1, 2. (a) Niki eki orikukira kutwara nka kikuru munonga? (b) Ni mazima ki agu turikutwara nk’ag’omuhendo, kandi n’ahabw’enki? (Reeba ekishushani aha kutandika.)

NI KINTU ki eki orikukirayo kutwara nk’eky’omuhendo? Itwe abaheereza ba Yehova, eki turikukirayo kutwara nka kikuru n’omukago ogu twine nawe. Titurikwenda kuguguza ahabw’ekindi kintu kyona. Kandi amazima n’ag’omuhendo, ahakuba nigatubaasisa kuba banywani ba Yehova.​—Abakolosai 1:9, 10.

² Yehova Omwegyesa Orikukirayo, naatwegyesa amazima maingi g’omuhendo kurabira omu Kigambo kye Baibuli. Naatwegyesa obukuru bw’eiziina rye n’emitwarize ye mirungi munonga. Naatumanyisa ngu naatukunda munonga kuhika n’aha kuhayo Omwana we omwe nyamunegyere ahabwaitu. Yehova naatwegyesa aha Bukama bwa Mesia. Kandi naatuha n’amatsiko aha biro by’omumaisho, yaaba omu iguru ahabw’abashukirweho amajuta nari omu Paradiso omu nsi ‘ahabw’ab’entaama  ezindi.’ (Yohaana 10:16) Naatwegyesa oku tushemereire kutwaza. Nitureeba amazima aga nk’ag’omuhendo ahakuba nigatuhwera kwirira haihi n’Omuhangi waitu n’okugira ekigyendererwa aha biro by’omumaisho.

3. Mbwenu shi Yehova naatushaba kushashura sente kubaasa kwega amazima?

³ Yehova Ruhanga n’efura. Ah’abw’okuba efura akahayo Omwana we ahabwaitu. Yehova yaareeba omuntu arikusherura amazima, naamuhwera kugatunga. Tarikubaasa kutushaba kushashura sente kubaasa kwega amazima. Izooba rimwe, omushaija orikwetwa Simooni akaha entumwa Petero esente ngu atungye obushoboorozi bw’okuha abandi omwoyo gurikwera. Petero akamushoboororera ngu emiteekateekyere ye egwire kandi yaamugira ati: “Efeeza yaawe ebure naiwe, ahabw’okuba waateekateeka kugura ekiconco kya Ruhanga n’empiiha.” (Ebyakozirwe 8:18-20) Mbwenu shi nikimanyisa ki ‘okugura amazima’?

4. Omu kicweka eki, nituza kwega ki aha bikwatiraine n’amazima?

⁴ Shoma Enfumu 23:23. Nikitwetengyesa kutamu amaani kwega amazima ga Baibuli. Twine kureka ebintu ebindi kubaasa kugatunga. Kandi bwanyima ‘y’okugagura’ nari okugeega, titushemereire ‘kugaguza’ nari kugarugamu. Nitugura tuta amazima ga Baibuli? Nigagura zingahi? Eby’okugarukamu by’ebibuuzo ebi nibiija kutuhwera kwongyera kusiima amazima n’okumariirira kugagumamu. Kandi nitwija kwetegyereza ahabw’enki amazima agu Yehova arikutwegyesa garikukirira kimwe ebindi byona.

5, 6. (a) Nitubaasa kugura tuta amazima tutashashwire sente? Shoboorora. (b) Amazima nigatugasira gata?

⁵ Okugira ngu ekintu n’ekya busha tikirikumanyisa ngu toine kugira eki waakora. Ekigambo ky’Oruheburaayo ekirikuvunuurwa ‘nk’okugura’ ekiri omu Enfumu 23:23, nikibaasa n’okumanyisa “okutunga.” Ebigambo ebi byombi nibyoreka ngu omuntu aine kukoresa amaani nari kugira eki yaayefeerereza kubaasa kutunga ekintu eki arikutwara nka kikuru. Kubaasa kwetegyereza oku turikubaasa kugura amazima, ka tugire ngu omu katare nibagaba eminekye. Mbwenu shi eminekye egyo neija kwereeta eyete aha meeza? Ngaaha, twine kuza omu katare tukagireeta omuka. N’ahabw’ekyo n’obu eraabe eri eya busha, twine kutamu amaani tukazayo kugyakiira. Omu muringo nigwo gumwe, titwine kuhayo esente kwega amazima, kwonka twine kutamu amaani kandi tukagira ebi twayefeerereza.

