1. Baibuli neeshoboorora eta rukundo eyaabuzima?

 “ENDIMI [za rukundo] nizityankana, [nk’endimi ‘z’omuriro’ gwa Yehova]. Amaizi maingi tigarikubaasa kuraaza rukundo, n’emyegyemure tekaagimira.” b (Kyesh. 8:6, 7) Egi ka n’enshoboorora nungi ya rukundo! Ebigambo ebi nibihamiza abari omu bushwere ngu nibabaasa kugirirana rukundo etarikuhwaho.

2. Abari omu bushwere baine kukora ki kuhamya rukundo yaabo?

² Abari omu bushwere baine kuteeraho kugirirana rukundo etarikuhwaho. Nk’eky’okureeberaho, omuriro kubaasa kuguma nigwaka, nooba oine kwongyeramu enku. Ekyo waaba otakikozire, niguraara. Nikyo kimwe, omushaija n’omukazi kubaasa kuguma nibakundana, nibaba baine kuhamya omukago gwabo. Obumwe, nibabaasa kwetegyereza ngu rukundo yaabo eriyo neetuuba, na munonga baaba baine oburemeezi omu by’entaatsya, amagara mabi, nari baaba nibeerarikirira aha ku barayorore abaana. Waaba ori omu bushwere, noobaasa kukora ki kuguma oine rukundo eri nk’endimi ‘z’omuriro’ gwa Yehova? Omu kicweka eki, nituza kureeba ebintu bishatu ebi oine kukora kubaasa kugira rukundo ehami n’obushwere burungi. c

3. Abari omu bushwere baagira omukago guhami na Yehova nikibahwera kita kwongyera kukundana? (Omubuurizi 4:12) (Reeba n’ekishushani.)

³ Endimi ‘z’omuriro’ gwa Yehova kubaasa kuguma nizaaka omushaija n’omukazi we baine kukora n’amaani kuhamya omukago gwabo na Yehova. Eki nikibahwera kita omu bushwere  bwabo? Abari omu bushwere baaba baine omukago guhami na Ishebo ow’omu iguru, nibagyendera aha buhabuzi bwe ahonaaho reero kibahwera kwetantara n’okusingura oburemeezi oburikubaasa kutuubya rukundo yaabo. (Shoma Omubuurizi 4:12.) Abantu b’eby’omwoyo nibateeraho kutooreza Yehova n’okugira emitwarize nk’eye, nk’embabazi, okugumisiriza, n’okusaasirana. (Efe. 4:32–5:1) Omushaija n’omukazi baagira emitwarize nk’egi nibongyera kukundana. Munyaanyazi-itwe orikwetwa Lena, omazire omu bushwere emyaka erikurenga 25, naagira ati: “Kyorobi kukunda n’okuha ekitiinisa omuntu w’eby’omwoyo.”

4. Ahabw’enki Yehova yaatooraine Yosefu na Mariamu kuba abazaire ba Mesia owaaraganisiibwe?

⁴ Teekateeka aha ky’okureeberaho ky’omu Baibuli eki. Obu Yehova yaatoorana omushaija n’omukazi kuba abazaire ba Mesia owaaraganisiibwe omuri baijukuru ba Daudi boona, akatooranamu Yosefu na Mariamu. Ahabw’enki? Ahakuba bombi bakaba baine omukago murungi na Yehova, kandi akaba naamanya ngu rukundo ei bamwiniire neija kubahwera kugira obushwere burungi. Abari omu bushwere, nimubaasa kwegyera ki ahari Yosefu na Mariamu?

