1, 2. Twaguma nitutunguuka, nitweyongyera kwega bintu ki? Ha eky’okureeberaho.

TEEKATEEKA aha muntu arikuha omwana muto ekiconco. Abazaire b’omwana ogwo bamugira ngu, “mwebaze.” Yaakikora, naaba yaakikora ahabw’okugira ngu baamugambira eky’okukora. Kwonka omwana ogwo yaaguma naakura, naatandika kwetegyereza ahabw’enki abazaire be barikureeba ngu ni kikuru kusiima abandi baatukorera eby’embabazi. Bwanyima, eki nikimuhiga kwebaza abandi ahabwe ahakuba ayegire kworeka okusiima.

² Ekintu nk’ekyo kikatuhikaho. Obu twatandika kwega amazima, tukeega ngu ni kikuru kworobera ebiragiro bya Yehova ebirikutandikirwaho. Kwonka ku turikweyongyera kutunguuka, nitwega bingi ebirikukwata aha miteekateekyere ye, ekirikumanyisa ebi arikukunda, ebi arikwanga, n’oku arikureeba enshonga. Twaikiriza emiteekateekyere ya Yehova kutwebembera omu bi turikucwamu n’omu bi turikukora, nitugira emiteekateekyere nk’eye.

3. Ahabw’enki nikibaasa kutugumira kugira emiteekateekyere nk’eya Yehova?

 ³ N’obu turaabe nitukunda kwega kuteekateeka nka Yehova, obumwe kigumire kugira emiteekateekyere nk’eye ahakuba tituhikiriire. Nk’eky’okureeberaho, nitumanya emiteekateekyere ya Yehova ahaby’emicwe, eby’obugaiga, okubuurira, okukoresa kubi eshagama, n’ebindi bintu. Kwonka nikibaasa kutugumira kwetegyereza ahabw’enki naabireeba omu muringo ogwo. Mbwenu shi nitubaasa kweyongyera tuta kugira emiteekateekyere nk’eya Yehova? Kandi eki nikiija kutuhwera kita kukora ebihikire hati n’omu biro by’omumaisho?

4. Okugarurwa busya omu biteekateeko nikimanyisa ki?

⁴ Shoma Abarooma 12:2. Omu mushororongo ogu, entumwa Paulo akashoboorora eki twine kukora kubaasa kugira emiteekateekyere nk’eya Yehova. Akagira ngu titushemereire ‘kushushanisibwa n’ab’obusingye obu.’ Nk’oku twegire omu kicweka eky’enyima, eki nikimanyisa ngu tushemereire kwangira emiteekateekyere n’emitwarize y’ensi. Kwonka Paulo akagaruka yaagira ngu twine kugarurwa busya omu biteekateeko. Eki nikimanyisa ngu twine kweyegyesa Ekigambo kya Ruhanga, twetegyereze ebiteekateeko bye, tubiteekateekeho munonga, kandi tuteereho kugira emiteekateekyere nk’eye.

5. Shoboorora oku okweyegyesa kurikutaana aha kushoma?

⁵ Okweyegyesa nikikira aha kushoma obutumwa noorahutsya, nari kushaza aha by’okugarukamu by’ebibuuzo. Twayeyegyesa, nituteekateeka aha ku ebi twayega birikutuhwera kumanya Yehova, oku arikutwaza, n’emiteekateekyere ye. Nituteeraho kwetegyereza ahabw’enki Yehova naatugambira kukora ebintu ebimwe n’okwetantara ebindi. Kandi nitureeba n’ahu twine kukora empindahinduka omu mitwarize yaitu n’omu miteekateekyere yaitu. Buzima, buri kweyegyesa titurikubaasa kuteekateeka aha nshonga ezo zoona. Kwonka ni kirungi kumara obwire turikuteekateeka aha bi twayega, obundi nka kimwe kya kabiri ky’obwire bw’okwega kwaitu.​—Zaaburi 119:97; 1 Timoseo 4:15.

6. Niki ekirikubaho twateekateeka aha Kigambo kya Ruhanga?

⁶ Haine ekintu kirungi ekirikubaho twaba nitukira kuteekateeka aha Kigambo kya Ruhanga. Nitwetungira obuhame nari twamanyira tutaine kubangaanisa ngu emiteekateekyere ya Yehova ehikiriire. Nitutandika kwetegyereza omuringo ogu Yehova arikureebamu enshonga, empereeruka emiteekateekyere yaitu neehikaana n’eye. Nituhindura ebiteekateeko byaitu, kandi tutandika kuteekateeka omu muringo musya. Mporampora, nitutandika kugira emiteekateekyere nk’eya Yehova.