⁶ Shoma Isaaya 55:1-3. Ebigambo bya Yehova nibituhwera kwetegyereza eki kirikumanyisa ‘okugura amazima.’ Omu mishororongo egi, Yehova naagyeragyeranisa ebigambo bye n’amaizi, amate, na viinyo. Nk’oku amaizi agarikufuka garikuruhuura omuntu oine eiriho, nikwo n’amazima garikuturuhuura. Nk’oku amate garikuhwera omwana kukura akahama, nikwo n’amazima ga Baibuli garikutuhwera kuhamya omukago gwaitu na Yehova. Kandi naagyeragyeranisa ebigambo bye na viinyo. Ahabw’enki? Baibuli neegira ngu viinyo neegwisa gye omutima. (Zaaburi 104:15) N’ahabw’ekyo Yehova ku arikutugambira “kugura viinyo,” naaba naatumanyisa ngu twakuratira obuhabuzi bwe, nitwija kutunga okushemererwa. (Zaaburi 19:8) Yehova naakoresa  okugyeragyeranisa oku kutuhwera kwetegyereza oku turikugasirwa twayega amazima kandi tukagagyenderaho. Hati ka tureebe ebintu bitaano ebi twine kwefeerereza nari kureka kubaasa ‘kugura amazima.’

7, 8. (a) Ahabw’enki nikyetengyesa kwefeerereza obwire kubaasa kwega amazima? (b) Omwegi omwe akeefeerereza ki, kandi hakarugamu ki?

⁷ Obwire. Nikitwara obwire omuntu kuhurikiza obutumwa bw’Obukama, kushoma Baibuli n’ebitabo ebirikugishoboorora, Abajurizi ba Yehova kumwegyesa Baibuli, okutebeekanisiza enteerane, n’okuzizamu. Kubaasa kukora ebi byona, twine kutuubya aha obwire obu turikuba nitukoreramu ebintu ebitari bikuru. (Shoma Abaefeso 5:15, 16.) Nikitwara obwire burikwingana ki kwega amazima agarikutandikirwaho? Obwire tiburikwingana kurugiirira aha mbeera y’omuntu. Tihariho bugarukiro omu kwega aha bwengye bwa Yehova, emitindo ye, n’ebintu ebi akozire. (Abarooma 11:33) Omunaara gw’Omurinzi ogwabandize kushohozibwa, gukagyeragyeranisa amazima n’ekimuri ekyesherekire, reero gwagira guti: “Toshemereire kumarwa n’ekimuri kimwe eky’amazima. Ku ogire ngu ekimuri kimwe eky’amazima nikimara, Ruhanga tiyakutuhaire amazima maingi. Yeyongyere kurundaana agandi n’okugasherura.” N’ahabw’ekyo nitubaasa kwebuuza tuti: ‘Nyegire birikwingana ki ebirikukwata ahari Yehova?’ N’obu twakugumaho ebiro byona, nihaija kuguma hariho ebintu bisya eby’okumwegaho. Obunaku obu, ni kikuru kukoresa gye obwire bwaitu kwega ebirikumukwataho nk’oku turikubaasa. Hariho eky’okureeberaho eky’omwe owaakikozire.