5. Emitwe y’amaka nibabaasa kwegyera ki ahari Yosefu?

⁵ Yosefu akaba naagyendera aha buhabuzi bwa Yehova, niyo nshonga ahabw’enki yaabaire nyineeka murungi. Yehova akamuha obuhabuzi emirundi eshatu oburikukwata aha ka ye. Buri murundi, akooroba ahonaaho, nangwa n’obu kyabaire kigumire. (Mat. 1:20, 24; 2:13-15, 19-21) Ahabw’okugira ngu Yosefu akoorobera obuhabuzi bwa Ruhanga akarinda Mariamu, yaamureeberera kandi yaamushagika. Ekyo ka kyareeteire Mariamu kwongyera kukunda Yosefu n’okumuha ekitiinisa! Emitwe y’amaka, nimubaasa kutooreza Yosefu murikusherura obuhabuzi omu Baibuli oburikworeka oku murikubaasa kureeberera amaka gaanyu. d Waagyendera aha buhabuzi obu, n’obu kyakuba nikitwariramu okukora empinduka, nikyoreka ngu nookunda omukazi waawe kandi nikihamya obushwere bwanyu. Munyaanyazi-itwe orikutuura Vanuatu, omazire emyaka erikurenga 20 omu bushwere naagira ati: “Ibanyi ku arikusherura obuhabuzi bwa Yehova kandi akabugyenderaho, ninyongyera kumuha ekitiinisa. Nimpurira nyine oburinzi kandi ninyesiga ebi arikucwamu.”

6. Abakazi nibabaasa kwegyera ki ahari Mariamu?

⁶ Mariamu akaba aine omukago murungi na Yehova, kandi okwikiriza kwe kukaba kutarikwegamira aha bi Yosefu yaabaire naakora. Akaba naamanya gye Ebyahandiikirwe. Kandi akaba agira obwire bw’okubiteekateekaho. (Luk. 2:19, 51) Omukago murungi  ogu Mariamu yaabaire aine na Yehova gukamureetera kuba omukazi w’omuhendo. Hati, abakazi baingi nibateeraho kumutooreza. Nk’eky’okureeberaho, Munyaanyazi-itwe Emiko naagira ati: “Ntakagiire mu bushwere, nkaba nyine entebeekanisa y’eby’omwoyo. Kwonka ku naabugiiremu, nkareeba ngu ibanyi niwe yaabaire naatujwekyera omu kushaba kandi arikwebembera okuramya, okwikiriza kwangye kukaba nikwegamira aha bi yaabaire naakora. Nketegyereza ngu nyine kugira eki naakora kuhamya omukago gwangye na Yehova. N’ahabw’ekyo hati niintaho obwire bw’okuba na Ruhanga wangye ndikumushaba, nkashoma Ebyahandiikirwe kandi nkabiteekateekaho.” (Gal. 6:5) Abakazi, mwagumizamu nimuhamya omukago gwanyu na Yehova, abashaija baanyu nibaija kwongyera kubeesiimisa n’okubakunda.—Enf. 31:30.

7. Abari omu bushwere nibabaasa kwegyera ki ahari Yosefu na Mariamu aha bikwatiraine n’okuramya hamwe?

⁷ Yosefu na Mariamu bakaba nibakorera hamwe kubaasa kuguma baine omukago guhami na Yehova. Bakaba nibamanya obukuru bw’okuramiza hamwe Yehova nk’eka. (Luk. 2:22-24, 41; 4:16) Nikibaasa kuba kyabaire kitoorobi na munonga eka ku yaayongyeire kuba mpango, kwonka bakakikora. Ekyo ka n’eky’okureeberaho kirungi aha bari omu bushwere obunaku obu! Nka Yosefu na Mariamu, waaba oine abaana nikibaasa kuguma kuza omu nteerane nari kutunga obwire bw’okuramya kw’eka. Kandi iwe n’ou ori nawe omu bushwere nimubaasa n’okuburwa obwire bw’okweyegyesa n’okushaba hamwe. Kwonka, ijuka ngu mwaramiza hamwe Yehova nimwongyera kumwirira haihi n’omukago gwanyu niguhama. N’ahabw’ekyo mwebembeze okuramya Yehova.