7, 8. (a) Yehova naareeba ata eby’obugaiga? (Reeba ebishushani aha kutandika.) (b) Twaba nitureeba eby’obugaiga nk’oku Yehova arikubireeba, niki eki turikwija kuguma nitutwara nka kikuru?

⁷ Ebi turikuteekateekaho nibyo turikukora. (Mako 7:21-23; Yakobo 2:17) Ka tureebe eby’okureeberaho bimwe ebirikushoboorora enshonga egi. Eky’okubanza, ekirikukwata aha kuzaarwa kwa Yesu, nikyoreka gye emiteekateekyere ya Yehova aha by’obugaiga. Ruhanga akatoorana Yosefu na Mariamu kuba nibo baayorora Omwana we n’obu baraabe baabaire bataine sente nyingi. (Abaleevi  12:8; Luka 2:24) Obu Yesu yaazaarwa, Mariamu, akamubyamya “omu nju y’amatungo, ahabw’okubura omwanya omu nju y’abagyenyi.” (Luka 2:7) Yehova kuri yaayenzire, akaba naija kuhamya ngu Omwana we yazaarirwa omu mwanya murungi munonga. Kwonka akaba naayenda ngu Yesu okurire omu ka erikwebembeza eby’omwoyo. Ekyo nikyo kyabaire kiri kikuru munonga ahari Yehova.

⁸ Eky’okureeberaho eki ekirikukwata aha kuzaarwa kwa Yesu, nikitworeka oku Yehova arikureeba eby’obugaiga. Abazaire abamwe nibenda abaana ngu baabo bagire ebintu birungi, n’obu ekyo kiraabe nikibaasa kushiisha omukago ogu baine na Yehova. Kwonka buzima, omukago ogu twine nawe nigwo arikutwara nka mukuru. Waikiriize emiteekateekyere ya Yehova aha nshonga egi? Ebikorwa byawe nibyoreka ki?​—Shoma Abaheburaayo 13:5.

9, 10. Nitubaasa kworeka tuta ngu nitureeba okuteeza abandi entsibo nk’oku Yehova arikukureeba?

⁹ Eky’okureeberaho ekindi nikyoreka oku Yehova arikureeba omuntu orikuteeza abandi entsibo, ekirikumanyisa orikureetera abandi kukora ekibi nari kubareetera kurekyera aho kuheereza Yehova. Yesu akagira ati: “Omuntu weena orireetera omwe ahari abo bato abarikuunyikiriza kukora ekibi, haakiri ogwo okubohwa orubengo omu bitsya, akanagwa omu nyanja.” (Mako 9:42) Ebi n’ebigambo by’amaani! Kandi nitumanya ngu Yesu aine emitwarize nk’eya Ishe. N’ahabw’ekyo nitubaasa kuhamya ngu Yehova tarikushemererwa omuntu yaateeza omukuratsi wa Yesu entsibo.​—Yohaana 14:9.

¹⁰ Okuteeza abandi entsibo nitukureeba nk’oku Yehova na Yesu barikukureeba? Oku turikutwaza nikworeka ki? Nk’eky’okureeberaho, nitubaasa kuba twine enjwara n’omuringo gw’okweboneza ogu turikukunda. Kwonka nitwija kutwaza tuta twamanya ngu nibigwisa kubi abamwe omu kibiina nari nibibareetera ebiteekateeko bibi by’okwenda kuteerana? Rukundo ei twiniire ab’eishe-emwe neija kutuhiga kureka ebi turikukunda?​—1 Timoseo 2:9, 10.

11, 12. Nitwerinda tuta twayanga ebi Yehova arikwanga tukagira n’omutwarize gw’okwezibira?

¹¹ Eky’okureeberaho kya kashatu: Yehova naayanga okukora kubi. (Isaaya 61:8) Buzima, naamanya ngu obumwe tikyorobi kukora ekihikire ahabw’okugira ngu tituhikiriire. Kwonka nabwo, naayenda ngu twangye ebibi nk’oku nawe arikubyanga. (Shoma Zaaburi 97:10.) Twateekateeka ahabw’enki Yehova naayanga ebibi, nikiija kutuhwera kugira emiteekateekyere nk’eye kitubaasise kwanga kukora ebibi.