⁸ Mariko, * (reeba obugambo obw’ahansi) omunyeeto kuruga Japan akaza omuri United States omu rurembo New York kushomerayo. Izooba rimwe, munyaanyazi-itwe ori payoniya akaza owe yaamubuurira. Mariko akaba aine ediini ye, kwonka munyaanyazi-itwe ogwo akatandika kumwegyesa Baibuli. Akakunda munonga ebi yaayegire yaashaba munyaanyazi-itwe kumwegyesa Baibuli emirundi ebiri omu saabiiti. N’obu Mariko yaabaire naashoma kandi arikukora, akatandika kuza omu nteerane z’ekibiina ahonaaho. Akatuubya aha bwire obu yaabaire naakoresa omu by’okweshemeza kutunga obwire burikumara kwega amazima. Mariko ahabw’okwefeerereza ati, akeeyongyera kwirira haihi na Yehova, kandi akabatizibwa atakamazire mwaka arikwega. Bwanyima y’ameezi mukaaga, omu 2006 akaba payoniya, kandi na hati ni payoniya.

9, 10. (a) Okwega amazima nikuhindura kuta emiteekateekyere yaitu aha by’obugaiga? (b) Omwishiki omwe akeefeerereza ki, kandi naayehurira ata?

⁹ Eby’obugaiga. Kubaasa kwega amazima, obundi twine kwefeerereza emirimo y’esente nyingi nari egyo erikutureetera kuba abasinguzi omu nsi egi. Nk’eky’okureeberaho, entumwa Petero na Anderea bakaba bari abajubi, kwonka Yesu ku yaabeetsire  kumukuratira bakatsigaho omurimo gwabo baahinduka abakuratsi be. (Matayo 4:18-20) Eki tikirikumanyisa ngu waaheza kwega amazima, oine kutsigaho omurimo gwawe. Omuntu aine kukora kubaasa kureeberera eka ye. (1 Timoseo 5:8) Kwonka ku orikwega amazima, emiteekateekyere yaawe aha by’obugaiga neehinduka. Nooyetegyereza ekirikukirayo obukuru. Yesu akagira ati: “Mutaryebiikira eitungo omu nsi.” Kureka, akatuhiga ati: “Mwebiikire eitungo omu iguru.” (Matayo 6:19, 20) Eki nikyo omwishiki omwe orikwetwa Maria yaakozire.

¹⁰ Maria akaba naakunda kuzaana omuzaano gwa golofu kuruga omu buto. Ku yaahikire omu siniya, akaguma naayeyongyera kutunguuka omu muzaano ogu. Ahabw’okuzaana gye golofu akaheebwa omugisha gw’okushomera busha aha yunivasite. Maria akaba aine ekigyendererwa ky’okuba omuhangu omu kuzaana golofu kugira ngu atungye esente nyingi. Kwonka akatandika kwega Baibuli, yaakunda ebi yaayegire, kandi yaabigyenderaho. Naagira ati: “Ku naayongyeire kuhindura emiteekateekyere yangye n’emitwarize yangye kuhikaana n’emitindo ya Baibuli, nkeyongyera kushemererwa.” Maria akeetegyereza ngu nikiija kumugumira kuta omutima aha mukago gwe na Yehova n’omuzaano gwa golofu. (Matayo 6:24) N’ahabw’ekyo akacwamu kwefeerereza ekigyendererwa kye ky’okuba omuhangu omu kuzaana golofu, yaakora ekirikukirayo obukuru. Hati Maria ni payoniya, kandi naagira ngu aine “okushemererwa okurikukirayo, n’ekigyendererwa ekyabuzima.”

11. Ku turikwega amazima, niki ekirikubaasa kuhika aha mukago gwaitu n’abandi?

¹¹ Omukago gwaitu n’abandi. Ku turikutandika kugyendera aha bi turikwega omu Baibuli, omukago gwaitu na banywani baitu nari abanyabuzaare niguhinduka. Yesu akatuhwera kwetegyereza ahabw’enki eki nikibaho, obu yaashabira abakuratsi be ati: “Obeeze omu mazima; ekigambo kyawe nigo mazima.” (Yohaana 17:17) ‘Okweza’ nikubaasa kumanyisa “okutaanisa.” Ku turikutandika kuta omu nkora amazima agu turikwega, nitwetaanisa ah’ab’ensi, ahakuba itwe nituba nitukuratira emitindo ya Baibuli. N’obu twakuteeraho kuguma nitukwatanisa na banywani baitu nari abanyabuzaare, abamwe nibabaasa kutatukunda nk’omu kubanza, kandi nibabaasa kutakunda enyikiriza zaitu ensya. Eki tikirikututangaaza. Yesu akagira ati: “Abazigu b’omuntu baryaba ab’omu ka ye.” (Matayo 10:36) Kandi Yesu akaraganisa ngu byona ebi turikwefeerereza ahabw’amazima, nitwija kutunga ebirikukiriraho!​—Shoma Mako 10:28-30.