8. Abari omu bushwere baagira oburemeezi nibabaasa kugasirwa bata omu bwijwire omu kuramya kw’eka?

⁸ Kandi shi ku mwakuba mwine oburemeezi omu bushwere? Obuhabuzi bw’okugira okuramya kw’eka nibubaasa kureebeka nk’obutarikukora. Ku kiraabe nikwo kiri, tandika n’ekintu kigufu kandi ekirikushemeza eki mwembi murikwikirizanaho. Eki nikibaasa kubahwera kuhamya omukago gwanyu n’okugira ekihika ky’okwejumba hamwe omu by’omwoyo.

9. Ahabw’enki omushaija n’omukazi we baine kugira obwire bw’okuba hamwe?

⁹ Abari omu bushwere, nimubaasa kuhamya rukundo yaanyu mwamara obwire hamwe. Mwakora mutyo buri omwe naija kufayo aha nyehurira za mugyenzi we. (Kut. 2:24) Yetegyereze eki Lilia na Ruslan baayetegyereize obu baataaha omu bushwere emyaka nka 15 enyima. Naagira ati: “Tukareeba ngu titurikwija kutunga obwire bwingi bw’okuba hamwe nk’oku twabaire nituteekateeka. Tukaba twine bingi by’okukora aha murimo, omuka n’okureeberera abaana. Tukamanya ngu twaba tutatungire obwire bw’okuba hamwe, rukundo yaitu neebaasa kutuuba.”

10. Abari omu bushwere nibabaasa kugyendera bata aha musingye oguri omu Abaefeso 5:15, 16?

¹⁰ Abari omu bushwere baine kukora ki kubaasa kumara obwire hamwe? Nikibaasa kubeetengyesa kutaho obwire bw’okuba hamwe. (Shoma Abaefeso 5:15, 16.) Ow’eishe-emwe Uzondu kuruga Nigeria naagira ati: “Naaba ninkora entebeekanisa y’emirimo yangye, niintaho obwire bw’okuba n’omukazi wangye, kandi nimbutwara nka bukuru.” (Fil. 1:10) Yetegyereze oku Anastasia, muka omureeberezi wa saketi kuruga Moldova, arikukoresa obwire bwe. Naagira ati:  “Niinteeraho kukora emirimo yangye ibanyi yaaba naakora emirimo y’ekibiina. Bwanyima tugira obwire bw’okuba hamwe.” Kwonka shi entebeekanisa zaanyu ku zaakuba nizibareetera kugumirwa kutunga obwire bw’okuba hamwe?

11. Akula na Priskila bakeejumba mu mirimo ki hamwe?

¹¹ Abari omu bushwere nibabaasa kwegyera ahari Akula na Priskila, abaabaire nibasiimwa Abakristaayo baingi b’ekyasha ky’okubanza. (Rom. 16:3, 4) N’obu Baibuli eraabe etarikugamba bingi aha bushwere bwabo, neeyoreka ngu bakaba nibakora hamwe aha murimo,omu kubuurira, n’omu kuhwera abandi. (Byak. 18:2, 3, 24-26) Niyo nshonga ahabw’enki Akula na Priskila, butoosha nibagambwaho hamwe omu Baibuli.

12. Omushaija n’omukazi baine kukora ki kubaasa kugira obwire bw’okuba hamwe? (Reeba n’ekishushani.)

¹² Abari omu bushwere nibabaasa kutooreza bata Akula na Priskila? Teekateeka aha bintu bingi ebi iwe n’omukundwa waawe mwine kukora. Mbwenu shi nimubaasa kubikora hamwe, omu mwanya gw’okubikora wenka? Nk’eky’okureeberaho, Akula na Priskila bakaba nibabuurira hamwe. Mbwenu shi nimukira kutebeekanisa kukora nikyo kimwe? Akula na Priskila nabo bakaba nibakora hamwe. Iwe n’omukazi waawe nimubaasa kuba nimukora emirimo y’okwebaisaho etarikushushana, kwonka nimubaasa kukora hamwe emirimo y’aha ka. (Mub. 4:9) Mwakora hamwe emirimo egyo, nimwongyera kuba nka tiimu n’okugira obwire bw’okugaaniira. Robert na Linda batwire omu bushwere emyaka erikurenga 50. Robert naagira ati: “Amazima gari ngu, titwine bwire bwingi bw’okwejumba hamwe omu by’okweshemeza. Kwonka ku ndikwozya ebintu omukazi wangye akabisiimura nari naaba niinyombera reero akanyegaitaho, ninshemererwa. Ku turikukora hamwe emirimo nitugira obumwe kandi nitwongyera kukundana.”

