak. 5:29) Naagira ati: “Yehova akagarukamu okushaba kwangye arikumpa obumanzi n’obwengye bw’okutandika abeegi baingi ab’edakiika itaano aha muryango gwa buri kashengye. Reero omu kiro nkaba mpadiika amabaruha g’okubaha omu kasheeshe.” Nka Jin-hyuk, nitubaasa kushaba Yehova kutuha obumanzi n’obwengye, twine obwesigye ngu naija kutuhwera kuhikiiriza obuheereza bwaitu.

14. Niki ekirikubaasa kutuhwera kwemera oburemeezi? (Zaaburi 37:3, 5)

¹⁴ Shaba Yehova kukuhwera kugumisiriza oburemeezi. Baingi omuriitwe nitubonabona ahabw’okurwara, oburemeezi omu nyehurira, okufeerwa omukundwa, embeera mbi omuka, okuhiiganisibwa, nari ahabw’oburemeezi obundi. Kandi ebigwererezi n’entaro bireetaire abantu kugumirwa kwemera  oburemeezi obu. Gambira Yehova kyona ekikuri aha mutima. Mugambire embeera ezi orikurabamu nk’orikugamba na munywani waawe ow’aha mara. Gira obwesigye ngu Yehova naija kukora ekiraakuhwere.—Shoma Zaaburi 37:3, 5.

15. Okushaba nikutuhwera kuta ‘kugumisiriza omu busaasi’? Ha eky’okureeberaho.

¹⁵ Okuguma nitushaba nikituhwera ‘kugumisiriza omu busaasi.’ (Rom. 12:12) Yehova naamanya ebi abaheereza be barikurabamu kandi ‘naahurira okutaka kwabo.’ (Zab. 145:18, 19) Payoniya ow’emyaka 29 orikwetwa Kristie akeetegyereza ngu ekyo kihikire. Akagira endwara z’amaani kitaraariire. N’ekyarugiremu akagira amaganya maingi. Bwanyima, akamanya ngu nyina aine endwara erikubaasa kumwita. Kristie naagira ati: “Nkashaba munonga Yehova kumpa amaani g’okuhama buri izooba. Nkateeraho kuhamira aha ntebeekanisa yangye y’eby’omwoyo ndikuza omu nteerane kandi ndikweyegyesa.” Naayongyeraho ati: “Okushaba kukampwera kugumisiriza oburemeezi bwangye. Nkaba niimanya ngu Yehova naaba ayeteekateekire kumpwera kandi ekyo kikaba kindeetera kwehurira gye. N’obu ndaabe ntarakizire ahonaaho, Yehova akahurira okushaba kwangye arikumpa obusingye bw’omu mutima n’okwikaikana.” Ka tugume nitwijuka ngu Yehova “naamanya kukiza abarikumutiina omu kugyezibwa.”—2 Pet. 2:9.

16. Ahabw’enki nitwenda obuhwezi bwa Yehova kubaasa kwangira okwohibwa?

¹⁶ Shaba Yehova kukuhwera kwangira okwohibwa. Ahabw’okugira ngu tituhikiriire, butoosha nikiba kitoorobi kukora ekihikire. Sitaane naakora kyona ekirikubaasika kutureeta kugumirwa kukora ekihikire. Omuringo gumwe oku arikuteeraho kushiisha emiteekateekyere yaitu n’okurabira omu by’okweshemeza ebitashemeire. Eby’okweshemeza eby’omuringo nk’ogwo nibishiisha emiteekateekyere yaitu, omuntu waitu ow’omunda  kandi nibibaasa kutureetera kukora ekibi ky’amaani.—Mak. 7:21-23; Yak. 1:14, 15.

17. Twine kukora ki, bwanyima y’okushaba kwetantara okwohibwa? (Reeba n’ekishushani.)

¹⁷ Nituba twine kuhwerwa Yehova twaba kubaasa kusingura okwohibwa kukora ekibi. Omu kushaba kw’eky’okureeberaho, Yesu akagamba ebigambo ebi: “Otatutwara omu kwohibwa kureka otujune omubi.” (Mat. 6:13) Yehova naayenda kutuhwera, kwonka twine kumushaba obuhwezi. Kandi twine kukora ebirikuhikaana n’okushaba kwaitu. Nitubaasa kukora ekyo turikwetantara ebirikubaasa kutureetera kugira emiteekateekyere etahikire eijwire omu nsi ya Sitaane. (Zab. 97:10) Nitubaasa kuta omu biteekateeko byaitu ebintu birungi turikushoma kandi tukeeyegyesa Baibuli. Okwejumba omu nteerane n’okuza omu kubuurira nakyo nikirinda ebiteekateeko byaitu. Kandi Yehova naaturaganisa ngu tarikwija kutureka kugyezibwa eki tutarikubaasa kwemera.—1 Kor. 10:12, 13.

18. Niki eki twena twine kukora aha bikwatiraine n’okushaba?

¹⁸ Buri omwe ahariitwe aine kwongyera kushaba kubaasa kuguma ari omwesigwa ahari Yehova omu biro by’emperu ebi ebigumire. Buri izooba gira obwire bw’okushaba oyihire aha mutima. Yehova naayenda ngu twaba nitushaba tumugambire byona ebi turi aha mutima. (Zab. 62:8) Himbisa Yehova kandi omusiime ahabwa byona ebi arikukora. Mushabe kukuhwera kugira obumanzi omu kubuurira. Mweshengyereze kukuhwera kwemera oburemeezi n’okwangira okwohibwa okw’emiringo yoona. Otaikiriza ekintu kyona kukuremesa kushaba Yehova butoosha. Kwonka shi, Yehova naagarukamu ata okushaba kwaitu? Nituza kugarukamu ekibuuzo kikuru ekyo omu kicweka ekirikukurataho.