12. Omushaija omwe Omuyudaaya akeefeerereza ki ahabw’amazima?

¹² Omushaija Omuyudaaya orikwetwa Aaron akaba naikiriza ngu kigwire okwatura eiziina rya Ruhanga. Kwonka buzima akaba naayenda kumanya amazima agarikukwata ahari Ruhanga. Izooba rimwe, Omujurizi wa Yehova akamworeka ngu yaayongyeramu engambisa omu nyuguta ina  ez’Oruheburaayo enteta ez’eiziina rya Ruhanga, niribaasa kwaturwa nka “Yehova.” Aaron akashemererwa kwega eki, kandi yaaza omu sinagogi kugambira abeegyesa ba sinagogi! Akaba naateekateeka ngu nibaija kushemererwa kwega amazima agarikukwata ah’eiziina rya Ruhanga, kwonka tikirabashemeize. Omu mwanya gw’ekyo, bakamucwera amacwante kandi baamubinga. N’ab’omu ka ye bakamwehindukana. Kwonka taraikiriize eki kumuremesa kwongyera kwega ahari Yehova. Aaron akaba omwe aha Bajurizi ba Yehova kandi yaagumizamu naaheereza Yehova ebiro byona eby’amagara ge. Naitwe twine kumanya ngu omukago gwaitu n’abandi nigubaasa kuhinduka bwanyima y’okwega amazima.

13, 14. Ni mpindahinduka ki ezi twine kukora omu mitwarize yaitu n’oku turikuteekateeka bwanyima y’okwega amazima? Ha eky’okureeberaho.

¹³ Emiteekateekyere n’ebikorwa bibi. Ku turikwega amazima kandi tukagyendera aha mitindo ya Baibuli, twine kuba tweteekateekire kuhindura aha miteekateekyere yaitu n’emitwarize yaitu. Entumwa Petero akahandiika ati: “Mube nk’abaana abarikuhurira, mutashushanisibwa nk’oku mwabaire muri, nimukurata okwetenga okubi omu butamanya bwanyu obwa ira.” Reero akoongyeraho ati: “Naimwe mube nikwo mwaba abarikwera omu micwe yaanyu yoona.” (1 Petero 1:14, 15) Omu rurembo Korinso orwa ira, abantu baingi bakaba bari enshambani. Abo abaabaire nibatuura omu rurembo orwo, bakaba baine kukora empindahinduka z’amaani kubaasa kuba abashemeire omu maisho ga Yehova. (1 Abakorinso 6:9-11) N’omu bunaku obu, baingi nibakora empindahinduka nizo zimwe bwanyima y’okwega amazima. Entumwa Petero akakishoboororaho obu yaahandiika ati: “Ebiro ebyahingwire bimare, ebi mwakoreiremu ebi abanyamahanga bakunda, okugyendera omu micwe mibi ey’obushambani, n’okwetenga okubi, n’obusinzi n’okuraara enkyera, n’okunywa amaarwa maingi, n’emizizo mibi ey’okuramya ebishushani.”​—1 Petero 4:3.