¹² Twayega kwanga ebi Yehova arikwanga, nikiija kutuhwera kumanya ngu ebintu ebimwe ni bibi n’obu Baibuli yaakuba etarikubigambo butunu. Nk’eky’okureeberaho, enzina erikwitsa enshoni erikwetwa fundukuru (lap dancing) ehangire munonga omu nsi ebiro ebi. Abamwe nibareeba ngu ekikorwa eki tikyo kimwe n’okuteerana n’omuntu,  n’ahabw’ekyo nibateekateeka ngu ti kibi. * (Reeba obugambo obw’ahansi.) Kwonka buzima oku nikwo Yehova arikukireeba atyo? Ijuka ngu Yehova naayanga ebikorwa bibi eby’emiringo yoona. N’ahabw’ekyo ka tuteereho kwetantara ekintu kyona ekibi turikwega kwezibira n’okwanga eki Yehova arikwanga.​—Abarooma 12:9.

13. Ahabw’enki twine kuteekateeka aha ku Yehova arikureeba enshonga hati kugira ngu twije tucwemu gye?

¹³ Twayeyegyesa, tushemereire kuteekateeka aha ku Yehova arikureeba enshonga ahakuba eki nikituhwera kwija kucwamu gye. Reero twayeshanga omu mbeera ahu twine kucwamu ahonaaho, titurikwija kugwa omu kahuurukano. (Enfumu 22:3) Ka tushwijume eby’okureeberaho ebimwe kuruga omu Baibuli.

14. Oku Yosefu yaagarukiremu muka Potifaari nitukyegyeraho ki?

¹⁴ Obu muka Potifaari yaateeraho kushendashenda Yosefu, akamwangira ahonaaho. Hatariho kubangaanisa, Yosefu akaba atwire naateekateeka aha ku Yehova arikureeba obushwere. (Shoma Okutandika 39:8, 9.) Yosefu akagambira muka Potifaari ati: “Mbwenu nimbaasa nta kukora ekibi ekirikwingana kityo, n’okucumura ahari Ruhanga?” Eki nikyoreka ngu akaba aine emiteekateekyere nk’eya Yehova. Kandi shi iwe? Noija kukora ki ou orikukora nawe yaatandika kweshunga naiwe? Kandi shi omuntu ku yaakukwoherereza aha simu yaawe obutumwa, nari ebishushani ebirikukwata aha kuteerana butunu? * (Reeba obugambo obw’ahansi.) Twaba twamanyire emiteekateekyere ya Yehova aha nshonga ezimwe, turikugiikiriza, kandi twacwiremu eki turaakore, nikiija kutworobera kuhamira ahari Yehova.

15. Nitubaasa kuguma tuta turi abeesigwa ahari Yehova nk’oku Abaheburaayo bashatu baakozire?

¹⁵ Teekateeka aha ky’okureeberaho ky’Abaheburaayo bashatu Seduraaka, Mesaaki na Abedeneego. Obu Omugabe Nebukadeneeza yaabaragira kuramya ekishushani ky’ezaabu eki yaakozire, bakanga kukiramya. Oku baagarukiremu Omugabe batarikweziringa kikooreka ngu bakaba baateekateekire aha kirikubaasa kubaho baaguma bari abeesigwa ahari Yehova. (Okuruga 20:4, 5; Danieli 3:4-6, 12, 16-18) Kandi shi obunaku obu? Noobaasa kukora ki mukama waawe yaakushaba ngu oheeyo esente kushagika omukoro gw’ediini y’ebishuba? Omu mwanya gw’okutegyereza ekintu nk’eki kubaho, ni kirungi kuteekateeka hati oku Yehova arikureeba ebintu nk’ebyo. Reero, twahikwaho embeera nk’egyo, nikiija kutworobera kugamba ekihikire n’okukikora nk’oku Abaheburaayo bashatu baatwarize.

16. Okwetegyereza gye emiteekateekyere ya Yehova nikituhwera kita kwetebeekanisiza obujanjabi obw’ahonaaho?

 ¹⁶ Okugira emiteekateekyere nk’eya Yehova nikibaasa n’okutuhwera kuguma tumuhamireho, kyatwetengyesa kutunga obujanjabi ahonaaho. Hatariho kubangaanisa, twine kumariirira kwanga kuteebwamu eshagama yoona, nari ebicweka byayo bina ebikuru. (Ebyakozirwe 15:28, 29) Kwonka hariho emiringo y’okushemezibwa erikutwariramu eshagama, ei buri Mukristaayo aine kwecweramu arikwihirira aha misingye ya Baibuli. Ni ryari obu oine kucwamu eki oraakore? Mbwenu shi nookikora ori omu irwariro, obundi oine obusaasi kandi orikugyemeserezibwa kucwamu ahonaaho? Ngaaha buzima. Hati nibwo bwire bw’okucondooza, okaijuza kaada y’obujanjabi erikworeka gye eki turikwenda, kandi tukagaaniira n’omushaho. * (Reeba obugambo obw’ahansi.)