13. Omushaija n’omukazi we baine kukora ki kubaasa kugira obumwe?

¹³ Ijuka ngu, okuba hamwe nikibaasa kutabareetera kugira omukago guhami. Omukazi kuruga Brazil naagira ati: “Ebiro ebi, obu twine bingi ebirikuhuzya, nyetegyereize ngu nitubaasa kugwa omu mutego gw’okuteekateeka ngu nitumara obwire bwingi hamwe ahabw’okugira ngu nitutuura hamwe. Kwonka nyegire ngu nyine kukora ekirikukira aha kutuura hamwe na ibanyi, nyine kumara obwire nawe.” Yetegyereze oku Bruno n’omukazi we, Tays, barikufayo kugira obwire hamwe. Naagira ati: “Obu turikuba tuhumwireho, esimu nituzita hangahari kubaasa kuba hamwe omu bwire obwo.”

14. Omushaija n’omukazi we baaba batarikukunda kumara obwire hamwe, baine kukora ki?

¹⁴ Kwonka shi iwe n’omukazi waawe ku mwakuba mutarikukunda kumara obwire  hamwe? Obundi nimukunda ebintu bitarikushushana nari buri omwe naakora ebirikugwisa kubi mugyenzi we. Nimubaasa kukora ki? Teekateeka aha ky’okureeberaho ky’omuriro ekyagambwaho aha kutandika. Tigurikwaka ahonaaho. Nooba oine kuguma nooyongyeramu enku mporampora. Nikyo kimwe, nimubaasa kutandika murikuba hamwe obwire bukye buri izooba. Muteeraho kukora ekintu eki murikukunda mwembi ekitarareeteho obutaikirizana. (Yak. 3:18) Okukora ebintu bikye ebyo, nikibaasa kuhwera omu kugaruraho rukundo yaanyu.

15. Ahabw’enki ni kikuru abari omu bushwere kuhaana ekitiinisa?

¹⁵ Ni kikuru kuhaana ekitiinisa omu bushwere. Ekitiinisa kiri nk’omwoya oguturikwitsya ogurikubaasisa omuriro kuguma nigwaka. Haaba hatariho omwoya ogwo, omuriro niguraara ahonaaho. Nikyo kimwe, haaba hatariho okuhaana ekitiinisa, rukundo y’abari omu bushwere neehora. Kwonka abari omu bushwere baateeraho kuhaana ekitiinisa rukundo yaabo neeyongyera kuhama. Kandi ijuka ngu tikirikurugirira aha ku orikuteekateeka ngu noomuha ekitiinisa kureka nikirugiirira aha ku omukundwa waawe arikwehurira. Penny na Aret bamazire emyaka 25 omu bushwere. Penny naagira ati: “Ahabw’okugira ngu nituhaana ekitiinisa twine okushemererwa omu ka yaitu. Nitugamba enyehurira zaitu tutatiinire ahabw’okugira ngu eki buri omwe ahariitwe arikugamba nitukitwara nka kikuru.” Mbwenu shi noobaasa kukora ki kureetera omukundwa waawe kuhurira ngu naaheebwa ekitiinisa? Teekateeka aha ky’okureeberaho ky’Abrahamu na Saara.