¹⁴ Devynn na Jasmine bakaba bari abasinzi kumara emyaka mingi. N’obu Devynn yaabaire atendekirwe gye omu murimo gw’okubariirira ebitabo, akaba atarikubaasa kurinda omurimo ogwo ahabw’obusinzi. Kandi Jasmine akaba naamanywa nk’omuntu oine ekiniga kingi kandi omushaarizi. Izooba rimwe, obu yaabaire asinzire akabugana Abajurizi ba Yehova babiri abamiisani aha ruguto. Bakamushaba kumwegyesa Baibuli. Abamiisani ku baagiire owa Jasmine na Devynn saabiiti eyaakuratsireho, bakashanga basinzire. Bakaba nibateekateeka ngu abamiisani abo tibarikwija kufayo kuza owaabo. Omurundi ogundi abamiisani ku baagarukire, bakashanga Jasmine na Devynn bari ab’omutaano. Bakaba baine ekihika ky’okwega amazima ga Baibuli, kandi ahonaaho bakatandika kugyendera aha bi barikwega. Omu meezi nk’ashatu bakarekyera aho okunywa amaarwa, kandi bwanyima bashemeza obushwere bwabo. Abantu baingi omu kyaro kya Jasmine na Devynn bakareeba empindahinduka ezi baakozire, kandi nabo bakatandika kwega Baibuli.

15. Emwe aha mpindahinduka ezigumire kukora ahabw’amazima neeha, kandi n’ahabw’enki?

¹⁵ Emigyenzo n’emikoro etarikushemeza Ruhanga. Emwe aha mpindahinduka ezigumire kukora n’okurekyera aho kwejumba omu migyenzo n’emikoro etarikushemeza Yehova. Nangwa na bwanyima y’okumanya oku Yehova arikwehurira aha migyenzo n’emikoro emwe, abamwe nikibagumira  kurekyera aho kugyejumbamu. Nibeerarikirira oku abanyabuzaare, abu barikukora n’abo, nari banywani baabo baraabatwarize. Nibamanya ngu abantu abamwe nibakira kutwara emigyenzo emwe nk’ey’omuhendo, nk’ey’okuha abafu ekitiinisa. (Eky’Ebiragiro 14:1) Mbwenu shi niki ekirikubaasa kutuhwera kukora empindahinduka ezirikwetengyesa? Nitubaasa kwegyera aha Abakristaayo ba ira omuri Efeso, abaakozire empindahinduka baaheza kwega amazima.

16. Abakristaayo b’omuri Efeso bakeefeerereza ki?

¹⁶ Omu rurembo Efeso orwa ira, abantu bakaba nibakira kukora eby’emiguruko. Abo abaabaire nibeejumba omu bikorwa ebyo, bakakora ki ku baahindukire Abakristaayo? Baibuli neeshoboorora eti: “Baingi aharibo abaabaire bakora eby’obufumu baateeranira hamwe ebitabo byabo, eby’okuragura babyokyeza omu maisho g’abantu boona; baabibariirira obuguzi bwabyo baashanga nibuhika ebicweka by’efeeza obukumi butaano. Okwo nikwo ekigambo kya Mukama kyayeyongyeire kityo amaani, kikasingura.” (Ebyakozirwe 19:19, 20) Abakristaayo abo abeesigwa bakaba beeteekateekire kwefeerereza ebitabo byabo by’obuguzi bwingi, kandi Yehova akabaha emigisha ahabw’okukora ekyo.

17. (a) Ni bintu ki ebi turikubaasa kuba twarekire ahabw’amazima? (b) Nitwija kugarukamu bibuuzo ki omu kicweka ekirikukurataho?

¹⁷ Obaasize kwefeerereza ki kwega amazima? Baingi ahariitwe tuhaireyo obwire bwaitu. Tukatsigaho emigisha y’okuba abagaiga. Kandi oku turikukwatanisa n’abandi nikubaasa kuba kuhindukire. Baingi ahariitwe tuhindwire emiteekateekyere n’emitwarize yaitu, kandi twareka kwejumba omu migyenzo n’emikoro etarikushemeza Yehova. Nituhamiza kimwe ngu amazima ga Baibuli nigakirira kimwe ekintu kyona eki twefeerereize. Amazima aga nigatubaasisa kwirira haihi na Yehova, kandi nikyo kirikukirayo obukuru. Ku turikuteekateeka aha migisha yoona ei tutungire ahabw’amazima, nikitugumira kwetegyereza ahabw’enki omuntu ‘naagaguza.’ Ekyo nikibaasa kubaho kita? Kandi nitubaasa kwetantara tuta kukora enshobi nk’egyo? Nitwija kugarukamu ebibuuzo ebyo omu kicweka ekirikukurataho.