17-19. Ahabw’enki kiri kikuru okumanya emiteekateekyere ya Yehova hati? Ha eky’okureeberaho.

¹⁷ Eky’aha muheru, teekateeka aha ki Yesu yaagarukiremu Petero ahonaaho obu yaamugira ati: “Nikikabure, Mukama wangye.” Hatariho kubangaanisa Yesu akaba yaateekateekire munonga aha eki Ruhanga yaabaire naayenda ngu akore n’obunabi obwabaire nibumukwataho n’okufa kwe. Okumanya oku kukamuhwera kuguma ari omwesigwa aha Yehova n’okuhayo amagara ge nk’ekitambo ahabwaitu twena.​—Shoma Matayo 16:21-23.

¹⁸ Obunaku obu, Ruhanga naayenda ngu tube banywani be kandi tukore eki turikubaasa omu kubuurira amakuru marungi. (Matayo 6:33; 28:19, 20; Yakobo 4:8) Kwonka abamwe nibabaasa kutumaramu amaani batakigyendereire, nk’oku Petero yaagambiire Yesu. Nk’eky’okureeberaho, mukama waawe naabaasa kukwongyera sente aha murimo, kwonka noomanya ngu nikiija kukwetengyesa kwongyera aha shaaha ezi orikukora kikuremese kutunga obwire burikumara  bw’okuza omu nteerane nari kubuurira n’ekibiina. Nari ka tugire ngu abashomesa baawe aha ishomero baakuha omugisha gw’okushomera hare n’owaanyu kwongyera aha mishomo yaawe. Ekyo kyabaho, noija kushaba Yehova, ocondooze, kandi okigaaniireho n’ab’eka yaawe nari abareeberezi otakacwiremu? Ni kirungi kumanya oku Yehova arikureeba enshonga ezi hati, kandi okagira emiteekateekyere nk’eye. Bwanyima embeera nk’ezi zaakuhikaho, noobaasa kushanga ngu buzima tizirikubaasa kukureetera kwohibwa. Kureka noomanya kyenyine eki oine kukora ahakuba nooba waacwiremu kuguma otaire omutima aha kuheereza Yehova.

¹⁹ Noobaasa n’okuteekateeka aha mbeera ezindi ezirikubaasa kukuremesa kuhamira ahari Yehova. N’amazima titurikubaasa kwetebeekanisiza buri mbeera erikubaasa kubaho. Kwonka twata omutima aha miteekateekyere ya Yehova omu kweyegyesa kwaitu, nikibaasa kutuhwera kwijuka ebi twegire, tumanye n’oku turaabikorese omuri buri mbeera yoona. N’ahabw’ekyo twaba nitweyegyesa, ka tuteereho kwetegyereza oku Yehova arikureeba enshonga, tugire emiteekateekyere nk’eye, kandi tuteekateekye oku eki kirikwija kutuhwera kucwamu gye hati n’omu biro by’omumaisho.

20, 21. (a) Ahabw’enki turikwija kuguma twine obugabe bwaitu n’omu nsi ensya? (b) Nitubaasa kutunga tuta ebirungi hati?

²⁰ Buzima twiniire ensi ensya ekihika. Baingi ahariitwe twine amatsiko g’okutuura omu Paradiso omu nsi. Obukama bwa Ruhanga ku buraabe nibutegyeka, nitwija kugira obunanukye hatariho busaasi n’okubonabona ebiriho hati. Kandi nabwo nitwija kuba twine obugabe bw’okucwamu ebi turikukunda n’ebi turikwetenga.

²¹ Kwonka ekyo tikirikumanyisa ngu obugabe bwaitu nibwija kuba butaine bugarukiro. Abacureezi nabwo, nibaija kuba nibacwamu barikwegamira aha biragiro bya Yehova n’emiteekateekyere ye. Kandi eki nikiija kureeta okushemererwa n’obusingye bwingi. (Zaaburi 37:11) Ekyo kitakabaireho, na hati nitubaasa kutunga ebirungi twaguma twine emiteekateekyere nk’eya Yehova.