16. Abashaija nibabaasa kwegyera ki ahari Abrahamu? (1 Petero 3:7) (Reeba n’ekishushani.)

¹⁶ Abrahamu akaba naatwariza Saara omu muringo gw’ekitiinisa. Akaba amuhurikiza yaaba aine eki arikugamba kandi afayo aha nyehurira ze. Eizooba rimwe, Saara akaba aine obusaasi, kandi akagambira Abrahamu enyehurira ze, nangwa yaamucwera n’orubanja. Mbwenu shi Abrahamu akarahuka kuguubwa kubi? Ngaaha. Akaba naamanya ngu Saara n’omukazi orikworoba kandi orikumushagika. Abrahamu akamuhurikiza kandi yaateeraho kushoboorora oburemeezi obwabaire buriho. (Kut. 16:5, 6) Eky’okwega? Abashaija, mwine obujunaanizibwa bw’okucwamu aha nshonga z’amaka gaanyu. (1 Kor. 11:3) Kwonka, otakacwiremu oine kubanza waamanya eky’omukazi waawe arikuteekateeka aha nshonga, na munonga eki orikuza kucwamu kyaba nikimukwataho. (1 Kor. 13:4, 5) Obumwe, omukazi waawe naabaasa kuba aine obusaasi kandi arikwenda kugamba oku arikwehurira. Mbwenu shi noofayo aha nyehurira ze orikumuhurikiza? (Shoma  1 Petero 3:7.) Angela na Dmitry bamazire omu bushwere emyaka nka 30. Naashoboorora oku omushaija we arikumutwariza omu muringo gw’ekitiinisa arikugira ati: “Butoosha Dmitry naampurikiza naaba ngwirwe kubi nari naaba nyine eki ndikumugambira. Naangumisiriza, n’obu ndikugamba oku ndikwehuria nyine ekiniga.”

17. Abakazi nibeegyera ki ahari Saara? (1 Petero 3:5, 6)

¹⁷ Saara akaba naaha Abrahamu ekitiinisa arikushagika ebi yaabaire acwamu. (Kut. 12:5) Eizooba rimwe, Abrahamu akacwamu kukunira abagyenyi abaizire kitaraariire. Akagambira Saara ngu arekye ebi yaabaire naakora atebeekanise emigaati. (Kut. 18:6) Saara akakora ekyo ahonaaho yaashagika Abrahamu. Abakazi, nimubaasa kutooreza Saara murikushagika abashaija baanyu baagira ebi baacwamu. Mwakora ekyo, nimuhamya obushwere bwanyu. (Shoma 1 Petero 3:5, 6.) Dmitry, ou twagambaho aha ruguru, naashoboorora oku omukazi we arikworeka ngu naamuha ekitiinisa. Naagira ati: “Ninsiima omukazi wangye Angela ahabw’okunshagika omu bi ndikucwamu, n’obu birikuba nibitaana n’eki arikwenda. Ebirikurugamu byaba bitabaire birungi, tarikuncwera rubanja.” Ka nikyoroba kukunda omuntu orikukuha ekitiinisa!

18. Abari omu bushwere nibagasirwa bata baaguma nibahamya rukundo yaabo?

¹⁸ Obunaku obu, Sitaane naayenda kumariraho kimwe rukundo eri omu bushwere bw’Abakristaayo. Naamanya ngu abari omu bushwere baaba batarikukundana, nibabaasa kutandika kuruga ahari Yehova. Kwonka, rukundo eyaabuzima terikubaasa kumarwaho. N’ahabw’ekyo rukundo eri omu bushwere bwanyu, ka ebe nk’erikugambwaho omu kitabo ky’Ekyeshongoro kya Sulemaani! Mumaririire kwebembeza Yehova omu bushwere bwanyu, mugirirane obwire, kandi mufeyo aha nyehurira n’ebyetengo by’abakundwa baanyu. Mwakora mutyo, obushwere bwanyu nibwija kuhaisa Yehova ekitiinisa, Obukomooko bwa rukundo eyaabuzima, kandi nk’omuriro ogurikwongyerwamu enku, rukundo yaanyu neija kweyongyera ebiro byona.